Бир-биринизи гүввәтләндирин

“Онлар мәнә тәсәлли вердиләр [“дајаг олдулар”, ЈД]” (КОЛОСЛУЛАРА 4:11).

1, 2. Тәһлүкәјә бахмајараг, нәјә ҝөрә достлары һәбсдә олан Павелә баш чәкирдиләр?

ӘДАЛӘТСИЗ олараг һәбс едилсә дә, һәбсханада әзијјәт чәкән адамын досту олмаг тәһлүкәлидир. Һәбсхана мүдиријјәти ҹинајәт ишләтмәјәҹәјинә әмин олмаг үчүн һәр бир һәрәкәтинә ҝөз гојараг, сәнә шүбһә илә јанаша биләр. Буна ҝөрә дә, достунла сых әлагә сахламаг вә она һәбсханада баш чәкмәк үчүн ҹәсарәт тәләб олунур.

² Лакин һәвари Павелин бә’зи достлары, тәхминән 1 900 ил бундан габаг мәһз бу ҹүр давранмышдылар. Онлар һәбсдә олан достуну руһән гүввәтләндирмәк үчүн онун јанына ҝәлмәкдән горхмурдулар вә һәвари мәһз онларын васитәсилә зәрури олан тәсәллини вә гүввәни әлдә едирди. Бу сәдагәтли достлар кимләр идиләр? Вә онларын ҹәсарәти, садиглији вә мәһәббәти бизә нә өјрәдә биләр? (Сүлејманын мәсәлләри 17:17).

Дајаг

3, 4. а) Павелин беш досту кимләр иди вә Павелин һәјатында онларын һансы ролу олмушдур? б) “Дајаг” нә демәкдир?

³ Ҝәлин хәјалән б. е. тәхминән 60-ҹы илинә гајыдаг. Һәвари Павел гијам галдырмагда јаландан иттиһам едиләрәк Ромада һәбсә алыныб (Һәвариләрин ишләри 24:5; 25:11, 12). Павел онунла олан беш мәсиһчини — Асија әјаләтиндән олан шәхси елчиси вә “Рәбб јолунда садиг хидмәткары” Тихики, Колос шәһәриндән олан “садиг вә севимли гардашы” Онисими, бир мүддәт Павеллә бирликдә һәбсдә олмуш, әслән Солоник шәһәриндән олан македонијалы Аристархы, ады илә бағлы Мүждәни јазан вә Барнабанын әмиси оғлу олан, миссионер хидмәтиндә Павелин әмәкдашы олан Маркы, һәмчинин “Аллаһын Сәлтәнәти [Падшаһлығы] үчүн” онун әмәкдашы олан Јусту хатырладыр. Бу беш нәфәр барәсиндә Павел дејир: “Онлар мәнә тәсәлли вердиләр [“дајаг олдулар”, ЈД]” (Колослулара 4:7-11).

⁴ Павел, садиг достларынын она ҝөстәрдикләри көмәклији чох мә’налы сурәтдә тәсвир етмишдир. О, Мүгәддәс Китабда јалныз бу ајәдә истифадә едилән “дајаг” кими тәрҹүмә олунан јунан сөзүнү (парегориʹа) истифадә етмишдир. Бу сөзүн чох мә’налары вар вә хүсусилә дә сөһбәт мүалиҹәдән ҝедәндә тез-тез истифадә олунурдуa. Ону һәм дә “овундурмаг”, “јүнҝүлләшдирмәк”, “тәсәлли вермәк” вә “раһатламаг” кими сөзләрлә тәрҹүмә етмәк олар. Павел белә бир гүввәтләндирилмәјә еһтијаҹ дујурду, һәмин беш гардаш да онун еһтијаҹыны тә’мин етдиләр.

Павел нәјә ҝөрә дајаға еһтијаҹ дујурду?

5. Һәвари олмасына бахмајараг Павел нәјә еһтијаҹ дујурду вә вахташыры олараг биз һамымыз нәјә еһтијаҹ дујуруг?

⁵ Павелин, һәваринин, гүввәтләндирилмәјә еһтијаҹ дујмасы кимә исә гәрибә ҝөрүнә биләр. Лакин бу белә иди. Доғрудур, Павелин ҝүҹлү иманы варды, о дәфәләрлә сәрт мүнасибәтләрә таб ҝәтирмиш, ‘сајсыз-һесабсыз көтәк јемиш, чох вахт өлүм тәһлүкәсиндә олмуш’, һәм дә башга сәбәбләрдән әзијјәт чәкмишдир (2 Коринфлиләрә 11:23-27). Буна бахмајараг, о инсан иди, бүтүн инсанлар исә бу вә ја башга бир вахтда киминсә онлара тәсәлли вермәсинә вә иманыны мөһкәмләтмәкдә көмәк етмәсинә еһтијаҹ дујурлар. Бу һәтта Иса илә дә баш вермишдир. Һәјатынын сон ҝеҹәси Ҝетсамани бағында она бир мәләк ҝөрүндү вә “Она гүввәт верди” (Лука 22:43).

6, 7. а) Ромада Павели кимләр кәдәрләндирди, бәс кимләр руһландырды? б) Мәсиһчи гардашлар Ромада Павел үчүн дајаг олараг, она һансы ишләрдә гуллуг ҝөстәрирдиләр?

⁶ Павел дә гүввәтләндирилмәјә еһтијаҹ дујурду. О, мәһбус кими Ромаја ҝәтириләндә, һәмјерлиләри тәрәфиндән сәмимиликлә гаршыланмады. Һәмин јәһудиләрин бөјүк әксәријјәти Падшаһлыг һаггындакы хош хәбәрә һәссас дејилдиләр. “Һәвариләрин ишләри” китабында, јәһудиләрдән олан адлы-санлы адамларын нәзарәт алтында олан Павелин јанына ҝәлишиндән сонра нә баш вердији һагда дејилир: “Павелин дедији сөзләрә бә’зиләри инандылар, бә’зиләри дә инанмадылар. Онлар бир-бирләри илә разылашмадыгда... ҝетдиләр” (Һәвариләрин ишләри 28:17, 24, 25). Онларын Јеһованын хејирхаһлығына гаршы олан нашүкүрлүјү, јәгин ки, Павели кәдәрләндирирди! Онун буна ҝөрә чох нараһат олдуғуну, бир нечә ил габаг Ромадакы јығынҹаға јаздығы мәктубундан ҝөрүрүк: “Бөјүк кәдәрим вә үрәјимдә даими изтирабым вар. Чүнки гардашларым [јәһудиләр], јә’ни ҹисмани сојдашларым олан исраиллиләр уғрунда мән өзүм Мәсиһдән узаглашыб, лә’нәт олунмаг истәрдим” (Ромалылара 9:2, 3). Буна бахмајараг, о, Ромада, ҹәсарәт вә мәһәббәтләри онун үрәјинә сакитлик ҝәтирән садиг, е’тибарлы јолдашлар тапды. Бунлар онун әсл руһани гардашлары идиләр.

⁷ Һәмин беш гардаш Павел үчүн һансы мә’нада дајаг олду? Дустаг олдуғу үчүн онлар Павелдән кәнар гачмадылар. Бунун әвәзинә, мәһәббәтдән ирәли ҝәләрәк онлар мүхтәлиф ишләрдә Павелә һәвәслә гуллуг ҝөстәрир вә һәбсдә олдуғу үчүн өзүнүн едә билмәдији ишләри онун үчүн едирдиләр. Мәсәлән, онун елчиләри кими фәалијјәт ҝөстәрир, Павелин мәктубларыны вә шифаһи ҝөстәришләрини мүхтәлиф јығынҹаглара чатдырыр, һәмчинин Ромада вә диҝәр јерләрдә олан гардашлар һаггында Павелә јахшы хәбәрләр ҝәтирирдиләр. Еһтимал ки, онлар Павел үчүн зәрури олан шејләри, мәсәлән, гыш палтары, китаблар вә јазы ләвазиматлары ҝәтирирдиләр (Ефеслиләрә 6:21, 22; 2 Тимотејә 4:11-13). Ҝөстәрилән бүтүн бу јардымлар, һәбсдә олан һәварини гүввәтләндирир вә руһландырырды, о исә өз нөвбәсиндә, бүтөв јығынҹаглары да дахил етмәклә, башгалары үчүн дајаг ола билирди (Ромалылара 1:11, 12).

Биз неҹә дајаг ола биләрик?

8. Павелин дајаға еһтијаҹ дујдуғуну һәлимликлә бојнуна алмасындан нә өјрәнирик?

⁸ Павел вә онун беш әмәкдашы илә баш верән һадисәдән биз һансы дәрсләри өјрәнә биләрик? Ҝәлин диггәтимизи дәрсләрдән биринә јөнәлдәк: бәлаја дүшән адамын көмәјинә чатмаг үчүн ҹәсарәт вә фәдакарлыг тәләб олунур. Бундан әлавә, биз бәлаја дүчар оланда көмәјә еһтијаҹ дујдуғумузу бојнумуза алмаг үчүн, һәлимлик тәләб олунур. Павел көмәјә еһтијаҹ дујдуғуну бојнуна алмагла кифајәтләнмәди, һәм дә бу көмәклији миннәтдарлыгла гәбул етди вә она көмәк едәнләри тә’рифләди. О, башгаларындан көмәк гәбул етмәјин зәифлик әламәти, нә исә алчалдыҹы бир шеј олдуғуну дүшүнмүрдү, буну биз дә дүшүнмәли дејилик. Әҝәр биз јардыма һеч заман еһтијаҹ дујмадығымызы сөјләсәјдик, бу о мә’наны дашыјарды ки, биз фөвгәлтәбии баҹарыға маликик. Јадда сахла: Исанын нүмунәси ҝөстәрир ки, һәтта камил инсана да бә’зән имдад диләмәк лазым ҝәлир (Ибраниләрә 5:7).

9, 10. Инсанын көмәјә еһтијаҹ дујдуғуну е’тираф етмәси нәјә ҝөрә јахшыдыр вә бу, онун аиләсинин, һәм дә јығынҹағын үзвләринә неҹә тә’сир едир?

⁹ Мәс’ул гардашлар һәр шејә гадир олмадыгларыны вә кәнардан көмәјә еһтијаҹ дујдугларыны е’тираф едәндә јахшы нәтиҹәләр әлдә олуна биләр (Јагуб 3:2). Белә олан һалда, сәлаһијјәти оланларла, бу сәлаһијјәтә табе оланлар арасында мүнасибәт мөһкәмләнир вә сәмими, һәм дә сәрбәст үнсијјәт јараныр. Һәлимлик ҝөстәрәрәк вә едилән көмәклији гәбул едәрәк, бу гардашлар ејни вәзијјәтдә оланлара нүмунә верирләр. Беләликлә онлар ҝөстәрирләр ки, үзәринә рәһбәрлик ҝөтүрәнләр дә инсандырлар вә онлара һәмишә асанлыгла јахынлашмаг олар (Ваиз 7:20).

¹⁰ Әҝәр ушаглар билсәләр ки, валидејнләри дә ушаглыгда ејни чәтинликләрлә гаршылашыб, онлара проблемләри вә дүзҝүн олмајан арзулары дәф етмәкдә валидејнләринин көмәјини гәбул етмәк даһа асан олаҹаг (Колослулара 3:21). О заман валидејнләрлә ушаглар арасындакы үнсијјәт гапысы ачыг олаҹагдыр. Мүгәддәс Китаб нәсиһәтләри, еһтимал ки, даһа инандырыҹы сәсләнәҹәк вә даһа һәвәслә гәбул едиләҹәк (Ефеслиләрә 6:4). Ејни тәрздә, јығынҹағын үзвләри ағсаггалларын да проблемләринин олдуғуну вә онларын да нәдәнсә горхдугларыны вә ја чашгынлыг ичиндә галдыгларыны билсәләр, ағсаггалларын көмәјини даһа һәвәслә гәбул едәҹәкләр (Ромалылара 12:3; 1 Петер 5:3). Чох еһтимал ки, онда јахшы үнсијјәт јаранаҹаг, ағсаггаллар да Мүгәддәс Китаб тә’лимләри илә бөлүшүб, иманы мөһкәмләдә биләҹәкләр. Јадда сахламаг лазымдыр ки, баҹы-гардашларымыз бу ҝүн һеч заман олмадығы гәдәр гүввәтләндирилмәјә еһтијаҹ дујурлар (2 Тимотејә 3:1).

11. Нәјә ҝөрә бу ҝүн бу гәдәр чох инсана дајаг лазымдыр?

¹¹ Һарада јашамағымыздан, кимлијимиздән вә јашымыздан асылы олмајараг, һамымызын һәјатында чәтин вахтлар олур. Бу, буҝүнкү дүнјанын чәтинликләринин бир һиссәсидир (Вәһј 12:12). Физики вә ја емосионал ҹәһәтдән кәдәрләндириҹи шәраитләр иманымызын кејфијјәтини сынаға чәкир. Сынаглар иш јериндә, мәктәбдә, аиләдә вә ја јығынҹагда јарана биләр. Буна ҹидди хәстәлик вә ја вахтилә кечирдији сарсынты сәбәб ола биләр. Һәјат јолдашымыз, ағсаггал вә ја достумуз бизи хош сөзләри вә көмәји илә руһландыранда, неҹә дә тәсәлливериҹи олур! Бу, дәринин сызылдајан һиссәси үчүн сакитләшдириҹи мәлһәм кимидир! Буна ҝөрә дә гардашларындан һансынынса ағыр вәзијјәтдә олдуғуну ҝөрүрсәнсә, она дајаг ол. Әҝәр сәнин өзүнү һансыса проблем јорур вә инҹидирсә, руһән јеткин мәсиһчиләрдән көмәк дилә (Јагуб 5:14, 15).

Јығынҹаг неҹә көмәк едә биләр?

12. Јығынҹагда һәр бир кәс гардашларынын иманыны неҹә гүввәтләндирә биләр?

¹² Јығынҹағын бүтүн үзвләри, һәтта ушаглар вә јенијетмәләр белә бу вә ја диҝәр тәрздә башгалары үчүн дајаг ола биләрләр. Сәнин мүнтәзәм олараг јығынҹагда олмағын вә тәблиғдә иштирак етмәјин башгаларынын иманыны чох мөһкәмләдир (Ибраниләрә 10:24, 25). Мүгәддәс хидмәтдә мәтанәт ҝөстәрмәјин сүбут едир ки, сән Јеһоваја садигсән вә проблемләринә бахмајараг руһән ојагсан (Ефеслиләрә 6:18). Бу ҹүр мәтанәт ҝөстәрмәјин, гардашларына гүввәтләндириҹи тә’сир ҝөстәрир (Јагуб 2:18).

13. Бә’зиләри нәјә ҝөрә гејри-фәал олурлар вә онлара неҹә көмәк етмәк олар?

¹³ Бә’зән һәјатын ағырлығындан вә ја диҝәр чәтинликләр уҹбатындан ким исә аз тәблиғ етмәјә, јахуд да тәблиғ хидмәтиндә гејри-фәал олмаға башлајыр (Марк 4:18, 19). Биз онлары јығынҹаг ҝөрүшләриндә ҝөрмәјә биләрик. Лакин онлар, еһтимал ки, һәлә дә үрәкләриндә Аллаһа мәһәббәт дујурлар. Онларын иманыны неҹә гүввәтләндирмәк олар? Ағсаггаллар гејри-фәал оланлара баш чәкәрәк онлара хејирхаһлыгла јардым ҝөстәрирләр (Һәвариләрин ишләри 20:35). Онлар јығынҹағын башга үзвләриндән дә көмәк диләјә биләрләр. Еһтимал ки, бу ҹүр зијарәтләр вә ҝөстәрилән гајғы, иманда зәиф олана јенидән ајаға галхмагда көмәк едән мәһз һәмин дәрман олаҹаг.

14, 15. Башгаларыны руһландырмаг үчүн Павел бизә һансы мәсләһәти верди? Онун мәсләһәтинә риајәт едән бир јығынҹаг һаггында данышын.

¹⁴ Мүгәддәс Китаб бизи тәшвиг едир: “Ҹәсарәтсизләри [“кәдәрли оланлары”, ЈД] руһландырын, зәифләрә јардым един” (1 Салониклиләрә 5:14). Ола биләр бу ҹүр “кәдәрли оланлар” ҹәсарәтләринин азалдығыны ҝөрүр вә гаршыларында олан манеәни башгаларынын көмәји олмадан дәф едә билмәдикләрини дүшүнүрләр. Онлара јардым әлини узада биләрсәнми? “Зәифләрә јардым етмәк” ифадәси зәифләри “мөһкәм тутмаг” вә ја онлара “мөһкәм јапышмаг” мә’наларыны да дашыја биләр. Јеһова бүтүн гојунларыны әзизләјир вә севир. Онлар Јеһова үчүн дәјәрлидир вә О истәмир ки, ахын онлардан һансыныса узаглашдырсын. Руһән зәифләр гүввәтләнәнә кими, онлары “мөһкәм тутмагда” јығынҹаға көмәк едә биләрсәнми? (Ибраниләрә 2:1).

¹⁵ Бир ағсаггал алты ил гејри-фәал олан әр-арвада баш чәкди. Ағсаггал јазыр: “Бүтүн јығынҹаг тәрәфиндән ҝөстәрилән хејирхаһлыг вә мәһәббәт, онлары сүрүјә гајытмаға тәшвиг едән ҝүҹлү стимул олду”. Јығынҹағын үзвләринин зијарәтләри гејри-фәал олан бир баҹыја неҹә тә’сир етди? О данышыр: “Бизә јенидән фәал олмагда көмәк едән о олду ки, нә бизә ҝәлән гардашлар, нә дә онларла ҝәлән баҹылар бизә һеч вахт мәһкумедиҹи вә ја тәнгиди сурәтдә јанашмырдылар. Әксинә, онлар анлајышлы идиләр вә бизи Мүгәддәс Китабдан олан фикирләрлә руһландырырдылар”.

16. Гүввәтләндирилмәјә еһтијаҹы оланлара көмәк етмәјә һәр заман һазыр олан кимдир?

¹⁶ Шүбһәсиз ки, Мәсиһин һәгиги давамчылары башгалары үчүн дајаг олмағы арзулајырлар. Елә шәраитләр јарана биләр ки, бизә дә гардашларын көмәји лазым ола биләр. Лакин реалист олаг, елә вәзијјәт јарана биләр ки, чәтин анларда бизә көмәк етмәк үчүн јанымызда һеч ким олмаз. Лакин һәр заман јанымызда олан вә һәр заман бизә көмәк етмәјә һазыр олан гүввә Мәнбәјимиз вар. Бу, Јеһова Аллаһдыр (Мәзмур 27:10).

Јеһова — башлыҹа гүввә Мәнбәји

17, 18. Јеһова Өз Оғлу Иса Мәсиһи неҹә гүввәтләндирирди?

¹⁷ Дирәјә мисмарланмыш Иса нида етди: “Еј Ата! Өз руһуму Сәнин әлләринә верирәм” (Лука 23:46). Бундан сонра о өлдү. Ҹәми бир нечә саат әввәл о, һәбс олунмушдур, јахын достлары исә ону тәрк едиб гачмышдылар (Матта 26:56). Исанын јалныз бир гүввә Мәнбәји — онун сәмави Атасы галмышдыр. Исанын да Јеһоваја бел бағламасы әбәс дејилди. Јеһова Өз Оғлуна сәдагәтлә көмәклик едәрәк, ону садиглијинә ҝөрә мүкафатландырды (Мәзмур 18:25; Ибраниләрә 7:26).

¹⁸ Иса јер үзүндәки хидмәти заманы нөгсансызлығыны сона гәдәр горујуб сахлаја билмәк үчүн лазым олан һәр бир шеји Јеһовадан алырды. Иса, мәсәлән, хидмәтинә башлајараг вәфтиз олундуғу заман, Атасы ону бәјәндијини вә севдијини уҹадан билдирди. Иса көмәјә еһтијаҹ дујанда, Јеһова ону гүввәтләндирмәк үчүн мәләкләрини ҝөндәрирди. Иса јер үзүндәки һәјатынын сонунда ән бөјүк сынагла гаршылашдығы заман, Јеһова онун јалварышларыны вә диләкләрини илтифатла ешитди. Сөзсүз ки, бүтүн бунлар Иса үчүн дајаг иди (Марк 1:11, 13; Лука 22:43).

19, 20. Чәтин анларда Јеһованын бизи гүввәтләндирәҹәјинә нәјә ҝөрә әминик?

¹⁹ Јеһова бизим үчүн дә башлыҹа гүввә Мәнбәји олмаг истәјир (2 Тарихләр 16:9). О, бөјүк гүввәнин вә үстүн гүдрәтин һәгиги Мәнбәјидир вә еһтијаҹ дујдуғумуз заман бизә дајаг ола биләр (Ишаја 40:26). Мүһарибә, јохсуллуг, хәстәликләр, өлүм, бизим шәхси гејри-камиллијимиз — бүтүн бунлар бизим үчүн ағыр јүк ола биләр. Һәјатын сынаглары “гүввәтли дүшмән” кими бизә ҝүҹ ҝәләндә, Јеһова бизим ҝүҹүмүз вә гүввәмиз ола биләр (Мәзмур 18:17; Чыхыш 15:2). Бизә көмәк етмәк үчүн Онун гүввәтли мүгәддәс руһу вар. Јеһова Өз руһу илә “зәиф олана гүввәт верир” ки, онлар ‘гарталлар кими ганад ҝәрсинләр’ (Ишаја 40:29, 31).

²⁰ Аллаһын руһу Каинатда ән ҝүҹлү гүввәдир. Павел демишдир: “Мәни Мөһкәмләндирән васитәсилә һәр шеји етмәјә гадирәм”. Бизим севән сәмави Атамыз, бизә “ән үстүн гүдрәт”и верә биләр ки, О, артыг олдугҹа јахын олан вә’д едилмиш Ҹәннәтдә һәр шеји ‘јениләшдирәнә’ гәдәр биз һәр бир чәтинлијә таб ҝәтирәк (Филипилиләрә 4:13, И–93; 2 Коринфлиләрә 4:7; Вәһј 21:4, 5).

[Һашијә]

Јадыныздадырмы?

• Ромадакы гардашлар Павел үчүн неҹә дајаг олдулар?

• Јығынҹагда биз неҹә дајаг ола биләрик?

• Гүввәнин башлыҹа Мәнбәји олан Јеһовадан биз неҹә ҝүҹ ала биләрик?

[29-ҹу сәһифәдәки шәкил]

Сүрүнү гүввәтләндирмәкдә ағсаггаллар рәһбәрлији өз үзәрләринә ҝөтүрүрләр.

[31-ҹи сәһифәдәки шәкил]

Гардашлар Павели сәдагәтлә гүввәтләндирәрәк вә руһландырараг, һәмчинин она мүхтәлиф ишләрдә гуллуг ҝөстәрәрәк, онун үчүн дајаг олдулар.