Мүгәддәс Китабын әслиндә нә өјрәтдијини өјрәдин
«Бүтүн халглары шаҝирдим един, онлары... өјрәдин» (МАТТА 28:19, 20).
1. Мүгәддәс Китаб нә гәдәр ҝениш јајылыб?
ЈЕҺОВАНЫН КӘЛАМЫ олан Мүгәддәс Китаб дүнјанын ән гәдим вә ән ҝениш јајылмыш китабларындан биридир. О, там вә гисмән 2 300-дән артыг дилә тәрҹүмә олунуб. Јер үзүнүн сакинләринин 90 фаиздән чоху ону өз ана дилиндә охуја биләр.
2, 3. а) Нә үчүн Мүгәддәс Китаб тә’лимләринә даир чашгынлыг јараныб? б) Биз һансы суаллары арашдыраҹағыг?
2 Милјонларла инсан Мүгәддәс Китабы һәр ҝүн охујур. Бә’зиләри ону әввәлдән ахырадәк дәфәләрлә охумушлар. Минләрлә дини груплар тә’лимләринин Мүгәддәс Китаба әсасландығыны иддиа етсәләр дә, араларында разылыға ҝәлә билмирләр. Бундан башга, ејни динин үзвләри арасындакы ҹидди фикир ајрылығы да чашгынлығы артырыр. Бә’зиләри Мүгәддәс Китаба е’тибар етмир, онун мәншәјинә вә дәјәрли олдуғуна шүбһә илә јанашырлар. Чохларынын фикринҹә исә, Мүгәддәс Китаб садәҹә никаһ мәрасиминдә вә ја мәһкәмәдә анд ичмәк үчүндүр.
3 Әслиндә исә Мүгәддәс Китаб Аллаһын тә’сирли кәламы, јә’ни бәшәријјәтә үнванланмыш мәктубудур (Ибраниләрә 4:12). Јеһованын Шаһидләри олдуғумуз үчүн бизим арзумуз будур ки, инсанлар онун тә’лимләриндән аҝаһ олсунлар. Биз Иса Мәсиһин давамчыларына вердији «ҝедин, бүтүн халглары шаҝирдим един, онлары... өјрәдин» тапшырығыны севинҹлә јеринә јетиририк (Матта 28:19, 20). Тәблиғдә, дүнјаны бүрүјән дини гарышыглыға ҝөрә нараһат олан сәмими гәлбли инсанларла растлашырыг. Онлар Јараданымыз һаггында һәгигәти вә һәјатын мә’насы барәдә Аллаһын Кәламында нә јазылдығыны билмәк истәјирләр. Ҝәлин, бир чох инсанлары марагландыран үч суалы бир-бир нәзәрдән кечирәк. Әввәлҹә дин рәһбәрләринин јајдығы сәһв фикирләри, сонра исә Мүгәддәс Китабын әслиндә нә өјрәтдијини арашдыраҹағыг. Һәмин суаллар ашағыдакылардыр: 1) Аллаһ гејдимизә галырмы? 2) Биз нә үчүн бурадајыг? 3) Инсан өләндә нә баш верир?
Аллаһ гејдимизә галырмы?
4, 5. Инсанлар нә үчүн Аллаһын гејдимизә галмадығыны дүшүнүрләр?
4 Ҝәлин, биринҹи суала диггәт јетирәк. Аллаһ бизим гејдимизә галырмы? Тәәссүф ки, чохлары бу суала «јох» ҹавабы верир. Онлар нијә белә фикирләширләр? Сәбәбләрдән бири одур ки, јашадығымыз дүнја нифрәт, әдавәт вә изтирабларла долудур. Инсанлар белә мүлаһизә јүрүдүрләр: «Әҝәр Аллаһ доғрудан да гејдимизә галсајды, дүнјанын вәзијјәти бу јерә ҝәлиб чыхмазды».
5 Бундан башга, инсанларда белә тәәссүратын јаранмасынын сәбәбкары дин хадимләридир. Бәдбәхтлик үз верәндә онлар адәтән нә дејирләр? Автомобил гәзасында ики ушағыны итирән бир гадына кешиш тәсәлли верәрәк демишди: «Аллаһын һөкмү белә иди. Она ҝөјдә даһа ики мәләк лазым олду». Дин хадимләри белә изаһат вермәклә бәдбәхтликләрдә Аллаһы ҝүнаһландырмыш олурлар. Анҹаг шаҝирд Јагубун гәләмә алдығы сөзләрә диггәт јетирин: «Имтаһан олунан заман, гој һеч ким: “Аллаһ мәни имтаһан едир”, — демәсин. Чүнки Аллаһ писликлә имтаһан олунмур вә Өзү дә һеч кими имтаһан етмир» (Јагуб 1:13). Бәли, һәгиги Аллаһ Јеһова һеч вахт һеч кимә пислик етмир (Әјјуб 34:10).
6. Дүнјадакы пислијин вә әзабларын сәбәбкары кимдир?
6 Әҝәр беләдирсә, бәс онда нәјә ҝөрә дүнја пислик вә әзабларла долудур? Сәбәбләрдән бири одур ки, бәшәријјәт Аллаһын әдаләтли ганун вә принсипләринә хор бахараг Ону бир Рәһбәр кими рәдд етмишдир. ‘Бүтүн дүнја шәририн һакимијјәти алтында’ олдуғу үчүн инсанлар өзләринин дә хәбәри олмадан Аллаһын дүшмәни Шејтана бојун әјибләр (1 Јәһја 5:19). Беләликлә, дүнјанын нә үчүн бәрбад вәзијјәтдә олдуғуну баша дүшмәк чәтин дејил. Шејтан пис, мәнфур, јаланчы вә гәддардыр. Ајдын мәсәләдир ки, дүнја өз рәһбәринин хасијјәтини мәнимсәјиб. Буна ҝөрә дә, пислијин ҝениш јајылмасы тәәҹҹүб доғурмур!
7. Изтирабларын сәбәбләриндән бә’зиләри һансылардыр?
7 Инсанын гејри-камиллији әзабларын диҝәр сәбәбидир. Ҝүнаһлы инсанлар һакимијјәт уғрунда мүбаризә апармаға мејлли олдуглары үчүн мүһарибәләр, зүлм вә әзаблар гачылмаздыр. Бу һагда Ваиз 8:9 ајәсиндә јахшы јазылыб: «Бир нәфәрин башга адама ағалыг етмәси башына бәла олур». Башга бир сәбәб «вахт вә тәсадүф»дүр (Ваиз 9:11, КМ). Јә’ни инсанларын башына бәдбәхтлик она ҝөрә ҝәлир ки, онлар мүнасиб олмајан вахтда мүнасиб олмајан јердә олурлар.
8, 9. Јеһованын һәгигәтән дә гајғымыза галдығыны һарадан билирик?
8 Әзабларын Јеһовадан олмадығыны билмәк чох тәсәлливериҹидир. Бәс һәјатымызда баш верәнләр Аллаһы һәгигәтән дә марагландырырмы? Бу суалын үрәк ачан ҹавабы «бәли»дир! Јеһованын бизим гајғымыза галмасы ондан бәллидир ки, О, Кәламы васитәсилә бәшәријјәтә нә үчүн өз јанлыш јолу илә ҝетмәјә иҹазә вердијини ачыглајыр. Бунун ики сәбәби вар: Онун али һакимијјәти вә инсанларын нөгсансызлығы. Јеһова һәр шејә гадир Јарадан олдуғундан әзаблара нә үчүн јол вердијини ачыгламаға борҹлу дејил. Анҹаг О, гајғымыза галдығы үчүн буну едир.
9 Ҝәлин, Аллаһын бизә лагејд јанашмадығыны ҝөстәрән диҝәр сүбуту нәзәрдән кечирәк. Нуһун ҝүнләриндә јер үзүндә пислик баш алыб ҝедәндә Јеһова «үрәјиндә кәдәрләнди» (Јарадылыш 6:5, 6). Бәс буҝүнкү писликләр Ону кәдәрләндирирми? Бәли, чүнки Аллаһ дәјишилмир (Малаки 3:6). О, әдаләтсизлијә нифрәт едир вә әсла инсанларын изтираб чәкмәсини истәмир. Мүгәддәс Китаб өјрәдир ки, Аллаһ тезликлә инсан һакимијјәтинин вә Иблисин ҝәтирдији зәрәри арадан галдыраҹаг. Мәҝәр бу, Аллаһын гајғымыза галдығына инандырыҹы сүбут дејилми?
10. Инсанларын изтирабы Јеһовада һансы һиссләри доғурур?
10 Дин рәһбәрләри фаҹиәләри Аллаһын һөкмүнә јазараг Онун һаггында сәһв тәсәввүрләр јарадырлар. Әслиндә исә Јеһова инсанларын изтирабларына сон гојмағы арзулајыр. 1 Петер 5:7 ајәсиндә дејилир ки, Аллаһ бизим ‘гајғымыза галыр’. Бәли, Мүгәддәс Китаб әслиндә мәһз буну өјрәдир!
Биз нә үчүн бурадајыг?
11. «Биз нә үчүн бурадајыг?» суалына дүнјадакы динләр неҹә ҹаваб верир?
11 Инди исә чохларыны нараһат едән «биз нә үчүн бурадајыг?» суалына нәзәр салаг. Дүнјадакы динләрин ҹавабы ондан ибарәтдир ки, инсанлар јер үзүндә гонагдырлар. Онларын фикринҹә, Јер күрәсиндәки һәјат һансыса башга бир дүнјаја кечиддир. Бә’зи дин хадимләри јанлыш олараг өјрәдирләр ки, Аллаһ бир ҝүн планетимизи мәһв едәҹәк. Бу тә’лимләрин нәтиҹәсиндә бир чох инсанлар белә гәнаәтә ҝәлирләр: «Онсуз да өләҹәјик, нә гәдәр ки бу дүнјадајам, јахшысы будур, јејиб-ичиб кеф едим». Бәс Мүгәддәс Китаб бизим бурада олмағымызын сәбәби һагда әслиндә нә өјрәдир?
12-14. Аллаһын Јер күрәсинә вә инсанлара даир нијјәти барәдә Мүгәддәс Китаб нә өјрәдир?
12 Аллаһын Јер күрәси вә бәшәријјәтә даир чох ҝөзәл нијјәти вардыр. О, Јери «бошуна» дејил, «үзәриндә јашанылсын дејә» јарадыб (Јешаја 45:18, КМ). Үстәлик, Јеһова онун ‘тәмәлини елә гуруб ки, әсла сарсылмасын’ (Мәзмур 104:5). Аллаһын бу нијјәтини өјрәнәрәк нә үчүн бурада олдуғумузу баша дүшәҹәјик.
13 «Јарадылыш» китабынын 1 вә 2-ҹи фәсилләриндә тәсвир олунур ки, Јеһова инсанларын јашамасы үчүн јердә һәр ҹүр шәраит јаратмышды. Јарадылышын сонунда Аллаһ, Јер күрәси дә дахил олмагла, ‘һәр шејин чох јахшы’ олдуғуну деди (Јарадылыш 1:31). Аллаһ Адәмлә Һәвваны ҝөзәл Еден бағында јерләшдирәрәк онлары бол-бол кејфијјәтли гида илә тә’мин етди. О, илк киши вә гадына деди: «Төрәјиб чохалын вә јер үзүнү бүрүјүб она саһиб олун». Онлар камил өвладлар дүнјаја ҝәтирмәли, Еден бағынын һүдудларыны бүтүн јер үзү Ҹәннәтә чевриләнәдәк ҝенишләндирмәли вә һејванларын үзәриндә мәһәббәтлә һөкмранлыг етмәли идиләр (Јарадылыш 1:26-28).
14 Јеһованын нијјәти о иди ки, јердә камил инсан аиләси әбәди сакин олсун. Аллаһын Кәламы дејир: «Салеһләр өлкәни [јери] мүлк олараг алаҹаг, онлар орада әбәди мәскән салаҹаг» (Мәзмур 37:29). Бәли, инсанлар Јер күрәсиндәки Ҹәннәтдә әбәди јашамалы идиләр. Аллаһын нијјәти будур вә Мүгәддәс Китаб әслиндә мәһз буну өјрәдир!
Инсан өләндә нә баш верир?
15. Динләрин әксәријјәти өлүмдән сонра баш верәнләр һагда нә өјрәдир?
15 Инди исә ҝәлин, инсанларын нараһатчылығына сәбәб олан үчүнҹү суалы нәзәрдән кечирәк. Инсан өләндә нә баш верир? Әксәр динләр өјрәдир ки, инсанын дахилиндә олан өлмәз бир шеј бәдән өләндән сонра јашамаға давам едир. Бә’зи дини груплар һәлә дә инанырлар ки, Аллаһ пис инсанлары одлу ҹәһәннәмдә әбәди әзаба мәһкум едәрәк онлара ҹәза верир. Анҹаг бу һәгигәтдирми? Әслиндә Мүгәддәс Китаб өлүләрин вәзијјәти һаггында нә өјрәдир?
16, 17. Мүгәддәс Китаб өлүләрин вәзијјәти һаггында нә дејир?
16 Аллаһын Кәламында дејилир: «Дириләр өләҹәкләрини билир, анҹаг өлүләр һеч нә билмир. Онлара даһа һеч вахт әвәз верилмәјәҹәк [«артыг онларын алаҹағы јохдур», КМ]». ‘Өлүләр һеч нә билмәдикләри’ үчүн онлар ешитмир, ҝөрмүр, данышмыр, һисс етмир вә дүшүнмүр. Онларын артыг алаҹағы да јохдур. Өлүләр һеч бир иш ҝөрә билмирләрсә, алаҹаглары һарадан олсун?! Бундан башга, өләнләрин «севҝиси, нифрәти, пахыллығы артыг мәһв олуб», чүнки онлар һеч бир һисс кечирмирләр (Ваиз 9:5, 6, 10).
17 Мүгәддәс Китаб бу барәдә садә вә ајдын дејир — өлүләр һарадаса јашамаға давам етмирләр. Инсан өләндә һеч нә онун бәдәнини тәрк едәрәк башга бәдәндә доғулуб јашамыр. Буну бир әјани нүмунә әсасында изаһ етмәк олар: һәјатымыз шамын аловуна бәнзәјир. Шам сөнәндә алов башга јердә јанмаға давам етмир, о, садәҹә олараг јох олур.
18. Инсан өлүләрин вәзијјәти һаггында һәгигәти өјрәнәндә нәји дәрк едир?
18 Ҝөрүн бу садә һәгигәт инсанларын һәјатына неҹә бөјүк тә’сир ҝөстәрир. Инсан Мүгәддәс Китабдан өлүләрин вәзијјәти һаггында һәгигәти өјрәнәндә асанлыгла баша дүшүр ки, һәјатдан көчән ата-бабасы сағ икән нә гәдәр аҹыглы олсајдылар да, артыг ону нараһат едә билмәзләр. О, һәмчинин дәрк едир ки, өлән әзизләри артыг нә ешидир, нә ҝөрүр, нә данышыр, нә һисс едир, нә дә ки дүшүнүрләр. Буна ҝөрә дә, онлар нә ә’рафда, нә дә ҹәһәннәмин гыр газанында әзаб чәкмирләр. Мүгәддәс Китаб өјрәдир ки, Аллаһын јаддашында олан өлүләри дирилмә ҝөзләјир. Бу неҹә дә ҝөзәл үмиддир! (Јәһја 5:28, 29).
Јени китаб
19, 20. Бир мәсиһчи кими үзәримизә һансы мәс’улијјәт дүшүр вә хидмәтимиз үчүн хүсусилә фајдалы олаҹаг һансы китаб нәшр едилиб?
19 Биз инсанлары нараһат едән јалныз үч суалы нәзәрдән кечирдик. Ҝөрдүјүмүз кими, Мүгәддәс Китабын бу суаллара вердији ҹаваб садә вә ајдындыр. Мүгәддәс Китабын нә өјрәтдијини билмәк истәјән инсанларла һәгигәти бөлүшмәк неҹә дә бөјүк севинҹдир! Лакин сәмими инсанларын ҹаваб тапмаг истәдији башга ваҹиб суаллар да вардыр. Бир мәсиһчи кими бу ишдә онлара көмәк етмәк бизим борҹумуздур.
20 Мүгәддәс Китаб һәгигәтләрини ајдын вә инсанларын үрәјинә тә’сир едәҹәк тәрздә өјрәтмәк асан дејил. Бу ишин өһдәсиндән ҝәлмәјимиз үчүн «садиг вә ағыллы гул» јени китаб һазырлајыб (Матта 24:45-47). Хүсусилә дә хидмәтдә истифадә етмәјимиз үчүн нәзәрдә тутулан 224 сәһифәли бу нәшр «Мүгәддәс Китаб әслиндә нә өјрәдир?» адланыр.
21, 22. «Мүгәддәс Китаб әслиндә нә өјрәдир?» китабынын бә’зи диггәтәлајиг ҹәһәтләри һансылардыр?
21 Јеһованын Шаһидләринин 2005-ҹи илдә кечирилән «Аллаһа итаәткарлыг» адлы вилајәт конгресиндә тәгдим олунан бу китаб бир чох диггәтәлајиг ҹәһәтләрә маликдир. Мәсәлән, беш сәһифәлик ҝиришин көмәјилә асанлыгла Мүгәддәс Китаб өјрәнмәсинә башламаг олар. Һәмчинин бурадакы шәкилләри вә ајәләри мүзакирә етмәк асандыр. Һәмин һиссәдә Мүгәддәс Китаб фәсилләрини вә ајәләрини асанлыгла тапмағын јолу ҝөстәрилир.
22 Китабын јазылыш үслубу садә вә ајдындыр. Бу китаб елә тәртиб олунуб ки, өјрәнәни мүзакирәјә ҹәлб етмәклә онун үрәјинә јол тапмаг асандыр. Һәр фәслин әввәлиндә бир нечә суал, сонунда исә «Мүгәддәс Китабын өјрәтдикләри» адлы чәрчивә вар. Чәрчивәдә фәслин әввәлиндә верилән суаллара Мүгәддәс Китаба әсасланан ҹаваблар јазылыб. Ҝөзәл шәкилләр, шәкилалты имзалар, һәмчинин әјани мисаллар јени фикирләри асанлыгла гаврамаға көмәк едир. Фәсилләрдәки материал садәдир, амма өјрәнәнә әлавә мә’лумат вермәк лазым ҝәләрсә, 14 ваҹиб мөвзуну даһа дәриндән арашдыран «Әлавәләр» бөлмәсинә мүраҹиәт етмәк олар.
23. «Мүгәддәс Китаб өјрәдир» китабыны истифадә етмәјә даир һансы мәсләһәтләр верилир?
23 «Мүгәддәс Китаб өјрәдир» китабы мүхтәлиф тәһсилли вә ҹүрбәҹүр динләрдән олан инсанлара көмәк етмәк үчүн һазырланыб. Әҝәр Мүгәддәс Китабы өјрәнән инсанын Аллаһын Кәламы һаггында һеч бир мә’луматы јохдурса, бир фәсли бир нечә һиссәјә бөлмәк олар. Материалы тез кечмәјә гаршына мәгсәд гојма, өјрәнәнин үрәјинә јол тапмаға чалыш. Әҝәр о, китабдакы әјани мисалы баша дүшмүрсә, ону изаһ ет вә ја башга нүмунә ҝәтир. Јахшы һазырлаш, китабдан мәһарәтлә истифадә ет, ‘һәгигәт сөзүнү доғрулугла өјрәтмәк’ үчүн Аллаһ дуа ет (2 Тимотејә 2:15).
Сәнә ҝөстәрилән шәрәфә ҝөрә миннәтдар ол
24, 25. Јеһова халгыны һансы шәрәфә лајиг ҝөрүб?
24 Јеһова Өз халгыны тајы-бәрабәри олмајан шәрәфә лајиг ҝөрүб. О бизә Өзү һаггында һәгигәти өјрәнмәк имканыны вериб. Буна һеч вахт нашүкүр јанашмамалыјыг. Аллаһ нијјәтини мәғрур инсанлардан ҝизләдиб тәвазөкарлара ачды. Бу һагда Иса деди: «Еј ҝөјүн вә јерин Рәбби олан Ата, шүкүр едирәм Сәнә ки, бу шејләри мүдрикләрдән вә ағыллылардан ҝизләдиб, көрпәләрә ачдын» (Матта 11:25). Каинатын Һөкмдары Јеһоваја хидмәт едән тәвазөкар инсанларын сырасында олмаг неҹә дә надир үстүнлүкдүр!
25 Биз, һәмчинин Аллаһ һаггында һәгигәти башга инсанлара өјрәтмәк шәрәфинә лајиг ҝөрүлмүшүк. Унутма ки, дин хадимләри јалан тә’лимләри јајараг Јеһованы инсанлара јанлыш танытмышлар. Буна ҝөрә дә, чохлары Јеһованы лагејд, дашүрәкли Аллаһ һесаб едир. Бәс сән инсанлара сәһв фикирләрдән азад олмагда көмәк етмәји арзулајырсанмы? Сән истәјирсәнми ки, бүтүн сәмими инсанлар Аллаһ һаггында һәгигәти билсинләр? Әҝәр беләдирсә, сә’јлә тәблиғ едәрәк вә Мүгәддәс Китабын ваҹиб мәсәләләрә даир нә өјрәтдијини башгалары илә бөлүшәрәк Аллаһа итаәт етдијини ҝөстәр. Һәгигәти ахтаранларын Мүгәддәс Китабын әслиндә нә өјрәтдијини билмәјә еһтијаҹы вар.
Неҹә ҹаваб верәрдиниз?
• Аллаһын гејдимизә галдығыны һарадан билирик?
• Биз нә үчүн јер үзүндә јашајырыг?
• Инсан өләндә нә баш верир?
• «Мүгәддәс Китаб өјрәдир» китабынын һансы ҹәһәтләри сәнин хүсусилә хошуна ҝәлир?
[9-ҹу сәһифәдәки шәкил]
Салеһләр Ҹәннәтдә әбәди јашајаҹаглар.
[10-ҹу сәһифәдәки шәкилләр]
Мүгәддәс Китаб өјрәдир ки, изтираблар битәҹәк.
[Иҹазә илә]
Јухарыда сағда, гыз: © Bruno Morandi/age fotostock; солда, гадын: AP Photo/Gemunu Amarasinghe; ашағыда сағда, гачгынлар: © Sven Torfinn/Panos Pictures