Ички ичмәк мәсәләсиндә таразлығы гору

«Шәраб инсанлары әлә салар, кефләндириҹи ички онлары далашдырар, сәрхош олан [«онлара ҝөрә јолуну азан», ЈД] мүдрик олмаз» (СҮЛЕЈМАНЫН МӘСӘЛЛӘРИ 20:1).

1. Мәзмурчу Јеһовадан ҝәлән јахшы бәхшишләрдән бә’зиләринә ҝөрә өз миннәтдарлығыны неҹә ифадә етди?

ШАҜИРД Јагуб јазырды: «Һәр бир јахшы бәхшиш вә һәр камил һәдијјә јухарыдан, нурлар Атасындан ҝәлир» (Јагуб 1:17). Аллаһдан ҝәлән чохсајлы бәхшишләрә ҝөрә миннәтдарлыг һисси илә долу олан мәзмурчу исә белә охујурду: «Һејванлар үчүн от битирирсән, инсана беҹәрмәк үчүн биткиләр јетирирсән. Гој инсан торпагдан азугәсини чыхартсын: үрәкләри хошһал едән шәрабы, үзләри ҝүлдүрән зејтун јағыны, тагәт верән чөрәји» (Мәзмур 104:14, 15). Битки, чөрәк вә зејтун јағы кими шәраб вә башга спиртли ичкиләр дә Аллаһдан ҝәлән ҝөзәл бәхшишләрдир. Биз бу бәхшишләрдән неҹә истифадә етмәлијик?

2. Ички ичмәк мәсәләси илә бағлы һансы суаллары мүзакирә едәҹәјик?

² Һәр бир хош бәхшиш јалныз дүзҝүн шәкилдә истифадә едилдикдә фајда ҝәтирир. Мәсәлән, балын «хејри вар», лакин «чох бал јемәк хејирли... дејил» (Сүлејманын мәсәлләри 24:13; 25:27). Еләҹә дә «бир аз шәраб» ичмәк хошдур, амма спиртли ичкиләрдән суи-истифадә етмәк ҹидди проблем јарада биләр (1 Тимотејә 5:23). Мүгәддәс Китаб хәбәрдарлыг едир: «Шәраб инсанлары әлә салар, кефләндириҹи ички онлары далашдырар, сәрхош олан [«онлара ҝөрә јолуну азан», ЈД] мүдрик олмаз» (Сүлејманын мәсәлләри 20:1). Бәс алкогола ҝөрә ‘јолуну азмаг’ нә демәкдир?a Һансы мигдарда спиртли ички һәддиндән артыг сајылыр? Бу суала даир таразлы нөгтеји-нәзәр нәдән ибарәтдир?

Алкогола ҝөрә ‘јолуну азмаг’ нә демәкдир?

3, 4. а) Сәрхошлуғун Мүгәддәс Китабда мүһакимә олундуғуну нә ҝөстәрир? б) Сәрхошлуғун әламәтләриндән бә’зиләри һансылардыр?

³ Гәдим Исраилдә бир оғул өјүд-нәсиһәт верилмәсинә бахмајараг, гарынгулулуг вә әјјашлыгла мәшғул олмаға давам едирдисә, ону дашгалаг едиб өлдүрүрдүләр (Ганунун тәкрары 21:18-21). Һәвари Павел мәсиһчиләрә хәбәрдарлыг етмишдир: «Сиз өзүнү гардаш адландырыб, әхлагсызлыг, тамаһкарлыг, бүтпәрәстлик, аҹыдиллик, сәрхошлуг вә јахуд гәсбкарлыг едәнлә отуруб-дурмајасыныз; һәтта беләләри илә бир јердә чөрәк белә јемәјәсиниз». Беләликлә, сәрхошлуг Мүгәддәс Јазыларда ајдын шәкилдә мүһакимә олунур (1 Коринфлиләрә 5:11; 6:9, 10).

⁴ Мүгәддәс Китабда сәрхошлуғун әламәтләри белә тәсвир олунур: «Шәрабын ал рәнҝинә, гәдәһдә парламасына, раһат ичилмәсинә бахма. Ахырда илан кими санҹар, әф’и илан кими зәһәрләр. Ҝөзләринә гәрибә шејләр ҝөрүнәр, гәлбинә әјри фикирләр ҝәләр» (Сүлејманын мәсәлләри 23:31-33). Һәддиндән артыг ички ичмәк илан кими санҹыр: инсанын үрәји буланыр, фикирләри долашыр, о, һәтта һушуну белә итирә биләр. Сәрхош адам «гәрибә шејләр» ҝөрә биләр: онда гарабасмалар, јахуд фантазијалар јарана биләр. О, һәмчинин тәмкинлији итирир: адәтән инсанларын өзләриндә боғмаға чалышдыглары әхлагсыз фикир вә арзулар һагда сәрбәст данышыр.

5. Спиртли ичкиләрдән суи-истифадә етмәк нәјә ҝөрә тәһлүкәлидир?

⁵ Бә’зиләри дүшүнүр ки, сәрхош олдуглары кәнардан нәзәрә чарпмајынҹајадәк истәдикләри гәдәр ичә биләрләр. Лакин елә инсанлар вар ки, хејли ичсәләр белә, онларда сәрхошлуг әламәтләри мүшаһидә олунмур. Бунун зәрәрсиз олдуғуну дүшүнмәк өзүнү алдатмаг демәкдир (Јеремја 17:9). Инсанда тәдриҹән спиртли ичкиләрдән асылылыг јарана биләр вә о, «шәраб дүшкүнү»нә чеврилә биләр (Титуса 2:3). Әјјашлыг просеси һаггында Каролајн Непп өз китабында јазыр: «Бу, јаваш-јаваш, тәдриҹән вә нәзәрә чарпмадан баш верән просесдир». Бәли, спиртли ичкиләрдән суи-истифадә етмәк чох дәһшәтли бир тәләдир!

6. Нәјә ҝөрә инсан ички вә гида мәсәләсиндә таразлы олмалыдыр?

⁶ Исанын хәбәрдарлығыны хатырлајаг: «Диггәтли олун ки, үрәкләриниз гарынгулулуг вә сәрхошлугла, бу һәјатын гајғылары илә ағырлашмасын вә о Ҝүн сизи гәфләтән јахаламасын. Чүнки о Ҝүн бир тор кими јер үзүндә јашајанларын һамысына раст ҝәләҹәкдир» (Лука 21:34, 35). Физики вә руһани ҹәһәтдән сүст вә тәнбәл һала дүшмәк үчүн, сәрхош олана гәдәр ичмәјә еһтијаҹ јохдур. Јеһованын ҝүнү кими исә бу вәзијјәтдә гәфләтән јахаларса, онда неҹә?

Спиртли ичкиләрдән суи-истифадә етмәк нәјә ҝәтириб чыхарыр?

7. Спиртли ичкиләрдән суи-истифадә етмәк 2 Коринфлиләрә 7:1 ајәсиндәки ҝөстәришә нәјә ҝөрә зиддир?

⁷ Спиртли ичкиләрдән һәддиндән артыг истифадә етмәк физики вә руһани ҹәһәтдән бир чох тәһлүкәләрә сәбәб олур. Спиртли ичкиләрдән суи-истифадә етмәјин сәбәб олдуғу хәстәликләр арасында гараҹијәр сиррозу, һепатит вә мүхтәлиф әсәб позғунлуглары, мәсәлән, ағ иситмә (алкогол сајыгламасы) вардыр. Узунмүддәтли сәрхошлуг хәрчәнҝ, шәкәр, еләҹә дә үрәк вә мә’дә хәстәликләринә ҝәтириб чыхара биләр. Спиртли ичкиләрдән суи-истифадә Мүгәддәс Китабын нөвбәти ҝөстәришинә ачыг-ајдын зиддир: «Өзүмүзү һәр бир бәдән вә руһ мурдарлығындан тәмизләјәк вә Аллаһ горхусу илә камил гүдсијјәти әлдә едәк» (2 Коринфлиләрә 7:1).

8. Сүлејманын мәсәлләри 23:20, 21 ајәләринә әсасән, һәддиндән артыг ички ичмәк нәјә ҝәтириб чыхара биләр?

⁸ Һәддиндән артыг ички ичмәк инсанын пулуну исраф етмәсинә, һәтта ишини белә итирмәсинә ҝәтириб чыхара биләр. Гәдим Исраилин падшаһы Сүлејман хәбәрдарлыг едирди: «Шәраба дүшкүн әјјашлара, әт гапан гарынгулулара гошулма». Нә үчүн? О изаһ едир: «Чүнки әјјаш вә гарынгулу јохсуллашар, јејиб-ичиб, мәст олан ҹыр-ҹындыр ичиндә галар» (Сүлејманын мәсәлләри 23:20, 21).

9. Әҝәр сүкан архасында отурмалыјыгса, спиртли ичкидән имтина етмәк нәјә ҝөрә мүдрик һәрәкәт оларды?

⁹ Даһа бир тәһлүкә дә вар. «Тәдгигатлар ҝөстәрир ки, спиртли ичкиләр инсанын автомобил идарә етмәк габилијјәтинә тә’сир ҝөстәрир, чүнки инсанын реаксијасыны, координасијасыны, диггәтлилијини, ҝөрмә габилијјәтини, дәрракәсини күтләшдирир» («Тһе Енҹјҹлопедиа оф Алҹоһолисм»). Сәрхош һалда автомобил сүрмәјин нәтиҹәси фәлакәтли ола биләр. Тәкҹә Бирләшмиш Штатларда сәрхош сүрүҹүләр уҹбатындан баш верән автомобил гәзаларында һәр ил он минләрлә инсан һәлак олур, јүз минләрлә исә травма алыр. Бу тәһлүкәјә хүсусилә дә ҝәнҹләр мә’руз галырлар, чүнки онларын һәм сүрүҹүлүк, һәм дә ички ичмәк мәсәләсиндә тәҹрүбәләри аздыр. Демәк олармы ки, сәрхош һалда автомобил сүрән адам һәјатыны Јеһовадан олан һәдијјә кими гијмәтләндирир? (Мәзмур 36:9). Һәјатын мүгәддәс олдуғуну јадда сахлајараг, машын сүрән адамын тамамилә ајыг олмасы даһа јахшыдыр.

10. Спиртли ички бејинә неҹә тә’сир едир вә бу ҹүр тә’сир нәјә ҝөрә тәһлүкәлидир?

¹⁰ Һәддиндән артыг ички ичмәк јалныз физики дејил, руһани ҹәһәтдән дә зәрәр ҝәтирир. Мүгәддәс Китабда дејилир: «Зина, көһнә вә тәзә шәраб онларын үрәкләрини ҹәлб едиб [«ағлы алыр», КМ]» (Һушә 4:11). Спиртли ички ағла тә’сир едир. Американын Милли Нарколоҝија институтунун бир нәшриндә изаһ едилир: «Инсан ичәндә, спиртли ички һәзм системи јолу илә гана һопур вә тезҹә бејинә дахил олур. Орада бејнин дүшүнҹә вә һиссләрә ҹавабдеһ олан шөбәләринин фәалијјәтинә әнҝәл олмаға башлајыр. Инсан өзүнү даһа азад вә сәрбәст һисс едир». Белә олан һалда о, асанлыгла ‘јолуну аза’, әдәбсизлијә јол верә биләр вә онда һәр һансы јерсиз һәрәкәт етмәк һәвәси јарана биләр (Сүлејманын мәсәлләри 20:1, ЈД).

11, 12. Спиртли ичкиләрдән һәддиндән артыг истифадә етмәк руһани ҹәһәтдән һансы зәрәри вура биләр?

¹¹ Мүгәддәс Китаб бујурур: «Јејирсинизсә, ичирсинизсә, нә едирсинизсә, һәр шеји Аллаһын иззәти үчүн един» (1 Коринфлиләрә 10:31). Әҝәр инсан спиртли ичкидән һәддиндән артыг истифадә едирсә, бу Аллаһа иззәт ҝәтирә биләрми? Әлбәттә, һеч бир мәсиһчи әјјаш кими танынмаг истәмәз. Белә ад Јеһованын адыны рүсвај едә биләр, Она һеч ҹүр иззәт ҝәтирмәз.

¹² Һәддиндән артыг спиртли ички ичән мәсиһчи һәмиманлысынын, мәсәлән, јығынҹағын јени үзвләриндән киминсә бүдрәмәсинә сәбәб оларса, бәс онда неҹә? (Ромалылара 14:21). Иса хәбәрдарлыг етмишдир: «Ким Мәнә иман едән бу кичикләрдән бирини пис јола чәкәрсә, бојнуна ири бир дәјирман дашы асыб дәнизин дибинә атылмаг онун үчүн даһа јахшы олар» (Матта 18:6). Спиртли ичкиләрдән суи-истифадә етмәк инсанын јығынҹагдакы шәрәфли мәс’улијјәтләрини итирмәсинә дә сәбәб ола биләр (1 Тимотејә 3:1-3, 8). Әјјашлығын аилә һәјатына нә дәрәҹәдә пис тә’сир етдијини дә унутмаг лазым дејил.

Тәһлүкәләрдән гачмаг неҹә мүмкүндүр?

13. Спиртли ичкидән суи-истифадә етмәјин тәләсинә дүшмәмәк үчүн нә етмәк ҝәрәкдир?

¹³ Спиртли ичкиләрдән суи-истифадә етмәјин тәләсинә дүшмәмәк үчүн, сәрһәдин һарадан кечдијини билмәк лазымдыр. Амма спиртли ичкиләрдән һәддиндән артыг истифадә етмәклә әјјашлыг арасындакы сәрһәди дејил, ондан гәдәринҹә истифадә етмәклә һәддиндән артыг истифадә етмәк арасындакы сәрһәди билмәк лазымдыр. Бизләрдән һәр биримиз үчүн бу сәрһәди ким мүәјјән едә биләр? Бурада бир чох амилләр рол ојнадығы үчүн нә гәдәр мигдарда спиртли ичкинин сәнин үчүн һәддиндән артыг олдуғуну һеч ким дејә билмәз. Һәр кәс өз нормасыны билмәли вә она риајәт етмәлидир. Сәнә өз норманы мүәјјән етмәкдә нә көмәк едәҹәк? Һансы принсипи рәһбәр тутмаг лазымдыр?

14. Гәдәринҹә вә һәддиндән артыг ичмәк арасындакы сәрһәди мүәјјән етмәкдә һансы принсипи рәһбәр тутмалыјыг?

¹⁴ Мүгәддәс Китабда дејилир: «Сағлам шүура, дәрракәјә бағлан, бунлардан ҝөзүнү чәкмә. Онлар сәнин һәјатын олар, ҝөзәл нахыш кими бојнуна бағланар» (Сүлејманын мәсәлләри 3:21, 22). Беләликлә, рәһбәр тутмалы олдуғумуз принсип нөвбәти амилдән ибарәтдир: сағлам дүшүнҹә тәрзинә вә мүһакимә јүрүтмәјинә мане олан мигдарда ички сәнин үчүн чохдур. Бу сәбәбдән өз норманы мүәјјән едәркән өз-өзүнлә дүрүст олмалысан.

15. Нә заман һәтта кичик мигдарда ички белә һәддиндән артыг һесаб олуна биләр?

¹⁵ Бә’зи һалларда һәтта ҹүз’и мигдарда ички дә һәддиндән артыг һесаб олуна биләр. Һамилә гадын көрпәнин һәјатыны тәһлүкәјә атмамаг үчүн, үмумијјәтлә спиртли ичкијә тохунмамаг гәрарына ҝәлә биләр. Спиртли ичкиләрлә вахтилә проблеми олан вә ја виҹданы ички ичмәји гәбул етмәјән адамын јанында ичмәмәк, мәҝәр мәрһәмәтин тәзаһүрү олмаздымы? Јеһова чадырда вәзифәләрини јеринә јетирән каһинләрә бујурмушду: «Һүзур чадырына нә шәраб, нә дә кефләндириҹи башга ички ичиб ҝирмәјин, јохса өләрсиниз» (Левилиләр 10:8, 9). Буна ҝөрә дә билаваситә мәсиһчи јығынҹагларына ҝетмәздән, хидмәтә чыхмаздан вә ја башга теократик вәзифәләри јеринә јетирмәздән әввәл спиртли ички ичмәкдән чәкинмәк лазымдыр. Бундан әлавә, спиртли ичкиләрин гадаған олундуғу вә ја јаш мәһдудијјәти гојулдуғу өлкәләрдә һаким даирәләрин тәләбләринә лазыми һөрмәт ҝөстәрилмәлидир (Ромалылара 13:1).

16. Спиртли ички тәклиф олунан заман нә һагда дүшүнмәк лазымдыр?

¹⁶ Ички ичилән бир мүһитдә оланда вә ја сәнә спиртли ички тәклиф едиләндә өзүндән соруш: «Үмумијјәтлә ичмәјә дәјәрми?» Әҝәр ичмәк гәрарына ҝәлсән, дәгиг олараг өз норманы мүәјјән ет вә һәддини ашма. Ев јијәсинин әлиачыглығынын сәнә тә’сир етмәсинә изн вермә. Бә’зи тојларда олдуғу кими, гонаглар үчүн тәклиф олунан спиртли ичкиләрин чох олдуғу сүфрә башында сајыг ол. Бир чох өлкәләрдә ушагларын спиртли ички ичмәсинә гануни олараг иҹазә верилир. Ички ичмәјә даир ҝөстәришләр вермәк вә онлара нәзарәт етмәк валидејнләрин вәзифәсидир (Сүлејманын мәсәлләри 22:6).

Бу асылылығын өһдәсиндән ҝәлә биләрсән

17. Спиртли ичкиләрдән асылылығын олуб-олмадығыны мүәјјән етмәкдә нә көмәк едә биләр?

¹⁷ Спиртли ичкиләрдән асылылығын вармы? Әмин ол ки, әҝәр спиртли ичкидән суи-истифадә етмәк ҝизлин ҝүнаһа чеврилирсә, әввәл-ахыр бу сәнә өз тә’сирини ҝөстәрәҹәкдир. Дәгигликлә вә дүрүстлүклә өзүнү јохла. Өзүндән соруш: «Әввәлкиндән даһа тез-тезми ичирәм? Даһа түнд тәркибли ичкиләр ичирәмми? Һәјәҹан һиссләрини унутмаг, стрессдән вә проблемләрдән азад олмаг үчүнмү ичирәм? Аилә үзвләримдән вә ја достларымдан кимсә спиртли ичкиләрә алудә олдуғума даир нараһатчылығыны билдирибми? Ички ичмәјим аиләмдә проблемләрә сәбәб олубму? Бир һәфтә, бир ај вә ја бир нечә ај әрзиндә ичкисиз кечинмәк чәтиндирми? Нә гәдәр ичдијими башгаларындан ҝизләдирәмми?» Әҝәр бурада ҝәтирилән суаллардан бә’зиләринә «бәли» ҹавабы вердинсә, онда неҹә? ‘Ҝүзҝүдә өз сифәтинин ҹизҝиләрини сејр едән вә дәрһал неҹә олдуғуну унудан’ адама бәнзәмә (Јагуб 1:22-24). Проблеми арадан галдырмаг үчүн аддымлар ат. Һансы аддымлары атмаг олар?

18, 19. Спиртли ичкиләрдән асылылығын өһдәсиндән ҝәлмәк үчүн нә етмәк олар?

¹⁸ Һәвари Павел мәсиһчиләрә нәсиһәт верирди: «Шәрабла сәрхош олмајын, сәфаһәтә сәбәб одур; лакин Руһла долу олун» (Ефеслиләрә 5:18). Һансы мигдарда ичкинин сәнин үчүн һәддиндән артыг олдуғуну мүәјјән ет вә өзүнә мәһдудијјәтләр гој. Онлары позмамағы гәти гәрарлашдыр вә өзүнә һаким олмағы баҹар (Галатијалылара 5:22, 23). Достларынын арасында сәни ичкидән суи-истифадә етмәјә тәшвиг едән вармы? Еһтијатлы ол. Мүгәддәс Китаб дејир: «Һикмәтли илә отуруб-дуран һикмәт газанар, ахмагларла ајаглашан бәдбәхт олар» (Сүлејманын мәсәлләри 13:20).

¹⁹ Әҝәр сән проблемләрдән гачмаг үчүн ичирсәнсә, чәтинликләрлә үз-үзә ҝәлмәји өјрән. Аллаһын Кәламындакы мәсләһәтләри тәтбиг етмәклә проблемләрин өһдәсиндән ҝәлмәк мүмкүндүр (Мәзмур 119:105). Сәнә јахын олан ағсаггаллардан биринә көмәк үчүн мүраҹиәт етмәкдән чәкинмә. Јеһованын сәнин руһанилијини инкишаф етдирмәк үчүн тәгдим етдији һәр шејдән фајдалан. Аллаһла мүнасибәтләрини мөһкәмләндир. Даима Она дуа ет. Сән хүсусилә дә зәифликләрин барәдә дуа едә биләрсән. Аллаһдан символик бөјрәкләрини вә үрәјини саф етмәсини дилә (Мәзмур 26:2). Әввәлки мәгаләдә тәшвиг олундуғу кими, вар гүввәнлә нөгсансызлыг јолу илә јеримәјә чалыш.

20. Спиртли ичкиләрдән асылылығын өһдәсиндән ҝәлмәк алынмырса, һансы өлчүләри ҝөтүрмәк тәләб олуна биләр?

²⁰ Әҝәр бүтүн ҹәһдләрә бахмајараг асылылығын өһдәсиндән ҝәлмәк мүмкүн дејилсә, онда неҹә? О заман Исанын нәсиһәтинә әмәл ет: «Әлин сәни пис јола чәкәрсә, ону кәс; сәнин үчүн һәјата чолаг ҝирмәк, ики әлин олараг ҹәһәннәмә, сөнмәз ода атылмагдан јахшыдыр» (Марк 9:43). Бурада һеч ичмәмәк нәзәрдә тутулур. Ирен (ад дәјишдирилиб) адлы бир гадын мәһз белә етмәк гәрарына ҝәлмишдир. О дејир: «Тәхминән ики ил јарым әрзиндә ичкидән узаг дурдугдан сонра, бу проблемин өһдәсиндән ҝәлдијими ҝөрмәк үчүн бир гәдәһ ичмәјин һеч бир зәрәри олмајаҹағыны дүшүндүм. Лакин ағлыма белә бир фикир ҝәлән кими, дәрһал Јеһоваја дуа етмәјә башлајырам. Јени дүнјаја гәдәр, һәтта ола билсин, һеч заман ағзыма спиртли ички алмамаг гәрарына ҝәлмишәм». Спиртли ичкидән тамамилә имтина етмәк, Аллаһын салеһлик өмүр сүрән јени дүнјасында јашамағын мүгабилиндә бир о гәдәр дә бөјүк фәдакарлыг дејил (2 Петер 3:13).

«Елә гачын ки, мүкафат газанасыныз»

21, 22. Һәјат уғрунда гачышда финишә чатмаға нә мане ола биләр вә бу манеәнин өһдәсиндән неҹә ҝәлмәк олар?

²¹ Мәсиһчи һәјатыны идман јарышы илә мүгајисә едәрәк, һәвари Павел јазырды: «Мәҝәр билмирсинизми ки, гачыш мејданында јарышанларын һамысы гачар, амма тәк бир нәфәр мүкафат алар? Елә гачын ки, мүкафат газанасыныз. Мүсабигәдә иштирак едәнләрин һамысы һәр ҹәһәтҹә өзләрини сахлајырлар. Онлар буну фани бир дәфнә таҹы алмаг үчүн едәрләр, биз исә фани олмајан үчүн едирик. Буна ҝөрә, мән елә гачырам ки, мәгсәдсиз олмајым. Елә вурушурам ки, јумруғуму һаваны дөјән кими атмајым. Амма бәдәнимә ҹәфа вериб ону көлә едирәм ки, башгаларына вә’з етдикдән сонра, өзүм јарышда иштирак етмәкдән мәрһум олмајым» (1 Коринфлиләрә 9:24-27).

²² Мүкафаты, јалныз мәсафәни ахыраҹан гачанлар алыр. Спиртли ичкиләрдән суи-истифадә етмәк финишә чатмаға мане ола биләр. Биз өзүмүзә һаким олмағы баҹармалыјыг. Әбәс јерә гачмамаг үчүн «сәрхошлуг»дан узаг олмаг лазымдыр (1 Петер 4:3). Бундан әлавә, һәр шејдә өзүнә һаким олмағы баҹармаг лазымдыр. Спиртли ичкидән суи-истифадә етмәјә ҝәлдикдә исә, «Аллаһа гаршы һөрмәтсизлији вә дүнјәви еһтираслары рәдд едиб, бу дүнјада тәмкинли, салеһ вә Аллаһ јолуна ујғун» бир өмүр сүрмәјимиз мүдрикликдир (Титуса 2:12).

[Һашијә]

Хатырлајырсынызмы?

• Спиртли-ичкиләрдән суи-истифадә етмәк нә демәкдир?

• Һәддиндән артыг спиртли ички ичмәк һансы зәрәри ҝәтирир?

• Спиртли ичкиләрин сәбәб олдуғу тәһлүкәләрдән неҹә гачмаг олар?

• Спиртли ичкиләрдән асылылығын өһдәсиндән неҹә ҝәлмәк олар?

[28-ҹи сәһифәдәки шәкил]

Шәраб «үрәкләри хошһал» едир.

[29-ҹу сәһифәдәки шәкил]

Өз нормамызы билмәли вә ону ашмамалыјыг.

[30-ҹу сәһифәдәки шәкил]

Өзүн үчүн сәрһәдин һарада олдуғуну әввәлҹәдән мүәјјән ет.

[31-ҹи сәһифәдәки шәкил]

Өз зәифликләрин барәдә Јеһоваја мүнтәзәм олараг дуа ет.

[32-ҹи сәһифәдәки шәкил]

Спиртли ичкиләр мәсәләсиндә ушаглара ҝөстәриш вермәк валидејнләрин вәзифәсидир.