Јеһова бизим јардымчымыздыр

«Јардымым ҝөјү вә јери Јарадан Јеһовадандыр» (МӘЗМУР 121:2, ЈД).

1, 2. а) Нәјә ҝөрә вахташыры олараг һамымызын јардыма еһтијаҹы олур? б) Јардымчы кими Јеһова һаггында нә демәк олар?

БИЗЛӘРДӘН кимин һеч заман јардыма еһтијаҹы олмајыб? Әслиндә чәтин проблеми һәлл етмәк, итки ағрысына дөзмәк, ағыр сынаглара таб ҝәтирмәк үчүн вахташыры олараг һамымыз јардыма еһтијаҹ дујуруг. Јардыма еһтијаҹ дујанда инсанлар чох вахт гајғыкеш доста мүраҹиәт едирләр. Проблемләримизи бу ҹүр достла бөлүшмәклә өзүмүздә јүнҝүллүк һисс едирик. Лакин достларымыз имканлары мәһдуд олан инсанлардыр. Онлар бизә јардым етмәк гүввәсиндә олмаја биләрләр.

² Лакин гүввәси мәһдудијјәт билмәјән Јардымчымыз вар. Бундан әлавә, О вә’д верир ки, һеч заман бизи тәрк етмәјәҹәк. Мәзмурчу Онун һаггында там әминликлә демишди: «Јардымым... Јеһовадандыр» (Мәзмур 121:2, ЈД). Мәзмурчу Јеһованын она јардым едәҹәјинә нәјә ҝөрә белә әмин иди? Бу суалын ҹавабы үчүн ҝәлин 121-ҹи Мәзмуру нәзәрдән кечирәк. Белә етмәклә Јеһоваја Јардымчымыз кими бел бағлаја билмәјимиз үчүн олан сәбәбләри ҝөрә биләҹәјик.

Садиг Јардымчы

3. Мәзмурчу ҝөзләрини һансы дағлара галдырырды вә нәјә ҝөрә?

³ Мәзмурчунун илк сөзләринә әсасән, Јеһованын Јарадан кими садиг олдуғуна әмин олмаг олар. «Ҝөзләрими дағлара тәрәф галдыраҹағам. Јардымым һарадан ҝәләҹәк? Јардымым ҝөјү вә јери Јарадан Јеһовадандыр» (Мәзмур 121:1, 2, ЈД). Мәзмурчу ҝөзләрини үмумијјәтлә һансыса дағлара тәрәф галдырмыр. Бу сөзләр јазыларкән Јеһованын мә’бәди Јерусәлимдә јерләширди. Јүксәкликдә, Јәһуда дағларында јерләшән бу шәһәр, мәҹази диллә десәк, Јеһованын јашајыш јери иди (Мәзмур 135:21). Мәзмурчу, еһтимал ки, ҝөзләрини Јеһованын мә’бәдинин тикилдији Јерусәлимин зирвәләринә галдырараг, Ондан әминликлә јардым ҝөзләјирди. Мәзмурчу Јеһованын она јардым етмәк гүввәсиндә олдуғуна нәјә ҝөрә бу гәдәр әмин иди? Чүнки Аллаһ «ҝөјү вә јери Јарадан» иди. Мәзмурчу там әмин иди ки, она јардым ҝөстәрмәјә гадир олан Јарадана һеч бир шеј мане ола билмәз! (Јешаја 40:26).

4. Мәзмурчу Јеһованын Өз хидмәтчиләринин еһтијаҹларына һәмишә диггәтли олдуғуну неҹә ҝөстәрди вә бу фикир нәјә ҝөрә руһландырыр?

⁴ Сонра мәзмурчу изаһ едир ки, Јеһова Өз хидмәтчиләринин еһтијаҹларына һәмишә диггәтлә јанашыр: «О, ајагларыны бүдрәмәјә гојмаз, сәни горујан јатмаз. Бах Исраили горујан јухуламаз, јатыб галмаз» (Мәзмур 121:3, 4). Аллаһын Она бел бағлајанларын ‘бүдрәмәсинә’ вә ја галха билмәјәҹәк дәрәҹәдә јыхылмасына јол вермәси гејри-мүмкүндүр (Сүлејманын мәсәлләри 24:16). Нәјә ҝөрә? Чүнки Јеһова сајыг бир чобан кими Өз гојунларыны горујур. Мәҝәр бу фикир руһландырмыр? О, хидмәтчиләринин гајғысына галараг бир ан белә ҝөзләрини гырпмаз. Онлар ҝеҹә-ҝүндүз Онун диггәт мәркәзиндәдирләр.

5. Јеһова һансы мә’нада биздән сағда дајаныр?

⁵ Јеһованын Өз халгына садиг Мүдафиәчи олдуғуна әмин олан мәзмурчу јазырды: «Сәни горујан Рәбдир, О, сағ тәрәфиндәдир, сәнә көлҝәдир. Сәнә ҝүндүз ҝүнәшин зијаны дәјмәз, ҝеҹәнин ајы сәнә зәрәр вермәз» (Мәзмур 121:5, 6). Орта Шәргдә пијада сәјаһәт едәнләр јахшы билирләр ки, көлҝә ҝүнәшин гызмар шүаларындан тәравәтләндириҹи мүдафиә верир. Јеһова Өз хидмәтчиләри үчүн «көлҝәдир»: О, хидмәтчиләрини, јандырыҹы ҝүнәш шүаларына бәнзәр һәр ҹүр писликдән мүдафиә едир. Мараглыдыр ки, Јеһова ‘сағ тәрәфимиздә’ көлҝә адланыр. Гәдим дөјүшләрдә дөјүшчүнүн сол әлиндә тутдуғу галхан сағ әлини бүтүнлүклә өртмүрдү. Мүдафиәни сағ тәрәфдә дајаныб дөјүшән садиг дост тәҹһиз едә биләрди. Бу ҹүр доста бәнзәр тәрздә Јеһова һәмишә Өз хидмәтчиләринин көмәјинә ҝәлмәјә һазыр сурәтдә сәдагәтлә онларын јанында дајаныр.

6, 7. а) Јеһованын Өз халгына јардым етмәји һеч заман дајандырмајаҹағына мәзмурчу бизи неҹә әмин едир? б) Нәјә ҝөрә биз мәзмурчунун әминлијинә шәрик ола биләрик?

⁶ Јеһова нә вахтса халгына көмәк етмәји дајандырармы? Бу ағласығмаз бир шејдир. Мәзмурчу сонда дејир: «Рәбб сәни һәр ҹүр шәрдән горујар, ҹаныны һәр шејдән горујар. Рәбб ҝедиш-ҝәлишини һифз едәр индидән сонсуза гәдәр» (Мәзмур 121:7, 8). Диггәт јетирәк ки, бир гәдәр әввәл, 5-ҹи ајәдә мәзмурчу индики замандан истифадә едир: «Сәни горујан Рәбдир». Лакин индики ајәләрдә о, ҝәләҹәк заманын тәсвиринә кечир: «Рәбб... сәни горујар». Бу сөзләр һәгиги ибадәтчиләри әмин едир ки, Јеһова бундан сонра да онлара јардым едәҹәк. Онлар һара ҝетсәләр дә, һансы тәһлүкә илә гаршылашсалар да, онлара јардым әлини узатмаг үчүн Аллаһ һәмишә јанларында олаҹаг (Сүлејманын мәсәлләри 12:21).

⁷ 121-ҹи Мәзмурун јазычысы, шүбһәсиз ки, Гадир Јараданын Өз халгыны мүлајим чобан вә еһтијатлы кешикчи кими горудуғуна әминдир. Јеһова дәјишилмәдији үчүн мәзмурчунун әминлијинә шәрик олмаға бүтүн әсасларымыз вар (Малаки 3:6). Бу о демәкдирми ки, бизә һеч бир физики хәсарәт дәјмәјәҹәк? Хејр, елә дејил, лакин нә гәдәр ки, Јеһоваја Јардымчымыз кими мүраҹиәт едирик, О бизи, руһанилијимизә тәһлүкә јарада биләҹәк һәр бир шејдән горујаҹаг. Тәбии бир суал јараныр: «Јеһова бизә неҹә јардым едир?» Ҝәлин, бизә јардым етмәк үчүн Јеһованын истифадә етдији дөрд үсулу нәзәрдән кечирәк. Бу мәгаләдә биз диггәтимизи Јеһованын Өз хидмәтчиләринә Мүгәддәс Китабын јазылдығы дөврләрдә неҹә јардым етдијинә јөнәлдәҹәјик. Нөвбәти мәгаләдә исә, Онун Өз халгына бу ҝүн неҹә јардым етдијини нәзәрдән кечирәҹәјик.

Мәләкләрин јардымы

8. Мәләкләрин Аллаһа хидмәт едән инсанларын рифаһына бөјүк һәвәслә мараг ҝөстәрмәләри нәјә ҝөрә тәәҹҹүблү дејил?

⁸ Јеһованын ихтијарында сајсыз-һесабсыз мәләкләр вар (Даниел 7:9, 10). Аллаһын бу руһани оғуллары Аталарынын ирадәсини сәдагәтлә јеринә јетирирләр (Мәзмур 103:20). Онлар чох ҝөзәл билирләр ки, Јеһова јердәки хидмәтчиләрини чох севир вә онлара јардым етмәк истәјир. Тәәҹҹүблү дејил ки, мәләкләр Аллаһа хидмәт едән инсанларын рифаһына бөјүк һәвәслә мараг ҝөстәрирләр (Лука 15:10). Буна ҝөрә дә, Јеһова онлары инсанлара јардым етмәјә ҝөндәрәндә онлар, еһтимал ки, чох севинирләр. Јеһова мәләкләрин васитәсилә Өз хидмәтчиләринә кечмишдә һансы үсулларла јардым ҝөстәрирди?

9. Аллаһын Өз мәләкләринә садиг инсанлары мүдафиә етмәји неҹә тапшырдығына даир нүмунәләр ҝәтирин.

⁹ Аллаһ мәләкләрә садиг инсанлары мүдафиә вә азад етмәји тапшырырды. Ики мәләк Содом вә Һоморра шәһәрләринин мәһви заманы Лута вә гызларына өлүмдән гачмагда јардым ҝөстәрди (Јарадылыш 19:1, 15-17). Бир мәләк Јерусәлим үчүн тәһлүкә јарадан 185 мин Ашшур әсҝәрини мәһв етди (2 Падшаһлар 19:35). Даниели асланларын олдуғу гујуја атанда, Јеһова «өз мәләјини ҝөндәриб ширләрин ағзыны бағлады» (Даниел 6:21, 22). Башга бир мәләк һәвари Петери һәбсханадан азад етди (Һәвариләрин ишләри 12:6-11). Мүгәддәс Китабда мәләкләрин Аллаһын хидмәтчиләрини мүдафиә етмәләринә даир чохлу нүмунәләр вар, буну Мәзмур 34:7 ајәси дә тәсдиг едир: «Рәбдән горханлары Онун мәләји мүдафиә едәр, онлара зәфәр верәр».

10. Даниел пејғәмбәри руһландырмаг үчүн Јеһова мәләкдән неҹә истифадә етди?

¹⁰ Бә’зи һалларда Јеһова Өз мәләкләрини садиг инсанлары руһландырмаг вә ҝүҹләндирмәк үчүн ҝөндәрирди. Тә’сирли бир нүмунәни «Даниел» китабынын 10-ҹу фәслиндә тапырыг. Орада тәсвир олунан һадисә, Даниелин тәхминән 100 јашы оланда баш вермишди. Еһтимал ки, Јерусәлимин виранә галмасындан вә мә’бәдин бәрпасы илә әлагәдар ишләрин ҝөрүлмәмәсиндән пејғәмбәр чох бәрк кәдәрләнирди. Һәм дә горхулу рө’јаја ҝөрә һәјәҹанланырды (Даниел 10:2, 3, 8). Аллаһ Өз хидмәтчисини руһландырмаг үчүн мәләјини ҝөндәрмәклә мәһәббәт тәзаһүр етдирди. Мәләк бир нечә дәфә Даниелә хатырлатды ки, о, «Аллаһын севимлиси»дир. Бу, јаша долмуш пејғәмбәрә неҹә тә’сир етди? О, мәләјә деди: «Мәнә ҝүҹ вердин» (Даниел 10:11, 19).

11. Јеһованын хош хәбәрин тәблиғ ишиндә мәләкләрдән неҹә истифадә етдији һансы нүмунәнин әсасында ҝөрүнүр?

¹¹ Јеһова һәм дә мәләкләрдән хош хәбәрин тәблиғ ишинә рәһбәрлик етмәк үчүн истифадә едирди. Нәтиҹәдә вәфтиз олунан һәбәшистанлы хәдимә тәблиғ етмәк ҝөстәришини Филипә мәһз мәләк вермишди (Һәвариләрин ишләри 8:26, 27, 36, 38). Бу һадисәдән гыса мүддәт сонра Аллаһ истәди ки, хош хәбәри сүннәтсиз гејри-јәһудиләр ешитсинләр. Аллаһдан горхан бир адам олан Корнелиуса мәләк ҝөрүнүб Петерин далынҹа адам ҝөндәрмәји тапшырды. Корнелиусун ҝөндәрдији адамлар Петери тапанда она дедиләр: «Корнелиус мүгәддәс бир мәләкдән әмр алды ки, сәни өз евинә ҝәтиртсин вә сәнин сөјләјәҹәкләрини ешитсин». Петер бу дә’вәти гәбул етди вә илк дәфә сүннәтсиз гејри-јәһудиләр мәсиһчи јығынҹағынын бир һиссәси олдулар (Һәвариләрин ишләри 10:22, 44-48). Әҝәр әбәди һәјата мејлли олан адамы тапмагда сәнә мәләјин көмәк етдијини билсәјдин, өзүнү неҹә һисс едәрдин?

Мүгәддәс руһун васитәсилә едилән јардым

12, 13. а) Исанын һәвариләринин мүгәддәс руһун онлара јардым етмәјә гадир олдуғуна инанмаларына нәјә ҝөрә там әсаслары варды? б) Мүгәддәс руһун вердији сәлаһијјәтин сајәсиндә Ы әсрин мәсиһчиләри нә едә билдиләр?

¹² Өләҹәји вахта аз галмыш Иса өз һәвариләрини әмин етди ки, онлар јардымсыз галмајаҹаглар. Ата онлара «јардымчы», мүгәддәс руһ верәҹәкдир (Јәһја 14:26, И–93). Мүгәддәс руһун онлара көмәк едәҹәјинә инанмаға һәвариләрин там әсасы варды, чүнки илһамланмыш Мүгәддәс Јазыларда, Јеһованын Өз мүгәддәс руһу — Каинатда ән ҝүҹлү гүввәси васитәсилә Өз хидмәтчиләринә јардым етдијинә даир нүмунәләр чох иди.

¹³ Јеһова ирадәсини јеринә јетирмәк үчүн дәфәләрлә инсанлара мүгәддәс руһун васитәсилә сәлаһијјәт вермишдир. Мүгәддәс руһун сајәсиндә һакимләр Исраили азад едирдиләр (Һакимләр 3:9, 10; 6:34). Һәмин руһ Ы әсрин мәсиһчиләринә һәр һансы гаршыдурмаја бахмајараг, ҹәсарәтлә тәблиғ етмәјә ҝүҹ верирди (Һәвариләрин ишләри 1:8; 4:31). Онларын хидмәт заманы әлдә етдикләри наилијјәт ачыг-ајдын мүгәддәс руһун тә’сиринә сүбутдур. Әкс тәгдирдә, «охумамыш, авам адамлар»ын хош хәбәри о заман мә’лум олан бүтүн дүнјаја бәјан етмәләрини неҹә изаһ етмәк олар? (Һәвариләрин ишләри 4:13; Колослулара 1:23).

14. Јеһова хидмәтчиләрини анлајышла тә’мин етмәк үчүн Өз мүгәддәс руһундан неҹә истифадә едирди?

¹⁴ Јеһова һәм дә Өз мүгәддәс руһундан, хидмәтчиләрини анлајышла тә’мин етмәк үчүн истифадә едирди. Аллаһын руһунун јардымы сајәсиндә Јусиф фир’онун пејғәмбәрлик јухуларыны јоза билмишди (Јарадылыш 41:16, 38, 39). Өз руһунун васитәсилә Јеһова елә етмишдир ки, Онун нијјәтләри мәғрурлардан ҝизләдилмиш, амма һәлим инсанлара ачылмышдыр (Матта 11:25). Јеһованын Ону севәнләр үчүн һазырладығы шејләр барәсиндә һәвари Павел демишдир: «Бизә... Аллаһ бунлары Өз Руһу илә ачды» (1 Коринфлиләрә 2:7-10). Инсан јалныз мүгәддәс руһун васитәсилә Аллаһын ирадәсини һәгиги мә’нада баша дүшә биләр.

Аллаһын Кәламындан әлдә едилән јардым

15, 16. Мүдрик давранмаг үчүн Јешуаја нә дејилмишдир?

¹⁵ Јеһованын Кәламы «тә’лим... үчүн фајдалыдыр» вә бунун да сајәсиндә Онун хидмәтчиләри ‘камил олуб, һәр ҹүр хејирли иш үчүн тәҹһиз едилирләр’ (2 Тимотејә 3:16, 17). Аллаһын садиг хидмәтчиләринин гәдимдә Мүгәддәс Китабын артыг јазылмыш олан һиссәләри васитәсилә јардым әлдә етмәләринә даир Мүгәддәс Китабда чохлу нүмунәләр вар.

¹⁶ Мүгәддәс Јазылар Аллаһын хидмәтчиләринә е’тибарлы рәһбәрлик верирди. Јешуаја Исраил халгына башчылыг етмәји тапшыраркән Јеһова она деди: «[Муса тәрәфиндән јазылмыш] бу Ганун китабынын сөзләри дилиндән дүшмәсин, орада јазылан һәр шејә дәгиг әмәл етмәк үчүн ҝеҹә-ҝүндүз онун үзәриндә дүшүн. Онда јолун уғурлу олаҹаг вә мүвәффәгијјәт газанаҹагсан». Мараглыдыр ки, Аллаһ Јешуаја фөвгәлтәбии јолла мүдриклик верәҹәјини вә’д етмәмишдир. Мүдрик давранмаг үчүн Исраилин ҝәләҹәк рәһбәри «Ганун китабыны» диггәтлә охумалы иди (Јешуа 1:8; Мәзмур 1:1-3).

17. Даниел вә Јошија падшаһ Мүгәддәс Јазыларын онларда олан һиссәсиндән неҹә јардым әлдә етмишдиләр?

¹⁷ Кәламы васитәсилә Аллаһ һәм дә Өз ирадәсини вә нијјәтини ачыглајырды. Мәсәлән, Даниел Јерусәлимин виранәлијинин гуртараҹағы вахты Јеремјанын китабы әсасында «анлады» (Јеремја 25:11; Даниел 9:2). Сәҹијјәви һадисә һәмчинин Јәһуда падшаһы Јошијанын һөкмдарлыг илләриндә баш вермишдир. Һәмин дөвр үчүн халг Јеһовадан узаглашмышды, падшаһлар исә, шүбһәсиз ки, өзләри үчүн ганунун сурәтини көчүрмүр вә ону иҹра етмирдиләр (Ганунун тәкрары 17:18-20). Лакин мә’бәди тә’мир едәндә, еһтимал ки, Мусанын әли илә јазылмыш «Ганун китабыны» тапдылар. Бу, 800 ил габаг јазылмыш илк әлјазма ола биләрди. Һәмин әлјазмада јазыланлары ешидән кими Јошија халгын Јеһоваја мәгбул олан јолдан нә гәдәр узаглашдығыны дәрк етди вә Аллаһын ганунуну јеринә јетирмәк үчүн ҹидди тәдбирләр ҝөрдү (2 Падшаһлар 22:8; 23:1-7). Беләликлә биз ајдын ҝөрүрүк ки, кечмишдә Аллаһын халгы Мүгәддәс Китабын артыг о заман јазылмыш олан һиссәләриндән јардым әлдә едирди.

Һәмиманлыларын васитәсилә

18. Нәјә ҝөрә дејә биләрик ки, Аллаһын бир хидмәтчиси диҝәринә јардым ҝөстәрәндә, бунун мәнбәји Аллаһдыр?

¹⁸ Јеһованын тәгдим етдији јардым чох вахт һәмиманлылар тәрәфиндән ҝәлир. Аллаһын бир хидмәтчиси диҝәринә јардым едәндә, әслиндә бу јардымын мәнбәји Аллаһдыр. Нәјә ҝөрә? Ики сәбәбә ҝөрә. Биринҹиси, мүгәддәс руһ өз ролуну ојнајыр. Бу руһла идарә олунмаға чалышан инсанларда о мәһәббәт вә јахшылығы дахил едән сәмәрәни јетишдирир (Галатијалылара 5:22, 23). Буна ҝөрә дә, Аллаһын хидмәтчисинин бири диҝәринә јардым ҝөстәрмәјә тәшвиг олунанда, фәалијјәт ҝөстәрән Јеһованын мүгәддәс руһудур. Икинҹиси, биз Аллаһын сурәтиндә јарадылмышыг (Јарадылыш 1:26). Бу исә о демәкдир ки, биз Онун хүсусијјәтләрини, о ҹүмләдән јахшылыг вә шәфгәт һиссини тәзаһүр етдирмәјә гадирик. Беләликлә, Јеһованын бир хидмәтчиси диҝәринә көмәк едәндә, бунун әсл Мәнбәји, инсанларын сурәтиндә јарадылдыглары Шәхсдир.

19. Мүгәддәс Китаба әсасән, Јеһова һәмиманлылар васитәсилә јардымы неҹә тәгдим едирди?

¹⁹ Мүгәддәс Китабын јазылдығы дөврләрдә Јеһова һәмиманлылар васитәсилә јардымы неҹә тәгдим едирди? Јеһова чох вахт елә едирди ки, Онун бир хидмәтчиси диҝәринә мәсләһәт версин. Мәсәлән, Јеремја Барука олдугҹа зәрури мәсләһәт верди (Јеремја 45:1-5). Аллаһын һәгиги хидмәтчиләринин бир-бирләринә мадди јардым ҝөстәрмәјә тәшвиг олундуглары һаллар олурду. Мәсәлән, Македонија вә Ахајадакы мәсиһчиләр Јерусәлимдәки еһтијаҹы олан гардашлара бөјүк һәвәслә јардым ҝөстәрдиләр. Һәвари Павел гејд етмишди ки, бу ҹүр ҹомәрдлик һаглы олараг «Аллаһа шүкүр» һасил едир (2 Коринфлиләрә 9:11).

20, 21. Ромалы гардашлар һәвари Павели неҹә гүввәтләндирдиләр?

²⁰ Јеһованын хидмәтчиләринин бир-бирини мөһкәмләтмәк вә руһландырмаг үчүн чох сә’ј ҝөстәрмәләри һаггында охумаг хүсусилә тә’сирлидир. Һәвари Павелин башына ҝәлмиш бир нүмунәни нәзәрдән кечирәк. Ону дустаг кими Ромаја апаранда, о, ромалылар тәрәфиндән тикилмиш Аппиус јолундан кечмәли олду. Јолун сонунҹу һиссәси батаглыг вә овалыг әразиләрдән кечдији үчүн хүсусилә хошаҝәлмәз идиa. Ромадакы јығынҹагдан олан гардашлар Павелин онларын шәһәринә ҝәлдијини билирдиләр. Онлар нә едәҹәкләр? Павелин өзү онларын јанына ҝәләнә гәдәр раһат евләриндәми галаҹаглар?

²¹ Мүгәддәс Китабы јазанлардан бири, бу сәјаһәт заманы Павели мүшајиәт едән Лука нә баш вердијини данышыр: «Орадакы [Ромадакы] гардашлар барәмиздә ешитдикдә, орадан Аппиус базарына вә Үч Меһманханалара гәдәр бизи гаршыламаға ҝәлдиләр». Бу сәһнәни тәсәввүр едә биләрсәнми? Павелин ҝәлдијини билән кими бир дәстә гардаш Ромадан онун гаршысына чыхды. Дәстәнин бири Ромадан тәхминән 74 километр аралыда олан Аппиус базарынын — танынмыш почт стансијасынын јанында ҝөзләјирди. Галан гардашлар исә шәһәрдән тәхминән 58 километр аралыда јерләшән Үч Меһманханаларын — дајанаҹағын јанында ҝөзләјирдиләр. Бу, һәваријә неҹә тә’сир бағышлады? Лука гејд едир: «Павел онлары ҝөрдүкдә Аллаһа шүкүр етди вә руһланды» (Һәвариләрин ишләри 28:15). Бирҹә тәсәввүр един, Павел асан олмајан бу јолу гәт едән гардашлары садәҹә олараг ҝөрдүјү үчүн өзүндә гүввә вә тәскинлик һисс етди! Вә бу јардыма ҝөрә Павел кимә миннәтдарлыг етди? Бу вәзијјәтин јаранмасына сәбәб олан Јеһова Аллаһа.

22. 2005-ҹи ил үчүн иллик ајә неҹә сәсләнир вә нөвбәти мәгаләдә нә мүзакирә едиләҹәк?

²² Ајдындыр ки, Јеһова тајы-бәрабәри олмајан Јардымчыдыр. Мүгәддәс Китабда јазыланлар бу барәдә чох ҝөзәл шаһидлик едир. Јеһованын Шаһидләри 2005-ҹи ил үчүн иллик ајәни әбәс јерә Мәзмур 121:2 (ЈД) ајәсиндән сечмәјибләр: «Јардымым... Јеһовадандыр». Бәс Јеһова бу ҝүн бизә неҹә јардым ҝөстәрир? Бу нөвбәти мәгаләдә мүзакирә едиләҹәк.

[Һашијә]

Хатырлајырсынызмы?

• Мәләкләрдән истифадә едәрәк Јеһова јардымы неҹә тәгдим едир?

• Јеһова Өз мүгәддәс руһунун васитәсилә јардымы неҹә тәгдим едир?

• Јеһова Өз Кәламынын васитәсилә јардымы неҹә тәгдим едир?

• Јеһова һәмиманлылар васитәсилә јардымы неҹә тәгдим едир?

[9-ҹу сәһифәдәки јазы]

2005-ҹи ил үчүн иллик ајә бу олаҹагдыр: «Јардымым... Јеһовадандыр» (Мәзмур 121:2, ЈД).

[8-ҹи сәһифәдәки шәкил]

Павел Ромадакы гардашлардан алдығы јардыма ҝөрә Јеһоваја миннәтдарлыг етди.