Нә гәдәр ки ҝәнҹсән, Јеһоваја хидмәти сеч
«Өјрәндијин вә әмин олдуғун шејләрә әмәл етмәкдә давам ет» (2 ТИМ. 3:14).
1. Јеһова ҝәнҹ Шаһидләринин хидмәтини неҹә гијмәтләндирир?
ҜӘНҸЛӘРИН мүгәддәс хидмәти Јеһова үчүн о гәдәр ваҹибдир ки, мәзмурчуну нөвбәти пејғәмбәрлији јазмаға илһамландырыб: «Дөјүш ҝүнү әсҝәрләрин көнүллү олараг дөјүшә ҝедәҹәк, ҝәнҹләрин сәһәр шеһи кими мүгәддәс либасыны ҝејиб јанына ҝәләҹәк» (Мәз. 110:3). Бәли, Јеһова Она көнүллү хидмәт едән ҝәнҹләри јүксәк гијмәтләндирир.
2. Ҝәнҹләр ҝәләҹәкләрини планлашдыраркән һансы тәсирләрә мәруз галырлар?
2 Еј мәсиһчи јығынҹағында олан ҝәнҹләр, һәјатынызы Јеһоваја һәср етмисинизми? Бир чох ҝәнҹләр һәгиги Аллаһа хидмәт етмәк сечиминин чәтин олдуғуну дүшүнүрләр. Габагҹыл иш адамлары, педагоглар, һәмчинин бәзән аилә үзвләри вә достлар ҝәнҹләри гаршыларына мадди мәгсәдләр гојмаға тәшвиг едирләр. Руһани мәгсәдләрә ҹан атан ҝәнҹләрә исә дүнја истеһза илә јанашыр. Шүбһә јохдур ки, һәгиги Аллаһа хидмәт етмәк һәјатда тута биләҹәјиниз ән јахшы јолдур (Мәз. 27:4). Бунунла әлагәдар үч суала диггәт јетирәк: сиз нә үчүн Аллаһа хидмәт етмәлисиниз? Башгаларынын сөзләринә вә һәрәкәтләринә бахмајараг, Јеһоваја һәср олунмуш бир шәхс кими неҹә мүвәффәгијјәт газана биләрсиниз? Мүгәддәс хидмәт үчүн гаршынызда һансы ҝөзәл имканлар ачыла биләр?
Јеһоваја хидмәт ән дүзҝүн һәјат јолудур
3. Јеһованын јаратдыглары бизи нәјә тәшвиг етмәлидир?
3 Сән нәјә ҝөрә һәгиги вә јашајан Аллаһа хидмәт етмәлисән? Вәһј 4:11 ајәсиндә бунун башлыҹа сәбәби дејилир: «Ја Рәббимиз вә Аллаһымыз, иззәти, һөрмәти вә гүдрәти алмаға лајигсән. Чүнки һәр шеји Сән јаратдын вә һәр шеј Сәнин ирадәнлә мөвҹуд олду вә јаранды». Јеһова мөвҹуд олан һәр бир шејин валеһедиҹи Јараданыдыр. Бах ҝөр Јер күрәси неҹә дә ҝөзәлдир! Ағаҹлар, ҝүл-чичәкләр, һејванлар, океанлар, дағлар, шәлаләләр — бунларын һамысыны Јеһова јарадыб. Мәзмур 104:24 ајәсиндә дејилир: «Ја Рәбб... јаратдыгларын јер үзүнү долдуруб». Јердән вә онда олан јахшы шејләрдән һәзз ала билмәјимиз үчүн Јеһованын мәһәббәтлә гајғы ҝөстәриб бизә бәдән вә шүур вердијинә ҝөрә биз неҹә дә миннәтдарыг! Мәҝәр һејрәтамиз варлыглара ҝөрә сәмими миннәтдарлыг һисси бизи Јарадана хидмәт етмәјә тәшвиг етмәли дејилми?
4, 5. Јеһованын һансы ишләри Јешуаны Она јахынлашдырды?
4 Јеһоваја хидмәт етмәјин башга сәбәби Исраилин башчысы Јешуанын сөзләриндән ајдын ҝөрүнүр. О, өмрүнүн сонуна јахын Аллаһын халгына деди: «Бүтүн гәлбинизлә вә варлығынызла билирсиниз ки, Аллаһыныз Рәббин һаггынызда дедији бүтүн јахшы шејләрдән һеч бири боша чыхмады. Һамысы сизин үчүн јеринә јетди». Нә үчүн Јешуа бу сөзләри әминликлә деди? (Јешуа 23:14).
5 Мисирдә боја-баша чатан Јешуа Јеһованын исраиллиләрә мирас олараг бир дијар верәҹәји вәдини билирди (Јар. 12:7; 50:24, 25; Чых. 3:8). Сонра Јешуа Јеһованын Мисирә Он бәла ҝөндәрмәклә вә инадкар фирону Исраил оғулларыны бурахмаға мәҹбур етмәклә һәмин вәди неҹә јеринә јетирмәјә башладығыны мүшаһидә етмишди. Јешуа Гырмызы дәнизи кечәнләрин вә фиронла ордусунун дәниздә мәһв едилмәсини ҝөрәнләрин арасында олмушду. «Бөјүк вә горхунҹ» Сина сәһрасында узун мүддәт долашдыглары вахт әрзиндә Јешуа Јеһованын исраиллиләри һәр шејлә неҹә тәмин етдијини ҝөрүрдү. Онларын арасында сусузлугдан вә ја аҹлыгдан өлән олмамышды (Ганун. т. 8:3-5, 14-16; Јешуа 24:5-7). Исраиллиләр үчүн ҝүҹлү Кәнан халгларыны мәғлуб етмәк вә Вәд едилмиш дијара саһиб олмаг вахты ҝәләндә Јешуа Јеһованын онлара бу ишдә неҹә дајаг олдуғуну ҝөрмүшдү (Јешуа 10:14, 42).
6. Аллаһа хидмәт етмәк истәјинин јаранмасына нә көмәк едәр?
6 Јешуа Јеһованын Өз вәдләринә садиг галдығыны билирди. Буна ҝөрә дә деди: «Мән вә мәним евимдәкиләр Рәббә гуллуг едәҹәк» (Јешуа 24:15). Бәс сәнин һаггында нә демәк олар? Һәгиги Аллаһын артыг јеринә јетмиш вә јетәҹәк вәдләри үзәриндә дүшүнәндә сәндә Јешуа кими Она хидмәт етмәк истәји јаранырмы?
7. Вәфтиз нә үчүн ваҹиб аддымдыр?
7 Јеһованын јаратдыгларыны сејр етмәк, мөһтәшәм вә етибарлы вәдләри үзәриндә дүшүнмәк сәни нәинки өзүнү Она һәср етмәјә, һәм дә вәфтиз олунмаға тәшвиг етмәлидир. Вәфтиз, Аллаһа хидмәт етмәк истәјәнләр үчүн ваҹиб аддымдыр. Нүмунәмиз олан Иса бунун белә олдуғуну ҝөстәрмишди. О, Мәсиһ кими хидмәтә башламаздан әввәл, вәфтиз олунмаг үчүн Вәфтизчи Јәһјанын јанына ҝәлди. Иса нә үчүн бу аддымы атды? Бир гәдәр сонра о деди: «Мәним ирадәми дејил, Мәни ҝөндәрән Атамын ирадәсини јеринә јетирмәк үчүн ҝөјдән ендим» (Јәһ. 6:38). Иса өзүнү Атасынын ирадәсини јеринә јетирмәјә һәср етдијини ҝөстәрмәк үчүн вәфтиз олунду (Мат. 3:13-17).
8. Тимотеј нә үчүн Аллаһа хидмәти сечмишди вә сәнә нә етмәк лазым ҝәлә биләр?
8 Ҝәлин, Јеһованын мүәјјән вахтдан сонра чох ишләр вә хүсуси тапшырыглар вердији ҝәнҹ мәсиһчи Тимотејин нүмунәсинә нәзәр салаг. Тимотеј нә үчүн һәгиги Аллаһа хидмәт етмәк гәрарына ҝәлмишди? Мүгәддәс Китаб дејир ки, о ‘өјрәнди’ вә өјрәндији шејләрин доғрулуғуна ‘әмин олду’ (2 Тим. 3:14). Әҝәр сән Аллаһын Кәламыны өјрәниб, орадакы тәлимләрин һәгигәт олдуғуна әмин олмусанса, Тимотеј кими давранмаға әсасын вар. Инди сән дә гәрар вермәлисән. Нә үчүн өз истәјин барәдә валидејнләринлә сөһбәт етмәјәсән? Онлар јығынҹағын ағсаггаллары илә бирликдә сәнә Мүгәддәс Јазыларда вәфтиз үчүн олан тәләбләри баша дүшмәјә көмәк едә биләрләр. (Һәвариләрин ишләри 8:12 ајәсини оху.)
9. Сәнин вәфтиз олунмағын инсанлара неҹә тәсир едә биләр?
9 Вәфтиз олунмағын һәгиги Аллаһа хидмәтинә әла башланғыҹдыр. Бу аддымы атмагла сән узунмәсафәли гачыша башламыш олурсан. Бунун мүкафаты исә әбәди һәјат вә Аллаһын ирадәсини јеринә јетирмәкдән доған севинҹдир (Ибр. 12:2, 3). Һәмчинин артыг бу гачышда олан аилә үзвләрини вә мәсиһчи достларыны севиндирәҹәксән. Ән ваҹиби исә Јеһованын үрәјини севиндирәҹәксән. (Сүлејманын мәсәлләри 23:15 ајәсини оху.) Дүздүр, башгалары сәнин Јеһоваја хидмәт етмәк гәрарыны баша дүшмәјә вә онун сәһв олдуғуну дүшүнә биләрләр. Онлар сәнә мүгавимәт дә ҝөстәрә биләрләр. Лакин бу чәтинликләрин өһдәсиндән мүвәффәгијјәтлә ҝәлә биләрсән.
Башгалары суал верәндә, јахуд мүгавимәт ҝөстәрәндә
10, 11. а) Аллаһа хидмәт етмәк гәрарынла бағлы инсанлар сәнә һансы суаллары верә биләрләр? б) Исанын һәгиги ибадәтә даир суаллара ҹаваб вермәсиндән нә өјрәнә биләрсән?
10 Јеһоваја хидмәт етмәк гәрарын синиф јолдашларында, гоншуларында вә гоһумларында тәәҹҹүб доғура биләр. Ола билсин, онлар бу јолу сечмәјинин сәбәбини сорушаҹаг вә етигадын барәдә сәни сорғу-суала тутаҹаглар. Сән неҹә ҹаваб вермәлисән? Тәбии ки, сечиминин сәбәбини баша сала биләсән дејә, ҝәрәк дүшүнҹә вә һиссләрини тәһлил едәсән. Етигадына даир суаллара ҹаваб верәндә тәглид едә биләҹәјин ән јахшы нүмунә Исанын нүмунәсидир.
11 Јәһуди дин рәһбәрләри Исаја дирилмә һаггында суал верәндә о онларын диггәтләрини бирбаша олараг нәзәрә алмадыглары ајәјә јөнәлтди (Чых. 3:6; Мат. 22:23, 31-33). Дин алимләриндән бири һансы әмрин ән бөјүк олдуғуну сорушанда Иса Мүгәддәс Китабдан мүвафиг ајәләри ситат ҝәтирди. Һәмин адам Исанын вердији ҹаваба ҝөрә она тәшәккүр етди (Лев. 19:18; Ганун. т. 6:5; Марк 12:28-34). Исанын Мүгәддәс Јазылардан истифадә етмәси вә данышыг тәрзи ‘халг арасында фикир ајрылығынын јаранмасына’ сәбәб олду вә дүшмәнләри она зәрәр јетирә билмәдиләр (Јәһ. 7:32-46). Иманынла бағлы суаллара ҹаваб верәркән Мүгәддәс Китабдан истифадә ет, ‘мүлајимликлә вә еһтирамла ҹаваб вер’ (1 Пет. 3:15). Суалын ҹавабыны билмирсәнсә, буну етираф ет вә арашдыраҹағыны билдир. Ана дилиндә варса, һәмин мөвзуну «Ҝөзәтчи Гүлләси нәшрләринин индекси»ндә вә ја «Ҝөзәтчи Гүлләсинин китабханасы»нда (CD-ROM) ахтар. Јахшы һазырлашмағын сајәсиндә «неҹә ҹаваб вермәк лазым олдуғуну» биләҹәксән (Колос. 4:6).
12. Тәгибин сәни руһдан салмасына нә үчүн јол вермәмәлисән?
12 Аллаһа хидмәт етмәк гәрарына вә етигадына даир сорғу-суал олунмагдан савајы даһа артыг шејлә гаршылаша биләрсән. Чүнки дүнјаны идарә едән Аллаһын дүшмәни Шејтан Иблисдир. (1 Јәһја 5:19 ајәсини оху.) Һәр бир инсандан тәриф вә илтифат ҝөзләмәк реал дејил вә сән мүгавимәтлә үзләшә биләрсән. Бәзи инсанлар ‘сәни сөјә’ биләрләр вә белә мүнасибәт узун сүрә биләр (1 Пет. 4:4). Унутма ки, сән тәк дејилсән. Иса Мәсиһ дә тәгибләрлә үзләширди. Тәгибләр һәвари Петердән дә јан кечмәди. О јазырды: «Севимлиләрим, санки башыныза гәрибә бир иш ҝәлирмиш кими, аранызда баш вериб, сизи сынамаг үчүн олан одлу имтаһана [әзијјәтә] тәәҹҹүб етмәјин. Лакин Мәсиһин әләмләриндә иштирак етдијинизә ҝөрә севинин» (1 Пет. 4:12, 13).
13. Мәсиһчиләр тәгиб олунанда нә үчүн севинә биләрләр?
13 Бир мәсиһчи кими тәгибә вә ја мүгавимәтә таб ҝәтирмәк севинмәјә әсас верир. Нә үчүн? Чүнки әҝәр дүнја сәни бәјәнирсә, демәли, сән Аллаһын јох, Шејтанын нормаларына мүвафиг јашајырсан. Иса хәбәрдарлыг етмишдир: «Бүтүн инсанлар сизин үчүн јахшы сөјләдикләри заман, вај сизә! Чүнки онларын аталары јаланчы пејғәмбәрләр илә дә белә рәфтар етмишләр» (Лука 6:26). Тәгиб ҝөстәрир ки, Јеһоваја хидмәт етдијин үчүн Шејтан вә онун дүнјасы сәнә чох гәзәблидир. (Матта 5:11, 12 ајәләрини оху.) ‘Мәсиһин адындан өтрү тәһгир едилдијимизә’ ҝөрә севинмәјә дәјәр (1 Пет. 4:14).
14. Тәгибә бахмајараг, инсанын Јеһоваја садиг галмасы һансы јахшы нәтиҹәләри верә биләр?
14 Мүгавимәтә бахмајараг Јеһоваја садиг галмағын ән азы дөрд јахшы нәтиҹәси олур. Сән Аллаһ вә Онун Оғлу һаггында шаһидлик едирсән. Сәдагәтлә таб ҝәтирмәјин мәсиһчи баҹы-гардашларыны руһландырыр. Сәни мүшаһидә едәнләрин бәзиләри Јеһованы ахтармаға тәшвиг олуна биләрләр. (Филипилиләрә 1:12-14 ајәләрини оху.) Сынаглара таб ҝәтирмәк үчүн Јеһованын сәни неҹә мөһкәмләндирдијини ҝөрәндә Она мәһәббәтин артыр.
Гаршында «ҝениш гапы» ачылыб
15. Һәвари Павелин гаршысында һансы «ҝениш гапы» ачылмышдыр?
15 Һәвари Павел Ефесдәки хидмәти һагда јазырды: «Гаршымда бөјүк вә фәалијјәт үчүн ҝениш гапы ачылмышдыр» (1 Кор. 16:8, 9). Бу гапы, шәһәрдә хош хәбәри тәблиғ етмәк вә шаҝирдләр һазырламаг үчүн ҝениш фәалијјәтә јол ачырды. Павел бу гапыдан ҝирәрәк бир чохларына Јеһова һаггында өјрәнмәјә вә Она хидмәт етмәјә көмәк етмишдир.
16. Мәсһ олунмуш галыг 1919-ҹу илдә ‘ачыг гапыдан’ неҹә ҝирди?
16 1919-ҹу илдә, иззәтләнмиш Иса Мәсиһ мәсһ олунмуш галығын өнүндә ‘гапы ачды’ (Вәһј 3:8). Онлар бу гапыдан ҝириб даһа бөјүк сәјлә хош хәбәри тәблиғ етмәјә вә Мүгәддәс Китаб һәгигәтини өјрәтмәјә башладылар. Онларын хидмәтинин бәһрәси нә олду? Һал-һазырда хош хәбәр дүнјанын уҹгар јерләриндә тәблиғ олунур вә једди милјона јахын инсан Аллаһын јени дүнјасында әбәди һәјата наил олмаға үмид бәсләјир.
17. «Фәалијјәт үчүн ҝениш гапы»дан неҹә ҝирә биләрсән?
17 «Фәалијјәт үчүн ҝениш гапы» Јеһованын бүтүн хидмәтчиләринин гаршысында һәлә дә тајбатај ачыгдыр. Бу гапыдан ҝирәнләр хош хәбәрин тәблиғиндә там иштирак етдикләри үчүн севинҹ вә мәмнунлуг дујурлар. Јеһованын хидмәтчиләри олан сиз ҝәнҹләр, башгаларына ‘Мүждәјә иман ҝәтирмәјә’ көмәк етмәк кими надир имканы нә дәрәҹәдә гијмәтләндирирсиниз? (Марк 1:14, 15). Даими вә ја көмәкчи пионер кими хидмәт етмәји дүшүнүрсүнүзмү? Падшаһлыг Залларынын тикинтисиндә иштирак етмәк, Бет-Ел, миссионер вә хүсуси пионер хидмәти сизләрдән бир чохунун гаршысында ачылан диҝәр имканлардыр. Шејтанын пис дүнјасы үчүн бурахылан вахт түкәнмәк үзрә олдуғу үчүн Падшаһлыг хидмәтинин бу саһәләриндә иштирак етмәк ҝүнү-ҝүндән тәхирәсалынмаз олур. Нә гәдәр ки вахт вар, ‘ҝениш гапыдан’ ҝирәҹәксәнми?
«Дадын, ҝөрүн Рәбб [Јеһова] нә гәдәр шириндир»
18, 19. а) Нәјә ҝөрә Давудун Јеһоваја хидмәт етмәјә ҝүҹлү истәји варды? б) Аллаһа хидмәт етдијинә Давудун һеч вахт пешман олмадығыны нә ҝөстәрир?
18 Аллаһдан илһам алан мәзмурчу башгаларыны дәвәт едир: «Дадын, ҝөрүн Рәбб [Јеһова] нә гәдәр шириндир» (Мәз. 34:8). Гәдим Исраилин падшаһы Давуд ушаглыгда чобан оланда Јеһова ону вәһши һејванларын һүҹумундан хилас едирди. Аллаһ ону Голјатла вурушанда дәстәкләмишди, бундан башга, бир чох чәтинликләрдән дә гуртармышды (1 Шам. 17:32-51; 18-ҹи мәзмур вә ҝириш сөзләри). Аллаһын севҝи долу хејирхаһлығыны ҝөрән Давуд «Ја Рәбб Аллаһым, Сәнә бәнзәјән јохдур! Бизә аид харигәләрин, дүшүнҹәләрин чохдур» сөзләрини јазмаға тәшвиг олунмушдур (Мәз. 40:5).
19 Давуд Јеһованы чох севирди вә Ону бүтүн үрәји вә дүшүнҹәси илә иззәтләндирмәк истәјирди. (Мәзмур 40:8-10 ајәләрини оху.) Һәјатыны һәгиги Аллаһа хидмәтә һәср етдијинә ҝөрә Давуд һеч вахт пешман дејилди. Өмрү боју Аллаһа садиг галмасы онун ән бөјүк хәзинәси — тајы-бәрабәри олмајан хошбәхтлик мәнбәји иди. Аһыл јашына чатмыш Давуд деди: «Еј Худавәнд, Сән мәним үмидимсән, ја Рәбб, ҝәнҹлијимдән бәри Сәнә ҝүвәнмишәм. Јаша долуб сачыма дән дүшәнә гәдәр... еј Аллаһ, мәни тәрк етмә» (Мәз. 71:5, 18). Давудун гоҹалыб ҝүҹдән дүшмәсинә бахмајараг, Јеһоваја етибары вә Онунла достлуг телләри ҝет-ҝедә мөһкәмләнирди.
20. Нәјә ҝөрә демәк олар ки, Аллаһа хидмәт һәјатда ән ҝөзәл јолдур?
20 Јешуанын, Давудун вә Тимотејин һәјаты бир даһа сүбут едир ки, Јеһоваја хидмәт инсанын сечә биләҹәји ән ҝөзәл һәјат јолудур. Бу дүнјада карјерада әлдә едилән гысамүддәтли наилијјәтләр ‘бүтүн гәлбимизлә, бүтүн варлығымызла’ Јеһоваја хидмәт етмәјин ҝәтирдији узунмүддәтли хејир-дуаларла мүгајисә едилә билмәз (Јешуа 22:5). Һәјатыны дуада Јеһоваја һәср етмәмисәнсә, өзүндән соруш: «Јеһованын Шаһиди олмағыма мане олан нәдир?» Артыг Јеһованын вәфтиз олунмуш хидмәтчисисәнсә, севинҹини артырмаг истәмәздинми? Онда хидмәтини ҝенишләндир вә бир мәсиһчи кими руһән бөјүмәјә давам ет. Нөвбәти мәгалә, һәвари Павелин нүмунәсини тәглид едәрәк сәнин бу саһәләрдә неҹә инкишаф едә биләҹәјини ҝөстәрәҹәк.
Неҹә ҹаваб верәрдиниз?
• Һансы ики сәбәбә ҝөрә Аллаһа хидмәт етмәлијик?
• Аллаһа хидмәт етмәји гәрара алмагда Тимотејә нә көмәк етди?
• Тәгиблә гаршылашанда нә үчүн мөһкәм олмалысан?
• Хидмәт үчүн гаршында һансы имканлар ачыла биләр?
[18-ҹи сәһифәдәки шәкил]
Јеһоваја хидмәт һәјатда ән ҝөзәл јолдур
[19-ҹу сәһифәдәки шәкил]
Етигадынла бағлы суаллара ҹаваб верә билирсәнми?