Ҝәнҹләр үчүн хејир-дуа олан гоҹалар
«Јаша долуб сачыма дән дүшәнә гәдәр ҝәләҹәк нәслә гүввәтини, ҝәләҹәк нәслин һәр биринә гүдрәтини е’лан едәҹәјәм. Еј Аллаһ, мәни тәрк етмә» (МӘЗМУР 71:18).
1, 2. Јашлы инсанлар нәји унутмамалыдырлар вә бу мәгаләдә нәји арашдыраҹағыг?
ГӘРБИ АФРИКАДА бир ағсаггал гоҹа мәсһ олунмуш гардаша баш чәкәндә: «Ишләрин неҹәдир?» — дејә ондан сорушду. Ҹавабында гардаш: «Гача билирәм, туллана билирәм», — дејәрәк һәмин һәрәкәтләри ҝөстәрмәјә ҹалышды. «Анҹаг», — о әлавә етди, — «уча билмирәм». Нә демәк истәдији ајдын иди. «Баҹардығымы ҹанла-башла едирәм, баҹармадығымы исә етмирәм». Инди 80 јашларында олан һәмин ағсаггал о гардашын јумор һиссини вә сәдагәтини севә-севә хатырлајыр.
2 Јашлы адамын ҝөстәрдији хош, Аллаһа мәгбул хүсусијјәтләр әтрафдакыларда унудулмајан тәәссүрат ојада биләр. Әлбәттә, јаш өз-өзүнә нә мүдриклик ҝәтирир, нә дә мәсиһчи хүсусијјәтләри јарадыр (Ваиз 4:13). Мүгәддәс Китабда бу һагда дејилир: «Ағаран сачлар шәрәф таҹыдыр, салеһлик јолунун газанҹыдыр» (Сүлејманын мәсәлләри 16:31). Әҝәр сиз дә јаша долмусунузса, сөзләринизин вә һәрәкәтләринизин башгаларына нә гәдәр фајда ҝәтирә биләҹәјини баша дүшүрсүнүзмү? Ҝәлин јашлы инсанларын ҝәнҹләр үчүн неҹә бөјүк хејир-дуа олдуғуну ҝөстәрән бир нечә Мүгәддәс Китаб нүмунәсини арашдыраг.
Индијәдәк тә’сирини итирмәјән иман
3. Нуһун садиглији инди јашајан инсанлара һансы фајданы ҝәтирди?
3 Нуһун иман вә дөзүмүндән бу ҝүн биз дә фајдаланырыг. Нуһ ҝәми дүзәлдиб һејванлары јығанда, о ҹүмләдән инсанлара тәблиғ едәндә 600-ә јахын јашы вар иди (Јарадылыш 7:6; 2 Петер 2:5). Аллаһ горхусу сајәсиндә, Нуһ аиләси илә бирликдә бөјүк Дашгындан сағ чыхды вә бу ҝүн јер үзүндә јашајан бүтүн инсанларын улу бабасы олду. Дүздүр, Нуһун дөврүндә инсанларын өмрү узун иди. Анҹаг лап гоҹа вахтында да Нуһ Аллаһа садиг галды, бу да бөјүк хејир-дуалар ҝәтирди. О, Аллаһа нәдә садиг галды?
4. Нуһун дөзүмлү олмасы Аллаһын мүасир хидмәтчиләринә һансы фајданы ҝәтирир?
4 Нәмруд Јеһованын «јер үзүнү бүрүјүн» әмринә зидд ҝедәрәк Бабил гүлләсини тикмәјә башлајанда Нуһ тәхминән 800 јашында иди (Јарадылыш 9:1; 11:1-9). О, Нәмрудун үсјанына гошулмады. Јәгин буна ҝөрә дә Аллаһ үсјанкарларын дилини гарышдыранда Нуһун дилини дәјишмәди. Нуһун тәкҹә гоҹа јашында дејил, бүтүн өмрү боју ҝөстәрдији иман вә дөзүмлүлүк Аллаһын һәр јашдан олан хидмәтчиләри үчүн тәглид едилмәли нүмунәдир (Ибраниләрә 11:7).
Аилә үзвләринә тә’сири
5, 6. а) Ибраһимин 75 јашы оланда Јеһова она нә тапшырды? б) Ибраһим Аллаһын тапшырығына неҹә мүнасибәт ҝөстәрди?
5 Гоҹаларын аилә үзвләринин иманына тә’сир ҝөстәрмәси Нуһдан сонра јашајан Аллаһын хидмәтчиләринин нүмунәсиндән ајдын ҝөрүнүр. Аллаһ Ибраһимә: «Өз торпағындан, гоһумларынын арасындан, ата евиндән чых, сәнә ҝөстәрәҹәјим торпаға ҝет. Сәндән бөјүк бир милләт төрәдәҹәјәм, сәнә хејир-дуа верәҹәјәм», — дејәндә онун 75 јашы вар иди (Јарадылыш 12:1, 2).
6 Тәсәввүр един ки, сиздән евинизи, достларынызы, доғма дијарынызы вә гоһум-әграбанызы тәрк едиб, танымадығыныз јерә ҝетмәјинизи истәјирләр. Ибраһим мәһз белә бир тапшырыг алмышды. О, «Рәббин она сөјләдији кими орадан чыхды» вә өмрүнүн галан илләрини Кән’ан торпағында чадырларда кечириб, гәриб вә көчәри кими јашады (Јарадылыш 12:4; Ибраниләрә 11:8, 9). Јеһова Ибраһимдән ‘бөјүк милләт төрәдәҹәјини’ вә’д етсә дә, о, нәслинин сајы артмаздан чох әввәл өлдү. Ибраһим Вә’д едилмиш дијарда 25 ил јашадыгдан сонра арвады Сара јалныз бир өвлад — Исһагы дүнјаја ҝәтирди (Јарадылыш 21:2, 5). Амма Ибраһим ҝөзләмәкдән тәнҝә ҝәлмәди вә чыхдығы шәһәрә дөнмәди. Неҹә дә ҝөзәл иман вә дөзүм нүмунәсидир!
7. Ибраһимин дөзүмлү олмасы оғлу Исһага неҹә тә’сир ҝөстәрди вә бәшәријјәтә һансы фајданы ҝәтирди?
7 Ибраһимин дөзүмлү олмасы өмрү боју, јә’ни 180 ил гәриб вә көчәри кими Кән’анда јашајан оғлу Исһага бөјүк тә’сир ҝөстәрмишди. Исһаг Аллаһын вә’динә инандығы үчүн дөзүмлү олду. Бу иманы она әввәлҹә гоҹа ата-анасы ашыламыш, сонра исә Јеһова онунла данышараг мөһкәмләндирмишди (Јарадылыш 26:2-5). Јеһова бәшәријјәтә хејир-дуа ҝәтирәҹәк Зүрријјәтин Ибраһимдән төрәјәҹәјини вә’д етмишди, Исһагын мәтанәтли олмасы исә бу нијјәтин јеринә јетмәсиндә һәлледиҹи ролу ојнады. Јүзләрлә илләр кечәндән сонра Зүрријјәтин әсас һиссәси олан Иса Мәсиһ она иман ҝәтирәнләр үчүн Аллаһла барышмаға вә әбәди һәјаты алмаға јол ачды (Галатијалылара 3:16, КМ; Јәһја 3:16).
8. Јагуб сарсылмаз имана саһиб олдуғуну неҹә нүмајиш етдирди вә нәтиҹәси нә олду?
8 Исһаг да, өз нөвбәсиндә, оғлу Јагуба гоҹа вахтында она дајаг олан сарсылмаз имана саһиб олмаға көмәк етди. Јагуб хејир-дуа алмаг үчүн бүтүн ҝеҹәни мәләклә ҝүләшәндә 97 јашы вар иди (Јарадылыш 32:24-28). 147 јашлы Јагуб өлүм јатағында икән вар ҝүҹүнү топлајыб 12 оғлунун һәр биринә хејир-дуа верди (Јарадылыш 47:28). Јагубун Јарадылыш 49:1-28 ајәләриндә јазылан пејғәмбәрлик сөзләри дүз чыхды вә һәлә дә јеринә јетмәкдәдир.
9. Јаша долмуш инсанлар өз аилә үзвләринә неҹә тә’сир ҝөстәрирләр?
9 Ҝөрдүјүмүз кими, Аллаһын садиг гоҹаман хидмәтчиләри аилә үзвләринә јахшы тә’сир ҝөстәрә биләрләр. Мүгәддәс Китаба әсасланан нәсиһәтлә јанашы ағыллы мәсләһәт вә дөзүм нүмунәси ушағын мөһкәм имана саһиб олмасына чох бөјүк көмәк едә биләр (Сүлејманын мәсәлләри 22:6). Јаша долмуш инсанлар өз аилә үзвләринә ҝүҹлү тә’сир ҝөстәрдикләрини һеч заман унутмамалыдырлар.
Һәмиманлылара ҝөстәрдикләри тә’сир
10. Јусифин ‘сүмүкләри һаггында әмри’ нәдән ибарәт иди вә бу, башгаларына неҹә тә’сир ҝөстәрмишди?
10 Јашлы баҹы-гардашлар һәмиманлылара да јахшы тә’сир едә биләрләр. Јагубун оғлу Јусиф гоҹа вахтында имандан ирәли ҝәләрәк етдији садә бир һәрәкәти илә өзүндән сонра јашајан милјонларла Аллаһын хидмәтчисинә бөјүк тә’сир ҝөстәрди. О, ‘сүмүкләри һаггында әмр верәндә’, јә’ни исраиллиләрин Мисири тәрк едән заман онун сүмүкләрини өзләри илә апармағы тапшыранда 110 јашында иди (Ибраниләрә 11:22; Јарадылыш 50:25). Бу әмр Јусифин өлүмүндән сонра узун илләр көләлик едән исраиллиләр үчүн үмид шәфәги кими сачараг гуртулушун ҝәләҹәјинә онлары әмин едирди.
11. Гоҹа Муса Јешуаја неҹә тә’сир ҝөстәрмишди?
11 Јусифин иманындан бәһрәләнәнләр арасында Муса да вар иди. Муса 80 јашында оланда Јусифин сүмүкләрини Мисирдән чыхарды (Чыхыш 13:19). Елә һәмин арада јашҹа ондан чох кичик олан Јешуа илә таныш олду. Сонракы 40 ил әрзиндә Јешуа Мусаја хидмәт етди (Сајлар 11:28). Ону Сина дағына ҝедәндә мүшајиәт етмиш вә шәһадәт лөвһәләри илә дағдан енәнә гәдәр орада ҝөзләмишди (Чыхыш 24:12-18; 32:15-17). Шүбһәсиз, гоҹа Муса Јешуа үчүн ағыллы, дүзҝүн мәсләһәт гајнағы иди.
12. Јешуа өмрү боју Исраил халгына неҹә тә’сир ҝөстәрмишди?
12 Јешуа исә өз нөвбәсиндә өмрү боју бүтүн Исраил халгына јахшы тә’сир ҝөстәрирди. Һакимләр 2:7 ајәсиндә дејилир: «Јешуанын бүтүн өмрү боју Рәббин Исраил үчүн етдији бүтүн бөјүк ишләри ҝөрән вә Јешуадан сонра сағ галан ағсаггалларын бүтүн өмрү бојунҹа халг Рәббә гуллуг етди». Јешуанын вә башга ағсаггалларын өлүмү илә Шамуел пејғәмбәрин ҝүнләринәдәк давам едән, һәгиги вә јалан ибадәт арасындакы 300 иллик тәрәддүд дөврү башланды.
Шамуел ‘салеһ иш ҝөрүрдү’
13. Шамуел һансы ‘салеһ ишләри’ ҝөрүрдү?
13 Мүгәддәс Китабда Шамуелин нечә јашында өлдүјү һагда мә’лумат верилмир, анҹаг «Биринҹи Шамуел» китабында јазыланлар 102 или әһатә едир, Шамуел исә онларын чохунун шаһиди олмушдур. Ибраниләрә 11:32, 33 (И–93) ајәләриндә дејилир ки, салеһ һаким вә пејғәмбәрләр ‘салеһ иш ҝөрүрдүләр’. Бәли, Шамуелин тә’сири алтында онун бә’зи мүасирләри писликдән әл чәкдиләр (1 Шамуел 7:2-4). Нәјин сајәсиндә Шамуел јахшы тә’сир ҝөстәрә билди? О, өмрү боју Јеһоваја садиг галды (1 Шамуел 12:2-5). Һәтта падшаһы да мәзәммәт етмәјә горхмады (1 Шамуел 15:16-29). Бундан башга, ‘гоҹалыб, сачлары ағармыш’ Шамуел башгалары үчүн дуа етмәкдә јахшы нүмунә гојду. О, исраиллиләрә ҝөрә дуа етмәји дајандырмағы «Рәббә гаршы ҝүнаһ етмәк» кими гијмәтләндирди (1 Шамуел 12:2, 23).
14, 15. Јашлы баҹы-гардашлар дуа етмәкдә Шамуелдән неҹә нүмунә ҝөтүрә биләрләр?
14 Бурадан Аллаһын гоҹа хидмәтчиләринин һәмиманлыларына дәјән әсас јахшылығын нә олдуғуну ҝөрүрүк. Сағламлыгла бағлы вә диҝәр проблемләрлә үзләшдикдә дә, јашлы мәсиһчиләр башгалары үчүн дуа едә биләрләр. Әзиз јаша долмуш баҹы-гардашларымыз, сизин дуаларынызын јығынҹаг үчүн неҹә бөјүк хејир-дуа олдуғуну билирсинизми? Мәсиһин төкүлән ганына иман ҝәтирдијиниз үчүн сиз Јеһова гаршысында јахшы ад газанмыш, узун илләр әрзиндә мәтанәтли галдығыныз үчүн исә ‘иманыныз сынагдан мүвәффәгијјәтлә кечмишдир’ (Јагуб 1:3; 1 Петер 1:7). Һеч вахт унутмајын: «салеһ адамын дуасы чох ҝүҹлү вә тә’сирлидир» (Јагуб 5:16).
15 Јеһованын ишиндә сизин дуаларыныза еһтијаҹ вар. Бә’зи гардашларымыз битәрәфлији горудуглары үчүн һәбсханаларда јатырлар. Диҝәрләри тәбии фәлакәтләр, мүһарибәләр вә өлкәдахили чәкишмәләрин гурбаны олмушлар. Јығынҹагларымыздакы баҹы-гардашлар исә сынагларла вә тә’гибләрлә үзләширләр (Матта 10:35, 36). Тәблиғ ишинә вә јығынҹаглара рәһбәрлик едәнләр дә сизин мүнтәзәм дуаларыныза еһтијаҹ дујурлар (Ефеслиләрә 6:18, 19; Колослулара 4:2, 3). Неҹә дә хошдур ки, сиз дә Епафра кими, һәмиманлыларынызы дуаларынызда хатырлајырсыныз! (Колослулара 4:12).
Ҝәләҹәк нәслә тә’лим
16, 17. Мәзмур 71:18 ајәсиндә һансы пејғәмбәрлик јазылыб вә о, неҹә јеринә јетир?
16 Јер үзүндә јашајаҹаг ‘башга гојунлар’ сәмави дә’вәтә малик олан ‘кичик сүрүнүн’ үзвләри илә, јә’ни садиг мәсиһчиләрлә әмәкдашлыг едәрәк јахшы тә’лим алмышлар (Лука 12:32; Јәһја 10:16). Бу, Мәзмур 71:18 ајәсиндә габагҹадан дејилмишди: «Јаша долуб сачыма дән дүшәнә гәдәр ҝәләҹәк нәслә гүввәтини, ҝәләҹәк нәслин һәр биринә гүдрәтини е’лан едәҹәјәм. Еј Аллаһ, мәни тәрк етмә». Руһла мәсһ едилмишләр Иса Мәсиһлә бирҝә иззәтләнмәк үчүн ҝөјә галхмаздан әввәл башга гојунлары ҝетдикҹә артан мәс’улијјәтләрә һазырлајырлар.
17 Мәзмур 71:18 ајәсиндә һаггында данышылан ‘ҝәләҹәк нәслин’ тә’лим алмасы, мәсһ олунмушлардан тә’лим алан башга гојунлара да аид едилә биләр. Јеһова јашлы хидмәтчиләринә һәгиги ибадәтә јени ҝәләнләрә Өзү һаггында шаһидлик етмәк сәлаһијјәтини вериб (Јоел 1:2, 3). Мәсһ олунмушлардан тә’лим алмаг башга гојунлар үчүн хејир-дуадыр, онлар исә өз нөвбәсиндә билдикләрини Јеһоваја хидмәт етмәк истәјән диҝәр инсанларла бөлүшүрләр (Вәһј 7:9, 10).
18, 19. а) Јеһованын јашлы хидмәтчиләринин чоху һансы гијмәтли билији бөлүшә биләр? б) Гоҹа мәсиһчиләр нәјә әмин олмалыдырлар?
18 Һәм мәсһ олунмушлардан, һәм башга гојунлардан олан Аллаһын гоҹаман хидмәтчиләри тәшкилатымызын тарихиндәки ваҹиб һадисәләрин ҹанлы шаһиди олмушлар. «Јарадылыш фотодрамы»нын илк нүмајишләриндә иштирак едәнләрин бә’зиләри һәлә дә сағдырлар. Бә’зиләри 1918-ҹи илдә һәбс едилән мәс’ул гардашлары шәхсән таныјырдылар. Диҝәрләри «Ҝөзәтчи Гүлләси» радиостансијасында (WББР) чалышмышлар. Бир чохлары Јеһованын Шаһидләринин дини азадлығына даир ишләринин али мәһкәмәләрдә гәләбә газандығы вахтлардан даныша биләрләр. Башгалары диктатор режими алтында һәгиги ибадәтин тәрәфиндә мөһкәм дурмушлар. Гоҹа баҹы-гардашлар илләр әрзиндә һәгигәтин тәдриҹән неҹә ачыгландығыны даныша биләрләр. Мүгәддәс Китаб бизи тәшвиг едир ки, дүнјаҝөрмүш бу инсанлардан нүмунә ҝөтүрәк (Ганунун тәкрары 32:7).
19 Аллаһын Кәламы гоҹа мәсиһчиләри ҝәнҹләрә нүмунә олмаға чағырыр (Титуса 2:2-4). Бәлкә дә сиз мәтанәт, дуа вә мәсләһәтләринизин диҝәрләринә ҝөстәрдији тә’сири инди ҝөрмүрсүнүз. Нуһ, Ибраһим, Јусиф, Муса вә башгалары садиг галмагларынын ҝәләҹәк нәсилләрә неҹә тә’сир ҝөстәрәҹәјини билә билмәздиләр. Лакин онларын иман вә нөгсансызлығынын тә’сири бөјүк олдуғу кими, сизин дә нүмунәниз ҝәләҹәк нәслә ејни ҹүр тә’сир ҝөстәрә биләр.
20. Үмидини ахыра гәдәр мөһкәм горујанлары һансы хејир-дуалар ҝөзләјир?
20 ‘Һәгиги һәјаты’ истәр ‘бөјүк мәшәггәтдән’ сағ чыхараг, истәр дириләнләрин арасында олараг әлдә етмәк неҹә дә ҝөзәл олаҹагдыр! (Матта 24:21; 1 Тимотејә 6:19, И–93). Мәсиһин Миниллик Һөкмранлығы дөврүндә гоҹалыгдан ҹаванлыға гајытмағы бир тәсәввүрүнүзә ҝәтирин. Биз һәр сәһәр ојананда гоҹалығын аҹы әламәтләрини дејил, сәһһәтимизин јахшылашдығыны — ҹаванлыг ҝүҹү илә долдуғумузу, ҝөзләримизә ишыг ҝәлдијини, јахшы ешитдијимизи вә даһа јахшы ҝөрүндүјүмүзү ҝөрәҹәјик (Әјјуб 33:25; Јешаја 35:5, 6). Аллаһын јени дүнјасында инсанлар әбәди јашасалар да, һәмишә ҹаван галаҹаглар (Јешаја 65:22). Буна ҝөрә ҝәлин Јеһоваја бүтүн үрәкдән хидмәт едәрәк үмидимизи ахыра гәдәр мөһкәм сахлајаг. Әмин ола биләрик ки, Јеһова бүтүн вә’дләрини һәјата кечирәҹәк вә үмидләримизи ҝөзләдијимиздән дә артыг доғрулдаҹаг (Мәзмур 37:4; 145:16).
Неҹә ҹаваб верәрдиниз?
• Нуһун мәтанәтли олмасы бүтүн бәшәријјәтә һансы хејир-дуалары ҝәтирди?
• Гәдимдә јашамыш аилә башчыларынын иманы өвладларына неҹә тә’сир етмишди?
• Јусиф, Муса, Јешуа вә Шамуел гоҹа вахтларында һәмиманлыларыны неҹә мөһкәмләндирирдиләр?
• Јашлылар ҝәләҹәк нәслә һансы мирасы өтүрә биләрләр?
[28-ҹи сәһифәдәки шәкил]
Мусанын мүдрик мәсләһәтләри Јешуаны мөһкәмләндирирди.
[29-ҹу сәһифәдәки шәкил]
Башгалары үчүн етдијиниз дуаларын чох бөјүк хејри вар.
[30-ҹу сәһифәдәки шәкил]
Јеһованын садиг гоҹа хидмәтчиләри илә үнсијјәт ҝәнҹләрә чох фајда ҝәтирә биләр.
[31-ҹи сәһифәдәки шәкил]
Ибраһимин дөзүмлү олмасы Исһага бөјүк тә’сир ҝөстәрди.