Јығынҹагдакы јерини гијмәтләндир
«Аллаһ үзвләри бәдәнин тәркибиндә истәдији кими ајры-ајры јерләшдирмишдир» (1 КОР. 12:18).
1, 2. а) Нә ҝөстәрир ки, һәр кәсин јығынҹагда гијмәтләндирә биләҹәји јери ола биләр? б) Бу мәгаләдә һансы суаллар мүзакирә едиләҹәк?
ЈЫҒЫНҸАГ Јеһованын Өз халгыны руһани гида илә тәмин етмәк вә онлара рәһбәрлик вермәк үчүн гәдим Исраилин дөврүндән тәшкил етдији бир гурулушдур. Мәсәлән, исраиллиләр Ај шәһәрини алт-үст етдикдән сонра «Јешуа ганунун бүтүн сөзләрини — хејир-дуа вә ләнәти, јәни Ганун китабында јазыланларын һамысыны... бүтүн Исраил ҹамаатынын [«јығынҹағынын», ЈД]... гаршысында» охуду (Јешуа 8:34, 35).
2 Б. е. I әсриндә һәвари Павел ағсаггал кими хидмәт едән Тимотејә јазырды ки, мәсиһчи јығынҹағы «Аллаһын аиләси» вә «һәгигәтин дирәји вә әсасы»дыр (1 Тим. 3:15). Бу ҝүн Аллаһын «аиләси» үмумдүнја һәгиги мәсиһчи гардашлығыдыр. Коринфлиләрә јаздығы биринҹи мәктубун 12-ҹи фәслиндә Павел јығынҹағы инсан бәдәни илә мүгајисә едир. Онун сөзләринә ҝөрә, бәдәнин һәр бир үзвүнүн мүхтәлиф функсијалары јеринә јетирмәсинә бахмајараг, онларын һамысы зәруридир. «Аллаһ үзвләри бәдәнин тәркибиндә истәдији кими ајры-ајры јерләшдирмишдир»,— дејә Павел јазыр. О һәтта гејд едир ки, «даһа аз етибарлы сајдығымыз бәдән үзвләринә даһа чох етибар ҝөстәририк» (1 Кор. 12:18, 23). Буна ҝөрә дә, Аллаһын аиләсиндә һеч бир садиг мәсиһчинин ролу диҝәринкиндән нә јахшы, нә дә писдир. Онлар садәҹә мүхтәлифдир. Бәс онда Аллаһын гурулушунда өз јеримизи неҹә тапа вә гијмәтләндирдијимизи неҹә ҝөстәрә биләрик? Јығынҹагда һансы јери тутмағымыз нәдән асылыдыр? Вә ‘тәрәггимиз һамыја ашкар олсун’ дејә биз нә едә биләрик? (1 Тим. 4:15).
Јығынҹагдакы јеримизи гијмәтләндирдијимизи неҹә ҝөстәрә биләрик?
3. Јығынҹагда јеримизи тапмағын вә гијмәтләндирдијимизи ҝөстәрмәјин үсулларындан бири һансыдыр?
3 Јығынҹагда јеримизи тапмағын вә гијмәтләндирдијимизи ҝөстәрмәјин үсулларындан бири «садиг вә ағыллы гул» вә ону тәмсил едән Рәһбәрлик Шурасы илә сых әмәкдашлыг етмәкдир. (Матта 24:45-47 ајәләрини оху.) Биз гул синфиндән алдығымыз рәһбәрлијә нә дәрәҹәдә итаәт етдијимизи јохламалыјыг. Мисал үчүн, узун илләрдир ки, ҝејим вә хариҹи ҝөрүнүшә, әјләнҹәјә вә Интернетдән дүзҝүн истифадәјә даир ајдын рәһбәрлик алырыг. Руһанилијимизи горумаға көмәк едән бу етибарлы рәһбәрлијә нә дәрәҹәдә ҹидди јанашырыг? Бәс мүнтәзәм аиләви ибадәт кечирмәк нәсиһәти барәдә нә демәк олар? Бу мәсләһәти үрәкдән гәбул едәрәк һәфтәнин бир ахшамыны бунун үчүн ајырмысанмы? Әҝәр субајсанса, Мүгәддәс Китабы арашдырмаг үчүн вахт мүәјјән етмисәнми? Гул синфинин рәһбәрлијинә риајәт етсәк, Јеһова бизи һәм ајры-ајрылыгда, һәм дә аиләликҹә хејир-дуаландыраҹаг.
4. Шәхси гәрарлар гәбул едән заман нәји нәзәрә алмалыјыг?
4 Бәзиләри иддиа едә биләр ки, әјләнҹә, ҝејим вә хариҹи ҝөрүнүшлә бағлы гәрар гәбул етмәк һәр кәсин шәхси ишидир. Амма јығынҹагда јерини гијмәтләндирән һәср олунмуш мәсиһчи гәрар гәбул едәркән шәхсән үстүнлүк вердији шејләри јеҝанә амил кими әлдә рәһбәр тутмамалыдыр. О, хүсусилә Јеһованын Мүгәддәс Китаб васитәсилә ачыгланан нөгтеји-нәзәринә үстүнлүк вермәлидир. Онун Кәламында дејиләнләр ‘һәр аддымымыз үчүн чыраг, јолларымыза ишыг’ олмалыдыр (Мәз. 119:105). Шәхси мәсәләләрә даир вердијимиз гәрарларын хидмәтимизә вә башгаларына — һәм јығынҹагда, һәм дә ондан кәнарда олан инсанлара неҹә тәсир етдијинә диггәт јетирмәк дә мүдриклик оларды. (2 Коринфлиләрә 6:3, 4 ајәләрини оху.)
5. Нәјә ҝөрә өзүмүзү мүстәгиллик руһундан горумалыјыг?
5 ‘Итаәтсиз инсанларда фәал олан руһ’ о гәдәр ҝениш јајылыб ки, бу, нәфәс алдығымыз һава илә мүгајисә олунур (Ефес. 2:2). Бу руһ бизи Јеһованын тәшкилаты васитәсилә вердији рәһбәрлијә еһтијаҹымыз олмадығыны дүшүнмәјә вадар едә биләр. Шүбһәсиз ки, биз һәвари Јәһјадан һеч нәји һөрмәтлә гәбул етмәјән Диотрефин тајы олмаг истәмәздик (3 Јәһ. 9, 10). Биз өзүмүзү мүстәгиллик руһундан горумалыјыг. Ҝәлин Јеһованын бу ҝүн истифадә етдији бу канала һеч вахт сөз вә ја һәрәкәтимизлә һөрмәтсизлик ҝөстәрмәјәк! (Сај. 16:1-3). Бунун әксинә олараг, гул синфи илә әмәкдашлыг етмәк шәрәфини гијмәтләндирмәлијик. Мәҝәр биз јығынҹағымызда рәһбәрлији үзәринә ҝөтүрәнләрә табе олмаға вә итаәт етмәјә чалышмамалыјыгмы? (Ибраниләрә 13:7, 17 ајәләрини оху.)
6. Нәјә ҝөрә өз имканларымызы нәзәрдән кечирмәлијик?
6 Јығынҹагда јеримизи гијмәтләндирдијимизи ҝөстәрмәјин диҝәр үсулу имканларымызы диггәтлә нәзәрдән кечирмәк, еләҹә дә ‘хидмәтимизи’ вә Јеһованы иззәтләндирмәк үчүн әлимиздән ҝәләни етмәкдир (Ром. 11:13). Бәзиләри даими пионер кими хидмәт едир, диҝәрләри исә таммүддәтли хидмәтин миссионер, сәјјар нәзарәтчи вә Бет-Ел аиләсинин үзвү кими хүсуси нөвләриндә иштирак едир. Бир чох баҹы вә гардашлар Падшаһлыг Залларынын тикинтисинә көмәк едирләр. Јеһованын әксәр хидмәтчиләри исә аиләләринин руһани еһтијаҹларыны өдәмәк вә һәр һәфтә хидмәтдә там иштирак етмәк үчүн әлләриндән ҝәләни әсирҝәмирләр. (Колослулара 3:23, 24 ајәләрини оху.) Өзүмүзү Аллаһа хидмәтә һәср етсәк вә әлимиздән ҝәләни едәрәк ҹанла-башла хидмәт етсәк, о заман әмин ола биләрик ки, Онун гурулушунда бизә һәмишә јер олаҹаг.
Јығынҹагда һансы јери тутмағымыз нәдән асылыдыр?
7. Имканларымызын јығынҹагда тутдуғумуз мөвгејә неҹә тәсир етдијини изаһ един.
7 Имканларымызы нәзәрдән кечирмәк ваҹибдир, чүнки јығынҹагда һансы иши ҝөрүб-ҝөрмәмәјимиз мүәјјән мәнада онлардан асылыдыр. Мәсәлән, гардашын јығынҹагда тутдуғу мөвге баҹынын мөвгејиндән мүәјјән дәрәҹәдә фәргләнир. Јаш, сәһһәт вә диҝәр амилләр дә Јеһоваја хидмәтдә едә биләҹәјимиз шејләрә тәсир едир. «Ҝәнҹләри гүввәти шәрәфләндирәр, ағ сачлар гоҹалара зинәт верәр»,— дејә Сүлејманын мәсәлләри 20:29 ајәсиндә јазылыб. Јығынҹағын ҝәнҹ үзвләри физики ҹәһәтдән даһа чох иш ҝөрә биләр, јашлылар исә өз мүдриклији вә тәҹрүбәләри илә јығынҹаға бөјүк фајда ҝәтирә биләрләр. Һәмчинин јадда сахламалыјыг ки, Јеһованын тәшкилатында ҝөрдүјүмүз һәр бир иш Онун лүтфү сајәсиндә мүмкүндүр (Һәв. иш. 14:26; Ром. 12:6-8).
8. Арзуларымыз јығынҹагда етдикләримизә неҹә тәсир едә биләр?
8 Јығынҹагда һансы јери тутаҹағымыза тәсир едән диҝәр амили исә ики доғма баҹынын нүмунәсиндән ҝөрмәк олар. Онларын һәр икиси орта мәктәби битирир. Икисинин дә вәзијјәти ејнидир. Онларын валидејнләри әлләриндән ҝәләни етмишләр ки, гызлары мәктәби битирдикдән сонра даими пионер кими хидмәт етмәјә башласынлар. Мәзун олдугдан сонра онлардан бири пионер хидмәтинә башлајыр, диҝәри исә өзүнү ишә һәср едир. Бәс онлар арасында фәрг нәдәдир? Онларын арзу вә истәкләриндә. Нәһајәтдә һәр кәс өз арзусуна чатыр. Ејни шеји әксәријјәтимиз һаггында да демәк олар, елә дејилми? Аллаһа хидмәтдә нә етмәк истәдијимиз үзәриндә ҹидди дүшүнмәлијик. Шәраитимиздә дәјишиклик етмәк лазым ҝәлсә белә, хидмәтә сәрф етдијимиз вахты артыра биләрикми? (2 Кор. 9:7).
9, 10. Әҝәр Јеһоваја хидмәтдә даһа чох шеј етмәјә һәвәсимиз јохдурса, нә етмәлијик?
9 Бәс әҝәр Јеһоваја хидмәтдә даһа чох шеј етмәјә һәвәсимиз јохдурса вә јығынҹагда садәҹә тәләб олунан шејләри етмәклә кифајәтләнириксә, онда неҹә? «Филипилиләрә мәктуб»унда Павел јазыр: «Өз илтифатына мүвафиг олманы һәм истәмәниз, һәм дә иҹра етмәниз үчүн сиздә фәал олан, Аллаһдыр». Бәли, Јеһова дахилимиздә фәалијјәт ҝөстәрәрәк арзу вә истәкләримизә тәсир едә биләр (Филип. 2:13; 4:13).
10 Буна ҝөрә дә Јеһовадан үрәјимиздә Онун ирадәсини јеринә јетирмәк арзусу инкишаф етдирмәсини хаһиш етмәли дејиликми? Гәдим Исраил падшаһы Давуд да мәһз бу һагда дуа едәрәк дејирди: «Ја Рәбб, јолларыны мәнә ҝөстәр, ардынҹа ҝетмәји мәнә өјрәт. Мәни һагг јолу илә апар, һәгигәтини мәнә өјрәт. Мәни гуртаран Аллаһ Сәнсән, даим Сәни ҝөзләјирәм» (Мәз. 25:4, 5). Биз дә ејнилә Јеһоваја дуа етмәлијик ки, биздә Она мәгбул тәрздә давранмаг истәјини алышдырсын. Јеһова Аллаһын вә Оғлунун мараглары наминә хидмәтдә етдикләримизә онларын неҹә јанашдыглары үзәриндә дүшүнәндә үрәјимиз миннәтдарлыгла долуб-дашыр (Мат. 26:6-10; Лука 21:1-4). Бу ҹүр миннәтдарлыг һисси тәшвиг едәҹәк ки, биздә хидмәтдә даһа чох шеј етмәк истәји алышдырмасы үчүн Јеһоваја дуа едәк. Јешаја пејғәмбәрин хидмәтә мүнасибәти һәр биримизә нүмунәдир вә биз дә өзүмүздә бу ҹүр мүнасибәт инкишаф етдирмәлијик. О, Јеһованын: «Кими ҝөндәрим? Бизим үчүн ким ҝедәҹәк?» суалына: «Мән бурадајам. Мәни ҝөндәр»,— дејә ҹаваб верди (Јешаја 6:8).
Неҹә тәрәгги етмәк олар?
11. а) Нәјә ҝөрә тәшкилатда үзәрләринә мәсулијјәт ҝөтүрә биләҹәк гардашлара бөјүк тәләбат вар? б) Гардаш јығынҹагда мәсулијјәтләрә неҹә ҹан ата биләр?
11 Бүтүн дүнјада 2008-ҹи хидмәт или әрзиндә 289 678 нәфәрин вәфтиз олунмасы ҝөстәрир ки, рәһбәрлији өз үзәринә ҝөтүрә биләҹәк гардашлара бөјүк тәләбат вар. Гардашлар буна неҹә һај вермәлидирләр? Гысаҹа олараг десәк, Мүгәддәс Јазыларда хидмәти көмәкчиләр вә ағсаггаллар үчүн тәләбләрә мүвафиг олмаға ҹан атмагла (1 Тим. 3:1-10, 12, 13; Тит. 1:5-9). Гардашлар бу Мүгәддәс Китаб тәләбләринә неҹә мүвафиг ола биләрләр? Онлар хидмәтдә фәал иштирак едә, јығынҹагдакы мәсулијјәтләри чалышганлыгла јеринә јетирә, мәсиһчи ҝөрүшләриндә вердикләри шәрһләри јахшылашдыра вә һәмиманлылары илә шәхсән мараглана биләрләр. Бунунла онлар јығынҹагдакы јерләрини гијмәтләндирдикләрини ҝөстәрирләр.
12. Ҝәнҹләр һәгигәт үчүн сәј ҝөстәрдикләрини неҹә нүмајиш етдирә биләрләр?
12 Ҝәнҹ, хүсусилә дә јенијетмә јашларында олан гардашлар јығынҹагда неҹә тәрәгги едә биләрләр? Онлар Мүгәддәс Јазылары өјрәнмәклә ‘һикмәт вә руһани идракда’ бөјүмәјә ҹан ата биләрләр (Колос. 1:9). Шүбһәсиз ки, Аллаһын Кәламыны сәјлә арашдырмаг вә јығынҹаг ҝөрүшләриндә фәал иштирак етмәк бу мәгсәдә наил олмаға көмәк едәҹәк. Һәмчинин ҝәнҹ гардашлар таммүддәтли хидмәтин мүхтәлиф нөвләринә ‘ачылан ҝениш гапыдан’ кечмәк үчүн тәләбләрә мүвафиг олмаға чалыша биләрләр (1 Кор. 16:9). Јеһоваја хидмәтдә инкишаф етмәк, һәгигәтән дә, мәмнунедиҹи һәјат јолудур вә бу јолда јеримәк бөјүк хејир-дуалар ҝәтирир. (Ваиз 12:1 ајәсини оху.)
13, 14. Баҹылар јығынҹагдакы ролларыны гијмәтләндирдикләрини неҹә ҝөстәрә биләрләр?
13 Һәмчинин баҹылар да Мәзмур 68:11 ајәсиндәки сөзләрин јеринә јетмәсиндә шәхсән иштирак етмәклә онлара верилән шәрәфи гијмәтләндирдикләрини ҝөстәрә биләрләр. Бу ајәдә охујуруг: «Худавәнд әмр едир, бир алај гадынлар белә мүждә пајлајырлар». Баҹыларын јығынҹагда јерләрини гијмәтләндирдикләрини ҝөстәрмәјин ән јахшы үсулларындан бири шаҝирд һазырламаг ишиндә иштирак етмәкдир (Мат. 28:19, 20). Беләликлә, хидмәтдә там иштирак етмәклә вә бунун үчүн гурбан вермәјә һазыр олмагла баҹылар јығынҹагда ојнадыглары ролу гијмәтләндирдикләрини ҝөстәрмиш олурлар.
14 «Титуса мәктуб»унда Павел јазырды: «Гарылар ејни шәкилдә мүгәддәсләрә лајиг тәрздә даврансынлар,.. хејирхаһлыг тәлим етсинләр ки, ҝәнҹ гадынларын башларына ағыл гојсунлар ки, онлар өз әрләрини, ушагларыны севсинләр, тәмкинли, исмәтли, евдар, хејирхаһ, өз әрләринә табе олсунлар ки, Аллаһын кәламы күфр олунмасын» (Тит. 2:3-5). Јеткин баҹыларын јығынҹаға фајдасы данылмаздыр. Рәһбәрлији үзәринә ҝөтүрән гардашлара һөрмәт етмәклә, ејни заманда ҝејим вә хариҹи ҝөрүнүш вә әјләнҹә кими мәсәләләрдә мүдрик гәрарлар гәбул етмәклә онлар башгаларына ҝөзәл нүмунә верир вә јығынҹагда јерләрини јүксәк гијмәтләндирдикләрини ҝөстәрмиш олурлар.
15. Субај баҹылар тәнһалығын өһдәсиндән неҹә ҝәлә биләрләр?
15 Бәзән субај баҹыја јығынҹагда өз јерини тапмаг чәтин ола биләр. Бунунла бағлы чәтинлији олан бир баҹы гејд едир: «Һәрдән өзүмү тәнһа һисс едирәм». Бәс о, бу вәзијјәтин өһдәсиндән неҹә ҝәлир? Баҹы дејир: «Дуа вә шәхси өјрәнмә мәнә јенидән јерими тапмаға көмәк едир. Өјрәнмә заманы Јеһованын мәнә неҹә мүнасибәт бәсләдијини арашдырырам. Сонра да јығынҹагда башгалары үчүн фајдалы ишләр ҝөрмәјә чалышырам. Бу, мәнә көмәк едир ки, јалныз өзүм барәдә јох, башгалары барәдә дә дүшүнүм». Мәзмур 32:8 ајәсинә әсасән, Јеһова Давуда дејир: «Нәсиһәт верәҹәјәм, ҝөзүм сәнин үстүндә олаҹаг». Бәли, Јеһова, субај баҹылар да дахил олмагла, һәр кәсә сәмими мараг ҝөстәрир вә јығынҹагда өз јерини тапмаға көмәк едир.
Јерини әлдән вермә!
16, 17. а) Нәјә ҝөрә Јеһованын тәшкилатынын бир һиссәси олмаг дәвәтини гәбул етмәк ән јахшы гәрардыр? б) Јеһованын тәшкилатында өз јеримизи неҹә горуја биләрик?
16 Јеһова һәр бир хидмәтчисини Онунла мүнасибәт гурмаға дәвәт едир. Иса демишди: «Әҝәр Мәни ҝөндәрән Атам ҹәлб етмирсә, һеч ким Мәним јаныма ҝәлә билмәз» (Јәһ. 6:44). Јеһова милјардларла инсанын ичиндән шәхсән бизи Онун јығынҹағына гошулмаға дәвәт едиб. Бу дәвәти гәбул етмәклә биз һәјатда ән јахшы гәрары гәбул етмишик вә һәјатын мәнасыны тапмышыг. Һәмчинин јығынҹагда јеримиз олдуғу үчүн биз бөјүк севинҹ вә мәмнунлуг дујуруг.
17 «Ја Рәбб, мәскәнин олан еви... севирәм»,— дејә мәзмурчу сөјләјирди. О һәмчинин охујурду: «Ајағым дүзлүк үстүндә дурур, ҹәмијјәтин ичиндә Рәббә алгыш едәҹәјәм» (Мәз. 26:8, 12). Һәгиги Аллаһ Өз тәшкилатында һәр биримизә јер ајырыб. Биз теократик рәһбәрлијә табе олмагла вә Јеһоваја хидмәтимизи давам етдирмәклә Онун гурулушунда дәјәрли јеримизи горуја биләрик!
Јадыныздадырмы?
• Нәјә ҝөрә демәк олар ки, јығынҹагда һәр мәсиһчинин өз јери вар?
• Аллаһын тәшкилатында јеримизи гијмәтләндирдијимизи неҹә ҝөстәрә биләрик?
• Јығынҹагда һансы јери тутмағымыз нәдән асылы ола биләр?
• Ҝәнҹ вә јеткин мәсиһчиләр Аллаһын гурулушундакы јерләрини гијмәтләндирдикләрини неҹә ҝөстәрә биләрләр?
[16-ҹы сәһифәдәки шәкил]
Гардашлар јығынҹагда мәсулијјәтләрә неҹә ҹан ата биләрләр?
[17-ҹи сәһифәдәки шәкил]
Баҹылар јығынҹагда тутдуглары јери гијмәтләндирдикләрини неҹә ҝөстәрә биләрләр?