Хошбәхтлијә апаран е’тибарлы јол

«ХӨШБӘХТЛИЈӘ ҹан атмаг» һәр инсанын һаггыдыр. Бу сөзләр Америка Бирләшмиш Штатларынын Мүстәгиллик бәјаннамәсинин мүәллифләринә мәхсусдур. Амма мәгсәдә ҹан атмаг вә она наил олмаг мүхтәлиф шејләрдир. Бу ҝүн ҝәнҹләрин чоху идман вә әјләнҹә нөвләриндә уғур газанмаг истәјирләр. Амма онлардан нечә нәфәри арзусуна наил олуб? Мусиги аләминдә мүвәффәгијјәт газанмағын нә олдуғуну јахшы билән мәшһур бир мүғәнни белә дејир: «Уғур газанмаг һәр адамын иши дејил».

Хошбәхтлик һаггында сиз дә бу ҹүр фикирләширсинизсә, руһдан дүшмәјин. Әҝәр хошбәхтлији дүзҝүн истигамәтдә ахтарырсынызса, тапаҹагсыныз. Әввәлки мәгаләдә ‘хошбәхт Аллаһ’ Јеһованын ады чәкилмишди (1 Тимотејә 1:11, ЈД). Мүгәддәс Китабда Аллаһ дүзҝүн јолу ҝөстәрир. О истәмир ки, хошбәхтлик ахтараркән биз чаш-баш галыб бу ишдән әлимизи үзәк. Кәдәрлә үзләшәндә Јеһова һиссләринизлә баҹармағыныза көмәк едә биләр. Ҝәлин әзиз бир адамымыз өләндә Аллаһын вердији тәсәлли һаггында дүшүнәк.

Әзизимиз өләндә

Өлүм һаггында јахшы бир шеј демәк олармы? О, валидејнләри ушагларындан, ушаглары да валидејнләриндән ајырыр. Јахын достлары бир-бириндән ајры салыр вә инсанлары ҝәләҹәк гаршысында аҹиз гојур. Өлүм хошбәхт бир аиләнин гапысынын ағзыны кәсдириб ону да гәм дәрјасына гәрг едир.

Һамы билир ки, өлүм әсл фаҹиәдир. Амма бә’зи адамлар бу һәгигәти рәдд едир вә өлүмүн әслиндә хејир-дуа олдуғуну иддиа едирләр. Мәсәлән, 2005-ҹи илин август ајында Мексика көрфәзиндә баш верән Катрина гасырғасынын гурбаны олмуш бир адамын дәфн мәрасиминдә кешиш белә демишди: «Ону Катрина өлдүрмәди. Ону Аллаһ евинә апарды». Диҝәр мисал: хәстәхана ишчиләриндән бири анасы өлән гыза тәсәлли верәрәк деди ки, онун анасыны Аллаһ ҝөјә апарыб. Гыз ағлајараг деди: «Аллаһ нәјә ҝөрә анамы әлимдән алды?»

Бәли, өлүм барәсиндәки бу ҹүр јанлыш фикирләр чәтин ки, кимисә сакитләшдирсин. Нә үчүн? Чүнки бу фикирләрдә һәгигәт јохдур. Тәсәлли вермәк әвәзинә, онлар Аллаһы, аиләләри вә достлары әзизләриндән ајыран, бунунла да онлара әзаб верән бир залым кими гәләмә верирләр. Лакин Аллаһын Кәламы өлүм һаггында һәгигәти ачыглајыр.

Мүгәддәс Китабда өлүм дүшмән адландырылыр. О, бәшәријјәт үзәриндә һакимлик едән падшаһа бәнзәдилир (Ромалылара 5:17; 1 Коринфлиләрә 15:26). Өлүм о гәдәр ҝүҹлүдүр ки, онун гаршысында һеч бир бәндә дајана билмәз, өлән һәр бир инсан онун нөвбәти гурбаныдыр. Мүгәддәс Китабда дејилир ки, севдијимиз бир инсан өләндә кечирдијимиз кәдәр вә аҹизлик һисси тамамилә нормалдыр. Амма суал јараныр: мәҝәр Аллаһ өлүмдән инсанлары ҝөјә апармаг үчүн истифадә едир? Гојун Мүгәддәс Китаб бу суала өзү ҹаваб версин.

Ваиз 9:5, 10 ајәләриндә дејилир: «Өлүләр һеч нә билмир... ҝедәҹәјин өлүләр дијарында [ибр. шеол] нә иш, нә фикир, нә билик, нә дә һикмәт вар». Шеол нәдир? Шеол — бәшәријјәтин үмуми мәзарыдыр. Мәзарда инсанлар тамамилә фәалијјәтсиз, һәрәкәтсиз, һиссиз-дујғусуз, фикирсиз вә дүшүнҹәсиздирләр. Онлар санки дәрин јухудадырларa. Мүгәддәс Китабдан ајдын олур ки, Аллаһ әзизләримизи ҝөјә, Өз јанына апармыр. Өлүләр мәзарда ҹансыздырлар.

Досту Лазар өләндән сонра Иса да бу һәгигәти тәсдигләди. О, өлүмү јухуја бәнзәтди. Әҝәр Лазар Гадир Аллаһын јанында, ҝөјдә олсајды, онда Исанын ону дирилдиб ҝеҹ-тез өләҹәји јер үзүнә гајтармасы гәддарлыг олмаздымы? Јазыларда дејилир ки, дәфн јериндә оларкән Иса јүксәк сәслә чағырды: «Лазар, чөлә чых!» Мүгәддәс Китаб давам едир: «Өлү дә... чыхды». Лазар јенидән јашамаға башлады. Иса билирди ки, Лазар јер үзүнү тәрк етмәмишди. О, ҹансыз бир вәзијјәтдә мәзарда узанмышды (Јәһја 11:11-14, 34, 38-44).

Мүгәддәс Китабда јазылмыш бу һадисә ҝөстәрир ки, Аллаһ инсанлары јердән ҝөјә апармаг үчүн өлүмдән истифадә етмир. Кәдәримизин сәбәбкарынын Аллаһ олмадығыны билмәјимиз Она јахынлашмағымыза имкан верир. Әмин ола биләрик ки, бәшәријјәтин дүшмәни олан өлүмүн бизә вурдуғу зәрәр вә кәдәри Аллаһ чох јахшы анлајыр. Мүгәддәс Китабда өлүләрин вәзијјәтини ачыглајан һәгигәт сүбут едир ки, онлар ҹәһәннәм одунда вә ја ә’рафда әзаб чәкмирләр; онлар мәзарда ҹансыз вәзијјәтдәдирләр. Гој өлән әзизләримизин хатирәсини Аллаһ һаггында олан јанлыш фикирләр ләкәләмәсин. Онларла инди нә баш вердији, онларын инди һарада олдуғу гој бизи нараһат етмәсин. Мүгәддәс Китаб васитәсилә Јеһова бизә тәсәлли вермәјә давам едир.

Үмид — хошбәхтлијә апаран јол

Мүзакирә етдијимиз бу ајәләрдән ҝөрдүк ки, үмидсиз хошбәхт олмаг гејри-мүмкүндүр. Мүгәддәс Китабда истифадә едилән «үмид» сөзүнүн мә’насы «јахшы бир шејин баш вермәсини әминликлә ҝөзләмәк»дир. Хошбәхтлијин үмидлә бағлылығыны анламаг үчүн ҝәлин Исанын Лазары дирилтмәсиндән бәһс едән парчаја бир дә диггәт јетирәк.

Исанын бу мө’ҹүзәни етмәсинә ән азы ики сәбәб вар иди. Биринҹиси, о, Мартаја, Мәрјәмә вә Лазарын гәм јејән достларына тәскинлик вермәк истәјирди. Онлар әзизләри илә јенидән бирликдә ола биләрдиләр. Анҹаг Иса Мартаја даһа ваҹиб олан икинҹи сәбәби сөјләди: «Сәнә: “Әҝәр иман едәрсәнсә, Аллаһын иззәтини ҝөрәҹәксән”, — демәдимми?» (Јәһја 11:40). Ҹ. Б. Филипсин «Әһди-Ҹәдид мүасир инҝилис дилиндә» нәшриндә ‘Аллаһын иззәти’ ифадәси «Аллаһын јаратмаға гадир олдуғу мө’ҹүзә» кими тәрҹүмә едилиб. Лазары һәјата гајтармагла Иса ҝәләҹәкдә Јеһова Аллаһын нәјә гадир олдуғуну вә нәләр едәҹәјини ҝөстәрди. ‘Аллаһын јаратмаға гадир олдуғу мө’ҹүзәләрдән’ бә’зиләринә фикир верәк.

Јәһја 5:28, 29 ајәсиндә Иса демишди: «Буна тәәҹҹүбләнмәјин, чүнки елә бир саат ҝәлир ки, гәбирләрдә оланларын һамысы Онун сәсини ешидәҹәкләр вә гәбирләриндән чыхаҹаглар». Бу о демәкдир ки, шеолда олан өлүләрин һамысы, бизим әзизләримиз дә дахил олмагла, јенидән һәјата гајыдаҹаглар. Һәвариләрин ишләри 24:15 ајәси бу мөһтәшәм һадисә һаггында даһа бир шеј ачыглајыр: «Һәм салеһ, һәм дә салеһ олмајан өлүләрин дирилмәси олаҹагдыр». Демәли, һәтта «салеһ олмајан», јә’ни Јеһованы танымајыб Она хидмәт етмәмиш инсанларын да ҝәләҹәкдә Аллаһын илтифатыны газанмаг имканлары олаҹаг.

Бәс дирилмә һарада олаҹаг? Сүлејманын мәсәлләри 2:21ајәсиндә дејилир: «Чүнки әмәлисалеһләр јер үзүндә сакин олаҹаг, камилләр бурада галаҹаг». Бир дүшүнүн! Өлүмүн ајырдығы аиләләр, достлар елә бурадаҹа, јердә јенидән ҝөрүшәҹәкләр. Мәҝәр һәсрәтини чәкдијимиз инсанларла нәһајәт бирликдә олмаг барәсиндә дүшүнәндә үрәјимиз севинҹлә ашыб-дашмырмы?

Јеһова сизин хошбәхт олманызы истәјир

Ҝөрдүјүмүз кими, Јеһова инсанларын хошбәхтлији наминә чох шеј едиб. Биринҹиси, Мүгәддәс Китаб васитәсилә билик вә чәтинликләрин өһдәсиндән ҝәлмәк үчүн бизә рәһбәрлик верир. Әзизимиз өләндә тәсәлли вермәкдән әлавә, Мүгәддәс Китабда олан мәсләһәтләр мадди вә сәһһәтимизлә бағлы проблемләрин дә өһдәсиндән ҝәлмәјимизә көмәк едир. Әдаләтсизлијә вә сијаси чахнашмалара таб ҝәтирмәк үчүн о бизә ҝүҹ верир. Әҝәр һәјатынызда онун рәһбәрлијинә риајәт етсәниз, диҝәр шәхси проблемләрин дә өһдәсиндән ҝәлмәји баҹараҹагсыныз.

Икинҹиси одур ки, Мүгәддәс Китабы өјрәнәркән сиз инсан ҹәмијјәтиндә тајы-бәрабәри тапылмајан бир үмид әлдә едирсиниз. Өлән аилә үзвләримизин вә достларымызын дирилмәси Мүгәддәс Китабда јазылан вә’дләрин һәлә јарысыдыр. Вәһј 21:3, 4 ајәләриндә ҝөрүн нә дејилир: «Аллаһын Өзү онларла [инсанларла] олаҹагдыр. Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди». Бу о демәкдир ки, һәјатыныза кәдәр ҝәтирән һәр бир шеј һәмишәлик јох олаҹаг. Мүгәддәс Китабын вә’дләри һәјата кечәҹәк, сиз исә онларын шаһиди ола биләрсиниз. Гаршыда ҝөзәл ҝүнләрин олаҹағыны билмәк артыг индидән бизә јүнҝүллүк ҝәтирә биләр. Өлүмдән сонра гејри-мүәјјән мүддәт әрзиндә әзаб чәкмәдијини билмәк хошбәхт олмаг үчүн даһа бир сәбәбдир.

Бир нечә ил бундан әввәл Марија адлы бир гадын хәрчәнҝ хәстәлијиндән әзијјәт чәкән әрини итирди. Ҝөзләринин јашы гурумаға маҹал тапмамыш, мадди чәтинликләр үзүндән үч гызы илә бирликдә евиндән чыхмаға мәҹбур олду. Ики ил сонра Марија билди ки, өзү дә хәрчәнҝ хәстәлијинә тутулуб. О вахтдан ики ағыр операсија кечириб вә һәр ҝүн дәһшәтли ағрылара гатлашмалы олур. Бүтүн бунлара бахмајараг, баҹымызын мүсбәт әһвал-руһијјәси вар, о һәтта башгаларына да үрәк-дирәк верир. Севинҹини горумаға о неҹә мүвәффәг олур?

Марија дејир: «Чәтинлијим оланда, чалышырам өзүм һаггында чох дүшүнмәјим. Белә суаллардан чәкинирәм: “Бу нијә мәним башыма ҝәлди? Нәјә ҝөрә мән белә әзијјәт чәкмәлијәм? Мән нәјә ҝөрә хәстәләндим?” Бәдбин дүшүнҹә тәрзи адамы әлдән салыр. Онданса, гүввәми Јеһоваја хидмәтә вә башгаларына көмәјә сәрф едирәм. Бунун сајәсиндә өзүмү хошбәхт һисс едирәм».

Маријанын һәјатында үмидин һансы ролу вар? Онун үрәји Јеһованын ҝәләҹәкдә хәстәликләри вә диҝәр проблемләри арадан галдыраҹағы вахтдадыр. Мүалиҹә үчүн хәстәханаја ҝедәндә, үмидләрини һәр шејдән үзмүш хәстәләрлә өз үмиди һагда данышыр. Үмид Марија үчүн нә дәрәҹәдә ваҹибдир? О дејир: «Тез-тез Ибраниләрә 6:19 ајәси үзәриндә дүшүнүрәм. Орада Павел үмиди ҹанымызын лөвбәринә бәнзәдир. Лөвбәрсиз адам гасырғаја дүшмүш ҝәми кими далғаларын үстүндә ора-бура атылыр. Амма о лөвбәрә бағлансан, гасырғаја бәнзәр нә проблемин олурса олсун, өзүнү тәһлүкәсиз һисс едәҹәксән». ‘Јалан данышмајан Аллаһын вә’д етдији әбәди һәјат үмиди’ Маријанын хошбәхт галмасына көмәк едир. О сизә дә көмәк едә биләр (Титуса 1:2).

Мүгәддәс Китабы өјрәнмәклә чәтинликләрә бахмајараг, сиз дә сөзүн әсл мә’насында хошбәхт ола биләрсиниз. Ола биләр, сизи бу өјрәнмәнин практики бир әһәмијјәти олуб-олмадығы марагландырсын. Јеһованын Шаһидләри суалларыныза Мүгәддәс Китабдан мәмнунијјәтлә ҹаваб верәрләр. Јеһованын вә’дләринин һәјата кечмәсини ҝөзләјирсинизсә, сиз дә бу ајәдә бәһс едилән инсанларын арасында ола биләрсиниз: «Онлар фәрәһ вә шадлыг тапаҹаг, кәдәр вә гәм-гүссә јох олаҹаг!» (Јешаја 35:10).

[Һашијә]

[5-ҹи сәһифәдәки шәкил]

Кәдәримизи јалныз Мүгәддәс Китаб һәгигәти јүнҝүлләшдирә биләр.

[7-ҹи сәһифәдәки шәкил]

Дирилмә үмиди бизи даһа да хошбәхт едир.