Јеһова сәмими дуалара ҹаваб верир

«Билсинләр ки, Сәнин исмин Рәбдир [«Јеһовадыр», ЈД], бүтүн јер үзүндә анҹаг Сән Һагг-Тааласан!» (МӘЗ. 83:18).

1, 2. Бир чохлары Аллаһын адыны өјрәнәндә һансы һиссләри кечирмишләр вә һансы суаллар јараныр?

ИЛЛӘР өнҹә бир гадын гоншулугда баш верән фәлакәтә ҝөрә чох үзҝүн иди. Католик аиләсиндә доғулан бу гадын көмәк алмаг үчүн кешишин јанына ҝетди. О исә онунла сөһбәт етмәк белә истәмәди. Буна ҝөрә дә дуасында Аллаһа деди: «Сәнин ким олдуғуну билмәсәм дә... билирәм ки, Сән варсан. Хаһиш едирәм, Өзүнү мәнә таныт!» Гыса вахтдан сонра Јеһованын Шаһидләри она баш чәкиб, ахтардығы тәсәлли вә билији она вердиләр. Бир чох башга шејләрлә јанашы, Шаһидләр она Аллаһын адынын Јеһова олдуғуну да өјрәтдиләр. Буну билмәк гадына дәрин тәсир бағышлады. О деди: «Ахы бу мәним ушаглыгдан ахтардығым Аллаһдыр!»

² Бир чохлары Аллаһын адыны өјрәнәндә белә һиссләр кечирмишләр. Әсасән онлар илк дәфә Јеһованын адыны Мүгәддәс Китабдан Мәзмур 83:18 ајәсини охујанда ҝөрмүшләр. «Јени Дүнја Тәрҹүмәси»ндә һәмин ајә белә сәсләнир: «Инсанлар билсинләр ки, ады Јеһова олан Сән, бүтүн јер үзәриндә јалныз Сән Уҹасан». 83-ҹү мәзмурун һансы мәгсәдлә јазылдығыны һеч дүшүнмүсәнми? Һансы һадисәләр һәр бир кәси Јеһованын ваһид һәгиги Аллаһ олдуғуну етираф етмәјә мәҹбур едәҹәк? Бу мәзмурдан нә өјрәнә биләрик? Бу суаллары бу мәгаләдә арашдыраҹағыгa.

Јеһованын халгына гаршы суи-гәсд

3, 4. Сәксән үчүнҹү мәзмуру ким бәстәләјиб вә бурада һансы тәһлүкәдән бәһс олунур?

³ Сәксән үчүнҹү мәзмурун ҝириш сөзләринә әсасән, бу, «Асәфин мәзмуру»дур. Ола билсин, ону бәстәләјән кәс падшаһ Давудун һөкмранлығы дөврүндә јашамыш мәшһур мусигичи олан левили Асәфин нәслиндән иди. Мәзмурчу Јеһоваја јалварыр ки, али һөкмранлығыны мүдафиә етмәк вә адыны танытмаг үчүн һәрәкәтә кечсин. Ҝүман ки, бу мәзмур Сүлејманын өлүмүндән бир гәдәр сонра бәстәләнмишди. Нәјә ҝөрә? Чүнки Давудун вә Сүлејманын һөкмранлығы дөврүндә Сур падшаһынын Исраил илә достлуг мүнасибәти варды. 83-ҹү мәзмурун бәстәләндији вахтда Сурун әһалиси Исраилә арха чевириб, онун дүшмәнләри илә әлбир олмушду.

⁴ Мәзмурчу Аллаһын халгыны мәһв етмәк үчүн суи-гәсд гуран он халгын адыны садалајыр. Исраилин әтрафында јашајан дүшмәнләр бунлардыр: «Едомлулар, Исмаиллиләр, Моавлылар, Һәҹәрлиләр, Ҝевал, Аммон, Амалег, Филишт вә Сур әһалиси. Ашшур да онлара гошулуб» (Мәз. 83:6-8). Бу мәзмурда һансы тарихи һадисәјә истинад едилир? Бәзиләри зәнн едирләр ки, бурада, Јеһошафатын ҝүнләриндә аммонлулар, моавлылар вә Сеир дағынын сакинләринин бирләшиб Исраилә һүҹум етдијинә истинад едилир (2 Салн. 20:1-26). Диҝәрләри исә дүшүнүрләр ки, бурада Исраил халгынын тарихи боју гоншу өлкәләрин она бәсләдији әдавәтдән бәһс едилир.

5. Мүасир мәсиһчиләр 83-ҹү мәзмурдан неҹә фајдалана биләрләр?

⁵ Һәр неҹә олса да, ајдындыр ки, Јеһова бу мәзмурун јазылмасыны халгы тәһлүкәли вахтларда јашадығы заман илһамландырмышды. Бу мәзмур Аллаһын мүасир хидмәтчиләрини дә руһландырыр, чүнки онлары мәһв етмәк үчүн дүшмәнләр онлара даима һүҹум чәкмишләр. Шүбһәсиз ки, јахын ҝәләҹәкдә Магог өлкәсиндән олан Гог Аллаһа руһән вә һәгигәтән ибадәт едәнләри мәһв етмәк мәгсәдилә бүтүн ордусуну топлајыб ахырынҹы дәфә һүҹум етмәјә ҹәһд едәндә 83-ҹү мәзмур бизләри дә мөһкәмләндирәҹәк. (Језекел 38:2, 8, 9, 16 ајәләрини оху.)

Мәзмурчу үчүн ән ваҹиб мәсәлә

6, 7. а) Мәзмурчу 83-ҹү мәзмурун илк ајәләриндә нә барәдә дуа едир? б) Мәзмурчуну даһа чох нараһат едән нә иди?

⁶ Ҝөрүн мәзмурчу дуада өз һиссләрини неҹә ифадә едир: «Еј Аллаһ, сусуб сәссиз дурма! Еј Аллаһ, сакит олма! Будур, дүшмәнләр гијамәт гопарыр, Сәнә нифрәт едәнләр Сәнин әлејһинә галхыр. Халгына гаршы фәнд ишләдирләр... Үрәкләри бир олараг гәрара ҝәлибләр, Сәнә гаршы бунлар әһд едибләр» (Мәз. 83:1-3, 5).

⁷ Мәзмурчуну даһа чох нараһат едән нә иди? Әлбәттә, о, аиләсинин вә өзүнүн тәһлүкәсизлијинә ҝөрә чох нараһат олурду. Лакин дуасында әсас диггәти Јеһованын адына јахылан ләкәјә вә бу ады дашыјан халгы һәдәләјән тәһлүкәјә јөнәлдирди. Ҝәлин көһнә системин сон ҝүнләринин чәтинликләринә таб ҝәтирәрәк биз дә мәзмурчу кими дүшүнҹә тәрзимиздә таразлығы горујаг. (Матта 6:9, 10 ајәләрини оху.)

8. Халгларын Исраилә гаршы суи-гәсд һазырламагда мәгсәди нә иди?

⁸ Мәзмурчу Исраилин дүшмәнләринин сөзләрини ситат ҝәтирир: «Ҝәлин, онлары милләт олмасын дејә мәһв едәк, Исраилин ады хатырланмасын дејә онлары јох едәк» (Мәз. 83:4). Онлар Аллаһын сечилмиш халгына неҹә дә нифрәт едирдиләр! Амма Исраилә гаршы суи-гәсд һазырламагда бу халгларын мәгсәди башга иди. Онлар Исраил торпағыны әлә кечирмәк истәјирдиләр вә ловғаланараг дејирдиләр: «Аллаһын јурдларыны өзүмүзә мүлк едәк» (Мәз. 83:12, КМ). Бизим ҝүнләрдә дә буна охшар шеј баш верирми? Бәли, верир!

Јеһованын мүгәддәс мәскәни

9, 10. а) Гәдим заманларда Аллаһын мүгәддәс мәскәни нә иди? б) Мәсһ олунмушларын галығы вә ‘башга гојунлар’ бу ҝүн һансы хејир-дуалары алырлар?

⁹ Гәдим заманларда Вәд едилмиш дијар Аллаһын јурду, јәни мүгәддәс мәскәни сајылырды. Исраиллиләрин Мисирдән азад едилдикдән сонра охудуглары зәфәр нәғмәсини хатырлајын: «Мәһәббәтинлә гуртардығын халга Сән јол ҝөстәрдин. Мүгәддәс мәскәнинә Өз ҝүҹүнлә апардын» (Чых. 15:13). Бир гәдәр сонра ‘мүгәддәс мәскәндә’ мәбәд илә каһинләр вә пајтахт шәһәр Јерусәлим илә Давудун сүлаләсиндән олуб Јеһованын тахтында отуранлар јерләшдирилди (1 Салн. 29:23). Иса әбәс јерә Јерусәлими ‘бөјүк Һөкмдарын шәһәри’ адландырмады (Мат. 5:35).

¹⁰ Бәс бизим ҝүнләр һагда нә демәк олар? Ерамызын 33-ҹү илиндә јени халг — «Аллаһын Исраили» јаранды (Галат. 6:16). Иса Мәсиһин руһла мәсһ олунмуш гардашларындан тәшкил олунан бу халг, ҹисмани Исраилин едә билмәдији иши, јәни Аллаһын адына шәһадәтлик етмәк тапшырығыны јеринә јетирди (Јешаја 43:10; 1 Пет. 2:9). Јеһова гәдим Исраилә вердији вәди онлара да верди: «Мән онларын Аллаһы, онлар да Мәним халгым олаҹагдыр» (2 Кор. 6:16, 17; Лев. 26:12). Јеһова 1919-ҹу илдә ‘Аллаһын Исраилинин’ галығы илә хүсуси мүнасибәт јаратды вә һәмин вахтдан етибарән онлар ‘өлкәјә’, јәни мәмнунлуг дујдуглары руһани ҹәннәтин руһани фәалијјәт саһәсинә дахил олдулар (Јешаја 66:8). 1930-ҹү илләрдән бәри милјонларла ‘башга гојунлар’ онлара гошулублар (Јәһ. 10:16). Мүасир мәсиһчиләрин хошбәхтлик вә руһани фираванлыг ичиндә јашамасы Јеһованын һөкмранлығынын әдаләтли олдуғуна данылмаз сүбутдур. (Мәзмур 91:1, 2 ајәләрини оху.) Бу, Шејтаны неҹә дә һиддәтләндирир!

11. Аллаһын дүшмәнләринин һәмишә әсас мәгсәди нә олуб?

¹¹ Ахыр ҝүнләр әрзиндә Шејтан өзүнүн әлалтыларыны мәсһ олунмушлара вә онларын әмәкдашларына мүгавимәт ҝөстәрмәјә тәһрик етмишди. Бу, Насист һакимијјәти алтында олан Гәрби Авропада вә Совет Иттифагынын коммунист һөкумәтинин рәһбәрлији алтында олан Шәрги Авропада баш вермишди. Бу, бир чох башга өлкәдә дә баш вермиш вә хүсусилә дә Магог өлкәсиндән олан Гогун сонунҹу һүҹуму заманы јенидән баш верәҹәкдир. Бу һүҹум заманы дүшмәнләр, кечмишдә олдуғу кими, Јеһованын халгынын әмлакына аҹҝөзлүклә јијәләнә биләрләр. Амма һәмишә Шејтанын әсас мәгсәди, Јеһованын ады бир даһа анылмасын дејә, Онун халгыны әбәди олараг јох етмәк олуб. Јеһова һөкмранлығына гаршы белә мејдан охунмаға неҹә реаксија ҝөстәрир? Ҝәлин бир даһа мәзмурчунун сөзләринә диггәт јетирәк.

Јеһованын гәләбәсинә даир кечмишдәки нүмунәләр

12-14. Мәзмурчу Меҝиддо шәһәри јахынлығында баш верән һансы ики тарихи гәләбәни хатырлајыр?

¹² Мәзмурчунун мөһкәм иманы варды ки, Јеһова дүшмән халгларынын планларыны алт-үст етмәјә гадирдир. О, ејниадлы вадијә нәзарәт едән гәдим Меҝиддо шәһәринин јахынлығында Исраил халгынын өз дүшмәнләри үзәриндә чалдығы ики һәлледиҹи гәләбәдән данышыр. Јајда Гишон чајынын гурумуш әјри-үјрү јатағыны вади боју ҝөрмәк олар. Гыш лејсанындан сонра чајын сулары вадини басыр. Ола билсин, елә бу сәбәбдән һәмин чај «Меҝиддо сулары» да адланыр (Һак. 4:13; 5:19).

¹³ Меҝиддодан тәхминән 15 километр вадинин о бири тајында Море тәпәси јерләшир. Һаким Ҝидеонун ҝүнләриндә мидјанлылар, амалеглиләр вә Шәрг халглары бурада мүһарибәјә топлашмышдылар (Һак. 7:1, 12). Нәһајәтдә Ҝидеонун ордусу 300 нәфәр тәшкил етсә дә, бу кичик орду Јеһованын көмәјилә бөјүк дүшмән ордусуну мәғлуб етди. Неҹә? Онлар Аллаһын ҝөстәришинә әмәл едәрәк әлләриндә бош долчалар вә онларын ичиндә мәшәл ҝеҹә вахты дүшмән дүшәрҝәсини мүһасирәјә алдылар. Ҝидеонун ишарәси илә әсҝәрләри долчалары сындырды вә ҝизләдилмиш мәшәлләр гәфләтән ҝөрүндү. Онлар ејни вахтда шејпур чалыб бағырдылар: «[Јеһованын] вә Ҝидеонун гылынҹы!» Дүшмәнләр арасына чахнашма дүшдү вә онлар бир-бирләрини өлдүрмәјә башладылар; сағ галанлар Иордан чајынын о бири тајына гачдылар. Бу арада даһа чох исраилли дүшмәни тәгиб етмәјә гошулду. Үмумиликдә 120 000 дүшмән әсҝәри гәтлә јетирилди (Һак. 7:19-25; 8:10).

¹⁴ Море тәпәсиндән тәхминән 6 километр јухарыда, Меҝиддодан вадинин о бири тајында Тавор дағы јерләшир. Јухарыдакы һадисәдән өнҹә бурада һаким Бараг 10 000 исраилли әсҝәри топлајыб, Кәнанын баш шәһәри Хасорун падшаһы Јавинин ордусуна гаршы дөјүшә чыхды. Онун ордусуна Сисра башчылыг едирди. Бу ордуда тәкәрләриндә мәһведиҹи узун дәрјазлар фырланан 900 дөјүш арабасы варды. Пис тәҹһиз едилмиш Исраил ордусу Тавор дағына топлашанда Сисранын ордусу да вадијә ахышды. О заман Јеһова «Сисраны вә бүтүн дөјүш арабалары илә ордусуну... мәғлуб етди». Ола билсин, ҝөзләнилмәдән јаған ҝүҹлү јағыш нәтиҹәсиндә Гишон чајынын сулары дашдығы үчүн арабалар палчыға батды. Исраиллиләр дүшмән ордусуну тамамилә мәһв етдиләр (Һак. 4:13-16; 5:19-21).

15. а) Мәзмурчу дуасында Јеһовадан нә хаһиш едирди? б) Аллаһын сонунҹу дөјүшүнүн ады бизә нәји хатырладыр?

¹⁵ Мәзмурчу Јеһоваја јалварыр ки, онун ҝүнләриндә Исраили мәһв етмәјә ҹан атан халглара да ејни шеји етсин. О дејир: «Башларына ҝәтир Мидјанлылара етдикләрини, Гишон вадисиндә Сисранын, Јавинин башына ҝәтирдикләрини. Онлар Ен-Дорда һәлак олдулар, торпаг үчүн пејин олдулар» (Мәз. 83:9, 10). Диггәтәлајигдир ки, Аллаһын Шејтанын дүнјасына гаршы сонунҹу мүһарибәси Һар-Меҝидон (мәнасы «Меҝиддо дағы») адланыр. Бу ад бизә Меҝиддо јахынлығында баш верән һәлледиҹи дөјүшләри хатырладыр. Јеһованын гәдимдә олан мүһарибәләрдәки зәфәри бизи әмин едир ки, О, Һар-Меҝидон дөјүшүндә дә мүтләг гәләбә чалаҹаг (Вәһј 16:13-16).

Јеһованын һөкмранлығынын бәраәт газанмасы үчүн дуа етмәлијик

16. Бу ҝүн дүшмәнләр неҹә рүсвај олурлар?

¹⁶ Бу «ахыр ҝүнләрдә» Јеһова Онун халгыны мәһв етмәк истәјәнләрин бүтүн ҹәһдләрини боша чыхарыр (2 Тим. 3:1). Нәтиҹәдә дүшмәнләр рүсвај олурлар. Бу, Мәзмур 83:16 ајәсиндә габагҹадан дејилмишди: «Ја Рәбб, онларын үзүнү хәҹаләтә бүрү, гој Сәнин исмини ахтарсынлар». Мүхтәлиф өлкәләрдә дүшмәнләрин Јеһованын Шаһидләрини сусдурмаг ҹәһдләри мүвәффәгијјәтсизлијә уғрамышдыр. Һәмин өлкәләрдә јеҝанә һәгиги Аллаһын хидмәтчиләринин сарсылмазлығы вә тәһәммүлү һәлим инсанлар үчүн шаһидлик олмушдур вә бир чохлары Јеһованын ‘исмини ахтармаға’ башламышлар. Вахтилә Јеһованын Шаһидләри амансызҹасына тәгиб олунан бир сыра өлкәләрдә һал-һазырда он минләрлә, һәтта јүз минләрлә инсан Јеһованы севинҹлә иззәтләндирир. Бу, Јеһова үчүн әсл зәфәр, дүшмәнләри үчүн исә рүсвајчылыгдыр! (Јеремја 1:19 ајәсини оху.)

17. Дүшмәнләрин тезликлә һансы имканы олмајаҹаг вә тезликлә һансы сөзләри јадымыза салаҹағыг?

¹⁷ Әлбәттә, тәгибләрин һәлә дә давам едәҹәјини билирик. Биз хош хәбәри һамыја, һәтта дүшмәнләримизә дә тәблиғ едирик (Мат. 24:14, 21). Амма Аллаһын халгынын дүшмәнләринин төвбә етмәк вә хиласа наил олмаг имканы тезликлә олмајаҹаг. Јеһованын адынын тәгдис олунмасы инсанларын хиласындан даһа ваҹибдир. (Језекел 38:23 ајәсини оху.) Јер үзүнүн бүтүн халглары Аллаһын халгыны мәһв етмәк үчүн бир јерә јығышанда биз мәзмурчунун дуасындан бу сөзләри јадымыза салаҹағыг: «Әбәдилик утанараг вәлвәләјә дүшсүнләр, рүсвај олуб, јох олсунлар» (Мәз. 83:17).

18, 19. а) Јеһованын һөкмранлығынын гаты дүшмәнләрини нә ҝөзләјир? б) Тезликлә Јеһованын һөкмранлығынын бәраәт газанаҹағы сәнә неҹә тәсир едир?

¹⁸ Јеһованын һөкмранлығынын гаты дүшмәнләри рүсвајчылыгла мәһв едиләҹәкләр. Аллаһын Кәламы ҝөстәрир ки, ‘Мүждәјә итаәт етмәјән’ инсанлар Һар-Меҝидонда мәһв едилиб «әбәди һәлак ҹәзасы чәкәҹәкләр» (2 Салон. 1:7-9). Онларын мәһви вә Јеһованын хидмәтчиләринин хиласы Јеһованын јеҝанә һәгиги Аллаһ олдуғунун инандырыҹы сүбуту олаҹаг. Бу бөјүк зәфәр јени дүнјада јаддашлардан силинмәјәҹәк. ‘Салеһ вә салеһ олмајанлар’ дириләндә Јеһованын бу бөјүк зәфәри һаггында өјрәнәҹәкләр (Һәв. иш. 24:15). Онлар јени дүнјада Јеһованын һөкмранлығы алтында јашамағын мүдриклик олдуғуна даир инандырыҹы сүбутлар ҝөрәҹәкләр. Онларын арасында һәлим оланлар Јеһованын јеҝанә һәгиги Аллаһ олдуғуна тез әмин олаҹаглар.

¹⁹ Севән сәмави Атамыз Өз садиг хидмәтчиләринә неҹә дә мөҹүзәли ҝәләҹәк һазырлајыб! Мәҝәр сән Јеһоваја дуа етмирсәнми ки, Јеһова мәзмурчунун дуасына сонунҹу ҹавабы версин: «[Сәнин дүшмәнләрин] әбәдилик утанараг вәлвәләјә дүшсүнләр, рүсвај олуб, јох олсунлар. Билсинләр ки, Сәнин исмин Рәбдир [Јеһовадыр], бүтүн јер үзүндә анҹаг Сән Һагг-Тааласан!» (Мәз. 83:17, 18).

[Һашијә]

Изаһ едә биләрсинизми?

• 83-ҹү мәзмур јазыланда Исраил һансы вәзијјәтлә гаршылашмышды?

• 83-ҹү мәзмурун јазычысыны даһа чох нә нараһат едирди?

• Бу ҝүн Шејтанын әдавәтинин һәдәфи кимләрдир?

• Јеһова Мәзмур 83:18 ајәсиндәки дуаја гәти ҹавабы неҹә верәҹәк?

[12-ҹи сәһифәдәки шәкил]

Бир мәзмурчуну 83-ҹү мәзмуру бәстәләмәјә нә тәшвиг етмишди?

[15-ҹи сәһифәдәки чәрчивә]

Гәдим Меҝиддо јахынлығындакы дөјүшләр ҝәләҹәјимизлә неҹә бағлыдыр?

Гишон чајы

Харошет-Һаггојим

Кармел дағы

Изреел вадиси

Меҝиддо

Таанак

Ҝилбоа дағы

Харод чешмәси

Море тәпәси

Ен-Дор

Тавор дағы

Галилеја дәнизи

Иордан чајы