Јеһова рифаһымыз үчүн бизи мүшаһидә едир
«Рәббин ҝөзләри јер үзүнү сејр едир ки, үрәји бүтүнлүклә Онунла оланлары гүввәтләндирсин» (2 САЛН. 16:9).
1. Јеһова бизи нә үчүн јохлајыр?
ЈЕҺОВА камил Атадыр. О бизи о гәдәр јахшы таныјыр ки, һәтта ‘ағлымызын бүтүн истәкләрини’ дә билир (1 Салн. 28:9). Амма Јеһова биздә садәҹә бир нөгсан тутмаг үчүн бизи јохламыр (Мәз. 11:4; 130:3). Әксинә, бизи Онунла мүнасибәтләримизә, јахуд әбәди һәјат үмидимизә зәрәр вураҹаг һәр шејдән мәһәббәтлә мүдафиә етмәк истәјир (Мәз. 25:8-10, 12, 13).
2. Јеһова Өз ҝүҹүндән кимләрин рифаһы үчүн истифадә едир?
2 Јеһова һәр шејә гадирдир вә һәр шеји ҝөрүр. Буна ҝөрә дә, садиг хидмәтчиләри Ону көмәјә чағырдыглары һәр ан имдадларына чата вә сынаглар заманы онлара дајаг ола биләр. 2 Салнамәләр 16:9 ајәсиндә дејилир: «[Јеһованын] ҝөзләри јер үзүнү сејр едир ки, үрәји бүтүнлүклә Онунла оланлары гүввәтләндирсин». Фикир вер ки, Јеһова Өз ҝүҹүндән Она бүтүн үрәклә, јәни саф вә сәмими нијјәтлә хидмәт едәнләрин рифаһы үчүн истифадә едир. О, фитнәкарлара вә икиүзлүләрә бу ҹүр гајғы ҝөстәрмир (Јешуа 7:1, 20, 21, 25; Сүл. мәс. 1:23-33).
Аллаһла јери
3, 4. ‘Аллаһ илә јеримәк’ нә демәкдир вә Мүгәддәс Китабдан һансы нүмунәләр буну баша дүшмәјимизә көмәк едир?
3 Бир чохлары үчүн бөјүк каинаты Јараданын инсанлара руһани мәнада Онунла јеримәјә иҹазә вермәси ағласығмаздыр. Амма Јеһова бизим мәһз белә етмәјимизи истәјир. Гәдим заманларда Ханок вә Нуһ ‘Аллаһ илә јеријирдиләр’ (КМ) (Јар. 5:24; 6:9). Муса «Ҝөрүнмәјәни ҝөрүрмүш кими, мөһкәм дајанды» (Ибр. 11:27). Падшаһ Давуд тәвазөкарлыгла сәмави Атасы илә санки јанашы јеријирди. О демишди: «[Јеһова] сағымда олдуғу үчүн сарсылмарам» (Мәз. 16:8).
4 Тәбии ки, биз һәрфи мәнада Јеһованын әлиндән тутуб Онунла јеријә билмәрик. Амма буну мәҹази мәнада етмәк мүмкүндүр. Неҹә? Мәзмурчу Асәф јазырды: «Даим Сәнинлә олмушам, мәним сағ әлимдән тутмусан. Нәсиһәтинлә мәнә јол ҝөстәрирсән» (Мәз. 73:23, 24). Садә сөзләрлә десәк, Јеһованын әсас етибарилә Өз Кәламы, һәмчинин «садиг вә ағыллы гул» васитәсилә вердији мәсләһәтләрә дәгиг әмәл едәндә Онунла јеријирик (Мат. 24:45; 2 Тим. 3:16).
5. Јеһова бир Ата кими садиг хидмәтчиләринә неҹә нәзарәт едир вә Она гаршы һансы һиссләримиз олмалыдыр?
5 Јеһова Онунла јеријәнләри нәҹиб мәһәббәтлә севдији үчүн онларын гејдинә галмагла, мүдафиә етмәклә вә өјрәтмәклә Өз ата нәзарәтини үзәрләриндә сахлајыр. Аллаһ дејир: «Сәнә тәлим верәҹәјәм, ҝедәҹәјин јолу өјрәдәҹәјәм. Нәсиһәт верәҹәјәм, ҝөзүм сәнин үстүндә олаҹаг» (Мәз. 32:8). Өзүндән соруш: Онун һикмәтинә гулаг асараг вә ҝөзүнүн үзәримдә олдуғуну биләрәк өзүмү Јеһованын әлиндән тутуб јеријән тәсәввүр едирәмми? Онун јанымда олдуғуну билмәјим фикирләримә, сөзләримә вә һәрәкәтләримә тәсир едирми? Сәһвә јол верәндә Јеһованы сојуг вә сәрт Ата кими дејил, төвбә едәнә Онунла јахын мүнасибәти бәрпа етмәјә көмәк етмәк истәјән мәрһәмәтли Ата кими ҝөрүрәмми? (Мәз. 51:17).
6. Валидејнләримиздән фәргли олараг, Јеһованын һансы үстүн ҹәһәти вар?
6 Бәзән Јеһова һәтта биз сәһв јола гәдәм гојмаздан өнҹә көмәјимизә ҝәлә биләр. Мисал үчүн, О диггәт јетирә биләр ки, һијләҝәрлијә мејлли олан үрәјимиз дүзҝүн олмајан шејләри арзуламаға башлајыр (Јер. 17:9). Белә вәзијјәтдә О, инсанын доғма валидејнләриндән даһа ҹәлд тәрпәнә биләр, чүнки үрәјимизин дәринликләрини вә ҝизли фикирләримизи ҝөрүр (Мәз. 11:4; 139:4; Јер. 17:10). Ҝәлин пејғәмбәр Јеремјанын мирзәси вә јахын досту олан Барукун вәзијјәтиндә Јеһованын нә етдијинә бахаг.
Барука ата гајғысы ҝөстәрилир
7, 8. а) Барук ким иди вә еһтимала ҝөрә, онун үрәјиндә һансы сәһв истәкләр инкишаф етмәјә башламышды? б) Јеһованын Барука ата гајғысы нәдән ҝөрүнүр?
7 Пешәкар мирзә олан Барук Јеһованын һөкмүнү Јәһудаја бәјан етмәк кими чәтин тапшырығы Јеремја илә бирҝә сәдагәтлә јеринә јетирирди (Јер. 1:18, 19). Танынмыш аиләдән олдуғу еһтимал едилән Барук мүәјјән бир вахтда өзү үчүн «чох шеј» истәмәјә башлады. Јәгин, о өзүндә мадди фираванлыға мејл вә истәјин баш галдырмасына јол верди. Һәр неҹә олса да, Јеһова Барукун үрәјиндә бу тәһлүкәли фикирләрин инкишаф етдијини ҝөрдү. Јеһова вахт итирмәдән Јеремја васитәсилә она деди: «Сән дедин ки, вај мәним һалыма! Чүнки Рәбб дәрдләримә кәдәр дә гатды, инилтимдән јорулдум, раһатлыг тапмырам». Сонра Аллаһ деди: «Өзүн үчүн чох шеј истәјирсәнсә, истәмә» (Јер. 45:1-5).
8 Јеһова Барукла ачыг данышса да, буну гәзәблә дејил, әсл ата гајғысы илә етди. Аллаһ ҝөрдү ки, онун арзулары үрәјинин пис вә ја һијләҝәр олдуғуну ҝөстәрмирди. Јеһоваја Јерусәлимин вә Јәһуданын сон ҝүнләрини јашадығы мәлум иди вә Барукун бу бөһранлы вахтда сәһвә јол вермәсини истәмирди. Буна ҝөрә, онун ҝөзүнү ачмаг үчүн Аллаһ ‘бүтүн бәшәрин үзәринә бәла ҝәтирәҹәјини’ она хатырлатды вә сөјләди ки, һикмәтлә давранарса, һәјатыны итирмәјәҹәк (Јер. 45:5). Аллаһ бунлары демәк истәјирди: «Барук, һәјата реал бах. Ҝүнаһ ичиндә батан Јәһуда вә Јерусәлимин башына тезликлә нә ҝәләҹәјини унутма. Садиглијини гору вә јаша! Мән сәни горујаҹағам». Јеһованын сөзләри Барукун үрәјинә јол тапды, чүнки о, дүшүнҹә тәрзиндә дәјишиклик етди вә 17 илдән сонра Јерусәлим дармадағын едиләндә сағ галды.
9. Бу абзасдакы суаллара неҹә ҹаваб верәрдин?
9 Барукун һадисәси үзәриндә дүшүнәркән нөвбәти суаллара вә ајәләрә диггәт јетир: Јеһованын Барукла неҹә даврандығы һәм Онун, һәм дә хидмәтчиләринә олан һиссләри барәсиндә нәји ашкар едир? (Ибраниләрә 12:9 ајәләрини оху.) Јашадығымыз чәтин зәманәни нәзәрә алараг, Јеһованын Барука мәсләһәтиндән вә онун буна неҹә һај вермәсиндән нә өјрәнә биләрик? (Лука 21:34-36 ајәләрини оху.) Мәсиһчи ағсаггаллар Јеремјаны тәглид едәрәк Јеһованын Өз хидмәтчиләринә олан гајғысыны неҹә әкс етдирә биләрләр? (Галатијалылара 6:1 ајәсини оху.)
Оғул Атасынын мәһәббәтини тәглид едир
10. Мәсиһчи јығынҹағынын Башы олан Иса бу вәзифәнин өһдәсиндән ҝәлмәк үчүн нә илә тәҹһиз едилиб?
10 Мәсиһчиликдән әввәлки дөврләрдә Јеһова Өз халгына олан мәһәббәтини пејғәмбәрләри вә диҝәр садиг хидмәтчиләри васитәсилә ҝөстәрирди. Инди исә О буну илк нөвбәдә мәсиһчи јығынҹағынын Башы олан Иса Мәсиһин васитәсилә едир (Ефес. 1:22, 23). Буна ҝөрә дә, Иса «Вәһј» китабында «једди ҝөзү» олан Гузу кими тәсвир едилир вә дејилир ки, бу ҝөзләр ‘Аллаһын бүтүн дүнјаја ҝөндәрдији једди руһудур’ (Вәһј 5:6). Аллаһын мүгәддәс руһу илә долу олан Иса мүкәммәл ајырд етмә габилијјәтинә маликдир. О да бизим дахилән неҹә инсан олдуғумузу ҝөрүр вә нәзәриндән һеч нә гачмыр.
11. Мәсиһин ролу нәдән ибарәтдир вә бизә мүнасибәтиндә Атасыны неҹә тәглид едир?
11 Јеһова кими Иса да ҝөјдән нәзарәт едән полис дејил. О, мәһәббәтдән ирәли ҝәләрәк бизә диггәтлә бахыр. Исанын титулларындан бири олан «Әбәди Ата» титулу бизә хатырладыр ки, она иман едәнләрин әбәди һәјаты алмаларында о, һансы ролу ојнајаҹаг (Јешаја 9:6). Бундан әлавә, мәсиһчи јығынҹағынын Башы кими, Иса руһән јеткин мәсиһчиләри, әләлхүсус ағсаггаллары еһтијаҹ дујанлара тәсәлли вә ја мәсләһәт вермәјә тәшвиг едә биләр (1 Салон. 5:14; 2 Тим. 4:1, 2).
12. а) Кичик Асијадакы једди јығынҹаға үнванланан мәктублардан Иса һаггында нә өјрәнмәк олар? б) Ағсаггаллар Аллаһын халгы илә мүнасибәтдә Мәсиһин хүсусијјәтләрини неҹә әкс етдирирләр?
12 Мәсиһин сүрү илә дәриндән марагландығыны Кичик Асијадакы једди јығынҹағын ағсаггалларына үнванланан мәктублардан ҝөрмәк олар (Вәһј 2:1–3:22). Онларда Иса һәр јығынҹагда баш верәнләрдән хәбәрдар олдуғуну вә өз давамчылары үчүн чох нараһат олдуғуну билдирирди. «Вәһј» китабындакы ҝөрүнтү «Рәббин ҝүнүндә» јеринә јетдији үчүн бу бизим ҝүнләрә даһа чох аиддирa (Вәһј 1:10). Адәтән Мәсиһин мәһәббәти јығынҹагда руһани чобанлар кими хидмәт едән ағсаггаллар васитәсилә тәзаһүр олунур. Иса «инсанлар тимсалында һәдијјәләр» (ЈД) олан бу адамлары лазым ҝәлдикдә тәсәлли вә ја мәсләһәт вермәјә, руһландырмаға тәшвиг едә биләр. (Ефес. 4:8; Һәв. иш. 20:28; Јешаја 32:1, 2 ајәләрини оху.) Сән онларын ҝөстәрдији сәји Мәсиһин шәхсән сәнинлә марагландығынын тәзаһүрү кими гәбул едирсәнми?
Вахтында ҝөстәрилән көмәк
13-15. Аллаһ дуаларымыза неҹә ҹаваб вермәк гәрарына ҝәлә биләр? Нүмунәләр чәкин.
13 Елә олубму ки, көмәк үчүн сәјлә дуа етмисән вә ҹаваб олараг руһән јеткин мәсиһчи сәнә баш чәкиб руһландырыб? (Јаг. 5:14-16). Јахуд, ола билсин, көмәји јығынҹаг ҝөрүшүндә сөјләнилән мәрузәдән вә ја нәшрләримиздәки мәлуматдан алмысан. Јеһова адәтән дуалара белә ҹаваб верир. Мәсәлән, бир ағсаггала мәрузәсиндән сонра, бундан өнҹә бир нечә һәфтә әрзиндә амансыз һагсызлыгла үзләшән бир баҹы јахынлашды. О өз проблеминдән ҝилејләнмәди, әксинә, мәрузәдә сәсләнән конкрет руһани фикирләрә ҝөрә дәрин миннәтдарлығыны билдирди. Онлар баҹынын вәзијјәтинә тәтбиг едилән иди вә она чох тәсәлли верди. О, һәмин ҝөрүшә ҝәлдијинә ҝөрә чох шад иди.
14 Дуа васитәсилә көмәк алан үч дустағын нүмунәсинә нәзәр салаг. Онлар Мүгәддәс Китаб һәгигәтини һәбсханада өјрәнмиш вә вәфтиз олунмамыш тәблиғчи олмушлар. Баш верән бир дәһшәтли һадисәдән сонра бу һәбсханада јатанларын һамысына бир сыра әлавә мәһдудијјәтләр гојулмушду. Бу, үсјана сәбәб олду. Дустаглар гәрара ҝәлдиләр ки, нөвбәти ҝүн сәһәр јемәјиндән сонра етираз әламәти олараг бошгаблары гајтармајаҹаглар. Вәфтиз олунмамыш һәмин үч тәблиғчи одла су арасында галды. Әҝәр үсјана гошулсајдылар, Јеһованын Ромалылара 13:1 ајәсиндәки ҝөстәришини позардылар, гошулмадыглары тәгдирдә исә, гәзәбләнмиш дустаглар онлардан гисас алардылар.
15 Бир-бири илә үнсијјәт етмәк имканлары олмајан бу үч нәфәр дуада Аллаһдан мүдриклик диләди. Сәһәриси ҝүн үчүнүн дә ејни гәрара ҝәлдији мәлум олду — онлар сәһәр јемәјиндән имтина етмишдиләр. Ҝөзәтчиләр бошгаблары јығмаға ҝәләндә онлар һеч бир шеј гајтарасы олмадылар. Онлар «дуалары ешидән»ин јанларында олдуғуна неҹә дә шад идиләр! (Мәз. 65:2).
Ҝәләҹәјә әминликлә бах
16. Тәблиғ иши Јеһованын сәмими инсанларын гајғысына галдығыны неҹә ҝөстәрир?
16 Үмумдүнја тәблиғ иши, һарада јашамаларындан асылы олмајараг, Јеһованын сәмими-гәлбли инсанларын гејдинә галдығыны ҝөстәрән диҝәр сүбутдур (Јар. 18:25). Јеһова чох вахт мәләкләрдән истифадә едәрәк, һәтта хош хәбәрин һәлә чатмадығы әразиләрдә јашасалар белә, Өз хидмәтчиләрини сәмими инсанларын јанына јөнәлдә биләр (Вәһј 14:6, 7). Мисал үчүн, Аллаһ биринҹи әсрдә тәблиғчи олан Филипи мәләјин васитәсилә һәбәшистанлы мәмурун јанына ҝөндәрди ки, Мүгәддәс Јазылары она изаһ етсин. Бунун нәтиҹәси нә олду? Һәмин адам хош хәбәри гәбул етди вә Исанын вәфтиз едилмиш давамчысы олдуb (Јәһ. 10:14; Һәв. иш. 8:26-39).
17. Нәјә ҝөрә ҝәләҹәјимиз үчүн чох нараһат олмамалыјыг?
17 Индики системин сону јахынлашдыгҹа габагҹадан дејилмиш ‘ағрылар’ ҝет-ҝедә артаҹаг (Мат. 24:8). Мәсәлән, әһалинин артмасы, тәбии фәлакәтләр вә игтисадијјатдакы гејри-стабиллик нәтиҹәсиндә әрзаг мәһсулларынын гијмәти әһәмијјәтли дәрәҹәдә арта биләр. Иш тапмаг чәтинләшә вә ишчиләрдән даһа чох ишләмәк тәләб олуна биләр. Һәр нә баш версә дә, руһани мараглары биринҹи јерә гојанлар вә ‘ҝөзүнү сағлам’ сахлајанлар һәддән артыг нараһат олмамалыдырлар. Онлар Аллаһын онларын севдијини вә гејдләринә галаҹағыны билирләр (Мат. 6:22-34). Ҝәлин ҝөрәк, ерамыздан әввәл 607-ҹи илдә Јерусәлим өзүнүн дәһшәтли сон ҝүнләрини јашадығы заман Јеһова Јеремјанын гајғысына неҹә галмышды.
18. Јерусәлимин мүһасирәдә олдуғу вахт әрзиндә Јеһова Јеремјаны севдијини неҹә сүбут етди?
18 Јерусәлимин бабиллиләр тәрәфиндән мүһасирәсинин сонларында Јеремја кешикчиләр һәјәтиндә зинданда иди. О, гиданы һарадан тапаҹагды? Әҝәр азадлыгда олсајды, јемәји өзү ахтармалы оларды. Лакин Јеремја әксәријјәти она нифрәт едән инсанлардан асылы иди. Бунунла белә, о, инсанлара јох, онун гејдинә галаҹағыны вәд едән Аллаһа бел бағлајырды. Јеһова Өз вәдини јеринә јетирдими? Әлбәттә! Јеһова гајғы ҝөстәрди ки, «шәһәрдә чөрәк еһтијаты гуртарана гәдәр» Јеремјаја һәр ҝүн ‘бир парча чөрәк версинләр’ (Јер. 37:21). Јеремја, еләҹә дә Барук, Евед-Мелек вә диҝәрләри аҹлығын, хәстәлијин вә өлүмүн түғјан етдији бир вахтда сағ галдылар (Јер. 38:2; 39:15-18).
19. Ҝәләҹәкдә һәр нә илә гаршылашсаг да, нәдә гәтијјәтли олмалыјыг?
19 Бәли, Јеһованын «ҝөзләри салеһләрә, гулаглары онларын дуаларына тәрәф јөнәлмишдир» (1 Пет. 3:12). Јеһованын ҝөзләринин һәмишә сәнин үзәриндә олмасы сәни севиндирирми? Онун ҝөзләринин сәнин рифаһын үчүн үзәриндә олдуғуну билдијинә ҝөрә өзүнү тәһлүкәсизлик һисс едирсәнми? Белә исә, ҝәләҹәкдә һәр нә баш версә дә, Аллаһла јеримәјә гәтијјәтли ол. Биз әмин ола биләрик ки, гајғыкеш Атамыз олан Јеһованын ҝөзләри даима Өз садиг хидмәтчиләринин үзәриндә олаҹаг. (Мәз. 32:8; Јешаја 41:13 ајәсини оху.)
[Һашијәләр]
a Мәктублар әсас етибарилә Исанын мәсһ олунмуш давамчыларына үнванланса да, үмумиликдә Аллаһын бүтүн хидмәтчиләринә аиддир.
b Аллаһын рәһбәрлијинин башга бир нүмунәсини Һәвариләрин ишләри 16:6-10 ајәләриндә ҝөрмәк олар. Бурада охујуруг ки, Павелә вә онун әмәкдашларына ‘мүгәддәс руһ Асија әјаләтиндә [вә Битинијада] кәламы тәблиғ етмәјә гојмады’. Әвәзиндә онлар Македонијаја ҝөндәрилдиләр вә орада бир чох һәлим инсанлар хош хәбәрә һај вердиләр.
Изаһ едә биләрсинизми?
• ‘Аллаһла јеридијимизи’ неҹә ҝөстәрә биләрик?
• Баруку севдијини Јеһова неҹә ҝөстәрди?
• Иса мәсиһчи јығынҹағынын Башы кими, Атасынын хүсусијјәтләрини неҹә тәзаһүр етдирир?
• Бу чәтин ҝүнләрдә Аллаһа ҝүвәндијимизи неҹә ҝөстәрә биләрик?
[9-ҹу сәһифәдәки шәкилләр]
Јеремјанын Барукла даврандығы кими, бу ҝүн дә мәсиһчи ағсаггаллар Јеһованын гајғысыны әкс етдирирләр
[10-ҹу сәһифәдәки шәкил]
Јеһова өз вахтында неҹә көмәк ҝөстәрир?