Бизим ҝүнләрдә «дәјәри чох бөјүк олан мирвари»нин ахтарышы
«Сәмави Сәлтәнәт [Падшаһлыг] һаггында олан бу Мүждә... бүтүн дүнјада тәблиғ олунаҹагдыр» (МАТТА 24:14).
1, 2. а) Исанын ҝүнләриндә јәһудиләр Аллаһын Падшаһлығы һаггында һансы фикирдә идиләр? б) Иса Падшаһлыг һаггында дүзҝүн тәсәввүрү ашыламаг үчүн нә етди вә бу һансы бәһрәләри ҝәтирди?
ИСАНЫН јер үзүндә јашадығы дөврдә Аллаһын Падшаһлығы һаггындакы мөвзу јәһудиләр арасында ән мүһүм јери тутурду (Матта 3:1, 2; 4:23-25; Јәһја 1:49). Лакин илк өнҹә онларын әксәријјәти бу Падшаһлығын мигјасыны вә онун рәһбәрлијинин гүввәсини һеч дә тәсәввүр етмирдиләр, онлар Падшаһлығын ҝөјләрдән идарә едәҹәјини дә баша дүшмүрдүләр (Јәһја 3:1-5). Һәтта Исанын давамчысы оланлардан бә’зиләринин белә Аллаһын Падшаһлығынын нә олдуғу вә Мәсиһлә бәрабәр идарә етмәк шәрәфинә лајиг ҝөрүлмәк үчүн нә тәләб олундуғу һаггында ајдын тәсәввүрләри јох иди (Матта 20:20-22; Лука 19:11; Һәвариләрин ишләри 1:6).
2 Иса шаҝирдләринә чох шејләри изаһ едәрәк, онлары сәбирлә өјрәдирди. Мәсәлән, өтән мәгаләдә дәјәрли мирвари һаггындакы өјрәндијимиз мәсәли данышмагла, Иса шаҝирдләринә ҝөстәрди ки, инсан ҝәрәк сәмави Падшаһлығы вар гүввәсини сәрф едәрәк ахтарсын (Матта 6:33; 13:45, 46; Лука 13:23, 24). Бу, олсун ки, онлара дәрин тәәссүрат бағышламышды, белә ки, «Һәвариләрин ишләри» китабынын әсаслы сурәтдә шаһидлик етдији кими, чох кечмәмиш онлар Падшаһлыг һаггындакы хош хәбәри усанмадан вә ҹәсарәтлә дүнјанын ән узаг јерләринә гәдәр бәјан етмәјә башладылар (Һәвариләрин ишләри 1:8; Колослулара 1:23).
3. Иса бизим ҝүнләрдән данышаркән Падшаһлыг һаггында нә деди?
3 Бәс мүасир ҝүнләримиз һаггында нә демәк олар? Милјонларла инсанлара Падшаһлығын рәһбәрлији алтында олаҹаг јер үзүндәки Ҹәннәтин хејир-дуалары тәклиф едилир. Иса «дөврүн сонуна» даир сөјләдији бөјүк пејғәмбәрлијиндә гејд етмишди: «Сәмави Сәлтәнәт [Падшаһлыг] һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир» (Матта 24:3, 14; Марк 13:10). О, һәмчинин баша салды ки, бу мөһтәшәм тапшырыг әһәмијјәтли манеәләрә, чәтинликләрә вә һәтта тә’гибләрә бахмајараг, иҹра олунаҹагдыр. Бунунла бәрабәр о бизи әмин етди ки, «ахыра гәдәр сәбр едән хилас олаҹагдыр» (Матта 24:9-13). Бунун үчүн, Исанын мәсәлиндәки таҹир кими, фәдакар вә мәгсәдјөнлү олмаг тәләб олунур. Бу ҝүн Падшаһлығы белә иман вә сә’јлә ахтаранлар вармы?
Һәгигәти тапмаг бөјүк севинҹдир
4. Падшаһлыг һаггындакы һәгигәт бизим ҝүнләрдә инсанлара неҹә тә’сир едир?
4 Исанын мәсәлиндәки таҹир «дәјәри чох бөјүк олан... мирвари»ни тапан заман севинҹинин һәдди-һүдуду јох иди. Бу севинҹ ону һәмән хәзинәни әлдә етмәк үчүн мүмкүн олан һәр шеји етмәјә тәшвиг етди (Ибраниләрә 12:1). Бунун кими, бизим ҝүнләрдә дә Аллаһ вә Онун Падшаһлығы һаггындакы һәгигәт инсанлары өзүнә ҹәлб етмәклә бәрабәр, һәм дә онлары һәрәкәтә тәшвиг едир. А. Һ. Макмиллан гардашын «Маршда иман» китабында јаздығы сөзләр јада дүшүр. Бу китабда гардаш Аллаһы неҹә ахтардығы вә бәшәријјәт үчүн Онун нијјәтини неҹә өјрәндији һаггында данышырды. Макмиллан гардаш јазырды: «Мәним тапдығымы минләрлә инсанлар илләрлә ахтармаға давам едирләр. Онлар да бизим кими инсанлардыр, онларын арасында бүтүн милләтләрдән, иргләрдән, ҹәмијјәтин һәр тәбәгәсиндән вә һәр јашдан олан инсанлар вар. Һәгигәт инсанларын кимлијинә бахмыр. О һәр ҹүр инсанлары өзүнә ҹәлб едир».
5. 2004-ҹү хидмәт или әрзиндә һансы наилијјәтләр әлдә едилмишдир?
5 Бу сөзләр һәгигәтән дә доғрудур. Чүнки Аллаһын Падшаһлығы һаггындакы хош хәбәр һәр ил јүз минләрлә сәмими гәлбли инсанлары һәјатларыны Јеһоваја һәср етмәјә вә Онун ирадәсини јеринә јетирмәјә тәшвиг едир. 2003-ҹү илин сентјабр ајындан, 2004-ҹү илин август ајына гәдәр давам едән 2004-ҹү хидмәт или дә истисна дејил. Бу 12 ај әрзиндә 262 416 инсан Јеһоваја һәср олундугларыны башгаларынын гаршысында суда вәфтиз олунмагла символлашдырмышлар. Јеһованын Шаһидләри һәр һәфтә 235 өлкәдә 6 085 387 Мүгәддәс Китаб өјрәнмәси кечирирләр. Онлар бу өјрәнмәләри кечирмәклә ҹәмијјәтин бүтүн тәбәгәләриндән, бүтүн милләтләрдән, гәбилә вә дилләрдән олан инсанлара Аллаһын Кәламындан һәјат верән һәгигәти дәрк етмәјә көмәк етмишләр (Вәһј 7:9).
6. Нәјин сајәсиндә һәгигәтә һәр ил чохлу инсанлар ҝәлир?
6 Бүтүн бунлар нәјин сајәсиндә баш верди? Шүбһә јохдур ки, Јеһова «әбәди һәјата мејлли олан» (ЈД) инсанлары Өзүнә ҹәлб едир (Јәһја 6:65; Һәвариләрин ишләри 13:48). Лакин Падшаһлығын марагларына хидмәт етмәк үчүн усанмаз вә тәмәннасыз әмәји оланлары да унутмаг олмаз. 79 јашлы Макмиллан гардаш јазырды: «Әзаб-әзијјәт чәкән вә өлмәк үзрә олан бәшәријјәтә верилмиш вә’дләрлә илк дәфә таныш оландан бәри, Мүгәддәс Китабын мәнә ачдығы хәбәрә олан үмидим һәлә дә зәифләмәјиб. Мән дәрһал Мүгәддәс Китабын тә’лимләри һаггында даһа чох билмәк гәрарына ҝәлдим ки, Гадир Аллаһ олан Јеһова вә Онун бәшәријјәтә даир ҝөзәл нијјәтләри һаггында билик ахтаран мәним кими инсанлара көмәк едә билим».
7. Һансы нүмунәдән ҝөрүнүр ки, инсанлар адәтән Мүгәддәс Китаб һәгигәтини ҹошғунлуг вә севинҹлә гәбул едирләр?
7 Белә бир сә’ји бу ҝүн Јеһованын Шаһидләри арасында да ҝөрүрүк. Мисал үчүн, Вјанада (Австрија) јашајан Даниеланы ҝөтүрәк. О дејир: «Ушаглыгдан бәри Аллаһ мәним ән јахшы достум олуб. Мән һәмишә Онун адыны билмәк истәмишәм, чүнки мәним үчүн садәҹә “Аллаһ” шәхсијјәт дејилди. Лакин мән Јеһованын Шаһидләри гапымы дөјдүкләри ана кими 17 ил ҝөзләмәли олдум. Онлар мәнә Аллаһ һаггында билмәк истәдијим һәр шеји данышдылар. Ахыр ки, мән һәгигәти тапдым — бу неҹә дә ҝөзәл иди! Севинҹимин һәдди-һүдуду јох иди. Вә демәк олар ки, һәр кәсә тәблиғ етмәјә башладым». Бу гызын һәгигәтә ҹошғун мүнасибәти тезликлә синиф јолдашларынын истеһзасына сәбәб олду. Даниела давам едәрәк дејир: «Мән буна Мүгәддәс Китаб пејғәмбәрлијинин јеринә јетмәси кими бахырдым, ахы мән Исанын өз давамчыларына онун адына ҝөрә нифрәт вә тә’гиб едәҹәкләри һаггында дедикләрини билирдим. Мән тәәҹҹүбләнир, ејни заманда да өзүмү чох хошбәхт һисс едирдим». Бир аздан Даниела һәјатыны Јеһоваја һәср етди, вәфтиз олунду вә гаршысына миссионер кими хидмәт етмәји мәгсәд гојду. Әрә ҝетдикдән сонра Даниела әри Хелмутла бәрабәр Вјанада јашајан африкалылара, чинлиләрә, филипинлиләрә вә һиндлиләрә тәблиғ етмәјә башлады. Инди Даниела илә Хелмут Африканын ҹәнуб-гәрбиндә миссионер кими хидмәт едирләр.
Онлар зәифләмирләр
8. Чохлары Аллаһа мәһәббәтләрини вә Онун Падшаһлығына сәдагәтләрини һансы мүкафатландырыҹы үсулла тәзаһүр етдирирләр?
8 Миссионер хидмәти — Јеһованын халгы үчүн Аллаһа мәһәббәтләрини вә Онун Падшаһлығына сәдагәтләрини ҝөстәрмәк үсулларындан биридир. Исанын мәсәлиндәки таҹир кими, белә бир хидмәтә башлајан инсанлар Падшаһлығын мәнафеји наминә дүнјанын ән узаг јерләринә белә ҝетмәјә һазырдырлар. Сөзсүз ки, миссионерләр узаг өлкәләрә Падшаһлыг һаггындакы хош хәбәри тапмаг үчүн јолланмырлар: онлар өзләри бу хәбәри инсанлара апарыр, Иса Мәсиһин шаҝирдләри олмаг үчүн инсанлары өјрәдир вә онлара көмәк едирләр (Матта 28:19, 20). Чох јерләрдә онлар бөјүк чәтинликләрлә гаршылашырлар. Лакин миссионерләрин бу тәһәммүлү бол-бол мүкафатландырылыр.
9, 10. Мәркәзи Африка Республикасы кими узаг өлкәләрдә миссионерләрлә һансы мараглы һадисәләр баш верир?
9 Нүмунә үчүн Мәркәзи Африка Республикасына диггәт јетирмәк олар. Бурада кечән ил Мәсиһин өлүмүнүн Хатирә Ҝеҹәсиндә 16 184 нәфәр иштирак етмишдир ки, бу да тәблиғчиләрин сајындан једди дәфә чохдур. Өлкәнин бир чох јерләриндә електрик олмадығындан, ҹамаат ев ишләрини һәјәтдә, ағаҹларын көлҝәси алтында ҝөрүр. Миссионерләр дә өз ишләрини бу јолла јеринә јетирирләр, онлар да Мүгәддәс Китаб өјрәнмәсини ағаҹларын көлҝәси алтында, тәмиз һавада кечирирләр. Һәјәтдә ишыглы вә сәрин олмагдан әлавә, бунун башга үстүнлүјү дә вар. Башга мәдәнијјәтләрдә инсанларын идман вә һава һаггында бәһс етмәји севдикләри кими, бу инсанлар да Мүгәддәс Китабы севир вә дини мөвзулары мүзакирә етмәји хошлајырлар. Чох вахт елә олур ки, јол ҝедән адам Мүгәддәс Китаб өјрәнмәси кечирилдијини ҝөрәндә садәҹә ҝәлиб өјрәнмәјә гошулур.
10 Бир дәфә, миссионер ачыг һавада белә өјрәнмә кечирдији заман, јолун әкс тәрәфиндә јашајан бир ҹаван оғлан она јахынлашыб билдирмишдир ки, һәләлик онлара һеч ким ҝәлмәдији үчүн, миссионер она баш чәкиб, онунла да Мүгәддәс Китабы өјрәнмәлидир. Сөзсүз ки, миссионер мәмнунијјәтлә разылашды вә инди һәмин ҹаван оғлан руһән сүр’әтлә инкишаф едир. Бу өлкәдә полисләр тез-тез Јеһованын Шаһиди олан сүрүҹүләри сахлајырлар, амма она ҝөрә јох ки, онлара мәһкәмәјә чағырыш вәрәгәси версинләр вә ја ҹәримә етсинләр. Онлар ја «Ҝөзәтчи Гүлләси» вә «Ојанын!» журналларынын сонунҹу сајларыны истәјир, ја да хүсусилә хошларына ҝәлән мәгалә үчүн тәшәккүрләрини билдирирләр.
11. Чәтинликләрә бахмајараг, тәҹрүбәли миссионерләр өз хидмәтләри барәдә нә дүшүнүрләр?
11 40-50 ил бундан габаг миссионер оланларын чоху индијәдәк өз хидмәтләрини сәдагәтлә давам етдирирләр. Онлар бизә имана вә тәһәммүлә даир неҹә дә ҝөзәл нүмунә верирләр! Бир әр-арвад ахырынҹы 42 ил әрзиндә үч мүхтәлиф өлкәдә миссионер кими хидмәт едибләр. Әр дејир: «Чәтинликләр дә олурду. Мәсәлән, 35 ил биз малјарија илә мүбаризә апармышыг. Лакин һеч заман миссионер олмаг гәрарымыз үчүн тәәссүфләнмәмишик». Онун һәјат јолдашы әлавә едир: «Миннәтдар олмаг үчүн сәбәбләримиз о гәдәрдир ки. Тәблиғ хидмәти бөјүк севинҹ ҝәтирир вә Мүгәддәс Китаб өјрәнмәси тапмаг чәтин дејил. Ҝөрәндә ки, шаҝирдләр јығынҹаглара ҝәлир вә бир-бирләри илә таныш олурлар, һәр дәфә адамда елә тәәссүрат јараныр ки, санки аилә бир јерә топлашыб».
Онлар «һәр шеји зијан һесаб едир»ләр
12. Инсанын Падшаһлығын дәјәрини һәгигәтән дә дәрк етдијини неҹә мүәјјән етмәк олар?
12 Чох дәјәрли мирварини тапан таҹир дәрһал «ҝедиб бүтүн варыны сатыб, ону сатын алды» (Матта 13:46). Дәјәрли һесаб олунан шеј үчүн нәји исә гурбан вермәјә һазыр олмаг — Падшаһлығын дәјәрини һәгигәтән дәрк едәнләрин фәргләндириҹи хүсусијјәтидир. Мәсиһин падшаһлыг иззәтинә шәрик олан һәвари Павел демишдир: «Уғрунда һәр шејин зәрәрини чәкдијим Рәббим Мәсиһ Исаны танымағын үстүн дәјәри јанында һәр шеји зијан һесаб едир вә зибил сајырам ки, Мәсиһи әлдә едим» (Филипилиләрә 3:8).
13. Чехија Республикасында јашајан бир нәфәр Падшаһлыға олан мәһәббәтини неҹә тәзаһүр етдирди?
13 Бу ҝүн дә чохлары Падшаһлығын хејир-дуалары наминә һәјатларында чох дәјишикликләр едирләр. Мәсәлән, 2003-ҹү илин октјабр ајында Чехија Республикасынын 60 јашлы мәктәб мүдиринин әлинә Мүгәддәс Китабы өјрәнмәк үчүн вәсаит олан «Әбәди һәјата апаран билик» китабы кечмишдир. Бу китабы охујан кими мүәллим дәрһал јашадығы әразидә олан Јеһованын Шаһидләри илә әлагә сахлајыб, онунла Мүгәддәс Китаб өјрәнмәси кечмәләрини хаһиш етди. О, руһән инкишаф етмәјә вә тезликлә бүтүн јығынҹаг ҝөрүшләринә ҝәлмәјә башлады. Бәс онун мер кими сечилмәк вә сенатор олмаг планлары неҹә? Бунун әвәзинә о, Падшаһлығын тәблиғчиси олмаг гәрарына ҝәлди. О данышыр: «Мән шаҝирдләримин арасында чохлу Мүгәддәс Китаб әдәбијјаты пајлаја билдим». О, 2004-ҹү илин ијул ајында кечирилән конгресдә Јеһоваја һәср олундуғуну суда вәфтиз олунмағы илә символлашдырды.
14. а) Милјонларла инсанлары Падшаһлыг һаггындакы хош хәбәр нәјә тәшвиг едир? б) Һәр кәс өзүнә һансы ҹидди суаллары верә биләр?
14 Бүтүн дүнјада милјонларла инсанлар Падшаһлыг һаггындакы хош хәбәри бу ҹүр севинҹ вә ҹошғунлугла гәбул едибләр. Онлар бу гәддар дүнјаны тәрк едиб, көһнә мәнликләрини гојуб, көһнә достларыны атыб вә дүнјәви мәгсәдләриндән имтина едибләр (Јәһја 15:19; Ефеслиләрә 4:22-24; Јагуб 4:4; 1 Јәһја 2:15-17). Нәјә ҝөрә? Она ҝөрә ки, Аллаһын Падшаһлығынын хејир-дуалары бу инсанлар үчүн индики системин тәклиф едә биләҹәји һәр шејдән даһа дәјәрлидир. Падшаһлыг һаггындакы хош хәбәрә сән дә белә јанашырсанмы? Кечирдијин һәјат тәрзинин, дәјәрләринин вә мәгсәдләринин Јеһованын тәләбләри илә узлашмасы үчүн лазым олан дәјишикликләри етмәк истәјин вармы? Бу сәнә инди вә ҝәләҹәкдә бол-бол хејир-дуалар ҝәтирәҹәкдир.
Бичинин сону јахынлашыр
15. Пејғәмбәрлијә әсасән, бу сон ҝүнләрдә Аллаһын халгы һансы ишлә мәшғул олмалыдыр?
15 Мәзмурчу јазырды: «Дөјүш ҝүнү әсҝәрләрин көнүллү олараг дөјүшә ҝедәҹәк». Аллаһын ирадәсини һазырлыгла јеринә јетирәнләр арасында ‘сәһәр шеһи кими олан ҝәнҹләр’ вә ‘бир алај мүждә пајлајан гадынлар’ иштирак едир (Мәзмур 68:11; 110:3). Бу сон ҝүнләрдә Јеһованын халгынын фәдакар әмәји — кишиләрин вә гадынларын, бөјүкләрин вә кичикләрин әмәји һансы бәһрәләри ҝәтирир?
16. Аллаһын хидмәтчиләринин Падшаһлыг һаггында башга инсанларын билмәләринә көмәк етмәк үчүн неҹә чалышдыгларына даир нүмунә ҝәтирин.
16 Һиндистанда хидмәт едән бир пионер, јә’ни Падшаһлығын таммүддәтли тәблиғчиси өлкәдә ики милјондан артыг јашајан лал инсанлара Падшаһлыг һаггында билмәләри үчүн неҹә көмәк етмәк барәсиндә дүшүнүрдү (Јешаја 35:5). Баҹы жест дили үзрә курса јазылмағы гәрара алыр. Курсларын сајәсиндә баҹы Падшаһлыға олан үмидини бир чох лалларла бөлүшмәјә башлајыр вә нәтиҹәдә Мүгәддәс Китабы өјрәнмәк үчүн груплар тәшкил олунур. Бир нечә һәфтә әрзиндә 12 нәфәрдән чох адам Падшаһлыг Залындакы ҝөрүшләрә ҝәлмәјә башлајыр. Сонрадан бир тој мәрасиминдә бу пионер баҹы Кәлкүттәдән олан бир ҹаван лал оғланла таныш олур. Һәмин оғлан Јеһова һаггында чохлу билмәк истәјир вә чохсајлы суаллар верир. Лакин бир чәтинлик јаранмышды. Бу ҹаван оғлан Кәлкүттәјә гајытмалы, јә’ни тәхминән 1600 километр узаға ҝетмәли вә коллеҹә дахил олмалы иди. О шәһәрдә исә жест дилини билән Шаһид јох иди. О, бөјүк чәтинликлә атасыны дилә тутур ки, Мүгәддәс Китабы өјрәнмәјә давам етмәси үчүн она Бенгалуруда галыб, орада охумағына иҹазә версин. О руһән бөјүјүр вә бир илдән сонра өз һәјатыны Јеһоваја һәср едир. Инди артыг о өзү башга лал инсанларла, о ҹүмләдән, өз ушаглыг досту илә Мүгәддәс Китаб өјрәнмәси кечирир. Һал-һазырда Һиндистандакы филиал пионерләрин жест дилини өјрәнмәләри вә лаллара көмәк етмәләри үчүн тәдбир ҝөрүр.
17. 19–22-ҹи сәһифәләрдә дәрҹ едилмиш 2004-ҹү хидмәт илинин һесабатында сизин ән чох хошунуза ҝәлән нә олду?
17 Бу журналын 19–22–ҹи сәһифәләриндә 2004-ҹү хидмәт или үчүн Јеһованын Шаһидләринин үмумдүнја тәблиғ хидмәтинин һесабатына баха биләрсиниз. Јеһованын халгынын «дәјәри чох бөјүк олан мирвари»нин ахтарышында неҹә бөјүк сә’ј ҝөстәрдикләрини өз ҝөзләринизлә ҝөрмәк үчүн, нәјә ҝөрә бир аз вахт ајырмајасыныз?
Әввәлҹә Падшаһлығы ахтарын
18. Таҹир һаггындакы мәсәлиндә Иса нә барәдә һеч нә демәди вә нәјә ҝөрә?
18 Таҹир һаггындакы мәсәлә бир даһа нәзәр салсаг ҝөрәрик ки, Иса бүтүн варындан мәһрум олан һәмин таҹирин сонра неҹә доланаҹағы һаггында һеч нә демәди. Ким исә соруша биләр: «Бәс доланмаг үчүн һеч нәји олмајан бу таҹир гиданы, ҝејими вә сығынаҹағы һарадан тапаҹагдыр? Дәјәрли мирвари она һансы фајданы ҝәтирәҹәк?» Инсан нөгтеји-нәзәриндән бу суаллар мәнтиги ҝөрүнүр. Лакин Иса шаҝирдләрини тәшвиг едирди: «Әввәлҹә Аллаһын Сәлтәнәтини [Падшаһлығыны] вә Онун салеһлијини ахтарын; вә бунларын һамысы сизә әлавә олараг вериләҹәкдир» (Матта 6:31-33). Иса өз мәсәлиндә демәк истәјирди ки, Аллаһы үрәкдән севмәк вә Онун Падшаһлығыны сә’јлә ахтармаг лазымдыр. Биз буну неҹә едә биләрик?
19. Исанын чох дәјәрли мирвари һаггындакы мәсәлиндән биз һансы әсас ибрәт дәрсини ҝөтүрә биләрик?
19 Арамызда валеһедиҹи хош хәбәрлә јениҹә таныш оланларла бәрабәр, онилләрлә Падшаһлығы ахтаран вә Онун хејир-дуаларыны бәјан едәнләр дә вар. Лакин һамымыза Падшаһлыға севинҹлә јанашмаға давам етмәк лазымдыр. Чәтин зәманәдә јашасаг да, таҹирин тапдығы мирвари кими, бизим мәгсәдимизин дә һәгиги вә дәјәрли олдуғуна инанмаг үчүн бүтүн әсасларымыз вар. Дүнјада баш верән һадисәләр вә Мүгәддәс Китабын јеринә јетән пејғәмбәрликләри «дөврүн сона» доғру јахынлашдығыны там шәкилдә сүбут едир (Матта 24:3). Ҝәлин Аллаһын Падшаһлығыны, таҹирин өз мирварисини гијмәтләндирдији кими, гијмәтләндирәк вә хош хәбәри севинҹлә тәблиғ етмәјә давам едәк (Мәзмур 9:1, 2).
Хатырлајырсынызмы?
• Нәјин сајәсиндә Аллаһын хидмәтчиләри һәр ил артыр?
• Миссионер кими хидмәт едәнләрдә һансы әһвал-руһијјә тәзаһүр олунур?
• Падшаһлыг һаггындакы хош хәбәр наминә инсанлар һансы дәјишикликләри едирләр?
• Исанын чох дәјәрли мирвари һаггындакы мәсәлиндә һансы ваҹиб ибрәт дәрсини ҝөрүрүк?
[24-ҹү сәһифәдәки шәкил]
«Һәгигәт... һәр ҹүр инсанлары өзүнә ҹәлб едир» (А. Һ. Макмиллан).
[25-ҹи сәһифәдәки шәкил]
Даниела илә Хелмут Вјанада әҹнәбиләрә тәблиғ едирдиләр.
[19-22-ҹи сәһифәләрдәки ҹәдвәл]
2004 ЈЕҺОВАНЫН ШАҺИДЛӘРИНИН ХИДМӘТ ИЛИ ҮЧҮН ҮМУМДҮНЈА ҺЕСАБАТЫ
(Һесабата нәшрин өзүндә бахын)