Рәбб јолунда алдығын хидмәтә диггәт јетир
«Диггәтли ол ки, Рәбб јолунда тапшырыг олараг алдығын хидмәти битирәсән». КОЛОС. 4:17
1, 2. Мәсиһчиләрин инсанларла бағлы һансы мәсулијјәти вар?
ӘТРАФЫМЫЗДА јашајан инсанларла бағлы ҹидди мәсулијјәтимиз вар. Онларын ‘бөјүк мәшәггәтдә’ сағ галыб-галмајаҹаглары һал-һазырда гәбул етдикләри гәрарлардан асылыдыр (Вәһј 7:14). Аллаһдан илһам алараг јазылмыш «Сүлејманын мәсәлләри»ндә дејилир: «Өлүмә апарыланлары гуртар, гырғын тәһлүкәси алтында оланлары ҝери чәк». Неҹә дә тәсирли сөзләрдир! Әҝәр инсанларын гаршысында дуран сечим һаггында онлары хәбәрдар етмәк мәсулијјәтини үзәримизә ҝөтүрмәсәк, өлүмләриндә тәгсиркар биз ола биләрик. Һәмин парчада даһа сонра дејилир: «Десән ки, бах бундан хәбәрим јох иди, үрәкләри јохлајан буну ҝөрмәзми? Ҹаныны горујан буну билмәзми? Инсан әмәлинә ҝөрә Ондан әвәз алмазмы?» Ајдын ҝөрүнүр ки, Јеһованын хидмәтчиләри инсанлар гаршысында дуран тәһлүкәдән ‘хәбәрим јохдур’ дејә билмәзләр (Сүл. мәс. 24:11, 12).
2 Һәјат Јеһованын ҝөзүндә гијмәтлидир. О, хидмәтчиләрини тәшвиг едир ки, даһа чох инсанын хилас олмасына көмәк етмәк үчүн әлләриндән ҝәләни етсинләр. Аллаһын һәр бир хидмәтчиси Онун Кәламындакы хилас ҝәтирән хош хәбәри бәјан етмәлидир. Бизә һәвалә олунан тапшырыг, јахынлашмагда олан тәһлүкәни ҝөрүб хәбәрдарлыг едән ҝөзәтчинин тапшырығына бәнзәјир. Биз өлүм тәһлүкәси илә үз-үзә дуран инсанларын өлүмүнүн мәсулијјәтини дашымаг истәмирик (Јез. 33:1-7). Буна ҝөрә, «Аллаһын кәламыны» арамсыз тәблиғ етмәјимиз олдугҹа ваҹибдир! (2 Тимотејә 4:1, 2, 5 ајәләрини оху.)
3. Бу вә нөвбәти ики мәгаләдә һансы мөвзулары арашдыраҹағыг?
3 Бу мәгаләдә ики амил мүзакирә едиләҹәк: 1) хилас ҝәтирән хидмәтимиздә үзләшдијимиз манеәләри неҹә арадан галдыра биләрик, 2) даһа чох инсана көмәк етмәјә неҹә мүвәффәг ола биләрик. Нөвбәти мәгаләдә, ваҹиб һәгигәтләри өјрәтмәк баҹарығымызы неҹә инкишаф етдирә биләҹәјимиз арашдырылаҹаг. Үчүнҹү мәгаләдә исә, Падшаһлығын үмумдүнја тәблиғиндә әлдә едилән руһландырыҹы наилијјәтләрдән бәһс едиләҹәк. Амма бу мөвзулара кечмәздән әввәл, ҝәлин јашадығымыз дөврүн нәјә ҝөрә ағыр олдуғуна нәзәр салаг.
Нә үчүн чохлары үмидсиздир?
4, 5. Бәшәријјәт нәләрә мәруз галыр вә чохларында һансы һиссләр јараныр?
4 Дүнјада баш верән һадисәләр ‘дөврүн сонунда’ јашадығымызы вә сонун чох јахын олдуғуну ҝөстәрир. Иса вә шаҝирдләри ‘ахыр ҝүнләрин’ әламәти олаҹаг һадисәләрдән бәһс етмишдиләр вә бу ҝүн бәшәријјәт мәһз һәмин һадисәләрә мәруз галыр. ‘Ағрылар’, јәни мүһарибәләр, гытлыглар, зәлзәләләр вә диҝәр фәлакәтләр бәшәријјәтә әзаб-әзијјәт верир. Ганунсузлуг, худбинлик вә аллаһсызлыг баш алыб ҝедир. Индики дөвр һәтта Мүгәддәс Китаб принсипләринә ујғун јашамаға чалышан инсанлар үчүн дә ‘чәтиндир’ (Мат. 24:3, 6-8, 12; 2 Тим. 3:1-5).
5 Инсанларын бөјүк әксәријјәти дүнјада баш верән һадисәләрин әслиндә нәјә ишарә етдијиндән бихәбәрдир. Буна ҝөрә дә, онлар һәм өзләринин, һәм дә доғмаларынын тәһлүкәсизлијинә ҝөрә нараһатдырлар. Әзизләринин өлүмү вә ја өзләринин үзләшдији бәдбәхтликләр инсанлара гәм-гүссә ҝәтирир. Онлар белә һадисәләрин баш вермәсинин сәбәбини дәгиг билмәдикләри вә проблемләрдән чыхыш јолу ҝөрмәдикләри үчүн үмидсизлијә гапылырлар (Ефес. 2:12).
6. Нәјә ҝөрә ‘Бөјүк Бабил’ она гуллуг едәнләрә көмәк етмәјә мүвәффәг олмады?
6 Јалан динин дүнја империјасы олан «Бөјүк Бабил» бәшәријјәтә тәсәлли ҝәтирә билмәди. Үстәлик, «зинасынын шәрабы илә» сајсыз-һесабсыз инсанлары руһани зүлмәтә салды. Јалан дин, фаһишә кими давранараг, ‘јерин һөкмдарларыны’ алдадыр вә онлара тәсир ҝөстәрир. Һәмчинин јанлыш тәлимләрдән вә сеһирбазлыгдан истифадә едәрәк бәшәријјәтин бөјүк һиссәсинин сијаси рәһбәрләрә кор-коранә табе олмасына наил олуб. Бунунла да јалан дин бөјүк нүфуза вә һакимијјәтә саһиб олса да, дини һәгигәти тамамилә инкар етмишдир (Вәһј 17:1, 2, 5; 18:23).
7. Әксәр инсанлары нә ҝөзләјир вә бәзиләринә неҹә көмәк етмәк олар?
7 Исанын дедији кими, инсанларын әксәријјәти һәлака апаран енли јолла ҝедир (Мат. 7:13, 14). Бәзиләри бу јолу, Мүгәддәс Китаб тәлимләрини биләрәкдән инкар етмәклә сечмишдир. Бир чохлары исә алдандыглары вә ја дин рәһбәрләри Јеһованын тәләбләрини өјрәтмәдикләри үчүн бу јолдадырлар. Ола билсин, бәзиләринә Мүгәддәс Китабдан тутарлы әсаслар ҝәтириләрсә, онлар өз һәјат тәрзләрини дәјишәрләр. Бөјүк Бабилдә галанлар вә Мүгәддәс Китаб принсипләрини инкар едәнләр исә «бөјүк мәшәггәтдән» сағ чыхмајаҹаглар (Вәһј 7:14).
Тәблиғ етмәкдән ‘ваз кечмә’
8, 9. Биринҹи әсрин мәсиһчиләри мүгавимәтләрлә үзләшәндә неҹә давранырдылар вә нә үчүн?
8 Иса Мәсиһ давамчыларынын Падшаһлыг һаггында хош хәбәри тәблиғ едәҹәкләрини вә шаҝирд һазырлајаҹагларыны демишди (Мат. 28:19, 20). Буна ҝөрә дә, һәгиги мәсиһчиләр һәмишә тәблиғ ишинә Аллаһа сәдагәт мәсәләси вә иманларынын әсас тәләби кими јанашырдылар. Бу сәбәбдән, Исанын еркән давамчылары, һәтта тәгибләрлә үзләшәндә дә, тәблиғ ишини давам етдирирдиләр. Онлар Јеһованын ‘сөзүнү там ҹәсарәтлә сөјләмәјә’ давам етмәк үчүн көмәк диләмәклә Онун ҝүҹүнә ҝүвәнирдиләр. Ҹаваб олараг, Јеһова бу мәсиһчиләрә мүгәддәс руһундан верди, онлар да Аллаһын сөзүнү ҹәсарәтлә сөјләдиләр (Һәв. иш. 4:18, 29, 31).
9 Мүгавимәтләрин шиддәтләнмәси Исанын давамчыларынын хош хәбәри тәблиғ етмәк әзмини сындырдымы? Бу һеч дә белә олмады. Һәвариләрин тәблиғинә ҝөрә гәзәбләнән јәһуди дин рәһбәрләри онлары һәбсә салдылар, һәдә-горху ҝәлдиләр вә дөјдүрдүләр. Буна бахмајараг, һәвариләр «тәлим вермәкдән вә Исанын Мәсиһ олдуғуну мүждәләмәкдән ваз кечмирдиләр». Онлар ајдын баша дүшүрдүләр ки, «инсанлардан артыг, Аллаһа итаәт етмәк ҝәрәкдир» (Һәв. иш. 5:28, 29, 40-42).
10. Бу ҝүн мәсиһчиләр һансы чәтинликләрлә гаршылашырлар, лакин онларын јахшы давранышларынын нәтиҹәси нә ола биләр?
10 Аллаһын мүасир хидмәтчиләринин әксәријјәти тәблиғ етдикләринә ҝөрә нә дөјүлүр, нә дә һәбс едилирләр. Анҹаг онларын да сынаглары аз дејил. Мәсәлән, Мүгәддәс Китаб әсасында тәрбијә едилән виҹданын сәни бу дүнјанын гејри-ади сајдығы вә башгаларындан фәргләндирән һәјат тәрзилә јашамаға тәшвиг едә биләр. Гәрарларыны Мүгәддәс Китаб принсипләринә әсасландырдығын үчүн иш вә ја синиф јолдашларын, јахуд гоншуларын сәнин гәрибә инсан олдуғуну дүшүнә биләрләр. Лакин онларын мәнфи мүнасибәти сәни дајандырмамалыдыр. Руһани зүлмәтдә олан бу дүнјада мәсиһчиләр ‘улдузлар кими парламалыдырлар’ (Филип. 2:15). Сәни кәнардан мүшаһидә едән бәзи сәмими инсанлар ҝөзәл ишләрини ҝөрүб гијмәтләндирә вә Јеһоваја иззәт верә биләрләр. (Матта 5:16 ајәсини оху.)
11. а) Бәзиләри тәблиғимизә неҹә јанаша биләрләр? б) Һәвари Павел һансы мүгавимәтләрлә үзләширди вә буна неҹә мүнасибәт ҝөстәрирди?
11 Падшаһлыг һаггында хәбәрин тәблиғини давам етдирмәк үчүн бизә ҹәсарәт лазымдыр. Бәзи инсанлар, һәтта гоһумларын да сәни лаға гоја, јахуд башга үсулла руһдан салмаға чалыша биләрләр (Мат. 10:36). Һәвари Павел хидмәтини сәдагәтлә јеринә јетирдији үчүн дәфәләрлә дөјүлмүшдү. Онун бу мүгавимәтләрә неҹә мүнасибәт ҝөстәрдијинә диггәт јетирәк: «Әзаб чәкиб, тәһгир олундуғумуз һалда, биз Аллаһымыздан ҹәсарәт алдыг ки, бөјүк мүгавимәтә бахмајараг, сизә Аллаһын Мүждәсини елан едәк» (1 Салон. 2:2). Бәли, палтарлары чыхарылыб, дәјәнәклә дөјүлүб, зиндана атылдыгдан сонра да хош хәбәри тәблиғ етмәк үчүн Павелдән ҹәсарәт тәләб олунурду (Һәв. иш. 16:19-24). О, хидмәтини давам етдирмәк үчүн ҹәсарәти һарадан алырды? Павелә ҹәсарәт верән Аллаһын она һәвалә етдији тәблиғ ишини јеринә јетирмәк арзусу иди (1 Кор. 9:16).
12, 13. Бәзиләри һансы чәтинликләрлә үзләшир вә онларын өһдәсиндән неҹә ҝәлмәјә чалышырлар?
12 Сәјимизи горумағы чәтинләшдирән амилләрдән бәзиләри саһәмиздәки инсанларын евләриндә чәтин тапылмасы вә ја онларын хош хәбәрә лагејд мүнасибәти дә ола биләр. Белә һалларда нә етмәк олар? Мәсәлән, бүтүн ҹәсарәтимизи топлајыб гејри-формал тәблиғ едә биләрик. Бундан савајы, биз ја хидмәт ҹәдвәлимиздә дәјишиклик едә, ја да даһа чох инсан олан јерләрдә тәблиғ етмәјә сәј ҝөстәрә биләрик. (Јәһја 4:7-15; Һәвариләрин ишләри 16:13; 17:17 ајәләри илә мүгајисә ет.)
13 Ҝүндән-ҝүнә јаша долмағымыз вә сәһһәтимизин зәифләмәси мүбаризә апардығымыз вә хидмәтимизи мәһдудлашдыран диҝәр чәтинликләр ола биләр. Әҝәр сәнин дә белә проблемләрин варса, руһдан дүшмә. Јеһова сәнин имканларынын мәһдуд олдуғуну јахшы билир вә ҝүҹүн чатаны едирсәнсә, буну гијмәтләндирир. (2 Коринфлиләрә 8:12 ајәсини оху.) Истәр тәгибләр, истәр лагејдлик, истәрсә дә сағламлығын зәифлији, бир сөзлә, һәр нә олурса-олсун, хош хәбәри башгалары илә бөлүшмәк үчүн шәраитин дахилиндә әлиндән ҝәләни ет. (Сүл. мәс. 3:27; мүгајисә ет: Марк 12:41-44.)
Хидмәтинә диггәт јетир
14. Павел һәмиманлыларына һансы нүмунәни гојду вә нәји мәсләһәт етди?
14 Һәвари Павел хидмәтинә олдугҹа ҹидди јанашырды вә һәмиманлыларыны да буна тәшвиг едирди (Һәв. иш. 20:20, 21; 1 Кор. 11:1). Павелин хүсусилә руһландырдығы мәсиһчиләрдән бири биринҹи әсрдә јашамыш Архип иди. Павел «Колослулара мәктуб»унда јазмышды: «Архипә буну дејин: “Диггәтли ол ки, Рәбб јолунда тапшырыг олараг алдығын хидмәти битирәсән”» (Колос. 4:17). Архипин өзү вә шәраити һаггында мәлуматымыз олмаса да, ҝөрүнүр, о тәблиғ етмәк тапшырығыны гәбул етмишди. Әҝәр һәјатыны Аллаһа һәср етмиш мәсиһчисәнсә, демәли, сән дә хидмәти гәбул етмисән. Бәс сән хидмәтини иҹра етмәк үчүн һәр ан она диггәт јетирирсәнми?
15. Мәсиһчи һәсролунмасы нә демәкдир вә һансы суаллар јараныр?
15 Вәфтиз олунмаздан әввәл сәмими дуада һәјатымызы Јеһоваја һәср етмишик. Бу о демәкдир ки, биз Онун ирадәсини јеринә јетирмәјә гәрар вермишик. Буна ҝөрә өзүмүздән сорушмалыјыг: «Доғруданмы Аллаһын ирадәси мәним һәјатында ән ваҹиб јери тутур?» Ола билсин, аиләмизин гајғысына галмаг кими ваҹиб мәсулијјәтимиз вар вә Јеһова биздән буна ҹидди јанашмағымызы ҝөзләјир (1 Тим. 5:8). Бәс галан вахтымызы вә гүввәмизи нәјә сәрф едирик? Һәјатда нәјә үстүнлүк веририк? (2 Коринфлиләрә 5:14, 15 ајәләрини оху.)
16, 17. Ҝәнҹ јахуд аз мәсулијјәтләри олан мәсиһчиләр нәјин үзәриндә дүшүнә биләрләр?
16 Ола билсин, сән мәктәби гуртармыш вә ја гуртармаг үзрә олан һәср олунмуш јенијетмәсән. Чох ҝүман ки, аилә мәсулијјәтиндән азадсан. Белә исә, ҝәләҹәклә бағлы һансы планларын вар? Һансы гәрарларын Јеһованын ирадәсини јеринә јетирмәк үчүн вердијин вәди даһа јахшы иҹра етмәјә көмәк едәҹәк? Бир чох мәсиһчиләр ҝүндәлик ишләрини елә планлашдырыблар ки, пионер кими хидмәт едә билсинләр, бу исә онлара бөјүк севинҹ вә мәмнунлуг ҝәтирмишдир (Мәз. 110:3; Ваиз 12:1).
17 Бәлкә дә сән, там иш ҝүнү ишләјән вә өзүнү тәмин етмәкдән савајы мәсулијјәти олмајан бир ҝәнҹсән. Шүбһә јохдур ки, вахтынын јол вердији гәдәр јығынҹағын ишләриндә иштирак етмәк сәнә севинҹ ҝәтирир. Бәс севинҹинә севинҹ гатмаг истәмәздинми? Хидмәтини ҝенишләндирмәк һагда дүшүнмүсәнми? (Мәз. 34:8; Сүл. мәс. 10:22). Бәзи әразиләрдә һәјаты хилас едән һәгигәт хәбәрини һамыја чатдырмаг үчүн һәлә ҝөрүләси ишләр чохдур. Һәјатында дәјишикликләр едиб, Падшаһлыг хидмәтчиләринә даһа чох еһтијаҹ олан әразиләрдә хидмәт едә биләрдинми? (1 Тимотејә 6:6-8 ајәләрини оху.)
18. Бир ҝәнҹ аилә һансы дәјишикликләри етди вә бу нә илә нәтиҹәләнди?
18 Бирләшмиш Штатлардан олан Кевин вә Еленанын нүмунәсинә нәзәр салагa. Әразиләриндә јашајан јени евлиләр кими, онлар да ев алмағы дүшүнүрдүләр. Һәр икиси там иш ҝүнүндә чалышыр вә раһат шәраитдә јашајырдылар. Вахтларынын чохуну ишә вә ев гајғыларына сәрф етдикләри үчүн тәблиғ хидмәтинә вахтлары аз галырды. Онлар, демәк олар ки, бүтүн вахт вә гүввәләрини әмлакларына сәрф етдикләрини баша дүшдүләр. Кевинлә Елена пионер кими хидмәт едән бир хошбәхт әр-арвадын садә һәјат тәрзини ҝөрәрәк һәјатларында дәјишиклик етмәк гәрарына ҝәлдиләр. Дуада Јеһовадан рәһбәрлик диләјәндән сонра евләрини сатыб, мәнзилә көчдүләр. Елена иш саатыны азалдараг пионер хидмәтинә башлады. Арвадынын хидмәтдән дујдуғу севинҹи ҝөрән Кевин ишиндән чыхыб пионер хидмәтинә башлады. Бир гәдәр сонра онлар хидмәт етмәк үчүн Падшаһлығын тәблиғчиләринә бөјүк еһтијаҹ олан Ҹәнуби Американын бир өлкәсинә көчдүләр. Кевин дејир: «Биз һәмишә хошбәхт аилә олмушуг, анҹаг руһани мәгсәдләрә ҹан атмаға башлајанда хошбәхтлијимиз бирә-беш артды». (Матта 6:19-22 ајәләрини оху.)
19, 20. Нәјә ҝөрә хош хәбәрин тәблиғи дүнјада ән ваҹиб ишдир?
19 Бу ҝүн дүнјада хош хәбәрин тәблиғиндән ваҹиб иш јохдур (Вәһј 14:6, 7). Бу иш бирбаша Јеһованын адынын мүгәддәс тутулмасы илә бағлыдыр (Мат. 6:9). Һәр ил Мүгәддәс Китаб хәбәри ону гәбул едән минләрлә инсанын һәјатыны јахшылашдырыр вә бунун нәтиҹәсиндә онлар хилас ола биләрләр. Һәвари Павел сорушмушду: «Вәз едән јохдурса, неҹә ешидәҹәкләр?» (Ром. 10:14, 15). Доғрудан да, тәблиғ едән јохдурса, инсанлар неҹә ешидәҹәкләр? Нәјә ҝөрә хидмәтини јеринә јетирмәк үчүн әлиндән ҝәләни етмәјә гәтијјәтли олмајасан?
20 Инсанлара бу чәтин дөврүн ваҹиблијини вә вердикләри гәрарлардан ҝәләҹәкләринин асылы олдуғуну анламаға көмәк етмәк үчүн биз өјрәтмәк баҹарығымызы да инкишаф етдирмәлијик. Буну неҹә едә биләҹәјимизи нөвбәти мәгаләдә арашдыраҹағыг.
[Һашијә]
a Адлар дәјишдирилиб.
Неҹә ҹаваб верәрдиниз?
• Мәсиһчиләрин инсанларла бағлы һансы мәсулијјәти вар?
• Тәблиғдә үзләшдијимиз чәтинликләрин өһдәсиндән неҹә ҝәлмәк олар?
• Бизә һәвалә олунан хидмәти неҹә јеринә јетирә биләрик?
[5-ҹи сәһифәдәки шәкил]
Мүгавимәтләр гаршысында хош хәбәри тәблиғ етмәк үчүн ҹәсарәт лазымдыр
[7-ҹи сәһифәдәки шәкил]
Саһәндә инсанлар евләриндә чәтин тапылырса, нә едә биләрсән?