Мүгәддәс Китаб һәјатлары дәјишир
Брилјант гачагмалчылығы илә мәшғул олуб, өз мүдириндән оғурлајан гадыны дүрүст ишчи олмаға нә тәшвиг етди? Ики дәфә интиһар етмәјә ҹәһд ҝөстәрән гадына һәјатын мәнасыны тапмаға нә көмәк етди? Спиртли ичкиләрдән вә наркотик маддәләрдән суи-истифадә едән адам бу зәрәрли вәрдишләрдән јаха гуртармаг үчүн ҝүҹү һарадан тапды? Ҝәлин ҝөрәк онлар өзләри бу һагда нә дејирләр.
ҮМУМИ ТАНЫШЛЫГ
АДЫ: МАРГАРЕТ ДЕБАРН
ЈАШЫ: 45
ӨЛКӘ: БОТСВАНА
КЕЧМИШИ: ГАЧАГМАЛЧЫ ВӘ ОҒРУ
ТАРИХЧӘМ: Әслән алман олан атам Ҹәнуб-Шәрги Африканын (инди Намибија) вәтәндашлығыны гәбул етмишди. Анам Ботсванадан, Манголога гәбиләсиндән иди. Өзүм Намибијанын Гобабис шәһәриндә анадан олмушам.
1970-ҹи илләрдә Ҹәнуби Африка һөкумәти Намибијаны ҝүҹлү нәзарәт алтында сахлајыр, бүтүн шәһәр вә кәндләрдә апартеид ганунларыны ҹидди сурәтдә һәјата кечирирди. Валидејнләрим мүхтәлиф иргләрдән олдуғундан ајрылмаға мәҹбур олдулар. Беләликлә, анам гардашларымы, баҹыларымы вә мәни ҝөтүрүб Ботсвананын дағлыг әразиси олан Гансијә көчдү.
1979-ҹу илдә мән Ботсвананын Лобатсе шәһәринә көчдүм вә мәктәби гуртарана кими бир аиләнин өһдәлији алтында јашадым. Сонра автотәмир емалатханасында катибә кими ишләмәјә башладым. Ушаглыгдан инанырдым ки, Аллаһ инсанларын гајғысына галмыр, өзүнү вә аиләсини, һансы јолла олурса-олсун, инсан өзү тәмин етмәлидир.
Ишдә мәсулијјәтли вәзифә тутмағымдан јарарланараг, мүдиримдән еһтијат һиссәләри оғурлајыб сатырдым. Ҝеҹә шәһәрдән гатар кечәндә достларымла гатара миниб әлимизә кечәни оғурлајырдыг. Бундан әлавә, брилјант, гызыл вә тунҹ гачагмалчылығы илә мәшғул олмаға вә наркотик гәбул етмәјә башладым. Ҝет-ҝедә даһа чох гәддарлашырдым вә һәјатымда чохлу оғланлар вар иди.
Сонра, 1993-ҹү илдә ахыр ки, оғурлуг үстүндә тутулдум вә ишдән говулдум. «Достларым» өзләринин дә әлә кечәҹәкләриндән горхараг мәни тәрк етдиләр. Онларын бу һәрәкәти үрәјими сындырды вә гәрара ҝәлдим ки, һеч кимә етибар етмәк олмаз.
МҮГӘДДӘС КИТАБ ҺӘЈАТЫМЫ ДӘЈИШДИ: 1994-ҹү илдә миссионер кими хидмәт едән Тим вә Вирҹинја адлы ики Јеһованын Шаһиди илә растлашдым. Онлар јени иш јеримә ҝәлир, наһар фасиләсиндә мәнә Мүгәддәс Китабы өјрәдирдиләр. Сонралар, етибарлы адам олдугларыны баша дүшәндә, өјрәнмә кечирмәк үчүн онлары евимә дәвәт етдим.
Тезликлә анладым ки, әҝәр Аллаһы разы салмаг истәјирәмсә, һәјат тәрзимдә дәјишиклик етмәлијәм. Мәсәлән, 1 Коринфлиләрә 6:9, 10 ајәләриндән өјрәндим ки, «нә әхлагсызлар,.. нә оғрулар, нә тамаһкарлар, нә сәрхошлар, нә аҹыдилләр, нә дә гәсбкарлар Аллаһын Сәлтәнәтини мирас алмајаҹаглар». Бир-бир пис вәрдишләрими тәрҝитмәјә башладым. Оғурлуғун дашыны атдым. Бирликдә бөјүдүјүм гулдурларла үнсијјәти кәсдим. Сонра Јеһова оғланлары һәјатымдан чыхармаға мәнә ҝүҹ верди.
МӘНӘ ФАЈДАСЫ: Чох чалышдыгдан сонра өзүмү ҹиловламағы вә нә исә өз гајдасында олмајанда ушагларымын үстүнә гышгырмамағы өјрәндим (Ефеслиләрә 4:31). Инди һәр шеји сакит-сакит мүзакирә етмәјә чалышырам. Бу ҹүр данышмаг арзуолунан нәтиҹәләри ҝәтирир вә бир аилә кими бизи бир-биримизә јахынлашдырыр.
Кечмиш достларым, һәтта гоншулар артыг билирләр ки, мәнә етибар етмәк олар. Инди әшјалара вә пула виҹданла јанашан етибарлы, дүрүст ишчи олмушам. Буна ҝөрә дә, вахтымын чох һиссәсини инсанлара Мүгәддәс Китабы өјрәтмәјә сәрф етмәклә јанашы, өзүмү дә тәмин едә билирәм. Сүлејманын мәсәлләри 10:22 ајәсиндә јазылан сөзләрлә үрәкдән разыјам: «Рәббин хејир-дуасы инсана сәрвәт ҝәтирәр, даһа она гүссә вермәз».
ҮМУМИ ТАНЫШЛЫГ
АДЫ: ГЛОРИА ЕЛИЗАРРАРАС ДЕ ЧОПЕРЕНА
ЈАШЫ: 37
ӨЛКӘ: МЕКСИКА
КЕЧМИШИ: ИНТИҺАР ЕТМӘЈӘ ҸӘҺД ҜӨСТӘРИБ
ТАРИХЧӘМ: Мән Мехико Штатынын варлы бөлҝәси олан Наукалпанда бөјүјүб боја-баша чатмышам. Ҝәнҹ јашларымдан чох дикбаш олмушам вә шәнликләрә ҝетмәји хошламышам. 12 јашымда сигарет чәкмәјә, 14 јашымда ичмәјә, 16-да исә наркотик гәбул етмәјә башламышам. Бир нечә илдән сонра евдән чыхыб ҝетдим. Достларымын әксәријјәти нормал аиләдән чыхмамышды, онлар ја физики, ја да сөзләрлә тәһгирә мәруз галмышдылар. Һәјат мәнә елә үмидсиз ҝөрүнүрдү ки, ики дәфә интиһар етмәјә ҹәһд ҝөстәрдим.
19 јашым оланда манекенлик етмәјә башладым. Сијасәт вә әјләнҹә дүнјасынын адамлары илә тәмасда олурдум. Әввәл-ахыр аилә гурдум, ушаг саһиби олдум, анҹаг аиләдә бүтүн гәрарлары гәбул едән мән идим. Мән јенә дә ичмәјә вә чәкмәјә давам едир, вахтымы дост-танышларла кечирирдим. Бир сөздән бир бајағы ифадәләр ишләдир, налајиг зарафатлары хошлајырдым. Чох пис хасијјәтим вар иди.
Достлуг етдијим инсанларын әксәријјәти дә ејни ҹүр һәјат сүрүрдүләр. Онлара елә ҝәлирди ки, мәним һәр шејим вар. Анҹаг һәјат мәнә бош вә мәнасыз ҝәлирди.
МҮГӘДДӘС КИТАБ ҺӘЈАТЫМЫ ДӘЈИШДИ: 1998-ҹи илдә Јеһованын Шаһидләри илә Мүгәддәс Китабы өјрәнмәјә башладым. Мүгәддәс Китабдан өјрәндим ки, һәјатын мәнасы вар, Јеһова Аллаһ јердә Ҹәннәти бәрпа едәҹәк, өлүләри дирилдәҹәк вә мән дә ҝәләҹәкдә белә шәраитдә јашаја биләрәм.
Һәмчинин баша дүшдүм ки, Аллаһы севдијими она табе олмагла ҝөстәрә биләрәм (1 Јәһја 5:3). Әввәлҹә бу мәнә чох чәтин ҝәлирди, чүнки һеч вахт һеч кимдән мәсләһәт гәбул етмәмишдим. Анҹаг ахырда етираф етдим ки, һәјатыма бундан сонра да өзүм истигамәт верә билмәрәм (Јеремја 10:23). Јеһоваја мәнә јол ҝөстәрмәси үчүн дуа етдим. Ондан хаһиш етдим ки, һәјатымы Онун нормаларына ујғунлашдырмаға вә ушагларыма мәним кими һәјат сүрмәмәји өјрәтмәјә көмәк етсин.
Лазыми дәјишикликләри етмәк мәним үчүн чох чәтин иди, буна бахмајараг, Ефеслиләрә 4:22-24 ајәләриндәки мәсләһәтә әмәл етмәјә башладым: «Әввәлки јашајышыныза мәхсус олуб, алдадыҹы еһтирасларла позулмуш көһнә мәнлији кәнара атын... Аллаһын бәнзәјишинә ҝөрә һәгиги салеһлик вә мүгәддәсликлә јарадылмыш јени мәнлији ҝејинин». Мәним үчүн јени мәнлији ҝејинмәк сигарет чәкмәк кими пис вәрдишләри тәрҝитмәк демәк иди. Һәм дә налајиг сөзләри нитгимдән чыхарараг сөз еһтијатымы јениләшдирмәли олдум. Лазыми дәјишикликләри етмәк вә Јеһованын Шаһиди кими вәфтиз ола билмәк үчүн мәнә тәхминән үч ил лазым ҝәлди.
Бундан башга, мән һәјат јолдашы вә ана кими дашыдығым мәсулијјәтләрә ҹидди јанашмаға башладым. Инди 1 Петер 3:1, 2 ајәләриндәки мәсләһәтә әмәл едирәм: «Еј гадынлар, сиз дә ејни шәкилдә өз әрләринизә табе олун ки, бәзиләри кәлама итаәт етмәзләрсә, еһтирам ичиндә тәмиз һәјатынызы мүшаһидә едәрәк, сиз арвадларын рәфтары илә һеч бир сөз сөјләнмәдән фәтһ едилсинләр».
МӘНӘ ФАЈДАСЫ: Һәјатын мәнасыны тапдығым үчүн Јеһоваја олдугҹа миннәтдарам. Инди ҝөрүрәм ки, чох дәјишилмишәм вә ушагларыма јахшы тәрбијә верә билирәм. Һәрдән үрәјим мәни кечмиш һәрәкәтләримә ҝөрә гынаса да, Јеһова үрәјими ҝөрүр (1 Јәһја 3:19, 20). Һеч шүбһә јохдур ки, Мүгәддәс Китаб нормаларына ујғун јашамаг мәни зәрәрдән горујур вә гәлб раһатлығы ҝәтирир.
ҮМУМИ ТАНЫШЛЫГ
АДЫ: ЖЕИЛСОН КОРРЕА ДЕ ОЛИВЕЈРА
ЈАШЫ: 33
ӨЛКӘ: БРАЗИЛИЈА
КЕЧМИШИ: ӘЈЈАШ ВӘ НАРКОМАН
ТАРИХЧӘМ: Мән Бразилијанын Уругвајла сәрһәдинә јахын јерләшән, тәхминән 100 000 нәфәрлик әһалиси олан Баже шәһәриндә доғулмушам. Әһали әсасән әкинчилик вә малдарлыгла мәшғул олурду. Мән гулдур дәстәләринин зоракылыг төрәтдији, әјјашлыг вә наркоманијанын ҝәнҹләр арасында ҝениш јајылдығы касыб әразидә бөјүмүшәм.
Мәктәби битирдикдән сонра ичмәјә, марихуана чәкмәјә, ағыр рок мусигиси динләмәјә башладым. Мән Аллаһа инанмырдым вә дүшүнүрдүм ки, дүнјадакы әзаб-әзијјәт вә гармагарышыглыг Аллаһын мөвҹуд олмадығына сүбутдур.
Мән ҝитара чалыр вә маһны јазырдым. Маһныларым үчүн чох вахт Мүгәддәс Јазыларын «Вәһј» китабындакы сөзләрдән илһам алырдым. Мусиги групум ҝөзләдијим гәдәр уғур газанмады, буна ҝөрә дә ҝетдикҹә ҝүҹлү наркотикләр гәбул етмәјә башладым. Веҹимә дејилди ки, јүксәк дозадан өлә биләрәм. Пәрәстиш етдијим бир чох мүғәнниләр мәһз бу сәбәбдән һәјатларыны итирмишдиләр.
Наркотик алмаг үчүн мәни бөјүдән нәнәмдән пул ҝөтүрүрдүм. Пулу нәјә хәрҹләдијими сорушанда ону алдадырдым. Бүтүн бунлар аз имиш кими, спиритизимлә дә мәшғул олмаға башладым. Гара маҝија мәнә чох мараглы ҝәлирди. Онун мусиги әсәрләрими зәнҝинләшдирәҹәјини дүшүнүрдүм.
МҮГӘДДӘС КИТАБ ҺӘЈАТЫМЫ ДӘЈИШДИ: Мүгәддәс Китабы өјрәнмәјә вә Јеһованын Шаһидләринин ҝөрүшләринә ҝетмәјә башладыгдан сонра мәним дүшүнҹә тәрзим вә хасијјәтим дәјишилмәјә башлады. Тәдриҹән үрәјимдә јашамаг вә хошбәхт олмаг арзусу ојанды. Јени дүшүнҹә тәрзинә саһиб оландан сонра наразылыг вә етираз әламәти олараг узатдығым сачларымы кәсмәк гәрарына ҝәлдим. Сонра баша дүшдүм ки, әҝәр Аллаһа мәгбул олмаг истәјирәмсә, спиртли ичкиләрдән суи-истифадә етмәјә, наркотик гәбул етмәјә вә сигарет чәкмәјә сон гојмалыјам. Һәмчинин мусиги сечиминдә дә дәјишиклик етмәјин лазым ҝәлдијини анладым.
Јеһованын Шаһидләринин јығынҹаг ҝөрүшүнә биринҹи дәфә ҝәләндә ҝөзүм дивардакы бир ајәјә саташды. Бу, Сүлејманын мәсәлләри 3:5, 6 ајәләри иди вә орада дејилирди: «Бүтүн гәлбинлә Рәббә ҝүвән, өз идракына етибар етмә. Бүтүн јолларында Ону таны, О сәнин јолларыны дүзәлдәр». Бу ајәләрин үзәриндә дүшүнәндә әмин олдум ки, әҝәр јол версәм, Јеһова мәнә һәјатымы јенидән гурмаға көмәк едәҹәк.
Анҹаг дәрин көк салмыш һәјат тәрзими дәјишмәк вә спиртли ичкиләрдән, наркотик маддәләрдән асылылыға сон гојмаг әлими кәсмәк гәдәр чәтин иди (Матта 18:8, 9). Бу дәјишикликләри тәдриҹән едә билмәздим. Билирдим ки, бу ҹүр етсәм, мәндә һеч бир шеј алынмајаҹаг. Буна ҝөрә дә, пис вәрдишләримин һамысына бирдән сон гојдум. Һәм дә мәни ширникләндириб көһнә, зәрәрли һәјат тәрзимә гајтара биләҹәк бүтүн инсанлардан вә јерләрдән гачырдым.
Мән диггәтими мәјуслуг һисс етдијим анлара ҹәмләмәјәрәк, ҝүндәлик наилијјәтләримдән гүрур дујмағы өјрәндим. Баша дүшүрдүм ки, Јеһованын ҝөзүндә физики, мәнәви вә руһани ҹәһәтдән тәмиз олмаг бөјүк шәрәфдир. Кечмиш һәјатым үзәриндә дүшүнмәјиб, ҝәләҹәјә бахмаг үчүн дуада Јеһовадан көмәк истәјир вә һәмин көмәји алырдым. Һәрдән көһнә вәрдишләримә гајыдырдым. Анҹаг бәрк сәрхошлугдан сонра өзүмү сүст һисс етдијим анларда белә, јенә дә мәнимлә Мүгәддәс Китаб өјрәнмәсинин кечирилмәсини тәкид едирдим.
Мүгәддәс Китабдан Аллаһ һаггында өјрәндијим һәгигәт — Онун һәр биримизин ајры-ајырылыгда гајғысына галмасы, јалан дини мәһв едәҹәји вә һал-һазырда үмумдүнја тәблиғ ишинә көмәк етмәси мәнә мәнтигәујғун ҝөрүнүрдү (Матта 7:21-23; 24:14; 1 Петер 5:6, 7). Бүтүн бунлар мозаиканын парчалары кими бир-бирини тамамлајырды. Ахырда, һәјатымы Јеһоваја һәср етмәк гәрарына ҝәлдим. Истәјирдим ки, Онун мәним үчүн етдији һәр шејә ҝөрә миннәтдарлығымы билдирим.
МӘНӘ ФАЈДАСЫ: Инди һәјатымын мәгсәди вә мәнасы олдуғуну һисс едирәм (Ваиз 12:13). Даһа мән аиләм үчүн јүк дејиләм, әксинә, дајағам. Мүгәддәс Китабдан өјрәндијим дәјәрли фикирләри нәнәмлә бөлүшүрдүм, бунун нәтиҹәсиндә о инди һәјатыны Јеһоваја һәср едиб. Аиләмин бәзи башга үзвләри вә көһнә мусиги групумуздан бир нәфәр дә Јеһованын Шаһиди олду.
Мән инди аиләлијәм вә јолдашымла бирликдә вахтымызын чох һиссәсини инсанлара Мүгәддәс Китаб һаггында өјрәтмәјә сәрф едирик. ‘Бүтүн гәлбимлә Рәббә ҝүвәнмәји’ өјрәндијим үчүн бол-бол хејир-дуа алырам.
[27-ҹи сәһифәдәки јазы]
«Тәдриҹән үрәјимдә јашамаг вә хошбәхт олмаг арзусу ојанды»