Инсандан јох, Аллаһдан горхмағын беш сәбәби

ҜӘНҸ оғланы һејрәт бүрүмүшдү. О, инди ешитдикләрини һеч ағлындан белә кечирмәзди. Ики нәфәр Јеһованын Шаһиди илә етдији сөһбәт санки ҝөзләрини ачды. Аллаһын нә үчүн әзаблара јол вермәси илләрдир ону нараһат едирди, анҹаг инди Мүгәддәс Китабдан буна ајдын ҹаваб алды. О, һеч тәсәввүр едә билмәзди ки, Мүгәддәс Китабда бу гәдәр дәјәрли вә үрәкохшајан мәлумат вар.

Гонаглар ҝедәндән бир нечә дәгигә сонра, ев саһибәси ҝурулту илә ичәри ҝириб, гәзәблә сорушду: «Бу ҝәләнләр ким иди?»

Тәәҹҹүбдән донуб галан оғлан билмәди нә десин.

«Мән јахшы билирәм онлар кимдир. Бир дә онлары ичәри бурахсан, шәлә-күләни јығышдырыб, өзүнә башга ев ахтара биләрсән!» — дејә о бағырды.

Гадын гапыны чырпыб ҝетди.

Мәсиһин һәгиги давамчыларыны тәгибләр ҝөзләјир

Ҝәнҹ оғланын башына ҝәлән һеч дә надир һадисә дејил. Аллаһын Кәламы олан Мүгәддәс Китабда изаһ едилир: «Аллаһ јолунда Мәсиһ Исаја бағлы олараг јашамаг истәјәнләрин һамысы да тәгибә мәруз галаҹагдыр» (2 Тимотејә 3:12). Үмуми ҝөтүрдүкдә, һәгиги мәсиһчиләрә рәғбәт бәсләнилмир вә һеч вахт да бәсләнилмәмишдир. Ахы нә үчүн? Һәвари Јәһја өз һәмиманлыларына демишди: «Билирик ки, биз Аллаһданыг, бүтүн дүнја исә шәририн һакимијјәти алтындадыр». Һәмчинин башга ајәдә Шејтан Иблис «нәрә чәкән вә ашырмаг үчүн кимисә ахтаран аслан» кими тәсвир олунур (1 Јәһја 5:19; 1 Петер 5:8). Инсан горхусу Шејтанын истифадә етдији ән ҝүҹлү силаһлардан биридир.

Һәтта баҹардығы гәдәр һамыја јахшылыг едән вә һеч бир ҝүнаһа јол вермәјән Иса Мәсиһ дә тәнәләр вә тәгибләр һәдәфинә чеврилмишди. О гејд етмишди: «Мәнә сәбәбсиз нифрәт етдиләр» (Јәһ. 15:25). Өлүмүндән әввәлки ҝеҹә о, шаҝирдләрини бу сөзләрлә тәгибләрә һазырлады: «Әҝәр дүнја сизә нифрәт едәрсә, билин ки, сиздән әввәл Мәнә нифрәт етмишдир. Мәним сизә сөјләдијим сөзү хатырлајын: “Гул ағасындан үстүн дејилдир”. Әҝәр Мәни тәгиб етдиләрсә, сизи дә тәгиб едәҹәкләр» (Јәһја 15:18, 20).

Бу сәбәбдән, бир чохлары һәгиги ибадәтин тәрәфинә кечмәјә тәрәддүд етмишләр. Мүгәддәс Китабда бир дәфә Исаны ахтаранлар һаггында дејилир: «Лакин јәһуди идарәчиләрин горхусундан кимсә Онун һаггында ачыг сөз сөјләмирди» (Јәһја 7:13; 12:42). Һәмин ҝүнләрдәки дин рәһбәрләри Мәсиһә иман ҝәтирән һәр кәси синагогдан говмагла һәдәләјирдиләр. Беләликлә, инсан горхусу бир чохларына мәсиһчи олмаға мане олмушду (Һәвариләрин ишләри 5:13).

Сонралар, мәсиһчи јығынҹағы тәсис олунанда Јерусәлимдәки јығынҹаға гаршы «бөјүк тәгиб» башладығы һагда охујуруг (Һәвариләрин ишләри 8:1). Мәсиһчиләр әслиндә бүтүн Рома империјасында тәгибләрә мәруз галырдылар. Ромадакы нүфузлу инсанлар һәвари Павелә демишдиләр: «Бу тәригәтә гаршы һәр јердә сөз сөјләнир» (Һәвариләрин ишләри 28:22). Бәли, һәгиги мәсиһчиләри һәр јердә тәгиб едирдиләр.

Һәтта инди дә, Шејтан бир чохларынын Мәсиһин һәгиги давамчысы олмасына мане олмаг үчүн инсан горхусундан силаһ кими истифадә едир. Јеһованын Шаһидләри илә Мүгәддәс Китабы өјрәнән сәмими инсанлар мәктәбдә, ишдә, гоншулар вә дост-танышлар тәрәфиндән тәгиб вә истеһзалара мәруз галырлар. Онлар һөрмәтләрини, достларыны, јахуд мадди дәстәкләрини итирәҹәкләриндән горха биләрләр. Бәзи кәнд јерләриндә әкинчиләри гоншуларын онлара бичин вахты көмәк етмәкдән вә мал-гараны горумагдан бојун гачыраҹаглары горхуда биләр. Анҹаг бу ҹүр горхулара бахмајараг, милјонларла инсан Аллаһа ҝүвәнмәјә вә Иса Мәсиһи тәглид едәрәк Аллаһын Кәламына ујғун јашамаға гәти гәрарлыдыр. Белә даврандыглары үчүн Јеһова онлары хејир-дуаландырыр.

Нә үчүн инсандан јох, Аллаһдан горхмалыјыг

Мүгәддәс Китаб бизи инсандан јох, Аллаһдан горхмаға тәшвиг едир. Орада дејилир: «Рәбб горхусу һикмәтин башланғыҹыдыр» (Мәзмур 111:10). Бу, дәһшәтли горху дејил, Һәјатверәнимизи разы салмамаға даир нараһатчылыг һиссидир. Белә горху мәһәббәтлә сых бағлыдыр. Бәс нә үчүн биз инсандан јох, Аллаһдан горхмалыјыг? Ҝәлин бунун беш сәбәбини нәзәрдән кечирәк.

 1 Јеһова ән гүдрәтли Шәхсдир. Јеһова истәнилән инсандан гат-гат ҝүҹлүдүр. Ондан горхмагла биз ҝөзүндә ‘милләтләр ведрәдә бир дамла су кими’ олан Күлли-Ихтијарын тәрәфини тутуруг (Јешаја 40:15). Аллаһ һәр шејә гадир олдуғундан Она садиг галанлара гаршы ишләнән истәнилән силаһы дәф етмәјә ҝүҹү вар (Јешаја 54:17). Һәм дә кимин әбәди һәјаты алмаға лајиг олдуғуну О мүәјјән етдијиндән, Аллаһ вә Онун ирадәси һаггында өјрәнмәјимизә һеч бир шејин мане олмасына јол вермәмәклә биз мүдрик давранмыш олуруг (Вәһј 14:6, 7).

 2 Аллаһ бизә көмәк едиб, горујаҹаг. Мүгәддәс Китабда Сүлејманын мәсәлләри 29:25 ајәсиндә дејилир: «Инсандан горхан өзүнү тәләјә салар, амма Рәббә ҝүвәнән архајын јашар». Инсан горхусу тәләдир, чүнки о бизи Аллаһа иманымызы ачыг бәјан етмәкдән чәкиндирә биләр. Аллаһ хилас етмәјә гадир олдуғуна бизи белә әмин едир: «Горхма, чүнки Мән сәнинләјәм, дәһшәтә ҝәлмә, чүнки Аллаһын Мәнәм. Сәни гүввәтләндирәҹәјәм, сәнә көмәк едәҹәјәм. Садиг сағ әлимлә Сәнә дајаг олаҹағам» (Јешаја 41:10).

 3 Аллаһ Она јахынлашанлары севир. Һәвари Павел нөвбәти тәсирли сөзләри јазмышды: «Мән әминәм ки, нә өлүм, нә һәјат, нә мәләкләр, нә рәјасәтләр, нә гүдрәтләр, нә индики, нә ҝәләҹәк шејләр, нә һүндүрлүк, нә дәринлик, нә дә башга мәхлуг бизи Рәббимиз Мәсиһ Исада олан Аллаһын мәһәббәтиндән мәһрум етмәјә гадир олмајаҹагдыр» (Ромалылара 8:37-39). Әҝәр биз һәгигәти өјрәниб, Аллаһа итаәт етсәк, Каинатын Һөкмдарынын сарсылмаз мәһәббәтини өз үзәримиздә һисс едәрик. Бу неҹә дә бөјүк шәрәфдир!

 4 Аллаһын бизим үчүн етдији һәр шеји јүксәк гијмәтләндиририк. Јеһова бизә һәјат верән Јарадандыр. Бундан әлавә, О бизи нәинки һәјат үчүн зәрури олан, һәм дә һәјатымызы мәмнунедиҹи вә рәнҝарәнҝ едән шејләрлә тәмин едир. Доғрудан да, О, һәр бир јахшы бәхшишин мәнбәјидир (Јагуб 1:17). Аллаһын мәһәббәтини гијмәтләндирән садиг Давуд јазмышдыр: «Ја Рәбб Аллаһым... Бизә аид харигәләрин, дүшүнҹәләрин чохдур... Сајы-һесабы јохдур» (Мәзмур 40:5).

 5 Бизи тәгиб едәнләрин бәзиләри дәјишә биләр. Сиз ҝүзәштә ҝетмәклә јох, Аллаһы иззәтләндирмәјә вә севмәјә гәти гәрарлы олмагла тәгиб едәнләрә көмәк едә биләрсиниз. Исанын гоһумларына диггәт јетирәк. Әввәлҹә гоһумлары иман етмәјәрәк, онун ағлыны итирдијини дүшүнүрдүләр (Марк 3:21; Јәһја 7:5). Лакин Исанын өлүб дирилмәсиндән сонра онларын чоху имана ҝәлди. Исанын өҝеј гардашлары Јагуб вә Јәһуда һәтта Мүгәддәс Китабын јазылмасында иштирак етди. Һәмчинин амансыз тәгибчи олан Шаул да сонралар һәвари Павел олду. Бу ҝүн бизи инҹидән бәзи инсанлар ҹәсарәтли мөвгејимиз сајәсиндә баша дүшә биләрләр ки, биздә олан Мүгәддәс Китаб һәгигәтидир (1 Тимотејә 1:13).

Мәсәлән, Африкадан олан Абераш адлы бир гадын һәгигәти тапмаг үчүн дуа едирди. Јеһованын Шаһидләри илә Мүгәддәс Китабы өјрәнмәјә башлајандан сонра о, аилә үзвләри вә дин рәһбәрләри тәрәфиндән кәскин мүгавимәтә мәруз галды. Өјрәнмәјә башлајан бир нечә гоһуму инсан горхусундан ҝери чәкилди. Анҹаг о, јалварыб Аллаһдан ҝүҹ вә ҹәсарәт диләјирди. Бир гәдәр сонра Абераш Јеһованын Шаһиди кими вәфтиз олунду. Бу нә илә нәтиҹәләнди? Гоһумларындан сәккизи бундан ҹәсарәтләниб, Мүгәддәс Китабы јенидән өјрәнмәјә башладылар вә һазырда јахшы руһани наилијјәтләр едирләр.

Инсан горхусуна галиб ҝәлә биләрсиниз

Инсан горхусунун гурбаны олмамаг үчүн әлиниздән ҝәлән һәр шеји един ки, Аллаһа мәһәббәтинизи мөһкәмләндирәсиниз. Сиз буна Мүгәддәс Китабы өјрәнмәклә вә Ибраниләрә 13:6 кими ајәләр үзәриндә дүшүнмәклә наил ола биләрсиниз. Орада дејилир: «Рәбб мәнә јардымчыдыр, мән горхмарам; инсан мәнә нә едә биләр?» Нәјә ҝөрә инсандан јох, Аллаһдан горхмағын дүзҝүн вә мүдрик һәрәкәт олдуғуну һеч вахт јаддан чыхартмајын.

Мүгәддәс Китабдан өјрәндикләринизи һәјатынызда тәтбиг етмәјин ҝәтирдији бол хејир-дуалары да һәмишә јадда сахлајын. Сиз һәјати ваҹиб суаллара гәнаәтбәхш ҹаваб тапаҹагсыныз. Һәјатын чәтинликләринә синә ҝәрмәк үчүн практики мүдриклик газанаҹагсыныз. Буҝүнкү гармагарышыг вәзијјәтә бахмајараг, ҝөзәл үмидлә јашајаҹагсыныз. Һәмчинин истәдијиниз вахт дуада Күлли-Ихтијар Аллаһа мүраҹиәт едә биләҹәксиниз.

Һәвари Јәһја јазмышдыр: «Дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр» (1 Јәһја 2:17). Инди мөһкәм дурмағын вә Аллаһ горхусунда јеримәјин әсил вахтыдыр. Инсан горхусуна әјилмәк әвәзинә, Аллаһын чағырышына сәс вермәји сечә биләрсиниз: «Оғлум, һикмәтли ол, гој гәлбим севинсин, онда мәни утандырана ҹаваб верә биләрәм» (Сүлејманын мәсәлләри 27:11). Бу неҹә дә бөјүк үстүнлүкдүр!

Унутмајын, һеч бир инсан сизә Аллаһын Ондан горханлара верәҹәји шеји верә билмәз: «Тәвазөкарлығын вә Рәбб горхусунун нәтиҹәси сәрвәт, шәрәф, һәјатдыр» (Сүлејманын мәсәлләри 22:4).

[23-ҹү сәһифәдәки шәкил]

Аберашын ҹәсарәти сајәсиндә сәккиз гоһуму Мүгәддәс Китабы өјрәнмәјә давам едир