Инсанлара Мүгәддәс Китабын тә’лимләринә әмәл етмәјә көмәк един
«Бәрәкәтли торпаг үзәринә дүшәнләр исә онлардыр ки, кәламы ешидиб, садиг вә тәмиз үрәкдә сахлајырлар вә сәбрлә сәмәрә верирләр» (ЛУКА 8:15).
1, 2. а) «Мүгәддәс Китаб әслиндә нә өјрәдир?» китабы һансы мәгсәдлә нәшр олунуб? б) Өтән ики ил әрзиндә Јеһова халгынын шаҝирд һазырламаг ишиндә ҝөстәрдији сә’јә неҹә хејир-дуа вериб?
«КИТАБА сөз ола билмәз. Мүгәддәс Китабы өјрәтдијим инсанларын о чох хошуна ҝәлир. Елә мәним дә үрәјимҹәдир. Онун көмәјилә дүз гапынын ағзында асанлыгла өјрәнмәјә башламаг олур». Бу, Јеһованын Шаһидләринин таммүддәтли хидмәтчиләриндән биринин «Мүгәддәс Китаб әслиндә нә өјрәдир?»a китабы һаггында дедији сөзләрдир. Хош хәбәри чохдан тәблиғ едән бир гардаш исә дејир: «Тәблиғ етдијим бу әлли ил әрзиндә бир чохларына Јеһованы танымаға көмәк етмишәм. Анҹаг бу китаб кими өјрәнмә вәсаити һәлә олмамышды. Ҝөзәл әјани нүмунәләрә вә мисаллара һеч сөзүм јохдур». Бәс сән бу китаб һаггында нә фикирләширсән? «Мүгәддәс Китаб өјрәдир» китабы Исанын «ҝедин, бүтүн халглары шаҝирдим един... Сизә әмр етдијим һәр шејә риајәт етмәји онлара өјрәдин» тапшырығыны јеринә јетирмәјә көмәк етмәк үчүн нәшр олунуб (Матта 28:19, 20).
2 Шүбһәсиз, тәхминән 6,6 милјон Шаһидин Исанын тапшырығыны һәвәслә јеринә јетирмәси Јеһованы севиндирир (Сүлејманын мәсәлләри 27:11). Ајдындыр ки, Јеһова онларын сә’јләринә хејир-дуа верир. 2005-ҹи хидмәт или әрзиндә мүждә 235 өлкә вә әразидә тәблиғ олунуб, орта һесабла 6 061 500 Мүгәддәс Китаб өјрәнмәси кечирилиб. Бунун сајәсиндә бир чох инсанлар Аллаһын кәламыны ешидиб ‘ону бәшәри сөз олараг дејил, әслиндә олдуғу кими, Аллаһын кәламы олараг гәбул етмишләр’ (1 Салониклиләрә 2:13). Өтән ики ил әрзиндә јарым милјондан чох јени шаҝирд һәјатыны Јеһованын нормаларына ујғунлашдырмыш вә өзүнү Аллаһа һәср етмишдир.
3. Мүзакирәмиз һансы суаллар әтрафында гурулаҹаг?
3 Сән киминләсә Мүгәддәс Китаб өјрәнмәси апарырсанмы? Бүтүн дүнјада садиг вә тәмиз үрәкли инсанлар һәлә дә вардыр. Онлар Аллаһын Кәламыны ешидәндә ону ‘сахлајыб, сәбрлә сәмәрә верәҹәкләр’ (Лука 8:11-15). Ҝәлин ҝөрәк «Мүгәддәс Китаб өјрәдир» китабындан шаҝирдләр һазырламаг ишиндә неҹә истифадә едә биләрик. Мүзакирәмиз үч суал әтрафында гурулаҹаг: 1) Мүгәддәс Китаб өјрәнмәсинә неҹә башламаг олар? 2) Һансы тә’лим методлары ән еффективдир? 3) Мүгәддәс Китабы өјрәнән инсана јалныз шаҝирд јох, һәм дә Аллаһын Кәламынын мүәллими олмаға неҹә көмәк етмәк олар?
Мүгәддәс Китаб өјрәнмәсинә неҹә башламаг олар?
4. Нәјә ҝөрә бә’зи инсанлар Мүгәддәс Китабы өјрәнмәјә тәрәддүд едирләр вә онлара неҹә көмәк етмәк олар?
4 Әҝәр сәнә чајы бир аддыма тулланыб кечмәји тәклиф етсәјдиләр, ола билсин, бојун гачырардын. Анҹаг чајын бир саһилиндән о бири саһилинәдәк дашлар дүзүлсәјди, бәлкә дә, чајы кечмәјә разылашардын. Ејнилә, мәшғул инсан Мүгәддәс Китаб өјрәнмәсинә башламаға тәрәддүд едә биләр. Она елә ҝәлә биләр ки, бунун үчүн чох вахт вә гүввә тәләб олунур. Бәс она неҹә көмәк етмәк олар? Һәр тәкрар башчәкмә заманы «Мүгәддәс Китаб өјрәдир» китабына әсасланан гыса мүзакирәләр етмәклә мүнтәзәм өјрәнмәјә јол ачмаг олар. Әҝәр јахшы һазырлашсан, һәр тәкрар башчәкмә, һәмин адамын Јеһоваја јахынлашмасы үчүн чајын бир саһилиндән о бирисинәдәк дүзүлән дашлара бәнзәјәҹәк.
5. Нә үчүн «Мүгәддәс Китаб өјрәдир» китабыны охумағын јахшы оларды?
5 Кимәсә «Мүгәддәс Китаб өјрәдир» китабыны кечмәздән әввәл сән өзүн бу нәшрлә јахшы таныш олмалысан. Китабы башдан ахыра кими охумусанмы? Бир әр-арвад мә’зунијјәтә ҝедәндә китабы өзләри илә ҝөтүрмүшдүләр. Саһилдә динҹәләркән ону охумаға башладылар. Туристләрә мал сатан гадын онлара јахынлашанда ҝөзү китабын адына саташды. Гадын үрәјини ачыб деди ки, ҹәми бир нечә саат әввәл о, дуада Аллаһа мәһз китабын үзүндәки суалы вермишди. Онлар севинҹлә китабы гадына һәдијјә етдиләр. Бәс сән вахты сатын алараг, нөвбәдә дураркән, мәктәбдә вә ја ишдә фасилә заманы бу китабы икинҹи дәфә олса белә охујурсанмы? (Ефеслиләрә 5:15, 16). Белә етмәклә бу өјрәнмә вәсаити илә јахшы таныш ола, һәмчинин башгалары илә онун әсасында сөһбәтә башлаја биләрсән.
6, 7. «Мүгәддәс Китаб өјрәдир» китабы илә өјрәнмәјә неҹә башламаг олар?
6 Китабы тәблиғдә кимәсә тәклиф едәндә 4, 5 вә 6-ҹы сәһифәләрдәки шәкилләрдән, ајәләрдән вә суаллардан истифадә ет. Мәсәлән, сөһбәтә белә башлаја биләрсән: «Бәшәријјәтин бу ҝүн үз-үзә ҝәлдији проблемләри нәзәрә алсаг, сизин фикринизҹә, е’тибарлы рәһбәрлији һарадан тапа биләрик?». Һәмсөһбәтинин ҹавабыны диггәтлә динләјәндән сонра 2 Тимотејә 3:16, 17 ајәләрини оху вә проблемләрин һәллинин Мүгәддәс Китабда јазылдығыны изаһ ет. Сонра 4 вә 5-ҹи сәһифәләри ачыб соруш: «Бурада ҝөстәрилән проблемләрдән һансы сизи даһа чох нараһат едир?». Онун ҹавабындан сонра китабы она вер ки, сән Мүгәддәс Китабдан мүвафиг ајәни охујуб гуртарана гәдәр тутсун. Сонра 6-ҹы сәһифәни оху вә һәмсөһбәтиндән соруш: «Бу алты суалдан һансына ҹаваб тапмаг истәјәрдиниз?». О, бирини сечәндә һәмин суала ҹаваб верән фәсли ҝөстәриб, китабы она вер. Суалы мүзакирә етмәк үчүн нөвбәти ҝөрүшү тә’јин ет.
7 Тәгдимә тәхминән беш дәгигә чәкәҹәк. Анҹаг бу вахт әрзиндә сән һәмсөһбәтини нараһат едән проблеми өјрәнәҹәк, ики ајә охујуб ону изаһ едәҹәк вә тәкрар башчәкмә үчүн тәмәл гојаҹагсан. Бу гыса сөһбәт онун ахыр вахтларда етдији ән руһландырыҹы вә ән тәсәлливериҹи сөһбәт ола биләр. Еһтимал ки, о, нә гәдәр мәшғул олса да, нөвбәти ҝәлишини сәбирсизликлә ҝөзләјәҹәк вә сәнин ‘һәјата апаран јолда’ јени аддым атмаг үчүн она көмәк етмәк имканын олаҹаг (Матта 7:14). Ев саһибинин марағы артдыгҹа өјрәнмәнин вахтыны да узатмаг лазымдыр. Бунун үчүн она өјрәнмәни ев шәраитиндә, бир гәдәр чох вахт әрзиндә кечирмәји тәклиф етмәк олар.
Еффектив тә’лим методлары
8, 9. а) Өјрәнәни манеә вә сынаглара неҹә һазырламаг олар? б) Мөһкәм иманы инша етмәк үчүн одадавамлы материаллары һарадан тапа биләрсән?
8 Инсан Мүгәддәс Китабдан өјрәндикләрини һәјатында тәтбиг етмәјә башлајанда еһтимал ки, о, руһани инкишафыны ләнҝидән манеәләрлә үзләшәҹәк. Һәвари Павел демишди: «Аллаһ јолунда Мәсиһ Исаја бағлы олараг јашамаг истәјәнләрин һамысы да тә’гибә мә’руз галаҹагдыр» (2 Тимотејә 3:12). Павел бу сынаглары кејфијјәтсиз тикинти материаллары күлә дөндәрән, лакин гызыл, ҝүмүш вә гијмәтли дашлар кими материаллара зәрәр вура билмәјән одла мүгајисә етди (1 Коринфлиләрә 3:10-13; 1 Петер 1:6, 7). Одадавамлы материаллардан тикәрәк өјрәнәнә үзләшәҹәји сынаглара мәтанәтлә таб ҝәтирмәк үчүн лазым олан кејфијјәтләри инкишаф етдирмәјә көмәк ет.
9 Мәзмурчу «Рәббин кәламлары»ны «күрәдә әридилән, једди дәфә тәмизләнән ҝүмүш»ә бәнзәдир (Мәзмур 12:6). Бәли, мөһкәм иманын иншасында истифадә олунан бүтүн гијмәтли материаллары Мүгәддәс Китабда тапмаг олар (Мәзмур 19:7-11; Сүлејманын мәсәлләри 2:1-6). «Мүгәддәс Китаб өјрәдир» китабы ајәләрдән еффектив сурәтдә истифадә етмәји өјрәдир.
10. Өјрәнәнин диггәтини Мүгәддәс Китаба неҹә јөнәлдә биләрсән?
10 Өјрәнмә заманы өјрәнәнин диггәтини фәсилдәки ајәләрә јөнәлт. Дүшүндүрүҹү суаллар верәрәк өјрәнәнә әсас ајәләри баша дүшмәјә вә шәхсән өзүнә тәтбиг етмәјә көмәк ет. Она нә етмәк лазым олдуғуну демә. Исадан нүмунә ҝөтүр. Гануну јахшы билән бир нәфәр Исаја суал верәндә о деди: «Ганунда нә јазылыб? Неҹә охујурсан?». Һәмин адам Мүгәддәс Јазылардан ҹаваб верәндә Иса бир мәсәл чәкәрәк ајәдәки принсипи баша дүшмәјә вә ону шәхсән өзүнә неҹә тәтбиг едә биләҹәјини ҝөрмәјә көмәк етди (Лука 10:25-37). «Мүгәддәс Китаб өјрәдир» китабында бир чох садә әјани мисаллар вар. Онлардан истифадә едәрәк өјрәнәнә Мүгәддәс Китаб принсипләринин шәхсән она неҹә аид олдуғуну ҝөстәр.
11. Һәр дәрсдә нә гәдәр материал кечмәк лазымдыр?
11 Иса мүрәккәб фикирләри садә сөзләрлә чатдырдығы кими, «Мүгәддәс Китаб өјрәдир» китабында да Аллаһын Кәламы садә вә ајдын тәрздә изаһ едилир (Матта 7:28, 29). Сән дә Исадан нүмунә ҝөтүрәрәк фикирләри садә, ајдын вә дүзҝүн тәрздә чатдыр. Материалы тез-тәләсик кечмәјә чалышма. Һәр дәфә нечә абзас кечәҹәјини мүәјјән едәндә шаҝирдин габилијјәтини вә вәзијјәтини нәзәрә ал. Иса шаҝирдләринин имканларыны билирди вә онлара һәмин вахт лазым оландан артыг мә’лумат вермирди (Јәһја 16:12).
12. «Әлавәләр»дән неҹә истифадә етмәк лазымдыр?
12 «Мүгәддәс Китаб өјрәдир» китабында 14 мөвзудан ибарәт «Әлавәләр» бөлмәси вар. Сәнә бир мүәллим кими, өјрәнәнин тәләбатларыны нәзәрә алараг, материалы неҹә кечәҹәјини мүәјјән етмәк лазымдыр. Мәсәлән, ола биләр ки, о, әввәлки дини е’тигадына ҝөрә һансыса мөвзуну чәтин гаврајыр вә ја онда чохлу суаллар јараныр. Бә’зи һалларда бөлмәнин мүвафиг мөвзусуну она ҝөстәрмәк олар ки, өзү тәк арашдырсын. Диҝәр тәрәфдән исә, өјрәнәнин тәләбатларыны нәзәрә алдыгдан сонра, һәмин мөвзуну онунла бирликдә арашдырмаг гәрарына ҝәлә биләрсән. Бу бөлмәдә «“Ҹан” вә “руһ” анлајышларынын мә’насы нәдир?», «“Бөјүк Бабил” нәдир?» кими ваҹиб мөвзулар нәзәрдән кечирилир. Ола биләр, бу мөвзулары өјрәнәнлә мүзакирә етмәк истәјәсән. «Әлавәләр»дә суаллар јохдур, буна ҝөрә дә, мә’налы суаллар тәртиб етмәк үчүн сән өзүн орадакы мә’луматла јахшы таныш олмалысан.
13. Иманын мөһкәмләнмәсиндә дуа һансы ролу ојнајыр?
13 Мәзмур 127:1 ајәсиндә дејилир: «Еви Рәбб тикмәзсә, бәнналарын зәһмәти боша ҝедәр». Өјрәнмәјә башламаздан әввәл Јеһоваја көмәк үчүн дуа ет. Гој һәр дәрсин әввәлиндәки вә сонундакы дуаларындан Јеһова илә мүнасибәтләринин јахын вә сәмими олдуғу һисс олунсун. Өјрәнәни Јеһовадан Кәламыны баша дүшмәк үчүн һикмәт вә мәсләһәтләринә риајәт етмәк үчүн ҝүҹ истәмәјә тәшвиг ет (Јагуб 1:5). Әҝәр о белә етсә, сынаглара таб ҝәтирә биләҹәк вә иманы ҝетдикҹә мөһкәмләнәҹәк.
Өјрәнәнә Мүгәддәс Китаб мүәллими олмаға көмәк ет
14. Мүгәддәс Китабы өјрәнәнләр һансы аддымы атмалыдырлар?
14 Әҝәр Мүгәддәс Китабы өјрәтдијимиз адам Исанын тапшырдығы «һәр шејә» әмәл етмәлидирсә, онда о, тәкҹә өјрәнмәклә кифајәтләнмәмәли, һәм дә Аллаһын Кәламынын мүәллими олмалыдыр (Матта 28:19, 20; Һәвариләрин ишләри 1:6-8). Бу мәгсәдә доғру руһани инкишаф етмәкдә она неҹә көмәк едә биләрсән?
15. Мүгәддәс Китабы өјрәнәнләри нә үчүн мәсиһчи ҝөрүшләринә ҝәлмәјә тәшвиг етмәк лазымдыр?
15 Елә илк дәрсдән өјрәнәни јығынҹаг ҝөрүшләринә дә’вәт ет. Она изаһ ет ки, мәһз ҝөрүшләрдә Аллаһын Кәламынын мәһарәтли мүәллими олмаг үчүн лазыми тә’лим верилир. Бир нечә һәфтә әрзиндә һәр дәрсин сонунда ҝөрүшләр вә конгресләрдә верилән руһани тә’лим програмы һаггында данышмаға вахт ајыр. Бунун сәнә ҝәтирдији фајдадан шөвглә даныш (Ибраниләрә 10:24, 25). Мүгәддәс Китабы өјрәнән адам ҝөрүшләрдә мүнтәзәм иштирак едәрсә, чох еһтимал ки, о, Аллаһын Кәламынын мүәллими олаҹаг.
16, 17. Өјрәнән гаршысына һансы әлчатан мәгсәдләр гоја биләр?
16 Өјрәнәнә гаршысына әлчатан мәгсәдләр гојмаға көмәк ет. Мәсәлән, ону тәшвиг ет ки, өјрәндикләрини дост-танышлары илә бөлүшсүн вә ја Мүгәддәс Китабы башдан ахыра кими охусун. Әҝәр о, инди Аллаһын Кәламыны һәр ҝүн охуса, бу вәрдиш она вәфтиздән сонра да узунмүддәтли фајда ҝәтирәҹәк. Бундан башга, нәјә ҝөрә шаҝирдә һәр фәслин әсас суалына ҹаваб верән һеч олмаса бир ајәни јадда сахламағы тәклиф етмәјәсән? Бу мәсләһәтләрә риајәт етсән о, «утанмаға әсасы олмајан вә һәгигәт сөзүнү доғрулугла өјрәдән бир ишчи» олаҹаг (2 Тимотејә 2:15).
17 Өјрәнәнә садәҹә олараг ајәни әзбәрләмәји вә ја ону өз сөзләри илә сөјләмәји өјрәтмә. Иманы барәсиндә ондан һесабат истәјәнләрә ҹаваб верән заман олдуғу кими, гој о, ајәнин мүзакирә олунан мөвзу илә бағлылығыны изаһ етсин. Сән ондан иманыны изаһ етмәји хаһиш едән гоһуму вә ја иш јолдашы ролунда чыхыш едә биләрсән. Белә гыса мәшгләрин фајдасы дәјә биләр. Өјрәнәнә «мүлајимликлә вә еһтирамла» ҹаваб вермәји өјрәт (1 Петер 3:15).
18. Мүгәддәс Китабы өјрәнән адам вәфтиз олунмамыш тәблиғчи оланда она даһа неҹә көмәк едә биләрсән?
18 Мүәјјән вахтдан сонра ола билсин ки, өјрәнән тәблиғчи үчүн тәләбләрә ҹаваб верәҹәк. Онунла сөһбәтдә вурғула ки, хидмәтдә иштирак етмәјә иҹазә верилмәси бөјүк шәрәфдир (2 Коринфлиләрә 4:1, 7). Ағсаггаллар өјрәнәнин вәфтиз олунмамыш тәблиғчи үчүн тәләбләрә ҹаваб вердијини мүәјјән етдикдә, она садә тәгдимә һазырламаға көмәк ет вә бирликдә хидмәтә ҝедин. Јени тәблиғчи илә хидмәтин мүхтәлиф нөвләриндә иштирак ет, һәмчинин она тәкрар башчәкмәјә һазырлашмағы вә тәкрар башчәкмә етмәји өјрәт. Сәнин јахшы нүмунән она мүсбәт тә’сир ҝөстәрәҹәк (Лука 6:40).
‘Һәм өзүнү, һәм дә сәнә гулаг асанлары хилас ет’
19, 20. Гаршымыза һансы мәгсәди гојмалыјыг вә нә үчүн?
19 Сөзсүз ки, инсанын ‘һәгигәти дәрк етмәси’ үчүн биздән чохлу сә’ј тәләб олунур (1 Тимотејә 2:4). Анҹаг һәјатда аз шеј бизә Мүгәддәс Китаб тә’лимләрини өјрәтмәкдән алдығымыз гәдәр севинҹ бәхш едә биләр (1 Салониклиләрә 2:19, 20). Бәли, үмумдүнја тә’лим ишиндә ‘Аллаһын әмәкдашлары’ олмаг бизим үчүн бөјүк шәрәфдир! (1 Коринфлиләрә 3:9).
20 Јеһова тезликлә Иса Мәсиһин вә гүдрәтли мәләкләрин васитәсилә «Аллаһы танымајан вә... [Рәбб Иса] барәсиндәки Мүждәјә итаәт етмәјәнләрә ҹәза верәҹәкдир» (2 Салониклиләрә 1:6-8). Инсанларын һәјаты тәһлүкәдәдир. Сән «Мүгәддәс Китаб әслиндә нә өјрәдир?» китабы васитәсилә һеч олмаса бир өјрәнмә апармағы гаршына мәгсәд гоја биләрсәнми? Бу ишдә иштирак етмәклә сән ‘һәм өзүнү, һәм дә сәнә гулаг асанлары хилас едәҹәксән’ (1 Тимотејә 4:16). Инсанлара Мүгәддәс Китабын тә’лимләринә әмәл етмәји өјрәтмәк инди хүсусилә ваҹибдир.
[Һашијә]
a Јеһованын Шаһидләри тәрәфиндән дәрҹ олунуб.
Сиз нә өјрәндиниз?
• «Мүгәддәс Китаб өјрәдир» китабы һансы мәгсәдлә нәшр едилиб?
• «Мүгәддәс Китаб өјрәдир» китабынын көмәји илә өјрәнмәјә неҹә башламаг олар?
• Һансы тә’лим методлары еффективдир?
• Өјрәнәнә Аллаһын Кәламынын мүәллими олмаға неҹә көмәк едә биләрсән?
[13-ҹү сәһифәдәки шәкил]
Сән бу китабдан мәһарәтлә истифадә едирсәнми?
[14-ҹү сәһифәдәки шәкил]
Гыса мүзакирә инсанда Мүгәддәс Китаба гаршы мараг ојада биләр.
[15-ҹи сәһифәдәки шәкил]
Өјрәнәнин диггәтини Мүгәддәс Китаба неҹә јөнәлдә биләрсән?
[16-ҹы сәһифәдәки шәкил]
Мүгәддәс Китабы өјрәнәнә руһани ҹәһәтдән инкишаф етмәјә көмәк ет.