Миннәтдарлығынызы даима артырын
«Еј Аллаһ... фикирләринин гијмәти чохдур, онларын сајы-һесабы јохдур!» (МӘЗМУР 139:17).
1, 2. Биз нә үчүн Аллаһын Кәламыны гијмәтләндирмәлијик, бәс мәзмурчу ону гијмәтләндирдијини неҹә ифадә етмишди?
БУ ҺЕЈРӘТАМИЗ тапынты иди. Јерусәлимдә Јеһованын мә’бәдиндә тә’мир ишләри апарылан заман баш каһин Хилгија «Муса васитәсилә верилән Рәббин Ганун китабыны тапды». Шүбһә јох иди ки, бу, тәхминән 800 ил әввәл јазылмыш орижинал әлјазма иди. Тәсәввүр едә биләрсинизми ки, китабы Аллаһ горхусуна малик Јошија падшаһын габағына гојанда о, һансы һиссләри кечирмишди? Падшаһ тапынтыны јүксәк гијмәтләндириб, дәрһал мирзә Шафана китабы уҹадан охумағы әмр етди (2 Салнамәләр 34:14-18).
2 Бу ҝүн милјардларла инсанын Аллаһын Кәламыны там вә ја гисмән охумаг имканы вар. Анҹаг бундан Мүгәддәс Јазыларын дәјәри вә әһәмијјәти азалырмы? Гәтијјән! Ахы бурада һәр шејә гадир Аллаһын бизим хејримиз үчүн олан фикирләри јазылыб (2 Тимотејә 3:16). Аллаһын Кәламына мүнасибәтини билдирәрәк мәзмурчу Давуд јазырды: «Еј Аллаһ, мәним үчүн фикирләринин гијмәти чохдур, онларын сајы-һесабы јохдур!» (Мәзмур 139:17).
3. Давудун, сөзүн әсл мә’насында руһани инсан олдуғу нәдән ҝөрүнүр?
3 Давуд һәмишә Јеһоваја, Онун Кәламына еһтирамла јанашыр, һәгиги ибадәт үчүн олан бүтүн тәдбирләри јүксәк гијмәтләндирирди. О, јаздығы бир чох ҝөзәл мәзмурларда өз һиссләрини ифадә етмишди. Мәсәлән, Мәзмур 27:4 ајәсиндә Давуд јазырды: «Рәбдән бир арзум, бир истәјим вар: бүтүн өмрүм боју Рәббин евиндә јашајым, мә’бәдиндә Рәббин ҹамалына бахым, Она пәрәстиш едим». «Она пәрәстиш едим» кими тәрҹүмә олунан ифадә орижинал ибрани мәтниндә дуруб сејр етмәк, диггәтлә ҝөздән кечирмәк, мәмнунлугла, мәфтунлугла, һејран-һејран бахмаг мә’насыны дашыјыр. Сөзүн әсл мә’насында руһани инсан олан Давуд иманынын мөһкәмләнмәси үчүн Јеһованын тәгдим етдији һәр шејә ҝөрә миннәтдар иди вә Онун ачдығы һәгигәтләри бөјүк мәмнунијјәтлә гәбул едирди. Давудун нүмунәси тәглид олунмаға лајигдир (Мәзмур 19:7-11).
Мүгәддәс Китаб һәгигәтини билдијинә ҝөрә миннәтдар ол
4. Иса нә үчүн ‘руһән севинди’?
4 Аллаһын Кәламыны баша дүшмәк үчүн мәғрурлуг доғуран зәка вә ја дүнјәви тәһсил лазым дејил. Әксинә, бу, руһани тәләбатларыны дәрк едән тәвазөкар вә сәмими инсанлара Јеһованын ҝөстәрдији лүтфдән асылыдыр (Матта 5:3; 1 Јәһја 5:20). Иса бә’зи гејри-камил инсанларын ҝөјдә адларынын јазылдығы үзәриндә дүшүнәндә «руһән севиниб деди: “Еј ҝөјүн вә јерин Рәбби олан Ата, шүкүр едирәм Сәнә ки, бу шејләри мүдрикләрдән вә ағыллылардан ҝизләдиб көрпәләрә ачдын”» (Лука 10:17-21).
5. Исанын шаҝирдләри нә үчүн онлара ачылан Падшаһлыг һаггында һәгигәтләрә ади јанашмамалы идиләр?
5 Бу сәмими дуадан сонра Иса үзүнү шаҝирдләринә тутараг деди: «Сизин ҝөрдүјүнүз шејләри ҝөрән ҝөзләр нә бәхтијардыр! Чүнки сизә дејирәм ки, бир чох пејғәмбәрләр вә һөкмдарлар сизин ҝөрдүјүнүз шејләри ҝөрмәк арзусунда олдулар, амма ҝөрмәдиләр; сизин ешитдијиниз шејләри ешитмәк арзусунда олдулар, амма ешитмәдиләр». Бәли, Иса садиг давамчыларыны тәшвиг едирди ки, онлара ачылан Падшаһлыг һаггындакы гијмәтли һәгигәтләрә ади јанашмасынлар. Бу һәгигәтләр Аллаһын әввәлки хидмәтчиләринә ачылмамышды вә әлбәттә ки, Исанын ҝүнләриндә јашајан «мүдрикләрдән вә ағыллылардан» ҝизли галмышды! (Лука 10:23, 24).
6, 7. а) Аллаһын ачдығы һәгигәтләрә ҝөрә миннәтдар олмағымыза һансы сәбәбләр вардыр? б) Бу ҝүн һәгиги динлә јалан дин арасында һансы фәрг ајдын ҝөрүнүр?
6 Бизим исә Аллаһын ачдығы һәгигәтләрә ҝөрә миннәтдар олмағымыза даһа чох сәбәбимиз вар, чүнки Јеһова «садиг вә ағыллы гул» васитәсилә Өз Кәламынын дәринликләрини халгына баша салыр (Матта 24:45; Даниел 12:10). Даниел пејғәмбәр сон ҝүнләр барәдә јазырды: «Чох адам өзүнү ора-бура вураҹаг вә билик артаҹаг» (Даниел 12:4). Мәҝәр бу ҝүн Аллаһ һаггында билик артмајыбмы? Јеһова Өз хидмәтчиләрини бол-бол гидаландырмырмы?
7 Аллаһын халгынын руһани фираванлығы илә Бөјүк Бабилин дини гарышыглығы арасында неҹә дә бөјүк фәрг вардыр! Бунун нәтиҹәсиндә, јалан диндән икраһ едән вә үмидләри доғрулмајан инсанлар һәгиги ибадәтә тәрәф үз тутурлар. Бу, Бөјүк Бабилин ‘ҝүнаһларына шәрик олмаг’ вә ја ‘бәлаларына дүчар олмаг’ истәмәјән һәлим инсанлардыр. Јеһова бүтүн белә инсанлары хидмәтчиләри васитәсилә һәгиги мәсиһчи јығынҹағына дә’вәт едир (Вәһј 18:2-4; 22:17).
Миннәтдар инсанлар Аллаһа тәрәф ахышырлар
8, 9. Һаггај 2:7 ајәси бу ҝүн неҹә јеринә јетир?
8 Јеһова Өз руһани мә’бәди һаггында габагҹадан демишди: «Бүтүн милләтләри ләрзәјә салыб һамысынын ҹаһ-ҹәлалыны бураја ҝәтирдәҹәјәм вә бу мә’бәди әзәмәтлә долдураҹағам» (Һаггај 2:7). Бу мөһтәшәм пејғәмбәрлик илк дәфә Һаггајын ҝүнләриндә, Јерусәлимә дөнән Аллаһын халгы мә’бәди бәрпа едәркән јеринә јетди. Бизим ҝүнләрдә Һаггајын бу сөзләри Јеһованын бөјүк руһани мә’бәди илә бағлы јеринә јетир.
9 Милјонларла инсанлар Аллаһа «руһән вә һәгигәтән» ибадәт етмәк үчүн руһани мә’бәдә артыг ҝәлмишләр, һәр ил исә ‘бүтүн милләтләрин ҹаһ-ҹәлалы’ олан 200 000-дән чох инсан бу мә’бәдә ахышыр (Јәһја 4:23, 24). Мәсәлән, 2006-ҹы хидмәт или үчүн олан үмумдүнја һесабатындан ҝөрүнүр ки, һәмин илдә 248 327 инсан Јеһоваја һәср олунманын рәмзи олараг вәфтиз олмушдур. Бу о демәкдир ки, орта һесабла һәр ҝүн 680 адам һәгиги ибадәтә гошулур. Онларын һәгигәтә севҝиси вә Падшаһлығын тәблиғчиләри кими Јеһоваја хидмәт етмәк арзусу Аллаһын онлары ҹәлб етдијини ҝөстәрир (Јәһја 6:44, 65).
10, 11. Инсанларын һәгигәти гәбул едиб, ону дәјәрләндирмәјә башладығына даир нүмунә ҝәтирин.
10 Бу сәмими инсанларын чоху «салеһлә пис адам, Аллаһа гуллуг едәнлә етмәјән арасындакы фәрги» ҝөрдүкләри үчүн һәгигәти гәбул етмишләр (Малаки 3:18). Протестант килсәсинә мәнсуб олса да, бир чох суаллары ҹавабсыз галан әр-арвад Вајн вә Вирҹинијанын нүмунәсинә нәзәр салаг. Онлар мүһарибәләрә нифрәт едирдиләр вә кешишин әсҝәрләрә вә силаһа хејир-дуа вердијини ҝөрәндә чаш-баш галырдылар. Вирҹинијанын чох илләр әрзиндә килсәнин мәктәбиндә һәр базар дәрс вердијинә бахмајараг, јаша долдугда, онлар килсәнин диҝәр үзвләринин е’тинасызлығыны һисс едирдиләр. Онлар данышырлар: «Һеч кәс бизә баш чәкмир, руһани вәзијјәтимизлә марагланмырды. Килсәјә анҹаг бизим пулумуз лазым иди. Биз онлардан белә шеји һеч ҝөзләмәздик». Килсә һомосексуаллыға ҝөз јуманда исә онлар даһа чох мә’јус олдулар.
11 Бу арада Вајн вә Вирҹинијанын нәвәси, сонра исә гызы Јеһованын Шаһиди олдулар. Әввәлҹә онларын ганы гаралса да, сонрадан фикирләрини дәјишиб өзләри дә Мүгәддәс Китабы өјрәнмәјә башладылар. Вајн дејир: «Мүгәддәс Китаб һаггында 70 илә өјрәнә билмәдикләримизи ҹәми үч аја өјрәндик! Биз билмирдик ки, Аллаһын ады Јеһовадыр, Онун Падшаһлығындан вә јерин Ҹәннәтә чевриләҹәјиндән хәбәримиз јох иди». Тезликлә бу сәмими гоҹалар мәсиһчи ҝөрүшләринә ҝәлмәјә вә тәблиғ етмәјә башладылар. Вирҹинија дејир: «Биз һәгигәти һамыја чатдырмаг истәјирик». 80 јашларында олан бу әр-арвад 2005-ҹи илдә вәфтиз олду. Онлар дејирләр: «Ахыр ки, биз һәгиги мәсиһчи аиләсини тапдыг».
‘Һәр ҹүр јахшы иш үчүн тәҹһиз едилдијимизә’ ҝөрә миннәтдарыг
12. Јеһова һәмишә Өз хидмәтчиләрини нә илә тә’мин едир вә бундан фајдаланмаг үчүн биз нә етмәлијик?
12 Јеһова һәмишә Өз хидмәтчиләринә ирадәсини јеринә јетирмәјә көмәк едир. Мәсәлән, Нуһ ҝәминин тикинтисинә даир ајдын, конкрет ҝөстәришләр алмышды. Бу иш илк дәфәдән дүзҝүн иҹра олунмалы иди. Нуһ белә дә етди. Бәс нәјин сајәсиндә о буну баҹарды? Чүнки «Нуһ һәр шеји етди: Аллаһ она неҹә әмр етмишдисә, о да һәр шеји еләҹә јеринә јетирди» (Јарадылыш 6:14-22). Јеһова бу ҝүн дә халгыны һәр шејлә тә’мин едир ки, Онун ирадәсини јеринә јетирә билсин. Әлбәттә ки, бизим әсас ишимиз Аллаһын артыг гурулмуш Падшаһлығы һаггында хош хәбәри тәблиғ етмәк вә лајиг оланлара Иса Мәсиһин шаҝирди олмаға көмәк етмәкдир. Нуһ кими бизим дә мүвәффәгијјәт газанмағымыз итаәткарлыгдан асылыдыр. Биз Јеһованын Кәламы вә тәшкилаты васитәсилә вердији рәһбәрлијә әмәл етмәлијик (Матта 24:14; 28:19, 20).
13. Јеһова бизә неҹә тә’лим верир?
13 Бу ишин өһдәсиндән ҝәлмәк үчүн әсас аләтимиз олан Аллаһын Кәламындан дүзҝүн истифадә етмәји өјрәнмәлијик. Бу китаб «тә’лим, тәкзиб, ислаһ, салеһлик тәрбијәси үчүн фајдалыдыр ки, Аллаһ бәндәси камил олуб, һәр ҹүр хејирли иш үчүн тәҹһиз едилсин» (2 Тимотејә 2:15; 3:16, 17). Биринҹи әсрдә олдуғу кими, бу ҝүн дә Јеһова бизә мәсиһчи јығынҹағы васитәсилә дәјәрли тә’лим верир. Бүтүн дүнјада мөвҹуд олан 99 770 јығынҹагда һәр һәфтә кечирилән Теократик Хидмәт Мәктәбинин вә хидмәти ҝөрүшләрин тәблиғимизи јахшылашдырмагда ојнадығы рол әвәзсиздир. Бу ҝөрүшләрә мүнтәзәм ҝәлмәклә вә орада алдығын мәсләһәтләрә әмәл етмәклә онлары гијмәтләндирдијини ҝөстәрирсәнми? (Ибраниләрә 10:24, 25).
14. Јеһованын халгы Она хидмәт етмәк шәрәфини гијмәтләндирдијини неҹә ҝөстәрир? (Шәрһләринә 27-30-ҹу сәһифәләрдәки һесабатдан мә’луматы да дахил ет.)
14 Јеһованын бүтүн дүнјада олан милјонларла хидмәтчиси Онун вердији тә’лимә ҝөрә миннәтдарлығыны дурмадан хидмәт етмәклә ҝөстәрир. Мәсәлән, 2006-ҹы хидмәт или әрзиндә Падшаһлығын 6 741 444 тәблиғчиси хидмәтин бүтүн нөвләринә үмуми һесабла 1 333 966 199 саат сәрф етмиш, 6 286 618 Мүгәддәс Китаб өјрәнмәси апармышдыр. Бунлар үмумдүнја тәблиғ һесабатынын јалныз бир нечә руһландырыҹы мәгамларыдыр. Биз сизә бу һесабаты диггәтлә нәзәрдән кечирмәји тәклиф едирик. Биринҹи әсрдә тәблиғ ишинин ҝенишләнмәси һаггындакы һесабат о дөврдә јашајан мәсиһчиләри руһландырдығы кими, әминик ки, бу һесабат сизи дә руһландыраҹаг (Һәвариләрин ишләри 1:15; 2:5-11, 41, 47; 4:4; 6:7).
15. Јеһоваја үрәкдән хидмәт едән мәсиһчиләр нә үчүн мә’јуслуға гапылмамалыдырлар?
15 Һәр ил Аллаһа уҹалан јүксәк һәмд сәсләри Јеһованын халгынын Ону танымаг вә һаггында шаһидлик етмәк шәрәфини јүксәк гијмәтләндирдијини әкс етдирир (Јешаја 43:10). Бәли, бә’зи јашлы, сәһһәти зәиф олан баҹы-гардашларын тәгдим етдији һәмд гурбанларыны дул гадынын ики лептонуна бәнзәтмәк олар. Лакин ҝәлин һеч вахт унутмајаг ки, Јеһова вә Онун Оғлу хидмәтдә әлләриндән ҝәләни едән бүтүн мәсиһчиләрин сә’јләрини гијмәтләндирирләр (Лука 21:1-4; Галатијалылара 6:4).
16. Сон илләрдә Аллаһ бизи һансы тә’лим вәсаитләри илә тә’мин етмишдир?
16 Јеһова бизә тәшкилаты васитәсилә хидмәт етмәји өјрәтмәкдән савајы, һәм дә ә’ла тә’лим вәсаитләри илә тә’мин едир. Сон онилликләрдә «Әбәди һәјата апаран һәгигәт», «Јер үзүндәки Ҹәннәтдә әбәдијјән јашаја биләрсиниз», «Әбәди һәјата апаран билик», бу јахынларда исә «Мүгәддәс Китаб әслиндә нә өјрәдир?» кими китаблар нәшр олунмушдур. Бу вәсаитләри доғрудан да гијмәтләндирәнләр хидмәтдә онлардан мәһарәтлә истифадә едирләр.
«Мүгәддәс Китаб өјрәдир» китабындан мәһарәтлә истифадә ет
17, 18. а) Сән хидмәтдә «Мүгәддәс Китаб өјрәдир» китабынын һансы һиссәсиндән даһа чох истифадә едирсән? б) Бир рајон нәзарәтчиси «Мүгәддәс Китаб өјрәдир» китабына даир нәји мүшаһидә етмишдир?
17 19 фәсилдән, мүәјјән мөвзулары әтрафлы мүзакирә едән «Әлавәләр» бөлмәсиндән ибарәт олан, садә диллә јазылан «Мүгәддәс Китаб әслиндә нә өјрәдир?» китабы хидмәтдә истифадә етмәк үчүн әсл һәдијјәдир. Мәсәлән, 12-ҹи фәсилдә «Аллаһы севиндирән һәјат тәрзи» мөвзусу мүзакирә едилир. Бурада Аллаһла дост олмағын неҹә мүмкүн олдуғу изаһ едилир. Чохлары бу һагда һеч вахт дүшүнмәмишләр вә ја буну әлчатмаз һесаб едирләр (Јагуб 2:23). Мүгәддәс Јазылары өјрәнмәк үчүн нәзәрдә тутулан бу китаб барәдә охуҹулар һансы фикирдәдирләр?
18 Австралијада хидмәт едән рајон нәзарәтчиси һесабатында гејд едир ки, китабын васитәсилә инсаны асанлыгла сөһбәтә ҹәлб етмәк олур, китабдан истифадә етмәк о дәрәҹәдә асандыр ки, бир чох тәблиғчиләр хидмәтдә јенидән әминлик вә севинҹ әлдә едибләр. Она ҝөрә дә, чохларынын бу китабы Гызыл Күлчә адландырмасы тәәҹҹүблү дејил!
19-21. «Мүгәддәс Китаб өјрәдир» китабынын дәјәрини ҝөстәрән бир нечә һадисә данышын.
19 «Сизи Аллаһ ҝөндәриб!» Бу сөзләри Гајанада јашајан бир гадын онун јанына ҝәлән пионерә демишди. Онунла јашајан киши бир гәдәр әввәл ону ики балаҹа ушагла атыб ҝетмишди. Пионер «Мүгәддәс Китаб өјрәдир» китабынын биринҹи фәслини ачыб, «Аллаһын әдаләтсизлијә мүнасибәти» адлы јарымбашлыг алтындакы 11-ҹи абзасы гадына охуду. Пионер дејир: «Бурадакы фикирләр она бөјүк тә’сир бағышлады. О, дүканын архасына ҝедиб, һөнкүр-һөнкүр ағлады». Гадын јерли јығынҹагдан олан баҹы илә Мүгәддәс Китабы өјрәнмәјә разылашды вә һазырда руһани ҹәһәтдән инкишаф едир.
20 Испанијада јашајан Һосе арвадыны автомобил гәзасында итирмишди. О, тәсәллини наркотикләрдә ахтарырды, һәмчинин психолога да мүраҹиәт етмишди. Анҹаг психолог Һосени ән чох нараһат едән «Аллаһ нә үчүн јолдашымын өлүмүнә јол верди?» суалына ҹаваб верә билмәди. Бир ҝүн Һосе онунла ејни ширкәтдә ишләјән Франческоја раст ҝәлди. Онлар Франческонун тәклифи илә «Мүгәддәс Китаб өјрәдир» китабынын «Аллаһ әзаблара нә үчүн јол верир?» адлы 11-ҹи фәслини мүзакирә етдиләр. Мүгәддәс Јазылара әсасланан изаһат вә мүәллим-шаҝирд нүмунәси Һосејә дәрин тәәссүрат бағышлады. Һосе Аллаһын Кәламыны ҹидди өјрәнмәјә башлады, рајон конгресиндә иштирак етди вә һал-һазырда јерли Падшаһлыг Залында кечирилән ҝөрүшләрә ҝәлир.
21 Полшада јашајан 40 јашлы иш адамы Роман Аллаһын Кәламына һәмишә һөрмәт бәсләјиб. Анҹаг башы бүсбүтүн ишинә гарышдығындан, Мүгәддәс Китаб өјрәнмәсиндә елә дә бөјүк ирәлиләјишләр етмәмишди. О, вилајәт конгресинә ҝәлиб, «Мүгәддәс Китаб өјрәдир» китабынын бир нүсхәсини алды. Бундан сонра о, ҝөзәчарпан ирәлиләјишләр етди. О дејир: «Бу китабда Мүгәддәс Јазыларын бүтүн әсас тә’лимләринин ајдын изаһ едилмәси сајәсиндә инсанда һәгигәт һаггында там тәсәввүр јараныр». Роман инди Мүгәддәс Китабы мүнтәзәм олараг өјрәнир вә јахшы наилијјәтләр әлдә етмишдир.
Миннәтдарлығыны даима артыр
22, 23. Ҝәләҹәјә олан үмидә ҝөрә миннәтдарлығымызы неҹә билдирә биләрик?
22 «Гуртулуш јахындыр!» адлы мараглы вилајәт конгресиндә дејилдији кими, һәгиги мәсиһчиләр Аллаһын вә’д етдији вә Иса Мәсиһин төкүлән ганы сајәсиндә мүмкүн олан ‘әбәди гуртулушу’ сәбирсизликлә ҝөзләјирләр. Бу дәјәрли үмидә ҝөрә миннәтдарлығымызы билдирмәјин ән јахшы үсулу ‘јашајан Аллаһа ибадәт едә билмәмиз үчүн өлүм ҝәтирән ишләрдән’ өзүмүзү тәмизләмәкдир (Ибраниләрә 9:12, 14).
23 Бәли, бүтүн дүнјада худбинлик руһунун ҝениш јајылдығы һалда Падшаһлығын алты милјондан чох тәблиғчисинин сәдагәтлә Аллаһа хидмәт етмәси һәгигәтән дә мө’ҹүзәдир. Бу, һәмчинин ону да сүбут едир ки, Јеһованын халгы она һәвалә олунан иш үчүн дәриндән миннәтдардыр. Аллаһын хидмәтчиләри әминдирләр ки, ‘Рәббин јолунда чәкдикләри әмәк әбәс дејилдир’. Гој бу миннәтдарлыг һисси даима артсын! (1 Коринфлиләрә 15:58; Мәзмур 110:3).
Неҹә ҹаваб верәрдиниз?
• Аллаһла мүнасибәтләримизә вә Онун бүтүн руһани тәдбирләринә неҹә јанашмалы олдуғумуза даир мәзмурчудан нә өјрәнирик?
• Һаггај 2:7 ајәси бу ҝүн неҹә јеринә јетир?
• Јеһова халгынын еффектив сурәтдә тәблиғ етмәси үчүн ону нә илә тә’мин едир?
• Јеһованын хејирхаһлығына ҝөрә өз миннәтдарлығыны неҹә билдирә биләрсән?
[27-30-ҹу сәһифәләрдәки ҹәдвәл]
2006 ЈЕҺОВАНЫН ШАҺИДЛӘРИНИН ХИДМӘТ ИЛИ ҮЧҮН ҮМУМДҮНЈА ҺЕСАБАТЫ
(Һесабата нәшрин өзүндә бахын)
[31-ҹи сәһифәдәки шәкилләр]
Јеһова Онун ирадәсини јеринә јетирмәк үчүн бизи һәр шејлә тә’мин едир.