Билирсинизми?

Мүнәҹҹимләр Исанын јанына нә вахт ҝәлмишдиләр?

«Маттанын Мүждәси»ндә де­јилир ки, Исанын јанына «шәргдән... мүнәҹҹимләр ҝәлиб», она һәдијјәләр ҝәтирмишдиләр (Матта 2:1-12). Исанын јанына ҝәлән мүнәҹҹимләрин сајы билдирилмир. Адәтән онларын үч нәфәр олдуглары һесаб едилсә дә, буну иддиа етмәјә һеч бир әсас јохдур; Мүгәддәс Китабда онларын һеч адлары да чәкилмир.

Бир әсәрдә Матта 2:11 ајәсинә белә бир шәрһ верилир: «Ҝениш јајылмыш фикрә зидд олараг, чобанлар кими, Сеһрбазлар да ҝәлиб Исаны доғулдуғу ҝеҹә ахурда ҝөрмәмишдиләр. Онлар ушаға бир нечә ајдан сонра өз евиндә баш чәкмишдиләр» («New International Version Study Biblet»). Һиродун, Бет-Лехем вә онун бүтүн ҹиварында олан ики вә даһа ашағы јашлы оғлан ушагларынын һамысынын өлдүрүлмәси әмрини вермәси бу факты тәсдигләјир. О, «мүнәҹҹимләрдән өјрәндији вахта ҝөрә» һәмин јашлы ушаглары сечмишди (Матта 2:16).

Мүнәҹҹимләр гызыл вә башга гијмәтли һәдијјәләрлә Исанын јанына доғулдуғу ҝеҹә ҝәлсәјдиләр, Мәрјәм 40 ҝүндән сонра Исаны мәбәддә тәгдим едәркән ҹәми ики гуш гурбан ҝәтирмәзди (Лука 2:22-24). Гануна ҝөрә, тоғлу ҝәтирмәјә ҝүҹү чатмајан јохсул адамлар ики гуш гурбан ҝәтирә биләрдиләр (Левилиләр 12:6-8). Лакин бу гијмәтли һәдијјәләр лап вахтында ҝәлмишди, белә ки онлар Исанын аиләсинин Мисирдә доланмасына көмәк олду (Матта 2:13-15).

Лазар өләндә Иса нәјә ҝөрә дөрд ҝүнә ҝәлиб чыхыр?

Дүзүнә галса, ҝөрүнүр, Иса­нын өзү иши белә планлашдырмышды. Нә үчүн белә демәк олар? «Јәһја» китабынын 11-ҹи фәслиндә јазылан һадисәни нәзәрдән кечирәк.

Исанын Бејтанјада јашајан досту Лазар ­хәстәләнәндә, баҹылары Исаја хәбәр ҝөндәрдиләр (1-3-ҹү ајәләр). Һәмин вахт Исаны Бејтанјадан икиҝүнлүк јол ајырырды (Јәһја 10:40). Ҝөрүнүр, Лазар Исаја хәбәр чатан вахт өлдү. Иса нә етди? О, ‘олдуғу јердә ики ҝүн галдыгдан’ сонра Бејтанјаја ҝетди (6, 7-ҹи ајәләр). Беләликлә, ики ҝүн ҝөзләјиб, ики ҝүн дә јол ҝетдикдән сонра, о, гәбрин јанына Лазар өләндән дөрд ҝүн сонра ҝәлиб чыхды (17-ҹи ајә).

Әввәлләр Иса ики нәфәри дирилтмишди: бирини өлүмүндән дәрһал сонра, диҝәрини исә, өлдүјү ҝүн, еһтимал ки, өлүмүндән бир гәдәр сонра (Лука 7:11-17; 8:49-55). О, дөрд ҝүн әрзиндә өлү олан вә артыг бәдәни чүрүмәјә башлајан адамы дирилдә биләрдими? (39-ҹу ајә). Мүгәддәс Китаба даир бир әсәрдә јазыланлара ҝөрә, јәһудиләрин арасында белә бир инанҹ вар иди ки, «дөрд ҝүн әрзиндә өлү олан адам үчүн һеч бир үмид ола билмәз; һәмин вахт артыг мејитдә чүрүмәнин әламәтләри ајдын ҝөрүнүр вә үч ҝүн мејитин әтрафында доланан руһ учуб ҝедир».

Әҝәр гәбрин әтрафына топлашанлардан киминсә шүбһәси вар идисә, о, тезликлә Исанын өлүм үзәриндәки ҝүҹүнүн шаһиди олаҹагды. Иса мејитин гојулдуғу ачыг мағаранын гаршысында дајаныб «Лазар, чөлә чых!» — дејә јүксәк сәслә гышгырды. «Өлү дә... чыхды» (43, 44-ҹү ајәләр). Өләнләр үчүн һәгиги үмид, чохларынын инандығы кими өлүмдән сонра руһун јашамасы јох, дирилмәдир (Јәһја 11:25).