Јеһова изтираб чәкәнләри гуртарыр

«Салеһләр чох бәлаја дүчар олар, лакин Рәбб онлары һәр бириндән гуртарыр» (МӘЗМУР 34:19).

1, 2. Бир садиг мәсиһчи һансы проблемлә үзләшмишди вә нә үчүн биздә дә охшар һиссләр баш галдыра биләр?

КЕЈКОa адлы ҹаван гадын 20 илдән артыгдыр ки, Јеһованын Шаһидидир. Бир мүддәт о, даими пионер, јә’ни Падшаһлығын таммүддәтли тәблиғчиси кими хидмәт етмишдир. Бу хидмәт нөвү онун үчүн чох әзиз иди. Лакин јахынларда Кејкону үмидсизлик вә тәнһалыг һиссләри чулғады. О дејир: «Ағламагдан башга һеч нә едә билмирдим». Ҹансыхыҹы фикирләрдән јаха гуртармаг үчүн Кејко шәхси өјрәнмәјә даһа чох вахт ајырмаға башлады. О дејир: «Вәзијјәтими дәјишдирә билмәдијим үчүн, иш о јерә чатды ки, артыг өлмәк истәјирдим».

² Сән дә әлаҹсызлыг һисси илә мүбаризә апармалы олмусанмы? Јеһованын Шаһиди олдуғун үчүн севинмәјә чохлу сәбәбләрин вар, чүнки Аллаһа сәдагәт «индики вә ҝәләҹәк һәјат үчүн үмид верир» (1 Тимотејә 4:8). Һал-һазырда сән руһани ҹәннәтдә јашајырсан! Лакин бу о демәкдирми ки, сәнин нә проблемләрин, нә дә руһ дүшкүнлүјүн олаҹаг? Хејр! Мүгәддәс Китаб дејир: «Салеһләр чох бәлаја дүчар олар, лакин Рәбб онлары һәр бириндән гуртарыр» (Мәзмур 34:19). Бу тәәҹҹүблү дејил, чүнки «бүтүн дүнја... шәририн», Шејтан Иблисин «һакимијјәти алтындадыр» (1 Јәһја 5:19). Һәр биримиз мүәјјән дәрәҹәдә һәјатымызда бунун нәтиҹәләрини һисс едирик (Ефеслиләрә 6:12).

Проблемләрин нәтиҹәси

3. Мүгәддәс Китабда һагларында јазылан шиддәтли кәдәр һисси кечирән Аллаһын хидмәтчиләриндән нүмунә ҝәтирин.

³ Узун сүрән проблем бизим бахышымызы бүтүнлүклә тутгунлашдыра биләр (Сүлејманын мәсәлләри 15:15). Салеһ Әјјуба диггәт јетирәк. Ағыр сынаг ичиндә икән Әјјуб белә деди: «Гадындан доғулан инсанын өмрү аздыр, һәјаты сыхынты илә долудур» (Әјјуб 14:1). Әјјуб севинҹини итирмишди. О, бир мүддәт һәтта Јеһованын ону тәрк етдијини дүшүнүрдү (Әјјуб 29:1-5). Аллаһын хидмәтчиләри арасында шиддәтли изтираб чәкән тәкҹә Әјјуб олмамышдыр. Мүгәддәс Китабда јазылыб ки, Ханна сонсуз олдуғуна ҝөрә ‘үрәји јанырды’ (1 Шамуел 1:9-11). Аиләсиндәки вәзијјәтә ҝөрә әзаб чәкән Ривга һәјатындан бездијини сөјләди (Јарадылыш 27:46). Өз сәһвләри үзәриндә дүшүнәркән Давуд деди: «Даим јаслы ҝәзирәм» (Мәзмур 38:6). Бу нүмунәләрдән ајдын ҝөрүнүр ки, мәсиһчилијә гәдәрки дөврдә дә Аллаһдан горхан инсанларын шиддәтли кәдәр һисси кечирдији вахтлар олмушдур.

4. Бу ҝүн мәсиһчиләр арасында ‘кәдәрлиләрин’ олмасы нә үчүн тәәҹҹүблү дејил?

⁴ Бәс мәсиһчиләр һагда нә демәк олар? Һәвари Павел салониклиләрә ‘кәдәрли оланлара’ тәсәлли вермәләрини сөјләмәји ваҹиб билмишди (1 Салониклиләрә 5:14, ЈД). Бир арајыш әсәриндә гејд олунур ки, «кәдәрли оланлар» кими тәрҹүмә едилән јунан сөзү «мүвәггәти олараг һәјатын чәтинликләринә ҝөрә руһ дүшкүнлүјүнә гапылан» адамлара да аид едилә биләр. Павелин сөзләри ҝөстәрир ки, Салоникдәки јығынҹагда руһла мәсһ олунмуш бә’зи мәсиһчиләр мә’јус идиләр. Бу ҝүн дә мәсиһчиләр арасында мә’јус оланлар вардыр. Онларын белә вәзијјәтләринин сәбәби нәдир? Ҝәлин ҝениш јајылмыш үч сәбәби арашдыраг.

Ҝүнаһлы тәбиәтимиз бизи кәдәрләндирә биләр

5, 6. Ромалылара 7:22-25 ајәләри бизә неҹә тәсәлли верир?

⁵ ‘Һәр ҹүр һәссаслығы итирән’ позғун инсанлардан фәргли олараг, ҝүнаһлы олмалары һәгиги мәсиһчиләри инҹидир (Ефеслиләрә 4:19). Онлар да Павелин кечирдији ејни һиссләри кечирә биләрләр. О јазырды: «Аллаһын Ганунундан дахили варлығыма ҝөрә зөвг алырам. Лакин мән үзвләримдә башга бир ганун да ҝөрүрәм ки, о, ағлымын тәсвиб етдији ганун илә мүбаризә едир вә үзвләримдә олан ҝүнаһ ганунуна мәни әсир едир». Сонра Павел нида едир: «Нә заваллы адамам!» (Ромалылара 7:22-24).

⁶ Сән дә һеч Павелин кечирдији һиссләри кечирмисәнми? Гејри-камиллијини дәриндән баша дүшмәк һеч дә пис дејилдир, чүнки бунун сајәсиндә ҝүнаһын тәһлүкәли олдуғуну дәрк едәҹәк вә писликдән гачмаға даһа гәтијјәтли олаҹагсан. Лакин бу о демәк дејилдир ки, сән сәһвләринә ҝөрә даима әзаб чәкмәлисән. Павел кечирдији һиссләрини бөлүшдүкдән сонра әлавә етди: «Рәббимиз Иса Мәсиһ васитәси илә Аллаһа шүкүр едирәм!» (Ромалылара 7:25). Бәли, Павел әмин иди ки, Исанын төкүлән ганы ону мирас алынмыш ҝүнаһдан хилас едә биләр (Ромалылара 5:18).

7. Инсана ҝүнаһлы мејлләринә ҝөрә мә’јуслуға гапылмамаға нә көмәк едә биләр?

⁷ Әҝәр ҝүнаһлы тәбиәтин сәнә әзијјәт верирсә, гој һәвари Јәһјанын сөзләри сәнә тәсәлли олсун. О јазырды: «Әҝәр бири ҝүнаһа батса белә, Атанын јанында Мүдафиәчијә, јә’ни адил олан Иса Мәсиһә маликик. О Өзү ҝүнаһларымыз вә јалныз бизим дејил, бүтүн дүнјанын ҝүнаһлары үчүн әфв тә’мин едән гурбандыр» (1 Јәһја 2:1, 2). Әҝәр сән өзүнүн ҝүнаһлы мејлләринә ҝөрә үзүлүрсәнсә, һеч вахт унутма ки, Иса камил инсанлар үчүн дејил, ҝүнаһкарлар үчүн өлүб. Әслиндә «һамы ҝүнаһ ишләтмиш вә Аллаһын иззәтиндән мәһрумдур» (Ромалылара 3:23).

8, 9. Нә үчүн иттиһамедиҹи фикирләри өзүмүздән говмалыјыг?

⁸ Фәрз едәк ки, сән кечмишдә ҹидди ҝүнаһ ишләтмисән. Шүбһәсиз, бу һагда дуада Јеһоваја демисән, ҝүман ки, бир јох, бир нечә дәфә. Мәсиһчи ағсаггалларындан руһани көмәк алмысан (Јагуб 5:14, 15). Һәгигәтән төвбә етдијин үчүн јығынҹағын үзвү олараг галмысан. Вә ја бәлкә дә сән бир мүддәт Аллаһын тәшкилатыны тәрк етмиш, анҹаг сонралар пешман олмуш вә тәмиз адыны бәрпа етмисән. Һәр ики һалда, кечмиш ҝүнаһын јадына дүшүб, сәни кәдәрләндирә биләр. Белә һалларда унутма ки, һәгигәтән пешман оланлар үчүн Јеһованын «әфви болдур» (Јешаја 55:7). Бундан башга, О истәмир ки, сән бағышланмајаҹағыны дүшүнәсән. Буну истәјән Шејтандыр (2 Коринфлиләрә 2:7, 10, 11). Шејтаны мәһв ҝөзләјир, чүнки о буна лајигдир, лакин о елә етмәк истәјир ки, сән дә ејни һөкмә лајиг олдуғуну дүшүнәсән (Вәһј 20:10). Шејтана јол вермә ки, иманыны мәһв етмәјә мүвәффәг олсун (Ефеслиләрә 6:11). Әксинә, башга һалларда олдуғу кими, бу һалда да ‘она гаршы дур’ (1 Петер 5:9).

⁹ Вәһј 12:10 ајәсиндә Шејтан «гардашларымызын», јә’ни мәсһ олунмушларын «иттиһамчысы» адланыр. Иблис ‘онлары Аллаһымызын өнүндә ҝеҹә вә ҝүндүз иттиһам едир’. Бу ајә үзәриндә фикирләшсән баша дүшәҹәксән ки, Јеһова сәни иттиһам етмәдији һалда сән өзүн-өзүнү гынајыб вә иттиһам етсән, Шејтан севинәҹәк (1 Јәһја 3:19-22). Нә үчүн ҝүнаһларына ҝөрә әзаб ичиндә о гәдәр гыврыласан ки, тәрк едилдијини дүшүнәсән? Шејтана Аллаһла мүнасибәтини мәһв етмәјә иҹазә вермә. Һеч вахт Шејтана имкан вермә ки, Јеһованын ‘рәһмли вә лүтфкар, һәдсиз сәбирли, бол мәһәббәтли’ олдуғуна ҝөзләрини јумсун (Чыхыш 34:6).

Имканларымызын мәһдудлуғу бизи руһдан сала биләр

10. Имканларымызын мәһдудлуғу бизи неҹә руһдан сала биләр?

¹⁰ Бә’зи мәсиһчиләр хидмәтдә истәдикләри гәдәр иштирак едә билмәдикләринә ҝөрә руһдан дүшүрләр. Бу сәнинлә дә баш верирми? Ола биләр, ҹидди хәстәлик, гоҹалыг вә ја башга сәбәбләр уҹбатындан хидмәтә әввәлки гәдәр вахт сәрф едә билмирсән. Дүздүр, мәсиһчиләр Аллаһа хидмәт етмәк үчүн вахты сатын алмаға тәшвиг олунурлар (Ефеслиләрә 5:15, 16). Бәс әҝәр даһа чох хидмәт етмәјинә мане олан сәбәбләр ҹиддидирсә вә бу да сәни руһдан салырса, онда неҹә?

11. Павелин Галатијалылара 6:4 ајәсиндә јазылмыш мәсләһәти бизә неҹә көмәк едә биләр?

¹¹ Мүгәддәс Китаб бизи ‘тәнбәл олмамаға, вә’д олунанлары иман вә сәбирлиликлә мирас аланлардан нүмунә ҝөтүрмәјә’ чағырыр (Ибраниләрә 6:12). Буну јалныз онларын ҝөзәл нүмунәләрини тәдгиг етмәк вә иманларыны тәглид етмәклә баҹарарыг. Лакин өзүмүзү башгалары илә мүгајисә едир вә һеч бир иши јахшы ҝөрмәдијимиз гәнаәтинә ҝәлириксә, бу фајда ҝәтирмәјәҹәк. Буна ҝөрә дә, Павелин мәсләһәтинә әмәл етмәк јахшы оларды: «Гој һәр кәс өз ишини сынасын вә о заман башгасы илә дејил, өзү илә ифтихара сәбәб олсун» (Галатијалылара 6:4).

12. Јеһоваја хидмәт едәркән севинмәјә һансы сәбәбләримиз вардыр?

¹² Мәсиһчиләрин сағламлыгла бағлы ҹидди проблемләри олдугда белә шадланмаг үчүн әсаслы сәбәбләри вардыр. Мүгәддәс Китаб бизи әмин едир: «Аллаһ һагсыз дејилдир ки, сизин ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти унутсун» (Ибраниләрә 6:10). Ола биләр ки, сәндән асылы олмајан сәбәбләрә ҝөрә хидмәтдә әввәлки гәдәр иштирак едә билмәјәсән. Буна бахмајараг, Јеһованын көмәјилә хидмәтин мүәјјән нөвләриндә, мәсәлән, телефон вә ја мәктубла шаһидлик етмәкдә даһа сәмәрәли иштирак едә биләрсән. Әмин ол ки, Јеһова Аллаһ үрәкдән етдијин хидмәтә, Она вә инсанлара ҝөстәрдијин мәһәббәтә ҝөрә сәнә хејир-дуа верәҹәк (Матта 22:36-40).

«Чәтин анлар» бизи үзә биләр

13, 14. а) «Чәтин анлар» бизә неҹә әзијјәт верә биләр? б) Инсанларын јахынларына гаршы шәфгәтсиз олдуглары бизим ҝүнләрдә неҹә ајдын ҝөрүнүр?

¹³ Аллаһын салеһ дүнјасында јашамаг үмидимиз олса да, һал-һазырда ‘чәтин анларда’ јашајырыг (2 Тимотејә 3:1). Кәдәрли һадисәләрин гуртулушумузун јахын олдуғуну ҝөстәрдијини билмәк бизә тәсәлли верир. Бунунла белә, әтрафдакы вәзијјәт бизә дә өз тә’сирини ҝөстәрир. Мәсәлән, ола билсин, сән ишсизсән, иш тапмаг исә чәтиндир. Ајлар кечир вә сән дүшүнүрсән: «Ҝөрәсән Јеһова дуаларымы ешидирми, Онун мәним вәзијјәтимдән хәбәри вармы?» Јахуд бәлкә дә ајрысечкилијин вә ја башга әдаләтсизлијин гурбаны олмусан. Һәтта гәзетләрдәки башлыглары нәзәрдән кечирәндә, ола билсин, әтрафындакыларын позғун давранышындан «әзијјәт чәкән салеһ» Лутун кечирдији һиссләри кечирирсән (2 Петер 2:7).

¹⁴ Ахыр ҝүнләрин јан кечә билмәјәҹәјимиз бир сәҹијјәви хүсусијјәти дә вардыр. Мүгәддәс Китабда габагҹадан дејилмишди ки, чохлары јахынларына гаршы «шәфгәтсиз» олаҹаглар (2 Тимотејә 3:3). Бир чох евләрдә аилә үзвләри арасында мәһәббәт кәскин сурәтдә чатышмыр. «Аиләдә зоракылыг» китабында дејилир: «Фактлара әсасән, гәтл һалларына ән чох аиләдә раст ҝәлинир, инсанлар физики зоракылыға, емосионал вә ја сексуал тәһгирләрә башгаларындан чох аилә үзвләри тәрәфиндән мә’руз галырлар. Инсанларын севилдикләрини вә өзләрини тәһлүкәсизликдә һисс етмәли олдуглары јер, бә’зи ушаглар вә бөјүкләр үчүн ән тәһлүкәли јердир». Пис аилә мүһитиндә бөјүјәнләр сонралар тәшвиш вә әлаҹсызлыг һисс едә биләрләр. Әҝәр сәнинлә дә бу баш верирсә, онда неҹә?

15. Јеһованын мәһәббәти һәр һансы инсанын мәһәббәтиндән нә дәрәҹәдә үстүндүр?

¹⁵ Мәзмурчу Давуд охујурду: «Ата-анам мәни атса белә, Рәбб мәни гәбул едәр» (Мәзмур 27:10). Јеһованын мәһәббәтинин истәнилән валидејнин мәһәббәтиндән гат-гат артыг олдуғуну билмәк неҹә дә тәсәлливериҹидир! Валидејнләринин лагејдлији, пис рәфтары, сәндән имтина етмәләри нә дәрәҹәдә ағыр олса да, бу Јеһованын сәнә олан гајғысына әсла тә’сир етмир (Ромалылара 8:38, 39). Јадда сахла ки, Јеһова севдији адамлары Өзүнә ҹәлб едир (Јәһја 3:16; 6:44). Инсанларын сәнинлә неҹә рәфтар етмәләриндән асылы олмајараг, сәмави Атан сәни севир!

Мә’јуслуғун өһдәсиндән неҹә ҝәлмәк олар?

16, 17. Мә’јуслуг һисс едәндә инсан руһән зәифләмәмәк үчүн нә едә биләр?

¹⁶ Мә’јуслуғун өһдәсиндән ҝәлмәк үчүн мүәјјән аддымлары ата биләрсән. Мәсәлән, руһландырыҹы мәсиһчи хидмәтиндә иштирак ет. Хүсусилә дә мә’јуслуг дәфедилмәз ҝөрүндүкдә Аллаһын Кәламы үзәриндә дүшүн. Мәзмурчу охујурду: «Мән “бүдрәјир ајағым” дејән заман, ја Рәбб, мәнә мәһәббәтинлә дајагсан. Мән дахилән чох нараһат оларкән тәсәлли верәрәк мәни фәрәһләндирирсән» (Мәзмур 94:18, 19). Мүнтәзәм олараг Мүгәддәс Китабы охудугда зеһнин тәсәлливериҹи сөзләрлә вә руһландырыҹы фикирләрлә долаҹаг.

¹⁷ Дуа да чох ваҹибдир. Һәтта үрәјинин дәринлијиндәки һиссләри сөзләрлә ифадә едә билмәјәндә дә, Јеһова нә демәк истәдијини билир (Ромалылара 8:26, 27). Мәзмурчу бизи әмин едир: «Сән гајғы јүкүнү Рәббә вер, гој сәнә дајаг олсун. О һеч вахт салеһә сарсынты вермәз» (Мәзмур 55:22).

18. Депрессијадан әзијјәт чәкән инсан нә едә биләр?

¹⁸ Бә’зиләринин руһ дүшкүнлүјү депрессијадан әзијјәт чәкмәләри илә әлагәдардырb. Әҝәр сән дә бундан әзијјәт чәкирсәнсә, баҹардығын гәдәр диггәтини Аллаһын јени дүнјасына вә ‘һеч бир сакинин “хәстәјәм” демәјәҹәји’ вахта јөнәлтмәјә чалыш (Јешаја 33:24). Әҝәр белә вәзијјәтин вахташыры олан мә’јуслуг һиссиндән даһа узун мүддәт давам едирсә, һәкимә мүраҹиәт етмәк мүдриклик оларды (Матта 9:12). Сағламлығын гајғысына галмаг чох ваҹибдир. Мүалиҹәви пәһриз вә ҝимнастиканын фајдасы дәјә биләр. Кифајәт гәдәр истираһәт ет. Ҝеҹәјә кими телевизора бахма, сәни физики вә емосионал ҹәһәтдән ҝүҹдән салан әјләнҹәләрдән гач. Ән әсасы исә Аллаһын иши илә мәшғул олмаға давам ет. Јеһованын ‘ҝөзләрдән бүтүн јашлары силәҹәји’ вахт һәлә чатмаса да, О, таб ҝәтирмәкдә сәнә көмәк олаҹагдыр (Вәһј 21:4; 1 Коринфлиләрә 10:13).

Аллаһын «ҝүҹлү әлинин алтында» јашајын

19. Јеһова изтираб чәкәнләрә нә вә’д едир?

¹⁹ Мүгәддәс Китаб әмин едир ки, салеһин бәласы чох олдуғуна бахмајараг, ‘Рәбб онларын һәр бириндән ону гуртарыр’ (Мәзмур 34:19). Аллаһ буну неҹә едир? Һәвари Павел ‘бәдәниндәки нештәрдән’ хилас олмаг үчүн дәфәләрлә дуа едәндә Јеһова она деди: «Мәним гүдрәтим зәифликдә камилләшир» (2 Коринфлиләрә 12:7-9). Јеһова Павелә нә вә’д етмишди, бәс сәнә һансы вә’ди верир? О, дәрһал шәфа јох, таб ҝәтирмәк үчүн ҝүҹ вермәји вә’д едир.

20. 1 Петер 5:6, 7 ајәләри бизи нәјә әмин едир?

²⁰ Һәвари Павел јазыр: «Аллаһын ҝүҹлү әлинин һимајәси алтында тәвазөкар олун ки, О Өз вахтында сизи уҹалтсын. Бүтүн гајғынызы Онун үзәринә гојун, чүнки сизин гајғыныза галан Одур» (1 Петер 5:6, 7). Јеһова гајғына галдығы үчүн һеч вахт сәни тәрк етмәјәҹәк. Сынагларына бахмајараг, О сәнә көмәк едәҹәк. Јадда сахла ки, садиг мәсиһчиләр ‘Аллаһын ҝүҹлү әлинин һимајәси алтындадырлар’. Јеһоваја хидмәт етдијимиздән, О, таб ҝәтирмәк үчүн бизә ҝүҹ верир. Әҝәр Она садиг галсаг, һеч бир шеј бизим руһани сағламлығымыза зәрәр вура билмәјәҹәк. Буна ҝөрә дә, ҝәлин Јеһованын гаршысында нөгсансызлығымызы горујаг ки, Онун вә’д етдији јени дүнјада әбәди һәјаты алаг вә изтираб чәкәнләри һәмишәлик гуртардығы ҝүнү ҝөрәк!

[Һашијәләр]

Хатырлајырсынызмы?

• Нә үчүн һәтта Јеһованын хидмәтчиләринин дә проблемләри ола биләр?

• Аллаһын халгындан бә’зиләринин руһ дүшкүнлүјүнә гапылмасынын бә’зи сәбәбләри һансылардыр?

• Јеһова руһ дүшкүнлүјүнүн өһдәсиндән ҝәлмәкдә бизә неҹә көмәк едир?

• Биз һансы мә’нада ‘Аллаһын ҝүҹлү әлинин һимајәси алтындајыг’?

[17-ҹи сәһифәдәки шәкилләр]

Сынаглара бахмајараг, Јеһованын халгынын севинмәк үчүн әсасы вардыр.