Гоҹаланда да бар верирләр
‘Рәббин евиндә әкиләнләр гоҹаланда да бар верәҹәкләр’ (МӘЗМУР 92:13, 14).
1, 2. а) Гоҹалыг адәтән неҹә тәсвир едилир? б) Мүгәддәс Јазылара әсасән, Адәмин ҝүнаһынын нәтиҹәләри илә нә олаҹаг?
ГОҸАЛЫГ дејәндә ағлыныза илк ҝәлән нә олур? Гырышмыш дәри? Ағыр ешидән гулаг? Тагәтдән дүшмүш дизләр? Јохса Ваиз 12:1-7 ајәләриндә һәртәрәфли тәсвир олунан ‘пис ҝүнләрин’ диҝәр әламәтләри? Әҝәр беләдирсә, јадда сахламаг лазымдыр ки, бурада Јараданымызын нијјәт етдији јашлылығын әламәтләри дејил, Адәмин ҝүнаһынын инсан бәдәнинә тә’сиринин нәтиҹәси олан гоҹалығын әламәтләри тәсвир олунур (Ромалылара 5:12).
2 Јаша долмаг өз-өзлүјүндә лә’нәт дејил, чүнки мөвҹуд олмаг үчүн илләрин кечмәси ҝәрәкдир. Әслиндә, бөјүмәк вә јеткинлијә чатмаг бүтүн ҹанлы варлыглар үчүн арзуолунандыр. Ҝүнаһ вә гејри-камиллијин алты мин иллик зәрәри тезликлә кечмишдә галаҹаг, итаәткар инсанлар, илк дәфә нәзәрдә тутулдуғу кими, гоҹалыг вә өлүмүн ҝәтирдији ағры олмадан јашајаҹаглар (Јарадылыш 1:28; Вәһј 21:4, 5). О вахт һеч ким «“хәстәјәм” демәјәҹәк» (Јешаја 33:24). Гоҹалар ‘јенијетмәлик дөврүнә гајыдаҹаглар’, онларын ‘бәдәни ушаг бәдәни кими тәзә олаҹаг’ (Әјјуб 33:25). Лакин инди һәр биримиз Адәмдән алдығымыз мирас илә мүбаризә апармалы олуруг. Јеһованын хидмәтчиләринә исә јаша долмаг бир чох бахымдан фајда ҝәтирир.
3. Мәсиһчиләр һансы мә’нада ‘гоҹаланда да бар верә’ биләрләр?
3 Аллаһын Кәламы бизи әмин едир ки, ‘Рәббин евиндә әкиләнләр гоҹаланда да бар верәҹәкләр’ (Мәзмур 92:13, 14). Мәзмурчу бәдии диллә ваҹиб һәгигәти ачыглајыр: Аллаһын садиг хидмәтчиләри ҹисмән гоҹалсалар да, руһани ҹәһәтдән инкишаф едиб чичәкләнә биләрләр. Мүгәддәс Китабдан вә һәјатдан олан бир чох нүмунәләр бунун доғрудан да белә олдуғуну сүбут едир.
‘Мә’бәддән һеч ајрылмазды’
4. Гоҹа Анна Аллаһа сәдагәтини неҹә ҝөстәрди вә Аллаһ ону неҹә мүкафатландырды?
4 Пејғәмбәр Аннанын нүмунәсинә бахаг. 84 јашына чатан Анна «мә’бәд әразисиндән һеч ајрылмаз, ҝеҹә-ҝүндүз оруҹ тутуб дуа едәрәк, ибадәтлә мәшғул иди». Атасы Леви дејил, «Ашер гәбиләсиндән» олдуғу үчүн о, мә’бәддә јашаја билмәзди. Тәсәввүр един ки, һәр ҝүн сәһәр ҝәтирилән тәгдимдән ахшам ҝәтирилән тәгдимәдәк мә’бәддә олмаг онун үчүн нә демәк иди! Сәдагәтинә ҝөрә Аллаһ Аннаны бол-бол мүкафатландырды. Јусиф вә Мәрјәм Гануна ујғун олараг көрпә Исаны Јеһоваја тәгдим етмәк үчүн мә’бәдә ҝәтирәндә Анна да орада иди. Исаны ҝөрәндә Анна «Рәбби мәдһ едиб Јерусәлимдә гуртулуш ҝөзләјәнләрин һамысына бу Көрпә һаггында данышды» (Лука 2:22-24, 36-38; Сајлар 18:6, 7).
5, 6. Јаша долмуш бир чох баҹы-гардашларымыз Аннаја нәдә бәнзәјирләр?
5 Јаша долмуш бир чох баҹы-гардашларымыз ҝөрүшләрә мүнтәзәм ҝәлдикләри, һәгиги ибадәт үчүн әлләриндән ҝәләни етдикләри вә хош хәбәри ҹошғун арзу илә бөлүшдүкләри үчүн Аннаја бәнзәјирләр. Ҝөрүшләрә јолдашы илә бирликдә мүнтәзәм ҝәлән 80 јашларында олан гардаш демишди: «Ҝөрүшләрә ҝетмәк бизим үчүн адәт һалыны алыб. Ҝөрүш вахты башга һеч јердә олмаг истәмирик. Аллаһын халгы һарададырса, биз дә орада олмаг истәјирик. Өзүмүзү мәһз орада раһат һисс едирик». Онларын нүмунәси неҹә дә руһландырыҹыдыр! (Ибраниләрә 10:24, 25).
6 «Әҝәр һансыса руһани тәдбир олаҹагса вә мән иштирак едә биләрәмсә, демәли орада олаҹағам». Бу, 80 јашында олан дул мәсиһчи гадынын шүарыдыр. О дејир: «Әлбәттә, мәним дә гәмҝин вахтларым олур, анҹаг нә үчүн бу вахт башгаларынын да кефини позум?» Ҹејн руһани тәдбирләрлә әлагәдар башга өлкәләрә ҝетмәјиндән севинҹлә данышырды. Ахырынҹы сәјаһәтиндә о, јол јолдашларына демишди: «Мән даһа галалара бахмаг истәмирәм, тәблиғә ҝетмәк истәјирәм!» Орада данышылан дили билмәсә дә, Ҹејн һәмсөһбәтләриндә Мүгәддәс Китаба мараг ојада билмишди. Бундан әлавә, јени дил өјрәнмәк вә бир тәрәфә бир саат вахт сәрф етмәк лазым ҝәлмәсинә бахмајараг, о, бир нечә ил әрзиндә көмәјә еһтијаҹы олан јығынҹагда хидмәт етди.
Һафизәнизи ҹанлы сахлајын
7. Муса аһыл вахтында Аллаһла мүнасибәтләрини мөһкәмләндирмәк арзусуну неҹә ифадә етмишди?
7 Илләр өтдүкҹә һәјат тәҹрүбәси артыр (Әјјуб 12:12). Руһани инкишаф исә јашла бирҝә өз-өзүнә ҝәлмир. Буна ҝөрә, кечмишдә әлдә едилән билијә ҝүвәнмәк әвәзинә, Аллаһын садиг хидмәтчиләри илләр кечдикҹә ‘биликләрини артырырлар’ (Сүлејманын мәсәлләри 9:9, КМ). Јеһова Мусаја тапшырыг верәндә онун 80 јашы вар иди (Чыхыш 7:7). Онун дөврүндә о јаша ҝәлиб чатмаг, ҝөрүнүр, гејри-ади иди. Бу онун јаздығы сөзләрдән бәллидир: «Јетмиш ил өмүр сүрәрик, сағлам олсаг, сәксәнә јетишәрик» (Мәзмур 90:10). Анҹаг Муса өјрәнмәк үчүн јашынын өтдүјүнү һеч вахт дүшүнмүрдү. Онилликләр әрзиндә Аллаһа хидмәт етдикдән, ҹидди тапшырыглар јеринә јетирдикдән сонра Муса Јеһовадан хаһиш етди: «Јалварырам, өз јолуну мәнә аҝаһ елә ки, Сәни таныјым» (Чыхыш 33:13). Мусанын Јеһова илә мүнасибәтләрини мөһкәмләндирмәк арзусу һеч вахт сөнмүрдү.
8. Даниел пејғәмбәр 90 јашларында олса да, һафизәсини неҹә ҹанлы сахлајырды вә бу һансы нәтиҹәләр ҝәтирди?
8 Даниел пејғәмбәр тәхминән 90 јашларында оланда да Мүгәддәс Јазылары арашдырырды. Еһтимал ки, «Левилиләр», «Јешаја», «Јеремја», «Һушә», «Амос» китабларынын дахил олдуғу «китаблардан» өјрәндикләри ону Јеһоваја үрәкдән дуа етмәјә тәшвиг етди (Даниел 9:1, 2). Јеһова һәмин дуанын ҹавабында Мәсиһин ҝәлиши вә һәгиги ибадәтин ҝәләҹәји барәдә пејғәмбәринә хәбәр верди (Даниел 9:20-27).
9, 10. Бә’зиләри һафизәләрини ҹанлы сахламаг үчүн нә едирләр?
9 Муса вә Даниел кими, биз дә ҝүҹүмүз дахилиндә руһани мөвзулары арашдырараг һафизәмизи ҹанлы сахлаја биләрик. Бир чохлары белә дә едир. 80 јашларында олан мәсиһчи ағсаггалы Вөрс чалышыр ки, «садиг вә ағыллы гул»ун бурахдығы һәр јени нәшри охусун (Матта 24:45). О дејир: «Мән һәгигәтә мәфтунам вә һәгигәтин нурунун ҝетдикҹә даһа чох сачдығыны ҝөрмәк мәни вәҹдә ҝәтирир» (Сүлејманын мәсәлләри 4:18). Өмрүнүн алтмыш илиндән чохуну таммүддәтли хидмәтдә кечирән Фред дә һәмиманлылары илә руһани сөһбәтләрин тәравәтләндириҹи олдуғуну дејир. О гејд едир: «Мүгәддәс Китаб һафизәмдә ҹанлы олмалыдыр. Мүгәддәс Китабы ҹанландыранда, јә’ни мә’налы едәндә вә өјрәндикләриндә “сәһиһ сөзләри” ҝөрәндә, алынан мә’лумат гырыг-гырыг олмајаҹаг. Һәр зәррәҹијин өз јериндә неҹә бәрг вурдуғу ҝөрүнәҹәк» (2 Тимотејә 1:13).
10 Јаша долмаг јени, мүрәккәб бир шеји өјрәнмәк үчүн манеә дејил. 60, 70, һәтта 80 јашларында олан адамлар јазыб-охумағы, јени дилләри өјрәнмишләр. Јеһованын Шаһидләринин бә’зиләри хош хәбәри мүхтәлиф халглардан олан инсанларла бөлүшмәк мәгсәдилә буну етмишләр (Марк 13:10). Һари вә арвады португалҹа данышан адамлара көмәк етмәји гәрара аланда онларын 70-ә јахын јашы вар иди. Һари дејир: «Сөзүн доғрусу, јаш өтдүкҹә һәр һансы иши ҝөрмәк чәтинләшир». Бунунла белә, сә’ј вә мәтанәт ҝөстәрәрәк онлар һәмин дилдә Мүгәддәс Китаб өјрәнмәләри кечирмәјә мүвәффәг олдулар. Артыг нечә илләрдир ки, Һари вилајәт конгресләриндә онун үчүн јени олан дилдә чыхыш едир.
11. Гоҹа һәмиманлыларымызын наилијјәтләрини нәзәрдән кечирмәјин мәгсәди нәдир?
11 Әлбәттә, белә чәтин ишләрә ҝиришмәјә һамынын шәраити вә сағламлығы јол вермир. Бәс бә’зи гоҹа баҹы-гардашларымызын наилијјәтләрини нәзәрдән кечирмәкдә мәгсәдимиз нәдир? Сөзсүз ки, һамыны һаггында данышдығымыз шејләрә ҹан атмаға тәшвиг етмәк дејил. Мәгсәди анламаға һәвари Павелин садиг ағсаггаллар барәдә ибрани мәсиһчиләринә јаздығы сөзләр көмәк едәр: «Онларын јашајышынын нәтиҹәсинә бахараг, иманларыны тәглид един» (Ибраниләрә 13:7). Чалышган гоҹа һәмиманлыларымызын нүмунәси үзәриндә дүшүнмәк бизи онларын мөһкәм иманыны тәглид етмәјә тәшвиг едә биләр. Бәс инди 87 јашы олан Һарини нә руһландырыр? «Јердә галан илләрими ағылла кечирмәк вә имканым нә гәдәр јол верирсә, Јеһоваја хејир ҝәтирмәк истәјирәм». Јухарыда ады чәкилән Фред Бет-Елдә хидмәт етмәкдән бөјүк севинҹ дујур. О гејд едир: «Ҝәрәк Јеһоваја хидмәтин һансы нөвүндә даһа фајдалы олдуғуну тапасан вә ондан мөһкәм јапышасан».
Онлар дәјишкән вәзијјәтә бахмајараг, садиг галдылар
12, 13. Гоҹалмасына бахмајараг, Барзиллај Аллаһа сәдагәтини неҹә ҝөстәрди?
12 Сәһһәтин писләшмәси илә мүбаризә апармаг чәтиндир. Лакин буна бахмајараг, садиг галмаг мүмкүндүр. Бу бахымдан ҝилеадлы Барзиллај ҝөзәл нүмунәдир. Авшалом үсјан галдыран заман о, 80 јашында ола-ола Давуду вә ордусуну азугә, сығынаҹагла тә’мин едәрәк чох бөјүк гонагпәрвәрлик ҝөстәрди. Давуд Јерусәлимә гајыданда Барзиллај ону Иордан чајына гәдәр өтүрдү. Давуд Барзиллаја сарајда јашамағы тәклиф етди. Онун ҹавабы нә олду? «Мәним бу ҝүн сәксән јашым вар... Гулун һеч једијинин, ичдијинин дадыны билирми? Киши вә гадын ханәндәләринин сәсини ешидә биләрәмми?.. Лакин будур, гулун Кимһам, гој о, ағам падшаһла чајы кечсин вә сән дә ҝөзүндә хош ҝөрүнәни онун үчүн ет» (2 Шамуел 17:27-29; 19:31-40).
13 Барзиллај гоҹалса да, Јеһованын мәсһ олунмуш падшаһына көмәк етмәк үчүн әлиндән ҝәләни әсирҝәмәди. О, әввәлки кими дад билмәдији, ешитмәдији үчүн һиддәтләнмирди. Өз јеринә Кимһамын сараја ҝетмәсини тәклиф етмәклә, дахилән неҹә инсан олдуғуну ҝөстәрди. Бу ҝүн Аллаһын бир чох јаша долмуш хидмәтчиләри дә Барзиллај кими өз мәнфәәтләрини ҝүдмүрләр вә сәхавәтлидирләр. Онлар ‘бу ҹүр гурбанларын Аллаһа мәгбул’ олдуғуну биләрәк һәгиги ибадәт үчүн әлләриндән ҝәләни едирләр. Арамызда садиг баҹы-гардашларын олмасы неҹә дә бөјүк хејир-дуадыр! (Ибраниләрә 13:16).
14. Давудун јашлы олмасы Мәзмур 37:23-25 ајәләриндәки сөзләрә неҹә мә’на гатыр?
14 Давуд илләр әрзиндә мүхтәлиф шәраитләрә дүшсә дә, о, һәмишә әмин иди ки, Јеһова даим садиг хидмәтчиләринин гејдинә галыр. О, һәјатынын сонуна јахын, инди 37-ҹи мәзмур кими танынан илаһини јазды. Давудун дүшүнҹәли-дүшүнҹәли лира чалараг: «Рәбб инсана ҝедәҹәји јолу ҝөстәрир, кимдән разы галырса, ону мөһкәмләндирир. Бу инсан бүдрәсә дә, јыхылмаз, чүнки Рәбб онун әлиндән тутар. Ҝәнҹлијимдән гоҹалығымадәк салеһин тәрк едилдијини, нәслинин чөрәк үчүн диләндијини ҝөрмәмишәм», — дејә охудуғуну тәсәввүр един (Мәзмур 37:23-25). Јеһова бу мәзмурда Давудун јашынын хатырланмасыны мүнасиб билди. Бу амил үрәкдән ҝәлән сөзләрә неҹә дә бөјүк мә’на гатыр!
15. Дәјишкән вәзијјәтинә вә гоҹалдығына бахмајараг, һәвари Јәһја садиглијини неҹә горуду?
15 Дәјишкән вәзијјәтинә вә гоҹалығына бахмајараг, садиглији горујан башга бир нәфәр һәвари Јәһја иди. Аллаһа тәхминән 70 ил хидмәт едәндән сонра Јәһја ‘Аллаһын кәламы вә Иса Мәсиһин шәһадәтинә’ ҝөрә Патмос адасына сүрҝүн олунду (Вәһј 1:9). Амма онун һәлә ҝөрүләси ишләри чох иди. Јәһја Мүгәддәс Јазылара дахил олан бүтүн китабларыны өмрүнүн сон илләриндә јазмышдыр. Патмос адасында оларкән она вәһј верилди, о, ҝөрдүкләрини дәгигликлә гәләмә алды (Вәһј 1:1, 2). Елә һесаб олунур ки, Јәһја Рома императору Нерванын ҝүнләриндә азадлыға бурахылмышдыр. Бундан сонра, тәхминән ерамызын 98-ҹи илиндә 90-100 јашларында оларкән Јәһја өзүнүн адыны дашыјан Мүждәни вә үч мәктубу јазды.
Сарсылмаз дөзүм нүмунәси
16. Данышыг габилијјәтини итирән инсанлар Јеһоваја садиг галдыгларыны неҹә ҝөстәрирләр?
16 Инсанларын имканы мүхтәлиф сәбәбләрдән ирәли ҝәләрәк мүхтәлиф дәрәҹәдә мәһдуд олур. Мисал үчүн, бә’зиләри данышыг габилијјәтини итирмишләр. Лакин онлар Аллаһын мәһәббәти вә лүтфү барәдә хатирәләри севә-севә үрәкләриндә горујурлар. Онлар дилдә дејә билмәсәләр дә, үрәкләриндә Јеһоваја дејирләр: «Ганунуну нә гәдәр севирәм! Һәмишә онун үзәриндә дәриндән дүшүнүрәм» (Мәзмур 119:97). Јеһова исә өз нөвбәсиндә ‘исмини дүшүнәнләри’ таныјыр вә Онун јолларына әһәмијјәт вермәјән бәшәријјәт ичиндә бу инсанларын неҹә сечилдијини ҝөрүр (Малаки 3:16, КМ; Мәзмур 10:4). Үрәјимизин дүшүнҹәләринин Јеһова үчүн хош олдуғуну билмәк неҹә дә бөјүк тәсәллидир! (1 Салнамәләр 28:9; Мәзмур 19:14).
17. Јеһоваја узун илләр хидмәт едәнләрин әлдә етдији надир шеј нәдир?
17 Нәзәрдән гачырмаг олмаз ки, Јеһоваја онилликләр әрзиндә хидмәт едәнләр, башга һеч ҹүр әлдә едилә билмәјәҹәк надир бир шеј — сарсылмаз дөзүм, сәбир газанмышлар. Иса демишди: «Өз ҹанларынызы сәбирлә хилас един» (Лука 21:19). Әбәди һәјаты алмаг үчүн дөзүм ваҹибдир. «Аллаһын ирадәсини» јеринә јетирән вә һәјат тәрзи илә садиглијинизи сүбут едән сизләр «вә’д олунмуш шеји» алмаға үмид едә биләрсиниз (Ибраниләрә 10:36).
18. а) Гоҹа хидмәтчиләриндә Јеһоваја хош олан нәдир? б) Нөвбәти мәгаләдә сөһбәт нәдән ҝедәҹәк?
18 Јеһова, истәр аз олсун, истәрсә дә чох, үрәкдән етдијиниз хидмәти гијмәтләндирир. Јаша долдугҹа ‘заһири варлыға’ нә олурса-олсун, ‘дахили варлыг’ ҝүндән-ҝүнә тәзәләнә биләр (2 Коринфлиләрә 4:16). Сүбһәсиз, Јеһова, кечмишдә ҝөрдүјүнүз ишләри гијмәтләндирир, анҹаг әмин ола биләрсиниз ки, Аллаһын ады наминә инди етдикләриниз дә Онун үчүн чох дәјәрлидир (Ибраниләрә 6:10). Бәс садиглијиниз башгаларына неҹә тә’сир ҝөстәрир? Бу һагда нөвбәти мәгаләдә данышылаҹаг.
Неҹә ҹаваб верәрдиниз?
• Анна гоҹа мәсиһчиләр үчүн һансы нүмунәни гојду?
• Мүәјјән наилијјәтләр әлдә етмәк үчүн јаш нәјә ҝөрә манеә дејил?
• Аллаһын хидмәтчиләри јаша долдугда да, садигликләрини неҹә ҝөстәрә биләрләр?
• Јеһова гоҹа хидмәтчиләринин Онун үчүн етдикләринә неҹә јанашыр?
[23-ҹү сәһифәдәки шәкил]
Гоҹа Даниел «китаблардан» Јәһуданын сүрҝүндә нә гәдәр олаҹағыны анлады.
[25-ҹи сәһифәдәки шәкилләр]
Бир чох гоҹа һәмиманлыларымыз ҝөрүшләрә мүнтәзәм ҝәлмәкдә, сә’јлә тәблиғ етмәкдә вә өјрәнмәјә һәвәс ҝөстәрмәкдә нүмунәдирләр.