Јеһова гәдимдә хидмәтчиләрини хилас едирди
«Еј Аллаһ, Сән Өзүнү тез јетир. Көмәјим, хиласкарым Сәнсән» (МӘЗ. 70:5).
1, 2. а) Аллаһын хидмәтчиләри нә заман Ондан көмәк диләјирләр? б) Һансы суал јараныр вә онун ҹавабыны һарадан тапа биләрик?
МӘЗУНИЈЈӘТДӘ олан бир әр-арвада хәбәр чатыр ки, онларын 23 јашлы ҝәнҹ аиләли гызы мүәммалы шәкилдә итиб. Һәр шеј чох гәрибә ҝөрүнүр. Онлар тез јығышыб евләринә гајыдырлар вә јол боју Јеһовадан көмәк диләјирләр. 20 јашлы Шаһидә, әввәл-ахыр ону тамамилә ифлиҹ едәҹәк хәстәлијә тутулдуғу диагнозу гојулур. О буну өјрәндикдән дәрһал сонра дуада Јеһоваја үз тутур. Ушағыны тәк бөјүдән ана өзүнү вә 12 јашлы гызыны доландырмаг үчүн иш тапмагда чәтинлик чәкир. О, дуада үрәјини Јеһоваја бошалдыр. Аллаһын хидмәтчиләри шиддәтли сынаг вә чәтинликләр заманы көмәк үчүн адәтән Јеһоваја дуа едирләр. Сән дә чыхылмаз вәзијјәтләрдә дуада Јеһовадан көмәк диләмисәнми?
2 Ваҹиб бир суал јараныр: Јеһованын көмәк барәдә дуаларымыза ҹаваб верәҹәјинә үмид едә биләрикми? Бу суалын иманымызы мөһкәмләндирән ҹавабы 70-ҹи мәзмурда верилир. Үрәјә тәсир едән бу мәзмуру Јеһованын садиг хидмәтчиси олуб, һәјатында бир чох сынаг вә чәтинликләрлә үзләшән Давуд гәләмә алмышды. Давуд Јеһовадан илһам алараг Онун һаггында нөвбәти сөзләри јазмышды: «Еј Аллаһ... көмәјим, хиласкарым Сәнсән!» (Мәз. 70:5). Ҝәлин бу мәзмуру арашдыраг вә ҝөрәк нә үчүн дара дүшәндә биз дә Јеһоваја дуа едә вә Онун бизим дә ‘хиласкарымыз’ олаҹағына там әмин ола биләрик.
‘Хиласкар Сәнсән’
3. а) Давуд 70-ҹи мәзмурда тәкидлә нәји хаһиш едир? б) О бу мәзмурда һансы әминлији ифадә едир?
3 Давуд гәләмә алдығы 70-ҹи мәзмурда әввәлдә вә сонда тәкидлә Јеһовадан көмәк диләјир. (Мәзмур 70:1-5 ајәләрини оху.) О јалварыр ки, Јеһова онун дадына «тез чат»сын вә ону гуртармаг үчүн «Өзүнү тез јетир»син. Давуд 2-4-ҹү ајәләрдә беш хаһиш сәсләндирир. Илк үчү ону гәтлә јетирмәк истәјәнләр барәдәдир. Давуд Јеһовадан дүшмәнләрини мәғлуб етмәји вә пислик төрәтдикләринә ҝөрә онларын рүсвај едилмәләрини хаһиш едир. 4-ҹү ајәдәки нөвбәти ики хаһиш Аллаһын халгы илә бағлыдыр. Давуд дуа едир ки, Јеһованы ахтаранлар даима севинҹ ичиндә јашасын вә өз Аллаһыны уҹалтсынлар. Давуд мәзмурун сонунда Јеһоваја дејир: «Көмәјим, хиласкарым Сәнсән». Фикир верин ки, бу сөзләр хаһиш дејил. О, «Сәнсән» демәклә Јеһованын она көмәк едәҹәјинә там әминлијини вә инамыны билдирир.
4, 5. Биз 70-ҹи мәзмурдан Давуд һаггында нә өјрәнирик вә нәјә әмин ола биләрик?
4 Биз 70-ҹи мәзмурдан Давуд һаггында нә өјрәнирик? Давуд онун һәјатына сон гојмаға ҹан атанларла үз-үзә ҝәләндә иши өз әлинә ҝөтүрмәмәк гәрарына ҝәлди. О шүбһә етмирди ки, Јеһова өз вахтында вә истәјинә мүвафиг олараг дүшмәнләрә гаршы тәдбир ҝөрәҹәк (1 Шам. 26:10). Давуд Јеһованын Ону ахтаранлара көмәк етдијинә вә онлары бәлалардан гуртардығына әминлијини һеч вахт итирмирди (Ибр. 11:6). О инанырды ки, Аллаһын һәгиги хидмәтчиләринин Јеһованын әзәмәти барәдә данышмагла Ону уҹалтмаға вә севинмәјә там әсаслары вар (Мәз. 5:11; 35:27).
5 Давуд кими биз дә там әмин ола биләрик ки, Јеһова бизим Көмәкчимиз вә Хиласкарымыздыр. Буна ҝөрә, сынаглара мәруз галанда, јахуд көмәјә сон дәрәҹә еһтијаҹ дујанда Јеһованын дадымыза тез чатмасы үчүн дуа едә биләрик (Мәз. 71:12). Јеһова көмәк үчүн дуаларымыза неҹә ҹаваб верир? Буну нөвбәти мәгаләдә мүзакирә едәҹәјик. Һәләлик исә ҝәлин ҝөрәк үч мүхтәлиф вәзијјәтдә Јеһова Давуда көмәк едәрәк ону неҹә хилас етди.
Дүшмәнләрин әлиндән гуртулуш
6. Давуд Јеһованын салеһләри хилас етдијини һарадан билирди?
6 Давуд Мүгәддәс Јазыларын о вахт мөвҹуд олан һиссәләриндән билирди ки, салеһ инсанлар Јеһованын көмәјинә архалана биләрләр. Јеһова аллаһсыз дүнјаны Дашгынла мәһв едәндә Ондан горхан Нуһу вә аиләсини хилас етмишди (Јар. 7:23). Јеһова Содом вә Һоморранын пис сакинләринин үзәринә ҝөјдән од вә күкүрд јағдыранда салеһ Лута вә ики гызына гачыб ҹанларыны гуртармаға көмәк етмишди (Јар. 19:12-26). Јеһова өзүндән чох разы олан фирону ордусу илә бирҝә Гырмызы дәниздә батыранда Өз халгыны аҹы агибәтдән гуртармышды (Чых. 14:19-28). Буна ҝөрә дә, Давудун башга мәзмурда Јеһованы ‘азад едән Аллаһ’ кими иззәтләндирмәси һеч дә тәәҹҹүблү дејил (Мәз. 68:20).
7-9. а) Давудун Јеһованын ону хилас етмәјә гадир олдуғуна инанмаг үчүн һансы тутарлы әсаслары варды? б) Давуд гуртулушуна ҝөрә кими иззәтләндирди?
7 Давудун Јеһованын ону хилас етмәјә гадир олдуғуна инанмаға тутарлы әсаслары варды. О, шәхсән әмин олмушду ки, Јеһованын ‘әбәди әлләри’ хидмәтчиләрини гуртара биләр (Ганун. т. 33:27, КМ). Јеһова дәфәләрлә Давуду азғын дүшмәнләринин әлиндән гуртармышды (Мәз. 18:17-19, 48). Бир нүмунәјә нәзәр салаг.
8 Исраил гадынлары Давуду дөјүш шүҹаәтинә ҝөрә мәдһ едәндә падшаһ Шаулун елә бәрк пахыллығы тутду ки, ики дәфә Давуду низә илә вурмаға ҹәһд ҝөстәрди (1 Шам. 18:6-9). Лакин Давуд һәр ики һалда ҹаныны гуртара билди. О, тәҹрүбәли вә чевик дөјүшчү олдуғуна ҝөрәми өлүмдән гачды? Хејр. Мүгәддәс Китабда дејилир ки, Јеһова «онунла иди». (1 Шамуел 18:11-14 ајәләрини оху.) Бир гәдәр сонра, Шаулун Давуду филиштлиләрин әли илә өлдүрмәк планы баш тутмајанда о, «Рәббин Давудла олдуғуну ҝөрүб баша дүшдү» (1 Шам. 18:17-28).
9 Давуд гуртулушуна ҝөрә кими иззәтләндирди? 18-ҹи мәзмурун ҝириш сөзләриндә дејилир ки, Давуд бу илаһини ‘Рәбб ону Шаулун әлиндән гуртаранда’ сөјләмишди. О, һиссләрини маһныда ифадә едәрәк деди: «Рәбб гајам, галам, хиласкарымдыр, Аллаһым гајамдыр, Она пәнаһ ҝәтирәҹәјәм» (Мәз. 18:2). Мәҝәр Јеһованын Өз халгыны гуртармаға гадир олдуғуну билмәк иманымызы мөһкәмләндирмирми? (Мәз. 35:10).
Јатаға дүшәндә Јеһова дајаг олду
10, 11. Давудун 41-ҹи мәзмурда хатырланан хәстәлијинин нә заман баш вердијини неҹә мүәјјән едә биләрик?
10 Биз 41-ҹи мәзмурда падшаһ Давудун бәрк хәстәләндијини охујуруг. Давудун һалы о гәдәр пис иди ки, дүшмәнләр онун ‘даһа галхмајаҹағыны’ дүшүнүрдүләр (7, 8-ҹи ајәләр). Давуд нә заман јатаға дүшмүшдү? Мәзмурда хатырланан вәзијјәтдән фәрз етмәк олар ки, бу, һәјатынын ән чәтин анларындан бириндә, јәни оғлу Авшалом тахт-таҹы әлә кечирмәјә ҹәһд етдији ҝүнләрдә баш вермишди (2 Шам. 15:6, 13, 14).
11 Мисал үчүн, Давуд дејир ки, етибарлы сајдығы, онунла чөрәк кәсдији ән јахын досту она хәјанәт етмишди (9-ҹу ајә). Бу онун һәјатындан олан бир һадисәни јадымыза салыр. Давудун етибар етдији мәсләһәтчиси Ахитофел она хәјанәт едиб Авшаломун падшаһа гаршы галдырдығы гијама гошулду (2 Шам. 15:31; 16:15). Пис нијјәтләрини һәјата кечирмәк үчүн она өлүм арзулајан дүшмәнләрлә әһатә олундуғуну билән вә галхмаға белә һалы олмајан хәстәләнмиш падшаһы тәсәввүрүнүзә ҝәтирин (5-ҹи ајә).
12, 13. а) Давуд нәјә шүбһә етмирди? б) Еһтимала ҝөрә, Аллаһ Давуду неҹә мөһкәмләндирди?
12 Давудун Хиласкар олан Јеһова Аллаһа етибары сарсылмады. О, Јеһованын хәстәликдән әзаб чәкән садиг хидмәтчиләри барәдә демишди: «Рәбб дар ҝүнүндә ону гуртарар, јатаға дүшәндә Рәбб она дајаг олар, ону бүтүн хәстәликдән сағалдар» (Мәз. 41:1, 3). Фикир верин ки, Давуд бу ајәләрдә дә өз әминлијини ифадә едир. Давуд Јеһованын ону гуртараҹағына шүбһә етмирди. Јеһова ону неҹә гуртарды?
13 Падшаһ Давуд Јеһованын она мөҹүзәли шәкилдә шәфа верәҹәјини ҝөзләмирди. Әксинә, Јеһованын ‘она дајаг олаҹағына’, јәни хәстәлијинә таб ҝәтирә билсин дејә, она ҝүҹ-гүввә верәҹәјинә там әмин иди. Әлбәттә, Давудун белә көмәјә еһтијаҹы варды. О, үзүҹү хәстәликдән әлавә, барәсиндә пис шејләр данышан дүшмәнләрлә әһатә олунмушду (5, 6-ҹы ајәләр). Ола билсин, Јеһова Давуду мөһкәмләндирмәк үчүн јадына тәсәлливериҹи фикирләр салырды. Онун нөвбәти сөзләринә фикир верин: «Камил [«нөгсансыз», ЈД] олдуғум үчүн мәндән мөһкәм јапышдын» (12-ҹи ајә). Јәгин, Давуду мөһкәмләндирән фикирләрдән бири дә о иди ки, хәстәлијинә ҝөрә әлдән дүшмәсинә вә дүшмәнләринин онун һаггында пис данышмаларына бахмајараг, Јеһова ону нөгсансыз инсан сајырды. Ахырда Давуд сағалды. Мәҝәр Јеһованын јатаға дүшмүш хидмәтчиләринә һәмишә дајаг олдуғуну билмәк бизә тәсәлли вермирми? (2 Кор. 1:3).
Гида илә тәмин олунду
14, 15. Давуд вә онун адамларынын әрзаға еһтијаҹлары нә заман јаранды вә онлар һансы көмәји алдылар?
14 Давуд Исраилин падшаһы оланда ән ләзиз тәамлардан вә ичкиләрдән дадырды вә һәтта бир чохларыны сүфрәсинә гонаг едирди (2 Шам. 9:10). Амма о, гытлығын нә олдуғуну да билирди. Оғлу Авшалом һакимијјәти әлә кечирмәк үчүн гијам галдыранда Давуд бәзи садиг тәрәфдарлары илә бирҝә Јерусәлими тәрк етди. Онлар Иордан чајынын шәргинә, јәни Ҝилеада гачдылар (2 Шам. 17:22, 24). Гачаг кими јашамаг мәҹбуријјәтиндә галан Давуд чох кечмәмиш адамлары илә бирликдә јемәк-ичмәјә, еләҹә дә истираһәтә бөјүк еһтијаҹ дујду. Бәс онлар бурада әрзағы һарадан тапа биләрдиләр?
15 Давуд адамлары илә бирҝә Маханајим шәһәринә ҝәлиб чатды. Бурада онлар Шови, Макир вә Барзиллаја раст ҝәлдиләр. Бу үч мәрд адам Аллаһ тәрәфиндән тәјин едилән падшаһа көмәк етмәк үчүн һәјатларыны тәһлүкәјә атмаға һазыр иди, чүнки Авшалом һакимијјәти там әлә кечирсәјди, Давуда көмәк едән һәр кәси сәрт ҹәзаландырарды. Онлар Давудун вә тәрәфдарларынын дара дүшдүкләрини анлајараг онлара еһтијаҹ дујдуглары азугә вә диҝәр ләвазиматлары — дөшәкләр, буғда, арпа, говурға, пахла, мәрҹимәк, бал, вә гојун ҝәтирдиләр. (2 Шамуел 17:27-29 ајәләрини оху.) Шүбһә јохдур ки, бу үч адамын сон дәрәҹә садиглијини вә гонагпәрвәрлијини ҝөрән Давуд онлара үрәкдән миннәтдарлыг етди. Давуд онларын бу јахшылығыны унуда биләрдими?
16. Әслиндә Давуду вә онун адамларыны әрзагла тәмин едән ким иди?
16 Бәс әслиндә Давуду вә онун адамларыны әрзагла тәмин едән ким иди? Давуд Јеһованын Өз халгынын гајғысына галдығына әмин иди. Әлбәттә, Јеһова хидмәтчиләринә «тәкан верә», јәни тәшвиг едә биләр ки, онлар еһтијаҹ ичиндә олан һәмиманлыларына көмәк етсинләр. Давуд Ҝилеаддакы һадисәләр үзәриндә дүшүнәндә, шүбһәсиз, һәмин үч адамын хејирхаһлығынын Јеһованын гајғысынын тәзаһүрү олдуғуну ҝөрдү. О, һәјатынын сонуна јахын јазмышды: «Ҝәнҹлијимдән гоҹалығымадәк салеһин [өзү дә дахил олмагла] тәрк едилдијини, нәслинин чөрәк үчүн диләндијини ҝөрмәмишәм» (Мәз. 37:25). Мәҝәр Јеһованын әлинин гыса олмадығыны билмәк тәсәлливериҹи дејилми? (Сүл. мәс. 10:3).
Јеһова инсанлары «неҹә хилас етмәји... билир»
17. Јеһова дәфәләрлә нәји ҝөстәриб?
17 Давуд Јеһованын гәдим заманларда хилас етдији јеҝанә хидмәтчиси дејилди. Давудун ҝүнләриндән бәри Аллаһ һәвари Петерин јаздығы сөзләрин һәгигилијини дәфәләрлә ҝөстәриб: «Рәбб Она ихлас едәнләри [садиг оланлары] имтаһандан неҹә хилас етмәји... билир» (2 Пет. 2:9). Даһа ики нүмунәни нәзәрдән кечирәк.
18. Јеһова Хизгијанын ҝүнләриндә хидмәтчиләрини неҹә хилас етди?
18 Ерамыздан әввәл сәккизинҹи әсрдә гүдрәтли Ашшур ордусу Јәһудаја сохулуб Јерусәлими мүһасирәјә алмышды. Падшаһ Хизгија дуада Јеһоваја үз тутуб деди: «Еј Аллаһымыз Рәбб, инди исә јалварырам, бизи... гуртар вә бүтүн дүнја падшаһлыглары билсин ки, Рәбб јалныз Сәнсән!» (Јешаја 37:20). Хизгијаны ән чох Јеһованын ады нараһат едирди. Јеһова онун сәмими дуасыны ҹавабсыз гојмады. Бир ҝеҹәдә бир мәләк чыхыб Ашшур ордуҝаһында 185 000 нәфәри гырды вә бунунла Јеһованын садиг хидмәтчиләрини гуртарды (Јешаја 37:32, 36).
19. Биринҹи әсрин мәсиһчиләри Исанын һансы хәбәрдарлығына гулаг асмалары сајәсиндә дәһшәтли агибәтдән гуртардылар?
19 Иса өмрүнүн сонуна бир нечә ҝүн галмыш Јәһудејада јашајан шаҝирдләринә көмәк едәҹәк бир пејғәмбәрлик сөјләјиб хәбәрдарлыг етди. (Лука 21:20-22 ајәләрини оху.) Онилликләр өтдү. Ерамызын 66-ҹы илиндә јәһудиләрин гијамыны јатырмаг үчүн Сестиј Галлын башчылыг етдији Рома ордусу Јерусәлими мүһасирәјә алды. Онлар мәбәдин диварыны алтындан газмаға мүвәффәг олсалар да, гәфләтән ҝери чәкилдиләр. Мәсиһчиләр ҝөрдүләр ки, бунунла Исанын пејғәмбәрлији јеринә јетир вә фүрсәтдән истифадә едәрәк дағлара гачдылар. Ерамызын 70-ҹи илиндә Рома леҝионлары ҝери гајытды вә Јерусәлими јерлә јексан етмәјинҹә ҝери чәкилмәдиләр. Исанын хәбәрдарлығыны гулаг ардына вурмајанлар дәһшәтли агибәтдән гуртардылар (Лука 19:41-44).
20. Нәјә ҝөрә Јеһоваја Хиласкарымыз кими етибар едә биләрик?
20 Јеһованын Өз халгына неҹә көмәк етдији үзәриндә дүшүнәндә иманымыз мөһкәмләнир. Аллаһын кечмишдә етдикләри Она бел бағламағымыза там әсас верир. Һәмчинин бу бизи әмин едир ки, истәр инди, истәрсә дә ҝәләҹәкдә олсун, үзләшдијимиз һәр бир чәтинликдән Јеһова һәмишә бизи хилас едәҹәк. Бәс Јеһова буну неҹә едә биләр? Бу мәгаләнин әввәлиндә хатырланан үч адам һагда нә демәк олар? Онларын агибәти неҹә олду? Ҝәлин буну нөвбәти мәгаләдән өјрәнәк.
Јадыныздадырмы?
• 70-ҹи мәзмур бизи нәјә әмин едир?
• Јеһова јатаға дүшмүш Давуда неҹә дајаг олду?
• Һансы нүмунәләр ҝөстәрир ки, Јеһова халгыны дүшмәнләриндән гуртармаға гадирдир?
[6-ҹы сәһифәдәки шәкил]
Јеһова Хизгијанын дуасыны ҹавабсыз гојмады