Әбәди һәјата говушдуран су
«Мәним верәҹәјим судан... ким ичәрсә, әсла сусамаз, она верәҹәјим су онда әбәди һәјата говушдуран су мәнбәји олаҹагдыр» (ЈӘҺЈА 4:14).
«ГӘФИЛДӘН Ајын кәнарындан... сирли гаранлыг дәрјасындан балаҹа мирвари кими јаваш-јаваш галхараг ағ-мави ҹаваһир, бурулан бәјаз өртүкләрлә бәзәдилән ачыг мави рәнҝли күрә пејда олур». Астронавт Едгар Митчелл Јер күрәсинин космосдан ҝөрүнүшүнү белә тәсвир етмишдир.
Планетимизә белә ҝөзгамашдырыҹы парылты верән нәдир ки, астронавт ҝөрдүјүнү поетик тәрздә ифадә етмишдир? Бу, Јер күрәсинин тәхминән дөрддә үч һиссәсини әһатә едән судур. Әлбәттә, су планетимизи ҝөзәлләшдирмәклә јанашы, јер үзүндә һәјатын мөвҹуд олмасына да сәбәб олур. Инсан бәдәнинин тәхминән 65 фаизи судан ибарәтдир. Буна ҝөрә «Британија енсиклопедијасы»нда су һаггында дејилир: «Су һәјат үчүн олдугҹа зәруридир. Демәк олар ки, биткиләрдә вә һејванларда баш верән һәр бир просесдә иштирак едир» («Енҹјҹлопæдиа Британниҹа»).
Сујун дөвраны сајәсиндә јер үзүндә онун еһтијаты түкәнмир. «Уорлд бук» енсиклопедијасында изаһ едилир: «Ишләтдијимиз һәр дамҹы су әввәл-ахыр океанлара гајыдыр. Сонра ҝүнәшин шүаларынын тәсири нәтиҹәсиндә бухарланыр. Вә јағыш һалында јенидән јерә гајыдыр. Судан тәкрар-тәкрар истифадә едилир вә о һеч заман түкәнмир» («The World Book Encyclopedia»). Тәхминән 3 000 ил әввәл бу һејрәтамиз просес Мүгәддәс Китабда тәсвир едилмишдир: «Бүтүн чајлар дәнизә ахыр, амма дәниз һеч вахт долмур. Ахдыглары јерә гајыдырлар ки, тәзәдән ахсынлар». Тәбиәтдә су дөвраны әсл мөҹүзәдир! (Ваиз 1:7).
Сујун һәјат үчүн ваҹиблијини вә онун түкәнмәдијини нәзәрә алсаг, сујун Мүгәддәс Китабда 700 дәфәдән чох хатырланмасы тәәҹҹүблү дејил. Мүгәддәс Китабда сујун өзүнәмәхсус хассәси, јәни онун тәмизләмә гүввәси вә һәјатын мөвҹуд олмасында ролу адәтән руһани дәјәрләри тәмсил едир (Јешаја 58:11; Јәһја 4:14).
Мүгәддәс Китабын тәмизләмә гүввәси
Исраиллиләр мүнтәзәм чимдикләринә вә пал-палтарларыны јудугларына ҝөрә физики тәмизликләри илә сечилирдиләр. Онларда јемәк јемәк үчүн евә ҝирәркән ајагларыны јумаг адәт иди (Лука 7:44). Исраиллиләр чиммәкдән вә палтарларыны јумагдан савајы, Аллаһын гаршысында пакланмаг үчүн дә судан истифадә едирдиләр. Һүзур чадырында хидмәт едән каһинләр бәдәнләрини вә палтарларыны тез-тез јумалы идиләр (Чыхыш 30:18-21). Сонралар падшаһ Сүлејман Јерусәлимдәки мәбәддә мисдән даирәви «һовуз» дүзәлтди вә ора адәтән 44 000 литр су долдурулурду. Бу су, мәбәддә Аллаһын тәмизлик барәдә ганунуна риајәт етмәк үчүн кифајәт иди (2 Салнамәләр 4:2, 6). Сујун бу тәрздә истифадә едилмәси мәсиһчиләр үчүн һансы мәнаны кәсб едир?
Һәвари Павел изаһ едир ки, Иса мәсиһчи јығынҹағыны ‘су илә јујуб, кәламла тәмизләди’. Һәрфи мәнада тәмизләјән су кими, Аллаһын Кәламындакы һәгигәт әхлаги вә руһани ҹәһәтдән тәмизләмәк гүввәсинә маликдир. Белә тәмизлијин сајәсиндә Мәсиһин шаҝирдләри ‘мүгәддәс вә нөгсансыз олурлар’ (Ефеслиләрә 5:25-27). Буна ҝөрә дә, Аллаһын лүтфүнү газанмаг истәјән һәр кәс өзүнү мәнәви вә руһани ҹәһәтдән «нөгсансыз [вә] ләкәсиз» сахламаға чалышмалыдыр (2 Петер 3:11, 14). Аллаһын Кәламы бу ишдә неҹә көмәк едир?
Јеһова Аллаһа мәгбул олмаг истәјәнләр Мүгәддәс Китабы мүнтәзәм арашдырмагла, санки, руһани су ичирләр. Алдыглары билик зеһинләринә вә үрәкләринә тәсир едәндә онларда Мүгәддәс Китабын нөвбәти ҝөстәришинә әмәл етмәјә ҝүҹлү истәк јараныр: «Аллаһын јахшы, мәгбул вә камил ирадәсинин нә олдуғуну дәрк етмәк үчүн ағлынызын јениләнмәси илә көкүндән дәјишин» (Ромалылара 12:2).
Аллаһын ирадәси һаггында дәгиг билик белә инсанлара давраныш вә дүшүнҹәләриндә нөгсанлары вә «ләкәләри» ҝөрмәјә көмәк едәҹәк. Онлар Мүгәддәс Китаб принсипләрини тәтбиг етдикҹә Аллаһын Кәламы онлара һәтта ҹидди ҝүнаһлардан белә ‘тәмизләнмәјә’ көмәк едәҹәк (1 Коринфлиләрә 6:9-11).
Ҝөрүн Испанијада јашајан Алфонсонун һәјатында һансы дәјишикликләр баш вериб. О данышыр: «18 јашында өзүмү бәдбәхт һисс едирдим». Алфонсо наркотикә гуршанды вә гаты ҹинајәткар олду. «Өзүмә вә башгаларына пислик етдијимә ҝөрә өзүмү мурдар һисс едирдим».
Алфонсо давам едир: «Мәктәбдә һәмјашыдым олан бир гыза раст ҝәлдим. О, һәмишә сәлигәли ҝөрүнүрдү вә әхлаги ҹәһәтдән тәмиз иди, бу исә һәмин гызы диҝәр шаҝирдләрдән фәргләндирирди. Онун нүмунәси мәни дә белә тәмиз һәјат сүрүмәјә тәшвиг етди. Онун дәвәтилә Јеһованын Шаһидләринин јығынҹаг ҝөрүшүнә ҝетдим. Тезликлә Мүгәддәс Китабы өјрәнмәјә вә Аллаһа јахынлашмаға башладым. Бир илин ичиндә һәјатымда дәјишиклик етдим вә Јеһованын Шаһиди кими вәфтиз олдум. Бу тәәҹҹүб доғуран дәјишиклији ҝөрән гоншулар јаныма ҝәлиб хаһиш едирдиләр ки, онларын наркоман ушагларына көмәк едим».
Әбәди һәјат ҝәтирән су
Бир дәфә Иса Јагубун гујусундан су чәкмәјә ҝәлән самаријалы гадына «һәјат сују» һаггында данышмышды. О деди: «Мәним верәҹәјим судан... ким ичәрсә, әсла сусамаз, она верәҹәјим су онда әбәди һәјата говушдуран су мәнбәји олаҹагдыр» (Јәһја 4:10, 14). Мүгәддәс Китабда изаһ олундуғу кими, Исанын бу сөзләри ҝөстәрир ки, «һәјат сују» Аллаһын һәјат үчүн тәгдим етдији бүтүн шејләри нәзәрдә тутур. Бүтүн бунларын сајәсиндә инсанларын әбәди јашамаг имканы олаҹаг. Бу символик сујун әсас һиссәсини Иса Мәсиһин фидијә гурбанлығы тәшкил едир. Иса деди: «Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун» (Јәһја 3:16).
Јухарыда ады чәкилән Алфонсо Аллаһын тәгдим етдији ‘һәјат сујуну’ јүксәк гијмәтләндирди. О, ҹинајәт јолундан дөнмәјәнләри вә наркотикләри атмајанлары хатырлајараг дејир: «Мәним доғма гардашым, һәмчинин көһнә дост-танышларымын һамысы өлүб. Аллаһын Кәламындан алдығым билик мәни белә агибәтдән горуду. Мән исә Јеһованын руһани көмәји сајәсиндә јашајырам». Үстәлик, Алфонсо Мүгәддәс Китабдан өјрәндикләринә әсасән Аллаһын вәд етдији јени дүнјада әбәди һәјаты сәбирсизликлә ҝөзләјир (2 Петер 3:13).
Һамы дәвәт олунур
Мүгәддәс Јазыларын сонунҹу китабында ‘Аллаһын вә Гузунун тахтындан чыхан бүллур кими парлаг, тәмиз һәјат сују ахан чајдан’ данышылыр (Вәһј 22:1). Бу ахан чај, јәни Аллаһын тәгдим етдији һәр бир шеј инсанлара көмәк едәҹәк ки, бәшәр тарихинин башланғыҹында Адәм илә Һәвванын малик олдуглары камиллијә чатсынлар.
Бу чај тәсвир едилдикдән сонра белә бир дәвәт сәсләнир: «Сусајан гој ҝәлсин, арзу едән гој һәјат сујуну мүфтә ҝөтүрсүн» (Вәһј 22:17). Бизим ҝүнләрдә бу дәвәт бүтүн дүнјада сәсләнир. Јеһованын Шаһидләри тәхминән 235 өлкә вә әразидә инсанлара Мүгәддәс Китабдан һәјатвериҹи билији алмаға көмәк етмәк үчүн һәр ил бир милјарддан чох саат сәрф едирләр.
Сиз дә һәјат сују үчүн сусамысынызмы? Бу бүллур кими тәмиз сују ичмәклә, јәни Јараданын тәгдим етдији һәр бир шеји өјрәниб тәтбиг етмәклә, сиз дә әбәди һәјата наил олмаг мәгсәдилә ‘өзләринә ҝәләҹәк үчүн јахшы тәмәл олаҹаг бир хәзинә топлајанлар’ арасында олаҹагсыныз (1 Тимотејә 6:19).
[16-ҹы сәһифәдәки чәрчивә]
Һәрфи мәнада тәмизләјән су кими, Аллаһын Кәламындакы һәгигәт әхлаги вә руһани ҹәһәтдән тәмизләмәк гүввәсинә маликдир
[17-ҹи сәһифәдәки чәрчивә/шәкил]
ГӘДИМДӘ ИНСАНЛАР СУЈУ ҺАРАДАН АЛЫРДЫЛАР?
Гәдим вахтларда инсанлар јарарлы су мәнбәләри тапмаг үчүн чох чалышмалы олурдулар. Ибраһим вә Исһаг аиләләринин вә сүрүләринин кифајәт гәдәр су илә тәмин олунмасы үчүн Беер-Шеванын јахынлығында су гујулары газмышдылар (Јарадылыш 21:30, 31; 26:18).
Дајаз гујулар узун вә гызмар јај мөвсүмүндә адәтән гурујурду. Буна ҝөрә дә су гујулары дәрин олмалы иди (Сүлејманын мәсәлләри 20:5). Мәсәлән, Лакишдә јерләшән бир гујунун дәринлији 44 метр иди. Ҝивеонда јерләшән башга гујунун дәринлији 25, ени исә 11 метр иди. Белә гујуну газмаг үчүн тәхминән 3 000 тон даш-торпаг газыб чыхармаг лазым иди. Су чәкмәк үчүн Јагубун гујусуна ҝәлән самаријалы гадын Исаја деди: ‘Гују дәриндир’. Ола билсин, һәмин гујуда сујун сәвијјәси торпагдан 23 метр ашағы иди (Јәһја 4:11).
Гәдим заманларда Јахын Шәргдә диҝәр су мәнбәји су анбарлары иди. Бу јералты һовузлара октјабрдан апрелә гәдәр јаған јағышларын сују јығылырды. Јағыш суларыны бу анбарлара јөнәлтмәк үчүн дағын, јахуд тәпәнин дөшүндә каналлар газырдылар. Исраиллиләр су топламаг үчүн бөјүк јералты һовузлар газырдылар (2 Салнамәләр 26:10).
Гујулардан вә су анбарларындан су чәкмәк, инди олдуғу кими, кечмишдә дә асан иш дејилди. Ривга вә Јетронун гызлары кими гадынлар һәр ҝүн аиләләри вә сүрүләри үчүн су чәкмәклә ваҹиб иш ҝөрүрдүләр (Јарадылыш 24:15-20; Чыхыш 2:16).
[17-ҹи сәһифәдәки шәкил]
Алфонсо Аллаһын Кәламыны тәблиғ едир