Әдавәтли дүнјада хејирхаһлыг ҝөстәрмәјә чалышын
“Инсаны истәдән онун лүтфкарлығыдыр [“севҝи долу хејирхаһлығыдыр”, ЈД]” (СҮЛЕЈМАНЫН МӘСӘЛЛӘРИ 19:22).
1. Хејирхаһлыг тәзаһүр етдирмәк нәјә ҝөрә чәтиндир?
ӨЗҮНҮ хејрихаһ инсан һесаб едирсәнми? Әҝәр беләдирсә, онда буҝүнкү дүнјада јашамаг сәнин үчүн чәтин ола биләр. Әслиндә Мүгәддәс Китаба әсасән, хејирхаһлыг руһун сәмәрәсинә дахилдир. Белә исә бәс нәјә ҝөрә хејирхаһлығы һәтта Христиан дөвләтләриндә белә тәзаһүр етдирмәк чәтиндир? (Галатијалылара 5:22). Әввәлки мәгаләдә гејд олундуғу кими, сәбәбләрдән бирини һәвари Јәһја ҝөстәрир. Бу сәбәб ондан ибарәтдир ки, бүтүн дүнја Шејтан Иблис адланан аҹыглы руһани шәхсијјәтин һакимијјәти алтындадыр (1 Јәһја 5:19). Иса Мәсиһ Шејтаны “дүнјанын рәиси” адландырды (Јәһја 14:30). Беләликлә, дүнја үсјанчы вә гәддар һөкмдарынын кејфијјәтләрини тәглид етмәјә мејл едир (Ефеслиләрә 2:2).
2. Хејирхаһлығы тәзаһүр етдирмәк хүсусилә дә нәјә ҝөрә чәтин олур?
2 Бизи әһатә едән инсанларын сәрт давранышлары бизә пис тә’сир ҝөстәрир. Аҹыглы давраныш һиддәтли гоншулар, сәмими олмајан јад адамлар, һәтта бә’зән нәји исә дүшүнмәдән едән достлар вә аилә үзвләри тәрәфиндән тәзаһүр олуна биләр. Бир-биринин үстүнә гышгыран вә бир-биринә сөјүш јағдыран инсанларла тәмасда оланда ҝәрҝинлик һисс едә биләрик. Башгалары тәрәфиндән хејирхаһлығын чатышмамазлығы бизи дә сәртләшдирә вә пислијә писликлә ҹаваб вермәјә мејлли едә биләр. Бу исә бизим руһани вә физики сағламлығымыза чох пис тә’сир едә биләр (Ромалылара 12:17).
3. Һансы ҹидди проблемләр инсанларда хејирхаһлыг етмәк арзусуну боғур?
3 Дүнјадакы ҝәрҝин вәзијјәтә ҝөрә дә хејирхаһлыг тәзаһүр етдирмәк бизим үчүн чәтин ола биләр. Мәсәлән, инсанлар үмумиликдә террор актлары вә террорчулара ҝөрә һәјәҹан кечирир, һәм дә һансыса милли груплашмаларын биоложи вә ја нүвә силаһларындан истифадә едә биләҹәјиндән горхурлар. Бундан әлавә, милјонларла инсанлар пис вәзијјәтдә олан дахмаларда јашајараг, минимум гидаја, ҝејимә вә тибби гајғыја малик олараг јохсуллуг ичиндәдирләр. Вәзијјәт үмидсиз ҝөрүнәндә хејирхаһлыг етмәк чох чәтин олур (Ваиз 7:7).
4. Бә’зиләри башгаларына хејирхаһлыг тәзаһүр етдирмәјә даир һансы јанлыш нәтиҹәјә ҝәлирләр?
4 Ким исә асанлыгла белә бир гәнаәтә ҝәлә биләр ки, хејирхаһлыг тәзаһүр етдирмәк үстүнлүк дејил, һәтта зәифлик әламәтидир. Белә адам, хүсусилә дә башгалары онунла кобуд вә әдаләтсиз даврананда, хејирхаһлығындан суи-истифадә едилдијини дүшүнә биләр (Мәзмур 73:2-9). Лакин Мүгәддәс Китаб бизә дүзҝүн рәһбәрлик верир: “Һәлим ҹаваб һирси јатырар, сәрт сөз гәзәби аловландырар” (Сүлејманын мәсәлләри 15:1, МКШ). Һәлимлик вә хејирхаһлыг руһун сәмәрәсини тәшкил едән кејфијјәтләрдән икисидир вә бир-бири илә сых бағлыдыр, һәм дә чәтин вә ҝәрҝин вәзијјәтләрдә чох фајдалыдыр.
5. Һәјатын хејирхаһлыг тәзаһүр етдирилмәси ваҹиб олан саһәләриндән бә’зиләри һансылардыр?
5 Мәсиһчиләр кими бизә Аллаһын мүгәддәс руһунун сәмәрәсини тәзаһүр етдирмәк чох ваҹиб олдуғуна ҝөрә, бу кејфијјәтләрдән бири олан хејирхаһлығы неҹә тәзаһүр етдирмәји нәзәрдән кечирмәк ҝәрәкдир. Әдавәтли дүнјада хејирхаһлыг тәзаһүр етдирмәк мүмкүндүрмү? Әҝәр беләдирсә, онда һансы үсулларла ҝөстәрә биләрик ки, Шејтанын тә’сиринин, хүсусилә дә ҝәрҝин вәзијјәтләрдә бизим хејирхаһ олмаг арзумузу зәифләтмәсинә јол вермирик? Ҝәлин аиләдә, ишдә вә мәктәбдә, гоншуларла мүнасибәтдә, хидмәтимиздә вә һәмиманлыларымызла мүнасибәтдә хејирхаһлығы неҹә тәзаһүр етдирә биләҹәјимизи мүзакирә едәк.
Аиләдә хејирхаһлыг
6. Аиләдә хејирхаһлыг нәјә ҝөрә белә ваҹибдир вә ону неҹә тәзаһүр етдирмәк олар?
6 Јеһованын хејир-дуасыны вә рәһбәрлијини әлдә етмәк үчүн, руһун сәмәрәсини бүтүнлүклә јетишдирмәк олдугҹа ваҹибдир (Ефеслиләрә 4:32). Ҝәлин әввәлҹә аилә үзвләринин бир-бирләринә хејирхаһлыг ҝөстәрмәләринин ваҹиблијиндән данышаг. Ҝүндәлик һәјатда әр вә арвада бир-бири илә вә ушагларла давранышда хејирхаһлыг тәзаһүр етдирмәк лазымдыр (Ефеслиләрә 5:28-33; 6:1, 2). Бу ҹүр хејирхаһлыг аилә үзвләринин бир-бири илә сөһбәтләриндә нәзәрә чарпмалыдыр: ушаглар валидејнләринә итаәт едиб, һөрмәт бәсләмәлидирләр, валидејнләр исә ушагларла мүнасиб тәрздә давранмалыдырлар. Тә’рифләмәјә ҹәлд, тәнбеһ етмәјә ләнҝ олмаг лазымдыр.
7, 8. а) Әҝәр аилә дахилиндә һәгиги хејирхаһлыг тәзаһүр етдирмәк истәјириксә, һансы давранышдан гачаҹағыг? б) Јахшы үнсијјәт аилә телләрини неҹә мөһкәмләдир? ҹ) Бәс сиз аиләниздә хејирхаһлығы неҹә тәзаһүр етдирә биләрсиниз?
7 Аилә үзвләринә мүнасибәтдә хејирхаһ олмаг, һәвари Павелин нәсиһәтинә риајәт етмәк демәкдир: “Гәзәб, һиддәт, кин, ифтира, ағзыныздан чыхан әдәбсиз сөзләр кими шејләрин һамысыны бир јана гојун”. Мәсиһчи аиләсинин үзвләри бир-бири илә һәр ҝүн һөрмәтлә үнсијјәт етмәлидирләр. Нәјә ҝөрә? Чүнки јахшы үнсијјәт олмадан аиләни ҝүҹлү вә сағлам тәсәввүр етмәк мүмкүн дејил. Фикир ајрылығы јарананда, зиддијјәти арадан галдырмаг үчүн мүбаһисәдә галиб ҝәлмәк әвәзинә, проблеми һәлл етмәјә чалышын. Аиләнин хошбәхт үзвләри бир-биринә мүнасибәтдә хејирхаһ вә диггәтли олмаг үчүн бүтүн гүввәләрини сәрф едирләр (Колослулара 3:8, 12-14).
8 Хејирхаһлыг мүсбәт кејфијјәтдир вә биздә инсанлара јахшылыг етмәк истәји ојадыр. Буна ҝөрә дә, биз аилә үзвләримизин хошуна ҝәләҹәк бир тәрздә давранараг, фајдалы, диггәтли олмаға чалышырыг. Аилә өзүнүн хејирхаһлығы илә танынсын дејә, һамынын бирликдә вә һәр кәсин ајрылыгда сә’ји тәләб олунур. Нәтиҹәдә бу ҹүр аилә Аллаһын хејир-дуасыны алаҹаг, һәм дә хејирхаһлыг Аллаһы олан Јеһоваја јығынҹагда вә гоншулар арасында иззәт верәҹәк (1 Петер 2:12).
Ишдә хејирхаһлыг
9, 10. Иш јериндә һансы проблемләрин јарана биләҹәји вә буну хејирхаһлыгла неҹә һәлл етмәјә сә’ј ҝөстәрмәјин үсулу барәдә данышын.
9 Ҝүндәлик иш шәраитиндә иш јолдашларына хејирхаһлыг тәзаһүр етдирмәк бә’зән мәсиһчи үчүн сынаға чеврилә биләр. Иш јолдашларындан ким исә пахыллыг едәрәк һијләҝәрликлә мүдиријјәт гаршысында өз иш јолдашыны нүфуздан сала биләр, буна ҝөрә дә һәмин кәс ишини итирә биләр (Ваиз 4:4). Белә һалларда хејирхаһлығы горујуб сахламаг асан дејил. Буна бахмајараг, Јеһованын хидмәтчиси әксәр һалларда хејирхаһлыгла давранмағын јахшы олдуғуну хатырлајараг, имкан дахилиндә чәтин јола ҝәлән адамын рәғбәтини газанмаға чалышмалыдыр. Буну етмәкдә һәссаслыг вә гајғыкешлик көмәк едәр. Иш јолдашын вә ја онун аилә үзвләриндән ким исә хәстәләнәрсә, еһтимал ки, сән нараһат олдуғуну ҝөстәрә биләрсән. Һәтта онларын сағламлығы барәдә сорушмағын мүсбәт тә’сирә малик ола биләр. Бәли, мәсиһчиләр баҹардыглары гәдәр өз тәрәфләриндән сүлһә вә һәмрә’јлијә ҹан атмалыдырлар. Бә’зән проблемин һәллинә, диггәт вә гајғы әкс етдирән хејирхаһлыгла сөјләнән сөз көмәк едир.
10 Башга һалларда мүдир табелијиндә олан адамлара өз нөгтеји-нәзәрини гәбул етдирир вә һамынын һансыса милли мәрасимдә вә ја Мүгәддәс Китаба ујғун ҝәлмәјән бајрамда иштирак етмәләрини тәләб едир. Мәсиһчинин виҹданы иш јолдашларына гошулмаға јол вермәјәндә, бу, тоггушмаја ҝәтириб чыхара биләр. Белә һалларда мүдирин тәләбләринә табе олмағын нә гәдәр сәһв һәрәкәт олдуғуну тәфәррүаты илә изаһ етмәк, јәгин ки, мүдриклик олмазды. Нәһајәтдә, мәсиһчинин е’тигадларына шәрик олмајан адамларын ҝөзүндә, бу ҹүр бајрамларда иштирак етмәк дүзҝүн ҝөрүнә биләр (1 Петер 2:21-23). Иштирак етмәмәјинин сәбәбини хејирхаһлыгла изаһ етмәк олар. Кинајәјә кинајә илә ҹаваб вермә. Мәсиһчинин Ромалылара 12:18 ајәсиндәки ҝөзәл нәсиһәтә риајәт етмәси јахшы олар: “Мүмкүнсә, әлиниздән ҝәлдији гәдәр бүтүн адамларла сүлһдә олун”.
Мәктәбдә хејирхаһлыг
11. Ҝәнҹ мәсиһчиләрә синиф јолдашларына хејирхаһлыг тәзаһүр етдирмәк нәјә ҝөрә асан дејил?
11 Бә’зән мәктәб јолдашларына хејирхаһлыг етмәк чәтин ола биләр. Ҝәнҹләр чох вахт синиф јолдашлары арасында танынмаға ҹан атырлар. Бә’зи оғлан ушаглары башгаларынын хошуна ҝәлмәк үчүн, өзләрини тәҹавүзкар кими апарыр, һәтта синиф јолдашларына һәдә-горху ҝәлирләр (Матта 20:25). Диҝәр мәктәблиләр һәр бир имкандан истифадә едәрәк дәрсдә, идманда вә ја диҝәр мәшғәләләрдә газандыглары мүвәффәгијјәтләри илә башгаларына тә’сир бағышламаға чалышырлар. Өз баҹарыгларыны ҝөстәрәрәк, онлар чох вахт синиф јолдашларына вә диҝәр тәләбәләрә сәрт мүнасибәт бәсләјирләр, чүнки сәһв олараг дүшүнүрләр ки, өз баҹарыгларына ҝөрә онлар диҝәрләриндән үстүндүрләр. Ҝәнҹ мәсиһчиләр өзләрини бу ҹүр апармамалыдырлар (Матта 20:26, 27). Һәвари Павел дејирди ки, “мәһәббәт сәбирли, хејирхаһдыр... ловғаланмаз, гүррәләнмәз”. Беләликлә, мәсиһчиләр синиф јолдашлары илә давранышларында Мүгәддәс Китабын нәсиһәтинә риајәт етмәк вә хејирхаһлыг етмәјәнләрин пис нүмунәләрини тәглид етмәмәк мәс’улијјәтини дашыјырлар (1 Коринфлиләрә 13:4).
12. а) Ҝәнҹләр үчүн мүәллимләрә хејирхаһлыгла јанашмаг нәјә ҝөрә чәтин ола биләр? б) Һәмјашыдларынын тәзјиги уҹбатындан хејирхаһлыг етмәк чәтин оланда ҝәнҹ мәсиһчиләр көмәк үчүн кимә мүраҹиәт едә биләрләр?
12 Ҝәнҹләр мүәллимләрә гаршы да хејирхаһ давранмалыдырлар. Мүәллимләри һирсләндирмәк бир чох тәләбәләрә хош ҝәлир. Онлар дүшүнүрләр ки, мәктәбин гајда-ганунларына зидд давраныб мүәллимләрә гаршы һөрмәтсизлик етмәклә, өзләринин ағыллы олдугларыны ҝөстәрирләр. Горхутмаг јолу илә онлар башгаларыны да өз әмәлләринә ҹәлб едә биләрләр. Ҝәнҹ мәсиһчи имтина едәрсә, әлә салына вә ја тәһгирә мә’руз гала биләр. Тәдрис или боју бу ҹүр вәзијјәтлә гаршылашмаг мәсиһчинин хејирхаһлыгла давранмаг гәрарыны сынаға чәкә биләр. Лакин Јеһованын садиг хидмәтчиси олмағын нә гәдәр ваҹиб олдуғуну унутма. Әмин ол ки, һәјатын бу ҹүр чәтин анларында Аллаһ сәнә Өз мүгәддәс руһу илә дәстәк олаҹаг (Мәзмур 37:28).
Гоншулара едилән хејирхаһлыг
13-15. Гоншулара гаршы хејирхаһ олмагда бизә нә мане ола биләр вә бу манеәләри неҹә дәф етмәк олар?
13 Ајрыҹа евдә, мәнзилдә вә ја башга һарада исә јашамағындан асылы олмајараг, сән гоншуларына хејирхаһлыг тәзаһүр етдирмәк вә онларын рифаһы илә марагландығыны ҝөстәрмәк барәсиндә дүшүнә биләрсән. Буну етмәк дә һәмишә асан олмур.
14 Әҝәр гапыбир гоншуларын иргинә, миллијәтинә вә ја дининә ҝөрә габагҹадан јаранмыш мәнфи рә’јә маликдирләрсә, онда неҹә? Әҝәр онлар сәни бә’зән аҹылајыр вә ја тамамилә сајмырларса, бәс онда неҹә? Јеһованын хидмәтчиси кими баҹардығын гәдәр хејирхаһлыг етмәк фајдалы олар. Белә олан һалда сән онлардан сечиләҹәк, хош тәәссүрат јарадаҹаг вә хејирхаһлыға даир нүмунә ҝөстәрән Јеһоваја иззәт ҝәтирәҹәксән. Һеч вахт билмәзсән ки, сәнин хејирхаһлығынын нәтиҹәсиндә гоншу өз нөгтеји-нәзәрини нә заман дәјишә биләр. Һәтта о да Јеһованы иззәтләндирә биләр (1 Петер 2:12).
15 Гоншулара хејирхаһлығы неҹә тәзаһүр етдирмәк олар? Бунун бир үсулу аиләнин бүтүн үзвләринин руһун сәмәрәсини әкс етдирәрәк јахшы давранмасыдыр. Еһтимал ки, гоншулар буну ҝөрәҹәкләр. Бә’зән гоншуја көмәк етмәк имканы јараныр. Јадда сахла ки, хејирхаһлыг, башгаларына гајғы ҝөстәрмәк демәкдир (1 Петер 3:8-12).
Хидмәтдә хејирхаһлыг
16, 17. а) Бизим тәблиғ хидмәтимиздә хејирхаһлыг нәјә ҝөрә ваҹибдир? б) Хидмәтин мүхтәлиф саһәләриндә хејирхаһлығы неҹә тәзаһүр етдирмәк олар?
16 Биз инсанларла онларын евләриндә, иш јериндә вә иҹтимаи јерләрдә сөһбәт етмәк үчүн бирҝә сә’ј ҝөстәрәндә, хејирхаһлыг бизим хидмәтимизин фәргләндириҹи ҹәһәти олмалыдыр. Јадда сахламалыјыг ки, биз Јеһованын нүмајәндәләријик, Јеһова исә һәр заман хејирхаһдыр (Чыхыш 34:6).
17 Хидмәтдә хејирхаһлыг тәзаһүр етдирмәк үчүн сән һансы сә’јләри ҝөстәрә биләрдин? Мәсәлән, күчәдә шаһидлик едәркән гыса данышараг, башгаларына диггәтли олмагла хејирхаһлыг ҝөстәрәрсән. Сәкиләрдә адәтән чохлу пијада олур, буна ҝөрә дә чалыш ки, кечиди тутмајасан. Ишҝүзар әразидә шаһидлик едәндә дә хејирхаһлыг ҝөстәр вә гыса даныш; јадда сахла ки, сатыҹылар алыҹылара хидмәт етмәлидирләр.
18. Узагҝөрәнлик хидмәт заманы хејирхаһлыг етмәјә неҹә көмәк едир?
18 Евдән-евә хидмәт едәркән анлајышлы ол. Хүсусән дә һава сојуг оланда, ев саһибини гапынын ағзында чох сахлама. Инсанын сәбри түкәнәндә вә ја сәнин ҝәлишин ону өзүндән чыхарданда, сән буну һисс едирсәнми? Ола биләр ки, сәнин јашадығын јердә Јеһованын Шаһидләри инсанлара чох тез-тез баш чәкирләр. Әҝәр бу беләдирсә, инсанлара хүсуси диггәтлә јанаш, һәмишә хејирхаһ вә меһрибан ол (Сүлејманын мәсәлләри 17:14). Һәмин ҝүн ев саһибинин сәни динләмәк истәмәмәсинин сәбәбини баша дүшмәјә чалыш. Унутма ки, јахын ҝәләҹәкдә бу евә сәнин мәсиһчи гардаш вә ја баҹыларындан бири ҝәләҹәк. Әҝәр кобуд адамла гаршылашырсанса, хејирхаһ давранмаг үчүн даһа чох сә’ј ҝөстәр. Сәсини уҹалтма вә наразылыг етмә, амма сакит тәрздә даныш. Хејирхаһ мәсиһчи ев саһибини јерсиз мүбаһисәләрә ҹәлб етмәк истәмир (Матта 10:11-14). Еһтимал ки, һәмин адам хош хәбәрә башга бир вахт гулаг асаҹаг.
Јығынҹаг ҝөрүшүндә хејирхаһлыг
19, 20. Јығынҹагда хејирхаһлыг нәјә ҝөрә лазымдыр вә буну неҹә тәзаһүр етдирмәк олар?
19 Һәмиманлыларымыза хејирхаһлыг тәзаһүр етдирмәк дә ејни дәрәҹәдә ваҹибдир (Ибраниләрә 13:1). Үмумдүнја гардашлығын бир һиссәси олдуғумуз үчүн, бир-биримизлә мүнасибәтдә хејирхаһ олмағымыз зәруридир.
20 Әҝәр Падшаһлыг Залындан сиздән башга бир, ики вә даһа артыг јығынҹаг истифадә едирсә, бу јығынҹагларын үзвләринин ләјагәтини алчалтмадан онлара хејирхаһлыг тәзаһүр етдирмәк ваҹибдир. Сөһбәт ҝөрүшләрин вахтынын низама салынмасындан вә ја тәмизлик, јахуд тә’мир кими зәрури ишләрдән ҝедәндә, инадҹыллыг әмәкдашлығы чәтинләшдирир. Јарана биләҹәк фикир ајрылыгларына бахмајараг, хејирхаһ вә һәссас олун. Беләликлә хејирхаһлыг гәләбә газанаҹаг, Јеһова исә сизин башгаларынын рифаһы үчүн ҝөстәрдијиниз гајғыја мүтләг хејир-дуа верәҹәк.
Хејирхаһлыг тәзаһүр етдирмәјә давам един
21, 22. Колослулара 3:12 ајәсинә әсасән нәјә гәрарлы олмалыјыг?
21 Хејирхаһлыг һәјатымызын һәр саһәсини өзүнә дахил едән кејфијјәтдир. Буна ҝөрә дә ону мәсиһчи шәхсијјәтимизин ајрылмаз һиссәси етмәлијик. Башгаларына хејирхаһлыг тәзаһүр етдирмәк вәрдишә чеврилмәлидир.
22 Ҝәлин һәр биримиз һәвари Павелин ашағыдакы сөзләрини өзүмүзә тәтбиг едәрәк ҝүнү-ҝүндән башгаларына гаршы хејирхаһ олаг: “Аллаһын сечилмишләри, мүгәддәсләри вә севимлиләри кими үрәкдән шәфгәт, хејирхаһлыг, тәвазөкарлыг, һәлимлик вә сәбирлилик ҝејин” (Колослулара 3:12).
Хатырлајырсынызмы?
• Мәсиһчинин хејирхаһлыг тәзаһүр етдирмәсинә әнҝәл јарадан нәдир?
• Аиләдә хејирхаһлыг тәзаһүр етдирмәк нәјә ҝөрә ваҹибдир?
• Мәктәбдә, иш јериндә вә гоншулара мүнасибәтдә хејирхаһ олмағымыза нә мане ола биләр?
• Мәсиһчиләрин тәблиғ хидмәтиндә неҹә хејирхаһлыг ҝөстәрә биләҹәкләрини изаһ един.
[14-ҹү сәһифәдәки шәкил]
Аиләдә һәр кәс хејирхаһлыг тәзаһүр етдирәндә, бу, бирлијә вә әмәкдашлыг руһуна көмәк едир.
[15-ҹи сәһифәдәки шәкил]
Сәнин иш јолдашын вә ја онун аилә үзвләриндән бири хәстәләнәндә, сән хејирхаһлыг тәзаһүр етдирә биләрсән.
[16-ҹы сәһифәдәки шәкил]
Истеһзаја бахмајараг, сәдагәтлә хејирхаһлыг ҝөстәрәни Јеһова дәстәкләјир.