Аллаһын хидмәтчиләри хејирхаһлығы севмәлидирләр
“Һагг оланы етмәк вә мәрһәмәти [“хејирхаһлығы”, ЈД] севмәк вә Аллаһынла тәвазөкар олараг јеримәкдән башга Рәбб сәндән нә истәр?” (МИКА 6:8).
1, 2. а) Јеһованын Өз хидмәтчиләриндән хејирхаһ олмағы тәләб етмәси нәјә ҝөрә бизи тәәҹҹүбләндирмәли дејил? б) Хејирхаһлыгла бағлы олан һансы суаллар бизим диггәтимизә лајигдир?
ЈЕҺОВА хејирхаһлыг Аллаһыдыр (Ромалылара 2:4; 11:22). Илк инсанлар олан Адәм вә Һәвва буна ҝөрә неҹә дә миннәтдар олмалы идиләр! Еден бағында онлары Аллаһын инсанлара олан хејирхаһлығынын ҝөрүнән сүбутлары әһатә едирди, Аллаһын хәлг етдикләри онлара севинҹ ҝәтирирди. Аллаһ бу ҝүн дә бүтүн инсанлара, һәтта пис инсанлара белә хејирхаһ олмаға давам едир.
2 Инсанлар Аллаһын сурәтиндә јарадылдыглары үчүн, Она хас олан хүсусијјәтләри әкс етдирмәјә гадирдирләр (Тәквин 1:26). Јеһованын биздән хејирхаһ олмағымызы тәләб етмәси тәәҹҹүблү дејил. Мика 6:8 ајәсиндә дејилдији кими Аллаһын хидмәтчиләри ‘хејирхаһлығы севмәлидирләр’. Бәс хејирхаһлыг нәдир? О, Аллаһа мәгбул олан диҝәр хүсусијјәтләрлә неҹә бағлыдыр? Инсанларын хејирхаһлыг едә билмәләринә бахмајараг, нәјә ҝөрә дүнјада бу гәдәр чох кобудлуг вә гәддарлыг вар? Вә нәјә ҝөрә биз мәсиһчиләр башгалары илә давранышымызда хејирхаһлыг ҝөстәрмәјә чалышмалыјыг?
Хејирхаһлыг нәдир?
3. Сиз хејирхаһлыға һансы тә’рифи верәрдиниз?
3 Хејирхаһлыг башгаларынын рифаһына ҹанлы мараг ҝөстәрмәкдә тәзаһүр олунур. Бу кејфијјәт фајдалы ишләрдә вә әдәбли сөзләрдә ҝөстәрилир. Хејирхаһ олмаг — башгаларына пислик дејил, јахшылыг етмәк демәкдир. Хејирхаһ инсан меһрибан, мүлајим, ҹаныјанан вә мәрһәмәтлидир. О, әлиачыг вә башгаларына гаршы диггәтлидир. Һәвари Павел мәсиһчиләрә өјүд верирди: “Шәфгәт, хејирхаһлыг, тәвазөкарлыг, һәлимлик вә сәбирлилик ҝејин” (Колослулара 3:12). Беләликлә, хејирхаһлыг һәр бир мәсиһчинин мәҹази ҝејиминин бир һиссәсидир.
4. Јеһова инсанлара хејирхаһлыг ҝөстәрмәкдә илк аддымы неҹә атыр?
4 Хејирхаһлыг ҝөстәрмәкдә илк аддымы Јеһова Аллаһ Өзү атыр. Һәвари Павелин дедији кими, “Хиласкарымыз Аллаһын хејирхаһлығы вә инсанпәрвәрлији изһар олундуғу заман”, “бизи јенидән доғулма сују илә јумагла вә Мүгәддәс Руһла тәзәләмәклә хилас етди” (Титуса 3:4, 5). Аллаһ мәсһ едилмиш мәсиһчиләрә Мәсиһин фидијә гурбанлығынын дәјәрини тәтбиг етмәклә, онлары Исанын ганында ‘јујур’, јә’ни тәмизләјир. О, һәм дә онлары мүгәддәс руһ илә тәзәләјир, онлар да Аллаһын руһдан доғулмуш оғуллары кими “јени мәхлуг” олурлар (2 Коринфлиләрә 5:17). Бундан әлавә, Аллаһ ‘либасларыны јујуб, онлары Гузунун ганы илә ағардан’ ‘бөјүк издиһама’ да хејирхаһлыг вә мәһәббәт ҝөстәрир (Вәһј 7:9, 14; 1 Јәһја 2:1, 2).
5. Аллаһын руһу илә идарә олунанлар нәјә ҝөрә хејирхаһлыг етмәлидирләр?
5 Хејирхаһлыг һәм дә Аллаһын руһунун, јә’ни фәал гүввәсинин сәмәрәсинә дахилдир. Павел демишдир: “Руһун сәмәрәси исә будур: мәһәббәт, севинҹ, сүлһ, сәбир, лүтфкарлыг, јахшылыг [хејирхаһлыг], сәдагәт, һәлимлик, өзүнә һаким олмаг. Бу кими шејләрә гаршы ганун јохдур” (Галатијалылара 5:22, 23). Белә исә Аллаһын руһу илә идарә олунанлар башгаларына хејирхаһлыг етмәли дејилләрми?
Һәгиги хејирхаһлыг зәифлик дејил
6. Хејирхаһлыг нә заман зәифлик олур вә нәјә ҝөрә?
6 Бә’зиләри хејирхаһлыға зәифлик кими бахырлар. Онлар дүшүнүрләр ки, башгалары онларын характерләринин ҝүҹүнү ҝөрсүнләр дејә, сәрт, бә’зән исә кобуд олмаг лазымдыр. Лакин әслиндә һәгиги мә’нада хејирхаһ олмаг вә јерсиз хејирхаһлыгдан гачмаг үчүн ҝүҹ лазымдыр. Һәгиги хејирхаһлыг Аллаһын руһунун сәмәрәси олдуғу үчүн, онун ҝүнаһлы һәрәкәтә ҝөз јуман зәиф ирадәликлә һеч бир мүштәрәклији јохдур. Ҝүнаһа ҝөз јумдуғу үчүн јерсиз хејирхаһлыг зәифлик сајылыр.
7. а) Ели нәјә е’тинасызлыг ҝөстәрди? б) Ағсаггаллар нәјә ҝөрә јерсиз хејирхаһлыг ҝөстәрмәјә еһтијат етмәлидирләр?
7 Исраилин баш каһини Елини хатырлајаг. О, чадырда каһин олараг хидмәт едән оғуллары Һофни вә Финеһасы ҹәзаландырмаг мәс’улијјәтинә е’тинасыз јанашырды. Һофни вә Финеһас гурбан ҝәтирилән һејванын Аллаһын Ганунуна ҝөрә онларын пајына дүшән һиссәсинә разы дејилдиләр, буна ҝөрә дә гуллугчуну ҝөндәрирдиләр ки, гурбанҝаһда һејванын ич јағы јандырылмамышдан габаг, гурбан ҝәтирән адамдан чиј әт тәләб етсин. Елинин оғуллары һәм дә чадырын ҝирәҹәјиндә хидмәт едән гадынларла јатараг әхлагсызлыг едирдиләр. Ели исә Һофни вә Финеһасы хидмәтдән кәнар етмәк әвәзинә, онлары садәҹә олараг јүнҝүл мәзәммәт едирди (1 Самуел 2:12-29). Тәәҹҹүблү дејил ки, “о ҝүнләрдә Рәббин кәламы сејрәк иди”! (1 Самуел 3:1). Мәсиһчи ағсаггаллар јығынҹағын руһанилијинә тәһлүкә јарадан ҝүнаһкарлара јерсиз хејирхаһлыг ҝөстәрмәјә еһтијат етмәлидирләр. Һәгиги хејирхаһлыг Аллаһын нормаларыны позан пис сөзләрә вә әмәлләрә ҝөз јуммур.
8. Иса һәгиги хејирхаһлығы неҹә тәзаһүр етдирирди?
8 Нүмунәмиз олан Иса Мәсиһ һеч заман јерсиз хејирхаһлыг ҝөстәрмирди. О, һәгиги хејирхаһлығын тәҹәссүмү иди. Мәсәлән, “издиһамы ҝөрдүкдә Исанын онлара јазығы ҝәлди; чүнки чобансыз гојунлар кими тагәтсиз вә дағыныг идиләр”. Сәмими гәлбли инсанлар Исанын јанына ҝәлмәјә горхмурдулар, онлар һәтта көрпә ушагларыны да онун јанына ҝәтирирдиләр. Онун онлары неҹә хејирхаһлыг вә үрәк јанғысы илә ‘гуҹаглајыб, хејир-дуа вердији’ һагда дүшүнүн (Матта 9:36; Марк 10:13-16). Иса хејирхаһ олса да, о, сәмави Атасынын ҝөзүндә доғру олан шејләрә гаршы дәјишмәз иди. Иса һеч заман пис шејләрә јол вермәзди; о, Аллаһын она вердији гүввә илә ријакар дин рәһбәрләрини ифша едирди. Матта 23:13-26 ајәләриндән ҝөрүндүјү кими, о, бир нечә дәфә нөвбәти сөзләри ишләдир: “Вај һалыныза, дин алимләри вә фәрисејләр, икиүзлүләр!”
Хејирхаһлыг вә Аллаһа мәгбул олан диҝәр кејфијјәтләр
9. Хејирхаһлыг сәбирлилик вә лүтфкарлыгла неҹә бағлыдыр?
9 Хејирхаһлыг, Аллаһын руһунун һасил етдији “сәбир” вә “лүтфкарлыг” кими диҝәр кејфијјәтләрлә дә бағлыдыр. Доғрудан да, өзүндә хејирхаһлығы инкишаф етдирән адам сәбирлидир. О, һәтта сәрт адамларла да сәбирлидир. Хејирхаһлыг лүтфкарлыгла она ҝөрә бағлыдыр ки, бу кејфијјәт чох вахт инсанлара көмәк етмәк, башгаларынын рифаһы үчүн нә исә етмәк һазырлығында тәзаһүр олунур. Мүгәддәс Китабда “хејирхаһлыг” мә’насыны дашыјан јунан сөзү бә’зән “лүтфкарлыг” кими дә тәрҹүмә олуна биләр. Еркән мәсиһчиләр тәрәфиндән ҝөстәрилән хејирхаһлыг бүтпәрәстләри о гәдәр валеһ едирди ки, Тертуллианын јаздығына ҝөрә, онлар Исанын давамчыларыны “хејирхаһлыгдан ибарәт олан инсанлар” адландырырдылар.
10. Хејирхаһлыг вә мәһәббәт неҹә әлагәлидир?
10 Хејирхаһлыг һәм дә мәһәббәтлә әлагәлидир. Иса өз давамчылары барәсиндә демишдир: “Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк” (Јәһја 13:35). Бу ҹүр мәһәббәт барәсиндә Павел јазырды: “Мәһәббәт сәбирли, хејирхаһдыр” (1 Коринфлиләрә 13:4). Хејирхаһлыг һәмчинин “Мүгәддәс Јазыларын Јени Дүнја Тәрҹүмәси” нәшриндә тез-тез ишләнән “севҝи долу хејирхаһлыг” ифадәсиндәки мәһәббәтлә әлагәлидир. Бу ҹүр хејирхаһлыг садиг мәһәббәтдән доғур. “Севҝи долу хејирхаһлыг” кими тәрҹүмә олунан ибрани дилиндәки исим өзүнә зәриф бағлылыгдан артыг шеј дахил едир. Бу хејирхаһлыг кимә исә мүнасибәтдә өз мәгсәдинә наил олана гәдәр мәһәббәтлә вә сабитликлә тәзаһүр олунур. Јеһованын севҝи долу хејирхаһлығы — садиг мәһәббәти — мүхтәлиф үсулларла ҝөстәрилир. Мәсәлән, бу кејфијјәт Онун, Өз хидмәтчиләрини азад етмәјә вә горумаға јөнәлтдији ишләриндә ҝөрүнүр (Мәзмур 6:4; 40:11; 143:12).
11. Аллаһын севҝи долу хејирхаһлығы бизә нәдә зәманәт верир?
11 Јеһованын севҝи долу хејирхаһлығы инсанлары Она ҹәлб едир (Јеремја 31:3). Аллаһын садиг хидмәтчиләри көмәјә вә ја гуртулуша еһтијаҹ дујанда билирләр ки, Онун севҝи долу хејирхаһлығы доғрудан да садиг мәһәббәтдир. Онлар билирләр ки, бу кејфијјәт онлары үмидсиз гојмајаҹаг. Буна ҝөрә дә онлар да мәзмурчу кими иманла дуа едә биләрләр: “Фәгәт мән сәнин инајәтинә [“севҝи долу хејирхаһлығына”, ЈД] ҝүвәндим; үрәјим гуртулушунла мәсрур олаҹагдыр” (Мәзмур 13:5). Јеһованын мәһәббәти садиг олдуғу үчүн, Онун хидмәтчиләри бүтүнлүклә Она бел бағлаја биләрләр. Онлар белә зәманәтә маликдирләр: “Рәбб халгыны өзүндән атмајаҹаг вә мирасыны бурахмајаҹагдыр” (Мәзмур 94:14).
Дүнја нәјә ҝөрә бу гәдәр гәддардыр?
12. Гәддар рәһбәрлик нә вахт вә неҹә башланды?
12 Бу суалын ҹавабы Еден бағында баш верән һадисә илә бағлыдыр. Худбин вә ловға олан бир руһани мәхлуг дүнјаны идарә етмәк мејлинә дүшдү. Бәшәр тарихинин башланғыҹында өз нијјәтини һәјата кечирмәјә башлады вә нәтиҹәдә һәгигәтән дә “бу дүнјанын рәиси”, өзү дә чох гәддар бир рәһбәр олду (Јәһја 12:31). О, Аллаһын вә инсанларын баш дүшмәни олан Шејтан Иблис кими танынмаға башланды (Јәһја 8:44; Вәһј 12:9). Онун худбинликдән ирәли ҝәләрәк Јеһованын хејирхаһ рәһбәрлијинә алтернатив бир рәһбәрлик јаратмаг фикриндә олдуғу, Һәвва јарадылдыгдан тезликлә сонра мә’лум олду. Адәм Аллаһын хејирхаһлығыны бүтүнлүклә рәдд едәрәк, Онун рәһбәрлијиндән мүстәгил олмаг јолуну сечәндә, пис рәһбәрлијин башланғыҹы гојулду (Тәквин 3:1-6). Һәгиги мә’нада мүстәгил олмаг әвәзинә, Адәм вә Һәвва сөзүн әсл мә’насында Иблисин тә’сири алтына дүшдүләр вә бу худбин вә мәғрур һөкмдарын табелијинә кечдиләр.
13-15. а) Инсанларын Јеһованын әдаләтли рәһбәрлијини рәдд етмәләринин нәтиҹәләриндән бә’зиләри һансылар олду? б) Нәјә ҝөрә дүнјада бу гәдәр кобудлуг вә гәддарлыг мөвҹуддур?
13 Ҝәлин бә’зи нәтиҹәләри нәзәрдән кечирәк. Адәм вә Һәвва, Ҹәннәт олан әразидән говулдулар. Онлар бол сағлам гиданын, ҝөјәртинин вә мејвәләрин олдуғу ҝөзәл паркы, Еден бағындан кәнарда олан чәтин шәраитләрә дәјишдиләр. Аллаһ Адәмә деди: “Арвадынын сөзүнә гулаг асдығын үчүн, гадаған етдијим, “мејвәсини јемә” дедијим ағаҹдан једијин үчүн, сәнә ҝөрә торпаг лә’нәтләнир. Өмрүн боју зәһмәтлә торпагдан јемәк әлдә едәҹәксән. О сәнә тикан вә гангал битирәҹәк”. Торпағын лә’нәтләнмәси о демәк иди ки, торпағы беҹәрмәк инди чох ағыр олаҹагды. Торпағын “тикан вә гангал” илә лә’нәтләнмәсинин нәтиҹәси Адәмин нәсли тәрәфиндән о гәдәр ҝүҹлү шәкилдә дујулурду ки, Нуһун атасы Ламек, ‘Рәббин лә’нәтләдији торпағы беҹәрәндә чәкдикләри әзијјәтләр’ барәсиндә данышырды (Јарадылыш 3:17-19; 5:29, МКШ).
14 Һәм дә Адәмлә Һәвва динҹ һәјаты изтираб вә кәдәрә дәјишдиләр. Аллаһ Һәвваја деди: “Бојлу оланда сәнә ағыр әзијјәт верәҹәјәм, ушагларыны ағры ичиндә доғаҹагсан. Әринә еһтијаҹын олаҹаг, о сәнә ағалыг едәҹәк”. Сонрадан Адәм вә Һәвванын илк оғлу олан Габил гәддарҹасына гардашы Һабили гәтлә јетирди (Јарадылыш 3:16; 4:8, МКШ).
15 Һәвари Павел билдирмишдир: “Бүтүн дүнја... шәририн һакимијјәти алтындадыр” (1 Јәһја 5:19). Буҝүнкү дүнја, өз һөкмдарына бәнзәр тәрздә, өзүнә худбинлик вә мәғрурлуг дахил едән пис хүсусијјәтләри бүрузә верир. Дүнјанын кобудлуг вә гәддарлыгла долу олмасы тәәҹҹүблү дејил! Лакин һәмишә белә олмајаҹаг. Јеһова гајғы ҝөстәрәҹәк ки, Онун Падшаһлығынын рәһбәрлији алтында кобудлуг вә гәддарлығын әвәзинә хејирхаһлыг вә мәрһәмәт үстүнлүк тәшкил етсин.
Аллаһын Падшаһлығынын рәһбәрлији алтында хејирхаһлыг үстүнлүк тәшкил едәҹәк
16. Аллаһын Мәсиһ Иса васитәсилә етдији рәһбәрлик нәјә ҝөрә хејирхаһлығы илә фәргләнир вә бу биздә һансы истәји ојадыр?
16 Јеһова вә Онун Падшаһлығынын тә’јин едилмиш Падшаһы Мәсиһ Иса тәләб едир ки, онларын тәбәәләри хејирхаһлыглары илә танынсынлар (Мика 6:8). Иса Мәсиһ ҝөстәрди ки, Атасынын она е’тибар етдији һакимијјәтдән хејирхаһлыгла истифадә едәҹәк (Ибраниләрә 1:3). Бу, Исанын халгы ағыр јүкләрлә әзијјәтә салан јаланчы дин рәһбәрләрини ифша едән сөзләриндән ҝөрүнүр. О деди: “Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм. Бојундуруғуму үзәринизә ҝөтүрүн вә Мәндән өјрәнин; чүнки Мән һәлим вә гәлбдән тәвазөкарам; вә ҹаныныза раһатлыг тапарсыныз. Чүнки бојундуруғум асан [һәрфән “хејирхаһ”] вә јүкүм јүнҝүлдүр” (Матта 11:28-30). Дүнјәви һакимијјәтләр, дини рәһбәрләр вә ја башга саһәләрдә рәһбәрлик едән кәсләр, инсанлары чох тез-тез сонсуз гајда-ганунларла әлдән салыр вә онлары дәјәрсиз ишләри јеринә јетирмәјә вадар едирләр. Исанын өз давамчыларындан тәләб етдикләри исә, онларын еһтијаҹ вә имканларына мүвафигдир. Һәгигәтән дә раһат вә хејирхаһ бојундуругдур! Бу бизи Исаны тәглид етмәјә вә башгаларына гаршы хејирхаһ олмаға тәшвиг етмирми? (Јәһја 13:15).
17, 18. Нәјә ҝөрә инанмаг олар ки, Мәсиһлә ҝөјдә идарә едәҹәк кәсләр вә онун јер үзүндәки нүмајәндәләри хејирхаһлыг ҝөстәрәҹәкләр?
17 Исанын һәвариләрә сөјләдији валеһедиҹи фикирләрдән, Аллаһын Падшаһлығынын рәһбәрлији илә инсан рәһбәрлијинин арасында нә гәдәр бөјүк фәргин олдуғуну ҝөрүрүк. Мүгәддәс Китабда дејилир: “Онларын [шаҝирдләрин] арасында бир мүбаһисә дә олду: онлардан ким ән бөјүк сајылмалыдыр. Иса исә онлара деди: “Һакимләр халглар үзәриндә һөкм сүрүрләр вә бу һөкмдарлыг едәнләрә һавадар дејирләр; сиз исә белә олмамалысыныз; лакин аранызда ән бөјүк олан ән кичик кими олсун вә рәислик едән хидмәткар кими олсун. Ахы ким даһа бөјүкдүр: сүфрәдә отуран, јохса хидмәт едән? Сүфрәдә отуран дејилми? Мән исә сизин аранызда хидмәткар кимијәм” (Лука 22:24-27).
18 Рәһбәрләр инсанларын үзәриндә ‘һөкм сүрәрәк’ вә өзләринә бөјүк титуллар ахтарараг јүксәлмәјә чалышырлар, санки бу ҹүр титуллар онлары, үзәрләриндә рәһбәрлик етдикләри адамлардан даһа јахшы едир. Лакин Иса деди ки, башгаларына хидмәт едәнләр вә буну сә’јлә вә даима едәнләр һәгигәтән бөјүкдүрләр. Һәм Мәсиһлә ҝөјдә идарә едәҹәк кәсләр, һәм дә онун јер үзүндәки нүмајәндәләри онун тәвазөкарлыг вә хејирхаһлыг нүмунәсинә риајәт етмәјә чалышмалыдырлар.
19, 20. а) Јеһованын нә дәрәҹәдә хејирхаһ олдуғуну Иса неҹә ҝөстәрди? б) Јеһованын хејирхаһлығыны биз неҹә тәглид едә биләрик?
19 Ҝәлин Исанын мәһәббәтлә вердији диҝәр мәсләһәтә бахаг. Јеһованын нә гәдәр хејирхаһ олдуғуну ҝөстәрәрәк Иса деди: “Әҝәр сизи севәнләри севирсинизсә, һансы тәшәккүрә лајигсиниз? Чүнки ҝүнаһкарлар да онлары севәнләри севирләр. Әҝәр сизә јахшылыг едәнләрә јахшылыг едирсинизсә, һансы тәшәккүрә лајигсиниз? Чүнки ҝүнаһкарлар да елә едирләр. Әҝәр ҝери алмағы үмид етдијиниз кимсәләрә борҹ верирсинизсә, һансы тәшәккүрә лајигсиниз? Чүнки ҝүнаһкарлар да ҝүнаһкарлара борҹ верирләр ки, һәмин борҹу там ҝери алсынлар. Амма дүшмәнләринизи севин, онлара јахшылыг един вә һеч бир шеј уммадан борҹ верин. Мүкафатыныз бөјүк олаҹагдыр; вә сиз Һагг-Тәаланын оғуллары олаҹагсыныз. Чүнки О, нанкорлара вә пис адамлара гаршы да хејирхаһдыр. Атаныз неҹә мәрһәмәтли исә, сиз дә елә мәрһәмәтли олун” (Лука 6:32-36).
20 Аллаһа хас олан хејирхаһлыг тәмәннасыздыр. Бу хүсусијјәт әвәз олараг һеч бир шеј ҝөзләмир вә тәләб етмир. Јеһова хејирхаһлыгла “Өз ҝүнәшинә әмр едир ки, пис вә јахшы адамларын үзәринә доғсун; вә салеһ оланлар илә олмајанларын үзәринә јағышлар ҝөндәрир” (Матта 5:43-45; Һәвариләрин ишләри 14:16, 17). Сәмави Атамызы тәглид едәрәк биз нанкор адамлара нәинки пислик етмир, һәтта бизә дүшмәнчиликлә јанашанлара белә хејирхаһлыг ҝөстәририк. Хејирхаһлыг тәзаһүр етдирәрәк биз Јеһоваја вә Исаја ҝөстәририк ки, хејирхаһлығын вә диҝәр ҝөзәл кејфијјәтләрин бүтүн инсан мүнасибәтләринин тәмәлини тәшкил едәҹәји Аллаһын Падшаһлығынын рәһбәрлији алтында јашамағы арзулајырыг.
Нәјә ҝөрә хејирхаһ олмаг лазымдыр?
21, 22. Биз нәјә ҝөрә хејирхаһ олмалыјыг?
21 Исанын һәгиги давамчыларына хејирхаһ олмаг хүсусилә ваҹибдир. Бу, Аллаһын руһунун бизә олан тә’сиринә сүбутдур. Бундан әлавә, биз һәгиги хејирхаһлығы тәзаһүр етдирәндә Јеһова Аллаһы вә Мәсиһ Исаны тәглид едирик. Һәм дә Аллаһын Падшаһлығынын вәтәндашлары олмаг үчүн хејирхаһ олмаг тәләб олунур. Буна ҝөрә дә биз хејирхаһлығы севмәли вә ону тәзаһүр етдирмәји өјрәнмәлијик.
22 Ҝүндәлик һәјатымызда хејирхаһлығын практики үсулларыны неҹә тәзаһүр етдирә биләрик? Бу барәдә нөвбәти мәгаләдә данышылаҹаг.
Неҹә ҹаваб верәрдиниз?
• Хејирхаһлыг нәдир?
• Нәјә ҝөрә дүнјада бу гәдәр кобудлуг вә гәддарлыг вар?
• Һарадан билирик ки, Аллаһын Падшаһлығынын рәһбәрлији алтында хејирхаһлыг үстүнлүк тәшкил едәҹәк?
• Аллаһын Падшаһлығынын рәһбәрлији алтында јашамаг арзусунда оланлара хејирхаһ олмаг нәјә ҝөрә ваҹибдир?
[9-ҹу сәһифәдәки шәкил]
Мәсиһчи ағсаггаллар сүрү илә хејирхаһлыгла рәфтар етмәјә чалышырлар.
[10-ҹу сәһифәдәки шәкил]
Јеһованын севҝи долу хејирхаһлығы Онун хидмәтчиләрини чәтин анларда үмидсиз гојмајаҹаг.