Еј ҝәнҹләр, Јараданынызы хатырлајын

«Ҹаванлыг ҝүнләриндә сәни Јараданы хатырла». ВАИЗ 12:1

1. Јеһова Она хидмәт едән ҝәнҹләрә етибар етдијини неҹә билдирир?

ҜӘНҸ мәсиһчиләр Јеһованын ҝөзүндә тәравәтләндириҹи ҝөзәл шеһ дамлалары кимидир. О, габагҹадан демишди ки, Оғлунун «дөјүш ҝүнү» ҝәнҹ оғлан вә гызлар «көнүллү олараг» Мәсиһә хидмәт едәҹәкләр (Мәз. 110:3). Һәмин пејғәмбәрлик инсанларын әксәријјәтинин аллаһсыз, худбин, пулпәрәст вә итаәтсиз олдуғу ҝүнләрдә јеринә јетмәли иди. Анҹаг Јеһова билирди ки, Она хидмәт едән ҝәнҹләр белә инсанлардан сечиләҹәкләр. Еј ҝәнҹ баҹы вә гардашлар, ҝөрүн Аллаһ сизә неҹә етибар едир!

2. Јеһованы хатырламаг нә демәкдир?

² Тәсәввүр един, ҝәнҹләрин өз Јараданыны хатырладығыны ҝөрәндә Аллаһ неҹә севинир (Ваиз 12:1). Әлбәттә, Јеһованы хатырламаг садәҹә Онун һаггында фикирләшмәк демәк дејил. Биз буну һәрәкәтләримизлә ҝөстәрмәлијик: Онун хошуна ҝәлән ишләри ҝөрмәли, ганун вә принсипләринин ҝүндәлик һәјатымызда рәһбәр олмасына јол вермәлијик. Бу һәм дә о демәкдир ки, Јеһованын бизим јахшылығымызы истәдијинә әмин олуб, Она етибар етмәлијик (Мәз. 37:3; Јешаја 48:17, 18). Сән дә Јараданына белә етибар едирсәнми?

«Бүтүн гәлбинлә Рәббә ҝүвән»

3, 4. Иса Јеһоваја етибар етдијини неҹә ҝөстәрмишди вә бизим ҝүнләрдә Јеһоваја етибар етмәк нә үчүн ваҹибдир?

³ Јеһоваја етибар етмәкдә ән јахшы нүмунәни, әлбәттә ки, Иса Мәсиһ ҝөстәрмишдир. О, Сүлејманын мәсәлләри 3:5, 6 ајәләриндәки сөзләрә ујғун јашајырды: «Бүтүн гәлбинлә Рәббә ҝүвән, өз идракына етибар етмә. Бүтүн јолларында Ону таны, О сәнин јолларыны дүзәлдәр». Иса вәфтиз олундугдан чох кечмәмиш Шејтан она јахынлашыб дүнјанын һакимијјәтини вә шан-шөһрәтини тәклиф едәрәк имтаһана чәкди (Лука 4:3-13). Лакин Иса алданмады. О билирди ки, һәгиги ‘сәрвәт, шәрәф, һәјат’ — ‘тәвазөкарлығын вә Рәбб горхусунун нәтиҹәсидир’ (Сүл. мәс. 22:4).

⁴ Бу ҝүн дүнјада тамаһкарлыг вә худбинлик һөкм сүрүр. Белә аб-һавада Исанын нүмунәсини тәглид етмәк мүдриклик оларды. Һәм дә јадда сахламалыјыг ки, Шејтан Јеһованын хидмәтчиләрини һәјата апаран дар јолдан сапдырмаг үчүн һәр шејә әл атаҹаг. О, һәр кәси мәһвә апаран ҝениш јолда ҝөрмәк истәјир. Онун сәни алдатмасына јол вермә! Әксинә, даим Јараданыны хатырла. Она там етибар ет вә сүрәтлә јахынлашан ‘һәгиги һәјатдан’ мөһкәм јапыш (1 Тим. 6:19, һашијә).

Ҝәнҹләр, мүдрик олун!

5. Бу дүнјанын ҝәләҹәјинә даир нә фикирләширсиниз?

⁵ Јараданларыны хатырлајан ҝәнҹләр өз јашыдларындан гат-гат мүдрикдирләр. (Мәзмур 119:99, 100 ајәләрини оху.) Онлар Аллаһын нөгтеји-нәзәринә шәрик олдуглары үчүн јахшы билирләр ки, бу дүнјанын ҝәләҹәји гаранлыгдыр. Јашынызын аз олмасына бахмајараг, шүбһәсиз, сиз дә инсанларын ҝетдикҹә ҝәләҹәјә даһа чох горху вә тәлашла бахдығыны ҝөрүрсүнүз. Јәгин мәктәбдә әтраф мүһитин чиркләнмәси, глобал истиләшмә, мешәләрин гырылмасы вә бу кими проблемләр барәдә ешитмисиниз. Дүнјада баш верәнләрә ҝөрә инсанлар дәрин нараһатлыг кечирирләр, лакин јалныз Јеһованын Шаһидләри баша дүшүрләр ки, бүтүн бунлар Шејтанын дүнјасынын сонуну ҝөстәрән әламәтин бир һиссәсидир (Вәһј 11:18).

6. Бәзи ҝәнҹләр неҹә алданмышлар?

⁶ Әфсуслар олсун ки, Аллаһын бәзи ҝәнҹ хидмәтчиләри сајыглыгларыны итирмиш вә бу дүнјанын сонуна нә гәдәр аз галдығыны нәзәрдән гачырмышлар (2 Пет. 3:3, 4). Башгалары пис достлуғун вә порнографијанын тәсири алтына дүшәрәк ағыр ҝүнаһ ишләтмишләр (Сүл. мәс. 13:20). Сонун белә јахын олдуғу бир вахтда Аллаһын лүтфүнү итирмәк неҹә дә аҹынаҹаглы оларды! Ерамыздан әввәл 1473-ҹү илдә Вәд едилмиш дијарын астанасында, Моав дүзәнлијиндә дүшәрҝә саланда исраиллиләрлә баш вермиш һадисәдән өзүнүзә дәрс ҝөтүрүн. Орада нә баш вермишди?

Мәгсәдә чатачатда мәһв олдулар

7, 8. а) Шејтан Моав дүзәнлијиндә һансы һијләјә әл атды? б) Бизим ҝүнләрдә Шејтан нәдән истифадә едир?

⁷ О вахты Шејтан ачыг-ајдын исраиллиләрин вәд олунмуш мирасы алмаларына мане олмаг истәјирди. Балам пејғәмбәр васитәсилә онлары ләнәтләмәк нијјәти боша чыханда, Шејтан даһа ҝүҹлү һијләјә әл атды; о чалышды ки, исраиллиләр Јеһованын хејир-дуасындан мәһрум олсунлар. Моавын ҹазибәдар гадынлары онлары јолдан чыхартды. Бу дәфә Шејтан мүәјјән дәрәҹәдә өз мәгсәдинә наил ола билди. Исраиллиләр Моав гызлары илә әхлагсызлыг етмәјә вә Пеордакы Баал бүтүнә сәҹдә етмәјә башладылар! Аллаһын онлара мирас вермәк истәдији Вәд едилмиш дијарын чох јахын олмасына бахмајараг, тәхминән 24 000 исраилли һәјатыны итирди. Бу неҹә дә бөјүк фаҹиә иди! (Сај. 25:1-3, 9).

⁸ Бу ҝүн биз вәд олунмуш даһа јахшы дијара, јени дүнјаја сүрәтлә јахынлашырыг. Шејтан, һәмишә олдуғу кими, бу ҝүн дә Аллаһын халгыны позмаг үчүн ҹинси әхлагсызлыгдан истифадә едир. Дүнјанын әхлаг нормалары о гәдәр ашағы дүшүб ки, әхлагсызлыг ади бир шејә чеврилиб, һомосексуализмин исә һәр кәсин шәхси иши олдуғу һесаб едилир. Бир баҹымыз дејир: «Ушагларым һомосексуализмин вә никаһдан кәнар ҹинси әлагәнин Аллаһын ҝөзүндә пис олдуғуну јалныз евдә вә Падшаһлыг Залында ешидирләр».

9. Ҹинси һиссләрин ҝүҹлү олдуғу дөврдә ҝәнҹләр һансы чәтинликлә үзләширләр вә бунун өһдәсиндән неҹә ҝәлә биләрләр?

⁹ Өз Јараданыны хатырлајан ҝәнҹләр билирләр ки, ҹинси әлагә нәслин артырылмасы вә һәјатын давам етмәси илә бағлы олан мүгәддәс әнамдыр. Онлар анлајырлар ки, бу ҹүр мүнасибәтләр Аллаһын мүәјјән етдији кими, никаһ дахилиндә олмалыдыр (Ибр. 13:4). Анҹаг ҹинси һиссләрин ҝүҹлү олдуғу вә сағлам дүшүнҹәјә үстүн ҝәлә билдији дөврдә әхлаги тәмизлији горујуб сахламаг чәтин ола биләр. Бәс ағлына налајиг фикирләр ҝәләндә нә едә биләрсән? Јеһоваја үрәкдән дуа ет ки, фикрини тәмиз шејләрә јөнәлтмәјә көмәк етсин. Јеһова Она сәмими-гәлбдән мүраҹиәт едәнләри һәмишә динләјир. (Лука 11:9-13 ајәләрини оху.) Тәмиз вә иманы мөһкәмләндирән шејләр һаггында сөһбәт етмәклә дә фикримизи јахшы шејләрә јөнәлдә биләрик.

Гаршыныза мүдрик мәгсәдләр гојун!

10. Һансы дүшүнҹә тәрзиндән гачмалыјыг вә өзүмүзә һансы суаллары верә биләрик?

¹⁰ Бир чох ҝәнҹләрин чылғынлығынын вә өз еһтирасларына ҝөрә јашамаларынын сәбәбләриндән бири одур ки, онларда «илаһи сөз» — Аллаһын рәһбәрлији вә ҝәләҹәјә мөһкәм үмид јохдур (Сүл. мәс. 29:18). Онлар Јешајанын ҝүнләриндә «севинҹ вә шадлыг» үчүн јашајан, ‘әт јејиб, шәраб ичән’ хәјанәткар исраиллиләрә бәнзәјирләр (Јешаја 22:13). Бу ҹүр инсанлара һәсәд апармаг әвәзинә, нә үчүн Јеһованын садиг хидмәтчиләринә вердији ҝөзәл үмид һаггында дүшүнмәјәсән? Сән јени дүнјаны сәбирсизликлә ҝөзләјирсәнми? Јеһованын сәнә вердији ‘мүбарәк үмиди ҝөзләјәркән’ ‘бу дүнјада тәмкинли өмүр сүрмәјә’ вар ҝүҹүнлә чалышырсанмы? (Тит. 2:12, 13). Бу суаллара неҹә ҹаваб вермәјин мәгсәдләринә вә һәјатда ваҹиб һесаб етдијин шејләрә тәсир едәҹәк.

11. Нәјә ҝөрә мәсиһчи ҝәнҹләр мәктәбдә јахшы охумалыдырлар?

¹¹ Дүнја истәјир ки, ҝәнҹләр бүтүн ҝүҹүнү дүнјәви мәгсәдләрә сәрф етсинләр. Тәбии ки, мәктәбдә охујанлар јахшы тәһсил алмаг үчүн чох чалышмалыдырлар. Ахы онларын мәгсәди јалныз јахшы иш тапмаг јох, һәмчинин јығынҹаға фајда ҝәтирмәк вә Падшаһлығын баҹарыглы тәблиғчиси олмагдыр. Бунун үчүн јахшы үнсијјәт етмәји, мәнтигли дүшүнмәји вә фикирләрини сакит вә һөрмәтҹил тәрздә ифадә етмәји баҹармаг лазымдыр. Мүгәддәс Китабы өјрәниб онун принсипләрини һәјатларында тәтбиг етмәјә чалышан ҝәнҹ мәсиһчиләр ән јахшы тәһсили алыр вә хошбәхт әбәди ҝәләҹәк үчүн мөһкәм тәмәл гојурлар. (Мәзмур 1:1-3 ајәләрини оху.)a

12. Мәсиһчи аиләләр һансы нүмунәни изләмәлидирләр?

¹² Гәдим Исраилдә валидејнләр ушагларынын тәлим-тәрбијәсинә чох ҹидди јанашырдылар. Бу, һәјатын, демәк олар ки, һәр саһәсини, хүсусилә дә руһани мәсәләләри әһатә едирди (Ганун. т. 6:6, 7). Беләликлә дә, валидејнләринә вә Аллаһдан горхан башга инсанлара гулаг асан ҝәнҹ исраиллиләр тәкҹә билик дејил, һәм дә Аллаһ һаггында билијин вердији һикмәт, идрак, дәрракә вә узагҝөрәнлик кими дәјәрли кејфијјәтләр әлдә едирдиләр (Сүл. мәс. 1:2-4; 2:1-5, 11-15). Мәсиһчи аиләләр дә тәһсилә ејни ҹүр јанашмалыдырлар.

Сизи севәнләрә гулаг асын

13. Бәзи ҝәнҹләрә һансы мәсләһәтләр верилир вә онлар нә үчүн еһтијатлы олмалыдырлар?

¹³ Адәтән ҝәнҹләрә һамы, о ҹүмләдән јалныз дүнјада уғур газанмаға тәшвиг едән мәктәб мүәллимләри дә мәсләһәт верир. Бүтүн бу мәсләһәтләрин үзәриндә дүшүнәркән дуада Аллаһдан рәһбәрлик истә вә Аллаһын Кәламындакы, еләҹә дә садиг вә ағыллы гулун нәшрләриндәки принсипләри нәзәрә ал. Мүгәддәс Китабдан билирсән ки, Шејтанын әсас һәдәфи ҝәнҹләр вә тәҹрүбәсизләрдир. Мәсәлән, тәҹрүбәсиз Һәвва Еден бағында јад бир шәхсә, ону зәррә гәдәр дә севмәјән Шејтана гулаг асды. О Өз мәһәббәтини бир чох саһәләрдә ҝөстәрмиш Јеһоваја гулаг ассајды, һәр шеј тамам башга ҹүр оларды! (Јар. 3:1-6).

14. Биз нә үчүн һәм Јеһоваја, һәм дә мәсиһчи валидејнләримизә гулаг асмалыјыг?

¹⁴ Јарадан сәни дә севир вә Онун мәһәббәти сафдыр. О, сәнин јалныз инди дејил, әбәдијјән хошбәхт олманы истәјир! Буна ҝөрә дә, гајғыкеш ата нәвазиши илә сәнә вә бүтүн хидмәтчиләринә белә сөзләрлә мүраҹиәт едир: «Јол будур, ҝедин бу јола» (Јешаја 30:21). Әҝәр валидејнләрин Јеһованы үрәкдән севирләрсә, бу сәнин үчүн даһа бир хејир-дуадыр. Гаршына мәгсәдләр гојаркән онларын мәсләһәтләринә һөрмәтлә гулаг ас (Сүл. мәс. 1:8, 9). Онлар сәнин вар-дөвләтдән вә бу дүнјанын шан-шөһрәтиндән гат-гат үстүн олан әбәди һәјаты алмағыны истәјирләр (Мат. 16:26).

15, 16. а) Јеһоваја нәдә әмин ола биләрик? б) Барукун нүмунәсиндән һансы ваҹиб дәрси өјрәнирик?

¹⁵ Өз Јараданыны хатырлајанлар Јеһованын онлары «һеч» бурахмајаҹағына вә «әсла» тәрк етмәјәҹәјинә әмин олдуглары үчүн садә һәјат сүрүрләр. (Ибраниләрә 13:5 ајәсини оху.) Бу сағлам әһвал-руһијјә дүнјанын дүшүнҹә тәрзинә зидд ҝетдији үчүн, еһтијатлы олмалыјыг ки, онун руһу бизә тәсир етмәсин (Ефес. 2:2). Јерусәлимин б. е. ә. 607-ҹи илдә дармадағын едилмәси әрәфәсиндә, чәтин ҝүнләрдә јашајан Јеремјанын мирзәси Барукун нүмунәсинә бахаг.

¹⁶ Ола биләр, Барук мадди ҹәһәтдән даһа јахшы јашамаг истәјирди. Јеһова буну ҝөрдү вә она хејирхаһлыгла хәбәрдарлыг етди ки, өзү үчүн «чох шеј» истәмәсин. Барук мүдриклик вә тәвазөкарлыг ҝөстәриб, Јеһоваја гулаг асды вә Јерусәлим мәһв олан заман сағ галды (Јер. 45:2-5). Диҝәр тәрәфдән исә, Јеһованы икинҹи јерә гојуб, мадди ҹәһәтдән «чох шеј» әлдә едән Барукун мүасирләри халдејлиләр (бабиллиләр) Јерусәлими зәбт едәндә һәр шејләрини итирдиләр. Чохлары һәтта һәјатыны да итирди (2 Салн. 36:15-18). Барукун нүмунәсиндән ҝөрүрүк ки, Аллаһла јахшы мүнасибәт бу дүнјанын вар-дөвләтиндән вә шан-шөһрәтиндән даһа ваҹибдир.

Онларын јахшы нүмунәсини тәглид един

17. Иса, Павел вә Тимотеј Јеһованын мүасир хидмәтчиләринә нә үчүн ҝөзәл нүмунәдирләр?

¹⁷ Аллаһын Кәламында һәјат јолунда јеримәјимизә көмәк едән чохлу ҝөзәл нүмунәләр вар. Мәсәлән, Иса јер үзүндә јашамыш ән истедадлы инсан иди, бунунла белә о, бүтүн ҝүҹүнү инсанлара әбәди фајда ҝәтирәҹәк бир шејә — ‘Аллаһ Сәлтәнәтинин мүждәсинә’ сәрф едирди (Лука 4:43). Јеһоваја хидмәтдә әлиндән ҝәләни етмәк үчүн һәвари Павел чохлу үмидләр верән ишини атыб вахтыны вә ҝүҹүнү хош хәбәрин тәблиғинә һәср етди. ‘Иманда һәгиги оғул олан’ Тимотеј Павелин ҝөзәл нүмунәсини тәглид едирди (1 Тим. 1:2). Иса, Павел вә Тимотеј сечдикләри һәјат јолуна ҝөрә пешман олдулармы? Гәтијјән! Павел дүнјанын тәклиф етдији шејләри Аллаһа хидмәтлә мүгајисәдә «зибил» сајырды (Филип. 3:8-11).

18. Бир ҝәнҹ гардаш һансы бөјүк дәјишикликләри етди вә о, нә үчүн пешман дејил?

¹⁸ Бу ҝүн бир чох мәсиһчи ҝәнҹләр Исанын, Павелин вә Тимотејин иманыны тәглид едирләр. Мәсәлән, әввәлләр јүксәкмәваҹибли иши олан бир ҝәнҹ гардаш јазмышдыр: «Мүгәддәс Китаб принсипләринә ујғун јашадығыма ҝөрә тезликлә ишдә вәзифәми галдырдылар. Мадди вәзијјәтимин јахшылашмасына бахмајараг, баша дүшүрдүм ки, күләк далынҹа гачырам. Мүдријјәтә јахынлашыб таммүддәтли хидмәтә башламаг истәдијими билдирәндә, онлар ишдә галаҹағыма үмид едәрәк дәрһал даһа чох мааш тәклиф етдиләр. Анҹаг гәрарым гәти ити. Чохлары баша дүшә билмирдиләр ки, таммүддәтли хидмәтә ҝөрә белә ҝәлирли иши неҹә әлдән бурахмаг олар. Буна сәбәб, Аллаһа һәср олунмама ујғун јашамаг истәјим иди. Инди һәјатымда биринҹи јери Аллаһа хидмәт тутдуғу үчүн, һеч бир пулун вә шан-шөһрәтин верә билмәдији хошбәхтлик вә мәмнунлуғу дујурам».

19. Ҝәнҹләр һансы мүдрик сечими етмәјә тәшвиг олунурлар?

¹⁹ Бүтүн дүнјада минләрлә ҝәнҹ бу ҹүр мүдрик сечим етмишдир. Беләликлә, ҝәнҹләр, ҝәләҹәјиниз һаггында дүшүнәркән Јеһованын ҝүнүнү јадда сахлајын (2 Пет. 3:11, 12). Бу дүнјада мүвәффәгијјәт газанан адамлара һәсәд апармајын. Әксинә, сизи һәгигәтән севән адамларын мәсләһәтләринә гулаг асын. «Ҝөјдә хәзинәләр» јығмагла вар-дөвләтинизи ән тәһлүкәсиз јерә јығмыш олаҹагсыныз вә јалныз бу, әбәди фајда ҝәтирәҹәк. (Мат. 6:19, 20; 1 Јәһја 2:15-17 ајәләрини оху.) Јараданынызы хатырлајын. Белә етсәниз, Јеһова сизә хејир-дуа верәҹәк.

[Һашијә]

Хатырлајырсынызмы?

• Аллаһа етибар етдијимизи неҹә ҝөстәрә биләрик?

• Ән јахшы тәһсил һансыдыр?

• Барукун нүмунәсиндән нә өјрәнә биләрик?

• Кимләр бизим үчүн ҝөзәл нүмунәдир вә нә үчүн?

[13-ҹү сәһифәдәки шәкилләр]

Јеһова ән јахшы тәһсили верир

[15-ҹи сәһифәдәки шәкил]

Барук Јеһоваја гулаг асды вә Јерусәлим мәһв олан заман сағ галды. Онун нүмунәсиндән нә өјрәнә биләрсиниз?