Хош хәбәри сә’јлә е’лан един
“Руһән һәрарәтли олун; Рәббә хидмәт един” (РОМАЛЫЛАРА 12:11).
1, 2. Мәсиһчиләр хош хәбәрин тәблиғинә һансы мүнасибәти горујуб сахламаға чалышмалыдырлар?
БИР ҝәнҹ, јени ишә гәбул олундуғу үчүн һәјәҹан һисси кечирир. Өзүнүн илк иш ҝүнүндә саһибкарындан сәбирсизликлә ҝөстәриш ҝөзләјир. О, илк тапшырығы ҝөзләјир вә буна там ҹиддиликлә јанашыр. О, бу ишдә өз ҹаныны фәда етмәјә һазырдыр.
2 Биз мәсиһчиләр, бә’зи ҹәһәтдән јени ишчиләрә охшајырыг. Биз әбәди јашамаға үмид едирик вә буна ҝөрә, демәк олар ки, Јегова үчүн чалышмаға јениҹә башламышыг. Шүбһәсиз ки, Јараданымыз бизә, әбәдијјәт боју јеринә јетирмәли олаҹағымыз сајсыз-һесабсыз тапшырыглар һазырлајыр. Лакин бизә илк нөвбәдә верилән тапшырыг, Падшаһлыг һаггындакы хош хәбәри тәблиғ етмәкдир (1 Салониклиләрә 2:4). Аллаһдан алдығымыз бу тапшырыға биз неҹә јанашырыг? Һәмин ҝәнҹ кими, биз бу ишдә ҹанымызы фәда етмәлијик, ону сә’јлә вә севинҹлә, бир сөзлә, гејрәтлә јеринә јетирмәлијик!
3. Хош хәбәрин тәблиғчиләри кими наилијјәт газанмаг үчүн бизә нә лазымдыр?
3 Е’тираф етмәк лазымдыр ки, бу ҹүр мүсбәт нөгтеји-нәзәри горујуб сахламаг чәтин ола биләр. Хидмәтимиздән әлавә, физики вә мә’нәви гүввә тәләб едән бир чох башга вәзифәләримиз дә вар. Чох вахт бу ишләрин өһдәсиндән ҝәлмәк, бунунла бәрабәр хидмәтимизә дә кифајәт гәдәр вахт ајырмаг бизә мүвәффәг олур. Амма бу, даими мүбаризә ола биләр (Марк 8:34). Исанын гејд етдији кими, мәсиһчи һәјатында наилијјәтләр газанмаг үчүн чох гүввә тәләб олунур (Лука 13:24).
4. Ҝүндәлик гајғылар руһани ишләрә олан мүнасибәтимизә неҹә тә’сир едә биләр?
4 Ишин чохлуғуну нәзәрә алсаг, бә’зән өзүмүзү јорғун вә әзҝин һисс етмәјимиз тәәҹҹүблү дејил. “Һәјатын гајғылары” теократик фәалијјәтләрә олан ҹәһдимизи зәифләдир вә онларын дәјәрини унутмаға башлајырыг (Лука 21:34, 35; Марк 4:18, 19). Гејри-камил олдуғумуздан, өзүмүзүн “илк мәһәббәтимизи” итирә биләрик (Вәһј 2:1—4). Јеговаја хидмәтимизин бә’зи саһәләри мүәјјән дәрәҹәдә бизим үчүн ади бир шејә чеврилә биләр. Хидмәтә сә’ји горумаг үчүн Мүгәддәс Китаб бизә неҹә көмәк едир?
Үрәјимиздә “јанан бир атәш кими”
5, 6. Һәвари Павел тәблиғ етмәк фүрсәтинә неҹә јанашырды?
5 Јегованын бизә е’тибар етдији хидмәт о дәрәҹәдә гијмәтлидир ки, вахт кечдикҹә ону ади бир шеј кими гәбул етмәк мүмкүн дејил. Һәвари Павел хош хәбәри тәблиғ етмәк имканыны чох гијмәтләндирирди, өзүнү исә бу тапшырыға лајиг санмырды. О, дејирди: “Бүтүн мүгәддәсләрдән ән кичији олдуғум һалда, Мәсиһин кәшфолунмаз зәнҝинлијини јәһуди олмајанлара мүждәләмәк вә һәр шеји Иса Мәсиһ васитәсилә јарадан Аллаһда әзәлдән бәри ҝизләнмиш олан сиррин неҹә тәртиб едилдијини бүтүн инсанлара ајдынлашдырмаг лүтфү мәнә бәхш едилди” (Ефеслиләрә 3:8, 9).
6 Павелин хидмәтиндәки мүсбәт нөгтеји-нәзәри бизим үчүн ҝөзәл нүмунәдир. О, ромалылара ҝөндәрдији мәктубунда дејирди: “Мән... вар ҝүҹүмлә Мүждәни тәблиғ етмәјә һазырам”. О, хош хәбәрдән утанмырды (Ромалылара 1:15, 16). Онун дүзҝүн нөгтеји-нәзәри варды вә өз хидмәтини јеринә јетирмәјә чалышырды.
7. Ромалылара јаздығы мәктубда Павел нә һагда хәбәрдар едирди?
7 Һәвари Павел, сә’ји горујуб сахламаг лазым ҝәлдијини дәрк едәрәк, Ромадакы мәсиһчиләрә мәсләһәт едирди: “Сә’јдә зәифләмәјин; руһән һәрарәтли олун; Рәббә хидмәт един” (Ромалылара 12:11). “Зәифләмәјин” кими тәрҹүмә едилән јунан сөзү, тәнбәллик, һәвәссизлик фикрини верир. Биз хидмәтдә зәифләмәсәк дә, һамымыз, өзүмүздә јаранан руһани тәнбәллијин илк әламәтини дәрһал нәзәрә алмалы вә буна мүвафиг сурәтдә өз фикирләримизи дәјишмәлијик (Сүлејманын мәсәлләри 22:3).
8. а) Јеремјанын үрәјиндә “јанан атәш кими” олан нә иди вә нә үчүн? б) Јеремјанын башына ҝәлән һадисәдән биз нәјә өјрәнә биләрик?
8 Биз руһдан дүшәндә, Аллаһын мүгәддәс руһу да бизә көмәк едә биләр. Мисал үчүн, бир дәфә пејғәмбәр Јеремја руһдан дүшдү вә пејғәмбәрлик хидмәтини дајандырмаг барәдә фикирләшди. О, һәтта Јегова һаггында деди: “Ону анмајаҹағам вә артыг онун ады илә сөјләмәјәҹәм”. Бу, Јеремјанын ҹидди сурәтдә руһән зәифләмәсинә әламәт идими? Хејр. Јеремјанын руһән мөһкәмлији, Јеговаја мәһәббәти вә һәгигәтә олан сә’ји она гүввәт верди ки, даһа сонра да пејғәмбәрлик етсин. О, изаһ едирди: “[Јегованын сөзләри] үрәјимдә, сүмүкләримин ичинә сохулмуш јанан бир атәш кими олду вә өзүмү сахламагдан јорулдум, артыг баҹармырам” (Јеремја 20:9). Аллаһын хидмәтчиләринин бә’зән руһдан дүшмәләри тамамилә тәбиидир. Лакин онлар көмәк үчүн Јеговаја дуа етдикдә, Јеремја кими Онун сөзләрини үрәкләриндә сахлајарларса, Јегова онларын үрәјини ҝөрүб, мүгәддәс руһундан бол-бол верәр (Лука 11:9—13; Һәвариләрин ишләри 15:8).
“Руһу сөндүрмәјин”
9. Мүгәддәс руһун бизим хејримизә һәрәкәт етмәсинә нә мане ола биләр?
9 Һәвари Павел салониклиләрә мәсләһәт едирди: “Руһу сөндүрмәјин” (1 Салониклиләрә 5:19). Бәли, Аллаһын принсипинә зидд олан давраныш вә дүшүнҹә тәрзи, мүгәддәс руһун бизим хејримизә һәрәкәт етмәсинә мане ола биләр (Ефеслиләрә 4:30). Мәсиһчиләрә бу ҝүн хош хәбәри тәблиғ етмәк тапшырылыб. Биз бу тапшырығы бөјүк шәрәф санырыг. Аллаһы танымајан инсанларын бизим тәблиғ фәалијјәтимизә нифрәт етмәләри бизи тәәҹҹүбләндирмир. Лакин мәсиһчи өз хидмәтинә шүурлу сурәтдә хор јанашанда, бу, Аллаһын фәалијјәтә тәшвиг едән руһуну “сөндүрә” биләр.
10. а) Әтрафымызда олан инсанларын фикирләри бизә неҹә тә’сир ҝөстәрә биләр? б) 2 Коринфлиләрә 2:17 хидмәтә аид һансы јүксәк мүнасибәт ифадә олунур?
10 Мәсиһчи јығынҹағына мәхсус олмајан адамлар, бизим хидмәтимизин әдәбијјат пајламагдан ибарәт олдуғуну дүшүнә биләрләр. Диҝәрләри сәһв олараг зәнн едә биләрләр ки, биз јалныз ианә јығмаг үчүн евдән евә ҝәзирик. Әҝәр бу ҹүр мәнфи нөгтеји-нәзәрләрин әһвал-руһијјәмизә тә’сир етмәсинә јол версәк, ајдын мәсәләдир ки, бизим хидмәтимизин ҝүҹү азалаҹагдыр. Белә фикирләрин тә’сиринә јол вермәк әвәзинә, ҝәлин өз хидмәтимизә Јегованын вә Исанын нөгтеји-нәзәри илә бахаг. Бу ваҹиб фикир һәвари Павелин сөзләриндә әкс олунур: “Биз бир чохлары кими Аллаһ кәламынын хырдаватчылары дејилик, лакин Аллаһдан ҝөндәрилән вә Мәсиһә аид олан адамлар олараг, Аллаһын һүзурунда сәмими гәлбдән вә’з едирик” (2 Коринфлиләрә 2:17).
11. Илк мәсиһчиләрә, һәтта тә’гибләр заманы ҹәсарәтли олмаға нә көмәк етди вә онларын нүмунәси бизә неҹә тә’сир етмәлидир?
11 Исанын өлүмүндән тез сонра, онун шаҝирдләри Јерусәлимдә бир мүддәт тә’гибә мә’руз галдылар. Онлары һәдәләјир вә тәблиғи дајандырмағы әмр едирдиләр. Анҹаг Мүгәддәс Китаб дејир ки, онлар “Мүгәддәс Руһла долмушду вә Аллаһын сөзүнү ҹәсарәтлә сөјләјирди”ләр (Һәвариләрин ишләри 4:17, 21, 31). Бир нечә илдән сонра Павелин Тимотејә дедији сөзләр, мәсиһчиләрә һансы мүсбәт әһвал-руһијјәни горујуб сахламаг лазым олдуғуну ҝөстәрир. Павел дејирди: “Аллаһ бизә горхаглыг руһу дејил, гүдрәт, мәһәббәт вә нәфсә һаким олмаг руһу вермишдир. Буна ҝөрә нә Рәббимизә шәһадәт етмәкдән вә нә дә Онун уғрунда әсир олан мәндән утанма; амма Аллаһын гүдрәти илә Мүждә уғрунда мәнимлә бирликдә әзијјәтә таб ҝәтир” (2 Тимотејә 1:7, 8).
Гоншуларымыза борҹумуз нәдир?
12. Хош хәбәри тәблиғ етмәјимизин әсас сәбәби нәдир?
12 Хидмәтимизә лајигинҹә јанашмағымыз үчүн, дүзҝүн мәгсәдимиз олмалыдыр. Биз нә үчүн тәблиғ едирик? Бунун әсас сәбәбини мәзмурчунун бу сөзләри ҝөстәрир: “[Ја РӘБ] Мө’минләрин сәни мүгәддәс сајсынлар. Падшаһлығынын иззәтини сөјләсинләр вә гүввәтини е’лан етсинләр. Та ки, инсан оғулларына онун гүдрәтли ишләрини вә падшаһлығынын әзәмәтли иззәтини билдирсинләр” (Мәзмур 145:10—12). Бәли, бизим тәблиғимизин мәгсәди, Јегованы халг арасында иззәтләндирмәк вә Онун адыны бүтүн бәшәријјәт гаршысында мүгәддәс тутмагдыр. Һәтта бизи динләјәнләр аз олса да, хилас һаггындакы мүждәни сәдагәтлә тәблиғ етмәјимиз Јеговаја иззәт ҝәтирир.
13. Хиласа олан үмиди башгаларына данышмаға бизи нә тәшвиг едир?
13 Бундан әлавә, бизи тәблиғ ишинә, инсанлара олан мәһәббәт вә гандан тәмиз олмаг истәји тәшвиг едир (Һезекиел 33:8; Марк 6:34). Павелин, мәсиһчи јығынҹағына мәхсус олмајан инсанлар барәдә дедији сөзләр буна мүвафигдир: “Мән, јунанлара вә барбарлара, мүдрикләрә вә ҹаһилләрә борҹлујам” (Ромалылара 1:14, ӘҸ—93). Павел, хош хәбәри бу инсанлара тәблиғ етмәји өз борҹу санырды, чүнки Аллаһын ирадәси ондан ибарәтдир ки, “бүтүн инсанлар хилас” олсунлар (1 Тимотејә 2:4). Бу ҝүн биз дә, өз гоншуларымыза мүнасибәтдә ејни мәһәббәти вә ејни борҹ һиссини дујуруг. Инсанлара олан мәһәббәти Јегованы тәшвиг етди ки, өз Оғлуну онлар уғрунда өлмәк үчүн јер үзүнә ҝөндәрсин (Јәһја 3:16). Бу, бөјүк гурбан иди. Биз, Исанын гурбанлығы сајәсиндә мүмкүн олан хилас һаггындакы хош хәбәри инсанлара сөјләмәк үчүн вахт вә гүввә сәрф едәндә, Јегованын мәһәббәтини әкс етдиририк.
14. Мәсиһчи јығынҹағынын мәхсус олмадығы дүнјаны Мүгәддәс Китаб неҹә тәсвир едир?
14 Јегованын Шаһидләри инсанларда, мәсиһчи гардашлығынын мүмкүн олан үзвләрини ҝөрүрләр. Биз ҹәсарәтлә тәблиғ етмәлијик, амма бизим ҹәсарәтимиз инсанлары тәнҝә ҝәтирмәмәлидир. Доғрудур ки, Мүгәддәс Китабда үмумијјәтлә дүнја һаггында кифајәт гәдәр гәти сөзләр истифадә едилир. Павел, “бу дүнјанын мүдриклији” вә “дүнјәви еһтираслар” һаггында данышаркән, “дүнја” сөзүнү мәнфи мә’нада ишләтмишдир (1 Коринфлиләрә 3:19; Титуса 2:12). Павел, Ефесдән олан мәсиһчиләрә дә хатырлатды ки, онлар “бу дүнјанын ҝедишинә” ујдуглары заман руһән “өлү” идиләр (Ефеслиләрә 2:1—3). Бу вә буна бәнзәр олан сөзләр, һәвари Јәһјанын дедикләринә мүвафигдир: “Бүтүн дүнја... шәририн һакимијјәти алтындадыр” (1 Јәһја 5:19).
15. Мәсиһчи јығынҹағына мәхсус олмајан инсанларла биз неҹә давранмырыг вә нә үчүн?
15 Лакин јадда сахламаг лазымдыр ки, бу ҹүр ифадәләр, ајры-ајры шәхсләрә дејил, үмумијјәтлә Аллаһдан узаглашмыш дүнјаја аиддир. Мәсиһчиләр, һәр һансы бир инсанын хош хәбәрә ҹаваб вериб вермәјәҹәјини вахтындан әввәл фәрз етмирләр. Онларда, бир кимсәни “кечиләрә” аид етмәјә һеч бир әсас јохдур. Иса “гојунлары кечиләрдән” ајырмаға ҝәләндә алынаҹаг нәтиҹәни мүәјјән етмәк бизим ишимиз дејил (Матта 25:31—46). Мүһакимә етмәк бизә јох, Исаја тапшырылыб. Бундан башга, тәҹрүбә ҝөстәрир ки, әввәлләр өзләрини һәддиндән артыг әхлагсыз апаран инсанлар Мүгәддәс Китабын мүждәсини гәбул едир, дәјишилир вә јүксәк әхлаглы мәсиһчи һәјатына башлајырлар. Буна ҝөрә дә биз, әхлагсыз инсанларла үнсијјәт ахтармадығымыза бахмајараг, имкан јарананда һәмин инсанлара Падшаһлыг үмиди һаггында мәмнунијјәтлә данышырыг. Мүгәддәс Јазыларда, иман етмәјән, амма “әбәди һәјата мејлли олан” инсанлар һаггында дејилир. Нәтиҹәдә, онлар да иман етмишдиләр (Һәвариләрин ишләри 13:48, ЈД). Биз нә гәдәр ки, бир инсана шәһадәтлик етмәмишик, бәлкә бир нечә дәфә етмишиксә дә, онун әбәди һәјата мејлли олуб олмадығыны мүәјјән едә билмәрик. Биз буну јадда сахлајыб, хилас һаггындакы мүждәни һәлә гәбул етмәјәнләрдән киминсә хош хәбәрә ҹаваб верәҹәјинә үмид едәрәк, инсанларла “һәлимликлә” вә “еһтирамла” давранырыг (2 Тимотејә 2:25; 1 Петер 3:15).
16. “Тә’лим вермәк габилијјәтини” инкишаф етдирмәк истәмәјимизин сәбәбләриндән бири нәдир?
16 Әҝәр өзүмүзүн тә’лим вермәк габилијјәтимизи инкишаф етдирсәк, хош хәбәрин тәблиғинә олан сә’јимиз ҝүҹләнәҹәкдир. Мисал үчүн: ојнамағы баҹармајан шәхс үчүн әјләнҹәли ојун вә ја идман мараглы олмајаҹаг. Амма баҹаран адама исә белә ојун ләззәт верир. Бунун кими мәсиһчиләр дә, “тә’лим” вермәк габилијјәтләрини инкишаф етдирәрәк хидмәтләриндән алдыглары севинҹи артыраҹаглар (2 Тимотејә 4:2; Титуса 1:9). Павел Тимотејә мәсләһәт верирди: “Чалыш ки, өзүнү Аллаһа сынагдан чыхмыш, утанмаға әсасы олмајан вә һәгигәт сөзүнү доғрулугла өјрәдән бир ишчи кими тәгдим едәсән” (2 Тимотејә 2:15). Тә’лим вермәк баҹарығымызы неҹә инкишаф етдирә биләрик?
17. Мүгәддәс Китабдакы билији неҹә “арзуламаг” олар вә бу билик хидмәтимиздә бизә неҹә көмәк едәҹәк?
17 Буну етмәјин бир үсулу, дәгиг билик алмагдыр. Һәвари Петер бизи тәшвиг едир: “Анадан тәзә олмуш көрпәләр кими, һијләсиз сүдү андыран кәламы арзулајын ки, онунла бөјүјүб гуртулуша наил оласыныз” (1 Петер 2:2). Сағлам көрпә сүдә гери-иради олараг ҹан атыр. Анҹаг мәсиһчијә, Мүгәддәс Китабдакы билији “арзуламаг” лазым ҝәлә биләр. Буна, чалышганлыгла өјрәнмәк вә охумаг вәрдишини инкишаф етдирмәклә наил олмаг мүмкүндүр (Сүлејманын мәсәлләри 2:1—6). Аллаһын Кәламыны мәһарәтлә тәблиғ етмәји өјрәнмәк үчүн сә’ј ҝөстәрмәк вә өзүнүидарә габилијјәти лазымдыр, амма белә сә’ј мүкафатланыр. Аллаһын Кәламыны тәдгиг етмәкдән алынан севинҹ һисси, бизи Аллаһын руһу илә ҹошмаға вә өјрәндијимизи башгалары илә бөлүшмәк арзусуну һәјата кечирмәјә тәшвиг едәҹәкдир.
18. Һәгигәт сөзләрини дүзҝүн тәблиғ етмәкдә мәсиһчи јығынҹаглары бизи неҹә тәҹһиз едир?
18 Аллаһын Кәламыны мәһарәтлә тәтбиг етмәк үчүн, мәсиһчи јығынҹагларына ҝетмәк дә чох ваҹибдир. Мә’рузәләрин вә Мүгәддәс Јазыларын диҝәр мүзакирәләри заманы Мүгәддәс Китабдан ситат ҝәтирилән ајәләр охунанда, јахшы олар ки, һәмин ајәләри биз дә өз Мүгәддәс Китабымызда изләјәк. Бүтүн диггәтимизи програмын бәндләринә, о ҹүмләдән, бирбаша тәблиғ хидмәтимизә аид олан һиссәсинә јөнәлтмәјимиз әһәмијјәтлидир. Унутмаг лазым дејил ки, ҝөстәрилән сәһнәҹикләр ваҹибдир вә онлар тәгдим олунан заман фикримизин јајынмасына јол вермәјәк. Јенә дә, өзүнүидарә габилијјәти вә фикри ҹәмләшдирмәк лазым ҝәлир (1 Тимотејә 4:16). Мәсиһчи јығынҹаглары бизим иманымызы мөһкәмләндирир, Аллаһын Кәламына һәвәсимизи артырмаға көмәк едир вә хош хәбәри сә’јлә е’лан етмәји өјрәдир.
Биз, Јегованын көмәјинә архалана биләрик
19. Тәблиғдә мүнтәзәм олараг иштирак етмәк нәјә ҝөрә ваҹибдир?
19 “Руһән алышан” вә хош хәбәри тәблиғ етмәк һәвәсилә ҹошан мәсиһчиләр хидмәтдә мүнтәзәм сурәтдә иштирак етмәјә чалышырлар (Ефеслиләрә 5:15, 16). Дүздүр, һамынын шәраити ејни дејил вә бу хиласедиҹи ишә һамы ејни вахты һәср едә билмир (Галатијалылара 6:4, 5). Буна бахмајараг, тәблиғдә кечирилән вахтын үмуми мигдары јох, үмидимиз барәдә башгаларына тез-тез данышмағымыз даһа ваҹибдир (2 Тимотејә 4:1, 2). Биз нә гәдәр чох тәблиғ едириксә, бу ишин әһәмијјәтини дә бир о гәдәр чох дәрк едирик (Ромалылара 10:14, 15). Үмидсиз олараг аһ чәкән вә фәрјад едән үрәјиачыг инсанларла мүнтәзәм ҝөрүшмәклә, биз даһа чох ҹаны јанан вә инсансевәр олаҹағыг (Һезекиел 9:4; Ромалылара 8:22).
20, 21. а) Гаршымызда һәлә һансы иш дурур? б) Јегова ишимиздә бизә неҹә көмәк едир?
20 Јегова хош хәбәри бизә һәвалә едиб. Бу, Онун “әмәкдашлары” кими, Ондан алдығымыз илк тапшырыгдыр (1 Коринфлиләрә 3:6—9). Аллаһын вердији бу вәзифәни биз ҹанла-башла вә баҹардығымыз гәдәр даһа јахшы јеринә јетирмәк истәјирик (Марк 12:30; Ромалылара 12:1). Бу дүнјада, һәгигәт арзусунда олан дүзҝүн нијјәтли инсанлар һәлә чохдур. Бу о демәкдир ки, иш дә чохдур, амма өз хидмәтимизи там јеринә јетирәрәк, биз Јегованын көмәјинә архалана биләрик (2 Тимотејә 4:5).
21 Јегова бизә өз руһуну верир вә бизи “руһун гылынҹы”, јә’ни өз Кәламы илә силаһландырыр. Биз, Аллаһын көмәји илә “Мүждәнин сиррини ҹәсарәтлә” е’лан едә биләрәк (Ефеслиләрә 6:17—20). Гој һәвари Павелин Салоникдәки мәсиһчиләрә јаздығы: “Јајдығымыз Мүждә сизә јалныз сөзлә дејил, гүдрәтлә, Мүгәддәс Руһла вә там бир е’тигадла чатмышдыр” - сөзләри бизә дә аид олсун (1 Салониклиләрә 1:5). Бәли, ҝәлин хош хәбәри биз дә сә’јлә е’лан едәк!
Гыса тәкрар
• Һәјатын гајғылары хидмәтимиздәки сә’јимизә неҹә тә’сир ҝөстәрә биләр?
• Хош хәбәри тәблиғ етмәк һәвәси һансы мә’нада үрәјимиздә “јанан атәш кими” олмалыдыр?
• Биз, хидмәтимизә ҝөстәрилән һансы мәнфи фикирләрдән чәкинмәлијик?
• Биз, әгидәмизә шәрик олмајан шәхсләрә үмумијјәтлә неҹә мүнасибәт бәсләмәлијик?
• Јегова бизә, тәблиғ ишиндә сә’јимизи горујуб сахламаға неҹә көмәк едир?
[21-ҹи сәһифәдәки шәкилләр]
Мәсиһчиләр Павелин вә Јеремјанын сә’јини әкс етдирирләр
[23-ҹү сәһифәдәки шәкилләр]
Јеговаја вә гоншуларымыза олан мәһәббәтимиз, бизи хидмәтдә сә’ј ҝөстәрмәјә тәшвиг едир