Аллаһа јахынлашын
Вәдләрини јеринә јетирән Шәхс
БАШГАЛАРЫНА етибар етмәк сизин үчүн чәтиндирми? Тәәссүф ки, биз инсанлара етибарын галмадығы бир дүнјада јашајырыг. Ола билсин, инандығыныз бир кәс јалан данышдығы, јахуд сөзүнүн үстүндә дурмадығы үчүн гәлбинизи гырдығындан, инсанлара етибарыныз өлүб. Анҹаг һеч бир мәјуслугла үзләшмәдән етибар едә биләҹәјимиз бир Шәхс вар. Сүлејманын мәсәлләри 3:5 ајәси бизи тәшвиг едир: «Бүтүн гәлбинлә Рәббә ҝүвән». Бәс нә үчүн Јеһова Аллаһ бу ҹүр етибара лајигдир? Бу суала ҹаваб вермәк үчүн ҝәлин бүтүн гәлби илә Јеһоваја етибар едән Јешуанын Јешуа 23:14 ајәсиндә јазылмыш сөзләринә нәзәр салаг.
Вәзијјәти тәсәввүр етмәјә чалышаг. Мусанын хәләфи вә Исраил халгынын рәһбәри Јешуанын јашы јүз ону һаглајыб. Јашадығы бу узун илләр әрзиндә о, Јеһованын 60 ил бундан әввәл мөҹүзәли шәкилдә Исраили Гырмызы дәниздән кечирәрәк хилас етмәси дә дахил олмагла, ҝөстәрдији бир чох мөһтәшәм ишләрин ҹанлы шаһиди олмушдур. Дөнүб өтән илләрә нәзәр салан Јешуа Исраил халгынын бүтүн ‘ағсаггалларыны, башчыларыны, һакимләрини вә мәмурларыны’ бир јерә јығыр (Јешуа 23:2). Инди онун дејәҹәји сөзләр садәҹә јашлы адамын ағзындан чыхан һикмәтли кәлмәләр јох, иманла долу олан үрәјин дүшүнҹәләридир.
Јешуа дејир: «Бу ҝүн мән дә һамы кими дүнјадан көчәҹәјәм». «Дүнјадан көчмәк» ифадәси өлүмү билдирмәк үчүн ишләдилән мәҹаздыр. Бу сөзләрлә Јешуа демәк истәјир ки, онун бир-ики ҝүнлүк өмрү галыб. Бу ҝүн-сабаһ өләҹәјини билән Јешуа, шүбһәсиз, тәклијә чәкилиб һәјаты һаггында хејли дүшүнүб. Бәс о, вида сөзләриндә өз һәмиманлыларына нә дејәҹәк?
Јешуа давам едир: «Аллаһыныз Рәббин һаггынызда дедији бүтүн јахшы шејләрдән һеч бири боша чыхмады. Һамысы сизин үчүн јеринә јетди. Онун сөзләриндән һеч бири боша чыхмады». Бу сөзләр Аллаһа там етибар едән инсанын ағзындан чыхырды. Бу ҹүр етибар нәјә әсасланырды? Кечмишдә ҝөрдүјү бүтүн шејләри хатырлајыб Јешуа гәнаәтә ҝәлмишди ки, Јеһова вәдләрини јеринә јетирир, өзү дә һәмишәa. Јешуанын сөзүнүн ҹаны ајдындыр: о истәјирди ки, онун исраилли гардашлары там иман етсинләр ки, Јеһованын онларын ҝәләҹәјинә даир вердији вәдләр дә һәјата кечәҹәк.
Мүгәддәс Китаба шәрһ верән бир китабда Јешуа 23:14 ајәси һагда белә дејилир: «Мүгәддәс Китабдакы һәр һансы вәди ҝөтүрүн; сонра Аллаһын бир дәнә дә олсун вәдини јеринә јетирмәдијини вә ја ону јадындан чыхардығыны тапмаг мәгсәди илә тарихи бахымдан арашдырма апарын вә бу һагда дүнјадакы һәр ҹанлыдан сорушун». Бу ҹүр арашдырма апармаг мүмкүн олсајды, биз дә Јешуанын ҝәлдији гәнаәтә ҝәләрдик — Јеһованын вәдләри һеч вахт боша чыхмыр (1 Падшаһлар 8:56; Јешаја 55:10, 11).
Мүгәддәс Китабда Јеһованын јеринә јетмиш, һәмчинин бизим ҝөзүмүзүн габағында һәјата кечән вәдләри јазылыб. Орада һәмчинин Јеһованын ҝәләҹәкдә јеринә јетәҹәк һејрәтамиз вәдләриндән дә сөз ачылырb. Нә үчүн бу јазылары өзүнүз арашдырмајасыныз? Мүгәддәс Китабы өјрәнмәклә сиз вәдләрини иҹра едән Шәхсин етибарыныза лајиг олдуғуна әмин олаҹагсыныз.
[Һашијәләр]
a Верилән вәдләрдән бир нечәси Јешуанын ҝөзүнүн габағында ҝерчәкләшмишди. Јеһова Исраилә өз вәтәнини гајтарды. (Јарадылыш 12:7 ајәсини Јешуа 11:23 ајәси илә мүгајисә един.) О, Исраили Мисир көләлијиндән азад етди. (Чыхыш 3:8 ајәсини Чыхыш 12:29—32 ајәләри илә мүгајисә един.) Онларын гајғысына галды. (Чыхыш 16:4, 13—15 ајәләрини Ганунун тәкрары 8:3, 4 ајәләри илә мүгајисә един.)
b Ҝәләҹәјимизә даир Аллаһын вердији вәдләр һагда даһа чох мәлумат алмаг үчүн Јеһованын Шаһидләри тәрәфиндән дәрҹ едилмиш «Мүгәддәс Китаб әслиндә нә өјрәдир?» китабынын 3, 7 вә 8-ҹи фәсилләринә бахын.