Јеһованын јоллары илә ҝедин
«Нә бәхтијардыр Рәбдән горхан, Онун јоллары илә ҝедән инсан!» МӘЗ. 128:1
1, 2. Нә үчүн әмин ола биләрик ки, әсл хошбәхтлијә наил олмаг мүмкүндүр?
ҺАМЫ хошбәхт олмаг истәјир. Амма разылашаҹагсыныз ки, хошбәхтлији арзуламаг вә һәтта она ҹан атмаг хошбәхт олмаг демәк дејил.
2 Буна бахмајараг, әсл хошбәхтлијә наил олмаг мүмкүндүр. Мәзмур 128:1 ајәсиндә дејилир: «Нә бәхтијардыр Рәбдән горхан, Онун јоллары илә ҝедән инсан!» Аллаһа еһтирам етсәк вә Онун ирадәсини јеринә јетирәрәк јоллары илә ҝетсәк, хошбәхт ола биләрик. Бу бизим давранышымыза вә хасијјәтимизә неҹә тәсир ҝөстәрә биләр?
Етибарлы инсан олдуғунузу ҝөстәрин
3. Етибарлы олмағымыз Аллаһа һәср олунмағымызла неҹә бағлыдыр?
3 Јеһовадан горханлар Онун кими етибарлыдырлар. Јеһова гәдим Исраил халгына вердији бүтүн вәдләрини јеринә јетирди (1 Пад. 8:56). Аллаһа һәср олунмағымыз һәјатымызда ән ваҹиб вәддир вә даима дуа етмәк ону јеринә јетирмәјимизә көмәк едәҹәк. Биз мәзмурчу Давуд кими дуа едә биләрик: «Сән, еј Аллаһ, етдијим әһди ешитдин... Адыны һәмишә тәрәннүм едәҹәјәм, һәр ҝүн әһд етдијим тәгдимләри верәҹәјәм!» (Мәз. 61:5, 8; Ваиз 5:4-6). Бәли, Аллаһын досту олмаг үчүн етибарлы адам олмалыјыг (Мәз. 15:1, 4).
4. Ифтаһ вә гызы онун Јеһоваја етдији әһдә неҹә јанашдылар?
4 Исраилдә һаким олан Ифтаһ әһд етди ки, Јеһова аммонлулар үзәриндә она гәләбә верәрсә, дөјүшдән гајыданда ону гаршыламаға илк чыханы «јандырма гурбаны» кими верәҹәк. Ифтаһы гызы — онун јеҝанә өвлады гаршылады. Јеһоваја имандан ирәли ҝәләрәк, Ифтаһ вә субај гызы едилән әһди јеринә јетирдиләр. Евлилик вә ушаг саһиби олмаг Исраилдә чох гијмәтләндирилсә дә, Ифтаһын гызы көнүллү олараг субај галмағы вә Јеһованын ибадәтҝаһында мүгәддәс хидмәти иҹра етмәк шәрәфини сечди (Һак. 11:28-40).
5. Ханна етибарлы инсан олдуғуну неҹә ҝөстәрди?
5 Аллаһ горхусу олан Ханна етибарлы гадын олдуғуну ҝөстәрди. О, левили әри Елгана вә онун диҝәр арвады Пенинна илә Ефрајимин дағлыг бөлҝәсиндә јашајырды. Пениннанын бир нечә ушағы олмушду вә о, сонсуз Ханнаны, хүсусилә дә бүтүн аилә ибадәтҝаһа ҝедәндә сөзлә аҹылајырды. Бир дәфә, онлар јенә ибадәтҝаһа ҝәләндә Ханна әһд етди ки, оғлу оларса, ону Јеһоваја верәҹәк. О, һамилә галыб бир оғул доғду вә адыны Шамуел гојду. Көрпә сүддән кәсиләндән сонра, Ханна Шамуели Шилоја ҝәтирәрәк ону Јеһоваја һәср етди (1 Шам. 1:11). Ханна јенә ушагларынын олаҹағыны билмәсә дә, өз әһдини јеринә јетирди (1 Шам. 2:20, 21).
6. Тихикин етибарлы инсан олдуғу нәдән ҝөрүнүр?
6 Биринҹи әсрдә јашамыш Тихик адлы мәсиһчи етибарлы адам вә «садиг хидмәткар» иди (Колос. 4:7). Тихик һәвари Павел илә бирҝә Македонијадан кечәрәк Јунаныстандан Кичик Асијаја вә еһтимал ки, Јерусәлимә ҝетмишди (Һәв. иш. 20:2-4). Ола билсин ки, Јәһудејада еһтијаҹы олан һәмиманлыларына азугә јығмаг ишиндә Титуса көмәк едән ‘гардаш’ Тихик иди (2 Кор. 8:18, 19; 12:18). Павел биринҹи дәфә Ромада һәбсдә оланда Ефес вә Колос шәһәрләриндәки һәмиманлыларына мәктублар чатдырмағы етибарлы тәмсилчиси Тихикә тапшырмышды (Ефес. 6:21, 22; Колос. 4:8, 9). Павел икинҹи дәфә Ромада һәбсдә оланда исә Тихики Ефесә ҝөндәрди (2 Тим. 4:12). Әҝәр етибарлы инсаныгса, Јеһоваја хидмәтдә биз дә хејир-дуалар алаҹағыг.
7, 8. Нәјә ҝөрә дејә биләрик ки, Давудла Јонатан әсл дост идиләр?
7 Јеһова биздән етибарлы дост олмағымызы ҝөзләјир (Сүл. мәс. 17:17). Шаул падшаһын оғлу Јонатан Давудун досту иди. Давудун Голјаты өлдүрдүјүнү ешидәндә «Јонатанын гәлби Давудун гәлбинә бағланды вә Јонатан ону өз ҹаны кими севди» (1 Шам. 18:1, 3). Шаул Давуду өлдүрмәк истәјәндә Јонатан она хәбәр верди. Давуд гачандан сонра Јонатан онунла ҝөрүшүб әһд бағлады. Јонатан Давудла данышдығы үчүн аз гала атасы ону өлдүрсүн. Лакин онлар бир даһа ҝөрүшүб достлуг мүнасибәтләрини мөһкәмләндирдиләр (1 Шам. 20:24-41). Сон ҝөрүшләри заманы Јонатан Давуду «Аллаһ наминә руһландырды» (1 Шам. 23:16-18).
8 Јонатан филиштлиләрлә дөјүшдә һәлак олду (1 Шам. 31:6). Давуд мәрсијәсиндә дејирди: «Еј гардашым Јонатан, сәнин үчүн үрәјим јанар. Сән мәнә чох әзиз идин. Сәнин севҝин мәним үчүн һејранедиҹи иди, гадын севҝисиндән дә үстүн иди» (2 Шам. 1:26). Давудла Јонатан әсл дост идиләр.
Һәмишә ‘тәвазөкар олун
9. Тәвазөкарлығын ваҹиблији «Һакимләр» китабынын 9-ҹу фәслиндә неҹә ҝөстәрилир?
9 Аллаһын досту олмаг үчүн ‘тәвазөкар олмалыјыг’ (1 Пет. 3:8). Тәвазөкарлығын ваҹиблији «Һакимләр» китабынын 9-ҹу фәслиндә ҝөстәрилир. Ҝидеонун оғлу Јотам демишди ки, ‘ҝүнләрин бир ҝүнүндә бүтүн ағаҹлар өзләри үчүн падшаһ мәсһ етмәк’ гәрарына ҝәлирләр. Зејтун вә әнҹир ағаҹынын, һәмчинин үзүм тәнәјинин ады чәкилир. Онлар һәмвәтәнләри исраиллиләр үзәриндә рәһбәрлик етмәјә ҹан атмајан ләјагәтли шәхсләри тәмсил едирди. Јалныз јанаҹаг кими истифадә едилән јабаны ҝөјәм исә, башгаларына ағалыг етмәјә ҹан атан мәғрур вә гатил Авимелејин һакимијјәтини тәмсил едирди. ‘Үч ил Исраил үзәриндә башчылыг етдикдән’ сонра ону вахтсыз өлүм јахалады (Һак. 9:8-15, 22, 50-54). ‘Тәвазөкар олмаг’ неҹә дә јахшыдыр!
10. Һиродун ‘Аллаһа мәхсус олан иззәти мәнимсәмәсиндән’ нә өјрәнирик?
10 Ерамызын биринҹи әсриндә Јәһудејанын мәғрур падшаһы Һирод Агриппа вә онунла сүлһдә олмаг истәјән Сур вә Сајда сакинләри арасында ҝәрҝинлик јаранды. Һирод бир дәфә халг гаршысында чыхыш едәндә онлар: «Бу инсан јох, Аллаһ сәсидир!» — дејә уҹадан гышгырырдылар. Һирод она јалтагҹасына дејилән бу сөзләрдән имтина етмәди, Јеһованын мәләји дә ону вурду вә о, дәһшәтли һалда өлдү, чүнки «Аллаһа мәхсус олан иззәти өзү мәнимсәмишди» (Һәв. иш. 12:20-23). Бәс әҝәр биз бир натиг, јахуд Мүгәддәс Китаб һәгигәтләрини өјрәдән кими мүәјјән истедада маликиксә, онда неҹә? Ҝәлин һәмишә бүтүн иззәти Јеһоваја верәк, ахы бүтүн бунлары бизә верән Одур (1 Кор. 4:6, 7; Јаг. 4:6).
Ҹәсарәтли вә мөһкәм олун
11, 12. Ханокун нүмунәси Јеһованын Өз хидмәтчиләринә ҹәсарәт вә ҝүҹ вердијини неҹә ҝөстәрир?
11 Тәвазөкарлыгла Јеһованын јолларында јерисәк, О бизә ҹәсарәт вә ҝүҹ верәҹәк (Ганун. т. 31:6-8, 23). Адәмдән сонра једдинҹи нәсилдән олан Ханок пис мүасирләри арасында тәмиз һәјат сүрәрәк ҹәсарәтлә Аллаһла јеријирди (Јар. 5:21-24). Јеһова Ханоку ҹәсарәтләндирирди ки, күфр едән вә аллаһсыз ишләр ҝөрән бу инсанлара Онун һөкм хәбәрини чатдырсын. (Јәһуда 14, 15 ајәләрини оху.) Бәс сәндә Аллаһын һөкмләрини бәјан етмәк үчүн лазыми ҹәсарәт вармы?
12 Јеһова Нуһун ҝүнләриндә бүтүн дүнјаја Дашгын ҝөндәрмәклә аллаһсыз инсанлар үзәриндә Өз һөкмүнү иҹра етди. Ханокун пејғәмбәрлији чох руһландырыҹыдыр, чүнки бизим ҝүнләрдә јашајан аллаһсызлар да тезликлә Аллаһын сәмави ордусу тәрәфиндән мәһв едиләҹәк (Вәһј 16:14-16; 19:11-16). Јеһова, дуаларымыза ҹаваб олараг, истәр Онун һөкмүнү, истәрсә дә Падшаһлығынын рәһбәрлији алтында олаҹаг хејир-дуалар һаггындакы хәбәрини бәјан етмәк үчүн бизә ҹәсарәт верир.
13. Нәјә ҝөрә әмин ола биләрик ки, сыхынты верән проблемләрин өһдәсиндән ҝәлмәк үчүн Јеһова бизә ҹәсарәт вә ҝүҹ верә биләр?
13 Сыхынты верән проблемләрин өһдәсиндән ҝәлмәк үчүн бизә Аллаһдан ҹәсарәт вә ҝүҹ лазымдыр. Есав ики хетли гызла евләнәндә «онлар Исһагын вә Ривганын [валидејнләринин] үрәкләринә дәрд олду». Ривга һәтта ҝилејләнирди: «Хетли гызларын әлиндән һәјатымдан бездим. Әҝәр [оғлумуз] Јагуб да беләҹә бу өлкәнин гызларындан — Хетли гызлардан өзүнә арвад алса, даһа мән нијә јашајырам?» (Јар. 26:34, 35; 27:46). Исһаг бу мәсәләјә биҝанә галмајыб, Јагубу Јеһоваја ибадәт едән гызлардан өзүнә арвад тапмаға ҝөндәрди. Исһаг вә Ривга Есавын етдијини дәјишә билмәсәләр дә, Аллаһ онлара мүдриклик, ҹәсарәт вә ҝүҹ верди ки, Она садиг галсынлар. Дуада Јеһовадан көмәк истәјириксә, О, хаһишләримизи ҹавабсыз гојмајаҹаг (Мәз. 118:5).
14. Балаҹа исраилли гыз ҹәсарәти неҹә тәзаһүр етдирди?
14 Әсрләр сонра, сојғунчулар тәрәфиндән әсир ҝөтүрүлмүш балаҹа исраилли гыз ҹүзам хәстәлијинә тутулмуш орду башчысы суријалы Нааманын евиндә гуллугчу олду. Јеһова Аллаһын Елиша пејғәмбәр васитәсилә етдији мөҹүзәләр һаггында ешидән бу гыз ҹәсарәтлә Нааманын арвадына деди: «Каш ки ағам Самаријада пејғәмбәрин јанында олајды. О заман пејғәмбәр онун ҹүзамына шәфа верәрди». Нааман Исраилә ҝетди вә мөҹүзәли шәкилдә сағалды (2 Пад. 5:1-3). Бу балаҹа гыз мүәллимләринә, синиф јолдашларына вә башгаларына тәблиғ етмәк үчүн Јеһовадан ҹәсарәт истәјән ҝәнҹләрә неҹә дә ҝөзәл нүмунәдир!
15. Ахавын сарај рәиси Авдија ҹәсарәтлә нә етди?
15 Аллаһын вердији ҹәсарәт тәгибләрә таб ҝәтирмәјимизә дә көмәк едир. Ҝәлин Илјас пејғәмбәрин мүасири вә падшаһ Ахавын сарај рәиси олан Авдијанын нүмунәсинә нәзәр салаг. Падшаһ арвады Изевел Аллаһын пејғәмбәрләрини гәтлә јетирмәк әмрини верәндә, Авдија ‘јүз нәфәри әлли-әлли олараг мағараларда ҝизләтди’ (1 Пад. 18:13; 19:18). Јеһованын пејғәмбәрләринә көмәк едән Авдија кими, сән дә тәгиб олунан һәмиманлыларына ҹәсарәтлә көмәк едә биләрсәнми?
16, 17. Аристарх вә Гај тәгибә мәруз галанда неҹә даврандылар?
16 Әҝәр тәгиб едилириксә, Јеһованын бизимлә олаҹағына әмин ола биләрик (Ром. 8:35-39). Павелин әмәкдашлары Аристарх вә Гај Ефесдә ачыг сәма алтындакы театрда минләрлә инсан гаршысында дурмалы олдулар. Симҝәр Димитри иғтишаш галдырмышды. О вә диҝәр симҝәрләр Артемида илаһәсинин мәбәдинин ҝүмүшдән макетләрини дүзәлдирдиләр. Павелин тәблиғи сајәсиндә шәһәр сакинләринин бир чоху бүтпәрәстликдән үз дөндәрдији үчүн бу симҝәрләрин ҝәлир мәнбәји тәһлүкә алтында иди. Издиһам Аристархла Гајы тутуб театра ҝәтирди вә уҹадан гышгырмаға башлады: «Ефеслиләрин Артемидасы әзәмәтлидир!» Аристарх вә Гај, бәлкә дә, өләҹәкләрини дүшүнүрдүләр, амма шәһәр валисинин мирзәси издиһамы сакитләшдирди (Һәв. иш. 19:23-41).
17 Әҝәр белә чәтинлијә мәруз галмысанса, даһа асан чыхыш јолу ахтармағы дүшүнмүсәнми? Аристарх вә Гајын ҹәсарәтсиз олдугларыны һеч нә ҝөстәрмир. Салоникдән олан Аристарх хош хәбәри тәблиғ етмәјин тәгибләрә сәбәб олаҹағыны билирди. Бундан бир аз әввәл, Павел бурада тәблиғ едәндә дә иғтишаш баш вермишди (Һәв. иш. 17:5; 20:4). Аристарх вә Гај Јеһованын јоллары илә ҝетдикләри үчүн сынаглара таб ҝәтирсинләр дејә, Аллаһ онлара ҝүҹ вә ҹәсарәт верди.
Башгаларынын мәнфәәтини ҝүдүн
18. Акила вә Прискила башгаларынын мәнфәәтини неҹә ҝүдүрдүләр?
18 Тәгибә мәруз галсаг да, галмасаг да һәмиманлыларымыза гајғы ҝөстәрмәлијик. Акила вә Прискила ‘башгаларынын мәнфәәтини ҝүдүрдүләр’. (Филипилиләрә 2:4 ајәсини оху.) Ола билсин, бу нүмунәви әр-арвад, јухарыда хатырланан симҝәр Димитринин иғтишашы гызышдырдығы Ефесдә Павели галмаг үчүн јерлә тәмин етмишди. Бәлкә дә мәһз бу вәзијјәтдә Акила вә Прискила Павелин уғрунда ‘өзләрини тәһлүкәјә салмышдылар’ (Ром. 16:3, 4; 2 Кор. 1:8). Бу ҝүн тәгиб олунан баҹы-гардашлара гајғы ҝөстәрмәјимиз бизи «илан кими мүдрик» едир (Мат. 10:16-18). Биз еһтијатла давранмалы вә һәмиманлыларымызын адыны вә ја онлар һаггында диҝәр мәлуматлары тәгибчиләрә вермәмәлијик.
19. Ҹејран башгалары үчүн һансы хејирхаһ ишләри ҝөрүрдү?
19 Башгаларынын гајғысына галмағын мүхтәлиф үсуллары вар. Бәзи мәсиһчиләрин јашамаг үчүн зәрури шејләри јохдур вә ола билсин, бизим онлара көмәк етмәк имканымыз вар (Ефес. 4:28; Јаг. 2:14-17). Биринҹи әсрдә Јаффадакы јығынҹагда Ҹејран адлы сәхавәтли бир гадын варды. (Һәвариләрин ишләри 9:36-42 ајәләрини оху.) Ҹејранын ‘етдији хејирли ишләрә вә вердији сәдәгәләрә’, еһтимал ки, јохсул дул гадынлара палтарлар тикмәк дә дахил иди. О, ерамызын 36-ҹы илиндә өләндә һәмин дул гадынлар чох кәдәрләнди. Аллаһ һәвари Петерин васитәсилә Ҹејраны дирилтди вә чох ҝүман ки, о, һәјатынын галан илләрини хош хәбәри севинҹлә тәблиғ етмәјә вә хејирхаһ ишләр ҝөрмәјә сәрф етди. Бу ҝүн арамызда өз мәнфәәтини ҝүдмәјән белә мәсиһчи гадынларын олмасына неҹә дә севинирик!
20, 21. а) Башгаларыны руһландырмаг вә онларын гејдинә галмаг бир-бири илә неҹә бағлыдыр? б) Башгаларыны неҹә руһландыра биләрсән?
20 Биз башгаларыны руһландырмагла да онлара гајғы ҝөстәририк (Ром. 1:11, 12). Павелин әмәкдашы Сила тәсәлли мәнбәји иди. Тәхминән ерамызын 49-ҹу илиндә сүннәт мәсәләси галдырыланда Јерусәлимдәки рәһбәрлик шурасы башга јердәки мәсиһчиләрә мәктуб чатдырмаг үчүн нүмајәндәләр ҝөндәрди. Сила, Јәһуда, Барнаба вә Павел мәктубу Антакјаја апардылар. Бурада Сила вә Јәһуда «чох сөзләрлә гардашлары тәшвиг едиб гүввәтләндирдиләр» (Һәв. иш. 15:32).
21 Бир гәдәр сонра Павел вә Сила Филипидә һәбс едилдиләр, амма зәлзәлә нәтиҹәсиндә зинданбана вә онун аиләсинә тәблиғ етдиләр вә онлар мәсиһчи олдулар. Павел вә Сила бу шәһәри тәрк етмәздән әввәл гардашлары руһландырдылар (Һәв. иш. 16:12, 40). Павел вә Силадан нүмунә ҝөтүрәрәк, сән дә шәрһләрин, нитгин вә хидмәтдә ҝөстәрдијин сәјлә башгаларыны руһландырмаға чалыш. ‘Тәшвиг үчүн сөзүн’ варса, ону ‘сөјләмәк’ фүрсәтини әлдән вермә (Һәв. иш. 13:15).
Јеһованын јоллары илә ҝетмәјә давам един
22, 23. Мүгәддәс Китаб нүмунәләриндән неҹә фајдалана биләрик?
22 Биз, «һәр ҹүр тәсәлли верән» Јеһова Аллаһын Кәламындакы садиг хидмәтчиләрин һәјатындан ҝөтүрүлмүш нүмунәләрә ҝөрә миннәтдар олмалыјыг! (2 Кор. 1:3). Белә нүмунәләрдән фајдаланмаг үчүн Мүгәддәс Китабдан алдығымыз бу дәрсләри һәјатда тәтбиг етмәли вә Аллаһын мүгәддәс руһунун бизә рәһбәрлик етмәсинә јол вермәлијик (Галат. 5:22-25).
23 Мүгәддәс Китаб нүмунәләри үзәриндә дүшүнмәк Аллаһа мәгбул хүсусијјәтләри тәзаһүр етдирмәјимизә көмәк едәҹәк. Бу, «һикмәти, билији вә шадлығы» верән Јеһова илә мүнасибәтимизи мөһкәмләндирәҹәк (Ваиз 2:26). Нәтиҹәдә, Аллаһын мәһәббәт долу үрәјини севиндирә биләҹәјик (Сүл. мәс. 27:11). Ҝәлин Јеһованын јоллары илә ҝетмәјә давам едәрәк бу ишдә гәтијјәтли олаг.
Неҹә ҹаваб верәрдиниз?
• Етибарлы инсан олдуғуну неҹә ҝөстәрә биләрсән?
• Биз нә үчүн ‘тәвазөкар олмалыјыг’?
• Мүгәддәс Китаб нүмунәләри ҹәсарәтли олмағымыза неҹә көмәк едә биләр?
• Башгаларына неҹә гајғы ҝөстәрә биләрик?
[8-ҹи сәһифәдәки шәкил]
Етибарлы Ифтаһ вә онун гызы, чәтин олса да, едилән әһди јеринә јетирдиләр
[10-ҹу сәһифәдәки шәкил]
Еј ҝәнҹләр, исраилли гыздан нә өјрәнирсиниз?
[11-ҹи сәһифәдәки шәкил]
Ҹејран һәмиманлыларынын еһтијаҹларыны неҹә өдәјирди?