Јеһоваја там ҝүвән. Вә өзүнү тәһлүкәсизликдә һисс ет
«Нә вахт Рәбби чағырсам, мәни ешидир» (МӘЗ 4:3).
1, 2. а) Давуд һансы тәһлүкәли вәзијјәтлә үзләшмишди? б) Бу мәгаләдә биз һансы мәзмурлары арашдыраҹағыг?
ДАВУД артыг нечә илләр иди ки, Исраил халгы үзәриндә һөкмранлыг едирди. Артыг аһыл јашларында олан падшаһ тәһлүкәли вәзијјәтә дүшмүшдү. Һијләҝәр оғлу Авшалом өзүнү падшаһ елан етдији үчүн о, Јерусәлими тәрк етмәк мәҹбуријјәтиндә иди. Бу, аз имиш кими, јахын досту она хәјанәт етди. Давуд бир нечә садиг тәрәфдарлары илә бирҝә ајагјалын вә ағлаја-ағлаја Зејтун дағына чыхды. Бундан сонра исә Шаулун нәслиндән олан Шимеј адлы бир нәфәр Давуду ләнәтләјә-ләнәтләјә она даш вә торпаг атырды (2 Шам. 15:30, 31; 16:5—14).
2 Давудун башына ҝәлән бу бәлалар ону кәдәр вә рүсвајчылыг ичиндә өлүләр дијарына ендирдими? Хејр. Чүнки о, Јеһоваја етибар едирди. Буну Авшаломдан гачмасы барәдә бәстәләдији үчүнҹү мәзмурдан ајдын ҝөрмәк олар. Дөрдүнҹү мәзмурун да мүәллифи Давуддур. Һәр ики мәзмурда Аллаһын дуалары ешитдијинә вә онлара ҹаваб вердијинә даир әминлик әкс олунур (Мәз. 3:4; 4:3). Бу мәзмурлар бизи әмин едир ки, Јеһова һәр ан садиг хидмәтчиләри иләдир; О, онлара дајаг олур вә тәһлүкә заманы гәлб раһатлығы бәхш едир (Мәз. 3:5; 4:8). Ҝәлин бу мәзмурлары арашдыраг вә ҝөрәк онлар бизә өзүмүзү тәһлүкәсизликдә һисс етмәјә вә Јеһоваја етибар етмәјә неҹә көмәк едир.
Чохлары ‘әлејһимизә галханда’
3. Мәзмур 3:1, 2 ајәләриндән ҝөрдүјүмүз кими, Давуд һансы вәзијјәтлә үзләшмишди?
3 Бир адам ҝәлиб Давуда хәбәр верди: «Исраиллиләр Авшалома рәғбәт бәсләјир» (2 Шам. 15:13). Авшаломун бу гәдәр адамы өз тәрәфинә неҹә чәкдијинә тәәҹҹүб едәрәк Давуд Јеһовадан сорушур: «Ја Рәбб, дүшмәнләрим нә гәдәр чохалыб? Әлејһимә галханлар нә гәдәр артыб? Мәним үчүн чохлары дејир: “Аллаһдан она хилас јохдур”» (Мәз. 3:1, 2). Бир чох исраиллиләр елә дүшүнүрдүләр ки, Јеһова Давуду Авшаломун вә онун тәрәфдарларынын әлиндән хилас етмәјәҹәк.
4, 5. а) Давуд нәјә әмин иди? б) «Башымы уҹалдан Сәнсән» ифадәсинин мәнасы нәдир?
4 Лакин Давуд Јеһоваја там ҝүвәндији үчүн өзүнү тәһлүкәсизликдә һисс едирди. О охујур: «Амма Сән, ја Рәбб, әтрафымда сипәрсән, шәрәфимсән, башымы уҹалдан Сәнсән!» (Мәз. 3:3). Давуд әмин иди ки, галхан әсҝәри горудуғу кими, Јеһова да ону мүдафиә едәҹәкдир. Дүздүр, гоҹалмыш падшаһ башыөртүлү һалда вә рүсвајчылыг ичиндә гачмышды, лакин Һагг-Таала онун вәзијјәтини дәјишиб әввәлки шан-шөһрәтини гајтараҹагды. Јеһова онун гамәтини дүзәлдәҹәк вә бир заманлар олдуғу кими, башыны уҹа едәҹәкди. Давуд Јеһовадан имдад диләјирди, чүнки дуаларынын ҹавабсыз галмајаҹағына әмин иди. Сәнин дә Јеһоваја олан етибарын белә ҝүҹлүдүр?
5 Давуд «башымы уҹалдан Сәнсән» демәклә сәбирсизликлә ҝөзләдији көмәјин Јеһовадан ҝәләҹәјинә даир әминлијини ифадә етмишди. Башга бир тәрҹүмәдә бу ајә белә сәсләнир: «Лакин Сән, ја Рәбб, һәмишә мәни тәһлүкәдән галхан кими горујурсан; мәнә зәфәр верирсән, ҹәсарәтими бәрпа едирсән» («Today’s English Version»). Бир китабда «башымы уҹалдан Сәнсән» ифадәси һагда дејилир: «Аллаһ киминсә “башыны” уҹалданда онун гәлбини үмид вә тәһлүкәсизлик һисси илә долдурур». Әлбәттә ки, тахт-таҹындан мәһрум олан Давудун мәјуслуға гапылмаға сәбәби варды. Лакин Јеһова онун ‘башыны уҹалданда’ онун ҹәсарәти бәрпа олунаҹаг, тәһлүкәсизлик һисси вә Аллаһа етибары мөһкәмләнәҹәкди.
Рәбб мәнә ҹаваб верир
6. Нәјә ҝөрә Давуд дејир ки, Јеһова онун дуасына мүгәддәс дағындан ҹаваб верир?
6 Давуд Јеһоваја етибар етдији вә дуаларына ҹаваб алаҹағына әмин олдуғу үчүн нөвбәти сөзләри дејир: «Рәбби уҹадан сәсләјирәм, О, мүгәддәс дағындан мәнә ҹаваб верир» (Мәз. 3:4). Јеһованын иштиракынын рәмзи олан Әһд сандығы, Давудун әмринә әсасән, Сион дағына ҝәтирилмишди. (2 Шамуел 15:23—25 ајәләрини оху.) Буна ҝөрә дә Давуд дејир ки, Јеһова онун дуасына мүгәддәс дағындан ҹаваб верир.
7. Нәјә ҝөрә Давуд һеч нәдән горхмурду?
7 Јеһоваја дуа етмәјин әбәс олмадығына әмин олан Давуд горхмурду. Әксинә, о охујурду: «Мән јатырам, јухуја ҝедирәм, јенә ојанырам, чүнки Рәбб мәнә көмәк едир» (Мәз. 3:5). Һәтта гәфил һүҹум еһтималы даһа јүксәк олан ҝеҹә вахты белә Давуд јатмаға горхмурду. О, сәһәр сағ-саламат ојанаҹағына зәррә гәдәр дә шүбһә етмирди, чүнки шәхси тәҹрүбәсиндән билирди ки, Јеһованын көмәјинә һәмишә ҝүвәнмәк олар. Әҝәр «Рәббин јолуну» тутсаг вә ондан һеч вахт дөнмәсәк, биздә дә белә әминлик олаҹаг. (2 Шамуел 22:21, 22 ајәләрини оху.)
8. Мәзмур 27:1—4 ајәләри Давудун Јеһоваја ҝүвәндијини неҹә ҝөстәрир?
8 Давудун бәстәләдији башга мәзмурдан да онун өзүнү тәһлүкәсизликдә һисс етдијини вә Јеһоваја там ҝүвәндијини ҝөрмәк олар. Орада јазылыб: «Рәбдир нурум, гуртулушум! Мән кимдән горхум? Рәбдир өмрүмүн галасы, мән кимдән ваһимәләним?.. Бир орду гаршымда дүзүлсә белә, үрәјим горхмаз... Рәбдән бир арзум, бир истәјим вар: бүтүн өмрүм боју Рәббин евиндә јашајым, мәбәдиндә Рәббин ҹамалына бахым, Она пәрәстиш едим» (Мәз. 27:1—4). Әҝәр сән онун һиссләринә шәриксәнсә вә шәраитин јол верирсә, һәмиманлыларынла бирҝә мүнтәзәм олараг јығынҹаг ҝөрүшләриндә иштирак едәҹәксән (Ибр. 10:23—25).
9, 10. Мәзмур 3:6, 7 ајәләриндә јазылан сөзләрә бахмајараг, нәјә әсасән демәк олар ки, Давуд һеч вахт гисас алмырды?
9 Авшаломун вә бир чох башга инсанларын Давуда хәјанәт етмәсинә бахмајараг, о охујурду: «Һәр јандан мәни мүһасирәјә алан он минләрлә халгдан горхмурам. Галх, ја Рәбб! Еј Аллаһым, мәни гуртар! Чүнки Сән бүтүн дүшмәнләримин әнҝиндән вурурсан, писләрин дишләрини гырырсан» (Мәз. 3:6, 7).
10 Давуд она едилән писликләрин әвәзини чыхмырды. Дүшмәнләрин ‘әнҝиндән вурмаг’ лазым ҝәләрдисә, буну Аллаһ едәҹәкди. Падшаһ Давуд өзү үчүн Ганунун сурәтини көчүрдүјүнә ҝөрә Јеһованын «гисас Мәнимдир, әвәзини Мән верәҹәјәм» әмриндән хәбәри вар иди (Ганун. т. 17:14, 15, 18; 32:35). ‘Писләрин дишләрини гырмаг’ ихтијары да Јеһоваја мәхсусдур. Бу, пислик едә билмәсинләр дејә онлары зәрәрсизләшдирмәк демәкдир. Јеһова кимләрин пис олдуғуну билир, ахы О, ‘үрәјә бахыр’ (1 Шам. 16:7). Јеһоваја неҹә дә миннәтдарыг ки, тезликлә үммана атылараг лајигли ҹәзасыны алаҹаг нәрә чәкән дишсиз аслана — пислијин башында дуран Шејтана мүгавимәт ҝөстәрмәјимиз үчүн бизә иман вә ҝүҹ верир (1 Пет. 5:8, 9; Вәһј 20:1, 2, 7—10).
«Гуртулуш Рәбдәндир»
11. Нәјә ҝөрә биз баҹы-гардашларымыз үчүн дуа етмәлијик?
11 Давуд дәрк едирди ки, еһтијаҹ дујдуғу гуртулушу она јалныз Јеһова вермәјә гадирдир. Лакин мәзмурчу тәкҹә өзү һагда јох, Јеһованын сечилмиш халгы барәдә дә дүшүнүрдү. Буна ҝөрә дә о, Аллаһдан илһам алараг јаздығы үчүнҹү мәзмура белә јекун вурур: «Гуртулуш Рәбдәндир, гој Сәнин хејир-дуан халгынын үзәриндә олсун!» (Мәз. 3:8). Давудун дәрди аз дејилди, буна бахмајараг, о, Аллаһын халгыны һеч вахт унутмурду вә әмин иди ки, Аллаһ Өз халгына хејир-дуа верәҹәк. Мәҝәр биз дә һәмишә һәмиманлыларымыз барәдә дүшүнмәли дејилик? Ҝәлин онлар һагда дуа етмәји унутмајаг вә Јеһовадан онлара мүгәддәс руһ вермәсини хаһиш едәк ки, ҹәсарәтлә вә Аллаһа там ҝүвәнәрәк хош хәбәри тәблиғ едә билсинләр (Ефес. 6:17—20).
12, 13. Авшаломун агибәти неҹә олду вә Давуда бу, неҹә тәсир етмишди?
12 Дөјүш заманы Авшаломун гошуну мәғлубијјәтә уғрады, өзү исә гатыра миниб гачды. Лакин онун галын сачлары бөјүк ағаҹын сых будагларына илишди вә о, көмәксиз вәзијјәтдә јерлә ҝөј арасында асылы галды. Јоав она чатанда әлинә үч мизраг алыб онун үрәјинә саплады (2 Шам. 18:6—17). Бәли, башгалары илә, хүсусилә дә Давуд кими Аллаһын мәсһ олунмушлары илә пис рәфтар едәнләр үчүн Авшаломун шәрәфсиз өлүмү бир хәбәрдарлыгдыр. (Сүлејманын мәсәлләри 3:31—35 ајәләрини оху.)
13 Давуд оғлунун өлүмү барәдә хәбәр тутанда севиндими? Јох. Әксинә, дәрддән өзүнә јер тапмајан Давуд отагда ојана-бу јана ҝедәрәк: «Оғлум Авшалом, оғлум, оғлум Авшалом! Каш сәнин јеринә мән өләјдим, оғлум! Оғлум, Авшалом!» — дејә һөнкүр-һөнкүр ағлајырды (2 Шам. 18:24—33). Јалныз Јоавын сөзләриндән сонра Давуд өзүнә ҝәлди. Худбин арзуларына гапылараг Јеһованын мәсһ олунмушу олан атасына гаршы чыхан, бунунла да башына бәла ачан Авшаломун агибәти неҹә дә пис олду! (2 Шам. 19:1—8; Сүл. мәс. 12:21; 24:21, 22).
Давудун Аллаһа етибары сарсылмыр
14. Дөрдүнҹү мәзмур барәдә нә демәк олар?
14 Үчүнҹү мәзмур кими, дөрдүнҹү мәзмур да Давудун сәмими дуасыдыр. Бу мәзмурдан да биз Давудун Јеһоваја там ҝүвәндијини ҝөрүрүк (Мәз. 3:4; 4:3). Еһтимал ки, Давуд бу нәғмәни Авшаломун гурдуғу суи-гәсд мүвәффәгијјәтсизлијә уғрајанда гәлбиндә дујдуғу раһатлығы ифадә етмәк вә Аллаһа миннәтдарлығыны билдирмәк үчүн бәстәләмишди. Јахуд да, ола билсин, о, бу нәғмәни левилиләр үчүн јазмышды. Һәр неҹә олурса-олсун, бу мәзмурун үзәриндә дүшүнмәк Јеһоваја етибарымызы даһа да мөһкәмләндирәҹәк.
15. Нәјә ҝөрә биз Иса Мәсиһин васитәсилә Јеһоваја әминликлә дуа едә биләрик?
15 Бу мәзмурда да Давуд Јеһоваја там етибар етдијини вә дуаларыны ешидиб онлара ҹаваб вердијинә әмин олдуғуну дејир. О охујур: «Сәни чағыранда мәнә ҹаваб вер, еј адил Аллаһым! Дара дүшән заман мәни ҝенишә чыхар, мәнә лүтф едиб дуама гулаг ас!» (Мәз. 4:1). Әҝәр салеһ инсан олсаг, биздә дә белә әминлик олаҹаг. «Адил» Аллаһ олан Јеһова салеһ хидмәтчиләриндән һеч вахт Өз хејир-дуасыны әсирҝәмир. Буна ҝөрә дә биз Иса Мәсиһин фидјә гурбанлығына иман ҝәтирәрәк онун васитәсилә әминликлә Јеһоваја дуада мүраҹиәт едә биләрик (Јәһ. 3:16, 36). Бунун ҝәтирдији гәлб раһатлығыны сөзлә ифадә етмәк мүмкүн дејил!
16. Давудун гәлб раһатлығыны алан нә иди?
16 Бәзән үзләшдијимиз вәзијјәтләр бизим гәлб раһатлығымызы ала биләр. Давуд да бир мүддәт белә һала дүшмүшдү. О охујурду: «Еј инсан өвладлары, нә вахтадәк шәрәфими рүсвајчылыға чевирәҹәксиниз? Нә вахтадәк бош шејләрә мејл ҝөстәриб, јалан ахтараҹагсыныз?» (Мәз. 4:2). Ҝөрүнүр, «инсан өвладлары» ифадәси мәнфи мәнада бүтүн бәшәријјәтә аиддир. Давуда дүшмән кәсилмиш адамлар ‘бош шејләрә мејл ҝөстәрирдиләр’. Бир Мүгәддәс Китаб тәрҹүмәсиндә бу ајә белә сәсләнир: «Нә вахтадәк сиз јаланы севәҹәксиниз вә сахта аллаһлары ахтараҹагсыныз?» («New International Version»). Башгаларынын етдикләри бизи руһдан салса да, ҝәлин үрәкдән Јеһоваја дуа етмәјә вә ваһид һәгиги Аллаһымыза там ҝүвәнмәјә давам едәк.
17. Мәзмур 4:3 ајәсиндә јазыланлара әсасән, биз неҹә даврана биләрик? Изаһ ет.
17 Давудун Јеһоваја етибар етдијини нөвбәти сөзләриндән дә ҝөрмәк олар: «Билин ки, мөмин инсаны Рәбб Өзү үчүн ајырыб; нә вахт Рәбби чағырсам, мәни ешидир» (Мәз. 4:3). Аллаһа садиг галмаг үчүн биз ҹәсарәтли олмалы вә Она там етибар етмәлијик. Бу хүсусијјәтләр төвбә етмәјән гоһумлары јығынҹагдан хариҹ едилән мәсиһчи аиләләринә хүсусилә лазымдыр. Јеһова Она вә јолларына садиг галан хидмәтчиләринә хејир-дуа верир. Ҹәсарәт вә Јеһоваја там етибар исә, өз нөвбәсиндә, Онун халгы арасында севинҹә сәбәб олур (Мәз. 84:11, 12).
18. Кимсә сәрт сөзү вә ја һәрәкәти илә гәлбимизә дәјибсә, Мәзмур 4:4 ајәсинә әсасән, нә етмәлијик?
18 Бәс әҝәр киминсә сөзү вә ја һәрәкәти бизи мәјус едирсә, онда неҹә? Давудун дедији кими даврансаг, севинҹимизи итирмәјәҹәјик. О демишди: «Горхуб-титрәјин, ҝүнаһ етмәјин, јатағынызда оларкән үрәјиниздә дүшүнүн, динмәјин» (Мәз. 4:4). Әҝәр киминсә сәрт сөзү вә ја һәрәкәти гәлбимизә тохунубса, ҝәлин һеч вахт бунун әвәзини чыхмаға чалышараг ҝүнаһа јол вермәјәк (Ром. 12:17—19). Ҝәлин Давудун дедији кими, ‘јатағымызда’ оларкән һиссләримизи Јеһова илә бөлүшәк. Әҝәр бизи нараһат едән мәсәлә барәдә дуа етсәк, она башга ҝөзлә бахаҹағыг вә хәтримизә дәјән инсаны мәһәббәтдән ирәли ҝәләрәк бағышлајаҹағыг (1 Пет. 4:8). Һәвари Павелин бунунла бағлы вердији мәсләһәт диггәтәлајигдир. О јазыр: «Гәзәбләнсәниз дә ҝүнаһ ишләмәјин; гој һирсиниз ҝүн батмамыш сојусун, Иблисә фүрсәт вермәјин» (Ефес. 4:26, 27). Еһтимал ки, бу мәсләһәт Мәзмур 4:4 ајәсинә әсасланыр.
19. Мәзмур 4:5 ајәсинә әсасән, руһани гурбанлар ҝәтирәркән нәји јадда сахламалыјыг?
19 Аллаһа етибар етмәјин ваҹиблијини вурғулајараг Давуд охујур: «Салеһлик гурбанлары кәсин, Рәббә ҝүвәнин» (Мәз. 4:5). Гурбанлары Аллаһа мәгбул олмасы үчүн исраиллиләр онлары дүзҝүн нијјәтдән ирәли ҝәләрәк ҝәтирмәли идиләр (Јешаја 1:11—17). Әҝәр руһани гурбанларымызын Аллаһа мәгбул олмасыны истәјириксә, бизим дә нијјәтләримиз дүзҝүн олмалыдыр вә Аллаһа там етибар етмәлијик. (Сүлејманын мәсәлләри 3:5, 6; Ибраниләрә 13:15, 16 ајәләрини оху.)
20. «Рәббин үзүнүн нуру» ифадәси нәји билдирир?
20 Давуд давам едир: «Чохлары дејир: “Ким бизә јахшылыг едәҹәк?” Ја Рәбб, үзүнүн нуруну үстүмүзә сал» (Мәз. 4:6). «Рәббин үзүнүн нуру» ифадәси Аллаһын лүтфүнү билдирир (Мәз. 89:15). Беләликлә, Давуд: «Үзүнүн нуруну үстүмүзә сал», — дејә дуа едәндә Јеһовадан она «лүтф ҝөстәрмәсини» хаһиш едирди. Биз дә Јеһоваја етибар едирик, буна ҝөрә О, бизә лүтф ҝөстәрир вә Онун ирадәсини јеринә јетирмәк бизә севинҹ верир.
21. Руһани бичин ишиндә фәал сурәтдә иштирак едириксә, нәјә әмин ола биләрик?
21 Давуд Јеһованын верәҹәји севинҹи ҝөзләјирди, чүнки бу севинҹ инсанларын бичин вахты дујдуғу севинҹдән даһа бөјүк иди. О охујурду: «Онларын бол тахыл вә тәзә шәраба ҝөрә севиндикләриндән дә чох мәним гәлбимә севинҹ вердин» (Мәз. 4:7). Әҝәр һал-һазырда ҝедән руһани бичиндә фәал иштирак едириксә, бизим дә үрәјимиз севинҹдән долуб-дашаҹаг (Лука 10:2). Биз чох шадыг ки, чохсајлы ‘милләт’ олан мәсһ олунмушларын бу ишә рәһбәрлик етмәләри сајәсиндә «бичинчи»ләрин сајы ҝүнү-ҝүндән артыр (Јешаја 9:3). Бу севиндириҹи ишдә сән дә үрәкдән иштирак едирсәнми?
Јеһоваја там етибар едәрәк ирәли!
22. Мәзмур 4:8 ајәсиндән ҝөрдүјүмүз кими, исраиллиләр Аллаһын ганунларына риајәт едәндә неҹә јашајырдылар?
22 Давуд дөрдүнҹү мәзмура белә јекун вурур: «Архајын јатыб јухуја ҝедирәм, чүнки јалныз Сән, ја Рәбб, мәни әмин-аманлыгда јашадырсан!» (Мәз. 4:8). Исраиллиләр Јеһованын ганунларына әмәл едәндә Онунла мүнасибәтләри јахшы иди вә өзләрини тәһлүкәсизликдә һисс едирдиләр. Мәсәлән, Сүлејманын һөкмранлыг етдији дөвр барәдә Мүгәддәс Китабда дејилир: «Јәһуда вә Исраилдә һәр кәс... динҹлик ичиндә јашајырды» (1 Пад. 4:25). Һәтта гоншу халглар онлара әдавәтли мүнасибәт ҝөстәрәндә белә Аллаһа етибар едәнләр өзләрини тәһлүкәсизликдә һисс едирдиләр. Давуд кими, биз дә раһат јатырыг, чүнки Аллаһ бизә тәһлүкәсизлик һисси верир.
23. Әҝәр Јеһоваја там етибар едириксә, һансы һиссләри кечирәҹәјик?
23 Ҝәлин бундан сонра да әминликлә Јеһоваја хидмәт едәк. Һәмчинин ҝәлин иманла дуа едәк, онда бүтүн инсан фикирләрини үстәләјән «Аллаһын вердији гәлб раһатлығы»ны һисс едәҹәјик (Филип. 4:6, 7). Вә гәлбимиз, һәгигәтән дә, севинҹлә долаҹаг! Үстәлик, әҝәр Јеһоваја һәмишә етибар етсәк, ҝәләҹәјә әминликлә бахаҹағыг.
Неҹә ҹаваб верәрдиниз?
• Давудун башына оғлу Авшаломун уҹбатындан нәләр ҝәлмишди?
• Үчүнҹү мәзмура әсасән, нәјә ҝөрә өзүмүзү тәһлүкәсизликдә һисс етмәјә әсас вар?
• Дөрдүнҹү мәзмур Јеһоваја олан етибарымызы неҹә мөһкәмләндирир?
• Јеһоваја там етибар етсәк, һансы хејир-дуалары бичәҹәјик?
[29-ҹу сәһифәдәки шәкил]
Авшаломдан гачмалы олса да, Давуд Јеһоваја там ҝүвәнирди
[32-ҹи сәһифәдәки шәкилләр]
Сән Јеһоваја там етибар едирсән?