Јегова јорғун олана гүввәт верир

“[Јегова] зәиф олана гүввәт верир вә тагәтсизин гүдрәтини артырыр” (ИШАЈА 40:29).

1. Аллаһын јаратдығы шејләрдә олан гүввәни нүмунәләр әсасында ҝөстәрин.

ЈЕГОВАНЫН гүввәси һәдсиздир. Јаратдығы шејләрдә дә чох бөјүк динамик енержи вардыр. Һәр бир шејин тәркибини тәшкил едән атомлар о дәрәҹәдә кичикдир ки, бир дамҹы суда јүз квинтилјон атом вардырa. Планетимиздә олан бүтүн ҹанлы һәјат, Ҝүнәшин тәркибиндәки истилик-нүвә реаксијасындан јаранан енержи сајәсиндә мөвҹуддур. Бәс јер үзүндә һәјатын давам етмәси үчүн нә гәдәр Ҝүнәш енержисинә еһтијаҹ вардыр? Јер, Ҝүнәшин һасил етдији енержинин јалныз кичик бир һиссәсини алыр. Бунунла јанашы, ријазијјатчы Фред Хојлун, өзүнүн “Астрономија” китабында јаздығы кими: “Јер күрәсинин Ҝүнәшдән алдығы ҹүз’и енержи... дүнја сәнајесиндә истифадә едилән бүтүн енержидән тәхминән 100 000 дәфә артыгдыр” (“Astronomy”).

2. Ишаја 40:26-ҹы ајәсиндә Јегованын гүввәси һаггында әслиндә нә дејилир?

² Истәр атома, истәрсә дә уҹсуз-буҹагсыз Каината диггәт јетирәк, Јегованын валеһедиҹи гүввәси бизи ләрзәјә салыр. Буна ҝөрә дә Јегованын: “ҝөзләринизи јухары галдырын вә ҝөрүн, бунлары ким јаратды; о ки, бунларын ордусуну сајы илә чыхарыр; онларын һамысыны адлары илә чағырыр; гүдрәтинин бөјүклүјүнә ҝөрә вә гүввәтинин зору илә онлардан һеч бири әксилмәз”,- демәси тәәҹҹүблү дејил (Ишаја 40:26). Бәли, Јегованын “гүдрәти бөјүкдүр” вә О, Каинатын јарадылмасында истифадә едилән гүввәнин Мәнбәјидир.

Үстүн гүдрәт тәләб олунур

3, 4. а) Мисал үчүн, бизи гүввәдән нә мәһрум едә биләр? б) Һансы суал нәзәрдән кечирилмәлидир?

³ Аллаһын гүввәси түкәнмәздир, инсанлара исә јорулмаг хасдыр. Јорғун адамлары һәр јердә ҝөрмәк олар. Онлар динҹәлмәдән ојаныр, ишә вә ја мәктәбә јорғун ҝедир, евә јорғун гајыдыр, јатанда исә нәинки јорғун, һәтта әлдән дүшмүш вәзијјәтдә олурлар. Бә’зиләри бир јана ҝетмәк вә еһтијаҹлары олдуғу үчүн бир аз динҹәлмәк истәјирләр. Јегованын хидмәтчиләри олан бизләр дә јорулуруг, чүнки Аллаһа сәдагәти һәмишә горујуб-сахламаг ҹәһдимиз бөјүк ҝәрҝинлик тәләб едир (Марк 6:30, 31; Лука 13:24; 1 Тимотејә 4:8). Бизи тагәтдән салан башга шејләр дә вардыр.

⁴ Биз мәсиһчи олсаг да, үмумијјәтлә инсанларын гаршылашдыглары проблемләрдән тамамилә мүдафиә едилмирик (Ејуб 14:1). Хәстәлик, малијјә дәјишкәнлији вә ја һәјатда тез-тез гаршылашдығымыз диҝәр чәтинликләр бизи руһдан сала биләр, бу исә гүввәмизи сарсыдыр. Бу чәтинликләрдән әлавә, бә’зи мәсиһчиләр салеһлик уғрунда тә’гибләрә мә’руз галырлар (2 Тимотејә 3:12; 1 Петер 3:14). Бу дүнјанын ҝүндәлик тәзјигләри вә Падшаһлыг һаггындакы хош хәбәрин тәблиғ ишинә ҝөстәрилән мүгавимәтләр о гәдәр тагәтдән сала биләр ки, бизләрдән кимдә исә Јеговаја хидмәти зәифләтмәк истәји јаранар. Бундан әлавә, Аллаһ гаршысындакы нөгсансызлығымызы сындырмаға ҹәһд ҝөстәрәрәк, Шејтан Иблис ихтијарында олан мүхтәлиф үсуллардан истифадә едир. Әлдән дүшмәмәк вә тәслим олмамаг үчүн, биз руһани гүввәни һарадан ала биләрик?

5. Мәсиһчи хидмәтини иҹра етмәк үчүн нәјә ҝөрә јалныз инсан гүввәси кифајәт етмир?

⁵ Биз руһани гүввәни гүдрәтли Јараданымыз Јеговадан алмалыјыг. Һәвари Павел диггәти она јөнәлтди ки, ади гүввәдән үстүн олан гүввәнин көмәји олмадан, гејри-камил инсанлар мәсиһчи хидмәтинин өһдәсиндән ҝәлә билмәзләр. О јазырды: “Лакин бу сәрвәти сахсы габларда сахлајырыг ки, ән үстүн гүдрәт бизә јох, Аллаһа аид олсун” (2 Коринфлиләрә 4:7). Мәсһедилмиш мәсиһчиләр, јердә јашамаг үмиди олан јолдашларынын көмәклији илә “барышдырма хидмәтини” һәјата кечирирләр (2 Коринфлиләрә 5:18; Јәһја 10:16; Вәһј 7:9). Гејри-камил инсанлар олдуғумуздан, Аллаһын ирадәсини јеринә јетирәркән мүгавимәтләрлә гаршылашдығымыздан, буну өз гүввәмиз сајәсиндә едә билмәјәҹәјик. Јегова бизә мүгәддәс руһу илә көмәк едир, беләликлә дә бизим зәифлијимиз Онун гүдрәтини иззәтләндирир. Вә биләндә ки, “РӘБ салеһләрә дәстәк олур”, бу бизә нә гәдәр дә тәсәлли верир! (Мәзмур 37:17).

Јегова һәјат енержимиздир

6. Мүгәддәс Јазылар, Јегованын гүввәмизин Гајнағы олдуғуна бизи неҹә әмин едир?

⁶ Сәмави Атамызын “гүввәти зор”дур вә О, һеч бир чәтинлик чәкмәдән бизә гүввәт верә биләр. Әслиндә бизә дејилир: “[Јегова] зәиф олана гүввәт верир вә тагәтсизин гүдрәтини артырыр. Ҝәнҹләр белә зәифләр вә јорулар вә иҝидләр һамысы јыхыларлар; фәгәт РӘББИ ҝөзләјәнләр гүввәтләрини тәзәләр, гарталлар кими ганад ҝәриб јүксәлирләр; сәјиртәрләр вә јорулмазлар; ҝедәрләр вә зәифләмәзләр” (Ишаја 40:29—31). Һәјатда артан ҝәрҝинлик уҹбатындан, биз бә’зән өзүмүзү әлдән дүшмүш гачыҹы кими һисс едирик. Лакин финиш хәтти дүз гаршымыздадыр вә биз һәјат уғрундакы гачышы дајандырмамалыјыг (2 Тарихләр 29:11). Дүшмәнимиз олан Иблис “нә’рә чәкән... аслан” кими ҝәзир вә бизи дајандырмаг истәјир (1 Петер 5:8). Унутмајаг ки, Јегова “гүдрәтимиз вә галханымыздыр” вә “зәиф олана гүввәт” вермәк үчүн чох үсуллар тәгдим едир (Мәзмур 28:7).

7, 8. Јегованын Давуду, Һабаккуку вә Павели гүввәтләндирмәсинә даир һансы сүбутлар мөвҹуддур?

⁷ Јегова Давуда, бөјүк манеәләри дәф етмәси үчүн лазым олан гүввәни верди. Буна ҝөрә дә, Давуд там иман вә әминликлә јазырды: “Аллаһ илә иҝидликләр едәрик [“һәјат енержисини әлдә едәрик”, ЈД]; дүшмәнләримизи ајаглајаҹаг олан одур” (Мәзмур 60:12). Јегова һәмчинин Һабаккука да гүввәт верирди ки, о, бир пејғәмбәр кими она тапшырылмыш иши ахыра гәдәр јеринә јетирә билсин. Һабаккук 3:19-ҹу ајәсиндә дејилир: “Јегова, Рәб, мәним гүввәтимдир; вә ајагларымы марал ајаглары кими едәр вә мәни јүксәк јерләрим үзәриндә ҝәздирәр”. Ашағыдакы сөзләри јазан Павелин дә нүмунәси диггәтә лајигдир: “Мәни Мөһкәмләндирән васитәсилә һәр шеји етмәјә гадирәм” (Филипилиләрә 4:13, И—93).

⁸ Давуд, Һабаккук вә Павел кими, Аллаһын бизи гүввәтләндириб, хилас етмәјә гадир олдуғуна биз дә иман етмәлијик. Инди исә, Күлл-Ихтијар Рәбб Јегованын “һәјат енержимизин” Гајнағы олдуғуну хатырлајараг, Онун бизә бол-бол вердији не’мәтләрдән руһани гүввәни мәнимсәмәјин үсулларына бахаг.

Мөһкәмләнмәјимиз үчүн руһани бәхшишләр

9. Мәсиһчи нәшрләри бизим гидаланмағымызда һансы ролу ојнајыр?

⁹ Мүгәддәс Јазылары, мәсиһчи нәшрләринин көмәји илә сә’јлә өјрәнмәк бизим үчүн гүввә вә јардым мәнбәјидир. Мәзмурчу охујурду: “Нә бәхтијардыр о адам ки... зөвгү РӘББИН шәриәтиндәдир. Вә ҝеҹә-ҝүндүз онун шәриәтини дәриндән дүшүнүр. Ахар сулар кәнарына әкилмиш ағаҹ кимидир, мејвәсини мөвсүмүндә верир вә јарпағы солмаз; етдији һәр иш дә јахшы ҝедәр” (Мәзмур 1:1—3). Физики гүввәмизи горумаг үчүн јемәк јемәмиз лазым олдуғу кими, руһани гүввәмизи горумаг үчүн дә Аллаһын Өз Кәламы вә мәсиһчи нәшрләри васитәсилә вердији руһани гиданы мәнимсәмәк лазымдыр. Буна ҝөрә тамдәјәрли өјрәнмә вә онун үзәриндә дәриндән дүшүнмәк ваҹибдир.

10. Өјрәнмәк вә дүшүнмәк үчүн вахты неҹә тапа биләрик?

¹⁰ “Аллаһын дәринликләри” үзәриндә дүшүнмәк хош вә фајдалы мәшғулијјәтдир (1 Коринфлиләрә 2:10, И—93). Бәс дүшүнмәк үчүн мүнасиб вахты неҹә тапа биләрик? Ибраһимин оғлу Исһаг “ахшама доғру дүшүнҹәјә далмаг үчүн тарлаја чыхды” (Тәквин 24:63—67). Мәзмурчу Давуд “ҝеҹә нөвбәләриндә... [Аллаһ һаггында] дәрин дүшүнүрдү” (Мәзмур 63:5). Аллаһын Кәламыны сәһәр, ахшам вә ҝеҹә - бир сөзлә, истәнилән вахт өјрәнмәк вә үзәриндә дүшүнмәк олар. Белә өјрәнмәнин вә дүшүнмәнин ардынҹа, Јегованын бизи руһән мөһкәмләтмәјә јөнәлдилмиш башга бир мүкафаты олан дуа ҝәлир.

11. Нәјә ҝөрә дуаја даһа чох әһәмијјәт вермәлијик?

¹¹ Аллаһа мүнтәзәм олараг дуа етмәк бизим мөһкәмләнмәјимизә көмәк едәр. Беләликлә, “дуада мәтанәтли” олаг (Ромалылара 12:12). Бә’зән һансыса бир сынағын өһдәсиндән ҝәлмәк үчүн лазым олан мүдриклик вә гүввә һаггында, Аллаһа даһа исрарла дуа етмәли олуруг (Јагуб 1:5—8). Ҝәлин, нијјәтләринин јеринә јетдијини вә ја хидмәтимизи давам етдирмәк үчүн бизә ҝүҹ вердијини ҝөрдүкҹә, Аллаһа миннәтдар олаг вә Она һәмд едәк (Филипилиләрә 4:6, 7). Әҝәр биз дуада Јегова илә јахын мүнасибәтдә галсаг, О, бизи һеч заман тәрк етмәјәҹәкдир. Давуд охујурду: “Будур, Аллаһ мәнә јардымчыдыр” (Мәзмур 54:4).

12. Нәјә ҝөрә Аллаһдан мүгәддәс руһ диләмәлијик?

¹² Сәмави Атамыз бизә гүввәт верир вә бизи, мүгәддәс руһунун, јә’ни фәал гүввәсинин васитәсилә мөһкәмләндирир. Павел јазырды: “Бу сәбәбдән... Атанын гаршысында диз чөкүрәм ки... Өз иззәтинин зәнҝинлијинә ҝөрә, дахили варлығынызда Өз Руһу илә гүввәтли шәкилдә мөһкәмләнмәнизи тә’мин етсин” (Ефеслиләрә 3:14—16). Биз мүгәддәс руһ барәсиндә дуа етмәли вә ону Јеговадан алаҹағымыза әмин олмалыјыг. Иса мүлаһизә едирди: ушаг балыг истәрсә, мәҝәр севән ата она илан верәрми? Әлбәттә ки, јох. Буна ҝөрә дә, Иса белә бир нәтиҹәјә ҝәлди: “Мадәм ки, сиз [ҝүнаһкар, она ҝөрә дә бу вә ја диҝәр дәрәҹәдә] пис олдуғунуз һалда өз өвладларыныза јахшы һәдијјәләр верә билирсиниз, Сәмави Атанызын Ондан диләјәнләрә Мүгәддәс Руһу верәҹәји нә гәдәр јәгиндир!” (Лука 11:11—13). Ҝәлин әминликлә дуа едәк вә Аллаһын садиг хидмәтчиләринин, Онун руһунун көмәји илә “гүввәтли шәкилдә мөһкәмләнә” биләҹәкләрини һәмишә хатырлајаг.

Мөһкәмләнмәјә јығынҹаг да көмәк едир

13. Мәсиһчи ҝөрүшләринә неҹә јанашмалыјыг?

¹³ Јегова бизә мәсиһчи јығынҹаглары васитәсилә гүввәт верир. Иса деди: “Һарадаса ики вә ја үч киши Мәним адымла бир јерә топлашмыш олурса, Мән орада, онларын арасындајам” (Матта 18:20). Буну вә’д едәрәк, Иса јығынҹагда рәһбәрлији үзәринә ҝөтүрәнләрин диггәтини тәләб едән мәсәләләри мүзакирә етди (Матта 18:15—19). Буна бахмајараг, Исанын сөзләри, онун ады наминә дуајла башлајан вә гуртаран бүтүн јығынҹаг ҝөрүшләринә вә конгрессләрә дә аиддир (Јәһја 14:14). Буна ҝөрә дә, ҹәми бир нечә вә ја минләрлә инсан иштирак етсә дә, белә мәсиһчи ҝөрүшләринә ҝетмәк имканыны гијмәтләндирмәк лазымдыр. Ҝәлин бизи руһән мөһкәмләндирмәјә, мәһәббәтә вә хејирли ишләрә тәшвиг етмәјә јөнәлдилмиш бу ҝөрүшләр үчүн миннәтдарлығымызы билдирәк (Ибраниләрә 10:24, 25).

14. Мәсиһчи ағсаггалларынын әмәји бизә һансы фајдалары ҝәтирир?

¹⁴ Мәсиһчи ағсаггаллары руһән јардым едир вә руһландырырлар (1 Петер 5:2, 3). Павел, буҝүнкү сәјјаһ нәзарәтчиләр кими, хидмәт етдији јығынҹаглара көмәк едир вә онлары мөһкәмләндирирди. Бундан әлавә, гаршылыглы мөһкәмләндириҹи руһ јүксәклији әлдә етмәләри үчүн, Павел һәмиманлылары илә бирликдә олмағы чох арзу едирди (Һәвариләрин ишләри 14:19—22; Ромалылара 1:11, 12). Ҝәлин, руһани мөһкәмлијимиздә бөјүк ролу олан јығынҹағымызын ағсаггалларыны вә башга мәсиһчи нәзарәтчиләрини гијмәтләндирдијимизи ҝөстәрәк.

15. Јығынҹағымызда олан һәмиманлыларымыз бизә неҹә “дајаг” ола биләрләр?

¹⁵ Јығынҹағымызда олан һәмиманлыларымыз бизә “дајаг” ола биләрләр (Колослулара 4:10, 11). Онлар бизим достларымыздыр вә чәтин анларда көмәјимизә ҝәлә биләрләр (Сүлејманын мәсәлләри 17:17). Мисал үчүн, 1945-ҹи илдә Заксенһаузен һәбс дүшәрҝәсиндә олан, Аллаһын 220 хидмәтчиси насист конвојунун мүшаијәти алтында 200 км мәсафә гәт етмәли иди. Онлар груп һалында ҝедирдиләр вә ҝүҹлү оланлар зәифләри, сүрүдүкләри бир нечә арабада дашыдылар. Нәтиҹәси нә олду? 10 000-дән артыг инсанын өлүмүнә баис олан бу јүрүш заманы бир нәфәр дә олсун Јегованын Шаһиди өлмәди. Ҝөзәтчи Гүлләси Ҹәмијјәтинин нәшрләриндә, мәсәлән, “Јегованын Шаһидләринин сәлнамәси”ндә вә “Јегованын Шаһидләри - Аллаһын Падшаһлығынын мүждәчиләри” (инҝ.) китабында тәсвир едилән бу ҹүр һадисәләр ҝөстәрир ки, тәслим олмасынлар дејә, Аллаһ өз хидмәтчиләринә гүввәт верир (Галатијалылара 6:9)b.

Бизи тәблиғ хидмәти мөһкәмләндирир

16. Хидмәтдә мүнтәзәм олараг иштирак етмәјимиз бизи руһән неҹә мөһкәмләндирир?

¹⁶ Падшаһлыг һаггындакы тәблиғ ишиндә мүнтәзәм олараг иштирак етмәк бизи руһән мөһкәмләндирир. Бу фәалијјәт, диггәтимизи Аллаһын Падшаһлығына ҹәмләшдирмәјә, әбәди һәјаты вә ҝәләҹәк хејир-дуалары нәзәрдән гачырмамағымыза көмәк едир (Јәһуда 20, 21). Хидмәт заманы, һаггында данышдығымыз Мүгәддәс Китаб вә’дләри бизә үмид верир вә ашағыдакы сөзләри дејән Мика пејғәмбәр кими, бизә дә ҹәсарәт верә биләр: “Биз дә даима вә әбәдијјән Аллаһымыз РӘББИН исмилә јеријәҹәјик” (Мика 4:5).

17. Мүгәддәс Китабын евдә өјрәнилмәси илә әлагәдар нә тәклиф олунур?

¹⁷ Башгаларыны өјрәдәркән Мүгәддәс Китабы даһа ҝениш истифадә етмәклә, Јегова илә олан мүнасибәтләримизи мөһкәмләндиририк. Мисал үчүн, “Әбәди һәјата апаран билик” китабынын васитәсилә киминләсә Мүгәддәс Китабы евдә өјрәнәркән, ҝөстәрилән ајәләрдән бә’зиләрини охумаг вә мүзакирә етмәк јахшы оларды. Бу, өјрәнән шәхсә көмәк едәр вә бизим шәхси руһани анлајышымызы јахшылашдырар. Әҝәр өјрәнән шәхсә Мүгәддәс Китабын мә’луматларыны вә ја әјани нүмунәләрини гаврамаг чәтин ҝәлирсә, онда “Билик” китабынын бир фәслини бир нечә дәфәјә кечмәк олар. Башгаларынын Аллаһа јахынлашмаларына көмәк етмәк үчүн әлавә сә’јләр тәтбиг етсәк бөјүк мәмнунлуг дујаҹағыг!

18. “Билик” китабынын хидмәтдә кејфијјәтлә истифадә едилмәсини нүмунә әсасында ҝөстәрин.

¹⁸ “Билик” китабынын кејфијјәтлә истифадә едилмәси сајәсиндә һәр ил минләрлә инсан Јегованын һәср олунмуш хидмәтчиси олур. Һалбуки, әввәлләр онлардан әксәријјәтинин Мүгәддәс Китаб һаггында тәсәввүрләри јох иди. Мәсәлән, Шри-Ланкадан олан бир һинду, ушаг оларкән бир Шаһидин ҹәннәт һаггында данышдығыны ешитмишди. Бир нечә илдән сонра о, һәмин гадына јахынлашды вә гыса вахтдан сонра гадынын әри онунла Мүгәддәс Китаб өјрәнмәсинә башлады. Һәмин ҝәнҹ, өјрәнмәјә һәр ҝүн ҝәлирди вә онлар “Билик” китабыны нисбәтән гыса вахтда баша чатдырдылар. О, бүтүн јығынҹаг ҝөрүшләринә ҝәлмәјә башлады, әввәлки дини илә бүтүн әлагәни кәсди вә Падшаһлығын мүждәчиси олду. Вәфтиз олундуғу вахт исә, артыг бир танышы илә Мүгәддәс Китаб өјрәнмәси кечирирди.

19. Әввәлҹә Падшаһлығы ахтарсаг нәјә әмин ола биләрик?

¹⁹ Әввәлҹә Падшаһлығы ахтарараг, бизи мөһкәмләндирән севинҹи әлдә едирик (Матта 6:33). Мүхтәлиф сынагларла гаршылашсаг да, хош хәбәри севинҹлә вә сә’јлә тәблиғ етмәјә давам едирик (Титуса 2:14). Бизләрдән әксәријјәти таммүддәтли пионер кими химдәт едир, башгалары исә даһа чох тәблиғчиләр тәләб олунан јердә хидмәт едирләр. Һансы јолла олурса-олсун, Падшаһлығын мәнафејинә көмәк едириксә, әмин ола биләрик ки, Јегова ишимизи вә Онун исминә ҝөстәрдијимиз мәһәббәти унутмајаҹагдыр (Ибраниләрә 6:10—12).

Јеговадан гүввәт алараг хидмәт етмәјә давам един

20. Јегованын гүввәсинә ҝүвәндијимизи неҹә ҝөстәрә биләрик?

²⁰ Ҝәлин сәмими гәлбдән ҝөстәрәк ки, Јеговаја үмид бәсләјир вә Онун гүввәсинә ҝүвәнирик. Буну, Аллаһын “садиг... гул”у васитәсилә вердији бүтүн руһани бәхшишләрдән фајдаланмагла едә биләрик (Матта 24:45). Аллаһын Кәламыны мүстәгил вә ја јығынҹагла бирликдә мәсиһчи нәшрләринин васитәсилә өјрәнмәк, үрәкдән ҝәлән дуалар, ағсаггаллар тәрәфиндән руһани јардым, садиг һәммәсиһчиләрин нүмунәси вә хидмәтдә мүнтәзәм олараг иштирак етмәк, Јегова илә мүнасибәтләримизи мөһкәмләндирән бә’зи бәхшишләрдир вә Она мүгәддәс хидмәти давам етдирмәк үчүн лазым олан гүввә мәнбәјидир.

21. Һәвари Петер вә Павел Аллаһдан ҝәлән гүввәјә еһтијаҹ дујдугларыны неҹә ҝөстәрдиләр?

²¹ Биз инсанлар зәифик, лакин Јегованын көмәјинә ҝүвәнсәк, ирадәсини јеринә јетирмәк үчүн О, бизи мөһкәмләндирәҹәкдир. Белә көмәклијин ваҹиблијини дәрк едән һәвари Петер јазырды: “Хидмәт едән, Аллаһын тә’мин етдији гүввәтлә хидмәт етсин” (1 Петер 4:11). Павел дә ашағадакы сөзләри јазараг, Аллаһын гүввәсинә ҝүвәндијини ҝөстәрди: “Мән, Мәсиһ уғрунда зәифликләрә, тәһгирләрә, еһтијаҹа, тә’гибләрә вә сыхынтылара таб ҝәтирмәјә разыјам; чүнки мән зәиф олдуғум заман гүввәтлијәм” (2 Коринфлиләрә 12:10). Ҝәлин белә әминлији әкс етдирәк вә јорғун олана гүввәт верән Күлл-Ихтијар Рәбб Јеговаја иззәт верәк (Ишаја 12:2).

[Һашијәләр]

Сиз неҹә ҹаваб верәрдиниз?

• Јегованын халгы нәјә ҝөрә ән үстүн гүдрәтә еһтијаҹ дујур?

• Аллаһын өз хидмәтчиләринә гүввәт вермәсинә Мүгәддәс Китаб неҹә шаһидлик едир?

• Мөһкәмләнмәјимиз үчүн Јегованын вердији бә’зи руһани бәхшишләр һансылардыр?

• Аллаһын гүввәсинә ҝүвәндијимизи неҹә ҝөстәрә биләрик?

[22-ҹи сәһифәдәки шәкил]

Башгаларыны өјрәдәркән Мүгәддәс Китабы истифадә етмәклә, Јегова илә мүнасибәтләримизи мөһкәмләндиририк.