Сән Јеһованын јардымыны гәбул едирсәнми?
«Рәбб мәнә јардымчыдыр, мән горхмарам» (ИБРАНИЛӘРӘ 13:6).
1, 2. Јеһованын јардымыны гәбул етмәк вә Онун ҝөстәришләринә гулаг асмаг нәјә ҝөрә ваҹибдир?
ТӘСӘВВҮР ет ки, дағлыг јол илә сәјаһәтә чыхмысан. Лакин сән тәк дејилсән, сәнинлә өз ишини јахшы билән бәләдчи ҝедир. Тәҹрүбәдә вә дөзүмлүлүкдә сәндән үстүн олмасына бахмајараг, о, сәбирлә сәнин јанынҹа ҝедир. Бә’зән бүдрәмәјин онун нәзәриндән гачмыр. Тәһлүкәли јердә јыхылмајасан дејә сәнә әлини узадыр. Сән онун јардымындан имтина едәҹәксәнми? Әлбәт ки, јох! Ахы сөһбәт сәнин һәјатындан ҝедир.
2 Бир мәсиһчи кими, бизләр чәтин јолла ҝедирик. Бу ‘енсиз јолда’ биз тәнһамы јеримәлијик? (Матта 7:14). Хејр, Мүгәддәс Китабдан өјрәнирик ки, јер үзүндә ән јахшы Бәләдчи олан Јеһова Аллаһ инсанлара Онунла јеримәјә имкан верир (Јарадылыш 5:24; 6:9). Һәмин јолда Јеһова Өз хидмәтчиләринә көмәк едирми? О дејир: «Сәнин сағ әлиндән тутуб “Горхма, сәнә көмәк едәҹәјәм” дејән Аллаһын Рәбб Мәнәм» (Јешаја 41:13). Јухарыда хатырланан бәләдчи кими, Јеһова, Онунла јеримәјә чалышан кәсләрә Өз көмәклијини вә достлуғуну тәклиф едир. Бизләрдән ким бу ҹүр јардымдан имтина етмәк истәјәрди?
3. Бу мәгаләдә биз һансы суаллары мүзакирә едәҹәјик?
3 Әввәлки мәгаләдә, Јеһованын кечмишдә Өз халгына јардым етмәк үчүн истифадә етдији дөрд үсулу нәзәрдән кечирдик. Аллаһ бу ҝүн дә ејни ҹүр јардым ҝөстәрирми? Вә биз Онун јардымыны гәбул етдијимизә неҹә әмин ола биләрик? Ҝәлин бу суаллары мүзакирә едәк. Белә олан һалда биз Јеһованын һәгигәтән дә бизим Јардымчымыз олдуғуна әминлијимизи мөһкәмләндирәрик (Ибраниләрә 13:6).
Мәләкләрин јардымы
4. Нәјә ҝөрә бизим ҝүнләрдә Аллаһын хидмәтчиләри мәләкләрин јардымына бел бағлаја биләрләр?
4 Мәләкләр Аллаһын мүасир хидмәтчиләринә јардым ҝөстәрирләрми? Сөзсүз. Доғрудур, бу ҝүн онлар Аллаһын халгыны тәһлүкәдән азад етмәк үчүн ҝөзә ҝөрүнмүрләр. Һәтта Мүгәддәс Китабын јазылдығы дөврләрдә белә, онлар надир һалларда ҝөзә ҝөрүнүрдүләр. Буҝүнкү кими, чох вахт онлар ҝөрүнмәз тәрздә јардым ҝөстәрирдиләр. Буна бахмајараг, Аллаһын хидмәтчиләри мәләкләрин онлара һәмишә јардым етмәјә һазыр олдугларыны биләрәк, өзләрини даһа үрәкли һисс едирдиләр (2 Падшаһлар 6:14-17). Мәләкләрин јардымына бел бағламаг үчүн бизим дә там әсасымыз вар.
5. Бизим ҝүнләримиздә мәләкләрин тәблиғ ишиндә иштирак етдијини Мүгәддәс Китаб неҹә ҝөстәрир?
5 Јеһованын мәләкләрини бизә дә аидијјаты олан бир иш хүсуси олараг марагландырыр. Бу һансы ишдир? Ҹавабы Вәһј 14:6 ајәсиндә тапа биләрик: «Ҝөјүн ортасында учан башга бир мәләји дә ҝөрдүм. Онун әбәди бир Мүждәси вар иди ки, јер үзүндә јашајанлара, һәр милләтә, һәр гәбиләјә, һәр дилә вә һәр халга тәблиғ етсин». Бу «әбәди... Мүждә», еһтимал ки, Исанын габагҹадан сөјләдијинә әсасән јашадығымыз систем өз сонуна чатмаздан әввәл «милләтләрин һамысына шәһадәт олараг бүтүн дүнјада» тәблиғ олунаҹаг «Падшаһлыг һаггында олан... Мүждә» илә әлагәлидир (Матта 24:14, И–93). Әлбәт ки, мәләкләр шәхсән өзләри тәблиғ етмирләр. Бу ваҹиб иши Иса инсанлара һәвалә едиб (Матта 28:19, 20). Мәҝәр бизә верилән тапшырығын јеринә јетирилмәсиндә мүгәддәс мәләкләрин — мүдрик вә гүдрәтли руһани варлыгларын јардым ҝөстәрмәләри бизи руһландырмырмы?
6, 7. а) Мәләкләрин бизим тәблиғ ишимизә дәстәк олдуглары нәдән ҝөрүнүр? б) Јеһованын мәләкләринин јардымыны алаҹағымыза әмин олмаг үчүн нә етмәк лазымдыр?
6 Мәләкләрин бизим ишимизә јардым етдијинә даир чохлу сүбутлар вар. Мәсәлән, тез-тез ешидирик ки, Јеһованын Шаһидләри хидмәт едәркән, бир гәдәр әввәл дуа едәрәк Аллаһдан һәгигәти тапмагда онлара көмәк етмәсини хаһиш едән инсанларла гаршылашырлар. Белә һаллар чох тез-тез баш вердији үчүн онлары ади тәсадүф һесаб етмәк дүз олмазды. Мәләкләрин рәһбәрлији сајәсиндә ҝетдикҹә даһа чох инсанлар «ҝөјүн ортасында учан» мәләјин: «Аллаһдан горхун! Она иззәт верин», чағырышына һај верә билирләр (Вәһј 14:7).
7 Јеһованын гүдрәтли мәләкләринин сәнә јардым етмәләрини арзулајырсанмы? Белә исә бүтүн гүввәни хидмәтинә һәср елә (1 Коринфлиләрә 15:58). Јеһованын ишини һәвәслә јеринә јетирәрәк, биз Онун мәләкләринин јардымына бел бағлаја биләрик.
Мәләкләрин Башчысынын јардымы
8. Иса ҝөјдә һансы мөвгеји тутур вә бу бизи неҹә мөһкәмләндирир?
8 Јеһова бизә мәләкләрин јардымыны башга ҹүр дә тәгдим едир. Вәһј 10:1 ајәсиндә ‘үзү ҝүнәшә бәнзәјән’ башга ‘ҝүҹлү бир мәләк’ тәсвир олунур. Рө’јада ҝөрүнән бу мәләк, еһтимал ки, дирилмиш Иса Мәсиһи сәмави иззәтиндә тәмсил едир (Вәһј 1:13, 16). Иса һәгигәтәнми мәләкдир? Мүәјјән мә’нада еләдир, чүнки о баш мәләкдир (1 Салониклиләрә 4:16). Иса Јеһованын руһани оғулларындан ән гүдрәтлисидир. Јеһова ону сәмави ордусунун Башчысы тә’јин етмишдир. Биз бу баш мәләјин васитәсилә бөјүк јардым әлдә едирик. Һансы үсулла?
9, 10. а) Ҝүнаһ ишләтдијимиз заман Иса бизим јардымчымыз ролунда неҹә чыхыш едир? б) Исанын нүмунәси бизә неҹә көмәк едир?
9 Јаша долмуш һәвари Јәһја јазырды: «Әҝәр бири ҝүнаһа батса белә, Атанын јанында Мүдафиәчијә, јә’ни адил олан Иса Мәсиһә маликик» (1 Јәһја 2:1). Јәһја нәјә ҝөрә Иса һаггында бизим ҝүнаһларымызла әлагәдар Мүдафиәчи, јә’ни јардымчы кими данышыр? Биз һәр ҝүн ҝүнаһ ишләдирик, ҝүнаһ исә өлүмә апарыр (Ваиз 7:20; Ромалылара 6:23). Иса исә өз һәјатыны бизим ҝүнаһларымыз уғрунда гурбан верди. О, бизим мәрһәмәтли Атамызын јанында отурур вә бизи мүдафиә едир. Һәр биримизин бу ҹүр јардыма еһтијаҹы вар. Биз бу јардымы неҹә ала биләрик? Ҝүнаһларымыздан төвбә етмәк вә Аллаһдан Мәсиһин гурбанлығы әсасында бағышланмамызы хаһиш етмәк зәруридир. Һәм дә диггәт јетирмәлијик ки, көһнә ҝүнаһлара јенидән гајытмајаг.
10 Иса бизим уғрумузда өлмәклә јанашы, тәглид етмәјимиз үчүн бизә камил нүмунә дә гојмушдур (1 Петер 2:21). Онун нүмунәси бизә јол ҝөстәрир, ҹидди ҝүнаһлардан гачынмаға вә Јеһованы разы салаҹаг һәјат сүрмәјә көмәк едир. Мәҝәр бу ҹүр јардыма малик олмаг бизим үчүн хош дејилми? Бундан әлавә Иса өз давамчыларына сөз верди ки, онлара башга јардымчы ҝөндәрәҹәк.
Мүгәддәс руһун васитәсилә едилән јардымы
11, 12. Јеһованын руһу нәдир, онун ҝүҹү нә гәдәрдир вә о бизә бу ҝүн нәјә ҝөрә лазымдыр?
11 Иса вә’д етмишдир: «Атадан хаһиш едәҹәјәм ки, О, даим сизинлә бәрабәр олмаг үзрә сизә башга бир Тәсәлливериҹи версин. Бу, һәгигәт Руһудур; Ону дүнја гәбул едә билмәз» (Јәһја 14:16, 17). «Һәгигәт Руһу», јә’ни мүгәддәс руһ шәхсијјәт дејил, Јеһованын фәал гүввәсидир. Бу гүввәнин һәдди јохдур. Јеһова һәмин гүввәнин васитәсилә Каинаты јаратмыш, һејранедиҹи мө’ҹүзәләр ҝөстәрмиш вә рө’ја васитәсилә Өз ирадәсини ачмышдыр. Бу ҝүн Јеһова Өз фәал гүввәсиндән бу ҹүр истифадә етмир, лакин бу о демәкдирми ки, мүгәддәс руһ бизә лазым дејил?
12 Әксинә! Бу «чәтин анларда» Јеһованын руһу бизә әввәлкиндән даһа чох лазымдыр (2 Тимотејә 3:1). О бизә сынаглара таб ҝәтирмәкдә ҝүҹ верир. О бизә, бизи Јеһова илә вә руһани баҹы-гардашларымызла јахынлашдыран ҝөзәл кејфијјәтләр јетишдирмәкдә көмәк едир (Галатијалылара 5:22, 23). Шүбһәсиз, мүгәддәс руһ ҝөзәл јардым тәгдим едир. Бәс ону әлдә етмәк үчүн нә етмәк олар?
13, 14. а) Јеһованын Өз хидмәтчиләринә мүгәддәс руһуну вермәк истәдијини һарадан билирик? б) Һансы әмәлләримиз ҝөстәрә биләр ки, биз әслиндә мүгәддәс руһун јардымыны гәбул етмирик?
13 Биринҹиси, дуада мүгәддәс руһ истәмәк ваҹибдир. Иса демишдир: «Мадам ки, сиз пис олдуғунуз һалда өз өвладларыныза јахшы һәдијјәләр верә билирсиниз, Сәмави Атанызын Ондан диләјәнләрә Мүгәддәс Руһу верәҹәји нә гәдәр јәгиндир!» (Лука 11:13). Бәли, Јеһова дүнјада ән ҝөзәл Атадыр. Әҝәр биз сидги-үрәкдән иманла Ондан мүгәддәс руһ диләсәк, онда О бизә мүтләг мүгәддәс руһ верәҹәкдир. Белә исә биз Аллаһдан мүгәддәс руһ истәјирикми? Биз бу һагда хаһиши һәр ҝүн дуаларымыза дахил етмәлијик.
14 Икинҹиси, биз мүгәддәс руһу, онун тәгдим етдији рәһбәрлијә әсасән даврананда алырыг. Тәсәввүр едәк ки, мәсиһчи порнографијаја бахмаг мејли илә мүбаризә апарыр. О, бу ијрәнҹ вәрдишдән азад олмаг үчүн дуада мүгәддәс руһ истәјир. О, һәм дә көмәк үчүн јығынҹағын ағсаггалларына мүраҹиәт едиб. Онлар исә она гәтијјәтлә һәрәкәт етмәји вә әхлагсыз материала һәтта јахынлашмамағы мәсләһәт ҝөрүбләр (Матта 5:29). Әҝәр о, ағсаггалларын мәсләһәтинә е’тинасыз јанашараг, јенидән өзүнү сынаглара мә’руз гојурса, неҹә? О, мүгәддәс руһун она көмәк етмәси барәдә дуа едир, бәс дуасына мүвафиг олараг давранырмы? Әкс тәгдирдә һәмән адам Аллаһын руһуну кәдәрләндирмәк вә өзүнү бу ән’ама лајиг олмамаг тәһлүкәси алтына атыр (Ефеслиләрә 4:30). Бизләрдән һәр биримиз баҹардығымыз гәдәр һәр шеји етмәлијик ки, бундан сонра да мүгәддәс руһун ҝөзәл јардымына малик олаг.
Аллаһын Кәламындан әлдә едилән јардым
15. Мүгәддәс Китабы ади китаб кими гәбул етмәдијимиз нәдән ҝөрүнәҹәк?
15 Јеһованын садиг хидмәтчиләри артыг чох әсрләрдир ки, Мүгәддәс Китабдан јардым әлдә едирләр. Биз Мүгәддәс Јазылары ади китаб кими гәбул етмәмәлијик, јадда сахламаг лазымдыр ки, о бизә чох көмәк едә биләр. Лакин көмәк әлдә етмәк үчүн сә’ј тәләб олунур. Мүгәддәс Китабы охумағы өзүмүз үчүн вәрдишә чевирмәлијик.
16, 17. а) Мәзмур 1:2, 3 ајәләринә әсасән Аллаһын ганунуну охумаг неҹә мүкафатландырылыр? б) Нәдән ҝөрүнүр ки, Мәзмур 1:3 ајәсиндә сә’јлә чалышмаг мәнзәрәси тәсвир едилир?
16 Мәзмур 1:2, 3 ајәләриндә Аллаһдан горхан инсан барәсиндә дејилир: «О анҹаг Рәббин ганунундан зөвг алар, ҝеҹә-ҝүндүз бу тә’лиматы дәрин дүшүнәр. Ахар сулар кәнарында әкилән ағаҹ кими барыны мөвсүмүндә верәр, јарпағы солмаз, етдији һәр ишдә уғур газанар». Бу сөзләрин мәғзини баша дүшүрсәнми? Дүшүнмәк олар ки, бурада чај кәнарындакы көлҝәли ағаҹдан ибарәт сакит бир мәнзәрә тәсвир едилиб. Наһардан сонра бу ҹүр јердә бир балаҹа мүрҝүләмәк неҹә дә хош оларды! Лакин бу мәзмур бизә истираһәт һаггында дүшүнмәји тәклиф етмир. Бу мәзмур тамамилә башга бир мәнзәрәни — сә’јлә чалышмаг мәнзәрәсини тәсвир едир. Бу нәдән ҝөрүнүр?
17 Диггәт јетирәк ки, бурада тәсвир олунан ағаҹ — чај кәнарында тәсадүф нәтиҹәсинә әмәлә ҝәлән, ади көлҝәли ағаҹ дејил. Бу, биләрәкдән мүәјјән јердә — «ахар сулар кәнарында әкилән» бар ҝәтирән ағаҹдыр. Бәс бир ағаҹ бир нечә ахар сујун кәнарында неҹә бөјүјә биләр? Мәсәлә ондадыр ки, мејвә бағларынын саһибләри әксәр һалларда ағаҹларын јанындан кечән суварма каналлары чәкирдиләр. Инди мәсәләнин мәғзи бизә ајдындыр! Әҝәр биз мәзмурда тәсвир олунан ағаҹа бәнзәр тәрздә руһани мә’нада чичәкләнириксә, бу јалныз она ҝөрә баш верир ки, бизә ҝөрә бөјүк иш ҝөрүлмүшдүр. Биз, тәмиз һәгигәт суларыны јанымыза чатдыран тәшкилатла бағлыјыг. Лакин бизим дә өз тәрәфимиздән сә’ј ҝөстәрмәјимиз тәләб олунур. Биз дүшүнмәјә вә тәдгигатлар апармаға вахт һәср едәрәк, бу гијмәтли сулары өзүмүзә һопмалыјыг. Бу, Аллаһын Кәламында олан һәгигәтләрин шүурумузда вә үрәјимиздә көк салмасы үчүн лазымдыр. Белә олан һалда биз дә ҝөзәл сәмәрәләр ҝәтирә биләрик.
18. Суалларымыза Мүгәддәс Китабдан ҹаваб тапмаг үчүн нә етмәк лазымдыр?
18 Әҝәр Мүгәддәс Китаб садәҹә олараг китаб рәфиндә дурурса, ондан һеч бир фајда олмајаҹаг. Диҝәр тәрәфдән исә ҝөзләмәк олмаз ки, онун әлимизә кечән илк сәһифәсини ачмагла бизи марагландыран суала ҹаваб тапаҹағыг, чүнки Мүгәддәс Китаб фөвгәл’адә гүввәјә малик дејил. Гәрар гәбул етмәк лазым ҝәләндә, «Аллаһ билҝисини» (КМ) ҝизләдилмиш хәзинә кими ахтармаг лазымдыр (Сүлејманын мәсәлләри 2:1-5). Дүшдүјүмүз вәзијјәтә дәгигликлә ујғун ҝәлән Мүгәддәс Китаб принсипини тапмаг үчүн, адәтән сә’јлә вә диггәтлә тәдгигат апармаг лазымдыр. Јардым үчүн бизә Мүгәддәс Китаба әсасланан чохлу нәшрләр тәгдим олунмушдур. Аллаһын Кәламында мүдрик мәсләһәтләр ахтарараг онлардан истифадә едәндә, биз Јеһованын Өзүндән ҝәлән көмәји гәбул едирик.
Һәмиманлыларын васитәсилә едилән јардым
19. а) Нәјә ҝөрә «Ҝөзәтчи Гүлләси» вә «Ојанын!» журналларында олан мәгаләләрә һәмиманлылардан ҝәлән јардым кими бахмаг олар? б) Журналларымыздан бириндә олан һәр-һансы мәгаләнин сизә неҹә көмәк етдијини данышын.
19 Јеһованын халгы һәмишә бир-биринә јардым ҝөстәриб. Јеһова бу ҹәһәтдән дәјишилибми? Әсла. Шүбһәсиз ки, бизләрдән һәр биримиз еһтијаҹ дујдуғу заман һәмиманлыларындан вахтлы-вахтында алдығы јардымы хатырлајыр. Еһтимал ки, «Ҝөзәтчи Гүлләси» вә «Ојанын!» журналларында олан, чәтин анларда сәнә тәсәлли верән, проблеми һәлл етмәкдә көмәк едән вә ја сынаглар заманы сәнә дәстәк олан мәгаләләри хатырлајырсан. Јеһова бу јардымы сәнә «вахтлы-вахтында... јемәк вермәк үчүн» тә’јин олунмуш «садиг вә ағыллы гул»ун васитәсилә ҝөстәриб (Матта 24:45-47).
20. Ағсаггаллар неҹә «инсанлар тимсалында һәдијјәләр» олурлар?
20 Буна бахмајараг, биз чох вахт шәхсән таныдығымыз һәмиманлыларымыздан јардым алырыг. Мәсиһчи ағсаггал үрәјимизә тә’сир едән мә’рузә илә чыхыш едә биләр, бизә чәтин анда дајаг ола биләҹәк чобан зијарәти едә биләр, ја да ки, һансыса чатышмазлығымызы анлајыб, онун өһдәсиндән ҝәлмәјә көмәк едән хош мәсләһәт верә биләр. Миннәтдарлыг һисси дујан бир мәсиһчи гадын ағсаггалын она неҹә көмәк етдији һагда јазырды: «Биз тәблиғ хидмәтиндә оларкән, о мәни үрәјими ачмаға тәшвиг етди. Мәһз елә һәмән ҝүндән әввәлки ҝеҹә Јеһоваја дуа етмишдим ки, өз нараһатчылыгларымы бөлүшә биләҹәјим кими исә тапым. Вә будур, нөвбәти ҝүн һәмин гардаш мәнимлә анлајышла данышды. О, Јеһованын артыг узун илләр әрзиндә мәнә неҹә јардым етдијини ҝөрмәкдә көмәк етди. Бу чобаны мәнә јетирдији үчүн Аллаһа миннәтдарам». Беләликлә ағсаггаллар бизим бундан сонра да һәјата апаран јолла ҝедә билмәјимиз үчүн Јеһованын Иса Мәсиһ васитәсилә вердији «инсанлар тимсалында һәдијјәләр» олурлар (Ефеслиләрә 4:8, ЈД).
21, 22. а) Мәсиһчи јығынҹағынын үзвләринин Филипилиләрә 2:4 ајәсиндәки принсипә әсасән давранмалары һансы сәмәрәни ҝәтирир? б) Нәјә ҝөрә һәтта балаҹа хејирхаһ әмәлләр дә әһәмијјәт кәсб едир?
21 Јалныз ағсаггаллар дејил, лакин һәр бир садиг мәсиһчи «јалныз өз мәнфәәтини дејил, башгаларынын да мәнфәәтини ҝүдүн» кими илһамланмыш мәсләһәтә риајәт етмәји арзу едир (Филипилиләрә 2:4). Мәсиһчи јығынҹағынын үзвләри бу ҹүр даврананда, бу јахшы әмәлләр тимсалында ҝөзәл бәһрәләр ҝәтирир. Мәсәлән, бир аилә бир гәфил башларына ҝәлән бөјүк фәлакәтдән әзијјәт чәкмәјә башлајыр. Ата гызы илә бирликдә машында мағазаја ҝедир. Ҝеријә гајыдаркән автомобил гәзасына уғрајыр. Гыз өлүр, ата исә ағыр хәсарәт алыр. Ону хәстәханадан бураханда, киши о гәдәр зәиф олур ки, өз гајғысына гала билмир. Онун һәјат јолдашы исә баш верән һадисәдән чох сарсылдығындан әринә гуллуг едә билмир. Јығынҹагда бир әр-арвад гәм-гүссә ичиндә олан бу валидејнләри өз јанларына ҝөтүрүрләр вә бир нечә һәфтә онлара гајғы ҝөстәрирләр.
22 Сөзсүз ки, һәмиманлылара ҝөстәрилән јардым һәмишә фаҹиә вә ја бөјүк сә’јләрлә әлагәдар олмур. Бә’зән бизим алдығымыз јардым ҹүз’и олур. Лакин буна ҝөрә биз һәмин јардымы азмы гијмәтләндиририк? Елә бир һалы јадына сала биләрсәнми ки, гардашын вә ја баҹынын сөјләдији хош сөз вә ја гајғыкеш давранышы сәнин мәһз еһтијаҹ дујдуғун јардым олсун? Јеһова чох вахт бизә мәһз бу ҹүр көмәк едир (Сүлејманын мәсәлләри 17:17; 18:24).
23. Јеһова бизим бир-биримизә көмәк етмәк ҹәһдимизи неҹә гијмәтләндирир?
23 Јеһованын сәнин васитәнлә башгаларына көмәк етмәсини истәјәрдинми? Бу мүмкүндүр. Јеһова сәнин бу саһәдә ҝөстәрдијин ҹәһдләри чох гијмәтләндирир. Онун Кәламында дејилир: «Касыба сәхавәт ҝөстәрән санки Рәббә борҹ верәр, чүнки онун әвәзи Рәбдән ҝәләр» (Сүлејманын мәсәлләри 19:17). Ҝүҹүмүзү вә вахтымызы баҹы-гардашлара сәрф етмәклә, бөјүк севинҹ дујуруг (Һәвариләрин ишләри 20:35). Бу севинҹ, башгаларындан гәсдән узаглашанлара әлчатан дејил, һәтта белә инсанлар өзләрини руһани јардымдан мәһрум едирләр (Сүлејманын мәсәлләри 18:1). Буна ҝөрә дә ҝәлин бир-биримизи руһландырмаг имканына малик олмаг үчүн мәсиһчи ҝөрүшләримизи бурахмамаға чалышаг (Ибраниләрә 10:24, 25).
24. Јеһованын кечмишдә етдији һејранедиҹи мө’ҹүзәләри ҝөрмәсәк дә, нәјә ҝөрә өзүмүзү мәһрум едилмиш һесаб етмәјә әсасымыз јохдур?
24 Мәҝәр Јеһованын бизә неҹә көмәк етдији һагда дүшүнмәк хош дејилми? Биз Аллаһын Өз ирадәсини јеринә јетирмәк үчүн һејранедиҹи мө’ҹүзәләр етдији дөврдә јашамасаг да, өзүмүзү мәһрум едилмиш һисс етмәјә әсасымыз јохдур. Ән башлыҹасы одур ки, Она садиг галмағымыз үчүн Јеһова бизә ән чох лазым олан јардымы ҝөстәрир. Вә әҝәр садиглијимизи горујуб сахлајараг ахыра кими бирликдә таб ҝәтирсәк, Јеһованын ән һејранедиҹи вә иззәтли ишләрини ҝөрәҹәјик! Ҝәлин Јеһованын мәһәббәтдән бизә ҝөстәрдији јардымы гәбул етмәјә гәрарлы олаг вә ондан там дәрәҹәдә истифадә едәк ки, 2005-ҹи ил үчүн олан иллик ајәмизә мүвафиг јашаја биләк: «Јардымым... Јеһовадандыр» (Мәзмур 121:2, ЈД).
Неҹә дүшүнүрсүнүз?
• Бизә бу ҝүн лазым олан јардымы Јеһова мәләкләрин васитәсилә неҹә чатдырыр?
• Бизә бу ҝүн лазым олан јардымы Јеһова мүгәддәс руһун васитәсилә неҹә чатдырыр?
• Бизә бу ҝүн лазым олан јардымы Јеһова Кәламынын васитәсилә неҹә чатдырыр?
• Бизә бу ҝүн лазым олан јардымы Јеһова һәмиманлыларын васитәсилә неҹә чатдырыр?
[16-ҹы сәһифәдәки шәкил]
Мәләкләрин тәблиғ ишинә јардым етдикләрини билмәк хошдур.
[17-ҹи сәһифәдәки шәкил]
Бизә лазыми тәсәллини вермәк үчүн Јеһова һәмиманлылардан кими исә истифадә едә биләр.