Јеһова һәмишә әдаләтлә давраныр

«Рәбб бүтүн јолларында адилдир» (МӘЗМУР 145:17).

1. Ким исә һаггымызда јанлыш нәтиҹә чыхарырса, биздә һансы һиссләр јараныр вә бурадан һансы ибрәт дәрсини ҝөтүрә биләрик?

ЕЛӘ олубму ки, ким исә вәзијјәтдән там хәбәри олмадан, сәнин һәрәкәтләрини вә ја нијјәтләрини мүһакимә едиб, һаггында јанлыш нәтиҹә чыхарсын? Јәгин ки, бу сәнин хәтринә дәјмишдир. Кечирдијин һиссләри баша дүшмәк олар. Бурадан ваҹиб ибрәт дәрси ҝөтүрмәк олар: әҝәр вәзијјәтдән там һали дејиликсә, тәләсик нәтиҹә чыхармагдан гачынмаг мүдрик давранышдыр.

2, 3. Мүгәддәс Јазыларда һәр бир суалын ҹавабына даир кифајәт гәдәр мә’лумат олмајан јерләрә раст ҝәлдикдә бә’зиләри неҹә мүнасибәт ҝөстәрирләр, бәс Јеһова һаггында Мүгәддәс Китабда нә дејилир?

² Биз Јеһова Аллаһ һаггында өјрәндијимиз заман да бу ибрәт дәрсини унутмамалыјыг. Нәјә ҝөрә? Она ҝөрә ки, Мүгәддәс Китабда елә јерләр вар ки, әввәлҹә адамы чашдыра биләр. Мәсәлән, Аллаһын хидмәтчиләринин вә ја елә Аллаһын Өзүнүн дә давраныш тәрзи бизим бүтүн суалларымыза ҹаваб верәҹәк дәрәҹәдә ҝениш тәсвир олунмаја биләр. Тәәссүфләр олсун ки, бә’зиләри Мүгәддәс Китабын бу кими парчаларыны тәнгид едир вә һәтта Аллаһын һаглы вә әдаләтли олдуғуна шүбһә едирләр. Лакин Мүгәддәс Јазыларда охујуруг ки: «Рәбб бүтүн јолларында адилдир» (Мәзмур 145:17). Онун Кәламы бизи әмин едир ки, Аллаһ ‘һагсызлыг етмир’ (Әјјуб 34:12; Мәзмур 37:28). Инсанлар Аллаһ һаггында јанлыш нәтиҹәләр чыхаранда Онун һансы һиссләри кечирдијини тәсәввүр ет!

³ Ҝәлин Јеһованын гәрарлары илә нә үчүн разылашмалы олдуғумузун беш сәбәбини нәзәрдән кечирәк. Сонра бу сәбәбләри јадда сахлајараг, суаллар јарада биләҹәк ики парчаны арашдыраг.

Нәјә ҝөрә Јеһованын гәрарлары илә разылашмаға дәјәр?

4. Аллаһын ишләрини нәзәрдән кечирәркән, нәјә ҝөрә тәвазөкар олмалыјыг? Нүмунә әсасында ҝөстәрин.

⁴ Биринҹи сәбәб одур ки, Јеһова, биздән фәргли олараг, мәсәләјә аид бүтүн фактлары билир. Буна ҝөрә дә, биз Аллаһын ишләрини нәзәрдән кечирәркән тәвазөкар олмалы дејиликми? Мисал үчүн, тәсәввүр едәк ки, нөгсансыз дүрүстлүјү вә әдаләтлилији илә мәшһур олан һаким бу вә ја диҝәр тәрздә мәһкәмә ишини һәлл едиб. Амма вәзијјәтдән там һали олмајан вә ганунлардан баш чыхармајан башга бириси онун гәрарыны тәнгид етмәјә башлајыр. Әҝәр вәзијјәтдән там хәбәрин јохдурса, мәсәләни мүһакимә етмәк ағылсызлыг олмаздымы? (Сүлејманын мәсәлләри 18:13). Онда биз инсанларын, «бүтүн дүнјанын Һакими»ни тәнгид етмәјимиз нә гәдәр ағылсызлыгдыр! (Јарадылыш 18:25).

5. Мүгәддәс Китабда Аллаһын бу вә ја диҝәр инсанларла неҹә даврандығы һаггында охујаркән нәји унутмалы дејилик?

⁵ Икинҹи сәбәб ондан ибарәтдир ки, инсанлардан фәргли олараг, Аллаһ үрәкләри ҝөрүр (1 Шамуел 16:7). Аллаһ Өз Кәламында дејир: «Мән Рәбб үрәји јохлајырам, инсанын фикрини сынајырам ки, һәр кәсә әмәлләринә ҝөрә, ишләринин бәһрәсинә ҝөрә әвәз верим» (Јеремја 17:10). Буна ҝөрә дә, ҝәлин Мүгәддәс Китабда Аллаһын бу вә ја диҝәр инсанларла неҹә даврандығы һаггында охујаркән унутмајаг ки, Онун Кәламында гәләмә алынмајан сирли фикирләр, нијјәтләр вә мәгсәдләр Онун һәр шеји ҝөрән ҝөзләриндән ҝизли галмамышдыр (1 Салнамәләр 28:9).

6, 7. а) Јеһова неҹә ҝөстәрди ки, Она баһа баша ҝәлсә дә, Өзүнүн әдаләтли нормаларына садиг галыр? б) Мүгәддәс Китабда бә’зиләриндә Аллаһын һагг вә әдаләтинә даир шүбһә ојадан парчалары охујаркән нәји јадда сахламалыјыг?

⁶ Үчүнҹү сәбәб исә ондан ибарәтдир ки, Јеһова Она баһа баша ҝәлсә дә, Өзүнүн әдаләтли нормаларына садиг галыр. Бир нүмунәни нәзәрдән кечирәк. Итаәткар бәшәријјәтин ҝүнаһ вә өлүмдән азад олмасы үчүн Өз Оғлуну гурбан вермәклә, Јеһова Өзүнүн әдаләтли вә доғру нормаларына мүвафиг давранмышдыр (Ромалылара 5:18, 19). Лакин севимли Оғлунун ишҝәнҹә дирәјиндә әзаб чәкиб, өлдүјүнү ҝөрмәк Јеһова үчүн ағласығмаз дәрәҹәдә ағыр иди. Бу, бизә Аллаһ һаггында нә дејир? Мүгәддәс Китабда «Иса Мәсиһин фидијә» гурбанлығы һаггында Аллаһын буну Өз «әдаләтини ҝөстәрмәк үчүн» етдији дејилир (Ромалылара 3:24-26, И–93). Башга бир тәрҹүмәдә Ромалылара 3:25 ајәсинин бу һиссәси белә сәсләнир: «Бу ону ҝөстәрди ки, Аллаһ һәмишә һагг вә әдаләтлә давраныр» («New Century Version»). Доғрудан да, Јеһованын фидијәни өдәмәк үчүн һансы гурбанлара ҝетмәјә һазыр олдуғуну нәзәрә алсаг, Онун «һагг вә әдаләтә» дәрин һөрмәт бәсләдијинә әмин олуруг.

⁷ Буна ҝөрә дә, Мүгәддәс Китабда бә’зиләриндә Аллаһын һагг вә әдаләтли олдуғуна даир шүбһә ојадан парчалары охујаркән, нөвбәти амили јадда сахламаг ҝәрәкдир: Јеһова Өзүнүн һагг-әдаләт нормаларына сәдагәтли галдығы үчүн, Өз Оғлуну белә әсирҝәмәјиб, онун әзаблы өлүмүнә јол верди. Белә олан һалда Аллаһ бу нормалары башга мәсәләләрдә позармы? Әслиндә Аллаһ һеч заман Өзүнүн һагг-әдаләт нормаларыны позмур. Беләликлә, Аллаһын һәмишә һагг вә әдаләтлә даврандығына даир инандырыҹы сәбәбләримиз вар (Әјјуб 37:23).

8. Нәјә ҝөрә инсанларын һансыса һалларда Јеһовада һагг вә әдаләтин чатышмадығыны дүшүнмәләри мәнтигәујғун дејил?

⁸ Дөрдүнҹү сәбәб ондадыр ки, Јеһова инсаны Өз сурәтиндә јаратмышдыр (Јарадылыш 1:27). Белә исә, инсанлара Аллаһын хүсусијјәтләри, о ҹүмләдән һагг-әдаләт һисси дә верилиб. Мәнтигәујғун олмазды ки, биздәки һагг вә әдаләт һисси, һансыса һалларда Јеһованын Өзүндә бу кејфијјәтләрин чатышмадығыны дүшүнмәјә мәҹбур етсин. Әҝәр Мүгәддәс Китабдан һансыса епизод бизи нараһат едирсә, унутмајаг ки, мирас алынмыш ҝүнаһ уҹбатындан әдаләт һиссимиз гејри-камилдир. Сурәтиндә јарадылдығымыз Јеһова Аллаһ исә һагг вә әдаләтдә камилдир (Ганунун тәкрары 32:4). Инсанларын исә Аллаһдан даһа һаглы вә әдаләтли олдугларыны тәсәввүр етмәк белә ҝүлмәлидир! (Ромалылара 3:4, 5; 9:14).

9, 10. Нәјә ҝөрә Јеһова инсанларын гаршысында һесабат вермәјә вә ја Өзүнә һагг газандырмаға борҹлу дејил?

⁹ Јеһованын гәрарлары илә разылашмалы олмағымызын бешинҹи сәбәби исә — Онун «бүтүн јер үзүндә... Һагг-Таала» олмасыдыр (Мәзмур 83:18). Белә олдуғу һалда Јеһова Өз гәрарларына ҝөрә инсанлар гаршысында һесабат вермәјә, јахуд Өзүнә һагг газандырмаға борҹлу дејил. О, Даһи Дулусчудур, биз исә Онун габлар истеһсал етдији ҝилик. Бу габларла неҹә давранаҹағыны исә О, Өзү гәрара алыр (Ромалылара 9:19-21). Биз кимик ки, Онун гәрарларыны вә давранышыны суал алтына гојаг? Биз садәҹә Онун әлләринин истеһсалыјыг. Тајфа башчысы Әјјуб Аллаһын инсанларла давранышына даир јанлыш нәтиҹәјә ҝәлдикдә, Јеһова онун нөгтеји-нәзәринә дүзәлиш верәрәк сорушду: «Сәнми әдаләтими боша чыхараҹагсан? Өзүнә һагг газандырмаг үчүн сәнми Мәни ҝүнаһландыраҹагсан?» Әјјуб ағылсыз данышдығыны баша дүшүб, төвбә етди (Әјјуб 40:8; 42:6). Аллаһы тәнгид етмәјимиз неҹә дә бөјүк сәһв оларды!

¹⁰ Беләликлә, Јеһованын һәмишә әдаләтлә даврандығына инанмаг үчүн бизим әсаслы сәбәбләримиз вар. Јеһованын јолларыны анламаг үчүн белә бир әсаса малик олараг, ҝәлин Мүгәддәс Китабын суаллар јарада билән ики парчасыны нәзәрдән кечирәк. Биринҹидә Аллаһын хидмәтчиләриндән биринин һәрәкәти, икинҹидә исә Аллаһын Өз давранышы һаггында бәһс едилир.

Нә үчүн Лут өз гызларыны азғын издиһама тәклиф едир?

11, 12. а) Инсан ҹилдинә ҝирмиш ики мәләјин Аллаһын тапшырығы илә Содом шәһәринә ҝәлдији заман баш верән һадисәни сөјләјин. б) Бу һадисә инсанларда һансы суаллары доғурур?

¹¹ «Јарадылыш» китабынын 19-ҹу фәслиндә инсан ҹилдинә ҝирмиш ики мәләјин Аллаһын тапшырығы илә Содом шәһәринә ҝәлдији һаггында охујуруг. Лут онлары евиндә галмаг үчүн дилә тутур. Лакин елә һәмин ҝеҹә шәһәрин сакинләри еви әһатәјә алыб, ҹинси әлагәјә ҝирмәк үчүн гонаглары чөлә чыхармағы тәләб едирләр. Лут издиһамы јола ҝәтирмәјә чалышыр, амма онун ҹәһди әбәс олур. Гонагларыны мүдафиә едәрәк Лут дејир: «Гардашларым, пислик етмәјин. Мәним әрә ҝетмәмиш ики гызым вар; гызларымы сизин јаныныза ҝәтирим, онлара нә истәјирсиниз, един. Анҹаг бу адамлара тохунмајын, чүнки онлар мәним евимин гонагларыдыр». Издиһам она гулаг асмыр вә артыг гапыны сындырмаға һазырлашырды. О заман мәләкләр бүтүн азғын издиһамын ҝөзүнү кор едирләр (Јарадылыш 19:1-11).

¹² Бу һадисәнин инсанларда суаллар доғурдуғу тамамилә ајдындыр. Мәсәлән, онлар тәәҹҹүбләнирләр: «Лут гонагларын хатиринә өз гызларыны шәһвәтли издиһама неҹә тәклиф едә билмишди? Мәҝәр бу дүзҝүн һәрәкәт иди? О, горхаглыг етмирдими? Нәјә ҝөрә Петер Аллаһдан илһам алараг Луту “салеһ” адландырмышдыр? Аллаһ Лутун һәрәкәтини бәјәнмишдими?» (2 Петер 2:7, 8). Јанлыш нәтиҹәјә ҝәлмәмәк үчүн ҝәлин бу һадисәни әтрафлы мүзакирә едәк.

13, 14. а) Мүгәддәс Китабда Лутун һәрәкәтләри тәсвир олунан парчаја даир нәји гејд етмәк лазымдыр? б) Нәдән ҝөрүнүр ки, Лут горхаг дејилди?

¹³ Әввәлҹә гејд етмәк лазымдыр ки, Мүгәддәс Китаб Лутун һәрәкәтини нә бәјәнир, нә дә мүһакимә едир, бу һадисә орада садәҹә нәгл олунур. Мүгәддәс Китабда Лутун фикирләри вә нијјәтләри һаггында да һеч нә дејилмир. Еһтимал ки, о, ‘салеһләр дирилән’ заман һәјата гајыданда һәр шеј һаггында ҝениш данышаҹагдыр (Һәвариләрин ишләри 24:15).

¹⁴ Чәтин ки, Луту горхаг адландырмаг олар. О, чәтин вәзијјәтә дүшмүшдү. «Онлар мәним евимин гонагларыдыр» демәклә, Лут ҝөстәрди ки, онлары мүдафиә етмәк вә горумаг мәс’улијјәти дашыјыр. Бу һеч дә асан иш дејилди. Јәһуди тарихчиси Иосиф Флавинин мә’луматына ҝөрә, Содомун сакинләри «инсанлара тәкәббүрлә, Аллаһа исә һөрмәтсизликлә јанашырдылар... Ејни заманда онлар гонагпәрвәрлијә сон гојмуш вә бүтүн инсанларла әдәбсиз давранмаға башламышдылар». Бунунла белә Лут азғын издиһамын өнүндән ҝеријә чәкилмәди. Әксинә, о, һәмин аҹыглы инсанларын гаршысына чыхыб, онлары јола ҝәтирмәјә чалышды. О, һәтта «архасынҹа гапыны өртдү» (Јарадылыш 19:6).

15. Нәјә ҝөрә демәк олар ки, Лут иманла һәрәкәт етмишдир?

¹⁵ Јенә дә ким исә соруша биләр: «Ахы нәјә ҝөрә Лут өз гызларыны издиһама тәклиф етди?» Нәјә ҝөрә онун пис нијјәтләрә малик олдуғуну дүшүнмәк әвәзинә, мүмкүн олан бә’зи изаһатлары нәзәрдән кечирмәјәк? Һәр шејдән әввәл, еһтимал ки, Лут иманла һәрәкәт едирди. Неҹә? Шүбһәсиз, әмиси Ибраһимин арвады Сараны Јеһованын неҹә мүдафиә етдији Лута мә’лум иди. Сара чох ҝөзәл олдуғундан, Ибраһим еһтијат едирди ки, арвадына ҝөрә ону өлдүрә биләрләр. Буна ҝөрә дә арвадындан хаһиш етмишди ки, ону гардашы кими гәләмә версинa. Сонра Сараны фир’онун евинә апарырлар. Лакин Јеһова мәсәләјә мүдахилә едиб, фир’онун Сараны алмасына јол вермир (Јарадылыш 12:11-20). Ола билсин, Лут инанырды ки, һәмин һадисәдә олдуғу кими, Аллаһ онун гызларыны да мүдафиә едәҹәкдир. Јеһованын һәгигәтән дә мүдахилә етмәси вә Лутун гызларына һеч бир зијан дәјмәмәси диггәтә лајигдир.

16, 17. а) Лут һансы јолла содомлулары утандырмаға вә ја онлары чашдырмаға чалыша биләрди? б) Лутун фикри һәр неҹә олса да, биз нәјә әмин ола биләрик?

¹⁶ Мүмкүн олан башга изаһаты да нәзәрдән кечирәк. Лутун ҹамааты утандырмаға вә ја онлары чашдырмаға чалышмасы да истисна дејил. Лутун содомлуларын һомосексуал мејлләринә ҝөрә онун гызларына тамаһ салмајаҹагларыны јәгин етмәјә дә әсасы варды (Јәһуда 7). Бундан әлавә, онун гызлары шәһәр сакинләриндән ики нәфәрин нишанлысы идиләр, буна ҝөрә дә, еһтимал етмәк олар ки, издиһамын арасында Лутун зәнн едилән күрәкәнләринин гоһумлары, достлары вә ја иш јолдашлары варды (Јарадылыш 19:14). Лут, ола билсин, бу сәбәбә ҝөрә әмин иди ки, издиһамдан бә’зи кишиләр онун гызларыны мүдафиә едәҹәкләр. Парчаланмыш издиһам исә артыг о гәдәр дә тәһлүкәли олмаздыb.

¹⁷ Лутун фикир вә нијјәтләри һәр неҹә олурса-олсун, биз бир шејә әмин ола биләрик ки, Јеһова һәмишә әдаләтлә даврандығы үчүн Луту салеһ сајмаға әсасы варды. Вә мәҝәр азғын издиһамын һәрәкәти, Јеһованын бу позғун шәһәрин сакинләрини ҹәзаландырмагда тамамилә һаглы олдуғуна ҝөзәл шәһадәтлик етмирми? (Јарадылыш 19:23-25).

Јеһова Уззаны нәјә ҝөрә мәһв етди?

18. а) Давуд сандығы Јерусәлимә ҝәтирмәјә ҹәһд ҝөстәрдији заман нә баш вермишдир? б) Бу һадисә илә бағлы һансы суал јараныр?

¹⁸ Бә’зиләриндә суал јарадан башга бир һадисә — Давудун Әһд сандығыны Јерусәлимә ҝәтирмәјә ҹәһд ҝөстәрдији заман баш вермишди. Сандығы Узза вә онун гардашынын сүрдүјү арабаја јерләшдирмишдиләр. Мүгәддәс Китабда дејилир: «Наконун хырман јериндән кечәндә өкүзләр бүдрәди. Буна ҝөрә дә Узза әл узадыб Аллаһын сандығындан тутду. Уззаја гаршы Рәббин гәзәби аловланды вә Аллаһ ону һөрмәтсизлик етдијинә ҝөрә орадаҹа вурду. Узза јериндәҹә — Аллаһын сандығы јанында өлдү». Бир нечә ајдан сонра ҝөстәрилән икинҹи ҹәһд исә мүвәффәгијјәтлә баша чатды: сандығы Аллаһын әмр етдији кими — Гоһат нәслиндән олан левилиләрин чијинләриндә ҝәтирдиләр (2 Шамуел 6:6, 7; Сајлар 4:15; 7:9; 1 Салнамәләр 15:1-14). Бә’зиләри соруша биләр: «Јеһова нәјә ҝөрә белә сәрт мүнасибәт ҝөстәрди, ахы Узза садәҹә сандығы тутмаға чалышмышды?» Лакин нәтиҹә чыхармаға тәләсмәјәк. Ҝәлин бу һадисәни әтрафлы нәзәрдән кечирәк.

19. Нәјә ҝөрә Јеһова әдаләтсиз даврана билмәз?

¹⁹ Јадда сахламаг лазымдыр ки, Јеһова һагсыз даврана билмәз (Әјјуб 34:10). Бу мәһәббәтә мүвафиг олмазды, Мүгәддәс Китабдан исә билирик ки, «Аллаһ мәһәббәтдир» (1 Јәһја 4:8). Бундан савајы Мүгәддәс Јазыларда дејилир ки, «салеһлик вә әдаләт [Аллаһын] тахтынын тәмәлидир» (Мәзмур 89:14). Елә исә, Јеһова неҹә әдаләтсиз даврана биләр? Бу заман О Өз һакимијјәтинин тәмәлини позмаздымы?

20. Нәјә ҝөрә, еһтимала ҝөрә, Узза сандыгла бағлы тәләбләри билирди?

²⁰ О ҹүмләдән гејд етмәк лазымдыр ки, Узза бир аз еһтијатлы олмалы иди. Сандыг Јеһованын иштиракыны тәмсил едирди. Ганунда ајдынҹа дејилирди ки, сәлаһијјәти олмајан адамлар өлүм горхусу алтында сандыға тохунмалы дејилләр (Сајлар 4:18-20; 7:89). Буна ҝөрә дә, мүгәддәс сандығын дашынылмасына дүшүнҹәсиз јанашмаг олмазды. Ҝөрүнүр, Узза левили иди (каһин дејилди), буна ҝөрә дә, о, Гануну билмәли иди. Бундан башга, бу һадисәдән чох илләр әввәл сандыг онун атасынын евинә ҝәтирилмишдир (1 Шамуел 6:20–7:1). Давуд бу сандығы башга јерә көчүрмәк истәјәнә гәдәр орада тәхминән 70 ил галмышдыр. Бу сәбәбдән, еһтимал ки, Узза ушаглыгдан бәри сандыгла бағлы ганунларла таныш иди.

21. Узза илә баш верән һадисәни нәзәрдән кечирәркән нәјә ҝөрә Јеһованын үрәкләрин нијјәтини ҝөрдүјүнү јадда сахламаг ваҹибдир?

²¹ Артыг јухарыда гејд олундуғу кими, Јеһова үрәкләри ҝөрән Аллаһдыр. Мүгәддәс Китабда Уззанын һәрәкәти «һөрмәтсизлик» адландығы үчүн, еһтимал ки, Јеһова бу инсанын үрәјиндәки — Мүгәддәс Јазыларда бирбаша гејд олунмајан — худбин нијјәтләри ҝөрмүшдүр. Узза һәддини ашмаға мејлли олан тәкәббүрлү инсан дејилдими? (Сүлејманын мәсәлләри 11:2). Онун аиләсиндә сахланылан сандығы инди һамынын ҝөзү габағында апармасы ловғаланмаг үчүн она әсас верирдими? (Сүлејманын мәсәлләри 8:13). Јә’ни Уззанын иманы о гәдәр зәиф иди ки, Јеһованын Онун иштиракыны тәмсил едән мүгәддәс сандығы горумасы үчүн әли чатмадығыны фикирләширди? Һәр неҹә олурса-олсун, биз әмин ола биләрик ки, Јеһова әдаләтлә давранмышды. Еһтимал ки, Аллаһ Уззанын үрәјиндә елә бир шеј ҝөрмүшдү ки, Ону дәрһал һәрәкәт етмәјә тәшвиг етмишди (Сүлејманын мәсәлләри 21:2).

Әминлик үчүн мөһкәм әсас

22. Нәјә ҝөрә Јеһованын Кәламында бу вә ја диҝәр тәфсилатларын бурахылмасында Онун мүгајисәедилмәз мүдриклијини ҝөрүрүк?

²² Јеһованын Кәламында бу вә ја диҝәр тәфсилатларын бурахылмасында Онун мүгајисә­едилмәз мүдриклијини ҝөрүрүк. Бунунла Јеһова Она е’тибар етдијимизи сүбут етмәк үчүн имкан јарадыр. Нәзәрдән кечирдијимиз нүмунәләрдән сонра мәҝәр ајдын олмурму ки, Јеһованын гәрарлары илә разылашмағымыз үчүн мөһкәм әсасымыз вар? Аллаһын Кәламыны сәмими үрәклә вә ачыг дүшүнҹә илә өјрәндијимиз заман, Јеһова һаггында лазымындан да артыг өјрәнирик. Бу исә Онун һәмишә һагг вә әдаләтлә даврандығына бизи әмин едир. Буна ҝөрә дә, әҝәр Мүгәддәс Китабдан һансыса епизодлар биздә дәрһал дәгиг ҹавабыны тапмадығымыз суаллар јарадырса, ҝәлин Јеһованын әдаләтлә даврандығына бир ан белә шүбһә етмәјәк.

23. Јеһованын ҝәләҹәкдә олаҹаг ишләринә даир һансы әминлијә малик ола биләрик?

²³ Белә бир әминлијә Јеһованын ҝәләҹәкдә олаҹаг ишләринә мүнасибәтдә дә малик ола биләрик. Беләликлә, инана биләрик ки, гаршыдан ҝәлән бөјүк мәшәггәтдә һөкм заманы Аллаһ «салеһи дә ҝүнаһкарла бирҝә» мәһв етмәјәҹәк (Јарадылыш 18:23). Онун һагг вә әдаләтә олан мәһәббәти буну етмәјә јол вермәз. Һәмчинин тамамилә әмин ола биләрик ки, јахынлашмагда олан јени дүнјада Аллаһ бизим бүтүн тәләбатларымызы ән ҝөзәл тәрздә өдәјәҹәкдир (Мәзмур 145:16).

[Һашијәләр]

Јадыныздадырмы?

• Һансы беш сәбәбә ҝөрә Јеһованын гәрарлары илә разылашмалыјыг?

• Лутун гызларыны азғын издиһама тәклиф етдији һаггында дүшүнәркән јанлыш нәтиҹәләрдән гачынмагда бизә нә көмәк едә биләр?

• Јеһованын Уззаны мәһв етмәсинин сәбәбини баша дүшмәкдә бизә нә көмәк едир?

• Јеһованын ҝәләҹәкдә олаҹаг ишләринә даир һансы әминлијә малик ола биләрик?