Јеһова Хиласкарымыздыр

‘Рәбб онларын имдадына чатыр, онлары гуртарыр’ (МӘЗ. 37:40).

1, 2. Јеһова һаггында һансы данылмаз һәгигәт әсл тәсәлли вә гүввә мәнбәјидир?

ҜҮНӘШИН салдығы көлҝә бир јердә дурмур. Јер күрәси һәрәкәт етдикҹә көлҝә даима һәрәкәт едир вә дәјишилир. Јерин вә Ҝүнәшин Јараданы исә һеч заман дәјишмир (Мал. 3:6). Онун һаггында Мүгәддәс Китабда дејилир: «Онда нә дәјишиклик вар, нә дә дөнүклүк көлҝәси» (Јаг. 1:17). Јеһова һаггындакы бу данылмаз һәгигәт, хүсусилә дә чәтин сынаг вә проблемләрлә үзләшәндә бизим үчүн әсл тәсәлли вә гүввә мәнбәјидир. Нә үчүн?

² Әввәлки мәгаләдән ҝөрдүјүмүз кими, Јеһова гәдим заманларда Өз халгыны хилас едирди (Мәз. 70:5). Аллаһ дәјишмәз вә сөзүнә садиг олдуғуна ҝөрә хидмәтчиләри әмин ола биләрләр ки, ‘онларын имдадына чатаҹаг, онлары гуртараҹаг’ (Мәз. 37:40). Јеһова мүасир хидмәтчиләрини неҹә гуртарыр? Бәс шәхсән бизи неҹә гуртарыр?

Дүшмән әлиндән гуртулуш

3. Нәјә ҝөрә әмин ола биләрик ки, дүшмәнләр Јеһованын халгынын тәблиғ ишини дајандыра билмәјәҹәкләр?

³ Ибадәтә јалныз вә јалныз Јеһова Аллаһ лајигдир вә Шејтан нә гәдәр чалышса да, Јеһованын Шаһидләринин Она хидмәт етмәләрини һеч вахт дајандыра билмәјәҹәк. Аллаһын Кәламы бизи әмин едир: «Сәнә гаршы ишләнән һеч бир силаһ ишә јарамајаҹаг. Мәһкәмәдә сәни тәгсирләндирән һәр бир кәси тәгсиркар чыхараҹагсан» (Јешаја 54:17). Дүшмәнләр Аллаһын халгынын јеринә јетирдији тәблиғ ишини дајандырмаға ҹәһд ҝөстәрсәләр дә, мәгсәдләринә наил ола билмәмишләр. Ики нүмунәни нәзәрдән кечирәк.

4, 5. Јеһованын халгы 1918-ҹи илдә һансы мүгавимәтләрлә үзләшди вә бунун нәтиҹәси нә олду?

⁴ Јеһованын халгы 1918-ҹи илдә ҝүҹлү тәгибләрлә үзләшди. Бунун архасында онлары сусдурмаг мәгсәдини ҝүдән дин хадимләри дурурду. Мајын 7-дә Бирләшмиш Штатларын федерал һакимијјәт даирәләри о вахтлар үмумдүнја тәблиғ ишинә нәзарәт едән Ҹозеф Рутерфордун вә мәркәзи идарәнин бир сыра әмәкдашларынын һәбс едилмәси барәдә әмр имзалады. Ики ај әрзиндә Рутерфорд гардаш вә онун әмәкдашлары һагсыз олараг дөвләтә гаршы суи-гәсд һазырламагда иттиһам олундулар вә узунмүддәтли һәбсә мәһкум едилдиләр. Дүшмәнләр мәһкәмәдән истифадә едиб тәблиғ ишини һәмишәлик дајандырмаға мүвәффәг олдулармы? Әлбәттә ки, јох!

⁵ Јеһованын вәдини хатырлајын: «Сәнә гаршы ишләнән һеч бир силаһ ишә јарамајаҹаг». Ҝөзләнилмәдән һәр шеј дәјишилди: 1919-ҹу ил мартын 26-да, Рутерфорд гардаш вә онун әмәкдашларынын һәбс олунмаларындан 9 ај кечәндән сонра, ҝиров вериб азадлыға бурахылдылар. Нөвбәти ил мајын 5-дә онлара гаршы галдырылан иш дајандырылды. Гардашлар азадлыға чыхыб Падшаһлыг ишини фәал давам етдирмәјә башладылар. Бу, һансы бәһрәләри ҝәтирди? О вахтдан бәри бу иш бөјүк вүсәт алмагдадыр! Бунлара ҝөрә бүтүн иззәт Хиласкарымыз олан Јеһова Аллаһа мәхсусдур (1 Кор. 3:7).

6, 7. а) Насист Алманијасында Јеһованын Шаһидләри һансы сынагларла үзләшмишдиләр вә бунун нәтиҹәси нә олду? б) Јеһованын Шаһидләринин мүасир тарихи нәји сүбут едир?

⁶ Инди исә кечәк икинҹи нүмунәјә. 1934-ҹү илдә Һитлер анд ичди ки, Алманијада Јеһованын Шаһидләринин көкүнү кәсәҹәк. О, бош-бошуна һәдә-горху ҝәлмирди. Бундан сонра гардашлары өлкәнин һәр јериндә һәбс етмәјә башладылар. Минләрлә Шаһид тәгиб олунурду. Јүзләрлә баҹы-гардаш һәбс дүшәрҝәләриндә гәтлә јетирилирди. Һитлер Алманијада Шаһидләрин көкүнү кәсмәјә вә хош хәбәрин тәблиғини дајандырмаға мүвәффәг олдуму? Гәтијјән! Тәгибләр заманы гардашларымыз ҝизлиҹә тәблиғ едирдиләр. Насист режими сүгута уғрадыгдан сонра бу гардашлар азадлыгдан истифадә едәрәк тәблиғ фәалијјәтләрини давам етдирдиләр. Бу ҝүн Алманијада 165 000-дән чох тәблиғчи вар. Јенә дә Хиласкарымыз олан Јеһова Өз сөзүнә садиг чыхды: «Сәнә гаршы ишләнән һеч бир силаһ ишә јарамајаҹаг».

⁷ Јеһованын Шаһидләринин мүасир тарихи сүбут едир ки, Јеһова һеч вахт халгынын көкүнүн кәсилмәсинә јол вермәјәҹәк (Мәз. 116:15). Бәс ајры-ајрылыгда һәр биримиз барәдә нә демәк олар? Јеһова шәхсән бизи неҹә горујур?

Физики тәһлүкәсизлијимиз барәдә нә демәк олар?

8, 9. а) Һарадан билирик ки, һәр биримизин физики тәһлүкәсизлији һәмишә тәмин олунмур? б) Биз нәји етираф етмәлијик?

⁸ Биз билирик ки, Јеһова һәр биримизин ајры-ајрылыгда физики тәһлүкәсизлијини һәмишә тәмин едәҹәјинә сөз вермәмишди. Биз падшаһ Навуходоносорун гојдуғу гызыл һејкәлә ибадәт етмәкдән имтина едән үч садиг јәһудинин нөгтеји-нәзәри илә разыјыг. Аллаһдан горхан бу ҝәнҹләр Јеһованын онлары мөҹүзәли шәкилдә физики зәрәрдән горујаҹағыны дүшүнмүрдүләр. (Даниел 3:17, 18 ајәләрини оху.) Амма Јеһова онлары гызмар собадан хилас етди (Дан. 3:21-27). Һәтта Мүгәддәс Китабын јазылдығы дөврләрдә Аллаһ чох надир һалларда хидмәтчиләрини мөҹүзәли шәкилдә хилас едиб. Јеһованын бир чох садиг хидмәтчиләри дүшмән әлиндән өлүбләр (Ибр. 11:35-37).

⁹ Бәс бу ҝүн неҹә? Әлбәттә, Хиласкарымыз Јеһова Аллаһ адамы тәһлүкәли вәзијјәтләрдән гуртара биләр. Бәс Јеһованын конкрет һалларда мүдахилә едиб-етмәдијини гәти шәкилдә дејә биләрикми? Хејр. Бунунла белә, тәһлүкәли вәзијјәтләрдән гачан адам фикирләшә биләр ки, она Јеһова көмәк етди. Башгаларынын онунла бу барәдә мүбаһисә етмәси ловғалыг оларды. Лакин етираф етмәлијик ки, бир чох садиг мәсиһчиләр, насистләрин дөврүндә олдуғу кими, тәгибләр заманы гәтлә јетирилмишдиләр. Диҝәрләри бәдбәхт һадисәләр нәтиҹәсиндә һәјатларыны итирмишләр (Ваиз 9:11). Бу биздә суал доғура биләр: Јеһова һәмин садиг инсанлары хилас етмәјә мүвәффәг олмадымы? Бу, гәтијјән белә дејил.

10, 11. Нәјә ҝөрә инсан өлүм гаршысында аҹиздир, лакин Јеһова нәјә гадирдир?

¹⁰ Ҝәлин бир шејә фикир верәк: инсан өлүм гаршысында аҹиздир, чүнки һеч кәс «ҹаныны өлүләр дијарынын пәнҹәсиндән» ‘гуртара’ билмәз (Мәз. 89:48). Бәс Јеһова буна гадирдирми? Насист террорундан сағ чыхмыш бир баҹы хатырлајыр ки, дүшәрҝәдә әзизләрини итирдијинә ҝөрә она тәсәлли вермәк үчүн Јеһованын Шаһиди олан анасы деди: «Әҝәр өлүм әбәди олсајды, о, Аллаһдан да ҝүҹлү оларды, елә дејилми?» Тәбии ки, өлүм һәјат мәнбәји олан Күлли-Ихтијар Јеһова Аллаһдан ҝүҹлү дејил! (Мәз. 36:9). Өлүләр дијарында оланларын һамысы Јеһованын јаддашындадыр вә О онларын һәр бирини гуртараҹаг (Лука 20:37, 38; Вәһј 20:11-14).

¹¹ Јеһова бу ҝүн дә Өз садиг хидмәтчиләринин гајғысына галыр. Ҝәлин ҝөрәк О, үч мүхтәлиф һалда хидмәтчиләрини неҹә горујур.

Руһани тәһлүкәсизлик

12, 13. Нәјә ҝөрә руһани тәһлүкәсизлик ән ваҹиб шејдир вә Јеһова белә тәһлүкәсизлијимизи неҹә тәмин едир?

¹² Јеһова бизи ән ваҹиб олан руһани тәһлүкәсизликлә тәмин едир. Бир һәгиги мәсиһчи кими анлајырыг ки, һәјатымыздан вә һәр шејдән даһа дәјәрли олан бир шеј вар. Бу, Јеһова илә шәхси мүнасибәтимиздир (Мәз. 25:14; 63:3). Әҝәр бу мүнасибәтимиз олмасајды, һәјатымызын мәнасы вә ҝәләҹәјә һеч бир үмидимиз олмазды.

¹³ Хошбәхтликдән, Јеһова Онунла сых мүнасибәтимизи горумаг үчүн бизи һәр шејлә тәмин едир. Биз Онун Кәламынын, мүгәддәс руһунун вә үмумдүнја јығынҹағынын көмәјинә маликик. Бәс бунлардан даһа јахшы неҹә фајдалана биләрик? Онун Кәламыны мүнтәзәм вә чалышганлыгла өјрәнмәклә иманымызы вә үмидимизи мөһкәмләндирәҹәјик (Ром. 15:4). Дуада сәмими-гәлбдән Ондан мүгәддәс руһ диләсәк, Онунла мүнасибәтимизә зәрәр вураҹаг һәр бир шејә мүгавимәт ҝөстәрмәк үчүн ҝүҹ әлдә едәҹәјик (Лука 11:13). Гул синфинин Мүгәддәс Китаба әсасланан нәшрләри, јығынҹаг ҝөрүшләри вә конгресләр васитәсилә тәгдим етдији рәһбәрлијә даима риајәт етмәклә биз «вахтлы-вахтында» верилән руһани јемәкдән фајдаланаҹағыг (Мат. 24:45). Белә гида бизи руһани зәрәрдән горујур вә Аллаһымыза бағлы галмаға көмәк едир (Јаг. 4:8).

14. Јеһованын бизи руһани ҹәһәтдән неҹә горудуғуну ҝөстәрән бир нүмунә данышын.

¹⁴ Јеһованын руһани тәһлүкәсизлијимизин неҹә гејдинә галдығыны ҝөрмәк үчүн ҝәлин әввәлки мәгаләнин башланғыҹында хатырланан нүмунәјә гајыдаг. Онларын гызы Терезанын иткин дүшмәсиндән бир неҹә ҝүн сонра онун гәтлә јетирилдијиндән хәбәр тутдуларa. Терезанын атасы хатырлајыр: «Јеһова ону горусун дејә дуа едирдим. Гызымызын өлдүрүлдүјүнү биләндә, етираф етмәлијәм ки, нәјә ҝөрә дуаларымын ҹавабсыз галдығыны әввәлҹә баша дүшмүрдүм. Әлбәттә, билирәм ки, Јеһова һәр бир хидмәтчисини ајры-ајрылыгда бүтүн тәһлүкәләрдән мөҹүзәли шәкилдә горујаҹағыны сөз вермәјиб. Анлајыш үчүн тәкидлә дуа едирдим. Јеһованын халгыны руһани ҹәһәтдән горудуғуну, јәни Онунла мүнасибәтимизи горумаг үчүн бизи лазым олан шејләрлә тәмин етдијини билмәк мәнә тәскинлик верди. Белә мүдафиә даһа ваҹибдир, чүнки әбәди ҝәләҹәјимиз Онунла мүнасибәтимиздән асылыдыр. Јеһова Терезаны мәһз бу мәнада горуду. О, өлүмүнәдәк Јеһоваја садиг галды. Гызымын ҝәләҹәк һәјатынын Јеһованын гајғыкеш әлләриндә олдуғуну билмәк мәнә гәлб раһатлығы ҝәтирир».

Јеһова јатаға дүшәнә дајагдыр

15. Әҝәр ҹидди хәстәјиксә, Јеһова бизә неҹә көмәк едә биләр?

¹⁵ ‘Јатаға дүшән’ Давудла олдуғу кими, Јеһова бизә дә дајаг ола биләр (Мәз. 41:3). Аллаһ бу ҝүн бизә мөҹүзәли шәкилдә шәфа вермәсә дә, бизи дарда гојмур. О буну неҹә едир? Онун Кәламында јазылан принсипләр мүалиҹәмизлә вә диҝәр мәсәләләрлә бағлы гәрарлар гәбул едәндә бизә чох көмәк едә биләр (Сүл. мәс. 2:6). «Ҝөзәтчи Гүлләси» вә «Ојанын!» журналларында сәһһәтимиздәки проблемләрлә бағлы мәгаләләрдән дәјәрли мәлуматлар вә мәсләһәтләр тапа биләрик. Вәзијјәтимизә таб ҝәтирмәк вә һәр нә баш версә дә, Она садиг галмаг үчүн Јеһова мүгәддәс руһу васитәсилә бизә «ән үстүн гүдрәт» верә биләр (2 Кор. 4:7). Белә көмәјин сајәсиндә биз Јеһова илә мүнасибәтимизин икинҹи јерә кечәҹәји дәрәҹәдә хәстәлијимизә алудә олмајаҹағыг.

16. Бир гардаш өз хәстәлијинә неҹә таб ҝәтирир?

¹⁶ Өтән мәгаләнин әввәлиндә хатырланан ҝәнҹин нүмунәсини јада салаг. 1998-ҹи илдә она, әввәл-ахыр инсаны там ифлиҹ вәзијјәтә ҝәтириб чыхаран јан амиотрофик склероз диагнозу гојулдуb. О, хәстәлијинә неҹә таб ҝәтирә биләрди? Гардаш дејир: «Јеҝанә чыхыш јолумун өлүм олдуғуну дүшүнәндә бәзән мәни гәм-гүссә бүрүјүр. Өзүмү әзҝин һисс едәндә Јеһовадан дуада үч шеј истәјирәм: гәлб раһатлығы, сәбир вә тәһәммүл. Јеһованын дуаларыма неҹә ҹаваб вердијини ҝөрүрәм. Гәлбим раһат оланда мәнә тәсәлли верән шејләр һагда дүшүнүрәм: ҝөрәсән, мән ҝәзә, дадлы јемәкләр јејә вә доғмаларымла даныша биләндә јени дүнјада һәјат неҹә олаҹаг? Сәбир хәстәлијимлә бағлы нараһатчылыглара вә әзаблара дөзмәјимә көмәк едир. Тәһәммүл исә мәнә садиг галмаға көмәк едир вә гојмур ки, нә исә Јеһова илә мүнасибәтимдән мәним үчүн даһа ваҹиб олсун. Мән мәзмурчу Давудун сөзләри илә тамамилә разыјам, чүнки «јатаға дүшәндә» Јеһованын мәнә неҹә ‘дајаг олдуғуну’ ҝөрмүшәм» (Јешаја 35:5, 6).

Гида илә тәмин олунуруг

17. Јеһова бизим үчүн нә етмәји вәд едиб вә бу вәдин мәғзи нәдир?

¹⁷ Јеһова мадди тәләбатларымызын гејдинә галаҹағыны вәд едир. (Матта 6:33, 34 вә Ибраниләрә 13:5, 6 ајәләрини оху.) Лакин бу, еһтијаҹларымызын мөҹүзәли шәкилдә тәмин едиләҹәји, јахуд ишләмәкдән бојун гачырмалы олдуғумуз мәнасыны вермир (2 Салон. 3:10). Аллаһын вәдинин мәғзи беләдир: әҝәр илк нөвбәдә Аллаһын Падшаһлығыны ахтарырыгса вә өзүмүзү тәмин етмәк үчүн ишләмәјә һазырыгса, үмид едә биләрик ки, Јеһова һәјат үчүн лазым олан шејләри әлдә етмәјимизә көмәк едәҹәк (1 Салон. 4:11, 12; 1 Тим. 5:8). О, еһтијаҹ дујдуғумуз шејләри зәнн етмәдијимиз тәрздә верә биләр. Мәсәлән, һәмиманлымыз көмәк әлини узада, јахуд иш тәклиф едә биләр.

18. Јеһованын мадди тәләбатларымызын гајғысына галдығына даир нүмунә чәкин.

¹⁸ Кечән мәгаләнин әввәлиндә хатырланан ананы јадымыза салаг. О, гызы илә башга јерә көчәндә иш тапмагда чәтинлик чәкирди. О дејир: «Сәһәрләр хидмәтә ҝедирдим, ҝүнортадан сонра исә иш далынҹа дүшүрдүм. Әрзаг дүканына сүд алмаға ҝетдијим ҝүнү һеч вахт унутмајаҹам. Орада дуруб тәрәвәзләрә бахырдым, амма онлары алмаға пулум чатмырды. Өзүмү һәлә һеч вахт белә мәјус һисс етмәмишдим. О ҝүн евә гајыданда гапымын ҝирәҹәјиндә ағзынаҹан ҹүрбәҹүр тәрәвәзләрлә долу зәнбилләр ҝөрдүм. Бунлар бир нечә ај бәс едәрди. Ҝөзләрим јашарды вә Јеһоваја миннәтдарлығымы билдирдим». Тезликлә баҹы өјрәнди ки, һәмин зәнбилләри тәрәвәз јетишдирән бир гардаш ҝәтирмишди. Бир гәдәр сонра баҹы она јазды: «О ҝүн сәнә чох тәшәккүр етдијимә бахмајараг, Јеһоваја да чох сағ ол дедим ки, сәнин хејирхаһлығын васитәсилә мәнә Өз мәһәббәтини хатырлатды» (Сүл. мәс. 19:17).

19. Бөјүк мәшәггәтдә Јеһованын хидмәтчиләринин һансы әминлији олаҹаг вә биз нә етмәјә гәти гәрарлы олмалыјыг?

¹⁹ Јеһованын кечмишдә вә бизим ҝүнләрдә етдикләри бизи даһа чох әмин едир ки, Онун көмәјинә һәр заман бел бағлаја биләрик. Тезликлә Шејтан дүнјасы бөјүк мәшәггәтлә үз-үзә ҝәләндә Јеһованын көмәјинә даһа чох еһтијаҹымыз олаҹаг. Һәтта о заман Јеһованын хидмәтчиләри там әминликлә Она үз тутаҹаглар. Онлар гуртулушларынын јахын олдуғуну биләрәк башларыны јухары галдырыб севинәҹәкләр (Лука 21:28). Нә гәдәр ки бу системдә јашајырыг, ҝәлин, сынаглардан асылы олмајараг, Јеһоваја там етибар етмәјә гәтијјәтли олаг вә аз да олса шүбһә етмәјәк ки, дәјишмәјән Аллаһымыз бизим Хиласкарымыздыр.

[Һашијәләр]

Јадыныздадырмы?

• Јеһова вахтсыз өлән хидмәтчиләрини неҹә хилас едәҹәк?

• Нәјә ҝөрә руһани тәһлүкәсизлик даһа ваҹибдир?

• Јеһованын мадди тәләбатларымызын гајғысына галаҹағы вәди нә демәкдир?

[8-ҹи сәһифәдәки шәкил]

1918-ҹи илдә һәбс едилән Рутерфорд гардаш вә онун әмәкдашлары мүәјјән вахтдан сонра азадлыға бурахылдылар вә онлара гаршы галдырылан иш дајандырылды

[10-ҹу сәһифәдәки шәкил]

Јеһова ‘јатаға дүшәнләрә’ дајаг ола биләр