Јеһова миннәтдар Аллаһдыр!
«Аллаһ һагсыз дејилдир ки, сизин ишинизи... вә... Онун ады наминә ҝөстәрдијиниз мәһәббәти унутсун» (ИБРАНИЛӘРӘ 6:10).
1. Јеһова моавлы Руту гијмәтләндирдијини неҹә ҝөстәрди?
ЈЕҺОВА Онун ирадәсини сәмими гәлбдән јеринә јетирмәјә чалышан инсанлары гијмәтләндирир вә онлара бол-бол хејир-дуа верир (Ибраниләрә 11:6). Садиг Боаз Аллаһын шәхсијјәтинин бу ҝөзәл
ҹәһәти илә чох јахшы таныш иди. Бу, дул галмыш гајынанасынын мәһәббәтлә гајғысына галан моавлы Рута дедији сөзләриндән бәллидир: «Бу ишинин әвәзини гој Рәбб версин! Гој... Рәбб сәнә бол мүкафат версин!» (Рут 2:12). Аллаһ Рута хејир-дуа вердими? Әлбәттә! Онун һаггында Мүгәддәс Китабда јазылмасы хејир-дуа дејилсә, бәс нәдир? Үстәлик, Рут Боаза әрә ҝедәрәк һәм Давудун, һәм дә Иса Мәсиһин улу нәнәси олду (Рут 4:13, 17; Матта 1:5, 6, 16). Бу, Јеһованын хидмәтчиләрини гијмәтләндирдијини ҝөстәрән Мүгәддәс Китабдакы бир чох нүмунәләрдән јалныз биридир.
2, 3. а) Јеһованын Өз хидмәтчиләрини гијмәтләндирмәси нәјә ҝөрә диггәтәлајигдир? б) Јеһова хидмәтчиләрини нә үчүн гијмәтләндирир? Нүмунә әсасында изаһ един.
2 Әҝәр Јеһова хидмәтчиләрини гијмәтләндирмәсәјди, буну Өзү тәрәфиндән һагсызлыг һесаб едәрди. Ибраниләрә 6:10 ајәсиндә дејилир: «Аллаһ һагсыз дејилдир ки, сизин ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти унутсун». Бу сөзләрдә диггәтәлајиг одур ки, иззәтиндән мәһрум вә ҝүнаһлы олдугларына бахмајараг, Јеһова Она садиг галан инсанлары гијмәтләндирир (Ромалылара 3:23).
3 Гејри-камиллијин уҹбатындан бизә һәрдән елә ҝәлә биләр ки, Аллаһ үчүн етдијимиз ишләр әһәмијјәтсиздир вә Онун хејир-дуаларына лајиг дејил. Лакин Јеһова үрәјимизи ҝөрдүјү вә вәзијјәтимизи баша дүшдүјү үчүн Она бүтүн гәлбдән етдијимиз хидмәти гијмәтләндирир (Матта 22:37). Мисал үчүн: ана масанын үстүндә бир һәдијјә — уҹуз бојунбағы тапыр. О, бу һәдијјәни әһәмијјәтсиз санараг бир кәнара ата биләр. Амма һәдијјәнин јанында олан ачыгҹаны охудугдан сонра ана ҝөрүр ки, бојунбағыны онун үчүн кичик гызы алыб. Гызҹығаз јығдығы бүтүн пулуну верәрәк анасына бу һәдијјәни алмышдыр. Инди ана бу һәдијјәјә тамамилә башга ҝөзлә бахыр. Ана ушағы гуҹаглајараг, бәлкә дә ҝөзләриндә јаш, она үрәкдән тәшәккүр едир.
4, 5. Иса миннәтдарлыг тәзаһүр етдирмәкдә Јеһованы неҹә тәглид етмишди?
4 Үрәјимизи ҝөрән вә имканларымызын мәһдудлуғуну нәзәрә алан Јеһова, әлимиздән ҝәләнин аз вә ја чох олмасындан асылы олмајараг Онун үчүн етдијимиз һәр шеји гијмәтләндирир. Иса Атасынын бу ҹәһәтини мүкәммәл сурәтдә әкс етдирмишди. Мә’бәдин ианә гутусуна ики лептон атан дул гадынын нүмунәсини јадымыза салаг. «Иса ҝөзләрини галдырдыгда ианә гутусуна һәдијјәләрини атан варлы адамлары ҝөрдү. Ораја ики лептон гојан касыб бир дул гадыны да ҝөрдү, вә деди: “Һәгигәти сизә дејирәм ки, бу јохсул дул гадын һамыдан чох пул атды. Чүнки онларын һамысы өз варларынын артыглығындан Аллаһа һәдијјә вердиләр, бу гадын исә касыблығына бахмајараг, доланмаг үчүн әлиндә олан бүтүн пулуну верди”» (Лука 21:1-4).
5 Бәли, Иса гадынын вәзијјәтини, јә’ни дул вә касыб олдуғуну нәзәрә алараг онун һәдијјәсинин һәгиги дәјәрини ҝөрдү вә јүксәк гијмәтләндирди. Ејни шеји Јеһова һаггында да демәк олар (Јәһја 14:9). Вәзијјәтимиздән асылы олмајараг, миннәтдар Аллаһымызын вә Онун Оғлунун ҝөзүндә лүтф тапмағын мүмкүн олдуғуну билмәк мәҝәр сизи руһландырмырмы?
Јеһова Ондан горхан кушлуја мүкафат верир
6, 7. Јеһова Евед-Мелекин һәрәкәтини нә үчүн гијмәтләндирди вә О буну неҹә етди?
6 Мүгәддәс Јазыларда гәләмә алынан бир чох нүмунәләр ҝөстәрир ки, Јеһова Онун ирадәсини јеринә јетирән инсанлары мүкафатландырыр. Ҝәлин Аллаһдан горхан кушлу Евед-Мелекин нүмунәсинә нәзәр салаг. Јеремја пејғәмбәрин мүасири олан Евед-Мелек Јәһуданын дөнүк падшаһы Сидгијанын сарајында хидмәт едирди. О, хәбәр тутду ки, Јәһуданын ә’јанлары Јеремја пејғәмбәрә шәр атараг ону халгы гијама галдырмагда иттиһам едибләр, сонра исә гујуја атыблар ки, орада аҹындан өлсүн (Јеремја 38:1-7). Јеремјанын тәблиғ етдији хәбәрә ҝөрә ә’јанларын нифрәтини газандығыны билә-билә Евед-Мелек һәјатыны тәһлүкәјә атыб падшаһа мүраҹиәт етди. Кушлу ҹәсарәтлә деди: «Ағам падшаһ, бу адамлар Јеремја пејғәмбәри гујуја атараг онунла пис рәфтар етди. О орада аҹындан өләҹәк». Падшаһын әмри илә Евед-Мелек 30 адам ҝөтүрүб Аллаһын пејғәмбәрини гујудан чыхартды (Јеремја 38:8-13).
7 Јеһова Евед-Мелекин иманла һәрәкәт етдијини ҝөрдү. Бу иман она һәр бир горхуја үстүн ҝәлмәкдә көмәк етмишди. Јеһова бу һәрәкәти гијмәтләндирәрәк Јеремја пејғәмбәрин васитәсилә деди: «Бу шәһәрин үзәринә јахшылыг дејил, пислик ҝәтирәрәк дедијим сөзләри јеринә јетирәҹәјәм... Анҹаг о ҝүн сәни хилас едәҹәјәм... Горхдуғун адамлара тәслим едилмәјәҹәксән. Бәли, Мән сәни хилас едәҹәјәм... Һеч олмаса өз ҹаныны гуртараҹагсан, чүнки сән Мәнә ҝүвәндин» (Јеремја 39:16-18). Бәли, Јеһова Јеремја илә бир јердә Евед-Мелеки Јәһуданын пис ә’јанларынын, сонра исә Јерусәлими јерлә-јексан едән бабиллиләрин әлиндән хилас етди. Мәзмур 97:10 ајәсиндә бәјан едилир: «О, [Јеһова] мө’минләринин ҹаныны горујар, онлары писләрин әлиндән гуртарар».
«Ҝизлини ҝөрән Атан сәнә ачыгҹасына әвәзини верәҹәкдир»
8, 9. Исанын нүмунәсиндән ҝөрүндүјү кими Јеһова һансы дуалары гијмәтләндирир?
8 Мүгәддәс Китабда дуа һаггында јазыланлар сүбут едир ки, Јеһова Онун наминә етдијимиз һәр шеји гијмәтләндирир. «Рәбб... әмәлисалеһләрин дуасындан... разы галыр», — дејә мүдрик инсан гејд етмишди (Сүлејманын мәсәлләри 15:8). Исанын ҝүнләриндә бир чох дин рәһбәрләринин инсанларын өнүндә дуа етмәк вәрдиши варды. Онлар буну мө’мин олдугларындан дејил, өзләрини башгаларына ҝөстәрмәк үчүн едирдиләр. Бу инсанлары ҝөрән Иса шаҝирдләринә нәсиһәт верәрәк демишди: «Онлар мүкафатларыны алдылар. Сән исә дуа етдијин заман өз отағына ҝир вә гапыны бағлајараг, ҝизлиндә олан Атана дуа ет; ҝизлини ҝөрән Атан сәнә ачыгҹасына әвәзини верәҹәкдир» (Матта 6:5, 6).
9 Бунунла Иса инсанларын гаршысында дуа етмәји мүһакимә етмәди, чүнки о өзү дә бә’зи һалларда ҹамаатын өнүндә дуа едирди (Лука 9:16). Јеһова өзүнү башгаларына ҝөстәрмәк нијјәти олмадан сидг үрәкдән едилән дуалары јүксәк гијмәтләндирир. Тәкликдә етдијимиз дуалар Аллаһы дәриндән севдијимизә вә Она е’тибар етдијимизә дәлаләт едир. Буна ҝөрә дә, тәәҹҹүблү дејил ки, Иса дуа етмәк үчүн тәнһа јер ахтарырды. О, бир дәфә «сәһәр, ҝүн доғмаздан әввәл» дуа етмишди. Нөвбәти дәфә исә «дуа етмәк үчүн тәк-тәнһа даға чыхды». Он ики һәварини сечмәздән әввәл о, бүтүн ҝеҹәни тәк дуа етди (Марк 1:35; Матта 14:23; Лука 6:12, 13).
10. Сидг үрәкдән дуа едиб дәрин һиссләримизи Јеһоваја ачанда нәјә әмин ола биләрик?
10 Оғлунун сәмими дуаларыны Јеһованын неҹә бөјүк диггәтлә динләдијини бир тәсәввүр един! Доғрудан да, Иса бә’зән «ҝүҹлү фәрјадла вә ҝөз јашлары илә дуалар вә хаһишләр етмиш вә Аллаһ горхусу сајәсиндә ешидилмишди» (Ибраниләрә 5:7; Лука 22:41-44). Биз дә сидг-үрәкдән дуа едиб, дәрин һиссләримизи Јеһоваја ачанда, әмин ола биләрик ки, О, дуаларымызы гијмәтләндирәрәк бизи диггәтлә динләјир. Бәли, «Рәбб... Ону сидг үрәкдән чағыран бүтүн инсанлара јахындыр» (Мәзмур 145:18).
11. Тәк оланда Јеһоваја садиг вә итаәткар галмағымыз Онда һансы һиссләри доғурур?
11 Әҝәр Јеһова тәк оланда етдијимиз дуалары гијмәтләндирирсә, ҝөрүн бизи һеч ким ҝөрмәјәндә Она итаәт етмәјимизи неҹә гијмәтләндирир! Бәли, Јеһова бизим тәкликдә оланда ҝөрдүјүмүз ишләрдән хәбәрдардыр (1 Петер 3:12). Јеһованын гаршысында ‘сәмими гәлбимизин’ олдуғу, јә’ни нијјәтләримизин тәмизлији вә доғру оланы етмәјә гәти гәрарлы олдуғумуз бизи һеч кәс ҝөрмәјәндә Аллаһа садиг вә итаәткар галмағымыздан ҝөрүнүр (1 Салнамәләр 28:9). Белә давранышымыз Јеһоваја неҹә дә бөјүк севинҹ ҝәтирир! (Сүлејманын мәсәлләри 27:11; 1 Јәһја 3:22).
12, 13. Натанел кими садиг шаҝирд олмаг үчүн зеһнимизи вә үрәјимизи неҹә горумалыјыг?
12 Демәли, садиг мәсиһчиләр порнографијаја вә зоракылыға бахмаг кими зеһни вә үрәји позан ҝизли ҝүнаһлардан өзләрини ҝөзләмәлидирләр. Бә’зи ҝүнаһлары инсанларын ҝөзүндән ҝизләтмәк мүмкүн олса да, биз баша дүшүрүк ки, Аллаһын «ҝөзләри өнүндә һәр шеј чылпаг вә ачыгдыр. Она һесабат верәҹәјик» (Ибраниләрә 4:13; Лука 8:17). Јеһованын хошуна ҝәлмәјән ишләрдән узаг дурмаға чалышараг виҹданымызы тәмиз сахлајыр, Аллаһын биздән разы галдығыны биләрәк исә севинирик. Шүбһәсиз ки, Јеһова «камиллик јолу илә ҝедән, әмәлисалеһ олан, үрәкдән һәгигәти сөјләјән» инсаны гијмәтләндирир (Мәзмур 15:1, 2).
13 Пислијә гәрг олмуш бу дүнјада үрәјимизи вә зеһнимизи неҹә горуја биләрик? (Сүлејманын мәсәлләри 4:23; Ефеслиләрә 2:2). Илк нөвбәдә иманымызы мөһкәмләндирмәк үчүн Јеһованын тәгдим етдији руһани тәдбирләрдән фајдаланмалыјыг. Лакин бундан савајы, дүз олмајан арзулар үрәјимиздә көк салараг ҝүнаһ доғурмајынҹа, пислији рәдд етмәк вә дүзҝүн давранмаг үчүн вар ҝүҹүмүзлә чалышмалыјыг (Јагуб 1:14, 15). Иса Натанел һаггында дедији «будур, дахилиндә һијлә олмајан [адам]!» сөзләрини сәнин үчүн дә десәјди, јәгин ки, чох севинәрдин (Јәһја 1:47). Бар-Талмај кими танынан Натанел сонралар Исанын 12 һәварисиндән бири олмаг шәрәфинә лајиг ҝөрүлдү (Марк 3:16-19).
«Мәрһәмәтли вә садиг Баш Каһин»
14. Башгаларындан фәргли олараг, Иса Мәрјәмин һәрәкәтинә неҹә мүнасибәт ҝөстәрди?
14 «Ҝөрүнмәјән Аллаһын сурәти» олан Иса Јеһоваја тәмиз үрәклә хидмәт едән инсанлары гијмәтләндирәрәк һәр заман Атасыны мүкәммәл сурәтдә тәглид едирди (Колослулара 1:15). Мәсәлән, өлүмүндән беш ҝүн әввәл Иса вә онун бә’зи шаҝирдләри бејтанјалы Шимонун евиндә гонаг идиләр. Ахшам дүшәндә Марта илә Лазарын баҹысы Мәрјәм тәхминән иллик ҝәлирә бәрабәр «чох гијмәтли халис һиндсүнбүлү јағындан тәгрибән јарым литр ҝөтүрүб» Исанын башына вә ајағына сүртдү (Јәһја 12:3). Бә’зиләри «бу исраф нә үчүн?» дејәрәк е’тиразларыны билдирдиләр. Амма Иса Мәрјәмин һәрәкәтинә тамам башга ҝөзлә бахды. Онун нәзәринҹә, бу, Мәрјәмин чох сәхавәтли олдуғуна ишарә едир, о ҹүмләдән јахынлашан өлүмү вә дәфни илә әлагәдар бөјүк мә’на дашыјырды. Иса Мәрјәми тәнгид етмәди, әксинә ону тә’рифләјиб деди: «Бу Мүждә бүтүн дүнјанын һарасында тәблиғ едиләрсә, бу гадынын етдији дә сөјләнәҹәк, өзү дә хатырланаҹагдыр» (Матта 26:6-13).
15, 16. Исанын јер үзүндә инсан кими јашајыб, Аллаһа хидмәт етмәсинин бизә һансы фајдасы вар?
15 Иса кими миннәтдар Рәһбәримизин олмасы бизим үчүн неҹә дә бөјүк шәрәфдир! Мәсиһин јер үзүндә јашамасы ону Јеһованын тә’јин етдији ишә, јә’ни әввәлҹә мәсһ олунмушларын, сонра исә јерүзү үмидинә малик оланларын јығынҹағында Баш Каһин олмаға вә Падшаһ кими хидмәт етмәјә һазырлады (Колослулара 1:13; Ибраниләрә 7:26; Вәһј 11:15).
16 Иса һәлә јер үзүнә ҝәлмәздән габаг инсанларла јахындан марагланыр вә онлара хүсуси мәһәббәт бәсләјирди (Сүлејманын мәсәлләри 8:31). О, инсан кими јашајараг Аллаһа хидмәтдә бизим һансы чәтинликләрлә үзләшдијимизи даһа јахшы баша дүшдү. Һәвари Павел јазырды: «О, [Иса] һәр ҹәһәтҹә гардашларына бәнзәмәли иди ки... мәрһәмәтли вә садиг Баш Каһин олсун. Чүнки Өзү имтаһан олунуб әләм чәкдији үчүн, имтаһан олунанлара јардым едә биләр». Иса «зәифликләримиздә бизә аҹыја» билир, чүнки о, һәр ҹәһәтдән «бизим кими имтаһан едилмиш», анҹаг һеч бир ҝүнаһа јол вермәмишди (Ибраниләрә 2:17, 18; 4:15, 16).
17, 18. а) Исанын Кичик Асијанын једди јығынҹағына үнванладығы мәктублардан нә өјрәнирик? б) О дөврдәки мәсһ олунмуш мәсиһчиләр һансы иш үчүн һазырланырдылар?
17 Шаҝирдләринин кечирдији сынаглардан Исанын јахшы хәбәрдар олмасы дирилмәсиндән сонра ајдын олду. Онун Кичик Асијанын једди јығынҹағына үнванладығы мәктубларына нәзәр салаг. Иса Измирдәки јығынҹаға деди: «Сәнин... әзабындан вә јохсуллуғундан... хәбәрдарам». Башга сөзлә десәк Иса дејирди: «Мән сизин проблемләринизи јахшы баша дүшүрәм, нәләрдән кечдијинизи билирәм». Өзүнүн дә өлүмҹүл әзабларла үзләшдији үчүн, о, мәрһәмәтлә вә әминликлә бунлары деди: «Өлүм баһасына да олса садиг гал, Мән сәнә һәјат таҹыны верәҹәјәм» (Вәһј 2:8-10).
18 Исанын једди јығынҹаға үнванладығы мәктублардан ҝөрүнүр ки, о, шаҝирдләринин чәтинликләриндән хәбәрдардыр вә онларын нөгсансызлығы горудугларына ҝөрә сәмими гәлбдән миннәтдардыр (Вәһј 2:1–3:22). Унутмајаг ки, Иса бу мәктублары онунла бирликдә ҝөјдә падшаһлыг етмәк үмидинә малик олан мәсһ едилмишләрә үнванламышды. Онлар да Иса кими, Мәсиһин фидијә гурбанлығыны бөјүк мәрһәмәтлә гејри-камил бәшәријјәтә тәтбиг етмәк кими шәрәфли иш үчүн һазырланырдылар (Вәһј 5:9, 10; 22:1-5).
19, 20. ‘Бөјүк издиһамы’ тәшкил едәнләр Јеһоваја вә Онун Оғлуна миннәтдарлыгларыны неҹә билдирирләр?
19 Әлбәттә, Иса һәр милләтдән олуб, «бөјүк мәшәггәтдән» сағ чыхаҹаг бөјүк издиһама дахил олан милјонларла садиг ‘башга гојунлары’ да севир (Јәһја 10:16; Вәһј 7:9, 14). Исанын фидијә гурбанына вә әбәди һәјат үмидинә ҝөрә миннәтдар олдуглары үчүн онун әтрафына топлашан бу инсанлар миннәтдарлыгларыны неҹә билдирирләр? ‘Ҝеҹә-ҝүндүз Она [Аллаһа] хидмәт етмәклә’ (Вәһј 7:15-17).
20 27-30-ҹу сәһифәләрдәки 2006-ҹы хидмәт или үчүн олан үмумдүнја һесабатындан ајдын ҝөрүнүр ки, бу садиг хидмәтчиләр ҝеҹә-ҝүндүз Јеһоваја мүгәддәс хидмәти иҹра едирләр. Бир ил әрзиндә онлар мәсһ олунмушларын нисбәтән кичик групу илә бирликдә тәблиғә 150 000-дән чох илә бәрабәр 1 333 966 199 саат һәср етмишләр!
Һәмишә миннәтдар олун!
21, 22. а) Миннәтдарлыг һиссини итирмәмәк үчүн мәсиһчиләр бу ҝүн нәјә ҝөрә хүсусилә ајыг олмалыдырлар? б) Нөвбәти мәгаләдә нә мүзакирә олунаҹаг?
21 Јеһова вә Онун Оғлунун гејри-камил инсанлары јүксәк гијмәтләндирмәси һәгигәтән дә валеһедиҹидир. Амма әфсуслар олсун ки, инсанларын әксәријјәти Аллаһы һеч дүшүнмәјәрәк, анҹаг өзләри үчүн јашајырлар. «Ахыр ҝүнләрдә» јашајан инсанлары тәсвир едәрәк Павел јазырды: ‘Инсанлар худбин, пулпәрәст, нанкор олаҹаглар’. Анҹаг бу инсанлардан фәргли олараг, һәгиги мәсиһчиләр Јеһоваја сәмими гәлбдән дуа етмәклә, һәвәслә табе олмагла вә бүтүн гәлбдән хидмәт етмәклә Аллаһын онлар үчүн етдији һәр шејә ҝөрә миннәтдарлыгларыны билдирирләр (Мәзмур 62:8; Марк 12:30; 1 Јәһја 5:3).
22 Нөвбәти мәгаләдә Јеһованын мәһәббәтлә тәгдим етдији бир чох руһани ән’амлар нәзәрдән кечириләҹәк. Гој бу ‘јахшы бәхшишләр’ үзәриндә дүшүндүкҹә бизим миннәтдарлығымыз артсын (Јагуб 1:17).
Неҹә ҹаваб верәрдиниз?
• Јеһованын миннәтдар Аллаһ олдуғу нәдән бәллидир?
• Тәкликдә оланда Јеһованын үрәјини неҹә севиндирә биләрик?
• Мәсиһин инсанлары гијмәтләндирдијини һарадан билирик?
• Јерүзү һәјаты Исаја мәрһәмәтли вә миннәтдар Рәһбәр олмаға неҹә көмәк етмишдир?
[18-ҹи сәһифәдәки шәкил]
Ушағын мәһәббәтини садәликлә билдирмәси валидејни севиндирдији кими, Јеһова да әлимиздән ҝәләни едәндә, О буну гијмәтләндирир.