Евдән-евә тәблиғ нә үчүн инди ваҹибдир?
«Һәр ҝүн мәбәддә вә евдән-евә тәлим вермәкдән вә Исанын Мәсиһ олдуғуну мүждәләмәкдән ваз кечмирдиләр» (ҺӘВ. ИШ. 5:42).
1, 2. а) Јеһованын Шаһидләри һансы тәблиғ үсулуна ҝөрә танынырлар? б) Бу мәгаләдә нәји мүзакирә едәҹәјик?
ДЕМӘК олар ки, дүнјанын һәр јериндә бу мәнзәрә мүшаһидә едилир: сәлигәли ҝејинмиш ики нәфәр бир евә јахынлашыр вә Мүгәддәс Китабдан Аллаһын Падшаһлығы һаггында хош хәбәри ев јијәсинә данышыр. Әҝәр онларын һәмсөһбәти хәбәрә мараг ҝөстәрирсә, онлар она Мүгәддәс Китаба әсасланан әдәбијјат верирләр, һәмчинин пулсуз вә евдә кечирилән Мүгәддәс Китаб өјрәнмәси тәклиф едирләр. Сонра онлар нөвбәти гапыја јахынлашырлар. Әҝәр сән бу ишдә иштирак едирсәнсә, јәгин фикир вермисән ки, ағзыны ачмамыш чох вахт инсанлар сәнин Јеһованын Шаһиди олдуғуну билирләр. Бәли, Јеһованын Шаһидләри евдән-евә тәблиғлә танынырлар.
2 Исанын тәблиғ етмәк вә шаҝирд һазырламаг тапшырығыны јеринә јетирмәк үчүн мүхтәлиф үсуллардан истифадә едирик (Мат. 28:19, 20). Биз тиҹарәт јерләриндә, күчәләрдә вә инсанларын олдуғу башга јерләрдә тәблиғ едирик (Һәв. иш. 17:17). Бир чохлары илә телефон вә мәктуб васитәсилә әлагә јарадырыг. Ҝүндәлик ишләримизлә мәшғул оларкән растлашдығымыз инсанлара Мүгәддәс Китаб һәгигәтләрини сөјләјирик. Бизим һәтта 300-дән артыг дилдә Аллаһын Кәламына әсасланан мәлуматын јерләшдији рәсми веб-сајтымыз варa. Бүтүн бу үсуллар јахшы сәмәрә вермишдир. Амма әксәр јерләрдә хош хәбәри јајмаг үчүн истифадә етдијимиз башлыҹа үсул евдән-евә тәблиғдир. Бу үсул нәјә әсасланыб? Нәјин сајәсиндә Аллаһын мүасир халгы бу үсулдан ҝениш истифадә етмәјә башлады? Вә евдән-евә тәблиғ бизим ҝүнләрдә нә дәрәҹәдә ваҹибдир?
Һәвариләрин истифадә етдији үсул
3. Иса тәблиғлә әлагәдар һәвариләрә һансы ҝөстәришләри верди вә буна әсасән, онлар неҹә тәблиғ етмәли идиләр?
3 Евдән-евә тәблиғ үсулу Мүгәддәс Јазылара әсасланыб. Иса һәвариләрини тәблиғ етмәјә ҝөндәрәндә онлара ҝөстәриш верди: «Һансы шәһәрә, ја кәндә ҝирсәниз орада ләјагәтли кимдирсә ахтарын». Онлар ләјагәтли оланлары неҹә ахтармалы идиләр? Иса онлара инсанларын евләринә ҝетмәләрини дејәрәк әлавә етди: «Евә ҝирәркән ев сакинләрини саламлајын. Әҝәр о ев ләјагәтли исә, саламыныз онун үзәринә ҝәлсин». Шаҝирдләр инсанларын онлары евә дәвәт етмәләрини ҝөзләмәли идиләрми? Исанын нөвбәти сөзләринә диггәт јетир: «Ким сизи гәбул етмәз вә сөзләринизи динләмәзсә, о евдән вә ја шәһәрдән чыхаркән ајагларыныздакы тозу чырпын» (Мат. 10:11-14). Исанын бу ҝөстәриши она ишарә едир ки, һәвариләр ‘кәнд-кәнд долашыб, Мүждәни тәблиғ едәрәк’ инсанлара өз евләриндә баш чәкмәкдә тәшәббүсү үзәрләринә ҝөтүрмәли идиләр (Лука 9:6).
4. Мүгәддәс Китабын һансы ајәләриндә евдән-евә тәблиғ һаггында конкрет дејилир?
4 Мүгәддәс Китаб һәвариләрин евдән-евә тәблиғ етдикләрини конкрет дејир. Мәсәлән, Һәвариләрин ишләри 5:42 ајәсиндә онлар һаггында охујуруг: «Һәр ҝүн мәбәддә вә евдән-евә тәлим вермәкдән вә Исанын Мәсиһ олдуғуну мүждәләмәкдән ваз кечмирдиләр». Тәхминән 20 илдән сонра һәвари Павел Ефесдәки јығынҹағын ағсаггалларына хатырлатды: «Сизә фајдалы олан һеч бир шеји бәјан етмәкдән, истәр ачыгҹа, истәрсә дә евдән-евә сизә тәлим етмәкдән чәкинмәдим». Бу ағсаггаллар мәсиһчи олмаздан әввәл Павел онлара баш чәкмишдими? Чох ҝүман ки, баш чәкмишди, чүнки о, һәр шејдән әлавә, онлара «Аллаһа төвбә вә Рәббимиз Иса Мәсиһә иман етмәји» өјрәтмишди (Һәв. иш. 20:20, 21). Робертсонун «Әһди-Әтигдә бәдии тәсвирләр» китабында Һәвариләрин ишләри 20:20 ајәсинә верилән шәрһдә дејилир: «Гејд етмәјә дәјәр ки, бу даһи тәблиғчи евдән-евә тәблиғ едирди» («Wорд Пиҹтурес ин тһе Неw Тестамент»).
Мүасир чәјирткә ордусу
5. Јоелин пејғәмбәрлијиндә тәблиғ иши неҹә тәсвир едилир?
5 Биринҹи әсрдә верилән шаһидлик, бизим ҝүнләрдә һәјата кечириләҹәк даһа бөјүк ишә садәҹә бир нүмунә иди. Јоел пејғәмбәр мәсһ едилмиш мәсиһчиләрин фәалијјәтини чәјирткәләрин виранедиҹи һүҹумуна бәнзәтди (Јоел 1:4). Орду кими һәрәкәт едән чәјирткәләр манеәләри ашыр, евләрә ҝирир вә гаршыларына чыхан һәр бир шеји јејир. (Јоел 2:2, 7-9 ајәләрини оху.) Бу, Аллаһын халгынын бизим ҝүнләрдә тәблиғ ишини әзмлә вә әсаслы сурәтдә һәјата кечирдијинин неҹә дә парлаг тәсвиридир! Мәсһ едилмиш мәсиһчиләрин вә онларын әмәкдашлары олан ‘башга гојунларын’ бу пејғәмбәрлик образынын јеринә јетмәсиндә истифадә етдикләри ән ваҹиб үсул евдән-евә тәблиғдир (Јәһ. 10:16). Биз, Јеһованын Шаһидләри, һәвариләрин бу тәблиғ үсулундан неҹә истифадә етмәјә башладыг?
6. 1922-ҹи илдә евдән-евә тәблиғә даир мәсиһчиләр нәјә тәшвиг едилдиләр вә бәзиләри буна неҹә һај вердиләр?
6 1919-ҹу илдән етибарән, һәр бир мәсиһчинин тәблиғ ишиндә иштирак етмәк мәсулијјәти олдуғу дөнә-дөнә вурғуланырды. Мисал үчүн, «Ҝөзәтчи Гүлләси»нин 1922-ҹи ил 15 август (инҝ.) сајында, «Хидмәт етмәк ваҹибдир» мәгаләсиндә мәсһ олунмуш мәсиһчиләрә «сәмави Падшаһлығын јахын олдуғуну шаһидлик едәркән чап едилмиш хәбәри инсанлара чатдырмағын вә гапылары ағзында онларла сөһбәт етмәјин» ваҹиблији хатырланырды. «Бүллетен»дә (инди «Бизим Падшаһлыг Хидмәтимиз») әтрафлы тәгдимәләр чап едилирди. Лакин башланғыҹда евдән-евә тәблиғ едәнләрин сајы аз иди. Бәзиләри тәблиғин бу нөвүндә иштирак етмәк истәмирдиләр вә мүхтәлиф бәһанәләр ҝәтирирдиләр. Анҹаг әсас проблем онда иди ки, онлар евдән-евә тәблиғи шәнләринә сығышдырмырдылар. Саһә хидмәтинин ваҹиблији даһа чох вурғуландыгҹа, белә инсанларын бир чоху јаваш-јаваш Јеһованын тәшкилатындан узаглашырды.
7. 1950-ҹи илләрдә нәјә еһтијаҹ дујулурду?
7 Сонракы онилликләр әрзиндә тәблиғ иши даһа ҝениш вүсәт алды. Амма ајдын олду ки, евдән-евә тәблиғ етмәк үчүн һәр тәблиғчинин әлавә тәлимә еһтијаҹы вар. Нүмунә үчүн Бирләшмиш Штатлардакы вәзијјәти ҝөтүрәк. 1950-ҹи илләрин әввәлләриндә һәмин өлкәдә Шаһидләрин 28 фаизи јалныз мәлумат вәрәгәләри пајламагла вә әлләриндә журналлар күчәләрдә дурмагла тәблиғ едирди. 40 фаиздән чоху ајларла тәблиғ етмәјәрәк гејри-мүнтәзәм тәблиғчиләр сијаһысына дүшүрдү. Бүтүн һәср олунмуш мәсиһчиләрә евдән-евә тәблиғ етмәјә неҹә көмәк етмәк оларды?
8, 9. 1953-ҹү илдә һансы тәлим програмына башланғыҹ верилди вә бунун нәтиҹәси нә олду?
8 1953-ҹү илдә Нју–Јоркда кечирилән бејнәлхалг конгресдә евдән-евә хидмәтә хүсуси диггәт јетирилмишди. Нејтан Норр гардаш бәјан етди ки, һәр Шаһидә евдән-евә хидмәтдә мүнтәзәм олмагда көмәк етмәк бүтүн мәсиһчи нәзарәтчиләринин башлыҹа вәзифәсидир. О деди: «Һәр биримиз хош хәбәри евдән-евә тәблиғ етмәји баҹармалыјыг». Бу мәгсәдә чатмаг үчүн үмумдүнја тәлим програмына башланғыҹ верилди. Индијәдәк евдән-евә тәблиғ етмәјәнләрә гапынын ағзында инсанларла сөһбәтә башламағын, Мүгәддәс Китаб әсасында онларла мүлаһизә јүрүтмәјин вә суаллара ҹаваб вермәјин үсуллары өјрәдилирди.
9 Бу програмын ҝәтирдији нәтиҹәләр валеһедиҹи иди. Он ил әрзиндә бүтүн дүнјада тәблиғчиләрин сајы 100, тәкрар башчәкмәләрин сајы 126 вә Мүгәддәс Китабы өјрәнәнләрин сајы исә 150 фаиз артды. Бу ҝүн тәхминән једди милјон тәблиғчи хош хәбәри бүтүн дүнјада тәблиғ едир. Бу һејрәтамиз артым Јеһованын Өз халгынын евдән-евә тәблиғ ишиндә ҝөстәрдији сәјини хејир-дуаландырдығы сүбутларындан биридир (Јешаја 60:22).
Инсанларын хилас үчүн ишарәләнмәси
10, 11. а) «Језекел» китабынын 9-ҹу фәслинә әсасән, Језекелә һансы ҝөрүнтү верилди? б) Бу ҝөрүнтү бизим ҝүнләрдә неҹә јеринә јетир?
10 Евдән-евә хидмәтин ваҹиблијини Језекел пејғәмбәрин алдығы ҝөрүнтүдән дә ајдын ҝөрмәк олар. Һәмин ҝөрүнтүдә Језекел әлләриндә силаһы олан алты нәфәри, еләҹә дә онларын арасында кәтан палтар ҝејинмиш вә белиндә јазы гутусу олан једдинҹи адамы ҝөрүр. Једдинҹи адама ‘шәһәри ҝәзмәк вә орада едилән бүтүн ијрәнҹ ишләрдән өтрү аһ-налә едән адамларын алнына ишарә гојмаг’ тапшырылыр. Ишарә гојма ишиндән сонра алнында ишарә олмајанларын һамысыны силаһла гырмаг әмр олунур. (Језекел 9:1-6 ајәләрини оху.)
11 Бу пејғәмбәрликдә «кәтан палтар ҝејинмиш» адам руһла мәсһ олунмуш мәсиһчиләрин галығыны тәмсил едир. Тәблиғ вә шаҝирд һазырламаг иши васитәсилә мәсһ олунмуш мәсиһчиләр Мәсиһин ‘башга гојунларына’ гошуланлара символик ишарә гојурлар (Јәһ. 10:16). Бу ишарә нәдир? Белә инсанларын алнына гојулан ишарә ајдын ҝөстәрир ки, онлар јени мәсиһчи мәнлијини ҝејиниб вә Мәсиһин һәср олунмуш вә вәфтиз едилмиш шаҝирдләридирләр (Ефес. 4:20-24). Бу инсанлар мәсһ едилмиш мәсиһчиләрлә бирҝә бир сүрү тәшкил едирләр вә башгаларына ишарә гојмаг кими ваҹиб ишдә онлара көмәк едирләр (Вәһј 22:17).
12. Језекелин алына ишарә гојма барәдә ҝөрүнтүсү сәмими инсанларын ахтарышынын ваҹиблијини неҹә вурғулајыр?
12 Језекелин ҝөрүнтүсү «аһ-налә едән» инсанлары ахтармағымызын нәјә ҝөрә белә тәхирәсалынмаз олдуғунун сәбәбини вурғулајыр. Инсанларын һәјаты тәһлүкәдәдир. Әлләриндә силаһлар олан алты инсанын тәмсил етдији Јеһованын сәмави ордусу символик ишарәси олмајанлары тезликлә мәһв едәҹәк. Һәвари Павел јахынлашмагда олан һөкм барәдә јазмышдыр ки, Иса Мәсиһ «гүдрәтли мәләкләри илә» бирликдә, «Аллаһы танымајан вә Өзү барәсиндәки Мүждәјә итаәт етмәјәнләрә ҹәза верәҹәкдир» (2 Салон. 1:7, 8). Диггәт јетир ки, инсанлар хош хәбәрә неҹә һај вердикләри әсасында мүһакимә едиләҹәкләр. Буна ҝөрә дә, Аллаһын мүждәсинин тәблиғи зәифләмәдән сона гәдәр давам етмәлидир (Вәһј 14:6, 7). Бу, Јеһованын һәср олунмуш бүтүн хидмәтчиләринин үзәринә мәсулијјәт гојур. (Језекел 3:17-19 ајәләрини оху.)
13. а) Һәвари Павел һансы мәсулијјәти һисс едирди вә нәјә ҝөрә? б) Бәс сән саһәндә јашајан инсанлар гаршысына һансы мәсулијјәти һисс едирсән?
13 Һәвари Павел хош хәбәри башгалары илә бөлүшмәкдә өз мәсулијјәтини һисс едирди. О јазырды: «Мән јунанлара вә јунан олмајанлара, мүдрикләрә вә ҹаһилләрә борҹлујам. Беләликлә, мән Ромада јашајан сизләрә дә вар ҝүҹүмлә Мүждәни тәблиғ етмәјә һазырам» (Ром. 1:14, 15). Павел она ҝөстәрилән лүтфә ҝөрә миннәтдарлыгдан ирәли ҝәләрәк, өзү Аллаһын лүтфүндән фајдаландығы кими, башгаларына да бундан фајдаланмаға көмәк етмәјә сәј ҝөстәрирди (1 Тим. 1:12-16). О раст ҝәлдији һәр бир инсана өзүнү борҹлу санырды вә дүшүнүрдү ки, бу борҹу јалныз онлара тәблиғ етмәклә өдәмәк оларды. Сән дә саһәндә јашајан инсанлар гаршысында өзүнү борҹлу һисс едирсәнми? (Һәвариләрин ишләри 20:26, 27 ајәләрини оху.)
14. Халг гаршысында вә евдән-евә тәблиғ етмәјимизин ән әсас сәбәби һансыдыр?
14 Инсанларын һәјатынын хиласы ваҹиб олса да, евдән-евә тәблиғ етмәк үчүн даһа бөјүк сәбәб вар. Малаки 1:11 ајәсиндәки пејғәмбәрликдә Јеһова бәјан едир: «Ҝүнәшин чыхдығы јердән батдығы јерә гәдәр Мәним адым милләтләр арасында әзәмәтли олаҹаг... Адыма... пак тәгдимләр ҝәтириләҹәк. Чүнки милләтләр арасында адым әзәмәтли олаҹаг». Бу пејғәмбәрлик бу ҝүн јеринә јетир вә Јеһованын һәср олунмуш хидмәтчиләри итаәткарлыгла хидмәтләрини јеринә јетирәрәк Онун адыны бүтүн дүнјада ачыгҹа иззәтләндирирләр (Мәз. 109:30; Мат. 24:14). Јеһоваја «һәмд гурбаныны» тәгдим етмәк халг гаршысында вә евдән-евә тәблиғ етмәјимизин ән әсас сәбәбидир (Ибр. 13:15).
Бизи габагда мөһтәшәм һадисәләр ҝөзләјир
15. а) Јерихонун әтрафында доланан исраиллиләр једдинҹи ҝүндә неҹә фәал олдулар? б) Бу, тәблиғ иши илә әлагәдар нәјә ишарә едир?
15 Тәблиғ иши илә бағлы нә ҝөзләнилир? «Јешуа» китабында Јерихо шәһәринин мүһасирәјә алынмасы барәдә һекајә буна бир нүмунәдир. Аллаһ Јерихону дағытмаздан әввәл исраиллиләрә тапшырды ки, алты ҝүн әрзиндә ҝүндә бир дәфә шәһәрин әтрафында долансынлар. Једдинҹи ҝүндә исә онлар әһәмијјәтли дәрәҹәдә фәал олмалы идиләр. Јеһова Јешуаја деди: «Једдинҹи ҝүн шәһәри једди дәфә доланын вә каһинләр шејпурлары чалсынлар... вә сиз шејпурун сәсини ешитдијиниз вахт бүтүн халг ҝур сәслә бағырсын. Онда шәһәрин гала диварлары јерә чөкәҹәк» (Јешуа 6:2-5). Ола билсин ки, тәблиғ фәалијјәтимизин артмасы буна бәнзәр шәкилдә олаҹаг. Шүбһә јохдур ки, биз индики системин мәһв олунмасындан өнҹә Аллаһын адына вә Онун Падшаһлығына бәшәр тарихиндә ән бөјүк шаһидлик вериләҹәјини ҝөрәҹәјик.
16, 17. а) ‘Бөјүк мәшәггәт’ битмәздән өнҹә нәјә наил олунаҹаг? б) Нөвбәти мәгаләдә һансы суаллар арашдырылаҹаг?
16 Вахт ҝәләҹәк ки, бәјан етдијимиз хәбәр ‘ҝур сәсә’ бәнзәјәҹәк. «Вәһј» китабында ҹидди һөкм хәбәри «һәр бири бир талант ағырлығында олан бөјүк долу дәнәләри» кими тәсвир едилирb. Вәһј 16:21 ајәсиндә дејилир: «Бәла һәддиндән артыг бөјүк иди». Аллаһын һөкм хәбәринин бәјан едилмәсинин һәлледиҹи мәгамында евдән-евә тәблиғин һансы рол ојнајаҹағы бизә мәлум дејил. Амма биз әмин ола биләрик ки, ‘бөјүк мәшәггәт’ битмәздән өнҹә Јеһованын ады бәшәр тарихиндә мисли ҝөрүнмәмиш дәрәҹәдә танынаҹаг (Вәһј 7:14; Јез. 38:23).
17 Ҝәлин гаршыда олан мөһтәшәм һадисәләри ҝөзләдијимиз әрәфәдә Падшаһлыг һаггында хош хәбәри дурмадан сәјлә тәблиғ едәк. Бәс евдән-евә тәблиғ етмәк тапшырығыны јеринә јетирәркән һансы чәтинликләрлә үзләширик вә онларын өһдәсиндән неҹә ҝәлә биләрик? Бу суаллар нөвбәти мәгаләдә арашдырылаҹаг.
[Һашијәләр]
a Јеһованын Шаһидләринин веб-сајтынын үнваны: www.watchtower.org.
b Әҝәр сөһбәт јунан талантындан ҝедирсә, һәр бир долу дәнәсинин чәкиси тәхминән 20 килограм олмалыдыр.
Неҹә ҹаваб верәрдиниз?
• Нә үчүн демәк олар ки, евдән-евә тәблиғ Мүгәддәс Китаба әсасланыр?
• Евдән-евә тәблиғин ваҹиблији мүасир дөврдә неҹә вурғуланмышды?
• Нәјә ҝөрә Јеһованын һәср олунмуш хидмәтчиләри хош хәбәри тәблиғ етмәјә борҹлудурлар?
• Габагда бизи һансы мөһтәшәм һадисәләр ҝөзләјир?
[4-ҹү сәһифәдәки шәкилләр]
Сән дә, һәвари Павел кими, башгаларына тәблиғ етмәк мәсулијјәтини һисс едирсәнми?
[5-ҹи сәһифәдәки шәкил]
Нејтан Норр, 1953-ҹү ил