Садиг олмаға дәјәрми?
ЈЕНС адлы бир нәфәрә сығорта ширкәтинин нүмајәндәси олан Карлa деди: «Сәһһәтинизин сығортасы үчүн олдугҹа чох пул өдәјирсиниз. Әҝәр бизим ширкәтимиздә сығорталансаныз, һәр ај 15 авро гәнаәт етмиш оларсыныз. Бу исә аз пул дејил».
Јенс ҹаваб верди: «Олсун ки, бу беләдир, лакин бу ширкәтлә мән артыг бир нечә илдир ки әмәкдашлыг едирәм. Онлар мәнә чох көмәк едибләр, буна ҝөрә дә сечдијим ширкәтә садиг галмаг истәјирәм».
Карл деди: «Садиглик јахшы хүсусијјәтдир, амма бу сизә баһа баша ҝәлир!»
Карл һаглы иди. Садиг вә ја вәфалы олмаг инсана һавајы баша ҝәлмир. Бу, һәмчинин вахт, гүввә вә емосионал бағлылығы да тәләб едир. Садиглик бүтүн бунлара дәјәрми?
Инсанларын гијмәтләндирдикләри, лакин тәзаһүр етдирмәдикләри хүсусијјәт
Алманијада иҹтимаи рә’ји өјрәнән Алленсбах институтунун кечирдији сорғу ҝөстәрди ки, иштирак едәнләрин 96 фаизи садиглији арзу олунан хүсусијјәт һесаб едир. Һәмин институтун 18-24 јашарасы ҹаванларла апардығы икинҹи сорғуда иштирак едәнләрин үчдә икисинин нөгтеји-нәзәринҹә, садиглик ҝөзәл хүсусијјәтдир.
Садиглији вә ја сәдагәтлилији чохлары гијмәтләндирсә дә, бу хүсусијјәти тәзаһүр етдирмәк мәсәләсиндә фикирләри фәрглидир. Мәсәлән, бир чох Авропа өлкәләриндә әр-арвад вә ја аилә үзвләри арасында сәдагәт горунуб сахланылмыр. Достлар арасында да сәдагәтсизлик баш алыб ҝедир. Саһибкарла ишчини, о ҹүмләдән бизнесдәки әмәкдашлары сәдагәт телләринин бағладығы зәманә артыг чохдан кечмишдә галыб. Бу вәзијјәтә сәбәб олан нәдир?
Һәјатын ҝәрҝинлији инсанлара вәзифәләрини сәдагәтлә јеринә јетирмәк үчүн чох аз вахт вә гүввә сахлајыр. Хәјанәт вә ја јаланла үзләшәнләр, кимәсә јенидән е’тибар етмәјә горхурлар. Диҝәрләри исә һәјата бир ҝүнлүк бахдыглары үчүн онларын һәјатында садиглијә јер јохдур.
Сәбәбиндән асылы олмајараг бир шеј ајдындыр: садиглик инсанларын гијмәтләндирдији, лакин тәзаһүр етдирмәдикләри хүсусијјәтдир. Буна ҝөрә дә ҝәлин, бу мәсәләни мүзакирә едәк: садиг олмаға дәјәрми? Әҝәр дәјәрсә, онда кимә садиг олмалы вә садиглији неҹә тәзаһүр етдирмәлијик? Садиг оланлары һансы хејир-дуалар ҝөзләјир?
[Һашијә]
a Бу вә сонракы мәгаләдә бә’зи адлар дәјишдирилиб.
[3-ҹү сәһифәдәки јазы]
Садиглик инсанларын гијмәтләндирдикләри, лакин тәзаһүр етдирмәдикләри хүсусијјәтдир.