Өз руһани тәләбатларыны неҹә тә’мин едә биләрсән?

“СОН он ил әрзиндә китаб мағазаларынын рәфләри — “Иса баш директор кими” адлы китабдан тутмуш, “Рәһбәрин Даосу” китабына гәдәр — 300-дән чох китаб адлары илә рәнҝарәнҝдир” дејә, “Јунајтед Стејтс нјус енд уорлд рипорт” журналында гејд олунур. Бу вәзијјәт садәҹә олараг она шәһадәт едир ки, бир чох чичәкләнән өлкәләрдә инсанлар һәјатларында даһа чох руһани рәһбәрлик алмаг истәјирләр. Бир ишҝүзар журналын бу мәсәләјә даир шәрһиндә гејд олунурду: “Һәјатымызын һәр бир саһәсини технолоҝијанын идарә етдији бир дөврдә, биз һәјатын мә’насыны, мәгсәдини даһа дәриндән баша дүшмәјә вә мәмнунлуг һисси әлдә етмәјә ҹан атырыг” (“Training & Development”).

Бәс мәмнунедиҹи руһани рәһбәрлији һарадан тапмаг олар? Кечмишдә инсанлар “һәјатын мә’насыны даһа дәриндән баша дүшмәјә” чалышараг көмәк алмаг мәгсәдилә динә мүраҹиәт едирдиләр. Бу ҝүн чохлары дини инкар едир. “Training & Development” журналына әсасән, 90 нәфәр администратор вә вәзифәли шәхсләр арасында кечирилән сорғу ҝөстәрмишдир ки, “инсанлар динлә руһанилик арасында ајдын фәрг гојурлар”. Сорғунун иштиракчылары дини — “дөзүмсүзлүк вә әдавәтлә”, руһанилији исә “үмумилик вә һәмрә’јликлә” әлагәләндирирдиләр.

Динин мәшһур һесаб олунмадығы Австралија, Бөјүк Британија, Јени Зеландија вә Авропа кими өлкәләрдә бир чох ҝәнҹ оғлан вә гызлар да һәмчинин һесаб едирләр ки, дин вә руһанилик фәргли шејләрдир. Профессор Рут Уеббер иддиа едир: “Ҝәнҹ оғлан вә гызларын әксәријјәти Аллаһа вә ја фөвгәлтәбии гүввәјә инанырлар, лакин онлар килсәнин ваҹиб олдуғуну вә ја онлара руһани тәләбатларыны ҝерчәкләшдирмәкдә көмәк етмәјә гадир олдуғуну дүшүнмүрләр” (“Youth Studies Australia”).

Һәгиги дин руһанилијә көмәк едир

Динә гаршы бу ҹүр шүбһәли мүнасибәт тамамилә ајдындыр. Бир чох дини тәшкилатлар әхлаг мәсәләсиндә сијаси интригалар вә икиүзлүлүк чиркабына гәрг олмуш, һәмчинин өзләрини әслиндә динин сәбәб олдуғу сајсыз-һесабсыз мүһарибә гурбанларынын ганы илә ләкәләмишләр. Лакин бә’зиләри икиүзлүлүк вә јалан ичиндә батыб галмыш дини инкар етмәклә, Мүгәддәс Китабын бу ҹүр һәрәкәтләри дәстәкләдијини ҝүман едәрәк, ону да инкар етмәклә сәһвә јол верирләр.

Әслиндә исә Мүгәддәс Китаб икиүзлүлүјү вә фәсады мүһакимә едир. Иса өз ҝүнләринин дин рәһбәрләринә демишдир: “Вај һалыныза, дин алимләри вә фәрисејләр, икиүзлүләр! Чүнки сиз ағардылмыш мәгбәрәләрә бәнзәјирсиниз: чөлү ҝөзәл ҝөрүнүр, ичи исә өлү сүмүкләри вә һәр ҹүр мурдарлыгла долудур. Сиз дә беләҹә инсанлара заһирән салеһ ҝөрүнүрсүнүз, дахилән исә икиүзлүлүк вә фәсадла долусунуз” (Матта 23:27, 28).

Бундан әлавә, Мүгәддәс Китаб мәсиһчиләри бүтүн сијаси ишләрдә битәрәфлији горумаға тәшвиг едир. Мүгәддәс Китаб иманлылары бир-бирләрини өлдүрмәјә тәшвиг етмәк әвәзинә, бир-бирләри уғрунда өлмәјә һазыр олмағы бујурур (Јәһја 15:12, 13; 18:36; 1 Јәһја 3:10-12). Мүгәддәс Китаба әсасланан һәгиги дин “дөзүмсүзлүк вә әдавәт” тохуму сәпмир, әксинә, “бирлијин” олмасына көмәк едир. Һәвари Петер демишдир: “Аллаһ инсанларын кимлијинә бахмаз. Амма һәр халгдан олуб, Ондан горхан вә һагг иш ҝөрән Она мәгбулдур” (Һәвариләрин ишләри 10:34, 35).

Мүгәддәс Китаб руһани сағламлыг газанмаға көмәк едир

Мүгәддәс Китабда дејилир ки, инсанлар Аллаһын бәнзәриндә јарадылыб (Тәквин 1:26, 27). Бу, онларын заһирән Аллаһа бәнзәдикләри демәк дејил, бу о демәкдир ки, онлар руһани шејләрә, јә’ни руһанилијә гаршы мејли дә дахил етмәклә, Аллаһын кејфијјәтләрини әкс етдирә биләрләр.

Әҝәр бу беләдирсә, онда Аллаһын бизим руһани тәләбатларымызы өдәмәк үчүн васитә, һәмчинин фајдалы шејләри руһани вәзијјәтимиз үчүн зәрәрли олан шејләрдән ајырд едә билмәмиз үчүн лазыми рәһбәрлик тәгдим едәҹәјини дүшүнмәк мәнтигидир. Аллаһ бизи хәстәликләрлә мүбаризә апаран вә сағламлығымызы горумагда бизә көмәк едән ҝөзәл иммун системи илә јаратдығы кими, еләҹә дә О, бизә дүзҝүн гәрарлар гәбул етмәјә вә бизим физики вә ја руһани сағламлығымыза зәрәр ҝәтирән һәрәкәтләрдән гачынмаға көмәк едән виҹдан, јә’ни дахили сәс вермишдир (Ромалылара 2:14, 15). Мә’лумдур ки, иммун системимизин ишләмәси үчүн дүзҝүн шәкилдә гидаланмаг лазымдыр. Бунун кими виҹданы да кејфијјәтли руһани гида илә тә’мин етмәк лазымдыр.

Иса бизим руһани сағламлығымыз үчүн фајдалы олан гида һаггында белә демишдир: “Инсан јалныз чөрәклә јашамаз, лакин Аллаһын ағзындан чыхан һәр бир сөзлә јашар” (Матта 4:4). Јеһованын сөзләри Мүгәддәс Китабда јазылмышдыр вә онлар “тә’лим, тәкзиб, ислаһ... үчүн фајдалыдыр” (2 Тимотејә 3:16). Бизә исә бу руһани гиданы јалныз ҝөтүрмәк галыр. Биз, Мүгәддәс Китабы нә гәдәр дәриндән баша дүшүр вә онун принсипләрини һәјатымыза кечиририксә, бир о гәдәр дә һәм руһани, һәм дә физики ҹәһәтдән мүвәффәгијјәт әлдә етмиш олуруг (Ишаја 48:17, 18).

Сә’ј ҝөстәрмәјә дәјәрми?

Доғрудур, Мүгәддәс Китабы өјрәнәрәк руһани сағламлығымызы јахшылашдырмаг үчүн вахт тәләб олунур, вахт исә бу ҝүн фаҹиәви сурәтдә чатышмыр. Анҹаг нәтиҹә ҝөстәрилән сә’јә дәјәр! Ҝәлин, чох мәшғул олан бир нечә сәнәт адамынын сөзләринә диггәт јетирәк, онлар өз руһани ­сағламлыгларына гајғы ҝөстәрмәк үчүн вахт ајырмағы нәјә ҝөрә ваҹиб сајдыгларыны изаһ едирләр.

Марина (һәким) дејир: “Мән хәстәханада ишләмәјә башлајыб, башгаларынын ағрыларыны дујмајынҹа, өз руһани вәзијјәтим барәдә һеч вахт дүшүнмүрдүм. Мән о заман анладым ки, әмин-аманлыг дујмаг үчүн, мәнә өз руһани тәләбатларымы е’тираф етмәк вә онлары өдәмәк лазымдыр. Чүнки һәјат ритми вә даима башгаларына гајғы ҝөстәрмәк зәрурәти, бизим сәнәтин адамларыны руһдан сала биләр.

Инди мән Мүгәддәс Китабы Јеһованын Шаһидләри илә өјрәнирәм. Өјрәнмә мәнә өз һәрәкәт вә мәгсәдләрими сәмәрәли сурәтдә анализ етмәјә көмәк едир вә даһа чох мүсбәт ҹәһәтдән дүшүнмәјә өјрәдир, бу сәбәбдән мән һәјата олан таразлы нөгтеји-нәзәри горујуб сахлаја билирәм. Мән өз ишимдән чох мәмнунам. Анҹаг мәним емосионал вәзијјәтим Мүгәддәс Китабы өјрәнмәјин сајәсиндә јахшылашыб, о мәнә мәнфи һиссләрими ҹиловламағы, ҝәрҝинлијин өһдәсиндән ҝәлмәји вә инсанлара гаршы даһа сәбирли вә шәфгәтли олмағы өјрәтди. Мүгәддәс Китаб принсипләринә риајәт етмәјим, мәнә аилә һәјатымда да көмәк едир. Ән ваҹиби исә одур ки, мән Јеһованы таныјыр вә һәмишә Онун руһунун тә’сирини һисс едирәм, бу исә мәним һәјатымы даһа да мә’налы едир”.

Николас (мүһәндис) дејир: “Мән Мүгәддәс Китабы Јеһованын Шаһидләри илә өјрәнмәздән әввәл руһани шејләрә мараг ҝөстәрмирдим. Мән һәјатда јалныз бир шеј — мүвәффәгијјәтли карјера гурмаг истәјирдим. Мүгәддәс Китабы өјрәнмәјин сајәсиндә ҝөрдүм ки, һәјатын мә’насы јалныз бундан ибарәт дејил вә Јеһованын ирадәсини јеринә јетирмәк әсл вә сонсуз хошбәхтлик ҝәтирир.

Сәнәтим, сөзсүз ки, мәнә өзүмү хошбәхт һисс етмәјимә көмәк едир, лакин әсас диггәти руһани шејләрә ајырараг, садә һәјат сүрмәјин ваҹиблијини мәнә јалныз Мүгәддәс Китаб өјрәтди. Бу принсипи тәтбиг едәрәк, арвадымла мән вар-дөвләт һәрислијинин ҝәтирдији мә’јуслугдан гачынмышыг. Һәјата бизим кими руһани нөгтеји-нәзәрлә бахан инсанларла үнсијјәт етмәклә, биз чохлу әсл достлар газанмышыг”.

Винсент (вәкил) сөјләјир: “Мүвәффәгијјәтли кар­јера мүәјјән дәрәҹәдә хошбәхтлик ҝәтирә биләр. Лакин мән ашкар еләдим ки, там хошбәхтлик вә мәмнунлуг үчүн бу кифајәт дејил. Јадымдадыр ки, хошбәхтлик һаггында Мүгәддәс Китабда нә дејилдијини өјрәнмәздән әввәл, һәјатын там мә’насызлығындан чашыб галмышдым: инсан доғулур, бөјүјүр, аилә гурур, ушагларыны тә’мин етмәк үчүн ишләјир, онлар да онун һәјатыны ејнилә тәкрар еләсинләр дејә, онлара тәрбијә верир вә нәһајәт гоҹалыр вә өлүр.

Јалныз Мүгәддәс Китабы Јеһованын Шаһидләри илә өјрәнмәклә, мән һәјатын мә’насы һаггында суалларыма ҹаваб алдым. Мән өјрәнмәнин васитәсилә Јеһованы бир шәхсијјәт кими таныдым вә мәндә Она гаршы дәрин мәһәббәт һисси ојанды. Бунун сајәсиндә мән Аллаһын ирадәсинә ујғун јашамаға сә’ј ҝөстәрәрәк, дүнјаја олан сағлам руһани нөгтеји-нәзәрими горујуб сахлаја билирәм. Һәјат јолдашымла мән там мә’нада шүурлу һәјат сүрдүјүмүз үчүн мәмнунлуг дујуруг”.

Мүгәддәс Китабы өјрәнмәклә сиз дә һәјатын мә’насыны дәрк едә биләҹәксиниз. Јеһованын Шаһидләри сизә көмәк етмәјә шад олаҹаглар. Әҝәр Јеһова һаггында вә Онун бүтүн бәшәријјәт үчүн вә шәхсән сизин үчүн олан нијјәтләри һаггында өјрәнсәниз, Марина, Николас вә Винсент кими, сиз дә мәмнунлуг дујаҹагсыныз. Сиз руһани тәләбатларынызын өдәнилдији үчүн нәинки инди севинҹ һисси дујаҹаг, һәмчинин мүкәммәл сағламлыға малик олмаг шәртилә јер үзүндә әбәди вә хошбәхт јашамаг үмидинә малик олаҹагсыныз. Бу үмид јалныз өз “руһани тәләбатларыны дәрк едәнләр”ә верилир (Матта 5:3, ЈД).

[6-ҹы сәһифәдәки шәкилләр]

Марина

[7-ҹи сәһифәдәки шәкилләр]

Николас

[7-ҹи сәһифәдәки шәкилләр]

Винсент