Аллаһа јахынлашын
Бәнзәри олмајан Ата
«АТА». Бу сөз үрәјимиздә мәһәббәт вә еһтирам кими хош һиссләр ојадыр. Өвладларыны һәгигәтән севән ата онлары хошбәхт бөјүтмәјә чалышыр. Мүгәддәс Китаб әбәс јерә Јеһова Аллаһы ‘Ата’ адландырмырa (Матта 6:9). Бәс Јеһова неҹә Атадыр? Бу суала ҹаваб тапмаг үчүн, ҝәлин Иса вәфтиз оларкән Јеһованын она дедији сөзләрә диггәт јетирәк. Ахы атанын ушаглары илә данышыг тәрзи онун неҹә валидејн олдуғу һагда чох шеј дејир.
Ерамызын 29-ҹу илинин тәхминән октјабр ајында Иса вәфтиз олмаг үчүн Иордан чајына ҝәлди. Мүгәддәс Китаб бу заман нә баш вердији һагда хәбәр верир: «Иса вәфтиз олунуб, о анда судан чыхды; вә будур, ҝөјләр ачылды вә Аллаһын Руһунун ҝөјәрчин кими ениб Өз үзәринә ҝәлдијини ҝөрдү. Вә будур, ҝөјләрдән бир сәс деди: “Бу Мәним севимли Оғлумдур, Ондан чох мәмнунам”»b (Матта 3:16, 17). Јеһованын бу нәвазишли сөзләри, Онун неҹә Ата олдуғу һагда бизә чох шеј дејир. Јеһованын Өз Оғлуна билдирдији үч шејә диггәт јетирәк.
Биринҹиси, Јеһова ‘бу Мәним Оғлумдур’ сөзләри илә санки «Мән сәнин Атан олмағымла фәхр едирәм» дејирди. Узагҝөрән ата ушагларына гаршы диггәтли олур, онлары тәрифләјир. Чүнки ушагларын еһтијаҹы вар ки, валидејнләр онлары аиләнин дәјәрли үзвү олдугларына әмин етсинләр. Јеткин јашларында олмасына бахмајараг, Атасынын ондан разы галдығыны билмәјин Иса үчүн нә демәк олдуғуну тәсәввүр един!
Икинҹиси, Исаны ‘севимли Оғлу’ адландырараг, Јеһова она олан мәһәббәтини ачыг-ашкар ифадә етди. Елә бил Ата дејирди: «Мән сәни севирәм». Јахшы ата ушагларына олан мәһәббәтини сөзләрлә ифадә едир. Белә сөзләр, һәмчинин тәбии бағлылыг һисси ушаглара фираванлыг ичиндә бөјүмәјә көмәк едир. Атасынын ону севдијини ешитмәк јәгин Исаја чох хош тәсир бағышламышды!
Үчүнҹүсү, «чох мәмнунам» сөзләри илә Јеһова Оғлундан разы олдуғуну билдирир. Санки Јеһова дејир: «Оғлум, ҝөрдүјүн иш үрәјимҹәдир». Севән ата имканлар ахтарыр ки, ушагларынын дедикләри вә ја етдикләри јахшы шејләрдән разы галдығыны билдирсин. Белә олдугда, ушаглар руһланыр вә ҹәсарәтләнирләр. Шүбһә јохдур ки, Иса Атасынын ондан разы галдығыны ешидәндә чох руһланмышды!
Һәгигәтән дә, Јеһова бәнзәри олмајан Атадыр. Сән дә белә Атанын олмасынын һәсрәтини чәкирсәнми? Әҝәр беләдирсә, Јеһова илә белә мүнасибәтләрин мүмкүн олдуғуну биләрәк тәскинлик тапа биләрсән. Әҝәр иман ҝәтирәрәк Онун һаггында өјрәниб, дедикләринә үрәкдән әмәл етмәјә чалышсан, О сәнә мүтләг ҹаваб верәҹәк. Мүгәддәс Китаб дејир: «Аллаһа јахынлашын, О да сизә јахынлашар» (Јагуб 4:8). Инсана Јеһова Аллаһла, ән јахшы Ата илә јахын мүнасибәтләрдән чох архајынлыг ҝәтирән нә ола биләр?
[Һашијәләр]
a Јеһова Јарадан олдуғуна ҝөрә Ата адланыр. Иса исә Аллаһ тәрәфиндән јарадылдығы үчүн Аллаһын Оғлу адланыр.
b «Луканын Мүждәси»ндәки паралел ајәјә әсасән, Јеһова «сән» шәхс әвәзлијиндән истифадә едәрәк демишди: «Сән Мәним севимли Оғлумсан, Сәндән чох мәмнунам» (Лука 3:22).