Јеһованын ҝүнүнү тәһәммүллә ҝөзләјин
‘Иманыныза тәһәммүл әлавә един’ (2 ПЕТЕР 1:5-7).
1, 2. Тәһәммүл нәдир вә о, мәсиһчиләрә нә үчүн лазымдыр?
ЈЕҺОВАНЫН мөһтәшәм ҝүнү чох јахындыр (Јоел 1:15; Сефанја 1:14). Аллаһ гаршысында нөгсансызлығы горумаға гәти гәрарлы олан биз мәсиһчиләр Јеһованын Өз һөкмранлығына бәраәт газандыраҹағы вахты сәбирсизликлә ҝөзләјирик. Амма һәләлик иманымыз уғрунда нифрәт, тәһгир, тә’гиб вә һәтта өлүмлә үзләширик (Матта 5:10-12; 10:22; Вәһј 2:10). Бу заман биздән тәһәммүл, јә’ни бәдбәхтликләрә таб ҝәтирмәк тәләб олунур. Һәвари Петер бизи ‘иманымыза тәһәммүл әлавә етмәјә’ сәсләјир (2 Петер 1:5-7). Тәһәммүл етмәк ваҹибдир, чүнки Иса демишдир: «Ахыра гәдәр сәбир едән хилас олаҹагдыр» (Матта 24:13).
2 Биз һәмчинин хәстәликләрлә, әзизләримизин иткиси илә јахуд башга сынаглара үзләширик. Бу заман чәтинликләрә дөзмәјиб иманымызы итирсәк, Шејтан неҹә дә севинәр! (Лука 22:31, 32). Јеһованын көмәјилә биз һәр ҹүр сынаға таб ҝәтирә биләрик (1 Петер 5:6-11). Ҝәлин Јеһованын ҝүнүнү тәһәммүллә вә сарсылмаз иманла ҝөзләмәјин мүмкүн олдуғуну ҝөстәрән бә’зи баҹы-гардашларын нүмунәсини нәзәрдән кечирәк.
Хәстәлик онларын әзмини гырмады
3, 4. Хәстәлијә бахмајараг Јеһоваја сәдагәтлә хидмәт едә биләҹәјимизи ҝөстәрән нүмунә чәкин.
3 Аллаһ бу ҝүн мө’ҹүзәли шәкилдә һеч кими сағалтмыр, анҹаг хәстәлијә таб ҝәтирмәк үчүн ҝүҹ-гүввә верир (Мәзмур 41:1-3). Шарон бөлүшүр: «Ҝөзүмү ачандан әлил арабасы мәнимләдир. Дүнјаја ҝәлән ҝүндән ифлиҹ ушаглыг севинҹими әлимдән алыб». Һәм Јеһова, һәм дә ҝәләҹәкдә һамынын там сағлам олаҹағы һаггында ешидәндә Шаронда үмид јаранды. Данышмаға вә јеримәјә чәтинлик чәксә дә, мәсиһчи хидмәти она севинҹ ҝәтирир. Тәхминән 15 ил бундан әввәл о демишди: «Сәһһәтим ҝетдикҹә писләшсә дә, Аллаһа иманым вә Онунла мүнасибәтләрим мәни һәјата бағлајыр. Јеһованын халгы арасында олдуғума вә Онун мәнә даим дајаг дурдуғуна ҝөрә чох хошбәхтәм».
4 Һәвари Павел Салоникдә јашајан мәсиһчиләри ‘кәдәрли оланлары руһландырмаға’ тәшвиг едирди (1 Салоникилиләрә 5:14, ЈД). Дәрин кәдәр инсаны депрессијаја сала биләр. Шарон 1993-ҹү илдә јазмышды: «Бүсбүтүн руһдан дүшәрәк... үч ил дәрин депрессијада олдум... Ағсаггаллар мәнә тәсәлли вә мәсләһәтләр верәрәк көмәјимә чатдылар... “Ҝөзәтчи Гүлләси” васитәсилә Јеһова шәфгәтлә ағыр депрессијанын нә олдуғуну анламаға мәнә көмәк етди. Бәли, О Өз халгынын гајғысына галыр вә һиссләримизи баша дүшүр» (1 Петер 5:6, 7). Шарон Јеһованын мөһтәшәм ҝүнүнү ҝөзләјәрәк һәлә дә Аллаһа сәдагәтлә хидмәт едир.
5. Һансы нүмунә ҝөстәрир ки, мәсиһчи бөјүк сарсынтыја таб ҝәтирә биләр?
5 Бә’зи мәсиһчиләр кечмишдә үзләшдикләри һадисәләрә ҝөрә мә’нәви сарсынты кечирирләр. Һарли Икинҹи Дүнја мүһарибәсиндә ганлы дөјүшләрин шаһиди олмуш вә мүһарибә илә бағлы дәһшәтли јухулар ҝөрүрдү. О, һәр дәфә: «Еһтијатлы ол! Өзүнү ҝөзлә!» — дејә гышгырараг ган-тәр ичиндә јухудан ојанырды. Анҹаг Һарли һәјатыны Аллаһын нормаларына ујғунлашдырды вә дәһшәтли јухулар ону әввәлки кими нараһат етмәди.
6. Бир гардаш емосионал проблемләрә неҹә таб ҝәтирирди?
6 Биполар позулма диагнозу гојулмуш бир мәсиһчијә евдән-евә тәблиғ етмәк чох чәтин иди. Лакин о, хидмәтин һәм өзү үчүн, һәм дә һај верәнләр үчүн һәјат демәк олдуғуну баша дүшдүјүндән, тәблиғ етмәјә сон гојмурду (1 Тимотејә 4:16). Бә’зән һеч гапынын зәнҝини басмаға да өзүнү мәҹбур едә билмирди. О дејирди: «Бир аз кечәндән сонра өзүмү топлајыр, нөвбәти гапыја јахынлашыр вә бир дә ҹәһд ҝөстәрирдим. Хидмәтими дајандырмамағын сајәсиндә руһани сағламлығымы горујуб сахлајырам». Ҝөрүшләрә ҝетмәк дә бу гардаш үчүн сынаға чеврилмишди, лакин о, руһани үнсијјәтин ваҹиблијини дәрк едирди. Буна ҝөрә, ҝөрүшләрә ҝәлмәк үчүн бүтүн ҝүҹүнү сәфәрбәр едирди (Ибраниләрә 10:24, 25).
7. Бә’зиләри аудиторија гаршысында чыхыш етмәкдән вә ја ҝөрүшләрә ҝәлмәкдән горхсалар да, неҹә мәтанәт ҝөстәрирләр?
7 Бә’зи мәсиһчиләр фобијалардан — һансыса вәзијјәтдән вә ја нәдәнсә һәдсиз горхудан әзијјәт чәкирләр. Мәсәлән, ола билсин, онлар аудиторија гаршысында чыхыш етмәкдән вә ја ҝөрүшләрә ҝәлмәкдән горхурлар. Тәсәввүр един, онлара мәсиһчи ҝөрүшләриндә шәрһ вермәк вә «Теократик Хидмәт Мәктәби»ндә чыхыш етмәк нә гәдәр чәтиндир! Лакин бу баҹы-гардашлар мәтанәт ҝөстәрирләр вә биз онларын ҝөрүшләрә ҝәлмәсини, онларда иштирак етмәсини олдугҹа гијмәтләндиририк.
8. Емосионал проблемлә үзләшәркән хүсусилә нәјин көмәји дәјә биләр?
8 Даһа чох јатмаг вә истираһәт етмәк емосионал проблемләрә таб ҝәтирмәјә көмәк едәр. Белә һалларда һәкимә мүраҹиәт етмәк дә мәсләһәтдир. Лакин Јеһова Аллаһа дуа етмәјин вә Она бел бағламағын хүсусилә көмәји дәјир. Мәзмур 55:22 ајәсиндә дејилир: «Сән гајғы јүкүнү Рәббә вер, гој сәнә дајаг олсун. О һеч вахт салеһә сарсынты вермәз». Буна ҝөрә дә «бүтүн гәлбинлә Рәббә ҝүвән» (Сүлејманын мәсәлләри 3:5, 6).
Ағыр иткијә дөзмәк
9-11. а) Әзиз адамымызын өлүмүнә таб ҝәтирмәјә нә көмәк едәр? б) Иткијә таб ҝәтирмәјә Аннанын нүмунәси неҹә көмәк едәр?
9 Өлүмүн аилә үзвләрини бир-бириндән ајырмасы инсаны гәм-гүссәјә гәрг едир (Јарадылыш 23:2). Севимли арвады Сара өләндә Ибраһим јас тутуб ағлајырды. Һәтта камил инсан олан Иса Мәсиһ досту Лазар өләндә «ағлады» (Јәһја 11:35). Беләликлә, әзизләримиздән кимсә өлүм јухусуна ҝедәндә кәдәрләнмәк тәбиидир. Лакин мәсиһчиләр дирилмәнин олаҹағыны билирләр (Һәвариләрин ишләри 24:15). Бу сәбәбдән онлар ‘үмидсиз олан башгалары кими кәдәрләнмирләр’ (1 Салоникилиләрә 4:13).
10 Ағыр иткијә неҹә дөзә биләрик? Нөвбәти нүмунәнин үзәриндә дүшүнүн. Адәтән достумуз сәјаһәтә чыханда биз буна ҝөрә узун мүддәт кәдәрләнмирик, чүнки онун јенидән гајыдаҹағыны билирик. Садиг мәсиһчинин дә өлүмүнә елә бахсаг, кәдәримиз азалар, чүнки онун дириләҹәјини билирик (Ваиз 7:1).
11 ‘Һәр ҹүр тәсәлли верән Аллаһа’ там е’тибар иткијә таб ҝәтирмәјә көмәк едәҹәк (2 Коринфлиләрә 1:3, 4). Дул гадын Аннанын һәјаты үзәриндә дүшүнмәк фајдалы олар. Әрә ҝедәндән ҹәми једди ил сонра о, дул галды. Анҹаг 84 јашында оланда о, һәлә дә мә’бәддә Јеһоваја мүгәддәс хидмәти иҹра едирди (Лука 2:36-38). Белә һәјат, сөзсүз ки, гүссәјә вә тәнһалыға таб ҝәтирмәјә көмәк едирди. Падшаһлығын тәблиғи дә дахил олмагла, мәсиһчи ишләриндә мүнтәзәм иштирак етмәк иткијә дөзмәјә көмәк едәҹәк.
Мүхтәлиф сынагларла үзләшәндә
12. Бә’зи мәсиһчиләр аилә һәјаты илә бағлы һансы сынаға таб ҝәтирирләр?
12 Бә’зи мәсиһчиләр аилә проблемләринә таб ҝәтирмәли олурлар. Мәсәлән, һәјат јолдашынын хәјанәт етмәси аилә үчүн неҹә дә бөјүк зәрбәдир! Сарсынты кечирән вә кәдәр ичиндә олан алдадылмыш тәрәф, ола билсин, ҝеҹәләр јатмыр, ҝөзүнүн јашы гурумаг билмир, ади ишләри ҝөрмәјә ҝүҹү чатмыр. Ола билсин, онун иштаһасы күсүр, арыглајыр, һалы пәришан олур, һәтта мәсиһчи ишләриндә иштирак етмәк дә чәтинләшир. Һәлә ушагларын кечирдији һиссләри демирик!
13, 14. а) Мә’бәдин тәнтәнәли ачылыш мәрасиминдә Сүлејманын сөјләдији дуа сизә неҹә тәсәлли верир? б) Биз нә үчүн мүгәддәс руһ һаггында дуа едирик?
13 Бу кими сынагларла үзләшәндә Јеһова лазыми көмәји биздән әсирҝәмир (Мәзмур 94:19). Јеһованын Өз хидмәтчиләринин сәсини ешитмәси мә’бәдин тәнтәнәли ачылыш мәрасими заманы Сүлејман падшаһын етдији дуадан ҝөрүнүр. О демишди: «Кимсә тәрәфиндән јахуд да бүтүн халгын Исраил тәрәфиндән бир дуа вә јалварыш оларса, һәр кәс өз үрәјинин дәрдини билиб бу мә’бәдә тәрәф әлләрини ачса, о вахт Сән ҝөјдә — Өз мәскәниндә ешит, бағышла вә бир әлаҹ ет. Үрәјини билдијин һәр адама бүтүн әмәлләринә ҝөрә әвәз вер, чүнки һәр инсанын үрәјини јалныз Сән билирсән. Та ки онлар аталарымыза вердијин торпагда јашадыглары бүтүн ҝүнләр боју Сәндән горхсунлар» (1 Падшаһлар 8:38-40).
14 Мүгәддәс руһ барәдә даим дуа етмәк хүсусилә фајдалы ола биләр (Матта 7:7-11). Руһун сәмәрәсинә севинҹ вә сүлһ кими кејфијјәтләр дахилдир (Галатијалылара 5:22, 23). Сәмави Атамызын дуаларымыза ҹаваб вермәси гәлб раһатлығы ҝәтирир — кәдәр севинҹә чеврилир, ағры-аҹынын јерини исә сүлһ тутур.
15. Һансы ајәләр тәлашымызы азалда биләр?
15 Бөјүк сарсынты кечирәндә тәлаша дүшмәмәк гејри-мүмкүндүр. Амма Исанын нөвбәти сөзләрини јадда сахласаг, нараһатчылығымызы мүәјјән гәдәр азалда биләрик: «Нә јејәҹәксиниз, јахуд нә ичәҹәксиниз дејә ҹанынызын, нә ҝејәҹәксиниз дејә бәдәнинизин гајғысына галмајын... Лакин әввәлҹә Аллаһын Сәлтәнәтини вә Онун салеһлијини ахтарын; вә бунларын һамысы сизә әлавә олараг вериләҹәкдир» (Матта 6:25, 33, 34). Һәвари Петер ‘гајғымызы Аллаһын үзәринә гојмаға’ тәшвиг едир, ‘чүнки гајғымыза галан Одур’ (1 Петер 5:6, 7). Проблеми һәлл етмәк үчүн сә’ј ҝөстәрмәк дә лазымдыр. Анҹаг әлимиздән ҝәләни едәндән сонра, гајғы чәкмәклә һеч нә дүзәлмәјәҹәк, бизә көмәк едән дуа олаҹаг. Мәзмурчу охујурду: «Јолуну Рәббә вер, Она ҝүвән, О едәҹәк» (Мәзмур 37:5).
16, 17. а) Нә үчүн биз нараһатчылыгдан там азад ола билмәрик? б) Филипилиләрә 4:6, 7 ајәләринә әмәл етсәк, нә һисс едәҹәјик?
16 Павел јазырды: «Һеч нәјин гејдинә галмајын, амма һәр шејдә, дуа вә нијаз едәрәк, өз хаһишләринизи Аллаһа шүкранла билдирин. Вә Аллаһын һәр ҹүр ағылдан үстүн олан сүлһү Мәсиһ Иса васитәсилә үрәкләринизи вә дүшүнҹәләринизи горујаҹагдыр» (Филипилиләрә 4:6, 7). Тәбии ки, Адәмин гејри-камил өвладлары нараһатчылыгдан тамамилә азад ола билмәзләр (Ромалылара 5:12). Есавын хетли арвадлары онун Аллаһдан горхан валидејнләри Исһаг вә Ривганын «үрәкләринә дәрд олду» (Јарадылыш 26:34, 35). Ҝөрүнүр, хәстәлик Тимотеј вә Трофим кими мәсиһчиләри чох нараһат едирди (1 Тимотејә 5:23; 2 Тимотејә 4:20). Павел һәмиманлыларындан ниҝаран иди (2 Коринфлиләрә 11:28). Анҹаг «дуалары ешидән» Аллаһ Ону севәнләрин дадына һәмишә чатыр (Мәзмур 65:2).
17 Јеһованын ҝүнүнү ҝөзләдијимиз бу мүддәт әрзиндә, «сүлһ верән Аллаһ» бизә дајаг олуб, тәсәлли верир (Филипилиләрә 4:9). Јеһова ‘рәһмли вә лүтфкар’, ‘хејирхаһ вә бағышлајандыр’, «торпагдан дүзәлмәјимизи унутмур» (Чыхыш 34:6; Мәзмур 86:5; 103:13, 14). Буна ҝөрә дә, ҝәлин ‘өз хаһишләримизи Аллаһа билдирәк’, чүнки бунун сајәсиндә үрәјимиздә инсан ағлындан үстүн олан ‘Аллаһын сүлһү’ — динҹлик сакин олаҹаг.
18. Әјјуб 42:5 ајәсинә әсасән, Аллаһы ‘ҝөрмәк’ неҹә мүмкүндүр?
18 Дуаларымыза ҹаваб аланда Аллаһын бизимлә олдуғуну баша дүшүрүк. Әјјуб сынаглара таб ҝәтирәндән сонра демишди: «[Јеһова,] гулагларыма сорағын чатмышды, индисә Сәни ҝөзләримлә ҝөрүрәм» (Әјјуб 42:5). Ағлымызын вә иманымызын ҝөзү илә бахараг, һәмчинин миннәтдарлыгла Аллаһын бизимлә неҹә даврандығы үзәриндә дүшүнәрәк Ону һәмишәкиндән дә јахшы ‘ҝөрә’ биләрик. Бу ҹүр јахын мүнасибәт бизә неҹә дә бөјүк гәлб раһатлығы ҝәтирир!
19. Бүтүн гајғымызы Јеһованын үзәринә гојсаг, өзүмүзү неҹә һисс едәҹәјик?
19 Бүтүн гајғымызы Јеһованын үзәринә гојсаг, үрәјимизи вә дүшүнҹәмизи горујан гәлб раһатлығы илә сынаглара таб ҝәтирә биләрик. Символик үрәјимиз нараһатлыглардан, горху вә тәлашдан азад олаҹаг. Чашгынлыг вә нараһатлыг зеһнимиздә јува салмајаҹаг.
20, 21. а) Стефанын нүмунәси неҹә ҝөстәрир ки, тә’гибләр заманы сакитлији горумаг мүмкүндүр? б) Сынаглар заманы сакитлији горујан мәсиһчиләрдән нүмунә чәкин.
20 Шиддәтли сынаг заманы шаҝирд Стефан сакитлијини горуду. Сонунҹу дәфә шаһидлик етмәздән габаг Синедриондакылар онун «үзүнү бир мәләк үзү кими ҝөрдүләр» (Һәвариләрин ишләри 6:15). Онун үз ифадәси Аллаһын елчиси олан мәләјинки кими сакит иди. Стефан Исанын өлүмүндә һакимләрин ҝүнаһыны үзләринә вуранда онлар «дахилән чох гәзәбләндиләр вә она гаршы диш гыҹыртдылар». Стефан исә «Мүгәддәс Руһла долуб ҝөзләрини ҝөјә дикәрәк, Аллаһын ҹалалыны вә Аллаһын сағында дуран Исаны ҝөрдү». Бу ҝөрүнтү Стефана ҝүҹ верди вә о, өлүмәдәк садиг галды (Һәвариләрин ишләри 7:52-60). Дүздүр, биз бу ҝүн вәһј алмырыг, анҹаг тә’гибләр заманы Аллаһ бизә дә сакитлик верир.
21 Ҝәлин ҝөрәк Икинҹи Дүнја мүһарибәси заманы фашистләр тәрәфиндән өлдүрүлән бә’зи мәсиһчиләр һансы һиссләри кечирмишдиләр. Мәһкәмәдә нә һисс етдији барәдә бир гардаш демишди: «Өлүм һөкмү чыхарылды. Һөкмү динләјәндән сонра сон сөз олараг Мәсиһин “өлүм баһасына да олса садиг гал” вә башга сөзләрини сөјләдим, бунунла да һәр шеј битди... Анҹаг гәм јемәјин. Сиз һеч ағлыныза да ҝәтирә билмәзсиниз ки, мән неҹә сакит, раһатам!» Бојну вурулмуш бир ҝәнҹ мәсиһчи валидејнләринә јазмышды: «Артыг ҝеҹә јарысындан кечиб. Фикримдән дөнмәјә һәлә вахтым вар. Аһ! Мәсиһи инкар етсәм, бу дүнјада јенә дә хошбәхт ола биләрәмми? Гәтијјән! Анҹаг архајын олун ки, мән бу дүнјаны хошбәхт вә сүлһ ичиндә тәрк едирәм». Шүбһә јохдур ки, Јеһова садиг хидмәтчиләринә дајагдыр.
Сиз тәһәммүл едә биләрсиниз!
22, 23. Нә гәдәр ки, Јеһованын ҝүнүнү тәһәммүллә ҝөзләјирсиниз, нәјә әмин ола биләрсиниз?
22 Ола билсин, сиз јухарыда һаггында данышдығымыз мүәјјән сынагларла һеч үзләшмәјәҹәксиниз. Амма Аллаһдан горхан Әјјуб һаглы олараг демишди ки, «гадындан доғулан инсанын өмрү аздыр, һәјаты сыхынты илә долудур» (Әјјуб 14:1). Бәлкә дә сиз ушагларыныза руһани дәјәрләри ашыламаға чалышырсыныз. Мәктәбдә сынаглара таб ҝәтирмәли олсалар да, өвладларынызын Јеһованын вә Онун салеһ принсипләринин тәрәфини мөһкәм тутмасы сизи чох севиндирир. Јахуд да сиз ишдә чәтинликләр вә ја имтаһанларла үзләшә биләрсиниз. Бу вә диҝәр сынаглара таб ҝәтирмәк мүмкүндүр, чүнки Јеһова ‘һәр ҝүн гајғы јүкүмүзү чәкир’ (Мәзмур 68:19).
23 Бәлкә дә сиз өз ҝөзүнүздә ади инсансыныз, анҹаг јадда сахлајын ки, Јеһова һеч вахт ишинизи вә Онун мүгәддәс ады наминә ҝөстәрдијиниз мәһәббәти унутмајаҹаг (Ибраниләрә 6:10). Онун көмәјилә иманыныз бүтүн сынаглара таб ҝәтирәҹәк. Беләликлә, Аллаһын ирадәси һагда дуа един вә ҝәләҹәк ишләринизи планлашдыраркән ону јаддан чыхармајын. Нә гәдәр ки, Јеһованын ҝүнүнү тәһәммүллә ҝөзләјирсиниз, әмин ола биләрсиниз ки, Онун хејир-дуасы вә көмәји сиздән әскик олмајаҹаг.
Неҹә ҹаваб верәрдиниз?
• Мәсиһчиләр нә үчүн тәһәммүл етмәлидирләр?
• Хәстәлијә вә әзизләримизин өлүмүнә таб ҝәтирмәјә нә көмәк едә биләр?
• Дуа сынаглара дөзмәјә неҹә көмәк едир?
• Јеһованын ҝүнүнү тәһәммүллә ҝөзләмәк нә үчүн мүмкүндүр?
[17-ҹи сәһифәдәки шәкил]
Үрәкдән дуа етмәк сынаглара таб ҝәтирмәјә көмәк едир.