Мүгәддәс Китаб һәјатлары дәјишир

Мексикада «Кичик шејтанлар» адлы ҝәнҹ гулдурлар дәстәсинин үзвүнүн һәјатыны дәјишиб, ону дүрүст, әмәксевәр вәтәндаш едән нә ола биләрди? Нәјә ҝөрә уғурлар әлдә едән јапонијалы иш гадыны һәјатынын амалы олан вар-дөвләт далынҹа гачмаға сон гојду? Бәс етдији дәјишикликдән сонра о нә һисс едир? Гејри-гануни силаһ тиҹарәти илә мәшғул олан русијалыны ҝәлир ҝәтирән ишиндән имтина етмәјә нә вадар етди? Ҝәлин ҝөрәк бу һагда онларын өзләри нә дејир.

ҮМУМИ ТАНЫШЛЫГ

АДЫ: АДРИАН ПЕРЕС

ЈАШЫ: 30

ӨЛКӘ: МЕКСИКА

КЕЧМИШИ: ГУЛДУР ДӘСТӘСИНИН ҮЗВҮ

ТАРИХЧӘМ: 13 јашым оланда аиләмиз Мехико штатынын Екатепек де Морелос шәһәринә көчдү. Һәмин вахт орада ҝәнҹләрин төрәтдији ҹинајәтләр, вандализм вә наркоманија баш алыб ҝедирди. Чох кечмәмиш мән спиртли ичкиләрә алудә олдум, әтрафа зијан вурмаға вә позғунлуг етмәјә башладым.

Сонралар биз доғулдуғум Сан Висента шәһәринә ҝери гајытдыг. Анҹаг наркоманија бурада да бөјүк проблемә чеврилмишди. Ҝәнҹләрин мејидинин күчәнин ортасында сәрилдијини ҝөрмәк ади һал иди. Мән «Кичик шејтанлар» адланан гулдур дәстәсинә гошулдум. Биз оғурлуг едир вә наркотик гәбул едирдик. Әсасән сыјыглашдырыҹы маје, јахуд јапышган ијләјирдик. Чох вахт евә неҹә ҝәлиб чыхдығымы билмирдим, һәрдән исә һушсуз һалда күчәнин ортасында сәрилиб галырдым. Достларымдан бәзиләри оғурлуг вә гатиллик үстүндә һәбсханаја дүшдүләр.

Бүтүн бунлара рәғмән үрәјимдә Аллаһа инам варды. Виҹданымы сакитләшдирмәк үчүн дини ајинләрдә, мәсәлән, Пасха бајрамындан әввәлки һәфтә кечирилән хач јолу ајининдә иштирак едирдим. Бундан сонра исә, Мәсиһ ролуну иҹра едән дә дахил олмагла, һамымыз сәрхош олана гәдәр ичмәклә һәмин ајиндә иштирак етмәјимизи гејд едирдик.

МҮГӘДДӘС КИТАБ ҺӘЈАТЫМЫ ДӘЈИШДИ: Ҝәнҹлик илләринә гәдәм гојанда Јеһованын Шаһидләри илә Мүгәддәс Китабы өјрәнмәјә башладым. Баша дүшүрдүм ки, мәнасыз һәјат сүрүрәм, белә ҝетсә ахырым пис олаҹаг. Галатијалылара 6:8 ајәсиндәки сөзләр мәни әмәллиҹә силкәләди: «Өз ҹисмани тәбиәти үчүн әкән, о тәбиәтдән өлүм бичәҹәкдир; Руһ үчүн әкән исә, Руһдан әбәди һәјат бичәҹәкдир». Бу ајәнин сајәсиндә баша дүшдүм ки, әҝәр өз јахшылығымы истәјирәмсә, онда ҝәләҹәји нәзәрә алараг әкмәлијәм.

Мүгәддәс Китабы өјрәндикҹә анламаға башладым ки, Јеһова мәнимлә шәхсән марагланан дири Аллаһдыр вә кечмишдәки ҝүнаһларымы бағышламаға һазырдыр. Өз тәҹрүбәмдән өјрәндим ки, О, дуалары динләјир вә онлара ҹаваб верир.

Һәјат тәрзими дәјишмәк елә дә асан олмады. Дәстәдән аралашмаг чәтин иди. Бәзи әразиләр мүхтәлиф дәстәләр арасында бөлүшдүрүлмүшдү. Мән артыг һеч бир дәстәјә аид олмасам да, һәмин күчәләрдән раһат кечә билмирдим. Һәрдән өз көһнә достларымдан ҝизләнмәли олурдум. Чүнки онлар мәни ахтарырдылар ки, көһнә вәрдишләримә гајтарсынлар.

Јеһованын Шаһидләринин Падшаһлыг Залында ҝөрүшләрә ҝәлмәјә башлајанда исә онлардан мәһәббәт вә сәмимилик ҝөрүрдүм. Бу инсанларын әсл иманлы олдуғуну вә өјрәтдикләринә ујғун јашадыгларыны ҝөрмәк мәнә ҝүҹлү тәсир бағышлады. Бу, әввәлләр олдуғум мүһитдән јерлә-ҝөј гәдәр фәргләнирди.

МӘНӘ ФАЈДАСЫ: Артыг он илдир ки, Јеһованын Шаһиди кими вәфтиз олунмушам. Мүгәддәс Китаб тәлимләрини һәјатымда тәтбиг етмәк үчүн чох чалышырам. Бунун сајәсиндә аиләмин һөрмәтини газанырам. Инди онлар мәни зәһмәткеш адам кими таныјырлар вә мән онлара мадди ҹәһәтдән көмәк дә едә билирәм. Анам Мүгәддәс Китабы өјрәнмәјә башлады вә инди Јеһованын Шаһидидир. Атам да јаваш-јаваш һәјат тәрзини дәјишир. Аилә үзвләримин чоху Јеһованын Шаһиди олмасалар да, һәјатымдакы дәјишикликләри ҝөрәндән сонра етираф едирләр ки, Мүгәддәс Китаб инсана һәјатыны јахшылыға доғру дәјишмәјә көмәк едә биләр.

ҮМУМИ ТАНЫШЛЫГ

АДЫ: ЈАЈОИ НАГАТАНИ

ЈАШЫ: 50

ӨЛКӘ: ЈАПОНИЈА

КЕЧМИШИ: УҒУРЛУ ИШ ГАДЫНЫ

ТАРИХЧӘМ: Мән меһрибан инсанларын јашадығы әјаләт шәһәриндә боја-баша чатмышам. Атам он ишчиси олан бөјүк мағаза саһиби иди. Атамла анамын иши чох олса да, евимиз мағазанын јанында олдуғундан, өзүмү һеч вахт тәк һисс етмирдим.

Аиләдә үч гыздан ән бөјүјү идим вә ушаг јашларымдан аилә бизнесини апармағы мәнә өјрәтмишдиләр. Ҝәнҹ јашында аилә гурдум. Әрим банкдакы ишиндән чыхыб аилә бизнесиндә мәнә көмәк етмәјә башлады. Бир-биринин ардынҹа үч ушағымыз олду. Мән сәһәрин ҝөзү ачыландан ахшама кими мағазада ишләјир, анам исә ушаглара бахыр, ев ишләрини ҝөрүрдү. Бунунла белә, аиләмизлә бир јердә вахт кечирмәјә бир аз вахтымыз галырды.

Сонра игтисади бөһран тиҹарәт саһәсинә зәрбә вурду вә бизнесимиз тәнәззүлә уғрамаға башлады. Вәзијјәтдән чыхмаг үчүн биз әсас шосе јолунун гырағында тикинти материаллары мағазасы ачмаг гәрарына ҝәлдик. Мағазанын тикинтисинә башламаздан бир ҝүн әввәл атам ҝөзләнилмәдән бејин инфаркты кечирди. О, данышыг габилијјәтини итирди. Артыг компанијанын президенти вәзифәсини иҹра едә билмәдијиндән јени мағазанын мәсулијјәти мәним үзәримә дүшдү. Әрим исә көһнә мағазада галды. Башымыз ишдән һеч ајылмырды.

Јени мағазамызда ишимиз уғурлу ҝедирди. Мән өз наилијјәтләримлә фәхр едир, јухума һарам гатыб ҝеҹә-ҝүндүз ишләјирдим. Ушагларымы севсәм дә, фикрим-зикрим анҹаг ишдә иди. Әримлә сөһбәт етмәјә ҝүҹ-бәла илә вахт тапырдым, тапанда да анҹаг дидиширдик. Ҝәрҝинликдән гуртулмаг үчүн, демәк олар ки, һәр ахшам достларымла вә иш јолдашларымла ичмәјә ҝедирдим. Һәјатда етдим шеј јалныз ишләмәк, ичмәк вә јатмаг иди. Мәнимки пул сарыдан ҝәтирсә дә, өзүмү ҝетдикҹә даһа чох бәдбәхт һисс едирдим, нијәсини исә баша дүшә билмирдим.

МҮГӘДДӘС КИТАБ ҺӘЈАТЫМЫ ДӘЈИШДИ: Јеһованын Шаһидләри илә Мүгәддәс Китабы өјрәнмәјә башлајанда үч ајә мәнә ҝүҹлү тәсир бағышлады. Матта 5:3 ајәсиндәки «руһән јохсуллар нә бәхтијардырлар! Чүнки Сәмави Сәлтәнәт онларындыр» сөзләринин мәнасыны баша дүшәндә һөнкүр-һөнкүр ағладым. Бу ајә мадди ҹәһәтдән уғур газанмағыма вә әмәкдашларымын фәхри олмағыма бахмајараг, нә үчүн дахили бошлуг дујдуғуму баша дүшмәјә көмәк етди. Анладым ки, јалныз руһани тәләбатларымы дәрк едиб, онлары тәмин етдијим тәгдирдә һәгиги хошбәхтлији тапа биләрәм.

Јапон игтисадијјаты шиддәтли бөһран кечирдији вахт јолдашларымын вәзијјәтиндән 1 Тимотејә 6:9 ајәсиндәки: «Варланмаг истәјәнләр исә јолдан чыхыр вә тора дүшүрләр вә инсанлары фәлакәтә вә һәлака апаран бир чох мәнасыз вә зијанвериҹи еһтираслара гапылырлар» сөзләринин ҝерчәк олдуғуну ҝөрдүм. Исанын Матта 6:24 ајәсиндәки: «Сиз Аллаһа вә маммона гуллуг едә билмәзсиниз» сөзләринин шәхсән мәнә аид олдуғуну баша дүшдүм, буна ҝөрә дә, һәјатымда бәзи дәјишикликләр етмәк гәрарына ҝәлдим.

Анладым ки, индијә гәдәр валидејнләримә, әримә вә ушагларыма биҝанә јанашмышам. Һәмчинин хасијјәтимин корландығы да ҝөз габағында иди. Мән тәкәббүрлү олмушдум. Адамлара һөвсәләм чатмырды. Тез өзүмдән чыхырдым. Әввәлҹә мәнә елә ҝәлирди ки, һеч вахт дәјишиб мәсиһчи ола билмәрәм. Амма ушагларымы һәгигәтән севирдим вә фикир верирдим ки, аиләдә Мүгәддәс Китабын мәсләһәтинә риајәт едәндә ушагларымын чох хошуна ҝәлир. Ушагларымла даһа чох вахт кечирмәјә вә онлары өзүмлә мәсиһчи ҝөрүшләринә апармаға башладым.

МӘНӘ ФАЈДАСЫ: Һәјатын мәнасыны анламаг, Аллаһа хидмәт едә билмәк вә Онун хошуна ҝәлән кими јашамаг мәнә әсл мәнада хошбәхтлик вә мәмнунлуг ҝәтирир. Даһа аиләми ишә гурбан вермирәм, буна ҝөрә дә, итирдијим өзүнәһөрмәт һиссини јенидән газанмышам.

Мүгәддәс Китаб принсипләрини тәтбиг етдикҹә, неҹә дәјишилдијими ҝөрмәк анамы Мүгәддәс Китабы өјрәниб мәсиһчи олмаға тәшвиг етди. Хошбәхтликдән, нә атам, нә дә әрим бизим гәрарымыза мане олмур. Ушагларымла мүнасибәтим даһа мөһкәм олду вә инди аилә һәјатында әсл хошбәхтлији дадырам.

ҮМУМИ ТАНЫШЛЫГ

АДЫ: МИХАИЛ ЗУЈЕВ

ЈАШЫ: 51

ӨЛКӘ: РУСИЈА

КЕЧМИШИ: ГАНУНСУЗ СИЛАҺ АЛВЕРЧИСИ

ТАРИХЧӘМ: Доғма шәһәрим Красногорскда һәр јан јашыллыгдыр. Москва чајы орадан ҹәнуба ахыр. Шималдан вә гәрбдән шәһәри сых мешәләр әһатә едир.

Ҝәнҹлијимдә әлбәјаха дөјүшү вә силаһ ојнатмағы хошлајырдым. Идмана чохлу вахт сәрф едирдим. Һәмчинин гејри-гануни одлу силаһлар, дөјүш сурсаты вә бычаглар дүзәлдирдим. Сонралар бу мәним бизнесимә чеврилди. Ишими јахшы дүзүб гошмушдум вә малымын ҹинајәткарлара сатышы да јахшы ҝедирди.

МҮГӘДДӘС КИТАБ ҺӘЈАТЫМЫ ДӘЈИШДИ: 1990-ҹы илләрин әввәлләриндә Јеһованын Шаһидләринә раст ҝәлдим, анҹаг әввәлҹә онлара инанмырдым. Мәним фикримҹә, онлар һәддиндән артыг чох суал верирдиләр.

Бир дәфә онлардан бири мәнә Ромалылара 14:12 ајәсиндәки: «Һәр биримиз өзү үчүн Аллаһа һесабат верәҹәкдир» сөзләрини охуду. Мәни фикир бүрүдү ки, ҝөрәсән Аллаһа нә ҹаваб верәҹәјәм. Бу ајә Аллаһын мәндән нә тәләб етдијини өјрәнмәјә мәни тәшвиг етди.

Мәнә Мүгәддәс Китабын Колослулара 3:5-10 ајәсиндә јазылмыш: «Дахили варлығынызын дүнјәви јөнләрини — ҹинси әхлагсызлыг, натәмизлик, шәһвәт, пис еһтирас вә бүтпәрәстлик олан тамаһкарлығы — өлдүрүн. Бунлардан өтрү Аллаһын гәзәби... ҝәлир... Гәзәб, һиддәт, кин, ифтира, ағзыныздан чыхан әдәбсиз сөзләр кими шејләрин һамысыны бир јана гојун. Бир-биринизә јалан данышмајын, чүнки көһнә мәнлијиниздән вә онун әмәлләриндән сојундунуз вә јени мәнлији ҝејдиниз» сөзләринә әмәл етмәк үчүн чох чалышмаг лазым ҝәлди.

Белә дәјишиклији етмәк чох чәтин иди. Көһнә мүштәриләрим силаһ үчүн мәнә пул тәклиф едирдиләр, һәм дә кимсә мәни тәһгир едәндә өзүмү әлә алмаг чәтин олурду. Буна бахмајараг, бөјүк вә гијмәтли силаһ коллексијамы мәһв етдим. Аллаһын вә Мәсиһин мәнә ҝөстәрдији мәһәббәт һаггында өјрәндикҹә үрәјимдә онлара гаршы севҝи ојанырды. Мүгәддәс Китабы өјрәнмәјә, јығынҹаг ҝөрүшләринә ҝетмәјә вә дуада Аллаһдан көмәк истәмәјә давам етдим.

МӘНӘ ФАЈДАСЫ: Јаваш-јаваш, бөјүк әзијјәтлә вә мәсиһчи гардашларын көмәјилә хасијјәтими дүзәлтмишәм. Јеһова Аллаһын һәр биримизин, һәтта ҝөзләрини һәјата јуманларын да гајғысына галдығыны билмәк мәни вәҹдә ҝәтирир (Һәвариләрин ишләри 24:15). Јеһованын Шаһидләри арасында ҝөрдүјүм сәмимијјәти вә дүзҝүнлүјү чох гијмәтләндирирәм. Онларын мәнә ҝөстәрдикләри сәмими мараға вә Аллаһа сәдагәтләринә ҝөрә чох миннәтдарам.

Әввәлҹә аилә үзвләримдән вә достларымдан бәзиләри јени иманыма гаршы чыхырдылар. Амма сонра онлар өзләринә тәсәлли вермәјә башладылар ки, ҹинајәткар тәшкилатларла әлагәли олмағымданса, диндар олмағым јахшыдыр. Севинирәм ки, һәјатымы даһа дөјүш силаһларынын алверинә дејил, инсанлара сүлһ Аллаһы һаггында өјрәтмәјә һәср етмишәм.

[27-ҹи сәһифәдәки шәкил]

Виҹданымы сакитләшдирмәк үчүн католик ајинләриндә иштирак едирдим

[28-ҹи сәһифәдәки шәкил]

Мәнимки пул сарыдан ҝәтирсә дә, чох бәдбәхт идим