Ҝөзлә ҝөрдүјүнүзә әсасән дејил, иманла јеријин!
«Биз ҝөзлә ҝөрүләнә дејил, имана әсасән һәрәкәт едирик [«иманла јеријирик», И–93]» (2 КОРИНФЛИЛӘРӘ 5:7).
1. Нәјә ҝөрә демәк олар ки, һәвари Павел ҝөзлә ҝөрүләнә әсасән дејил, иманла јеријирди?
ХӘЈАЛӘН ерамызын 55-ҹи илинә јолланаг. Исанын давамчыларыны тә’гиб едән Шаулун мәсиһчилији гәбул етдији вахтдан тәхминән 20 ил кечмишдир. Инди о, һәвари Павел кими таныныр. Чох вахт кечмәсинә бахмајараг, Павел Аллаһа олан иманынын зәифләмәсинә јол вермәмишди. О, ҝөјдә баш верәнләри һәрфи мә’нада ҝөрмүрдү, буна бахмајараг онун иманы мөһкәм иди. Бу сәбәбдән, о, ҝөјләрдә јашамаг үмидинә малик олан мәсһ едилмиш мәсиһчиләрә јазмышды: «Биз ҝөзлә ҝөрүләнә дејил, имана әсасән һәрәкәт едирик [«иманла јеријирик», И–93]» (2 Коринфлиләрә 5:7).
2, 3. а) Иманла јеридијимизи неҹә ҝөстәрә биләрик? б) Ҝөзлә ҝөрүләнә әсасән јеримәк нә демәкдир?
2 Иманла јеримәк нә демәкдир? Бу, Аллаһын бизим һәјатымызы идарә етмәјә гадир олдуғуна вә бизим үчүн нәјин даһа јахшы олдуғуну билдијинә там е’тибар етмәји нәзәрдә тутур (Мәзмур 119:66). Әҝәр иманла јеријириксә, гәрарларымызда вә һәрәкәтләримиздә ‘ҝөрүнмәјән һәгигәтләри’ нәзәрә алаҹағыг (Ибраниләрә 11:1). «Ҝөрүнмәјән һәгигәтләр» өзүнә вә’д едилмиш ‘јени ҝөјләри вә јени јери’ дахил едир (2 Петер 3:13). Бәс ҝөзлә ҝөрүләнә әсасән јеримәк нә демәкдир? Бу, һәјатда јалныз һиссијјат органларымызын гаврадығы шејләри рәһбәр тутмаг демәкдир. Бу ҹүр әһвал-руһијјә, Аллаһын ирадәсинә тамамилә е’тинасыз јанашмағымыза ҝәтириб чыхара билдији үчүн тәһлүкәлидир (Мәзмур 81:12; Ваиз 11:9).
3 Биз һамымыз — һәм ҝөјләр дә’вәтинә малик олан «кичик сүрү»нүн үзвләри, һәм дә јер үзүндә јашамаг үмидинә малик олан «башга гојунлар» ҝөзлә ҝөрүләнә әсасән дејил, иманла јеримәк нәсиһәтинә гулаг асмалыјыг (Лука 12:32; Јәһја 10:16). Ҝәлин, бу илһамланмыш нәсиһәтин ‘ҝүнаһ илә мүвәггәти олараг зөвг алмағы’ рәдд етмәкдә, вар-дөвләт һәрислијинин торундан гачмагда вә бу системин сонунун јахын олдуғуну нәзәрдән гачырмамагда бизә неҹә көмәк едәҹәјини арашдыраг. Биз, һәмчинин ҝөзлә ҝөрүләнә әсасән јеримәјин нә дәрәҹәдә тәһлүкәли олдуғуну мүзакирә едәҹәјик (Ибраниләрә 11:25).
‘Ҝүнаһ илә мүвәггәти олараг зөвг алмағы’ рәдд един
4. Муса һансы сечими етди вә нәјә ҝөрә?
4 Амрам оғлу Мусаны гаршыда нәләр ҝөзләдијини бир анлыға тәсәввүр един. Гәдим Мисирдә падшаһ аиләсиндә бөјүмүш Муса гүдрәтә, вар-дөвләтә вә нүфуза саһиб ола биләрди. Онун ағлындан белә фикирләр кечә биләрди: «Мисирин шөһрәт газанмыш елминә өјрәдилмишәм, сөзүмдә вә әмәлләримдә гүдрәтлијәм. Падшаһын сарајында галсам, сыхынты ичиндә олан ибрани гардашларыма көмәк етмәк үчүн өз вәзифәмдән истифадә едә биләрәм!» (Һәвариләрин ишләри 7:22). Лакин Муса «Аллаһын халгы илә әзаб чәкмәји тәрҹиһ етди». Нәјә ҝөрә? Ону Мисирдә тәгдим олунан һәр шејдән имтина етмәјә нә тәшвиг етди? Мүгәддәс Китаб ҹаваб верир: «Һөкмдарын гәзәбиндән горхмајыб, иман васитәсилә Мисири тәрк етди; чүнки о, Ҝөрүнмәјәни ҝөрүрмүш кими, мөһкәм дајанды» (Ибраниләрә 11:24-27). Муса Јеһованын салеһ әмәлләрә ҝөрә һәмишә мүкафатландырдығына инанырды, бу исә, она ҝүнаһы рәдд етмәјә вә мүвәггәти зөвгә далмамаға көмәк едирди.
5. Мусанын нүмунәси бизи нәјә тәшвиг едир?
5 Чох вахт биз дә чәтин сечим гаршысында галырыг. Мәсәлән, Мүгәддәс Китаб принсипләринә там ујғун олмајан мәшғулијјәт вә вәрдишләрдән имтина едим, ја етмәјим? Мадди газанҹ вә’д едирмиш кими ҝөрүнән, лакин руһани инкишафыма манечилик төрәдә биләҹәк бир ишә ҝиришим, ја јох? Мусанын нүмунәси бизи, бу дүнјаја хас олдуғу кими, ҝәләҹәји дүшүнмәдән гәрарлар гәбул етмәјә дејил, «Ҝөрүнмәјәни»н — Јеһова Аллаһын узагҝөрән мүдриклијинә иман ҝәтирмәјә тәшвиг едир. Ҝәлин, Муса кими, биз дә Јеһова илә олан достлуг мүнасибәтләримизи бу дүнјанын тәклиф едә биләҹәји һәр бир шејдән даһа чох гијмәтләндирәк.
6, 7. а) Нәјә ҝөрә демәк олар ки, Есав иманла дејил, ҝөзлә ҝөрүләнә әсасән јеримәји үстүн тутду? б) Есавын башына ҝәләнләр бизим үчүн чәкиндириҹи нүмунә кими неҹә хидмәт едир?
6 Мусадан фәргли олараг, гәбилә башчысы Исһагын оғлу Есав өз арзуларынын дәрһал тә’мин олунмасына үстүнлүк верди (Јарадылыш 25:30-34). Есав мүгәддәс шејләри гијмәтләндирмәјиб, «илк доғулмуш олмағын һаггыны бир габ хөрәјә сатды» (Ибраниләрә 12:16). Бу гәрарынын Јеһова илә мүнасибәтләринә вә ҝәләҹәк нәслинә неҹә тә’сир ҝөстәрәҹәји һагда дүшүнмүрдү, чүнки руһани ҝөзләри кор иди. Аллаһын дәјәрли вә’дләри Есав үчүн һеч бир әһәмијјәт кәсб етмирди. О, иманла дејил, ҝөзлә ҝөрүләнә әсасән јеријирди.
7 Есавын башына ҝәләнләр бизим үчүн чәкиндириҹи нүмунә кими хидмәт едир (1 Коринфлиләрә 10:11). Ваҹиб вә ја бир о гәдәр дә ваҹиб олмајан гәрарлар гәбул едәркән, өз арзуларымызы дәрһал тә’мин етмәјә тәшвиг едән Шејтан дүнјасынын тәблиғатынын тә’сири алтына дүшмәмәлијик. Өзүмүздән сорушмалыјыг: гәрарларым Есавын руһуну әкс етдирмирми? Арзу етдијим шејләри дәрһал әлдә етмәк үчүн, руһани ишләри арха плана чәкмирәмми? Аллаһла достлуғуму вә Онун вә’д етдији мүкафаты тәһлүкә алтына атмыраммы? Башгаларына неҹә нүмунә верирәм? Әҝәр гәрарларымыз мүгәддәс шејләри гијмәтләндирдијимизи ҝөстәрирсә, Јеһова бизи хејир-дуаландыраҹаг (Сүлејманын мәсәлләри 10:22).
Вар-дөвләт һәрислијинин торуна дүшмәкдән гачын
8. Иса лаодикијалы мәсиһчиләри нә һагда хәбәрдар етди вә онун сөзләри нәјә ҝөрә бизим үчүн мараг доғурур?
8 Биринҹи әсрин сонунда һәвари Јәһјаја верилән вәһјдә иззәтләнмиш Иса Мәсиһ Лаодикијадакы (Кичик Асија) јығынҹаға хәбәр ҝөндәрди. Бу, вар-дөвләт һәрислијинин тәһлүкәси һаггында хәбәрдарлыг иди. Лаодикијалы мәсиһчиләр мадди ҹәһәтдән варлы олсалар да, руһани мә’нада тамамилә касыбламышдылар. Онлар иманла јеримәк әвәзинә јол вермишдиләр ки, вар-дөвләт руһани ҝөзләрини кор етсин (Вәһј 3:14-18). Вар-дөвләт һәрислији бу ҝүн дә ејни тә’сирә маликдир: иманымызы о дәрәҹәдә зәифләдә биләр ки, биз һәјат үчүн јарышда мәтанәтлә гачмаға сон гоја биләрик (Ибраниләрә 12:1). Әҝәр еһтијатлы олмасаг, ‘һәјатын зөвгләри’ руһани ишләримизи сыхышдырыб, тамамилә боғаҹагдыр (Лука 8:14).
9. Малик олдуғумузла кифајәтләнмәјимиз вә руһани гиданы гијмәтләндирмәјимиз бизи неҹә мүдафиә едир?
9 Бу дүнјадан там истифадә етмәк вә варланмаға ҹан атмаг әвәзинә, малик олдуғумузла кифајәтләнмәји өјрәнмәлијик, бунунла биз өзүмүзү руһән горујаҹағыг (1 Коринфлиләрә 7:31; 1 Тимотејә 6:6-8). Ҝөрдүкләримизә әсасән дејил, иманла јерисәк, инди јашадығымыз руһани ҹәннәт бизә севинҹ ҝәтирәҹәк. Мәҝәр бәсләјиҹи руһани гиданы гәбул едәндә ‘шадланыб мәдһијјәләр сөјләмәк’ истәмирикми? (Јешаја 65:13, 14). Бундан әлавә, Аллаһын руһунун сәмәрәсини тәзаһүр етдирән кәсләрлә үнсијјәтдә олмаг да бизә чох хошдур (Галатијалылара 5:22, 23). Сөзсүз ки, Јеһова бизим руһани рифаһымызын гејдинә галыр. Бунун бизә мәмнунлуг вә тәравәт ҝәтирмәси неҹә дә ваҹибдир!
10. Өзүмүзә һансы суаллары версәк јахшы оларды?
10 Өзүмүзә нөвбәти суаллары вермәк јахшы оларды: мадди шејләр һәјатымда һансы јери тутур? Вәсаитими нәјә хәрҹләјирәм — кеф чәкәрәк јашамаға, јохса һәгиги ибадәти дәстәкләмәјә? Мәнә даһа чох нә мәмнунлуг ҝәтирир — Мүгәддәс Китаб өјрәнмәси вә јығынҹагда һәмиманлыларла үнсијјәт, јохса мәсиһчи мәс’улијјәтиндән азад кечирдијим истираһәт ҝүнләри? Истираһәт ҝүнләриндә тәблиғ етмәк вә башга теократик ишләрлә мәшғул олмаг әвәзинә, бу вахты һәддиндән артыг истираһәтә вә ја әјләнҹәјә сәрф едирәмми? Әҝәр иманла јеријириксә, Јеһованын вә’дләринә там е’тибар едәрәк, даима Падшаһлығын ишләри илә мәшғул олаҹағыг (1 Коринфлиләрә 15:58).
Сонун јахын олдуғуну нәзәрдән гачырмајын
11. Иманла јеријәндә, сонун јахын олдуғуну нәзәрдән гачырмамаг нәјә ҝөрә асан олур?
11 Иманла јеријәндә, сонун узаг олдуғу вә ја һеч ҝәлмәјәҹәји кими ҹисмани нөгтеји-нәзәрләри инкар етмәк асан олаҹаг. Мүгәддәс Китабда дејиләнләрә шүбһә илә јанашан вә е’тинасызлыг ҝөстәрән инсанлардан фәргли олараг, биз Аллаһын Кәламындакы пејғәмбәрликләрин неҹә дәгигликлә јеринә јетдијини ҝөрүрүк (2 Петер 3:3, 4). Мәсәлән, мәҝәр инсанларын дүшүнҹә тәрзи вә давранышлары «ахыр ҝүнләрдә» јашадығымызы ајдын шәкилдә ҝөстәрмирми? (2 Тимотејә 3:1-5). Иман ҝөзләри илә ҝөрүрүк ки, буҝүнкү дүнја һадисәләри әввәлләр баш верәнләрдән олдугҹа фәргләнир. Онлар Мәсиһин ‘ҝәлишинин вә дөврүн сонунун әламәтини’ тәшкил едир (Матта 24:1-14).
12. Исанын Лука 21:20, 21 ајәләриндә јазылан сөзләри биринҹи әсрдә неҹә јеринә јетди?
12 Ерамызын биринҹи әсриндә баш вермиш вә бизим ҝүнләримизлә паралел олан бир һадисәни нәзәрдән кечирәк. Иса Мәсиһ јер үзүндә оланда өз давамчыларыны хәбәрдар етмишди: «Гошунларын Јерусәлими мүһасирә етдијини ҝөрдүјүнүз заман билин ки, онун виранәлијинин вахты јахынлашмышдыр. О заман Јәһудејада оланлар дағлара гачсынлар; шәһәрдә оланлар орадан чыхсынлар» (Лука 21:20, 21). Бу пејғәмбәрлик ерамызын 66-ҹы илиндә јеринә јетди. Рома гошунлары Сестиј Галлын рәһбәрлији алтында шәһәри мүһасирәјә алдылар, сонра исә гәфилдән ҝери чәкилдиләр. Бу, мәсиһчиләр үчүн ‘дағлара гачмаг’ фүрсәти јаратды. Ерамызын 70-ҹи илиндә ромалылар јенидән гајыдараг, шәһәри зәбт едиб мә’бәди јерлә јексан етдиләр. Иосиф Флавинин вердији хәбәрә ҝөрә, бир милјондан артыг ибрани һәјатыны итирмиш, 97 мин исә әсир дүшмүшдү. Аллаһын јәһуди системинә кәсдији һөкм јеринә јетирилди. Иманла јеријәнләр вә Исанын хәбәрдарлығына диггәт јетирәнләр хилас олдулар.
13, 14. а) Ҝәләҹәкдә һансы һадисәләр баш верәҹәк? б) Нәјә ҝөрә Мүгәддәс Китаб пејғәмбәрликләринин јеринә јетмәсини диггәтлә изләмәлијик?
13 Буна бәнзәр һадисәләр бизим ҝүнләрдә дә баш вермәк үзрәдир. Аллаһын һөкмүнүн һәјата кечирилмәсиндә БМТ дахилиндәки мүәјјән гүввәләр иштирак едәҹәк. Неҹә ки, биринҹи әсрдә ромалылар өз гошунлары васитәсилә Пах Романа-ны (Рома сүлһү) горумаг нијјәтиндә идиләр, еләҹә дә бу ҝүн Бирләшмиш Милләтләр Тәшкилатына сүлһү горумаг һәвалә олунуб. Рома гошунлары, о вахт мә’лум олан дүнјанын һәр јериндә нисби сүлһү тә’мин етмәјә чалышараг, Јерусәлими дағытдылар. Бизим ҝүнләрә ҝәлдикдә исә, Мүгәддәс Китаб пејғәмбәрликләринә әсасән, БМТ-нин һәрбиләшдирилмиш гүввәләри бу дүнјанын динләрини иғтишашларын сәбәбкары һесаб едәҹәк вә гәдим Јерусәлимин бәнзәри олан Христиан дүнјасыны вә онунла бирликдә Бөјүк Бабилин галан һиссәсини мәһв етмәк үчүн өлчү ҝөтүрәҹәк (Вәһј 17:12-17). Ҝөрдүјүмүз кими, јалан динин дүнја империјасынын сону јахынлашыр.
14 Јалан динин мәһви бөјүк мәшәггәтин башланғыҹына ишарә едәҹәк. Бөјүк мәшәггәтин сонунда бу пис системин галан һиссәләри дә јер үзүндән силинәҹәкдир (Матта 24:29, 30; Вәһј 16:14, 16). Иманла јеридијимиз үчүн, биз Мүгәддәс Китаб пејғәмбәрликләринин јеринә јетмәсини диггәтлә изләјирик. Биз, Аллаһын һәгиги сүлһү вә тәһлүкәсизлији бәрпа етмәк үчүн инсан әли илә јарадылан БМТ кими тәшкилатлардан истифадә едәҹәјини дүшүнәрәк, өзүмүзү алдатмырыг. Бу сәбәбдән, мәҝәр һәјат тәрзимиздә Јеһованын ‘мөһтәшәм ҝүнүнүн’ јахын олдуғуна даир әминлик әкс олунмалы дејилми? (Сефанја 1:14).
Ҝөзлә ҝөрүләнә әсасән јеримәк нә дәрәҹәдә тәһлүкәлидир?
15. Аллаһдан хејир-дуа алмасына бахмајараг, Исраил халгы һансы тәләјә дүшдү?
15 Ҝөзлә ҝөрүләнә әсасән јеријәрәк иманымызын зәифләмәсинә јол вермәјин нә дәрәҹәдә тәһлүкәли олдуғуну, гәдим Исраил халгынын нүмунәсиндән ҝөрүрүк. Исраиллиләри көләликдән азад едәрәк, Јеһова Мисирә он бәла ҝөндәрди вә онун јаланчы аллаһларыны алчалтды. Сонра исә Јеһова Өз халгыны мө’ҹүзәли шәкилдә Гырмызы дәниздән кечирди. Бүтүн бунлара бахмајараг, исраиллиләр Аллаһын әмрини позуб, гызыл дана дүзәлтдиләр вә она ибадәт етмәјә башладылар. Халг ‘дағдан енмәкдә ҝеҹикән’ Мусаны ҝөзләмәкдән јорулуб, сәбирсизлик ҝөстәрди (Чыхыш 32:1-4). Сәбирсизлик онларын ҝөрә билдикләри бүтә ибадәт етмәләринә ҝәтириб чыхарды. Ҝөзлә ҝөрүләнә әсасән јеријәрәк, исраиллиләр Јеһованы тәһгир етдиләр вә буна ҝөрә дә онлардан «үч минә јахын адам һәлак олду» (Чыхыш 32:25-29). Бу ҝүн Јеһованын хидмәтчисинин Она вә вә’дләрини јеринә јетирмәјә гадир олдуғуна е’тибар етмәдијини ҝөстәрән гәрарлар гәбул етмәси неҹә дә кәдәрлидир!
16. Ҝөзлә ҝөрдүкләри исраиллиләрә неҹә тә’сир ҝөстәрирди?
16 Исраиллиләр руһани ҹәһәтдән кор олдуглары үчүн әзијјәт чәкирдиләр. Онлар ҝөзлә ҝөрүләнләрин тә’сири алтына дүшәрәк, дүшмәнләри гаршысында горхуја гапылдылар (Сајлар 13:28, 32; Ганунун тәкрары 1:28). Исраиллиләр Аллаһын Мусаја вердији һакимијјәтә гаршы үсјан галдырараг өз һәјатларындан шикајәтләнмәјә башладылар. Онлар имансызлыглары уҹбатындан Вә’д едилмиш дијара хор бахараг, ҹинләрин һакимијјәти алтында олан Мисирә гајытмаг истәдиләр (Сајлар 14:1-4; Мәзмур 106:24). Јеһова үчүн неҹә дә ағыр иди ки, Онун халгы өзләринин ҝөзә ҝөрүнмәз Падшаһы олан Јеһоваја бөјүк һөрмәтсизлик ҝөстәрирди!
17. Шамуелин ҝүнләриндә исраиллиләр Јеһованын рәһбәрлијини нәјә ҝөрә рәдд етдиләр?
17 Шамуел пејғәмбәрин ҝүнләриндә Аллаһын сечилмиш халгы јенә дә һәмин тәләјә дүшдү. Исраиллиләр ҝөрә биләҹәкләри падшаһларынын олмасыны истәдиләр. Јеһова онларын Падшаһы олдуғуну сүбут етсә дә, бу, онлары иманла јеримәјә тәшвиг етмәди (1 Шамуел 8:4-9). Өз зәрәрләринә олараг, исраиллиләр Јеһованын мүкәммәл рәһбәрлијини ағылсызҹасына рәдд едиб, әтрафларындакы халглар кими олмаг истәдиләр (1 Шамуел 8:19, 20).
18. Ҝөзлә ҝөрүләнә әсасән јеримәјин нә дәрәҹәдә тәһлүкәли олдуғуну тарих неҹә ҝөстәрир?
18 Јеһованын мүасир хидмәтчиләри олан бизләр Аллаһла олан мүнасибәтләримизи гијмәтләндиририк. Гәдимдә баш верән һадисәләрин үзәриндә фикирләшмәји вә өзүмүзә гијмәтли ибрәт дәрси ҝөтүрмәји арзу едирик (Ромалылара 15:4). Исраиллиләр иманла дејил, ҝөзлә ҝөрүләнләрә әсасән јеријәндә, Муса васитәсилә Аллаһын Өзүнүн онлара рәһбәрлик етдијини унудурдулар. Әҝәр еһтијатлы олмасаг, биз дә мәсиһчи јығынҹағына бу ҝүн Јеһова Аллаһын вә Бөјүк Муса олан Иса Мәсиһин рәһбәрлик етдикләрини унуда биләрик (Вәһј 1:12-16). Диггәтли олмалыјыг ки, Јеһованын тәшкилатынын јер үзүндәки һиссәсинә инсан нөгтеји-нәзәри илә бахмајаг. Әкс тәгдирдә, биздә наразылыг руһу јарана биләр вә биз һәм Јеһованын тәмсилчиләрини, һәм дә «садиг вә ағыллы гул»ун васитәсилә вердији руһани гиданы гијмәтләндирмәмәјә башлаја биләрик (Матта 24:45).
Иманла јеримәјә давам един
19, 20. Биз нә етмәјә гәтијјәтлијик вә нәјә ҝөрә?
19 Мүгәддәс Китабда дејилир: «Мүбаризәмиз ган вә әтә гаршы дејилдир, анҹаг рәјасәтләрә, һакимијјәтләрә, бу гаранлыг дүнјанын һөкмранларына, јә’ни сәмави аләмдә олан пис руһи гүввәләрә гаршыдыр» (Ефеслиләрә 6:12). Бизим баш дүшмәнимиз Шејтан Иблисдир. Онун мәгсәди Јеһоваја олан иманымызы мәһв етмәкдир. Вә о, һәр имкана әл атаҹаг ки, Аллаһа хидмәт етмәк гәтијјәтимизи сарсытсын (1 Петер 5:8). Өзүмүзү неҹә мүдафиә едә биләрик? Шејтан дүнјасынын заһири парылтысына алданмамаг үчүн нә етмәлијик? Ҝөзлә ҝөрүләнә әсасән дејил, иманла јеримәлијик! Јеһованын вә’дләринә там е’тибар етсәк, иманымыз «гәзаја уғрајан ҝәми кими» олмајаҹаг (1 Тимотејә 1:19). Јеһованын бизә хејир-дуа верәҹәјинә шүбһә етмәдән, ҝәлин иманла јеримәјә давам едәк! Ҝәлин јахын ҝәләҹәкдә ‘баш верәҹәк фәлакәтләрдән гачынмаг’ үчүн дуа едәк (Лука 21:36).
20 Ҝөзлә ҝөрүләнә әсасән дејил, иманла јеримәјә даир ҝөзәл нүмунәјә маликик. Мүгәддәс Китабда јазылыб: «Мәсиһ дә бизә бир нүмунә гојараг, бизим үчүн изтираб чәкди ки, биз Онун изләри илә ҝедәк» (1 Петер 2:21). Нөвбәти мәгаләдә Исанын јолу илә неҹә ҝедә биләҹәјимизи нәзәрдән кечирәҹәјик.
Јадыныздадырмы?
• Ҝөзлә ҝөрүләнә әсасән дејил, иманла јеримәјә даир Мусанын вә Есавын нүмунәси бизә нә өјрәтди?
• Вар-дөвләт һәрислијинин тәләсиндән гачмагда бизә нә көмәк едәҹәк?
• Иманла јеријәндә, сонун чох узаг олдуғуна даир нөгтеји-нәзәри рәдд етмәк нәјә ҝөрә асан олур?
• Ҝөзлә ҝөрүләнә әсасән јеримәк нә үчүн тәһлүкәлидир?
[13-ҹү сәһифәдәки шәкил]
Муса иманла јеријирди.
[15-ҹи сәһифәдәки шәкил]
Истираһәтә ҝөрә теократик ишләри тез-тезми икинҹи плана чәкирсән?
[16-ҹы сәһифәдәки шәкил]
Әҝәр биз Аллаһын Кәламына диггәтлә јанашырыгса, бу бизи неҹә мүдафиә едәҹәк?