Руһани шејләрә мејил вә сизин рифаһыныз
ЕҺТИМАЛ КИ, сиз физики сағламлығыныза кифајәт гәдәр вахт ајырырсыныз. Јәгин ки, һәр ҝүн сәккиз саата јахын јатыр, бир нечә саат јемәк һазырламаға вә гидаланмаға сәрф едир, һәмчинин өзүнүзү мәнзил вә гида илә тә’мин етмәк үчүн ҝүндә сәккиз саат вә ја даһа артыг ишләјирсиниз. Хәстәләндикдә, ола билсин, һәкимә ҝетмәк вә ја ев шәраитиндә мүалиҹә олунмаг үчүн вахт вә вәсаит сәрф едирсиниз. Мәнзилинизи јығышдырыр, јујунур вә еһтимал ки, һәтта идманла мәшғул олурсунуз — бүтүн бунларын һамысы јахшы сағламлығы горујуб сахламаг наминә едилир.
Лакин јахшы сағламлыг јалныз физики тәләбатларын өдәнилмәсиндән асылы дејил. Сағламлығынызда ваҹиб рол ојнајан бир шеј дә вардыр. Тибби арашдырмалар ҝөстәрмишдир ки, физики сағламлыг бирбаша руһани сағламлыгдан, јә’ни инсанын руһанилијиндән асылыдыр.
Сых әлагә
Мелбурн Университетинин (Австралија) профессору Һедли Пич дејир: “Бу мәсәләнин мүзакирә олундуғу арашдырма ишләринин әксәријјәтиндә јүксәк руһаниликлә јахшы сағламлыг арасында сых әлагә мүшаһидә олунур”. Бу арашдырмаларла әлагәдар “Австралијанын тибб журналы”нда дејилирди: “Диндар инсанлар да... зәиф ган тәзјиги, холестерин дәрәҹәси... вә һәтта јоғун бағырсагда хәрчәнҝ хәстәлијинин әмәлә ҝәлмәси тәһлүкәси илә гаршылашырлар”.
Буна бәнзәр тәрздә, 2002-ҹи илдә Берклидәки Калифорнија Университети тәрәфиндән кечирилән 6 545 америкалынын мүајинәси заманы ашкар олмушдур ки, “өлүм тәһлүкәси һәфтәдә бир дәфә дини хидмәтләрдә иштирак едән кәсләрдә бу ҹүр хидмәтләрдә даһа аз вә ја үмумијјәтлә иштирак етмәјәнләрдән әһәмијјәтли дәрәҹәдә аз олур”. Мүајинәләрә рәһбәрлик едән вә Берклидәки Калифорнија Университетинин сәһијјә факултәсиндә мүәллим ишләјән Даг Оман демишдир: “Сосиал әлагәләрә, сигарет чәкмәји вә идманла мәшғул олмағы да дахил етмәклә, сағламлыға тә’сир едән вәрдишләрин олуб-олмамасы кими амилләрә дүзәлиш едилсә белә, бу фәрг олдуғу кими галмагдадыр”.
Дүнјаја руһани нөгтеји-нәзәрлә баханларын һәјатларындакы әлавә мүсбәт ҹәһәтләр барәдә “Австралијанын тибб журналы”нда дејилир: “Австралијада апарылан тәдгигатлар ҝөстәрмишдир ки, диндар адамларын никаһлары даһа мөһкәм олур, спиртли ичкиләрдән вә наркотикдән суи-истифадә, суи-гәсд һаллары чох аз вә она гаршы мүнасибәт олдугҹа мәнфи олур, нараһатчылыг вә депрессија һаллары аз вә алтуризм (башгаларына тәмәннасыз јардым етмәјә һазыр олма) исә јүксәкдир”. Бундан әлавә “Британија тибб журналы”нда дејилир: “Даһа мөһкәм имана малик олан инсанлар әзиз адамын өлүмүндән сонра гәм-гүссәнин өһдәсиндән, санки даһа тез вә јахшы ҝәлирләр, нәинки имана малик олмајанлар”.
Әсл руһанилијин нә олдуғуна даир мүхтәлиф нөгтеји-нәзәрләр мөвҹуддур. Бунунла белә руһани вәзијјәт физики вә руһи сағламлыға тә’сир ҝөстәрир. Бу, тәхминән 2000 ил бундан әввәл Иса Мәсиһин дедији сөзләрә ујғун ҝәлир. О демишдир: “Өзләринин руһани тәләбатларыны дәрк едәнләр хошбәхтдирләр” (Матта 5:3, ЈД). Сағламлыг вә хошбәхтлик инсанын руһани вәзијјәтилә мүәјјән едилдији үчүн, суаллар јараныр: “Е’тибарлы руһани рәһбәрлији һарадан тапмаг олар? Вә руһани инсан олмаг нә демәкдир?”