Сабаһы дүшүнәрәк јашајын
ИСА МӘСИҺ Галилејада сөјләдији мәшһур Дағүстү тәблиғиндә демишди: «Сабаһ үчүн гајғы чәкмәјин». Сонра о давам едир: «Сабаһкы ҝүн өзү үчүн гајғы чәкәҹәкдир» (Матта 6:34).
Сизҹә, «сабаһкы ҝүн өзү үчүн гајғы чәкәҹәкдир» сөзләринин мә’насы нәдир? Бу о демәкдирми ки, инсан јалныз бу ҝүн үчүн јашамалы, сабаһкы ҝүнү исә һеч дүшүнмәмәлидир? Доғруданмы, бу, Исанын вә онун шаҝирдләринин инандығы шејләрә ујғун ҝәлир?
«Гајғы чәкмәјин»
Зәһмәт олмаса, Исанын Матта 6:25-32 ајәләриндә јазылмыш сөзләрини әввәлдән ахырадәк охујун. Ҝәлин орадан бә’зи фикирләрә диггәт јетирәк: «Нә јејәҹәксиниз, јахуд нә ичәҹәксиниз дејә ҹанынызын, нә ҝејәҹәксиниз дејә бәдәнинизин гајғысына галмајын... Ҝөјүн гушларына бахын, онлар нә әкир, нә бичир, нә дә амбарларда топлајырлар; вә сәмави Атаныз онлары једиздирир... Сизләрдән ким гајғы чәкмәклә бојуну бир аршын артыра биләр? Вә нә үчүн палтардан өтрү гајғы чәкирсиниз? Тарла занбагларынын неҹә бөјүдүкләринә бахын; нә зәһмәт чәкирләр, нә дә иплик әјирирләр... Беләликлә: “Нә јејәҹәјик?”, “Нә ичәҹәјик?”, “Нә ҝејәҹәјик?” — дејә гајғы чәкмәјин. Чүнки бүтүн бу шејләри бүтпәрәстләр ахтарырлар; сәмави Атаныз да бүтүн бу шејләрә еһтијаҹ дујдуғунузу билир».
Иса нитгинин бу һиссәсини ики мәсләһәтлә битирир. Биринҹиси, «әввәлҹә Аллаһын Сәлтәнәтини вә Онун салеһлијини ахтарын; вә бунларын һамысы сизә әлавә олараг вериләҹәкдир». Икинҹиси, «сабаһ үчүн гајғы чәкмәјин; она ҝөрә ки, сабаһкы ҝүн өзү үчүн гајғы чәкәҹәкдир. Һәр ҝүнүн өз һөкмү вар» (Матта 6:33, 34).
Сәмави Атаныз нәјә еһтијаҹ дујдуғунузу билир
Неҹә дүшүнүрсүнүз, Исанын мәгсәди өз шаҝирдләринин, о ҹүмләдән, әкинчиләрин әлини ‘әкиб, бичмәкдән вә амбарларда мәһсул топламагдан’, јахуд еһтијаҹлары олан палтар үчүн зәһмәт чәкиб, иплик әјирмәкдән сојутмаг идими? (Сүлејманын мәсәлләри 21:5; 24:30-34; Ваиз 11:4). Әлбәттә ки јох. Әҝәр онлар ишләмәсәјдиләр, «бичин вахты» нә јемәјә, нә дә ҝејмәјә һеч нә тапмаздылар (Сүлејманын мәсәлләри 20:4).
Бәс нараһатчылыг һаггында нә демәк олар? Иса динләјиҹиләринин нараһатчылыгдан тамамилә азад ола биләҹәкләриними нәзәрдә тутурду? Бу, гејри-мүмкүн бир шеј оларды. Исанын өзү тутулан ҝеҹә ҝүн дәрин кәдәр вә нараһатчылыг кечирирди (Лука 22:44).
Иса садәҹә олараг чох ваҹиб бир һәгигәти ачыглајырды. Һәддиндән артыг нараһат олмаг проблемләри һәлл етмәјә һеч вахт көмәк етмәјәҹәк. Мәсәлән, нараһат олмагла өмрү узатмаг олмаз. Иса демишди ки, нараһатчылыг өмрү бир аршын да артыра билмәз (Матта 6:27). Әксинә, шиддәтли вә узун сүрән нараһатлыг өмрү гысалда биләр.
Исанын мәсләһәти сон дәрәҹә фајдалыдыр. Һаггында нараһат олдуғумуз шејләрин чоху һеч вахт баш вермир. Британија дөвләт хадими Уинстон Чөрчилл Икинҹи Дүнја мүһарибәсинин дәһшәтли ҝүнләри һаггында дүшүнәндә буну баша дүшмүшдү. Һәмин дөврдә чәкдији бә’зи гајғылар һаггында о јазырды: «О вахт кечирдијим нараһатчылыглар һаггында дүшүнәндә јадыма бир гоҹа кишинин әһвалаты дүшүр. Өлүм јатағында оланда о демишди ки, һәјатында чох шејә ҝөрә нараһатчылыг кечириб, анҹаг онларын чоху һеч вахт баш вермәјиб». Әҝәр проблем вә сыхынтылар биздә асанлыгла нараһатчылыг јарадырса, анҹаг јашадығымыз ҝүн һаггында дүшүнмәк мүдриклик оларды.
‘Әввәлҹә Аллаһын Сәлтәнәтини ахтарын’
Әслиндә Иса динләјиҹиләринин тәкҹә физики вә емосионал рифаһы һаггында дүшүнмүрдү. О билирди ки, ҝүндәлик тәләбатлар үчүн чәкилән гајғылар, һабелә вар-дөвләтә вә әјләнҹәләрә һәддиндән артыг ҹан атмаг ваҹиб шејләри сыхышдырыб чыхара биләр (Филипилиләрә 1:10). Бәлкә дә сиз дүшүнүрсүнүз: «Һәјатда лазымлы шејләри әлдә етмәкдән ваҹиб нә ола биләр?» Аллаһа ибадәтлә бағлы олан руһани шејләр. Иса вурғулајырды ки, һәјатымызда ән ваҹиб шеј ‘әввәлҹә Аллаһын Сәлтәнәтини вә Онун салеһлијини ахтармаг’ олмалыдыр (Матта 6:33).
Исанын ҝүнләриндә чохлары мадди не’мәтләрин далынҹа гачырды. Онларын әсас иши вар-дөвләт јығмаг иди. Анҹаг Иса динләјиҹиләрини бахышларыны дәјишмәјә сәсләјирди. Аллаһа һәср олунмуш бир халг кими онларын «әсас вәзифәси» ‘Аллаһдан горхуб, Онун әмрләрини јеринә јетирмәк’ олмалы иди (Ваиз 12:13).
Һәддиндән артыг мадди шејләрә алудә олмаг — «дүнјанын гајғысы вә зәнҝинлијин алдадыҹылығы» — Исанын динләјиҹиләрини Аллаһа ибадәт етмәкдән јајындыра биләрди (Матта 13:22). Һәвари Павел јазмышды: «Варланмаг истәјәнләр исә јолдан чыхыр вә тора дүшүрләр вә инсанлары фәлакәтә вә һәлака апаран бир чох мә’насыз вә зијанвериҹи еһтираслара гапылырлар» (1 Тимотејә 6:9). Һәмин тора дүшмәсинләр дејә, Иса давамчыларынын јадына салды ки, сәмави Аталары онларын бүтүн бу шејләрә еһтијаҹлары олдуғуну билир. Аллаһ ‘ҝөјүн гушларынын’ гајғысына галдығы кими, онларын да гајғысына галаҹагды (Матта 6:26, 32). Гајғылара гапылмагданса, онлар өзләрини тә’мин етмәк үчүн баҹардыгларыны етмәли, сонра исә һәр шеји архајынлыгла Јеһованын өһдәсинә бурахмалы идиләр (Филипилиләрә 4:6, 7).
‘Сабаһкы ҝүнүн өзү үчүн гајғы чәкәҹәјини’ дејәндә, Иса садәҹә демәк истәјирди ки, сабаһ нә баш верә биләҹәји һагда нараһатчылыг чәкәрәк буҝүнкү проблемләримизи артырмамалыјыг. Мүгәддәс Китабын башга тәрҹүмәсиндә дејилир: «Сабаһ үчүн нараһат олмајын; онун өзүнүн кифајәт гәдәр гајғылары олаҹаг. Һәр ҝүнүн ҝәтирдији нараһатчылығын үзәринә нараһатлыг ҝәтирмәк лазым дејил» (Матта 6:34, «Тодај’с Енҝлисһ Версион»).
«Сәлтәнәтин ҝәлсин»
Анҹаг сабаһкы ҝүн һаггында һәддиндән артыг нараһат олмамагла, бу һагда һеч дүшүнмәмәк арасында бөјүк фәрг вар. Иса һеч вахт шаҝирдләрини сабаһы дүшүнмәмәјә тәшвиг етмәмишди. Әксинә, онлары тәшвиг едирди ки, ҝәләҹәклә јахындан мараглансынлар. Онлар јериндә олараг һәрҝүнкү еһтијаҹлары — ҝүндәлик рузиләри үчүн дуа етмәли идиләр. Амма онлар биринҹи нөвбәдә ҝәләҹәкдә олаҹаг шејләр үчүн, Аллаһын Падшаһлығынын ҝәлмәси вә ҝөјдә олдуғу кими, јердә дә Онун ирадәсинин олмасы үчүн дуа етмәли идиләр (Матта 6:9-11).
Биз Нуһун ҝүнләриндәки инсанлара охшамалы дејилик. Онларын башы ‘јејиб, ичиб, евләниб, әрә ҝетмәјә’ о гәдәр гарышмышды ки, тезликлә баш верәҹәк һадисә һаггында һеч дүшүнмүрдүләр. Ахыры нә олду? ‘Туфан ҝәлиб һамысыны апарды’ (Матта 24:36-42). Һәвари Петер сабаһы дүшүнәрәк јашамағын ваҹиблијини јадымыза салмаг үчүн һәмин тарихи һадисәни мисал чәкди. О јазырды: «Әҝәр бүтүн бунлар бу ҹүр мәһв едиләҹәксә, сиз неҹә инсанлар олмалысыныз? Аллаһын Ҝүнүнүн зүһуруну ҝөзләјиб, ону сүр’әтләндирәрәк мүгәддәс вә Аллаһа ихласкар бир һәјат јашамалысыныз» (2 Петер 3:5-7, 11, 12).
Ҝөјдә хәзинәләр јығын
Бәли, ҝәлин Јеһованын ҝүнүнү ‘сүр’әтләндирәк ’. Бу бизим вахтымызы, ҝүҹүмүзү, габилијјәт вә баҹарығымызы, вар-дөвләтимизи нәјә сәрф етдијимизә ҝүҹлү тә’сир ҝөстәрәҹәк. Бизим башымыз мадди шејләрә, истәр ҝүндәлик тәләбатларымыза, истәрсә дә һәјатын зөвгләри архасынҹа гачмаға о гәдәр гарышмалы дејил ки, Аллаһа сәдагәтимизи ҝөстәрән ишләр үчүн вахтымыз аз галсын. Бәлкә дә елә ҝөрүнә биләр ки, јалныз бу ҝүнү дүшүнмәк дәрһал бәһрә ҝәтирир, амма ән јахшы һалда белә бу бәһрәләрин фајдасы мүвәггәтидир. Иса демишдир ки, хәзинәни јердә топламагданса, ҝөјдә јығмаг даһа мүдрик һәрәкәт оларды (Матта 6:19, 20).
Иса бу мәгамы ҝәләҹәјә даир мөһтәшәм планлар гуран бир адам һаггында мәсәлиндә вурғулады. Һәмин адамын планларында Аллаһ үчүн јер јох иди. Кишинин торпағы бол мәһсул вермишди. О, анбарларыны сөкүб, бөјүкләрини тикмәји гәрара алды ки, сонра раһат јејиб, ичиб, кеф чәксин. Бәс бурада дүзҝүн олмајан нә иди? О, әмәјинин бәһрәсиндән истифадә етмәмиш өлдү. Ән писи исә о, Аллаһла мүнасибәт јаратмамышды. Иса сонда деди: «Аллаһ гаршысында зәнҝин олмаг әвәзинә, өзү үчүн дөвләт топлајан һәр бир адамын агибәти белә олур» (Лука 12:15-21; Сүлејманын мәсәлләри 19:21).
Сиз нә едә биләрсиниз?
Һеч вахт Исанын һаггында данышдығы кишинин сәһви кими сәһвә јол вермәјин. Аллаһын сабаһ үчүн олан нијјәтинин нә олдуғуну өјрәнин вә һәјатынызы она ујғун гурун. Аллаһ ҝөрәҹәји ишләри инсанлардан ҝизли сахламыр. Гәдимдә јашајан Амос пејғәмбәр јазмышдыр: «Худавәнд Рәбб гулу олан пејғәмбәрләрә Өз нијјәтини ачмадан һеч нә етмир» (Амос 3:7). Јеһованын Өз пејғәмбәрләри васитәсилә ачдығы шејләри Аллаһдан илһам алмыш Мүгәддәс Китабын сәһифәләриндән охуја биләрсиниз (2 Тимотејә 3:16, 17).
Мүгәддәс Китабын ачдығы шејләрдән бири одур ки, јахын ҝәләҹәкдә бүтүн дүнјаја ҝөрүнмәмиш мигјасда тә’сир едәҹәк бир һадисә баш верәҹәк. Иса демишдир: «О заман елә бөјүк мәшәггәт олаҹагдыр ки, беләси дүнјанын башланғыҹындан индијәдәк олмамышдыр» (Матта 24:21). Һеч бир инсан онун гаршысыны ала билмәз. Әслиндә Аллаһын һәгиги хидмәтчиләринин онун гаршысыны алмаг истәмәси үчүн һеч сәбәб дә јохдур. Чүнки о заман Аллаһ јер үзүнү бүтүн писликләрдән тәмизләјәҹәк, сонра «јени бир сәма вә јени бир јер», јә’ни јени сәмави һөкумәт вә јердә јашајан јени инсан ҹәмијјәти гураҹаг. Һәмин јени дүнјада Аллаһ инсанларын «ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр» (Вәһј 21:1-4).
Бәс белә олдугда, мәнтигәујғун дејилми ки, ҝәләҹәк һадисәләр һаггында Мүгәддәс Китабын нә дедијини өјрәнмәк үчүн инди вахт ајыраг? Бу ишдә көмәјә еһтијаҹыныз вармы? Јеһованын Шаһидләриндән сизә көмәк етмәји хаһиш един. Јахуд да бу журналы нәшр едәнләрә јазын. Тәкҹә бу ҝүн үчүн дејил, һәм дә мөһтәшәм ҝәләҹәк үчүн јашамаға гәти гәрарлы олун.
[3-ҹү сәһифәдәки шәкил]
«Гајғы чәкмәјин... Сабаһкы ҝүн өзү үчүн гајғы чәкәҹәкдир».