Гој јығынҹаг Јеһоваја һәмд етсин
«Сәнин адыны Мәним гардашларыма аҝаһ едәҹәјәм; ҹамаат [јығынҹаг] ичиндә Сәнә нәғмә илә һәмд едәҹәјәм» (ИБРАНИЛӘРӘ 2:12).
1, 2. Јығынҹағын һансы фајдасы вар, анҹаг о, әсас е’тибарилә, нә үчүн тәшкил едилиб?
ӘСРЛӘР бојунҹа аилә инсанлар үчүн јолдашлыг вә тәһлүкәсизлик јувасы олмушдур. Анҹаг Мүгәддәс Китабда бүтүн дүнјадан олан сајсыз-һесабсыз инсанларын хүсуси јолдашлыг вә тәһлүкәсизлик тапдығы башга бир гурулушдан бәһс едилир. Сөһбәт мәсиһчи јығынҹағындан ҝедирa. Меһрибанлығы, дајағы өз аиләндә тапсан да, тапмасан да, Јеһованын јығынҹаг васитәсилә тәгдим етдији һәр шеји гијмәтләндирмәлисән, буну етмәк исә чәтин дејил. Әҝәр сән артыг Јеһованын Шаһидләринин јығынҹағына гајнајыб-гарышырсанса, јәгин ки, орада сәмими достлуг вә тәһлүкәсизлик тапдығыны тәсдиг едәрсән.
2 Јығынҹаг сосиал груплашма, иҹтимаи бирлик дејил. Бу, һәмчинин ејни мәншәли, ејни идман нөвү илә марагланан, јахуд ејни һоббиси олан инсанларын јығышдығы клуб да дејил. Јығынҹаг, әсас е’тибарилә, Јеһова Аллаһа һәмд етмәк үчүн тәшкил олунуб. «Зәбур» китабында ҝөстәрилдији кими, та гәдим заманлардан Аллаһын хидмәтчиләри бу мәгсәдлә бир јерә јығылырдылар. Мәзмур 35:18 ајәсиндә охујуруг: «Бөјүк топлантыда Сәнә шүкүр едәҹәјәм, чохсајлы јығынҹагда Сәнә һәмд едәҹәјәм». Мәзмур 107:31, 32 ајәләри дә бизи тәшвиг едир: «Рәббә мәһәббәтинә ҝөрә, бәшәр өвладларына ҝөстәрдији харигәләринә ҝөрә шүкүр етсинләр! Гој Ону халгын топлантысында уҹалтсынлар!»
3. Һәвари Павелин сөзләринә ҝөрә, јығынҹаг һансы мәгсәдә хидмәт едир?
3 Һәвари Павел ‘һәгигәтин дирәји вә әсасы олан Аллаһын аиләсинә, јә’ни јашајан Аллаһын ҹәмијјәтинә [јығынҹағына]’ истинад едәркән, јығынҹағын диҝәр ваҹиб ролуну вурғулады (1 Тимотејә 3:15). Павел һансы јығынҹагдан данышырды? Мүгәддәс Китабда «јығынҹаг» сөзү һансы мә’наларда ишләнир? О, һәјатымыза вә ҝәләҹәк планларымыза неҹә тә’сир етмәлидир? Ҹаваб тапмаг үчүн, ҝәлин әввәлҹә Аллаһын Кәламында «јығынҹаг» сөзүнүн һансы мә’наларда ишләдилдијини арашдыраг.
4. Ибраниҹә Мүгәддәс Јазыларда «јығынҹаг» сөзү ән чох кимә аид едилир?
4 Орижинал әлјазмада Ибраниҹә Мүгәддәс Јазыларда «јығынҹаг» үчүн «гаһал» сөзү истифадә олунур. «Гаһал» «бир јерә топламаг», «јығмаг» сөзүндән әмәлә ҝәлмишдир (Ганунун тәкрары 4:10; 9:10). Мәзмурчу ҝөјдәки мәләкләрдән данышаркән һәмин ибрани сөзүнү ишләтмишди, бу сөз бир груп пис адамы ҝөстәрмәк үчүн дә истифадә едилир (Мәзмур 26:5; 89:5-7). Амма Ибраниҹә Мүгәддәс Јазыларда «јығынҹаг» сөзү ән чох Исраил халгына аид едилир. Аллаһ Јагубдан ‘милләтләр јығыны төрәјәҹәјини’ демишди вә бу белә дә олду (Јарадылыш 35:11). Исраил халгы «Рәббин ҹамааты», «Аллаһын иҹмасы», јә’ни јығынҹағы олмаг үчүн сечилди (Сајлар 20:4; Неһемја 13:1; Јешуа 8:35; 1 Шамуел 17:47; Микеја 2:5).
5. Һансы јунан сөзү «јығынҹаг» кими тәрҹүмә олунур вә бу сөз һансы мә’наларда ишләнир?
5 «Гаһал»ын јунан еквиваленти олан «екклесиа» «бајыра» вә «чағырма» мә’насыны верән ики јунан сөзүндән јараныб. Бу һәм дә дини дејил, диҝәр мәгсәдлә чағырылан јығынҹаглара аид едилир. Буна Димитринин Ефесдә Павелин әлејһинә чағырдығы ‘иҹласы’ нүмунә ҝәтирмәк олар (Һәвариләрин ишләри 19:32, 39, 40). Анҹаг Мүгәддәс Китабда бу сөз, әсас е’тибарилә, мәсиһчи јығынҹағы илә әлагәдар ишләдилир. Бә’зи тәрҹүмәләрдә «екклесиа» «килсә» кими тәрҹүмә едилиб, лакин бир лүғәтдә дејилир ки, о, «һеч вахт мәсиһчиләрин ибадәт үчүн јығышдығы һәр һансы тикилини билдирмәјиб» («Тһе Ымпериал Библе-Диҹтионарј»). Анҹаг мараглыдыр ки, Јунанҹа Мүгәддәс Јазыларда «екклесиа» сөзү мәсиһчи јығынҹағы илә әлагәдар ән азы дөрд мүхтәлиф мә’нада ишләнир.
Аллаһын мәсһ олунмушлардан ибарәт јығынҹағы
6. Давуд вә Иса јығынҹагда нә едирдиләр?
6 Һәвари Павел Давудун Мәзмур 22:22 ајәсиндәки сөзләрини Исаја аид едәрәк јазырды: «“Сәнин адыны Мәним гардашларыма аҝаһ едәҹәјәм; ҹамаат [јығынҹаг] ичиндә Сәнә нәғмә илә һәмд едәҹәјәм”. Бу сәбәбдән О, [Иса] һәр ҹәһәтҹә гардашларына бәнзәмәли иди ки,.. Аллаһа хидмәтиндә мәрһәмәтли вә садиг Баш Каһин олсун» (Ибраниләрә 2:12, 17). Давуд гәдим Исраил топлантысы вә ја јығынҹағы ичиндә Аллаһа һәмд едирди (Мәзмур 40:9). Бәс Павел Исанын јығынҹаг ичиндә Аллаһа һәмд етдијини дејәндә нәји нәзәрдә тутурду? Бу һансы јығынҹаг иди?
7. Јунанҹа Мүгәддәс Јазыларда «јығынҹаг» сөзү, әсас е’тибарилә, һансы мә’нада ишләдилир?
7 Ибраниләрә 2:12, 17 ајәләриндә јазыланларын бөјүк әһәмијјәти вардыр. Бурадан ҝөрүрүк ки, Иса гардашларына Аллаһын адыны аҝаһ етдији јығынҹағын үзвү иди. О гардашлар кимләр иди? ‘Ибраһимин нәслинин’ бир һиссәси, Мәсиһин ‘сәмави дә’вәтә ортаг олан’ мәсһ олунмуш гардашлары (Ибраниләрә 2:16–3:1; Матта 25:40). Бәли, Јунанҹа Мүгәддәс Јазыларда «јығынҹаг» сөзү, әсас е’тибарилә, Мәсиһин руһла мәсһ олунмуш давамчыларындан ибарәт група аиддир. 140 000 нәфәр мәсһ олунмуш ‘сәмаларда адлары гејд едилмиш илк доғуланларын үмуми ҹәмијјәтини [јығынҹағыны]’ тәшкил едирләр (Ибраниләрә 12:23).
8. Иса мәсиһчи јығынҹағынын тәшкил олунаҹағыны габагҹадан неҹә ҝөстәрмишди?
8 Иса һәмин мәсиһчи јығынҹағынын тәшкил олунмаг үзрә олдуғуну демишди. Өлүмүндән тәхминән бир ил габаг о, һәвариләриндән биринә деди: «Сән Петерсән вә Мән ҹәмијјәтими [јығынҹағымы] бу дашын үзәриндә гураҹағам; вә өлүләр аләминин гапылары она галиб ҝәлә билмәјәҹәкдир» (Матта 16:18). Һәм Петер, һәм дә Павел һәмин дашын Иса олдуғуну дүз баша дүшмүшдүләр. Петер јазмышдыр ки, дашын, јә’ни Мәсиһин үзәриндәки руһани евин тикилән дири дашлары, онлары Чағыранын фәзиләтләрини е’лан етмәк үчүн тәшкил олунан Аллаһа мәхсус халгдыр (1 Петер 2:4-9; Мәзмур 118:22; Јешаја 8:14; 1 Коринфлиләрә 10:1-4).
9. Аллаһын јығынҹағы нә заман тәшкил олунмаға башлады?
9 ‘Аллаһа мәхсус халг’ нә заман мәсиһчи јығынҹағы кими тәшкил олунмаға башлады? Ерамызын 33-ҹү или Пентикост ҝүнүндә, Јерусәлимдә јығышан шаҝирдләрин үзәринә мүгәддәс руһ төкүләндә. Һәмин ҝүн, бир гәдәр сонра Петер јәһуди вә прозелитләрин гаршысында мәһарәтлә чыхыш етди. Исанын өлүмүнә ҝөрә чохларынын үрәјинә санки ох батды; онлар төвбә едиб, вәфтиз олдулар. Мүгәддәс Китаб хәбәр верир ки, беләләринин сајы үч мин нәфәр иди вә бундан дәрһал сонра онлар Аллаһын јени вә артмагда олан јығынҹағынын үзвләри олдулар (Һәвариләрин ишләри 2:1-4, 14, 37-47). Јығынҹаг она ҝөрә артырды ки, ҝүндән-ҝүнә даһа чох јәһуди вә прозелит Исраил халгынын артыг Аллаһын јығынҹағы олмадығыны гәбул едирди. Инди исә ‘Аллаһын [руһани] Исраилини’ тәшкил едән мәсһ олунмуш мәсиһчиләр Аллаһын јығынҹағы идиләр (Галатијалылара 6:16; Һәвариләрин ишләри 20:28).
10. Иса Мәсиһ Аллаһын јығынҹағында һансы мөвгејә маликдир?
10 Мүгәддәс Китаб тез-тез «Мәсиһә вә ҹәмијјәтә [јығынҹаға]» кими ифадәләр ишләтмәклә Исаны вә мәсһ олунмушлары бир-бириндән ајырыр. Иса мәсһ олунмушларын јығынҹағынын Башыдыр. Павел јазырды ки, Аллаһ Исаны «бүтүн варлыгларын үзәриндә баш олмаг үчүн,.. иманлылар ҹәмијјәтинә [јығынҹаға] верди. Бу ҹәмијјәт [јығынҹаг] Онун бәдәнидир» (Ефеслиләрә 1:22, 23; 5:23, 32; Колослулара 1:18, 24). Һал-һазырда јер үзүндә һәмин јығынҹағын үзвләриндән аз галыб. Әмин ола биләрик ки, онларын Башы Иса Мәсиһ бу мәсиһчиләри севир. Онун гардашларына гаршы һиссләри Ефеслиләрә 5:25 ајәсиндә тәсвир олунур: «Мәсиһ... иманлылар ҹәмијјәтини [јығынҹағыны] севди вә онун уғрунда Өзүнү фәда етди». Иса сәмави үмиди оланлары она ҝөрә севир ки, онлар Исанын өзү кими ‘Аллаһа һәмд гурбаныны, јә’ни Онун адыны играр едән додагларын бәһрәсини тәгдим едирләр’ (Ибраниләрә 13:15).
Башга мә’наларда «јығынҹаг»
11. Јунанҹа Мүгәддәс Јазыларда «јығынҹаг» сөзү һансы икинҹи мә’нада истифадә олунур?
11 Бә’зән Јунанҹа Мүгәддәс Јазыларда «јығынҹаг» сөзү Аллаһын јығынҹағыны тәшкил едән 144 000 нәфәрә аид едилмир, даһа мәһдуд вә конкрет мә’нада ишләнир. Мәсәлән, Павел Коринфдәки мәсиһчиләрә јазмышдыр: «Нә јәһудиләрин, нә јунанларын, нә дә ки, Аллаһын ҹәмијјәтинин [јығынҹағынын] бүдрәмәсинә сәбәб олун» (1 Коринфлиләрә 10:32). Ајдын мәсәләдир ки, гәдим Коринф шәһәриндә јашајан мәсиһчинин налајиг һәрәкәтләрә јол веримәси бә’зиләринин бүдрәмәсинә сәбәб ола биләрди. Анҹаг бу о демәк идими ки, онун налајиг һәрәкәти бүтүн јунанлылары, јәһудиләри, һәмчинин о дөврдән индијәдәк јашајан мәсһ олунмушларын һамысыны бүдрәдәҹәкди? Чәтин. Демәли, белә гәнаәтә ҝәлмәк олар ки, бу ајәдә Аллаһын јығынҹағы дедикдә, мүәјјән вахтда јашајан мәсиһчиләр нәзәрдә тутулур. Буна ујғун олараг, кимсә Аллаһын јығынҹаға рәһбәрлик едиб, онун гајғысына галыб хејир-дуа вердијини дејәндә, јашадыглары јердән асылы олмајараг, мүәјјән вахтда јашајан бүтүн мәсиһчиләри нәзәрдә тутур. Јахуд да биз Аллаһын јығынҹағында һөкм сүрән хошбәхтлик вә сүлһдән данышанда бүтүн мәсиһчи гардашлығыны фикримиздә тутуруг.
12. «Јығынҹаг» сөзүнүн үчүнҹү мә’насы нәдир?
12 Үчүнҹү мә’нада «јығынҹаг» сөзү бир ҹоғрафи әразидә олан бүтүн мәсиһчиләрә аиддир. Биз охујуруг: ‘Бүтүн Јәһудеја, Галилеја вә Самаријада ҹәмијјәтләр [«јығынҹаг», ЈД] саламат галыб инкишаф едирди’ (Һәвариләрин ишләри 9:31). Һәмин бөјүк әразидә мәсиһчи групларынын сајы бирдән чох олса да, Јәһудеја, Галилеја вә Самаријадакы групларын һамысындан бир јығынҹаг кими данышылыр. Ерамызын 33-ҹү илинин Пентикост ҝүнүндә вә ондан сонра вәфтиз оланларын сајыны нәзәрә алсаг, белә гәнаәтә ҝәлмәк олар ки, Јерусәлимдә мүнтәзәм олараг бирдән чох груп топлашырды (Һәвариләрин ишләри 2:41, 46, 47; 4:4; 6:1, 7). I Һирод Агриппа ерамызын 44-ҹү илиндә вәфат едәнәдәк Јәһудејанын һөкмдары олмушдур вә 1 Салоникилиләрә 2:14 ајәсиндән мә’лумдур ки, 50-ҹи илә гәдәр Јәһудејада артыг бир нечә јығынҹаг вар иди. Демәли, Һиродун ‘ҹәмијјәтә [јығынҹаға] аид оланларын бә’зиләринә зүлм етдији’ дејилдикдә Јерусәлимдә јығышан бир дејил, бүтүн груплар нәзәрдә тутулурду (Һәвариләрин ишләри 12:1).
13. Јунанҹа Мүгәддәс Јазыларда «јығынҹаг» сөзүнүн дөрдүнҹү вә даһа тез-тез тәсадүф олунан мә’насы һансыдыр?
13 Дөрдүнҹү, даһа мәһдуд вә тез-тез тәсадүф олунан мә’нада «јығынҹаг» сөзү бир јерли јығынҹағы, мәсәлән, евдә јығышан јығынҹағы тәшкил едән мәсиһчиләрә аиддир. Павел ‘Галатијанын ҹәмијјәтләри [јығынҹаглары]’ һагда данышмышды. Романын бу бөјүк әјаләтиндә бирдән чох јығынҹаг вар иди. Павел Антакја, Дербе, Листра вә Конја шәһәрләринин дахил олдуғу Галатија әјаләти һаггында данышаркән «јығынҹаг» сөзүнү ики дәфә ҹәмдә ишләтмишди. Мүгәддәс Китаб тәләбләринә ҹаваб верән гардашлар бу јығынҹагларда ағсаггал вә ја нәзарәтчи тә’јин олунурду (1 Коринфлиләрә 16:1; Галатијалылара 1:2; Һәвариләрин ишләри 14:19-23). Аллаһын Кәламы онларын һамысыны Аллаһын јығынҹаглары адландырыр (1 Коринфлиләрә 11:16; 2 Салоникилиләрә 1:4).
14. «Јығынҹаг» сөзүнүн бә’зи ајәләрдә ишләнмәсини нәзәрә алараг, һансы гәнаәтә ҝәлмәк олар?
14 Бә’зи һалларда мәсиһчи ҝөрүшләринә ҝәләнләрин сајы елә аз олурду ки, киминсә евинә јерләширдиләр. Бунунла белә, онлардан бә’зиләри јығынҹаг адланырды. Һәмин јығынҹаглардан бизә мә’лум оланлар Прискила вә Акила, Нимфа, о ҹүмләдән, Филимонун евиндә јығышырды (Ромалылара 16:3-5; Колослулара 4:15; Филимона 2). Бу бизим дөврдә мүнтәзәм олараг евдә топлашан кичик јығынҹаглары руһландырыр. Јеһова биринҹи әсрдә белә кичик груплары јығынҹаг һесаб едирди, сөзсүз ки, бу ҝүн дә О, кичик груплара јығынҹаг кими бахараг мүгәддәс руһу илә хејир-дуа верир.
Јығынҹаглар Јеһоваја һәмд едир
15. Еркән јығынҹагларын бә’зиләриндә мүгәддәс руһ неҹә фәалијјәт ҝөстәрирди?
15 Артыг гејд едилдији кими, Иса јығынҹагда Аллаһа һәмд едирди (Мәзмур 22:22, Ибраниләрә 2:12). Онун садиг давамчылары да белә етмәли идиләр. Биринҹи әсрдә һәгиги мәсиһчиләр Аллаһын оғуллары вә беләликлә дә Мәсиһин гардашлары олмаг үчүн руһла мәсһ олунанда мүгәддәс руһ онларын бә’зиләриндә хүсуси шәкилдә фәалијјәт ҝөстәрмәјә башлады: онлара руһун мө’ҹүзәви ән’амлары верилди. Бу ән’амлардан бә’зиләри һикмәт вә ја билик кәламы, инсанлара шәфа вермәк, пејғәмбәрлик етмәк вә ја билмәдикләри дилләрдә данышмаг иди (1 Коринфлиләрә 12:4-11).
16. Руһун мө’ҹүзәви ән’амлары һансы мәгсәдә хидмәт едирди?
16 Дилләрдә данышмаг һаггында Павел демишди: «Һәм руһән, һәм дә әглән маһны охујаҹағам» (1 Коринфлиләрә 14:15). О дәрк едирди ки, башгаларынын тә’лим алмасы үчүн онун дедикләрини баша дүшмәләри ваҹибдир. Павелин мәгсәди Јеһоваја јығынҹагда һәмд етмәк иди. О, руһун ән’амыны аланлара нәсиһәт едирди: «Ҹәмијјәти [јығынҹағы] инкишаф етдирән ән’амларда үстүн олмаға чалышын». Бурада Павел мө’ҹүзәләр ҝөстәрдикләри јерли јығынҹағы нәзәрдә тутурду (1 Коринфлиләрә 14:4, 5, 12, 23). Бәли, Павел билирди ки, мәсиһчиләр јығынҹагларда Аллаһа һәмд едә биләҹәкләр, она ҝөрә дә јығынҹагларын рифаһы ону марагландырырды.
17. Јерли јығынҹаглара ҝәлдикдә, нәјә әмин ола биләрик?
17 Јеһова инди дә јығынҹағындан истифадә едир вә она дајаг дурур. О, јер үзүндә галан мәсһ олунмушлара хејир-дуа верир. Јеһованын халгынын алдығы бол-бол руһани гида буна сүбутдур (Лука 12:42). О, бүтүн үмумдүнја гардашлығына, һәм дә јерли јығынҹаглара хејир-дуа верир. Бу јығынҹагларда биз Јараданымыза әмәлләримизлә вә руһландырыҹы шәрһләримизлә һәмд едирик. Биз бурада билик вә тә’лим алырыг ки, Аллаһа башга вахтларда, јығынҹаг ҝөрүшләриндә олмадығымыз вахтларда да һәмд едәк.
18, 19. Јығынҹаглардакы садиг мәсиһчиләр нә етмәк нијјәтиндәдирләр?
18 Һәвари Павел Македонијанын Филипи шәһәриндәки јығынҹағы сәсләјирди: «Дуа едирәм ки,.. Аллаһын иззәти вә мәдһи үчүн Иса Мәсиһдән ҝәлән салеһлик бәһрәләри илә доласыныз». Бу о демәк иди ки, мәсиһчиләр Исаја иманлары вә ҝөзәл үмидләри барәдә јығынҹаға аид олмајан инсанларла данышмалы идиләр (Филипилиләрә 1:9-11; 3:8-11). Буна мүвафиг олараг, Павел һәмиманлыларыны тәшвиг етмишди: «Һәмишә Иса васитәсилә Аллаһа һәмд гурбаныны, јә’ни Онун адыны играр едән додагларын бәһрәсини тәгдим едәк» (Ибраниләрә 13:15).
19 Сән дә Иса кими Јеһованы һәм јығынҹагда, һәм дә Ону һәлә танымајанларын вә Она һәмд етмәјәнләрин гаршысында додагларынла иззәтләндирмәкдән севинҹ дујурсанмы? (Ибраниләрә 2:12; Ромалылара 15:9-11). Бизим ҹавабымыз мүәјјән мә’нада өз јығынҹағымызын Аллаһын нијјәтиндәки ролу һаггында нә дүшүндүјүмүздән асылыдыр. Ҝәлин нөвбәти мәгаләдә Јеһованын јерли јығынҹағымыза неҹә рәһбәрлик едиб вә ондан истифадә етдијини, һәмчинин онун бизим һәјатымыздакы ролуну арашдыраг.
[Һашијә]
a Азәрбајҹанҹа «Мүгәддәс Китаб»да вә «Инҹил»дә јығынҹаг мә’насыны верән ибраниҹә «гаһал» вә јунанҹа «екклесиа» сөзләри «топланты», «јығынҹаг», «иҹма», «ҹамаат», «мәҹлис», «иҹлас», «ҹәмијјәт» кими сөзләрлә тәрҹүмә олунмушдур. Бу мәгаләдә «јығынҹаг» сөзүнүн орижинал дилләрдә мүәјјән мәгсәдлә бир јерә топлашан инсанлара аид ишләнилән мә’насына диггәт јөнәлдилир.
Хатырлајырсынызмы?
• Мәсһ олунмушлардан ибарәт Аллаһын јығынҹағы неҹә јаранды?
• Јунанҹа Мүгәддәс Јазыларда «јығынҹаг» сөзү даһа һансы үч мә’нада ишләнир?
• Давуд, Иса вә биринҹи әсрдәки мәсиһчиләр јығынҹагла әлагәдар нә етмәјә гәти гәрарлы идиләр вә бу бизи нәјә тәшвиг етмәлидир?
[9-ҹу сәһифәдәки шәкил]
Мәсиһчи груплары Аллаһын јығынҹағы адланырды.
[10-ҹу сәһифәдәки шәкил]
Бениндәки мәсиһчиләр кими, биз дә јығынҹагда Јеһоваја һәмд едирик.
[11-ҹи сәһифәдәки шәкил]
Иса һансы јығынҹағын тәмәли иди?