Онлара јубанмадан ҝери дөнмәјә көмәк ет!
«Биз кимин јанына ҝедә биләрик? Әбәди һәјатын сөзләри Сәндәдир» (ЈӘҺ. 6:68).
1. Шаҝирдләрин чоху Исаны тәрк едәндә Петер нә деди?
БИР ДӘФӘ Иса Мәсиһин шаҝирдләринин чоху онун тәлиминдән наразы галараг ону тәрк етди. «Јохса сиз дә ҝетмәк истәјирсиниз?», — дејә о, һәвариләриндән сорушду. Петер ҹавабында деди: «Ја Рәбб, биз кимин јанына ҝедә биләрик? Әбәди һәјатын сөзләри Сәндәдир» (Јәһ. 6:51-69). Онларын ҝедәси башга јери јох иди. Артыг о вахт јәһуди дининдә «әбәди һәјатын сөзләри» јох иди вә әлбәттә ки, онлар јалан динин дүнја империјасы олан Бөјүк Бабилдә дә јохдур. Јеһованын сүрүсүндән узаглашмыш, лакин Ону разы салмаг истәјән һәр кәс үчүн ‘јухудан ајылыб’, сүрүјә гајытмағын әсл вахтыдыр (Ром. 13:11).
2. Мәхфи вә интизам тәдбирләри тәләб олунан мәсәләләрлә бағлы нәји јадда сахламаг лазымдыр?
2 Јеһова Исраилин итмиш гојунларына лагејд дејилди. (Језекел 34:15, 16 ајәләрини оху.) Ағсаггаллар да сүрүдән узаглашанлара көмәк етмәк истәјирләр вә бу онларын борҹудур. Көмәк истәјән гејри-фәал илә өјрәнмә кечирмәјә тәјин олунан тәблиғчи онун ҹидди ҝүнаһ ишләтдијиндән хәбәр тутубса, нә етмәлидир? Мәхфи вә интизам тәдбирләри тәләб олунан мәсәләләрлә бағлы мәсләһәт вермәк әвәзинә, тәблиғчи она ағсаггалларла данышмағы мәсләһәт ҝөрмәлидир. Әҝәр о буну етмәзсә, тәблиғчи өзү ағсаггаллара мәлумат вермәлидир (Лев. 5:1; Галат. 6:1).
3. Мәсәлдәки 100 гојуну олан адам итән бир гојунуну тапанда һансы һиссләри кечирди?
3 Әввәлки мәгаләдә 100 гојуну олан адам барәдә Исанын чәкдији мәсәлә тохунулмушду. Онлардан бири итәндә о, 99-ну гојуб, итән гојуну ахтармаға ҝедир. Ону тапанда кишинин севинҹинин һәдди-һүдуду олмур (Лука 15:4-7). Аллаһын сүрүсүндән узаглашанлардан бири ҝери дөнәндә биз дә ејни һиссләри јашајырыг. Мәһәббәтдән ирәли ҝәләрәк ағсаггаллар вә јығынҹағын диҝәр үзвләри, ола билсин, гејри-фәаллара нә вахтса баш чәкмишләр. Онлар да бу инсанларын ҝери дөнмәләрини вә Аллаһын көмәјини, мүдафиәсини вә хејир-дуаларыны өз үзәрләриндә һисс етмәләрини истәјирләр (Ганун. т. 33:27; Мәз. 91:14; Сүл. мәс. 10:22). Әҝәр онлар бир кимсәнин јығынҹаға гајытмасына көмәк етмәк истәјирләрсә, нә едә биләрләр?
4. Галатијалылара 6:2, 5 ајәләриндән нә өјрәнирик?
4 Һәмин инсана Јеһованын Өз гојунларыны севдијини вә биздән едә биләҹәјимиздән артыг шеј тәләб етмәдијини ҝөстәрмәк олар вә ола билсин, бу ону јығынҹаға гајытмаға тәшвиг етди. Аллаһын тәләбләринә Мүгәддәс Јазылары арашдырмаг, ҝөрүшләрә ҝәлмәк вә Падшаһлыг һаггында хош хәбәри тәблиғ етмәк дахилдир. Галатијалылара 6:2, 5 ајәләрини охујуб демәк олар ки, мәсиһчиләр бир-бирләринә ‘јүкләрини дашымаға’ көмәк етсәләр дә, Јеһованын гаршысында һәр кәс «өз мәсулијјәтинин јүкүнү дашыјаҹагдыр». Бизим әвәзимизә киминсә Аллаһа садиг галмасы мүмкүн дејил.
Бәлкә, сәбәб «һәјатын гајғылары»дыр?
5, 6. а) Гејри-фәал һәмиманлымыз үрәјини бошалданда она диггәтлә гулаг асмаг нәјә ҝөрә ваҹибдир? б) Гејри-фәал һәмиманлыларына јығынҹаға ҝәлмәмәләринин онлара пис тәсир ҝөстәрдијини анламаға неҹә көмәк едә биләрсән?
5 Гејри-фәал һәмиманлымыз үрәјини ағсаггаллара вә диҝәр јеткин тәблиғчиләрә бошалданда онлар диггәтлә гулаг асмалыдырлар ки, онун һансы көмәјә еһтијаҹы олдуғуну мүәјјән едә билсинләр. Тәсәввүр ет ки, сән ағсаггалсан вә башы «һәјатын гајғылары»на гарышыб јығынҹаг ҝөрүшләринә ҝәлмәјән бир аиләјә баш чәкирсән (Лука 21:34). Мадди чәтинликләр вә ја аилә гајғыларынын артмасы онларын руһани јухуја ҝетмәләринә сәбәб ола биләр. Ола билсин, онлар јүкләрини бир аз јүнҝүлләшдирмәк истәдикләрини дејирләр. Амма сән дејә биләрсән ки, бу, вәзијјәтдән чыхыш јолу дејил. (Сүлејманын мәсәлләри 18:1 ајәсини оху.) Онлардан нәзакәтлә сорушмаг олар: «Ҝөрүшләрә ҝәлмәји дајандырандан бәри сиз даһа да хошбәхт олмусунузму?», «Аилә һәјатыныз јахшылашыбмы?», «Јеһоваја ҝүвәнмәјин ҝәтирдији севинҹи һәлә дә дујурсунузму?» (Неһ. 8:10).
6 Бу суалларын үзәриндә дүшүнмәләри, бәлкә, онлара јығынҹагла үнсијјәти кәсмәләринин руһани вәзијјәтләринә вә хошбәхтликләринә пис тәсир етдијини баша дүшмәјә көмәк едәҹәк (Мат. 5:3; Ибр. 10:24, 25). Севинҹләрини итирмәләринә хош хәбәри тәблиғ етмәдикләринин дә сәбәб олдуғуну анламаларына көмәк ет (Мат. 28:19, 20). Бәс гејри-фәалларын өзләри һансы аддымлары ата биләрләр?
7. Сүрүдән узаглашанлары нәјә тәшвиг едә биләрик?
7 Иса демишди: «Диггәтли олун ки, үрәкләриниз гарынгулулуг вә сәрхошлугла, бу һәјатын гајғылары илә ағырлашмасын... Буна ҝөрә бүтүн баш верәҹәк бу фәлакәтләрдән гачынмаға лајиг олмаг... үчүн, һәр ан дуа един вә ајыг олун» (Лука 21:34-36). Сүрүдән узаглашанлары, лакин итирдикләри хошбәхтлији гајтармаг истәјәнләри Аллаһдан мүгәддәс руһ вә көмәк диләмәјә, һәмчинин дуаларына әсасән давранмаға тәшвиг едә биләрик (Лука 11:13).
Бәлкә, онлары нәсә бүдрәдиб?
8, 9. Бүдрәјән инсанын дүзҝүн гәнаәтә ҝәлмәсинә ағсаггал неҹә көмәк едә биләр?
8 Гејри-камил инсанлар арасында фикир ајрылығы гачылмаздыр, бу да кимисә бүдрәдә биләр. Бәзиләринин исә бүдрәмәсинә јығынҹағын мәсул үзвләриндән биринин Мүгәддәс Китаб принсипләринә зидд давранышы сәбәб ола биләр. Әҝәр киминсә гејри-фәал олмасына белә шејләр сәбәб олубса, она баш чәкән ағсаггал вурғулаја биләр ки, Јеһова һеч кими бүдрәтмир. Белә исә, нәјә ҝөрә бир кимсә Аллаһла вә Онун халгы илә мүнасибәтләринә сон гојмалыдыр? Мәҝәр Аллаһа хидмәтини дајандыран әмин олмалы дејилми ки, «бүтүн дүнјанын Һакими» баш верәнләрдән хәбәрдардыр вә О, мәсәләни өз јолуна гојаҹаг? (Јар. 18:25; Колос. 3:23-25). Адамын ајағы илишиб јыхылыбса, тәбии ки, белә вәзијјәтдә галмаг истәмәјәҹәк, һеч олмаса ајаға дурмаға чалышаҹаг.
9 Гејри-фәала руһани көмәклик ҝөстәрмәјә чалышан ағсаггал гејд едә биләр ки, бәзиләри бүдрәмәләринә сәбәб олан шејләрин елә дә ҹидди олмадығыны вахт өтдүкҹә баша дүшмүшләр. Һәтта, ола билсин, онлары бүдрәдән вәзијјәт чохдан дүзәлиб. Әҝәр инсанын бүдрәмәсинә нә вахтса она гаршы ҝөрүлән интизам тәдбирләри сәбәб олубса, дуа едиб ҝөтүр-гој етмәк она анламаға көмәк едә биләрик ки, алдығы мәсләһәтләр јериндә олмушду вә бунун ону бүдрәтмәсинә јол вермәли дејилди (Мәз. 119:165; Ибр. 12:5-13).
Бәлкә, проблем һансыса тәлимлә бағлы олуб?
10, 11. Мүгәддәс Китабын һансыса тәлимини башга ҹүр баша дүшәнә неҹә көмәк едә биләрик?
10 Ола билсин, бәзиләри Мүгәддәс Китабын һансыса тәлими илә разылашмадыгларына ҝөрә Аллаһын сүрүсүнү тәрк етмишләр. Мисир әсарәтиндән азад едилән исраиллиләр Аллаһын онлар үчүн етдији ‘әмәлләри тез унутдулар’ вә «Ондан мәсләһәт алмадылар» (Мәз. 106:13). «Садиг вә ағыллы гул»ун бизи јүксәккејфијјәтли руһани гида илә тәмин етдијини гејри-фәал һәмиманлымыза хатырлатмағын көмәји дәјә биләр (Мат. 24:45). О, һәгигәти мәһз бунун сајәсиндә өјрәнмишди. Елә исә, нәјә ҝөрә о, һәгигәт јолуна гајыдыб, бу јолда гәтијјәтлә јеримәсин? (2 Јәһ. 4).
11 Аллаһын сүрүсүндән узаглашан инсанлара көмәк етмәјә чалышан ағсаггал Исанын тәлимләринин бириндән наразы олуб ону тәрк едән шаҝирдләрин нүмунәсини чәкә биләр (Јәһ. 6:53, 66). Онлар Мәсиһ вә онун садиг давамчылары илә әлагәни кәсмәклә руһани шејләрә ҝөрә миннәтдарлыгларыны вә севинҹләрини итирдиләр. Бәс јығынҹағы тәрк едәнләр руһани гиданын бол олдуғу башга јер тапыблармы? Јох, чүнки белә бир јер јохдур!
Бәлкә, сәбәб ҹидди ҝүнаһ олуб?
12, 13. Јығынҹагдан узаглашан кәс ҹидди ҝүнаһ ишләтдијини дејирсә, она неҹә көмәк етмәк олар?
12 Бәзиләри ҹидди ҝүнаһ уҹбатындан тәблиғ етмәји вә јығынҹаг ҝөрүшләринә ҝәлмәји дајандырмышлар. Ола билсин, онлар фикирләширләр ки, етдикләри ҝүнаһы ағсаггаллара ачсалар, јығынҹагдан кәнар едиләҹәкләр. Амма әмәлләриндән әл чәкиб, сәмими-гәлбдән төвбә едибләрсә, бу онларла баш вермәјәҹәк (2 Кор. 7:10, 11). Баҹы-гардашлар ону севинҹлә гаршылајаҹаг, ағсаггаллар исә лазыми руһани көмәји ҝөстәрәҹәкләр.
13 Тутаг ки, бир јеткин тәблиғчи кими, сәнә гејри-фәал баҹыја вә ја гардаша көмәк етмәк тапшырылыб. Әҝәр о, ҹидди ҝүнаһ ишләтдијини ачыб дејәрсә, сән нә етмәлисән? Јухарыда дејилдији кими, тәфсилатларла марагланмагданса, она ағсаггаллара мүраҹиәт етмәји мәсләһәт ҝөрмәк лазымдыр. Әҝәр о буну етмәк истәмирсә, белә мәсәләләрә даир Аллаһын вердији ҝөстәришләрә әсасән давранмагла сән Јеһованын адына вә јығынҹағын рифаһына ҝөрә нараһат олдуғуну ҝөстәрәҹәксән. (Левилиләр 5:1 ајәсини оху.) Ағсаггаллар јығынҹаға гајытмаг вә Аллаһын ирадәсинә ујғун јашамаг истәјәнләрә неҹә көмәк етмәји јахшы билирләр. Мәһәббәтдән ирәли ҝәләрәк интизам тәдбирләри ҝөрмәк лазым ҝәлә биләр (Ибр. 12:7-11). Әҝәр инсан Аллаһа гаршы ҝүнаһ ишләтдијини бојнуна алырса вә әмәлиндән әл чәкиб һәгигәтән дә төвбә едирсә, ағсаггаллар она көмәк едәҹәк вә Јеһова ону бағышлајаҹаг (Јешаја 1:18; 55:7; Јаг. 5:13-16).
Оғулун гајытмасы севинҹ ҝәтирир
14. Исанын гејб олмуш оғул мәсәлини өз сөзләринизлә данышын.
14 Јығынҹагдан узаглашана көмәк ҝөстәрмәк үчүн тәјин олунан тәблиғчи онун диггәтини Исанын Лука 15:11-24 ајәләриндәки мәсәлинә јөнәлдә биләр. Мәсәлдәки ҝәнҹ өз атасындан алдығы мирасы позғун һәјат сүрәрәк исраф едир. Нәтиҹәдә белә һәјат она ијрәнҹ ҝәлир. О аҹ галыр, еви үчүн дарыхыр вә евләринә гајытмаг гәрарына ҝәлир. Һәлә узагда икән атасы ону ҝөрүр, дуруб јанына гачыр вә бојнуна сарылыб өпүр. Атанын севинҹинин һәдди-һүдуду јохдур. Бу мәсәлин үзәриндә дүшүнмәк јығынҹагдан узаглашан инсаны ҝери дөнмәјә тәшвиг едә биләр. Бу систем тезликлә мәһв едиләҹәји үчүн о, јубанмадан «евинә» — јығынҹаға гајытмалыдыр.
15. Бәзиләри нә үчүн јығынҹагдан узаглашырлар?
15 Јығынҹагдан узаглашанларын әксәријјәти һәмин оғул кими бирдән ҝетмир. Бәзиләри илә бу, гајығын саһилдән јаваш-јаваш узаглашдығы кими, тәдриҹән баш верир. Ҝүндәлик гајғылар диҝәрләринин һәјатыны о гәдәр ағырлашдырыр ки, онлар Јеһова илә мүнасибәтләринә мәһәл гојмурлар. Башгаларынын исә јығынҹағы тәрк етмәләринә сәбәб киминсә онлары бүдрәтмәсинә јол вермәләри вә ја Мүгәддәс Китабын һансыса тәлими илә разылашмамаларыдыр. Бәзиләри исә мәсиһчиләрә јарашмајан һәрәкәтләр едирләр. Һәр вәзијјәтә даир арашдырдығымыз мәсләһәтләр сәнә көмәк едәҹәк ки, бу вә ја диҝәр сәбәбләр уҹбатындан сүрүнү тәрк етмиш һәмиманлыларымыза, һәлә ки ҝеҹ дејил, ҝери гајытмаларына јардым едә биләсән.
«Евинә хош ҝәлдин, оғул!»
16-18. а) Бир ағсаггал узун илләр гејри-фәал олан гардаша неҹә көмәк етди? б) Бу гардаш нәјә ҝөрә гејри-фәал олду, она һансы көмәк ҝөстәрилди вә јығынҹагда неҹә гаршыланды?
16 Бир мәсиһчи ағсаггал дејир: «Јығынҹағымызын ағсаггаллар шурасы гејри-фәаллара баш чәкмәјә ҹидди јанашыр. Бир вахтлар Мүгәддәс Китабы өјрәтдијим вә һәгигәтә ҝәлмәсинә көмәк етдијим бир гардаш фикримдән чыхмырды. О, 25 илә јахын гејри-фәал олмушду вә чох чәтин вәзијјәтдә иди. Буна ҝөрә дә, Мүгәддәс Китаб принсипләрини тәтбиг етмәјин фајдасыны изаһ етдим. Бир гәдәр сонра о, Падшаһлыг Залына ҝәлмәјә башлады вә сүрүјә гајытмаг гәтијјәтини мөһкәмләндирмәк үчүн Мүгәддәс Китабы јенидән өјрәнмәјә разылашды».
17 Һәмин гардаш нә үчүн гејри-фәал олмушду? О етираф едир: «Фикрими руһани ишләрә ҹәмләшдирмәк әвәзинә, дүнјәви мәгсәдләрә ҹан атмаға башладым. Сонра шәхси өјрәнмәми, хидмәтими дајандырдым вә ҝөрүшләрә ҝетмирдим. Бир вахт анладым ки, артыг јығынҹағын бир һиссәси дејиләм. Лакин бир ағсаггалын мәнә шәхсән ҝөстәрдији сәмими марағы ҝери дөнмәјимә көмәк етди». Онунла Мүгәддәс Китаб өјрәнмәси бәрпа олундугдан сонра проблемләри ҝетдикҹә азалды. О давам едир: «Мән анладым ки, һәјатымда Јеһованын вә Онун тәшкилатынын севҝиси вә рәһбәрлији чатышмырды».
18 Бәс баҹы-гардашлар ону неҹә гәбул етдиләр? О дејир: «Мән өзүмү Иса Мәсиһин мәсәлиндәки гејб олмуш оғул кими һисс едирдим. Отуз ил бундан әввәл јығынҹагда ҝөрдүјүм вә һәлә дә иманда ҝүҹлү олан бир јашлы баҹы: «Евинә хош ҝәлдин, оғул!» — дејә мәни сәмими гаршылады. Бу мәнә хош тәсир бағышлады. Мән евимә гајытмышдым. Һәмин ағсаггалын вә бүтүн јығынҹағын мәнә ҝөстәрдији мәһәббәтә, сәмимилијә, сәбирә вә мараға ҝөрә чох миннәтдарам. Онларын Јеһоваја вә јахынларына олан мәһәббәти сүрүјә гајытмағыма көмәк етди».
Тәшвиг ет ки, онлар ләнҝимәдән јығынҹаға гајытсынлар!
19, 20. Гејри-фәал тәблиғчиләри јубанмадан јығынҹаға гајытмаға неҹә тәшвиг едә вә Јеһованын биздән ҝүҹүмүздән артыг шеј ҝөзләмәдијини неҹә ҝөстәрә биләрсән?
19 Биз бу системин ахыр ҝүнләриндә јашајырыг вә онун сону олдугҹа јахындыр. Буна ҝөрә, гејри-фәаллары ҝөрүшләрә ҝәлмәјә вә буну ләнҝимәдән етмәјә тәшвиг ет. Онлара буну хатырлат: Шејтан онларын Аллаһла мүнасибәтләрини позмаға чалышыр вә истәјир ки, онлар һәгиги ибадәти атмагла һәјат гајғыларынын азалаҹағыны фикирләшсинләр. Бу баҹы-гардашлары әмин едә биләрсән ки, јалныз Исанын садиг давамчысы олмагла әсл раһатлығы тапаҹаглар. (Матта 11:28-30 ајәләрини оху.)
20 Гејри-фәаллара хатырлат ки, Аллаһ биздән ҝүҹүмүздән артыг шеј ҝөзләмир. Лазарын баҹысы Мәрјәм Исанын өлүмүндән бир аз габаг онун башына баһалы әтирли јағ төкдүјүнә ҝөрә мүһакимә олунанда Иса деди: «Гадындан әл чәкин... [о,] әлиндән ҝәләни етди» (Марк 14:6-8). Иса мәбәдин хәзинәсинә чох кичик мигдарда пул ианә едән јохсул дул гадыны тәрифләди. Бу гадын да әлиндән ҝәләни етди (Лука 21:1-4). Әксәријјәтимиз ҝөрүшләрә ҝәлә вә Падшаһлыг һаггында хош хәбәри тәблиғ едә билирик. Јеһованын көмәји илә гејри-фәал оланларын әксәријјәти дә буну едә биләр.
21, 22. Јеһоваја јенидән үз тутанлары нәјә әмин едә биләрсән?
21 Сүрүдән узаглашмыш адам гардаш-баҹыларла јенидән ҝөрүшмәјә ҹәсарәт етмирсә, гејб олмуш оғул евә гајыданда атасынын кечирдији севинҹи она хатырлада биләрсән. Киминсә јығынҹаға гајытмасы баҹы-гардашлар арасында ејни севинҹә сәбәб олур. Онлары индидән Иблисә мүгавимәт ҝөстәрмәјә вә Аллаһа јахынлашмаға тәшвиг ет (Јаг. 4:7, 8).
22 Јеһоваја јенидән үз тутанлар севинҹлә гаршыланырлар (Мәрс. 3:40). Вахтилә Аллаһа хидмәт етмәләри онлара бөјүк севинҹ ҝәтирмишди. Сүрүјә јубанмадан гајыданлар ҝәләҹәкдә бол хејир-дуалар алаҹаглар!
Неҹә ҹаваб верәрдиниз?
• Бүдрәјәрәк гејри-фәал олмуш мәсиһчијә неҹә көмәк едә биләрик?
• Мүгәддәс Китабын һансыса тәлими илә разылашмадығына ҝөрә Аллаһын сүрүсүнү тәрк едәнә неҹә көмәк етмәк олар?
• Јығынҹаға гајытмаға ҹәсарәт етмәјәнә неҹә көмәк етмәк олар?
[13-ҹү сәһифәдәки шәкил]
Гејри-фәал олмуш һәмиманлын үрәјини бошалданда диггәтлә гулаг ас
[15-ҹи сәһифәдәки шәкил]
Исанын гејб олмуш оғул мәсәли үзәриндә дүшүнмәк бәзиләрини сүрүјә гајытмаға тәшвиг едә биләр