Онлар «дәјәри чох бөјүк олан бир мирвари» тапыблар
«Сәмави падшаһлыг — инсанларын вар гүввәләри илә ҹан атдыглары мәгсәддир вә ҹан атанлар она јијәләнирләр» (МАТТА 11:12, ЈД).
1, 2. а) Иса Падшаһлыг һаггында чәкдији мәсәлләрин бириндә һансы надир хүсусијјәти хатырлатмышдыр? б) Дәјәрли мирвари һаггындакы мәсәлиндә Иса нә демишдир?
СӘНИН үчүн елә бир дәјәрли шеј мөвҹуддурму ки, она малик олмаг наминә һәр шејиндән кечмәјә һазыр оласан? Инсанлар вар-дөвләтә, шөһрәтә, һакимијјәтә, вәзифәјә ҹан атараг, чохлу сә’ј ҝөстәрирләр. Анҹаг нәјинсә хатиринә инсанын һәр шеји гурбан вермәјә һазыр олмасы надир һалдыр. Бу ҹүр мәгсәдјөнлүлүк адамы һејран едир. Иса Мәсиһ Аллаһын Падшаһлығы һаггында чәкдији чохсајлы вә инсаны дүшүнмәјә вадар едән мәсәлләриндән бириндә мәһз белә бир хүсусијјәти хатырладыр.
2 Иса шаҝирдләри илә бирликдә оланда, чох вахт дәјәрли мирвари һаггындакы мәсәл кими дә танынан белә бир мәсәл чәкмишдир. О демишдир: «Сәмави Сәлтәнәт [Падшаһлыг] ҝөзәл мирвариләр ахтаран бир таҹирә бәнзәр; о, дәјәри чох бөјүк олан бир мирвари тапараг, ҝедиб бүтүн варыны сатыб, ону сатын алды» (Матта 13:36, 45, 46). Иса динләјиҹиләринә нә өјрәтмәк истәјирди? Вә биз бурадан һансы ибрәт дәрсини ҝөтүрә биләрик?
Мирваринин дәјәри
3. Гәдим заманларда јахшы мирвариләр нә үчүн чох гијмәтләндирилирди?
3 Гәдим дөврләрдән е’тибарән мирвари һәмишә өз ҝөзәллијинә ҝөрә гијмәтләндирилиб. Мүгәддәс Китаб үзрә бир арајышда Рома алими Бөјүк Плини јазмышдыр ки, мирвари «гијмәтли шејләрин арасында биринҹи јери тутурду». Гызылдан, ҝүмүшдән вә бир чох гијмәтли дашлардан фәргли олараг, мирвари ҹанлы организмләрдән — кичик молјускалардан әмәлә ҝәлир. Мә’лум олдуғу кими, мирвари јад ҹисимләрдән, мәсәлән, гум дәнәҹикләринин молјусканын чанағына дүшмәси вә тәдриҹән сәдәфин әтрафында топланмасы нәтиҹәсиндә әмәлә ҝәлир. Гәдим заманларда, ән јахшы мирвариләр әсасән Гырмызы дәниздән, Иран көрфәзиндән вә Һинд океанындан, јә’ни Исраилдән олдугҹа узагларда чыхарылырды. Мәһз буна ҝөрә дә Иса «ҝөзәл мирвариләр ахтаран бир таҹир» һаггында данышмышды. Әсл дәјәрли мирвари тапмаг үчүн чохлу сә’ј тәләб олунурду.
4. Исанын таҹир һаггында сөјләдији мәсәлдә башлыҹа олан нә иди?
4 Мирвари гәдимдән баһалы мал сајылса да, шүбһәсиз ки, Исанын чәкдији мәсәлдә әсас олан онун гијмәти дејилди. Иса Аллаһын Падшаһлығыны садәҹә дәјәрли мирваријә бәнзәтмәклә јанашы, һәмчинин диггәти «ҝөзәл мирвариләр ахтаран... таҹирә» вә һәмин мирварини тапан заман онун һәрәкәтинә јөнәлтди. Ади дүканчыдан фәргли олараг, бу таҹир, неҹә дејәрләр, өз ишинин устасы иди. О адам надир мирварини фәргләндирән бәдии дәјәрини вә сезилмәз ҹизҝиләрини анламаг үчүн тәләб олунан ити ҝөзә вә һәссаслыға малик иди. О, малын әсл олуб-олдуғуну дәрһал анлајар, кејфијјәтсиз вә ја сахта мирварини гәтијјән алмазды.
5, 6. а) Исанын мәсәлиндәки таҹир нәјә ҝөрә хүсуси адам иди? б) Ҝизләдилмиш дәфинә мәсәли таҹирин нијјәтләрини баша дүшмәкдә неҹә көмәк едир?
5 Гејд етмәк лазымдыр ки, Исанын һаггында бәһс етдији таҹир хүсуси инсандыр. Ади тиҹарәтчи әввәлҹә мирваринин базар гијмәтини мүәјјән едәр вә ондан ҝәлир әлдә етмәк үчүн нә гәдәр пул вермәк лазым ҝәлдијини һесаблајарды. Һәмчинин о, белә бир мирваријә тәләбат олуб-олмадығыны вә ону тез бир заманда сатыб-сатмајаҹағыны өјрәнәрди. Башга сөзләрлә десәк, онун үчүн башлыҹасы малы өзүндә сахламаг дејил, сәрф едилән вәсаити ҝери гајтармагдыр. Анҹаг Исанын мәсәлиндәки таҹир тамам башга инсандыр. Ону нә пул, нә дә ҝәлир марагландырыр. О ахтардығына наил олмаг үчүн «бүтүн варыны», ола билсин, шәхси әшјаларыны вә мүлкүнү белә вермәјә һазыр иди.
6 Тиҹарәтчиләрин әксәријјәти, еһтимал ки, бу таҹирин һәрәкәтини ағылсызлыг һесаб едәрдиләр. Узагҝөрән тиҹарәтчи белә бир хәтәрли ишә пул бурахмазды. Лакин Исанын мәсәлиндәки таҹир дәјәрләр һаггында башга тәсәввүрә малик иди. О, өзү үчүн мүкафаты мадди ҝәлирдә дејил, гијмәтдә тајы-бәрабәри олмајан бир шејә малик олмагдан алынан севинҹ вә хошбәхтликдә ҝөрүрдү. Буну, Исанын данышдығы башга бир мәсәл тәсдиг едир: «Сәмави Сәлтәнәт [Падшаһлыг] тарлада ҝизләдилән бир дәфинәјә бәнзәр. Ону бир адам тапыб ҝизләтди; вә севинҹлә ҝедиб бүтүн варыны сатыб, о тарланы сатын алды» (Матта 13:44). Тапылан дәфинәнин ҝәтирдији севинҹ наминә, һәмин инсан малик олдуғу һәр шејдән имтина етмәјә һазыр иди. Белә инсанлар бу ҝүн дә вармы? Вә бу ҹүр гурбанлара дәјән дәфинә мөвҹуддурму?
Онлар Падшаһлығын дәјәрини дәрк етмишләр
7. Нәјә ҝөрә әминликлә демәк олар ки, Иса Падшаһлығын дәјәрини дәрк едирди?
7 Иса таҹир һаггындакы мәсәли данышаркән әслиндә «Сәмави Сәлтәнәт [Падшаһлыг]» һаггында данышырды. Иса һаггында там әминликлә демәк олар ки, о, Падшаһлығын дәјәрини дәрк едирди. Инҹил бу һагда ҝүҹлү шаһидлик едир. Б. е. 29-ҹу илиндә вәфтиз олундугдан сонра, Иса «тәблиғ едиб: “Төвбә един, чүнки Сәмави Сәлтәнәт [Падшаһлыг] јахындыр”, — демәјә... башлады». Иса үч ил јарым давам едән хидмәти әрзиндә чох инсанлара Падшаһлығын һәгигәтләрини өјрәтмишди. Иса Исраилдә дөнә-дөнә «шәһәрләри вә кәндләри долашыб тәблиғ едәрәк Аллаһын Сәлтәнәтини [Падшаһлығыны] мүждәләјирди» (Матта 4:17; Лука 8:1).
8. Иса Аллаһын Падшаһлығынын инсанлар үчүн нәләр едәҹәјини неҹә ҝөстәрди?
8 Иса чохлу мө’ҹүзәләр ҝөстәрирди. О, Аллаһын Падшаһлығынын инсанлар үчүн нәләр едәҹәјини ҝөстәрәрәк, хәстәләрә шәфа верир, аҹлары дојурур, тәбии фәлакәтләрин гаршысыны алыр вә һәтта өлүләри дирилдирди (Матта 14:14-21; Марк 4:37-39; Лука 7:11-17). Сонунда исә ишҝәнҹә дирәјиндә әзаб-әзијјәт ичиндә өләрәк Аллаһа вә Онун Падшаһлығына олан сәдагәтини сүбут етди. Таҹир «дәјәри чох бөјүк олан бир мирвари» үчүн бүтүн варыны вердији кими, Иса да Падшаһлыг наминә јашамыш вә онун уғрунда ҹаныны гурбан вермишдир (Јәһја 18:37).
9. Мәсиһин илк давамчылары һансы надир хүсусијјәтләри илә сечилирдиләр?
9 Иса өз һәјатыны Падшаһлыға һәср етмәклә бәрабәр, һәм дә давамчыларындан ибарәт балаҹа бир груп тәшкил етди. Бу инсанлар да Падшаһлығын дәјәрини чох ҝөзәл дәрк едирдиләр. Онлардан бири вәфтизчи Јәһјанын шаҝирди Андреј иди. Андреј Јәһјадан Исанын «Аллаһын Гузусу» олдуғуну ешидән кими онун башга бир шаҝирди илә, һәр еһтимала ҝөрә, Зеведејин оғлу Јәһја илә дәрһал Исанын ардынҹа ҝетмиш вә она иман етмишдиләр. Лакин бунунла һәр шеј битмәди. Андреј дәрһал гардашы Шимонун јанына ҝедиб: «Биз Мәсиһи тапдыг» деди. Бир аздан Шимон (Кефа вә ја Петер кими дә танынырды), һәмчинин Филип өз досту Натанел илә Исанын Мәсиһ олдуғуну е’тираф етдиләр. Натанел, һәтта Исаја деди: «Сән Аллаһын Оғлусан, Сән Исраилин Һөкмдарысан!» (Јәһја 1:35-49).
Онлар һәрәкәтә тәшвиг олунмушлар
10. Иса биринҹи ҝөрүшдән бир гәдәр вахт кечдикдән сонра шаҝирдләри онун ардынҹа ҝәлмәјә чағырдығы заман, онлар буна неҹә һај вердиләр?
10 Андрејин, Петерин, Јәһјанын вә башгаларынын Мәсиһи тапдыглары заман кечирдикләри һәјәҹаны, дәјәрли мирвари тапан таҹирин кечирдији һиссләрлә мүгајисә етмәк олар. Инди онлар нә едәҹәкләр? Иса илә һәмин биринҹи ҝөрүшдән дәрһал сонра онларын нә етдикләри барәдә Инҹилдә, демәк олар ки, хатырланмыр. Ҝөрүнүр ки, онларын чоху өзләринин ҝүндәлик ишләри илә мәшғул олмаға давам етмишләр. Лакин тәхминән јарым илдән бир илә гәдәр вахт кечдикдән сонра Иса Андрејә, Петерә, һәмчинин Јәһјаја вә онун гардашы Јагуба Галилеја дәнизиндә балыг тутдуглары јердә јенидән раст ҝәлмишдиa. Онлары ҝөрәндә Иса деди: «Ардымҹа ҝәлин, Мән сизи инсан тутан балыгчылар едәҹәјәм». Бу тәклифә онлар неҹә һај вердиләр? Маттанын Мүждәсиндә Петер вә Андреј һаггында дејилир: «Онлар да һәмин анда торлары атыб Онун ардынҹа ҝетдиләр». Јагуб вә Јәһја һагда һәмчинин охујуруг: «Онлар да һәмин анда гајығы вә аталарыны гојуб Исанын ардынҹа ҝетдиләр». Луканын Мүждәсиндә исә әлавә олунур ки, онлар «һәр шеји атыб, Онун ардынҹа ҝетдиләр» (Матта 4:18-22; Лука 5:1-11).
11. Шаҝирдләри Исанын тәклифинә тез һај вермәјә тәшвиг едән, еһтимал ки, нә иди?
11 Бәлкә шаҝирдләр бу гәрары һиссләрә гапылдыглары бир анда гәбул етмишдиләр? Чәтин. Онлар Иса илә биринҹи ҝөрүшдән сонра аиләләринин мәшғул олдуглары балыгчылыг ишинә гајытсалар да, һәмин вахт ҝөрдүкләри вә ешитдикләри, шүбһәсиз ки, онларын үрәк вә дүшүнҹәләриндә дәрин из бурахмышды. Һәр шеји ҝөтүр-гој етмәк үчүн онларын, демәк олар ки, бир ил вахтлары варды. Инди исә гәрар гәбул етмәјин вахты ҝәлиб чатмышды. Онлар да бөјүк дәјәрә малик олан мирварини тапан кими севиндијиндән ону алмаг үчүн дәрһал ҝедиб лазым олан һәр шеји едән таҹир кими олаҹаглармы? Бәли. Онларын ҝөрдүкләри вә ешитдикләри үрәкләриндә дәрин из бурахмышдыр. Онлар һәрәкәт етмәјин вахты чатдығыны дәрк етмишдиләр. Буна ҝөрә дә, Инҹилдә дејилдији кими, онлар тәрәддүд етмәдән һәр шеји гојуб, Мәсиһин ардынҹа ҝетдиләр.
12, 13. а) Исаны динләјәнләрин әксәријјәти неҹә инсанлар иди? б) Иса өз садиг шаҝирдләри һаггында нә демишдир вә онун сөзләри нәји нәзәрдә тутур?
12 Бу садиг кишиләр Инҹилдә хатырланан башга инсанлардан неҹә дә фәргләнирдиләр! Исанын шәфа вердији вә ја дојурдуғу инсанлар чох иди, амма онлар өз ишләри илә мәшғул олмаға давам едирдиләр (Лука 17:17, 18; Јәһја 6:26). Башгалары, Исанын тәклифиндән үз дөндәрмәк үчүн һәтта бәһанәләр ахтарырдылар (Лука 9:59-62). Онлар Исанын сонрадан һаггында данышдығы садиг инсанлардан чох сечилирдиләр: «Вәфтизчи Јәһјанын ҝүнләриндән индијәдәк сәмави падшаһлыг — инсанларын вар гүввәләри илә ҹан атдыглары мәгсәддир вә ҹан атанлар она јијәләнирләр» (Матта 11:12, ЈД).
13 «Вар гүввәләри илә ҹан атдыглары» вә «ҹан атанлар» ифадәси алтында нәзәрдә тутулан нәдир? Бу ифадәләрин әмәлә ҝәлдији јунан фе’ли һаггында «Вајнын Әһди-Әтиг вә Әһди-Ҹәдидин сөзләринә аид изаһлы лүғәти»ндә дејилир: «Бу фе’л енержи долу ҹәһди нәзәрдә тутур» («Вине’с Ехпоситорј Диҹтионарј оф Олд анд Неw Тестамент Wордс»). Үмумиликдә ајә һаггында исә Мүгәддәс Китаб алими Һенрих Мајер јазмышдыр: «Јахынлашан Хиласкар падшаһлыға гаршы ҹошғун, рәфедилмәз, лазым олан сә’ји ҝөстәрмәк һазырлығы белә тәсвир олунур. [...] Падшаһлығы сакит ҝөзләмәни аловлу вә ҝәрҝин мараг әвәз етмишдир». Таҹир кими, бу бир нечә адам нәјин һәгигәтән гијмәтли олдуғуну дәрһал анлајыб, малик олдуглары һәр шеји Падшаһлыг уғрунда көнүллү олараг гурбан вермишләр (Матта 19:27, 28; Филипилиләрә 3:8).
«Мирваринин» ахтарышына башгалары да гошулурлар
14. Иса һәвариләрини Падшаһлыг һаггындакы тәблиғ ишинә неҹә һазырламышдыр вә бунун нәтиҹәси неҹә олмушдур?
14 Иса хидмәти заманы Падшаһлығы ахтармагда башгаларына да көмәк едирди. Әввәлҹә Иса шаҝирдләри арасындан 12 нәфәри сечди вә онлары һәвари, јә’ни өз елчиләри тә’јин етди. Иса шаҝирдләринә хидмәти неҹә јеринә јетирмәјә даир ҝениш изаһат верди, һәмчинин чәтинликләр барәдә онлары хәбәрдар етди (Матта 10:1-42; Лука 6:12-16). Нөвбәти ики ил әрзиндә онлар Исаны Исраилдә етдији тәблиғ сәјаһәтләриндә мүшајиәт етмиш вә онунла јахындан үнсијјәт етмишдиләр. Һәвариләр Исанын дедикләрини ешитмиш, һабелә гүдрәтли ишләринин шаһиди олмуш вә онун шәхси нүмунәсини ҝөрмүшдүләр (Матта 13:16, 17). Бүтүн бунлар, шүбһәсиз ки, шаҝирдләрә елә ҝүҹлү тәәссүрат бағышламышдыр ки, онлар да таҹир кими сә’јлә вә бүтүн үрәклә өз һәјатларыны Падшаһлығын мәнафејинә һәср етмишдиләр.
15. Исанын сөзләринә ҝөрә, онун давамчыларынын севинмәк үчүн һансы әсл сәбәбләри варды?
15 Иса 12 һәваридән савајы, «јетмиш башга адам тә’јин едиб, онлары ики-ики Өзүнүн ҝедәҹәји һәр шәһәрә вә һәр јерә, Өзүндән габаг ҝөндәрди». О, онлары да чәтинликләрин олаҹағы һагда хәбәрдар едиб, инсанлара нөвбәти сөзләри демәји тапшырды: «Аллаһын Сәлтәнәти [Падшаһлығы] сизә јахынлашды» (Лука 10:1-12). Јетмиш шаҝирд тәблиғдән севинҹлә гајыдыб, Исаја сөјләди: «Ја Рәбб! Ҹинләр дә Сәнин адынла бизә итаәт едирләр». Исанын ҹавабы, ола билсин ки, онлары тәәҹҹүбләндирди. Иса онлара баша салды ки, Падшаһлыг үчүн ҝөстәрдикләри сә’јин сајәсиндә ҝәләҹәкдә даһа чох севинҹ һисси дујаҹаглар. О деди: «Руһларын сизә итаәт етмәсинә севинмәјин, лакин сизин адларынызын ҝөјләрдә јазылдығына севинин» (Лука 10:17, 20).
16, 17. а) Иса сонунҹу ҝеҹәдә өз садиг һәвариләринә нә деди? б) Исанын сөзләри һәвариләрә нә үчүн севинҹ ҝәтирди вә онлар нәјә зәманәт алдылар?
16 Б. е. 33-ҹү илинин 14 нисан ҝүнүндә Иса һәвариләри илә бирҝә сонунҹу ҝеҹәни кечирди. О, Рәббин Ҝеҹәси адланан бајрамы тә’сис етди вә онлара буну гејд етмәји бујурду. Иса һәмин ҝеҹә јанында олан 11 һәварисинә деди: «Кечирдијим сынагларда Мәнимлә бәрабәр оланлар сизсиниз, вә Атам Мәнә бир сәлтәнәт [падшаһлыг] тапшырдығы кими Мән дә сизә бир сәлтәнәт [падшаһлыг] тапшырырам ки, Мәним Сәлтәнәтимдә [Падшаһлығымда] сүфрәмдә јејиб-ичәсиниз вә Исраилин он ики гәбиләсинә һөкм етмәк үчүн тахтларда отурасыныз» (Лука 22:19, 20, 28-30).
17 Һәвариләр Исадан бу сөзләри ешидән заман, олсун ки, бөјүк севинҹ вә хошбәхтлик һисси кечирмишдиләр. О, онлара инсанын малик ола билдији ән бөјүк шәрәфи тәклиф едирди (Матта 7:13, 14; 1 Петер 2:9). Онлар таҹир кими, Исанын ардынҹа ҝетдикләри вә һәјатларыны Падшаһлығын мәнафејинә һәср етдикләри заман, чох шејдән имтина етмишләр. Инди исә онлар индијәдәк вердикләри гурбанларын әбәс олмадығына даир зәманәт алдылар.
18. Он бир һәваридән савајы даһа кимләр Падшаһлығын хејир-дуаларыны алыр?
18 Падшаһлығын хејир-дуалары јалныз Иса илә бәрабәр һәмин ҝеҹәдә иштирак етмиш һәвариләрә нәсиб олмур. Јеһованын ирадәси одур ки, Падшаһлыг әһдиндә 144 000 инсан да иштирак етсин. Онлар Иса илә бирликдә иззәтләнмиш сәмави Падшаһлыгда идарә едәҹәкләр. Бундан әлавә, һәвари Јәһја рө’јасында «кимсәнин сајмаға гадир олмадығы бөјүк бир издиһам» ҝөрмүшдү. Һәмин инсанлар «тахтын вә Гузунун гаршысында» дуруб, јүксәк сәслә: «Хилас, тахтда отуран Аллаһымыза вә Гузуја мәхсусдур!» дејә бәјан едирдиләр. Бунлар Падшаһлығын јер үзүндәки вәтәндашларыдырb (Вәһј 7:9, 10; 14:1, 4).
19, 20. а) Һәр халгдан олан инсанларын гаршысында һансы имкан ачыгдыр? б) Нөвбәти мәгаләдә һансы суалы мүзакирә едәҹәјик?
19 Иса ҝөјә галхмаздан бир аз габаг өзүнүн садиг давамчыларына бујурду: «Ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един; сизә әмр етдијим һәр шејә риајәт етмәји онлара өјрәдин; вә будур, Мән, дөврүн сонуна гәдәр һәр ҝүн сизинләјәм» (Матта 28:19, 20). Беләликлә, Иса Мәсиһин шаҝирдләри һәр халгдан олан инсанлар олмалы иди. Онлар да дәјәрли мирваријә саһиб олмаг үчүн бүтүн варыны гојан таҹир кими, кимиси сәмави, кимиси исә јер мүкафатыны ҝөзләјәрәк һәр шејләрини Падшаһлыг наминә гојмалы идиләр.
20 Иса демишдир ки, инсанлары өјрәтмәк тапшырығы, бу системин сонунадәк давам едәҹәкдир. Бәс бу ҝүн дә һәмән таҹир кими, Падшаһлыг наминә һәр шејләрини гурбан вермәјә һазыр олан инсанлар вармы? Бу суалы нөвбәти мәгаләдә мүзакирә едәҹәјик.
[Һашијәләр]
a Ола биләр ки, Зеведејин оғлу Јәһја Иса илә биринҹи ҝөрүшдән сонра онун ардынҹа ҝетмиш вә онун ишләриндән бә’зиләринин шаһиди олмушдур. Бу исә она һәмин һадисәләри өз Мүждәсиндә ҹанлы сурәтдә јазмаға имкан вермишдир (Јәһја, 2-5-ҹи фәсилләр). Лакин јенидән Иса илә ҝөрүшмәздән бир мүддәт өнҹә, о, аиләсинин мәшғул олдуғу балыгчылыг ишинә гајытмышдыр.
b Бу һагда даһа чох мә’луматы, Јеһованын Шаһидләри тәрәфиндән нәшр едилән «Әбәди һәјата апаран билик» китабынын 10-ҹу фәслиндә охуја биләрсиниз.
Изаһ едә биләрсинизми?
• Исанын таҹир һаггында сөјләдији мәсәлдә башлыҹа олан нә иди?
• Нәјә ҝөрә әминликлә демәк олар ки, Иса Падшаһлығын дәјәрини дәрк едирди?
• Нәјә ҝөрә Андреј, Петер, Јәһја вә башгалары Иса чағыран кими дәрһал онун ардынҹа ҝетдиләр?
• Һәр халгдан олан инсанларын гаршысында һансы ҝөзәл имкан дурур?
[16-ҹы сәһифәдәки шәкил]
Онлар һәр шејләрини гојуб Исанын ардынҹа ҝетдиләр.