Јеһова әдаләти севир
«Мән Рәбб әдаләти севирәм» (ЈЕШАЈА 61:8).
1, 2. а) «Әдаләт» вә «әдаләтсизлик» сөзләринин мә’насы нәдир? б) Мүгәддәс Китаб Јеһова вә Онун әдаләти һагда нә дејир?
ӘДАЛӘТ «һәрәкәт вә мүнасибәтләрин әхлаг вә һүгуг нормаларына ујғунлуғу, һагг вә инсаф принсипләринә риајәт» демәкдир. Әдаләтсизлик исә «әдаләтә, һагг вә инсафа зидд һәрәкәт», башгасына һагсыз јерә зәрәр јетирмәк демәкдир.
2 Тәхминән 3 500 ил әввәл Муса Каинатын Һөкмдары Јеһова барәдә јазмышдыр: «Бүтүн јоллары һагдыр, Садиг Аллаһдыр, һеч заман һагсызлыг етмәз» (Ганунун тәкрары 32:4). Једди әсрдән сонра Аллаһ Јешајаны бу сөзләри јазмаг үчүн илһамландырды: «Мән Рәбб әдаләти севирәм» (Јешаја 61:8). Биринҹи әсрдә јашамыш һәвари Павел нида етмишди: «Мәҝәр Аллаһын јанында һагсызлыгмы вар? Әсла!» (Ромалылара 9:14). Елә һәмин әсрдә Петер бәјан етмишди: «Аллаһ инсанларын кимлијинә бахмаз. Амма һәр халгдан олуб, Ондан горхан вә һагг иш ҝөрән Она мәгбулдур» (Һәвариләрин ишләри 10:34, 35). Бәли, Јеһова «әдаләти севир» (Мәзмур 37:28; Малаки 3:6).
Әдаләтсизлик баш алыб-ҝедир
3. Әдаләтсизлик јер үзүндә неҹә көк салды?
3 Бу ҝүн әдаләт дәбдә дејил. Әдаләтсизлијә ҹәмијјәтин һәр тәбәгәсиндә — иш јериндә, мәктәбдә, һакимијјәт даирәләриндә, һәтта аиләдә вә башга јерләрдә раст ҝәлинир. Әлбәттә, белә әдаләтсизлик јенилик дејил. Сонралар Шејтан Иблис олан руһани варлығын тәһрики илә илк валидејнләримиз үсјан едәндә әдаләтсизлик бәшәр аиләсинә јол тапды. Јеһованын бәхш етдији азад ирадәдән суи-истифадә етмәк Адәм, Һәвва вә Шејтан тәрәфиндән һагсызлыг иди. Онларын сәһв һәрәкәти бүтүн бәшәријјәт үчүн дәһшәтли әзабларла вә өлүмлә нәтиҹәләнди (Јарадылыш 3:1-6; Ромалылара 5:12; Ибраниләрә 2:14).
4. Нә гәдәр мүддәтдир ки, әдаләтсизлик бәшәријјәтин ајрылмаз һиссәси олараг галыр?
4 Еден бағында баш верән үсјандан сонракы 6 000 ил әрзиндә әдаләтсизлик инсан ҹәмијјәтинин ајрылмаз һиссәсинә чеврилди. Бу елә белә дә олмалы иди, чүнки дүнјанын танрысы Шејтандыр (2 Коринфлиләрә 4:4). О, јаланчы вә јаланын атасыдыр, бөһтанчы вә Јеһованын дүшмәнидир (Јәһја 8:44). О, һәмишә ҝөрүлмәмиш әдаләтсизликләр төрәдиб. Мәсәлән, Дашгындан әввәл Нуһун ҝүнләриндә Аллаһ ҝөрдү ки, «јер үзүндәки инсанларын шәр әмәлләри чохдур вә һәр заман онларын үрәјиндәки фикирләр вә нијјәтләр пислијә доғру јөнәлир» (Јарадылыш 6:5). Инсанларын белә олмасына Шејтан да мүәјјән дәрәҹәдә тә’сир ҝөстәрмишди. Исанын ҝүнләриндә дә вәзијјәт бу јердә иди. О, әдаләтсизлијин дә дахил олдуғу ҝүндәлик проблемләри нәзәрдә тутараг демишди: «Һәр ҝүнә өз дәрди јетәр» (Матта 6:34, И–93). Буна ҝөрә дә Мүгәддәс Китаб һаглы олараг дејир: «Бүтүн хилгәт индијә кими бирликдә фәрјад едиб доғум ағрысы чәкир» (Ромалылара 8:22).
5. Нә үчүн әдаләтсизлик бизим ҝүнләрдә әввәлкиндән даһа чох јајылыб?
5 Беләликлә, дәһшәтли әдаләтсизликлә нәтиҹәләнән писликләр бүтүн бәшәр тарихи бојунҹа баш вермишдир. Инди вәзијјәт әввәлкиндән дә писдир. Нәјә ҝөрә? Чүнки артыг бир нечә онилликләрдир ки, аллаһсыз дүнјанын ‘ахыр ҝүнләри’ башлајыб, сону јахынлашдыгҹа исә о, ‘чәтин анларыны’ јашајыр. Мүгәддәс Китаб пејғәмбәрлик етмишдир ки, тарихин бу дөврүндә инсанлар ‘худбин, пулпәрәст, ловға, тәкәббүрлү, күфр данышан, нанкор, гүдсијјәтдән мәһрум, шәфгәтсиз, барышмаз, бөһтанчы, нәфсини сахламајан, азғын, рәһмсиз, јахшылығын дүшмәни, хаин, еһтијатсыз, мәғрур олаҹаглар’ (2 Тимотејә 3:1-5). Бу кими пис хүсусијјәтләр һәр ҹүр әдаләтсизлијә ҝәтириб чыхарыр.
6, 7. Бизим зәманәдә һансы мисли ҝөрүлмәмиш һагсызлыглар баш верир?
6 Кечән јүзилликдә әдаләтсизлик ҝөрүлмәмиш сәвијјәјә чатмышды. Белә ки, ән мүдһиш мүһарибәләр һәмин илләрдә баш вермишдир. Мәсәлән, бә’зи тарихчиләрин һесабламаларына ҝөрә тәкҹә Икинҹи Дүнја мүһарибәси заманы һәлак оланларын үмуми сајы 50 милјондан 60 милјона гәдәр олмушдур. Онларын әксәријјәтини исә динҹ сакинләр — ҝүнаһсыз киши, гадын вә ушаглар тәшкил едирди. Һәмин мүһарибәдән сонра милјонларла инсанлар мүхтәлиф мүнагишәләрдә гәтлә јетирилмишләр. Јенә дә өләнләрин әксәријјәти динҹ әһали олмушдур. Јеһованын ону тамамилә мәғлуб едәҹәјини билән Шејтан гәзәбиндән бу ҹүр әдаләтсизлији јајыр. Мүгәддәс Китаб буну белә тәсвир едир: «Иблис, вахтынын аз олдуғуну биләрәк, бөјүк гәзәблә јаныныза енди» (Вәһј 12:12).
7 Бүтүн дүнјада һәрби мәгсәдләрә һәр ил тәхминән трилјон АБШ доллары сәрф едилир. Јүз милјонларла инсан ән зәрури еһтијаҹларыны белә өдәјә билмир. Анҹаг бүтүн бу пулларын динҹ мәгсәдләрә сәрф едилмәси ҝөрүн нә гәдәр фајда ҝәтирә биләрди. Кимләринсә боллуг ичиндә јашадығы һалда, тәхминән бир милјард инсан јарыаҹ-јарытох һәјат сүрүр. БМТ-нин вердији мә’лумата ҝөрә һәр ил тәгрибән беш милјон ушаг аҹлыгдан өлүр. Бу неҹә дә әдаләтсизликдир! Һәлә аборт нәтиҹәсиндә өлдүрүлән ҝүнаһсыз көрпәләрдән данышмырыг. Бүтүн дүнјада һәр ил 40 милјондан 60 милјона гәдәр гадын ушаг салдырыр. Неҹә дә дәһшәтли һагсызлыгдыр!
8. Һәгиги әдаләт јалныз һансы јолла бәрпа олуна биләр?
8 Бу ҝүн һаким даирәләри бәшәријјәтә әзијјәт верән чохсајлы проблемләрин һәллини тапа билмирләр; онларын ҝөстәрдији ҹәһдләр ҝәләҹәкдә дә вәзијјәти јахшылашдырмајаҹаг. Аллаһын Кәламында әввәлҹәдән дејилмишди ки, бизим ҝүнләрдә «пис адамлар вә сахтакарлар... алдадыб алданараг, ҝетдикҹә даһа бетәр олаҹаглар» (2 Тимотејә 3:13). Әдаләтсизлик ҝүндәлик һәјатымыза елә һопуб ки, инсанлар ону арадан галдырмаға гадир дејилләр. Јалныз һагг-әдаләт Аллаһы буну етмәјә гадирдир. Тәкҹә О, Шејтаны, ҹинләри вә шәр адамлары јох едә биләр (Јеремја 10:23, 24).
Инсанлары баша дүшмәк олар
9, 10. Асәф нәјә ҝөрә руһдан дүшдү?
9 Кечмиш заманларда һәтта Мүгәддәс Китабы јазанларын бә’зиләрини дә Аллаһын нәјә ҝөрә инсанларын ишләринә гарышмамасы, һагг-әдаләти вә салеһлији бәрпа етмәмәси суалы нараһат едирди. Мәсәлән, гәдимдә јашамыш бир адамын нүмунәсинә нәзәр салаг. 73-ҹү мәзмурун ҝириш сөзләриндә Асәфин ады јазылыб. Бурада ја Давуд падшаһын һакимијјәти заманы јашајан мәшһур илаһичи Асәфин өзү, ја да онун өвладлары нәзәрдә тутулур. Асәф вә онун өвладлары ибадәт заманы ифа едилән чохлу мусиги бәстәләмишдиләр. Амма бир дәфә бу мәзмурчу руһдан дүшдү. О ҝөрүрдү ки, пис адамларын пулу башындан ашыр. Она елә ҝәлирди ки, онлар һәјатларындан мәмнундурлар вә писликләрин әвәзини алмырлар.
10 Мәзмурчу јазырды: «Писләрин фираванлығыны ҝөрәркән бу мәғрурлара һәсәд апарырдым. Өләнәдәк онларын ағрылары јохдур, вүҹудлары әтә-ҹана ҝәлиб. Онлар башгалары кими дәрдә дүшмәзләр, әзаб чәкмәзләр» (Мәзмур 73:2-8). Анҹаг вахт кечдикҹә о белә дүшүнҹә тәрзинин јанлыш олдуғуну анлады (Мәзмур 73:15, 16). Мәзмурчу дүшүнҹә тәрзини дүзәлтмәјә чалышды, амма пис инсанларын нәјә ҝөрә ҹәзасыз галдығыны, садиг хидмәтчиләрин исә чох вахт әзијјәт чәкдијини сона гәдәр анлаја билмәди.
11. Мәзмурчу Асәф ахырда нәји баша дүшдү?
11 Кечмишдә јашајан бу инсан ахырда пис инсанлары һансы агибәтин ҝөзләдијини, Јеһованын ишләри јолуна гојаҹағыны баша дүшдү (Мәзмур 73:17-19). Давуд јазмышды: «Рәбби ҝөзлә, Онун јолуну тут, О сәнә өлкәни мүлк олараг верәҹәк, сәни јүксәлдәҹәк. Писләрин кәсилиб атылаҹағы заманы ҝөрәҹәксән» (Мәзмур 37:9, 11, 34).
12. а) Јеһованын пислијә вә һагсызлыға даир нијјәти нәдир? б) Аллаһын әдаләтсизлији арадан галдыраҹағы сиздә һансы һиссләр ојадыр?
12 Әмин олмаг олар ки, Јеһова пислији вә онун нәтиҹәси олан һагсызлығы вахты чатанда арадан галдырмаг нијјәтиндәдир. Һәтта садиг мәсиһчиләр белә буну мүнтәзәм олараг өзләринә хатырлатмалыдырлар. Јеһова Өз нијјәтинә гаршы чыханларын һамысыны арадан ҝөтүрәҹәк, итаәткарлары исә хејир-дуаландыраҹагдыр. «Рәббин ҝөрән ҝөзләри вар, ҝөзүнү ачар, бәшәр өвладларына диггәтлә бахар. Рәбб салеһ адамы сынагдан кечирир, писә, зүлмкараса нифрәт едир. Писләрин үстүнә одлу көз, күкүрд јағдырыр, онларын касаларына дүшән пај сәмум јели олаҹаг. Чүнки Рәбб адилдир, әдаләти севир» (Мәзмур 11:4-7).
Әдаләтли јени дүнја
13, 14. Нә үчүн јени дүнјада әдаләт вә салеһлик гәләбә газанаҹаг?
13 Јеһова Шејтанын идарә етдији бу әдаләтсиз дүнјаны мәһв едәндән сонра ҝөзәл јени дүнја гураҹаг. Јени дүнјада Аллаһын сәмави Падшаһлығы һөкм сүрәҹәк. Иса шаҝирдләринә һәмин Падшаһлыг һаггында дуа етмәји өјрәтмишди. Пислик вә һагсызлыг салеһлик вә әдаләтлә әвәз олунаҹаг, чүнки бу заман «Сәлтәнәтин ҝәлсин. Ҝөјдә олдуғу кими, Јердә дә Сәнин ирадән олсун» дуасына там мә’нада ҹаваб вериләҹәк (Матта 6:10).
14 Мүгәддәс Китаб тәмиз үрәкли кәсләрин сәбирсизликлә ҝөзләдији һәмин һакимијјәтин неҹә олаҹағыны бизә ачыглајыр. Мәзмур 145:16 ајәси о заман тамамилә һәјата кечәҹәк: «[Јеһова Аллаһ,] әлини ачырсан, бүтүн ҹанлылары дојунҹа једирирсән». Бундан әлавә Јешаја 32:1 ајәсиндә дејилир: «Будур, падшаһ [ҝөјдә олан Иса Мәсиһ] салеһликлә һөкм сүрәҹәк, башчылар [Исанын јердәки тәмсилчиләри] әдаләтлә рәһбәрлик едәҹәк». Падшаһ Иса Мәсиһә даир Јешаја 9:7 ајәси пејғәмбәрлик едир: «Һакимијјәтинин вә әмин-аманлығынын артмасынын сону олмајаҹаг, о, Давудун тахты вә сәлтәнәти үзәриндә һөкм сүрәҹәк, о, һакимијјәтини әдаләтлә вә салеһликлә индидән әбәди олараг гураҹаг. Ордулар Рәббинин гејрәти буну едәҹәк». Сән өзүнү һәмин әдаләтли Падшаһлығын һакимијјәти алтында јашајан тәсәввүр едирсәнми?
15. Јеһова јени дүнјада бәшәријјәт үчүн нәләр едәҹәк?
15 Аллаһын јени дүнјасында Ваиз 4:1 ајәсиндә јазылан «мән јенә сәма алтында едилән бүтүн зүлмләри ҝөрдүм: мәзлумларын ҝөз јашларыны ҝөрдүм, онлара тәсәлли верән јох иди, гүдрәт залымларын әлиндә иди, мәзлумлара тәсәлли верән јох иди» сөзләрини демәјә һеч бир сәбәб олмајаҹаг. Бизә өз гејри-камил ағлымызла һәмин салеһ дүнјанын неҹә олаҹағыны тәсәввүр етмәк чәтиндир. Пислик артыг мөвҹуд олмајаҹаг, әксинә, һәр ҝүн јахшылыгларла долу олаҹаг. Бәли, Јеһова һәр шеји бизим ҝөзләдијимиздән дә артыг јолуна гојаҹаг. Јеһова Аллаһын һәвари Петерә илһам верәрәк: «Биз Онун вә’динә ҝөрә јени ҝөјләр вә јени јер ҝөзләјирик ки, онларда салеһлик өмүр сүрүр» сөзләрини јаздырмасы неҹә дә мүнасибдир! (2 Петер 3:13).
16. «Јени ҝөјләр» нәдир вә «јени јер»ин өзәји бу ҝүн һансы мә’нада топланмагдадыр?
16 «Јени ҝөјләр», јә’ни Мәсиһин башчылыг етдији Аллаһын сәмави һөкумәти артыг тә’сис едилмишдир. ‘Јени јерин’, јә’ни садиг хидмәтчиләрдән ибарәт ҹәмијјәтин өзәјини тәшкил едәҹәк инсанлар бу ахыр ҝүнләрдә топланырлар. Тәхминән 235 өлкә вә әразидә 100 000-ә јахын јығынҹағы тәшкил едән бу инсанларын сајы једди милјона чатыр. Онлар Јеһованын әдаләтли вә салеһ јолларыны өјрәнирләр. Бунун нәтиҹәсиндә исә бүтүн дүнјада мәсиһчиләрин арасында мәһәббәт телләри илә мөһкәмләнмиш бирлик мөвҹуддур. Дүнја тарихиндә һәлә белә мөһкәм бирлик олмамышдыр. Бу бирлик Шејтанын тәбәәләринин арасындакы бирликдән гат-гат үстүндүр. Бу мәһәббәт вә бирлик салеһликлә вә әдаләтлә идарә олунаҹаг Аллаһын јени дүнјасынын нүмунәсидир (Јешаја 2:2-4; Јәһја 13:34, 35; Колослулара 3:14).
Шејтанын һүҹуму дәф едиләҹәк
17. Шејтанын Јеһованын халгына етдији сонунҹу һүҹумун уғурсузлугла нәтиҹәләнәҹәјинә нә үчүн әминик?
17 Шејтан вә онун тәрәфдарлары Јеһованын хидмәтчиләринин көкүнү кәсмәк мәгсәдилә тезликлә онлара һүҹум едәҹәкләр (Језекел 38:14-23). Бу, Исанын ‘дүнјанын башланғыҹындан индијәдәк олмамыш вә һеч олмајаҹаг’ бөјүк мәшәггәт адландырдығы һадисә заманы баш верәҹәк (Матта 24:21). Шејтан өз мәгсәдинә чатаҹагмы? Хејр. Аллаһын Кәламы бизи әмин едир: «Рәбб әдаләти севир, һеч заман мө’минләри тәрк етмир. Салеһләр даим мүдафиә олунаҹаг, писләр нәсилликлә кәсилиб атылаҹаг. Салеһләр өлкәни мүлк олараг алаҹаг, онлар орада әбәди мәскән салаҹаг» (Мәзмур 37:28, 29).
18. а) Шејтанын сонунҹу һүҹумуна ҹаваб олараг Аллаһ нә едәҹәк? б) Әдаләтин зәфәр газанаҹағы һаггында Мүгәддәс Китаба әсасланан бу мә’луматы арашдырмаг сизә һансы фајданы ҝәтирди?
18 Шејтанын вә онун тәрәфдарларынын Јеһованын хидмәтчиләринә етдији һәмин һүҹум онларын сон тәһгирамиз һәрәкәти олаҹагдыр. Јеһова Зәкәријјә васитәсилә демишди ки, халгына тохунан Онун ҝөз бәбәјинә тохунмуш олур (Зәкәријјә 2:8). Санки кимсә бармағыны Јеһованын ҝөз бәбәјинә сохур. Јеһова буна дәрһал ҹаваб верәҹәк вә ҹинајәткарлары јер үзүндән кәнарлашдыраҹаг. Јеһованын хидмәтчиләри дүнјанын ән динҹ, гануна итаәт едән, һәмрә’ј, мәһәббәтли инсанларыдыр. Буна ҝөрә дә онлара едилән һәмин һүҹум тамамилә һагсыз һүҹум олаҹаг. ‘Әдаләти севән’ Јеһова артыг дөзмәјәҹәк. О, халгынын мүдафиәсинә галхыб, дүшмәнләри һәмишәлик мәһв едәҹәк, һагг-әдаләт гәләбә чалаҹаг вә ваһид һәгиги Аллаһа ибадәт едәнләр хилас олаҹагдыр. Бизи јахын ҝәләҹәкдә неҹә дә һејрәтамиз, валеһедиҹи һадисәләр ҝөзләјир! (Сүлејманын мәсәлләри 2:21, 22).
Неҹә ҹаваб верәрдиниз?
• Нә үчүн әдаләтсизлик баш алыб ҝедир?
• Јеһова әдаләтсизлији неҹә арадан галдыраҹаг?
• Әдаләтин гәләбә газанаҹағы һагда олан бу мәгаләдә сизә ән чох тә’сир едән нә олду?
[9-ҹу сәһифәдәки шәкил]
Дашгындан габаг пислик неҹә баш алыб ҝедирдисә, јашадығымыз «ахыр ҝүнләрдә» дә вәзијјәт о јердәдир.
[10 вә 11-ҹи сәһифәдәки шәкил]
Аллаһын јени дүнјасында пислијин јерини әдаләт вә салеһлик тутаҹаг.