Үнсијјәтиниз сизи гане едирми?
«АЛТМЫШ јашлынын мәһәббәт мәктубу». Бу мүсабигәни бир нечә ил бундан әввәл Јапонијада бир банк тәшкил етмишди. Мүсабигәдә иштирак едән 50-60 јашлы јапонлулар һәјат јолдашларына үрәкләриндә олан һиссләрини сөјләмәли идиләр. Мүсабигәчиләрдән бири арвадына үнванладығы мәктубунда јазмышды: «Мәнә ҝүлә биләрсән, амма үрәјимдә галмасын дејә сәнә ачыг е’тираф едирәм: Әзизим, мәнә ҝәлдијин үчүн чох сағ ол!»
Бә’зи шәрг өлкәләрини дә дахил етмәклә, бир сыра халгларын мәдәнијјәтиндә һиссләрин азад ифадә едилмәсинә пис бахылыр. Бунунла белә, Јапонијада 15 000-дән чох адам «мәһәббәт мәктубу» мүсабигәсиндә иштирак етмәк арзусунда олдуғуну билдирмишди. Мүсабигә о дәрәҹәдә мәшһурлашды ки, баша чатдыгдан сонра она бәнзәр икинҹиси кечирилди, јазылан мәктубларын әсасында китаблар чап олунмаға башлады. Бу ону ҝөстәрир ки, әслиндә чохлары севҝили һәјат јолдашына олан һиссләрини ифадә етмәк истәјәрди. Лакин бә’зиләри буну етмәкдән чәкинир. Нијә? Чүнки севдијин инсана өз һиссләрини сөјләмәк мүәјјән гәдәр сә’ј вә баҹарыг тәләб едир.
Һитоши Като тәгаүдчүләр һаггында китабында јазыр ки, Јапонијада јашлылар арасында бошанма әризәләрини әсасән гадынлар верирләр. Буна сәбәб онларын үрәкләриндә илләр әрзиндә јува салмыш инҹиклик һиссидир. О давам едир: «Лакин башга бир сәбәб, чәтинликлә гаршылашан әрлә арвадын үрәкләриндә оланлары бир-биринә ачмамасыдыр».
Бә’зи гадынлар әрләри тәгаүдә чыхдыгдан аз сонра ҝөзләнилмәдән онлара бошанмаг истәдикләрини сөјләјирләр. Ола биләр, илләр узуну, әрлә арвад бир-бирләринә гаршы нә дујдуглары һагда ачыг сөһбәт етмәмишләр. Јахуд да, буна ҹәһд етсәләр дә, сөһбәтләрини лазыми тәрздә — сакит вә мүлајимликлә давам етдирә билмәмишләр. Мүнасибәтләрини даһа да мөһкәмләндирмәк әвәзинә, онлар арды-арасы кәсилмәјән мүбаһисәләрә ҝиришмишләр.
Әрлә арвадын мүбаһисәләри сүлһ јолу илә һәлл етмәләри мүмкүндүрмү? Онлар һиссләрини бир-биринә мүлајимликлә сөјләјә биләрләрми? Бәлкә дә, сизә тәәҹҹүблү ҝәләҹәк, амма ән јарарлы тәклифләри никаһ мәсләһәтчиләри тәрәфиндән тәзәликҹә јазылан китабларда јох, әсрләр боју дәјәри азалмајан гәдим китабда — Мүгәддәс Китабда тапмаг олар.