Инди гәти аддымлар атмағын вахтыдыр

«Нә вахта гәдәр ики тәрәфә әјиләҹәксиниз?» (1 ПАДШАҺЛАР 18:21).

1. Бизим дөврү кечмиш дөврләрдән фәргләндирән сәҹијјәви хүсусијјәт һансыдыр?

ЈЕҺОВАНЫН ваһид һәгиги Аллаһ олдуғуна вә Шејтанын пис дүнјасынын өз ‘ахыр ҝүнләрини’ јашадығына инанырсанмы? (2 Тимотејә 3:1). Онда сән разылашаҹагсан ки, гәти аддымлар атмаг инди әввәлкиндән даһа да ваҹибдир. Бәшәр тарихинин һеч бир дөврүндә бу гәдәр инсан һәјаты тәһлүкә алтында олмамышдыр.

2. Падшаһ Ахавын һөкмранлыг етдији дөврдә онгәбиләли Исраил падшаһлығында нәләр баш верирди?

² Ерамыздан әввәл онунҹу әсрдә Исраил халгы чох ваҹиб бир гәрар гәбул етмәли иди: онлар кимә хидмәт едәҹәкләр? Падшаһ Ахав бүтпәрәст арвады Изевелин тә’сири илә онгәбиләли Исраил падшаһлығында Баала ибадәти јајмышды. Баал мәһсулдарлыг аллаһы иди вә она ибадәт едәнләр инанырдылар ки, јағышы вә бәһрәли мәһсулу о верирди. Баалын пәрәстишкарлары она өпүш ҝөндәрирдиләр вә бүтүнә сәҹдә едирдиләр. Баал онларын мәһсулларыны вә ев һејванларыны сәмәрәли етсин дејә, пәрәстишкарлары мә’бәд фаһишәләри илә ијрәнҹ ҹинси һәрәкәтләрлә мәшғул олурдулар. Онларын һәтта ган ахана гәдәр өзләрини јараламаг адәти дә вар иди (1 Падшаһлар 18:28).

3. Баала ибадәт Аллаһын халгына неҹә тә’сир ҝөстәрмишди?

³ Лакин 7 000 исраилли бу бүтпәрәст, әхлагсыз вә дәһшәтли ибадәтдә иштирак етмәкдән имтина етмишди (1 Падшаһлар 19:18). Онлар Јеһова Аллаһын Исраил халгы илә бағладығы әһдә садиг галдыглары үчүн тә’гибләрлә үзләшмәли олдулар. Мәсәлән, мәләкә Изевел Јеһованын бир чох пејғәмбәрләрини гәтл етмишди (1 Падшаһлар 18:4, 13). Јаранмыш белә бир чәтин вәзијјәтдә исраиллиләрин әксәријјәти һәм Јеһованы, һәм Баалы мәмнун етмәјә чалышараг икисинә дә ибадәт едирди. Лакин бу, Јеһованын ҝөзүндә дөнүклүк иди. Јеһова исраиллиләри јалныз Ону севдикләри вә әмрләринә итаәт етдикләри һалда хејир-дуаландырмағы вә’д етмишди. Јеһова онлара хәбәрдарлыг етмишди ки, әҝәр Ондан үз дөндәриб башга аллаһлара ибадәт етсәләр, О, онлары мәһв едәҹәк (Ганунун тәкрары 5:6-10; 28:15, 63).

4. Иса Мәсиһ вә онун һәвариләри мәсиһчиләрин арасында нәјин баш верәҹәјини пејғәмбәрлик етмишдиләр вә бу пејғәмбәрлик неҹә јеринә јетди?

⁴ Христиан дүнјасы да ејни вәзијјәтдәдир. Христианлар Исанын һәгиги давамчылары олдугларыны иддиа едирләр, лакин онларын бајрамлары, давраныш тәрзи вә е’тигадлары Мүгәддәс Китаб тә’лимләринә зиддир. Христиан дүнјасынын руһаниләри Изевел кими, Јеһованын Шаһидләринә гаршы јөнәлмиш тә’гибләрин башында дурурлар. Онлар әсрләр боју мүһарибәләрин тәрәфдары олмушлар вә буна ҝөрә һәлак олан милјонларла килсә үзвләринин ганы онларын үстүндәдир. Онларын дүнја һакимијјәтләрини дәстәкләмәләри Мүгәддәс Китабда руһани әхлагсызлыг адландырылыр (Вәһј 18:2, 3). Үстәлик, Христиан дүнјасынын дини рәһбәрләри, һәтта кешишләрин арасында ҝениш јајылмыш ҹинси әхлагсызлыға белә ҝөз јумурлар. Иса Мәсиһ вә онун һәвариләри бу ҹүр бөјүк дөнүклүјүн олаҹағыны пејғәмбәрлик етмишдиләр (Матта 13:36-43; Һәвариләрин ишләри 20:29, 30; 2 Петер 2:1, 2). Бәс христианлыға мәнсуб олан бир милјарддан чох инсанын агибәти неҹә олаҹаг? Јеһованын һәгиги ибадәтчиләри јалан динин аздырдығы инсанларын гаршысында һансы мәс’улијјәти дашыјырлар? Исраилдә ‘Баалын көкүнүн кәсилмәсинә’ ҝәтириб чыхаран һәјәҹан долу драматик һадисәләри нәзәрдән кечирсәк, бу суаллара ајдын ҹаваблар тапаҹағыг (2 Падшаһлар 10:28).

Аллаһын, јолундан азмыш халгына бәсләдији мәһәббәт

5. Јеһова, јолуну азмыш халгына мәһәббәт долу гајғысыны неҹә тәзаһүр етдирди?

⁵ Јеһова Аллаһ Она садиг галмајан инсанлары ҹәзаландырмагдан һәзз алмыр. О, мәһәббәт долу бир Ата кими, пис инсанларын төвбә едиб, өз јолларындан Она тәрәф дөнмәсини арзулајыр (Језекел 18:32; 2 Петер 3:9). Бу ондан бәллидир ки, Јеһова Ахавын вә Изевелин ҝүнләриндә Баала ибадәтин ҝәтирдији нәтиҹәләрдән Өз халгыны хәбәрдар етмәк үчүн онларын јанына пејғәмбәрләрини ҝөндәрирди. Илјас бу пејғәмбәрләрдән бири олмушдур. Илјас, габагҹадан хәбәр едилән виранедиҹи гураглыгдан сонра, падшаһ Ахава деди ки, Исраил вә Баал пејғәмбәрләрини бир јерә, Кармел дағына јығсын (1 Падшаһлар 18:1, 19).

6, 7. а) Илјас Исраилин дөнүклүјүнүн сәбәбинин нәдә олдуғуну неҹә ҝөстәрди? б) Баалын пејғәмбәрләри нә етдиләр? в) Илјас нә етди?

⁶ Ҝөрүш Јеһованын ‘дағыдылмыш гурбанҝаһынын’ јанында олду. Еһтимал ки, бу гурбанҝаһы Изевели разы салмаг үчүн дағытмышдылар (1 Падшаһлар 18:30). Тәәссүфләр олсун ки, орада јығышан исраиллиләрин һеч бири Јеһованын вә ја Баалын сәбирсизликлә ҝөзләнилән јағышы јағдырмаға гадир олдуғуна әмин дејилди. Ба­алы 450 пејғәмбәр тәмсил едирди, Јеһованы исә јалныз бир нәфәр, Илјас. Бу ҹүр аҹынаҹаглы вәзијјәтин көкүнә ишарә едәрәк Илјас халгдан сорушду: «Нә вахта гәдәр ики тәрәфә әјиләҹәксиниз?» Сонра исә ачыг-ајдын онлара деди: «Әҝәр Рәбб [«Јеһова», ЈД] Аллаһдырса, она хидмәт един, јох, Баал Аллаһдырса, онда она хидмәт един». Гәтијјәтсиз исраиллиләри јалныз Јеһоваја ибадәт етмәјә тәшвиг етмәк үчүн Илјас онлара кимин һәгиги Аллаһ олуб-олмадығына даир бир сынаг кечирмәји тәклиф етди. Бунун үчүн ики буға гурбан кәсилмәли иди — бири Јеһоваја, о бириси исә Баала. Һәгиги Аллаһ бу гурбаны одла удмалы иди. Баалын пејғәмбәрләри өз гурбанларыны һазырладыгдан сонра бир нечә саат әрзиндә «Еј Баал, бизә ҹаваб вер!» дејә гышгырараг ону чағырдылар. Илјас онлары лаға гојмаға башлајанда, пејғәмбәрләр ган ахынҹаја гәдәр өзләрини јаралајараг вар гүввәләри илә гышгырмаға давам етдиләр. Лакин ҹаваб ҝәлмәди (1 Падшаһлар 18:21, 26-29).

⁷ Инди исә Илјасын нөвбәси иди. Илк нөвбәдә о, Јеһованын гурбанҝаһыны бәрпа етди вә буғаны доғрајыб үстүнә гојду. Илјас дөрд сәһәнҝ су ҝәтириб гурбанын үстүнә төкмәји әмр етди. Бу үч дәфә — гурбанҝаһын әтрафында газылан хәндәк долунҹаја гәдәр едилди. Сонра Илјас дуа етди: «Еј Ибраһимин, Исһагын вә Исраилин Аллаһы Рәбб [«Јеһова», ЈД]! Гој бу ҝүн билинсин ки, Исраилдә Сән Аллаһсан вә мән Сәнин гулунам, бүтүн бу ишләри дә Сәнин сөзүнлә етдим. Сәсими ешит, ја Рәбб [«Јеһова», ЈД], мәнә ҹаваб вер. Гој бу халг билсин ки, Сән Аллаһсан, ја Рәбб [«Јеһова», ЈД], онда онларын үрәјини Өзүнә тәрәф дөндәрәҹәксән» (1 Падшаһлар 18:30-37).

8. Аллаһ Илјасын дуасына неҹә ҹаваб верди вә пејғәмбәр һансы аддымы атды?

⁸ Һәгиги Аллаһ ҝөјдән од ҝөндәрди. Од гурбаны, гурбанҝаһы, һәтта хәндәкдәки сују да удду! Бунун исраиллиләрә ҝөстәрдији тә’сир һаггында бир дүшүн! «Бүтүн халг буну ҝөрдү вә онлар үзүстә дүшүб дедиләр: “Рәбб [«Јеһова», ЈД] Аллаһдыр! Рәбб [«Јеһова», ЈД] Аллаһдыр!”» Илјас нөвбәти гәти аддымы атараг исраиллиләрә «Баал пејғәмбәрләрини тутун, онлардан бир нәфәр дә гачыб гуртармасын» дејә әмр етди. Баалын 450 пејғәмбәринин һамысы Кармел дағынын әтәјиндә өлдүрүлдү (1 Падшаһлар 18:38-40).

9. Јеһованын ибадәтчиләринин нөгсансызлығы неҹә сынаға чәкилди?

⁹ Һәмин унудулмаз ҝүндә Јеһова үч ил јарым әрзиндә илк дәфә иди ки торпаға јағыш ҝөндәрди! (Јагуб 5:17, 18). Исраиллиләр евләринә гајыданда бүтүн јол боју Јеһованын Аллаһ олдуғуну сүбут етдикләри барәдә сөһбәтләрини тәсәввүрүнә ҝәтир. Лакин Баалын пәрәстишкарлары тәслим олмадылар. Изевел Јеһованын хидмәтчиләрини тә’гиб етмәјә давам едирди (1 Падшаһлар 19:1, 2; 21:11-16). Аллаһын халгынын нөгсансызлығы јенә дә сынаға чәкилди. Баалын хидмәтчиләри үзәринә Јеһованын һөкм ҝүнү ҝәләндә, исраиллиләр Јеһоваја садиг галаҹаглармы?

Инди гәти аддымлар атын

10. а) Мәсһ едилмиш мәсиһчиләр бу ҝүн һансы ишлә мәшғулдурлар? б) Вәһј 18:4 ајәсиндә јазылан чағырыша әмәл етмәк нә демәкдир?

¹⁰ Бизим ҝүнләрдә, мәсһ олунмуш мәсиһчиләр Илјасын ишинә бәнзәр иши һәјата кечирирләр. Онлар евдән-евә тәблиғ едир вә мүхтәлиф нәшрләр васитәсилә бүтүн милләтләрдән олан инсанлары, һәм христианлары, һәм башга динләрә е’тигад едәнләри јалан динин ҝәтирдији тәһлүкәләр һаггында хәбәрдар едирләр. Бунун нәтиҹәси олараг, милјонларла инсан јалан динлә әлагәсини кәсмәк үчүн гәти аддымлар атыблар. Онлар һәјатларыны Јеһоваја һәср едәрәк Иса Мәсиһин вәфтиз олунмуш давамчылары олублар. Бәли, онлар тә’хирә салмадан Аллаһын чағырышына һај верибләр: «Еј халгым, орадан чыхын ки, онун ҝүнаһларына шәрик олмајасыныз вә онун бәлаларынын биринә дүчар олмајасыныз» (Вәһј 18:4).

11. Јеһованын рәғбәтини газанмаг үчүн нә етмәк лазымдыр?

¹¹ Јеһованын Шаһидләринин тәблиғ етдији Мүгәддәс Китаб хәбәри милјонларла инсанын хошуна ҝәлсә дә, онлар нә етмәли олдугларына әмин дејилләр. Белә инсанлардан бә’зиләри һәрдәнбир Иса Мәсиһин Хатирә ҝеҹәсиндә вә вилајәт конгресинин бә’зи һиссәләриндә иштирак едирләр. Биз онлары Илјасын сөзләри үзәриндә дәриндән дүшүнмәјә тәшвиг едирик. Бир Мүгәддәс Китаб тәрҹүмәсиндә бу сөзләр белә тәрҹүмә едилиб: «Нә вахта гәдәр һасарын үстүндә отураҹагсыныз?» (1 Падшаһлар 18:21, Неw Енҝлисһ Библе). Ҝөзләмә мөвгеји тутмаг әвәзинә, онлар Јеһованын һәср вә вәфтиз едилмиш хидмәтчиси олмаг үчүн артыг индидән гәти аддымлар атмалыдырлар. Онларын әбәди һәјаты тәһлүкә алтындадыр! (2 Салониклиләрә 1:6-9).

12. Бә’зи вәфтиз олунмуш мәсиһчиләр һансы тәһлүкәли вәзијјәтдәдирләр вә онлар нә етмәлидирләр?

¹² Чох тәәссүфләр олсун ки, бә’зи вәфтиз олунмуш мәсиһчиләр хидмәтләриндә гејри-фәал вә гејри-мүнтәзәм олублар (Ибраниләрә 10:23-25; 13:15, 16). Тә’гибләр гаршысында јаранан горху, аиләни доландырмаг үчүн чәкилән нараһатчылыг, варланмаг вә ја өз кефи үчүн јашамаг кими арзулар онларын сә’јини зәифләтди. Иса хәбәрдарлыг етмишди ки, мәһз бунлар онун бә’зи давамчыларыны бүдрәдәҹәк, сә’јләрини боғаҹаг вә онлар үчүн тәлә олаҹаг (Матта 10:28-33; 13:20-22; Лука 12:22-31; 21:34-36). ‘Ики тәрәфә әјилмәјә’ давам етмәк әвәзинә, онлар ‘сә’јли олуб, төвбә едәрәк’ һәср олунаркән Аллаһа вердикләри вә’ди јеринә јетирмәк үчүн гәти аддымлар атмалыдырлар (Вәһј 3:15-19).

Јалан динин гәфил мәһви

13. Јеһу падшаһ тә’јин едилән заман Исраилдәки вәзијјәти тәсвир един.

¹³ Инсанлар тә’хирә салмадан инди гәти аддымлар атмалыдырлар. Бунун ваҹиб олдуғуну баша дүшмәк үчүн, ҝәлин Кармел дағында кимин һәгиги Аллаһ олдуғуну мүәјјән едән сынагдан 18 ил сонра Исраилдә баш верән һадисәләри нәзәрдән кечирәк. Баалын пәрәстишкарлары үзәринә Јеһованын һөкм ҝүнү гәфләтән, Илјасын хәләфи олан Елишанын ҝүнләриндә ҝәлди. О вахт Исраилдә Ахавын оғлу Јеһорам падшаһлыг едирди, Изевел исә һәлә дә сағ иди. Елиша һеч кимә хәбәр вермәдән, нөкәрини Исраил ордусунун башчысы Јеһунун јанына ҝөндәрди вә она Јеһуну јени падшаһ кими мәсһ етмәји тапшырды. Һәмин вахт о, Иордан чајынын шәрг саһилиндә, Рамот-Ҝилеадда, Исраилин дүшмәнләринә гаршы мүһарибә апарырды. Падшаһ Јеһорам исә алдығы јаралардан сағалмаг үчүн Изреелдә, Меҝиддонун јанындакы дүзәнликдә иди (2 Падшаһлар 8:29–9:4).

14, 15. Јеһу һансы тапшырығы алды вә ону неҹә гәбул етди?

¹⁴ Јеһованын Јеһуја вердији әмр бу иди: «Аған Ахавын нәслини гырыб мәһв едәҹәксән. Гулларым пејғәмбәрләрин вә Рәббин бүтүн гулларынын ганы үчүн Мән Изевелдән гисасымы алаҹағам. Бүтүн Ахав нәсли мәһв олаҹаг... Изевели исә Изреел тарласында көпәкләр јејәҹәк вә ону басдыран олмајаҹаг» (2 Падшаһлар 9:7-10).

¹⁵ Јеһу гәтијјәтли инсан иди. О, тә’хирә салмадан, дөјүш арабасына миниб ону сүр’әтлә Изреелә сары сүрдү. Изреелдәки ҝөзәтчи Јеһуну арабаны сүрмәсиндән таныды вә падшаһ Јеһорама хәбәр верди. Падшаһ орду башчысыны гаршыламаг үчүн арабасына миниб јола дүшдү. Онлар гаршылашанда Јеһорам Јеһудан сорушду: «Хејир ола, Јеһу?» О ҹаваб верди: «Анан Изевелин хаинликләри вә ҹадуҝәрликләри бу гәдәр чох олдуғу һалда неҹә хејир ола биләр?» Јеһорам гачмаға маҹал тапмамыш, Јеһу каманыны чәкди вә онун күрәјиндән елә вурду ки, ох онун үрәјиндән кечди (2 Падшаһлар 9:20-24).

16. а) Изевелин нөкәрләри ҝөзләнилмәдән һансы вәзијјәтә дүшдүләр? б) Јеһованын Изевел һаггындакы пејғәмбәрлији неҹә јеринә јетди?

¹⁶ Вахт итирмәдән о, арабасыны шәһәрә сүрдү. Үз-ҝөзүнү бојамыш Изевел пәнҹәрәдән бојланараг Јеһуну кинајәли сөзләрлә гаршылады. Јеһу она мәһәл гојмајараг, «Ким мәнимләдир, ким?» дејә ичәридә оланлары көмәјә чағырды. Изевелин нөкәрләри инди гәтијјәтлә һәрәкәт етмәли идиләр. Ики-үч сарај хидмәтчиси пәнҹәрәдән бојланды. Һәмин ан онларын садиглији сынаға чәкилди. «Ону ашағы атын» дејә Јеһу әмр етди. Хидмәтчиләр Изевели чөлә атдылар вә Јеһу өз арабасы вә атлары илә онун ҹәсәдини тапдалајыб кечди. Беләликлә, Исраилдә Баала ибадәтә башчылыг едән Изевел өз лајигли сонуна ҝәлиб чатды. Ону дәфн етмәјә маҹал тапмамыш, ҹәсәдини көпәкләр једи. Бунунла да онун һаггында дејилән пејғәмбәрлик сөзләри јеринә јетди (2 Падшаһлар 9:30-37).

17. Изевелин үзәриндә јеринә јетирилән һөкм ҝәләҹәкдә һансы һадисәнин олаҹағына даир иманымызы мөһкәмләндирир?

¹⁷ Руһани фаһишә олан «Бөјүк Бабилин» дә сону белә гәфләтән ҝәләҹәк. Фаһишә, көкләри гәдим Бабил шәһәринә ҝедән Шејтан дүнјасынын јалан динләрини тәмсил едир. Јалан динләри мәһв етдикдән сонра, Јеһова бүтүн диггәтини Шејтан дүнјасынын диҝәр һиссәләрини тәшкил едән инсанлара јөнәлдәҹәк. Онлары да мәһв етдикдән сонра јени салеһ дүнјаја јол ачылаҹаг (Вәһј 17:3-6; 19:19-21; 21:1-4).

18. Изевелин өлүмүндән сонра Исраилдә Баалын пәрәстишкарлары илә нә баш верди?

¹⁸ Изевелин өлүмүндән сонра, Јеһу вахт итирмәдән Ахавын бүтүн нәслини вә онун тәрәфдарларыны мәһв етди (2 Падшаһлар 10:11). Лакин өлкәдә Баала ибадәт едән исраиллиләр һәлә дә галмагда иди. Буну нәзәрә алараг, Јеһу ‘Рәбб үчүн гејрәтини ҝөстәрмәк’ мәгсәдилә нөвбәти гәти аддымыны атды (2 Падшаһлар 10:16). Өзүнү Баалын пәрәстишкары кими гәләмә верәрәк, Јеһу, Ахавын Самаријада Баалын адына тикдији мә’бәддә бөјүк бајрам мәрасими тәшкил етди. Исраилдә Баала ибадәт едәнләрин һамысы бу бајрама топлашды. Лакин мә’бәд онлар үчүн тәлә олду: Јеһунун адамлары онларын һамысыны өлдүрдүләр. Бу Мүгәддәс Китаб һекајәси белә сөзләрлә баша чатыр: «Беләликлә, Јеһу Исраилдән Баалын көкүнү кәсди» (2 Падшаһлар 10:18-28).

19. Јеһоваја садиг галан ‘бөјүк издиһамы’ габагда нә ҝөзләјир?

¹⁹ Исраилдә Баала ибадәтин көкү кәсилди. Шүбһәсиз ки, јалан динин дә сону бу ҹүр гәфләтән ҝәләҹәк. О мөһтәшәм һөкм ҝүнү әрзиндә сән кимин тәрәфиндә олаҹагсан? «Бөјүк мәшәггәтдән» сағ чыхаҹаг ‘бөјүк издиһамын’ арасында олмаг үчүн гәти аддымлары инди ат. Онда сән севинә-севинә ҝеријә бахыб, ‘ҹинси әхлагсызлығы илә јер үзүнү јолдан чыхаран бөјүк фаһишәнин’ үзәриндә һәјата кечирилән һөкмә ҝөрә Јеһоваја иззәт верәҹәксән. Аллаһын башга садиг хидмәтчиләри илә бирликдә сәмадан ҝәлән: «Һалелуја! Чүнки Күлл-Ихтијар Рәбб Аллаһымыз сәлтәнәт сүрүр» сөзләринә шәрик олаҹагсан (Вәһј 7:9, 10, 14; 19:1, 2, 6).

Дүшүнмәк үчүн суаллар

• Исраиллиләр Баалла ибадәтә неҹә ҹәлб едилдиләр?

• Мүгәддәс Китабда һансы бөјүк дөнүклүк һаггында пејғәмбәрлик едилмишди вә о неҹә јеринә јетди?

• Јеһу Баала ибадәтин көкүнү неҹә кәсди?

• Аллаһын һөкм ҝүнүндән сағ чыхмаг үчүн биз нә етмәлијик?

[18-ҹи сәһифәдәки хәритә]

(Хәритәјә нәшрин өзүндә бахын)

Соко

Афег

Хелгат

Јогнеам

Меҝиддо

Таанак

Дотан

САМАРИЈА

Ен-Дор

Шунем

Офра

Изреел

Ивлеам (Гат-Риммон)

Тирса

Бет-Шемеш

Бет-Шеан

Јавеш-Ҝилеад?

Авел-Мехола

Бет-Арбел

Рамот-Ҝилеад

Дағын зирвәси

Кармел дағы

Тавор дағы

Море

Ҝилбоа дағы

[Су һөвзәләри]

Аралыг дәнизи

Галилеја дәнизи

[Чајы]

Иордан чајы

[Чешмә]

Харод чешмәси

[Иҹазә илә]

Based on maps copyrighted by Pictorial Archive (Near Eastern History) Est. and Survey of Israel

[20-ҹи сәһифәдәки шәкилләр]

Падшаһлығын тәблиғиндә вә мәсиһчи ҝөрүшләриндә мүнтәзәм иштирак етмәк һәгиги ибадәтин ваҹиб һиссәсидир.