‘Атаныз мәрһәмәтлидир’
«Атаныз неҹә мәрһәмәтли исә, сиз дә елә мәрһәмәтли олун» (ЛУКА 6:36).
1, 2. Исанын дин алимләринә, фәрисејләрә вә өз давамчыларына дедији сөзләр мәрһәмәтин дәјәрли кејфијјәт олдуғуну неҹә ҝөстәрир?
МУСА васитәси илә Исраил халгына верилән Ганун тәхминән 600 тәләб вә гајдадан ибарәт иди. Мусанын Ганунуна әмәл етмәк ваҹиб олса да, мәрһәмәт ҝөстәрмәјин дә бөјүк әһәмијјәти варды. Исанын башгаларына мәрһәмәтсиз јанашан фәрисејләрә дедији сөзләрә нәзәр салаг. О, фәрисејләрин диггәтини Аллаһын сөзләринә јөнәлдәрәк онлары ики дәфә мәзәммәт едиб деди: «Мән гурбан јох, мәрһәмәт истәјирәм» (Матта 9:10-13; 12:1-7; Һушә 6:6). Јер үзүндәки хидмәтинин сонуна јахын Иса демишди: «Вај һалыныза, дин алимләри вә фәрисејләр, икиүзлүләр! Чүнки нанә, шүјүд вә зирәнин онда бирини верирсиниз, лакин Ганунун даһа ваҹиб ишләрини, әдаләти, мәрһәмәти вә иманы атырсыныз» (Матта 23:23).
2 Шүбһәсиз ки, Иса мәрһәмәти јүксәк гијмәтләндирирди. О, давамчыларына демишди: «Атаныз неҹә мәрһәмәтли исә, сиз дә елә мәрһәмәтли олун» (Лука 6:36). Бу саһәдә ‘Аллаһы тәглид етмәк’ үчүн биз һәгиги мәрһәмәтин нә олдуғуну билмәлијик (Ефеслиләрә 5:1). Мәрһәмәтли олмағын һансы фајданы ҝәтирдијини анламағымыз исә, бу кејфијјәти һәјатымызда даһа долғун шәкилдә тәзаһүр етдирмәјә тәшвиг едәҹәк.
Еһтијаҹы оланлара мәрһәмәт
3. Һәгиги мәрһәмәтин нә олдуғуну нәјә ҝөрә Јеһовадан өјрәнмәлијик?
3 Мәзмурчу охујурду: «Рәбб лүтфкар вә рәһмлидир, һәдсиз сәбирли вә бол мәһәббәтлидир. Рәбб һамыја хејирхаһлыг едәр, јаратдыгларынын һәр биринә мәрһәмәт ҝөстәрәр» (Мәзмур 145:8, 9). Јеһова «мәрһәмәтли Ата вә һәр ҹүр тәсәлли верән Аллаһдыр» (2 Коринфлиләрә 1:3). Мәрһәмәтли шәхс диҝәрләринин дәрдинә шәрик олараг онларла шәфгәтлә давраныр. Мәрһәмәт Аллаһын сәҹијјәви хүсусијјәтләриндән биридир. Онун нүмунәсиндән вә бизә вердији өјүд-нәсиһәтдән һәгиги мәрһәмәтин нә олдуғуну өјрәнә биләрик.
4. Јешаја 49:15 ајәсиндән мәрһәмәт һаггында нә өјрәнирик?
4 Јешаја 49:15 ајәсиндә Јеһованын бу сөзләрини охујуруг: «Ана сүдәмәр көрпәсини һеч унудармы? Бәтниндән чыхан оғлуна рәһм етмәзми?» Јеһованы мәрһәмәтли олмаға тәшвиг едән һиссләр, адәтән, ананын сүдәмәр көрпәсинә бәсләдији зәриф һиссләри илә мүгајисә едилир. Ола билсин, көрпә аҹдыр, јахуд онун башга бир шејә еһтијаҹы вар. Ана шәфгәт һиссиндән ирәли ҝәләрәк ушағынын гајғысыны чәкир. Јеһова да мәрһәмәт ҝөстәрдији инсанлара ејни зәриф һиссләри бәсләјир.
5. Јеһова исраиллиләрә гаршы мәрһәмәтинин бол олдуғуну неҹә ҝөстәрди?
5 Еһтијаҹы оланын һалына аҹымаг илә онун хејринә һәрәкәт етмәк фәргли шејләрдир. Ҝәлин ҝөрәк тәхминән 3 500 ил бундан әввәл халгы Мисир көләлијиндә оланда Јеһова буна неҹә мүнасибәт ҝөстәрмишди. О, Мусаја деди: «Һәгигәтән, Мән Мисирдә олан халгымын әзијјәтини ҝөрдүм, нәзарәтчиләрин әлиндән етдикләри фәрјадларыны ешитдим вә дәрдләринә нәзәр салдым. Мән она ҝөрә ҝәлдим ки, онлары Мисирлиләрин әлиндән гуртарыб бу өлкәдән чыхарым вә ҝениш, не’мәтли бир дијара, сүд вә бал ахан торпаға... апарым» (Чыхыш 3:7, 8). Исраиллиләр Мисирдән азад едилдикдән тәхминән 500 ил сонра Јеһова онлара хатырлатды: «Исраили Мисирдән Мән чыхартдым. Мисирлиләрин вә сизә зүлм едән бүтүн сәлтәнәтләрин әлиндән сизи Мән азад етдим» (1 Шамуел 10:18). Аллаһын әдаләтли ганунларыны поздуглары үчүн исраиллиләр тез-тез дара дүшүрдүләр. Лакин Јеһова исраиллиләрин һалына аҹыјырды вә дәфәләрлә онларын дадына чатырды (Һакимләр 2:11-16; 2 Салнамәләр 36:15). Бу нүмунә мәһәббәтли Јеһованын еһтијаҹ дујан, тәһлүкә илә үзләшән вә дара дүшәнләрин гајғысына неҹә галдығыны ҝөстәрир. Јеһова «мәрһәмәти бол олан» Аллаһдыр (Ефеслиләрә 2:4).
6. Иса Мәсиһ мәрһәмәт тәзаһүр етдирмәкдә Атасыны неҹә тәглид етмишди?
6 Иса јер үзүндә оланда мәрһәмәт ҝөстәрмәкдә Атасыны мүкәммәл сурәтдә тәглид етмишди. Ики кор адам Исаја: «Ја Рәбб, еј Давуд Оғлу! Бизә мәрһәмәт ејлә!» — дејә јалваранда о, неҹә давранды? Бу ики нәфәр Исадан хаһиш едирди ки, мө’ҹүзәли шәкилдә онларын ҝөзүнә шәфа версин. Иса онларын хаһишини јеринә јетирди, лакин буну сојугганлы шәкилдә етмәди. Мүгәддәс Китабда охујуруг: «Иса онлара аҹыјыб ҝөзләринә тохунду; о анда ҝөзләри ачылды» (Матта 20:30-34). Шәфгәт һисси Исаны корлара, ҹинләрә тутулмуш адамлара, ҹүзамлылара вә ушаглары хәстә олан валидејнләрә раһатлыг ҝәтирән чохсајлы мө’ҹүзәләр ҝөстәрмәјә тәшвиг етмишди (Матта 9:27; 15:22; 17:15; Марк 5:18, 19; Лука 17:12, 13).
7. Јеһова Аллаһын вә Иса Мәсиһин нүмунәсиндән мәрһәмәт һаггында нә өјрәнирик?
7 Јеһова Аллаһын вә Иса Мәсиһин нүмунәсиндән мәрһәмәтин ики ҹәһәти олдуғуну ҝөрүрүк: биринҹиси, дара дүшәнләрә шәфгәт ҝөстәрмәк, онларын дәрдинә шәрик олмаг вә ја һалына аҹымаг; икинҹиси, дара дүшәнләрә јардым етмәк. Мәрһәмәтли олмаг үчүн бунун һәр икисинин олмасы ҝәрәкдир. Мүгәддәс Јазыларда мәрһәмәт сөзү еһтијаҹы оланлара хејирхаһлыгла көмәк етмәк мә’насыны дашыјыр. Бәс һөкм чыхарылмасы тәләб олунан һалларда мәрһәмәт неҹә ҝөстәрилир? Белә һалларда мәрһәмәт ҝөстәрмәк ҹәзанын верилмәмәси вә ја пассивлик кими гијмәтләндирилә биләрми?
Ҝүнаһ ишләдәнләрә мәрһәмәт
8, 9. Бат-Шева илә ҝүнаһ ишләдән Давуда мәрһәмәт неҹә ҝөстәрилди?
8 Ҝәлин Натан пејғәмбәрин гәдим Исраилин падшаһы Давуду Бат-Шева илә етдији әхлагсызлыға ҝөрә ифша етдикдән сонра баш верәнләрә нәзәр салаг. Төвбә етмиш Давуд дуа едирди: «Мәһәббәтин наминә, еј Аллаһ, мәнә лүтф ет, бол мәрһәмәтинә ҝөрә асиликләрими сил. Мәним бүтүн тәгсирләрими ју, ҝүнаһымдан тәмизлә. Чүнки асиликләрими билирәм, ҝүнаһым даим ҝөзүмүн гаршысындадыр. Сәнә, јалныз Сәнә гаршы ҝүнаһ ишләтмишәм» (Мәзмур 51:1-4).
9 Давуд дәрин пешманчылыг кечирмишди. Јеһова Давудун ҝүнаһыны бағышлады, она вә Бат-Шеваја лајиг олдуглары ҹәзаны вермәсә дә, ҹәзасыз гојмады. Мусанын Ганунуна ҝөрә, һәм Давуд, һәм дә Бат-Шева өлдүрүлмәли иди (Ганунун тәкрары 22:22). Јеһова онлара јашамаға иҹазә версә дә, онлар етдикләри ҝүнаһын аҹы нәтиҹәләринин һамысындан гача билмәдиләр (2 Шамуел 12:13). Аллаһ мәрһәмәтиндән ирәли ҝәләрәк сәһви бағышлајыр, лакин ҝүнаһкарлары ҹәзасыз гојмур.
10. Јеһова бизә гаршы һөкм чыхаранда мәрһәмәтли олса да, нәјә ҝөрә Онун мәрһәмәтиндән суи-истифадә етмәмәлијик?
10 ‘Ҝүнаһ тәк бир адам [Адәм] васитәсилә дүнјаја ҝирдији’ вә «ҝүнаһын әвәзи өлүм» олдуғу үчүн бүтүн инсанлар өлүмә лајигдир (Ромалылара 5:12; 6:23). Бизә гаршы һөкм чыхаранда мәрһәмәт ҝөстәрдији үчүн Јеһоваја неҹә дә миннәтдар олмалыјыг! Лакин Аллаһын мәрһәмәтиндән суи-истифадә етмәмәлијик. Ганунун тәкрары 32:4 ајәсиндә Јеһованын ‘бүтүн јолларынын һагг’ олдуғу дејилир. О кимәсә мәрһәмәт ҝөстәрмәји гәрара аланда Өзүнүн мүкәммәл әдаләт нормаларыны унутмур.
11. Јеһова Давудун Бат-Шева илә етдији ҝүнаһы арашдыраркән, әдаләт принсипинә лазыми һөрмәти неҹә ҝөстәрди?
11 Давуд вә Бат-Шеванын һадисәсиндә өлүм ҹәзасыны јүнҝүлләшдирмәздән өнҹә, онларын ҝүнаһларыны бағышламаг тәләб олунурду. Исраилин һакимләринә белә сәлаһијјәт һәвалә олунмамышды. Әҝәр Давудла Бат-Шеванын ишинә онлар бахмалы олсајдылар, өлүм һөкмү чыхармагдан башга бир шеј едә билмәздиләр. Ганун белә тәләб едирди. Јеһова Давудла әһд бағладығы үчүн, онун ҝүнаһыны бағышламаға әсас олуб-олмадығыны мүәјјән етмәк истәди (2 Шамуел 7:12-16). Беләликлә, ‘үрәји сынајан’ «бүтүн дүнјанын Һакими» Јеһова Аллаһ бу мәсәләјә Өзү бахмаг гәрарына ҝәлди (Јарадылыш 18:25; 1 Салнамәләр 29:17). Јеһова Давудун үрәјиндә олан һәр шеји ҝөрмәјә, төвбәсинин нә дәрәҹәдә сәмими олдуғуну мүәјјән етмәјә вә ону бағышламаға гадир иди.
12. Ҝүнаһлы инсанлар Аллаһын онлара мәрһәмәт ҝөстәрмәсини истәјирләрсә, нә етмәлидирләр?
12 Мирас алдығымыз ҝүнаһын пәнҹәсиндән гуртулаг дејә, бизә ҝөстәрдији мәрһәмәт Јеһованын әдаләтинә зидд дејил. Әдаләт принсипләрини позмамаг шәртилә, ҝүнаһларымызын бағышланмасы үчүн Јеһова Оғлу Иса Мәсиһин фидијә гурбанлығыны тәгдим етди. Бу исә Аллаһын мәрһәмәтинин ән бөјүк тәзаһүрү иди (Матта 20:28; Ромалылара 6:22, 23). Мирас алдығымыз ҝүнаһын ҹәзасындан јаха гуртармаг үчүн бизә Јеһованын мәрһәмәти лазымдыр. Буна, Онун ‘Оғлуна иман етмәклә’ наил ола биләрик (Јәһја 3:16, 36).
Мәрһәмәтли вә әдаләтли Аллаһ
13, 14. Аллаһын мәрһәмәти Онун әдаләтини јумшалдырмы? Изаһ един.
13 Беләликлә, Јеһованын мәрһәмәти Онун әдаләт принсипләринә зидд дејил. Бәс онда демәк олармы ки, мәрһәмәт неҹәсә әдаләтә тә’сир едир? Мәрһәмәт Аллаһын әдаләтини јумшалдырмы? Хејр.
14 Јеһова Һушә пејғәмбәрин васитәсилә исраиллиләрә демишди: «Сәни әбәди олараг Өзүмә нишанлајаҹағам, доғрулуг, әдаләт, мәһәббәт вә мәрһәмәтлә сәни өзүмә нишанлајаҹағам» (Һушә 2:19). Бу сөзләр ајдын ҝөстәрир ки, Јеһованын мәрһәмәтинин тәзаһүрү, әдаләт дә дахил олмагла, диҝәр кејфијјәтләри илә һәмаһәнҝдир. Јеһова ‘рәһмли вә лүтфкар, ҹәзаны, асилији вә ҝүнаһы бағышлајан, лакин ҹәзасыз гојмајан’ Аллаһдыр (Чыхыш 34:6, 7). Јеһова мәрһәмәтли вә әдаләтли Аллаһдыр. Мүгәддәс Китабда Онун һаггында дејилир: «О, ишләри камил Гајадыр, чүнки бүтүн јоллары һагдыр» (Ганунун тәкрары 32:4). Јеһованын әдаләти мәрһәмәти кими мүкәммәлдир. Бу ики хүсусијјәт нә бир-бириндән үстүндүр, нә дә бир-бирини јумшалдыр. Әксинә, һәр икиси бир-бири илә тамамилә һәмаһәнҝдир.
15, 16. а) Јеһованын әдаләтинин сәрт олмадығыны нә ҝөстәрир? б) Јеһова бу пис дүнјаја чыхардығы һөкмү иҹра едәндә Онун хидмәтчиләри нәјә әмин ола биләрләр?
15 Јеһованын әдаләти сәрт дејил. Әдаләт, бир гајда олараг, һәмишә ишин һүгуги тәрәфи илә бағлыдыр вә әдаләт мәһкәмәси тәләб едир ки, ҹинајәткара онун лајиг олдуғу ҹәза верилсин. Амма Аллаһ әдаләтиндән ирәли ҝәләрәк лајиг оланларын хиласыны да тә’мин едир. Мәсәлән, Содом вә Һоморра шәһәрләринин пис сакинләри мәһв едиләндә гәбилә башчысы Лут вә онун ики гызы хилас едилди (Јарадылыш 19:12-26).
16 Биз әмин ола биләрик ки, Јеһова бу пис дүнјаја чыхардығы һөкмү иҹра едәндә ‘либасларыны јујуб, онлары Гузунун ганы илә ағардан’ вә Аллаһын һәгиги хидмәтчиләрини тәшкил едән ‘бөјүк издиһам’ хилас олунаҹаг. Онлар ‘бөјүк мәшәггәтдән чыхаҹаглар’ (Вәһј 7:9-14).
Биз нә үчүн мәрһәмәтли олмалыјыг?
17. Мәрһәмәтли олмағымызын ваҹиб сәбәби нәдир?
17 Јеһованын вә Иса Мәсиһин нүмунәси бизә һәгиги мәрһәмәтин нә олдуғуну өјрәдир. Мәрһәмәтли олмағымызын ваҹиблијини ҝөстәрән диҝәр сәбәб Сүлејманын мәсәлләри 19:17 ајәсиндә јазылыб: «Касыба сәхавәт ҝөстәрән санки Рәббә борҹ верәр, чүнки онун әвәзи Рәбдән ҝәләр». Бир-биримизлә мәрһәмәтлә давранараг Јеһованы вә Оғлуну тәглид едәндә, бу Онун хошуна ҝәлир (1 Коринфлиләрә 11:1). Бизим бу ҹүр давранмағымыз диҝәрләрини мәрһәмәтли олмаға тәшвиг едир, чүнки мәрһәмәт мәрһәмәт доғурур (Лука 6:38).
18. Биз нә үчүн мәрһәмәтли олмаға чалышмалыјыг?
18 Мәрһәмәт бир чох јахшы хүсусијјәтләри, мәсәлән, лүтфкарлығы, мәһәббәти, хејирхаһлығы вә јахшылығы өзүндә бирләшдирир. Зәриф шәфгәт һисси мәрһәмәт ҝөстәрмәјә тәшвиг едир. Јеһованын мәрһәмәти Онун әдаләтини јумшалтмаса да, О гәзәбләнмәјә тәләсмир вә ҝүнаһкарларын төвбә етмәләринә кифајәт гәдәр вахт верир (2 Петер 3:9, 10). Демәли, мәрһәмәт өзүнә сәбир кејфијјәтини дахил едир. Аллаһын руһунун сәмәрәси дә дахил олмагла, бир чох ҝөзәл кејфијјәтләри өзүндә бирләшдирән мәрһәмәт, бу кејфијјәтләри өзүмүздә јетишдирмәјә көмәк едир (Галатијалылара 5:22, 23). Мәрһәмәтли олмаға сә’ј ҝөстәрмәјимиз неҹә дә ваҹибдир!
«Мәрһәмәтли оланлар... бәхтијардырлар»
19, 20. Мәрһәмәт һансы мә’нада һөкмә галиб ҝәлир?
19 Биз нә үчүн башгалары илә һәмишә мәрһәмәтлә давранмалыјыг? Бунун сәбәбини шаҝирд Јагуб ачыглајыр: «Мәрһәмәт һөкмә галиб ҝәлир» (Јагуб 2:13б). Јагуб Јеһованын хидмәтчиләринин бир-бирләринә ҝөстәрдији мәрһәмәтдән данышырды. Мәрһәмәт һансы мә’нада һөкмә галиб ҝәлир? Һәр бир инсанын ‘өзү үчүн Аллаһа һесабат вермәсинин’ вахты ҝәләндә Јеһова онун башгалары илә мәрһәмәтли давранышыны нәзәрә алаҹаг вә Оғлунун фидијә гурбанлығынын сајәсиндә ону бағышлајаҹаг (Ромалылара 14:12). Давуд Бат-Шева илә ҝүнаһ ишләдәндә она мәрһәмәт ҝөстәрилмәсинин сәбәбләриндән бири, шүбһә јохдур ки, Давудун өзүнүн мәрһәмәтли инсан олмасы иди (1 Шамуел 24:4-7). Лакин «мәрһәмәт ҝөстәрмәјәнә һөкм мәрһәмәтсиздир» (Јагуб 2:13а). Тәәҹҹүблү дејил ки, ‘мәрһәмәтсизләр’ Аллаһын ‘өлүмә лајиг’ сајдығы инсанлар сырасында дурур! (Ромалылара 1:31, 32).
20 Дағүстү тәблиғиндә Иса демишди: «Мәрһәмәтли оланлар нә бәхтијардырлар! Чүнки онлара мәрһәмәт едиләҹәкдир» (Матта 5:7). Бу сөзләр неҹә дә ајдын ҝөстәрир ки, Јеһовадан мәрһәмәт ҝөзләјәнләр өзләри мәрһәмәтли олмалыдырлар! Нөвбәти мәгаләдә ҝүндәлик һәјатымызда мәрһәмәти неҹә тәзаһүр етдирә биләҹәјимиз мүзакирә олунаҹаг.
Сиз нә өјрәндиниз?
• Мәрһәмәт нәдир?
• Мәрһәмәт неҹә тәзаһүр етдирилир?
• Һансы мә’нада Јеһова Аллаһ һәм мәрһәмәтли, һәм дә әдаләтлидир?
• Биз нә үчүн мәрһәмәтли олмалыјыг?
[7-ҹи сәһифәдәки шәкил]
Јеһованын еһтијаҹы оланлара бәсләдији зәриф һиссләр ананын өз көрпәсинә бәсләдији һиссләрә охшајыр.
[8-ҹи сәһифәдәки шәкил]
Давуда мәрһәмәт ҝөстәрмәклә Јеһова Өз әдаләтинә ҝөз јумдуму?