Охуҹуларымыз сорушур
Аллаһын Падшаһлығы инсанларын үрәјиндәдирми?
Чохлары Аллаһын Падшаһлығынын инсанларын үрәјиндә олдуғуна инаныр. Мәсәлән, бир енсиклопедијада дејилир: «Аллаһын Падшаһлығы [...] Аллаһын бизим үрәјимизи идарә етмәси демәкдир» («The Catholic Encyclopedia»). Бир гајда олараг руһаниләр бу тәлими өјрәдирләр. Һәгигәтәнми Мүгәддәс Китаб Аллаһын Падшаһлығынын инсанларын үрәјиндә олдуғуну өјрәдир?
Бәзиләри фикирләшир ки, Аллаһын Падшаһлығынын инсанларын үрәјиндә олдуғу фикрини илк дәфә Иса ирәли сүрүб. О демишди: «Будур, Аллаһын Сәлтәнәти сизин ичиниздәдир» (Лука 17:21). Бәзи тәрҹүмәләрдә бу ајә белә верилир: «Аллаһын Сәлтәнәти сизин дахилиниздәдир». Бу, Исанын дедикләрини дәгигликлә әкс етдирирми? Доғруданмы о, Аллаһын Падшаһлығынын инсанын үрәјиндә олдуғуну нәзәрдә тутурду?
Әввәла, ҝәлин ҝөрәк инсанын үрәји дедикдә нә нәзәрдә тутулур. Мүгәддәс Китаба әсасән, символик үрәк инсанын дахили варлығы, јәни онун фикирләринин, әһвал-руһијјәсинин вә һиссләринин мәнбәјидир. Инсанын үрәјиндә Аллаһын Падшаһлығы кими али бир шејин олмасы, онун инсаны дәјишиб нәҹибләшдирә билмәси фикри ҹәлбедиҹи ҝөрүнә биләр. Анҹаг буна инанмаға әсас вармы?
Мүгәддәс Китаб дејир: «Инсан үрәји һәр шејдән һијләҝәрдир, сағалмаз хәстәлији вар» (Јеремја 17:9). Иса өзү демишди: «Бәд дүшүнҹәләр, зинакарлыг, ҹинси әхлагсызлыг, гатиллик, оғурлуг, тамаһкарлыг, пислик... инсанларын үрәјиндән, ичиндән чыхар» (Марк 7:20-22). Дүшүнүн: бу ҝүн дүнјада мүшаһидә етдијимиз бәдбәхтликләрин чохунун сәбәби инсанын ҝүнаһлы үрәји дејилми? Белә исә Аллаһын камил Падшаһлығы бу ҹүр јердә неҹә ола биләр? Гангалда әнҹир битмәдији кими, инсанын үрәјиндә дә Аллаһын Падшаһлығы гурула билмәз (Матта 7:16).
Инди исә ҝәлин Исанын Лука 17:21 ајәсиндә јазылан сөзләри кимә үнванладығына диггәт јетирәк. Әввәлки ајәдә дејилир: «Фәрисејләр Аллаһын Падшаһлығынын нә заман ҝәләҹәји барәдә Ондан сорушдуглары вахт онлара ҹаваб верди» (Лука 17:20). Фәрисејләр Исанын дүшмәнләри идиләр. Иса бу икиүзлүләрин Аллаһын Падшаһлығына ҝирмәјәҹәкләрини сөјләди (Матта 23:13). Әҝәр фәрисејләр Аллаһын Падшаһлығына ҝирмәјәҹәкдиләрсә, Падшаһлыг онларын үрәјиндә ола биләрдими? Бу гејри-мүмкүндүр! Онда Исанын дедикләрини неҹә баша дүшмәк олар?
Мүгәддәс Китабын бәзи дәгиг тәрҹүмәләриндә Исанын бу сөзләри «Јени Дүнја Тәрҹүмәси»нә охшар тәрздә верилмишдир. Бәзиләриндә Падшаһлыг «сизин араныздадыр» вә ја «сизин ичиниздәдир» кими тәрҹүмә олунуб. Бәс Аллаһын Падшаһлығы һансы мәнада һәмин инсанларын, еләҹә дә фәрисејләрин ичиндә иди? Јеһова Аллаһ Исаны Падшаһлығын Падшаһы тәјин етмишди. Иса тәјин олунмуш Падшаһ кими бу инсанларын арасында иди. О, Аллаһын Падшаһлығы һаггында өјрәтмәклә вә һәтта мөҹүзәләр ҝөстәрмәклә, Падшаһлығын нәләри һәјата кечирәҹәјини нүмајиш етдирирди. Демәли, Падшаһлыг һәгиги мәнада онларын арасында иди.
Ҝөрдүјүмүз кими, Мүгәддәс Китабда һеч бир фикир Аллаһын Падшаһлығынын инсанларын үрәјиндә олмасыны тәсдиг етмир. Әксинә, бу Падшаһлыг, пејғәмбәрләрин дә әввәлҹәдән дедикләри кими, јер үзүндә көклү дәјишикликләр едәҹәк реал һөкумәтдир (Јешаја 9:6, 7; Даниел 2:44).